«Мы з Санькам — артылерысты...»

Мы з Санькам — артылерысты... (fb2) - Мы з Санькам — артылерысты... (Мы з Санькам... - 3) 1007K скачать: (fb2) - (epub) - (mobi) - Иван Киреевич Серков

Выпуск выдання ажыццёўлены па заказе i пры фiнансавай падтрымцы Мiнiстэрства iнфармацыi Рэспублiкi Беларусь

© Сяркоў I.К., нашчадкi, 2015

© Афармленне. УП «Мастацкая лiтаратура», 2015

Мы з Санькам — артылерысты...

Взвейтесь, соколы, орлами,

Полно горе горевать.

Даўняя салдацкая песня

Шпакi

— Ну, пішыце,— скончыў бацька развітанкі, паціснуў нам з Санькам рукі, як роўні, і, тузануўшы вожкі, крыкнуў на Стрыгунка:— Но-о! Развесіў вушы!

Парожнія калёсы лёгка пакаціліся прэч, узнімаючы густы пыл, а мы засталіся адны на дарозе ў жыце. I тут мне чамусыіі ўспомнілася леташняе-пазалеташняе, тое, як бабка аднойчы сказала: «У, ідал, сэрца ў цябе каменнае». А навёў тады бабульку на такое адкрыццё наш парсючок Дзюнька. Такой скацініны, як ён, не бачыў свет. Худы і цыбаты, замурзаны да самых вушэй пасля бясконцых купанняў у лужыне, ён умеў бегаць так, што і сабака не дакажа. А кемлівы быў, а хітры, такога і сярод нас, хлопцаў, яшчэ трэба пашукаць. Усе дзіркі ў сваім плоце і ў суседскіх ён ведаў назубок. Ад гэтага Дзюнькі мой малодшы брат Глыжка выў воўкам: не дагнаць жа, сабаку, не пераняць, хоць на ланцугу трымай. I вось гэтай вясной не паспелі мы пасадзіць бульбу, як Дзюнька, прасачыўшы, што ўсе пайшлі абедаць, прабраўся ў гарод і пачаў яе капаць, не чакаючы ўраджаю. Ну і бегатня тады была па нашых пасевах, ну і аблава! Хто з чым, а я з хлудам, насіліся мы за нахабнікам да сёмага поту. Бабулька праклiнала яго на чым свет стаіць: і каб ён здох, і каб апруцянеў, і каб яго пераехала, бо так ён можа загнаць каго хочаш у магілу. А парсюку — хоць бы што, у яго быццам вочы завязаны, ні варотцаў, знарок адчыненых для яго, ні сваіх дзірак у плоце не бачыць, гойсае сабе па градах уподбрыкі ды весела рохкае, задраўшы лыч угару. Дражніцца, халера. Вось і ўцэліў я тады яму хлудам па рэбрах, аж той заекатаў немым голасам. I ўмомант дзе і дзірка знайшлася на вуліцу, толькі плот затрашчаў! Вось тады, крыху аддыхаўшыся пасля бегатні, бабка і сказала: «У, ідал, сэрца ў цябе каменнае. А калі б самога так, соладка было б?»

Ды за што ж мяне? Што гэта — я зглуміў паўрада бульбы сваім лычам, я спаганіў грады? Сем пятніц у яе на тыдні: то — каб ён здох, то — у мяне сэрца каменнае. Я разгневаўся, кінуў-рынуў усё і пайшоў да Санькі гуляць. А Санька мяне супакоіў. Аказваецца, што каменнае сэрца — гэта не так і дрэнна, калі той камень — не проста дзічак, а крэмень. Крэмень — камень асаблівы: у ім жыве агонь. Нездарма ж, калі ўрэжаш па ім зломкам сталёвага рашпіля, дык снопам сыплюцца іскры. А чорны ён таму, што, мабыць, у агні нарадзіўся. У сапраўдных хлопцаў, калі яны — не цюхі-мацюхі, і павінны быць крамянёвыя сэрцы. Так суцяшаў Санька, і мне гэта нават спадабалася. Цяпер было зразумела, чаму мы з сябрам такія цвёрдыя. У нашай з ім цвёрдасці не раз маглі пераканацца і Глёкава Каця, і Сонька-Кучараўка, калі мы, вяртаючыся са школы, іншы раз штурхалі іх у крапіву, каб не былі такімі разумніцамі. Мы маглі па сто гадоў і не глядзець у іхні бок, калі яны адмаўляліся танцаваць з намі «Сербіянку» пад Косцікаву балалайку. I было з-за чаго ім нос задзіраць перад намі, з-за чаго дзьмуцца — з-за аднаго-двух хрушчоў, якіх мы дзеля смеху іншы раз кідалі ім за каўнерыкі кофтачак. Хіба толькі з імі мы так жартавалі? Дык іншыя ж не дзьмуліся, а то — цацы!

I вось цяпер, калі бацькаў воз усё болей і болей аддаляецца, калі зніклі нарэшце ў жытнёвых хвалях выцвілая ад сонца бацькава пілотка, а затым і дуга над стрыгунковай галавой, мне чамусьці зрабілася горка-горка на душы, быццам палыну туды кінулі. Быццам штосьці такое згубіў, без чаго і жыць на свеце нельга. I не знайсці яго больш, і не вярнуць.

Усё... Скончылася...

Як за плечы перакінуў...

I не будзе больш побач са мной бабкі, ніхто не назаве мяне цяпер ідалам і гайдамакам, ніхто больш не скажа, што ў мяне каменнае сэрца; не будзе больш побач і бацькі, з якім усе мы смелыя і разумныя; і брат не будзе чапляцца: то ў яго рагатка парвалася, то яму канёк з дроту зрабі. Не будзе нічога, што раней было: ні старой, драўлянай школы, ні возера з акунямі, ні пагулянак на суседавай прызбе. Словам, пакідаем мы з Санькам свае дзяцінства — не наеліся ўдосталь хлеба, не навучыліся ў ахвоту, не набегаліся на паплавах, не нагарцаваліся на калгасных конях, не назбіраліся на балоце качыных яек, не налавіліся ў былых тарфяных кар'ерах і выгарах шчупянят і карасікаў, не наласаваліся яблыкамі з суседскіх садоў, не направодзіліся вечарамі дзяўчат пасля пагулянак дахаты. А не наеўся, як кажа бабка,— не наліжашся. Трэба ісці. Седзячы дома на печы, афіцэрам артылерыі не будзеш.

Наш прыяцель, сын участковага міліцыянера Юрка Калдоба, які разам з намі бавіў свой водпуск на полі, на лузе і на суседавай прызбе па вечарах, зусім даканаў нас расказамі пра свае вучылішча, і мы з Санькам без артылерыі цяпер і дыхнуць не можам. Нам нават сняцца розныя там марціры і гаўбіцы. Кожны вечар, кладучыся спаць пасля нішчымнай вячэры, я ўпотай мару пра артылерыйскі паёк. Юрка кажа, што кормяць іх там добра: хлеба даюць пад завязку, і крупнік заўсёды з мясам. А галоўнае — будзем вучыцца як людзі: і кніжкі табе, і сшыткі, толькі чытай і пішы.

Мы ідзём не куды-небудзь проста ў людзі, а лічы, што ў армію, і таму прыбіраць нас асабліва не прыбіралі. Бабка шкадавала, што на мне яшчэ добрыя штаны, усяго раз ці два латаныя, мог бы яшчэ і Глыжка данасіць. Але былі яны ў мяне ўсяго адны, і горшыя выбраць няма з чаго. А іх жа там, відаць, забяруць, як будуць пераапранаць нас у камандзіры. Хто там будзе берагчы гэтыя абноскі. Забяруць і бацькавы салдацкія чаравікі, яшчэ даволі-такі трывалыя. Вось іх дык і мне шкада. Я, можа, і не браў бы іх з сабой, ды бацька сам настояў. Ну, як я буду перад вайсковым начальствам з рэпанымі нагамі?

А пакуль што я перакінуў свае скараходы цераз плячо, Санька — матчыны разбітыя ўшчэнт боты, якія засталося на раз абуць, і мы пайшлі басанож, не аглядваючыся больш на вёску і дружна насвістваючы марш, які мы нядаўна перанялі ў Юркі: «Артиллеристы, Сталин дал приказ!» Мы ідзём па гарачым дарожным прысаку, ідзём па друзу ўздоўж чыгункі, па няроўнаму гарадскому бруку — няма нам перашкоды. Нагам вольна і легка, не тое што ў абутку з чужой, дарослай нагі. А прабіць падэшвы на які-небудзь гарэлы цвік ці калючы дрот мы не баімся, бо яны ў нас цвёрдыя, тоўстыя і трывалыя, як на салдацкіх нямецкіх ботах. Адно што без жалезных шыпоў.

Калі па-людску, то ў горадзе варта было б і абуцца, усё ж такі горад. А прыгледзеліся, дык мы тут і не белыя вароны. На базар вясковыя жанчыны клункі з зелянінай пруць басанож, не кажучы ўжо пра дзяўчат і такіх падшыванцаў, як мы. Нашы з Санькам гарадскія аднагодкі таксама не ў шчыблетах раскашуюць. А калі ўжо хто ў чобаты, а хоць у чаравікі ці ў што іншае абуты, дык той, мабыць, зарабляе кучу грошай ці ўжо занадта вялікі інтэлігент. Словам, і тут можна жыць босаму чалавеку. Тым больш што і сцежкі-дарожкі сцерпныя: варонкі ад бомб і снарадаў даўно пазасыпаны бітай цэглай з руін, даўно прытаптаны і прыкачаны, з-пад ног прыбраны сляды былых баёў і бамбёжак: завалы, дахавае жалеза, бітае шкло і іншы друз, з-за якога тут яшчэ нядаўна было ні прайсці ні праехаць.

Бяжыцца нам ходка, бяжыцца нам весела, асабліва па вуліцы з артылерыйскай назвай — Батарэйная. Хоць яна такая ж, як і ўсе ўскраінныя вуліцы горада, амаль цалкам драўляная, з пахіленымі паўразбуранымі платамі, з папялішчамі, што паспелі ўжо густа зарасці палыном, дзядоўнікам і розным іншым бадыллем, з разбітай пыльнай дарогай, але яна нам, як свая, самая родная вуліца ў горадзе. Што ні кажы, не якая-небудзь там Сялянская ці Палеская, а усё ж такі Батарэйная. I назвалі яе так, мабыць, не без прычыны. Магчыма, на ей кватаравала калі-небудзь нейкая славутая батарэя, ці, можа, з тутэйшых хлопцаў многа служыць у артылерыі, ці з-за таго, што тут недалёка ўжо і да нашага вучылішча, ці проста па ей часцей, чым па іншых вуліцах горада, любіць прагульвацца наш брат — батарэец. Але колькі мы ні прыглядаліся, колькі ні стралялі вачыма, ніводнага службоўца са свайго роду войск так і не сустрэлі, праехала толькі, грукаючы расхлябанымі бартамі і нарабіўшы смуроду, старая палутарка ды босая дзяўчына перайшла нам дарогу з поўным вядром.

— Эй, рыжая, дай напіцца!— раптам ветліва гэтак папрасіў яе Санька, і я ад нечаканасці аж спыніўся. Во як хлопец асмялеў, не паступіўшы яшчэ ў вучылішча, да гарадскіх дзевак чапляецца. А тая толькі грэбліва зірнула ў наш бок, нос — угору і пачасала сваей дарогай. Добрая, відаць, фіфа.

А напіцца і сапраўды не шкодзіла б. Сонца ўжо добра прысмаліла — хутка поўдзень. Толькі дзе тут нап'ешся? Тэта табе не веска, што падышоў да калодзежа, парыпеў журавом і хоць на галаву лі. Каля адзінай на ўсю Батарэйную калонкі стаіць ладная такі чарга з вёдрамі, а вада з крана ледзь-ледзь цурчыць тонкай ніткай, і трэба мець час і цярпенне, каб набраць поўнае вядро. У нас цярпення хапіла б, ды часу ў абрэз. Пераб'ёмся як-небудзь і так.

Мінулі мы вадзяную чаргу — трапілі на хлебную. Гэтая яшчэ мудрэй за тую. Народу тут, што і бог адступіўся б, калі б ён хлеба захацеў. А крыку тут, а гвалту! Асабліва хвалюецца чарга, калі дзверы невялічкага, з аблупленай тынкоўкай цаглянага магазінчыка бяруць штурмам інваліды. Чарга, як мы прыкмецілі з Санькам, паводзіць сябе розна: хто лаецца, хто заступаецца, а інваліды даказваюць, што яны маюць права. На іх баку і міліцыянер, хоць ён нічога не можа зрабіць з чаргой: не вельмі яго слухаюць.

Не легка прабіцца ў хлебны магазін, не лягчэй з яго і выбрацца. Вылазяць адтуль усе расхрыстаныя, ускудлачаныя, з абарванымі гузікамі і рукавамі, потныя — ледзь жывыя, але з хлебам. У каго цэлы бохан, у каго яшчэ і луста ў прыдачу.

Па праўдзе сказаць, усё гэта відовішча нас з Санькам не вельмі кранае. Проста цікава крыху — і ўсё. Калі б мы мелі нават вялікія грошы, хлеба нам тут не прададуць. Тут важней за грошы хлебныя карткі. А дзе іх нам з Санькам узяць, калі мы не гарадскія, нідзе тут не працуем і не служым?

А хлеб свежы. 3 магазіна пахне так, што галава кружыцца. I, відаць, смачны. Хлопец не большы за нас, які толькі што ледзь выбіўся з чаргі на волю, пакамечаны і расхрыстаны, прагна на нашых вачах з'еў усю дабаўку да бохана. Мы з Санькам пракаўтнулі сліну і пайшлі сваёй дарогай прэч ад спакусы. Нічога — паступім у вучылішча, дык, можа, яшчэ не такі хлеб есці будзем і не па столькі, а, як казаў Юрка, пад самую завязку.

За вуліцай Батарэйнай горад скончыўся. Да вучылішча цяпер рукой падаць. Вунь яны пад рэдкімі соснамі на ўзвышшы, цагляныя будынкі, дзе я калісьці паміраў ад сыпняку. Тады там быў шпіталь, а цяпер — вучылішча. Дарога знаёмая.

Сеўшы на мурог, мы ў рэшце рэшт абуліся. I не абы табе як, а яшчэ і паплявалі кожны на свае колькі сліны было, анучкай пацерлі, спадзеючыся на бляск. Толькі многа трэба пляваць на Санькавы боты і на чаравікі майго бацькі, каб яны хоць крыху заблішчалі.

Усю дарогу мы храбрыліся: то бойка насвіствалі свой артылерыйскі марш, то ўслых марылі, як будуць зайздросціць нам хлопцы, калі прыйдзем у вёску на пабыўку ў вайсковай форме, як мы пойдзем у ей на вячоркі, а тут, перад пафарбаванай у зялёнае будкай з надпісам КПП1, адразу прыціхлі, сталі рахманымі. Не дайшоўшы да яе крокаў дзесяць, мы спыніліся. Сюды гэта ці не сюды? Пакуль што праз будку прайшоў толькі адзін капітан ды выйшаў старшына, а такога начальства, як мы, дык штосьці і не відаць. Чаго добрага, каб не патурылі нас адсюль з самага парога ды не паднялі на смех. Вось гэтага мы не любім да смерці. Хоць мы хлопцы і простыя, а свой гонар маем.

А яшчэ мы тут стаім у нерашучасці таму, што нас павінен быў сустрэць Юрка і паказаць, як ён абяцаў, усе хады і выхады. Ды вось жа няма ні Юркі, ні яго хадоў — вакол высокая драўляная агароджа ды вось гэта самае КПП перад намі і прыгожыя вароты з артылерыйскімі эмблемамі. Давядзецца самім прабівацца, як простым смяротным, у якіх няма ўплывовых землякоў і заступнікаў.

Але прабівацца было не трэба. На КПП Санька паказаў нашы паперкі-выклікі на экзамены і сказаў як адрэзаў:

— Паступаем на афіцэры.

Атрымалася гэта ў яго так проста, быццам для нас гэта — раз плюнуць, і не важна, што ў нас такі вясковы, зацюканы выгляд — мы не абы-хто. Сяржант з чырвонай павязкай на рукаве акінуў нас позіркам з макушак да абуўкі і неяк горка ўсміхнуўся:

— Ну-ну, шуруйце, Панове афіцэры.

А на развітанне рукой да сваёй пілоткі крануўся. Чэсць аддаў! Санька на ўсе сто перакананы, што гэта ён нам чэсць аддаў. Гэта ж выдумае што-небудзь, дык хоць стой, хоць валіся. Можна падумаць, што сяржанту няма каму чэсці аддаваць, апрача нас. Можа, ён проста муху сагнаў. А Санька на сваім стаіць: чэсць — і годзе. Той сяржант наперад глядзіць: атрымаем званне — можам яго па стойцы «смірна» так паставіць, што — ого! Словам, ніхто на КПП нашага гонару не адкусіў, а ў Санькі яго яшчэ і прыбавілася.

Але як бы там ні было, мы ў вучылішчы. Асабіста ў мяне адчуванне не скажу, каб геройскае. Тут зойдзеш іншы раз у чужы двор і то, як стрыножаны, не ведаеш, куды ступіць, дзе прытуліцца,— усё не свае, усё незнаёмае, усё не так, як дома. А гэта ж вайсковае вучылішча! Тут зусім іншае царства: вакол падмецена, прыбрана, дарожка, па якой мы ідзём, абапал абкладзена пад шнур цэглай, а цэгла яшчэ пабелена і крэйдай. Ступіць лішні крок страшна, плюнуць няма куды, так чыста. Гэта табе не нашы Падлюбічы і не вуліца Батарэйная. Нават паветра тут не такое: сосны хоць і рэдкія, а свой пах даюць.

А галоўнае — людзі. У цывільным тут рэдка каго і сустрэнеш, усе — вайскоўцы. І ніхто з іх не бяжыць, як у горадзе, на злом галавы, ніхто не ходзіць разявіўшы рот, як мы з Санькам, не ловіць варон. А калі хто ідзе, дык ідзе, адразу відаць, што па справе. Сустракаючыся, яны ўскідваюць руку да скроні і цвёрда гэпаюць па зямлі падэшвамі, бяруць пад казырок. I нам з Санькам у вочы кінулася, што той гучней гэпае і вышэй падкідае ногі, у каго меней зорак на пагонах, а ў каго зоркі болыиыя, той толькі рукой адмах-нецца і — будзь здаровы.

I песні, аказваецца, тут у модзе. Дзе вы бачылі, каб людзі гуртам ішлі па вуліцы і на ўсё горла спявалі песню? Хіба што на вяселлі. А тут параўняўся з намі строй такіх, як Юрка, хлопцаў ды як грымне ўжо знаёмы нам марш. I так гэта ў іх гучна і дружна атрымлівалася, што нам з Санькам і самім хацелася заспяваць.

Не, што ні кажыце, а вайсковае вучылішча, ды яшчэ артылерыйскае — зусім іншы свет, не той, у якім мы жылі дагэтуль.

Ходзім мы гэта па новым для сябе свеце, шукаем, у каго спытаць, куды нам трэба, і раптам:

— Эй, шпакі! Ідзіце-тка сюды.

Азірнуліся, каго там клічуць, што тут за шпакі такія ёсць у артылерыстаў,— аказваецца, гэта нас з Санькам клічуць. Мы так заслухаліся песнямі, што не заўважылі на лавачцы пад сасной траіх, як сказала б наша геаграфічка, абарыгенаў. Па ношанай форме, якая добра сядзіць на іх, адразу відаць, што не навічкі. Напэўна, Юркавы аднагодкі. Хаця адзін з іх, мабыць, і жаўтароцік: гімнасцёрка сядзіць лубам, сам дробненькі.

Што зробіш, трэба ісці, каб непрыемнасці якой не было. Усё ж такі не на сваёй вуліцы. А можа, што добрае і скажуць: куды, напрыклад, нам падацца са сваімі выклікамі на экзамены, дзе тут нас павінны прымаць. Мы не кінуліся да іх рыссю, а падышлі нага за нагу, і Санька насцярожана спытаў:

— Ну?

I тут нам здалося, што мы з Санькам зрабілі бог ведае якую непрыстойнасць, скажам, самае малое — без штаноў на вулiцу выйшлі, бо старэйшы з тых траіх з адной лычкай на акаймаваных жоўтай істужкай пагонах аж за галаву ўзяўся.

— Не, вы толькі паглядзіце, таварышы, што робіцца?— з болем у голасе ўсклікнуў ён.— Вы толькі паглядзіце, як яны падыходзяць да камандзіра!

Яго таварышы з дакорам паківалі галовамі, асуджальна пацмокалі языкамі, маўляў, як нам не сорамна, як нам не ай-я-яй. I каб хто ўсміхнуўся. Здзекуюцца, паразіты. Мы з Санькам не лыкам шытыя, бачым, што здзекуюцца. Ці даўно самі чэрствай скарынцы былі рады, ці даўно паскідалі такія ж як і на нас, грэшных, рызманы, і ўжо строяць з сябе ваша высакароддзе. Камандзіры шалудзівыя. Калі б мы сустрэліся з імі ў нашай вёсцы ды на сваёй вуліцы, дык там бы яшчэ яно паказала, хто з нас шпак, а хто — арол. А тут наўрад ці пакажа: падмогі няма, і ўцякаць не ведаем куды, у свой двор не схаваешся — далека.

Мы стаім слупамі, разгубленыя і раззлаваныя: ім тут жартачкі, а ў нас часу няма. Можа, нас там ужо дзе чакаюць і не могуць дачакацца, а гэтыя д'яблы тут прычапіліся, што не адчапіцца. I Юрку свінні з'елі. Не, каб прыйсці ды выручыць, пакуль да пабоішча не дайшло.

— Выхаванец Казлоў,— загадаў тым часам строгім голасам той, што строіў з сябе камандзіра,— пакажы гэтым шпакам, як трэба падыходзіць да начальніка!

Выхаванец Казлоў — нос аблуплены, бульбінкай, шыя, як і ў нас з Санькам,— дзве ў каўнер змесціпца, пілотка са стрыжанай галавы налазіць на адтапыраныя вушы — адбег крокаў на пяць, прыклаў руку да скроні і, высока ўскідваючы ногі, як пайшоў, адбіваючы крок, дык у нас з Санькам і сківіцы адвіслі ад здзіўлення. Артыст — і годзе! Ідзе, халера, як танцуе. Вось ён па-заліхвацку ляснуў абцасамі і, выцягнуўшыся перад сваім начальствам струной, высокім дзявочым голасам адрапартаваў:

— Таварыш камандзір! Выхаванец Казлоў па вашаму загаду прыбыў!

А мне тым часам падумалася: падшыванец ты, а не выхаванец, падліза ты няшчасны. 3 яго паслугача робяць, а ён рады старацца. Ды мы такіх падлізаў у школе лупцавалі як сідаравых коз. Не па душы нам гэты народ.

— Ну, а цяпер вы!— загадаў нам з Санькам самазваны камандзір.— Хто з вас смялейшы?

Ні я, ні Санька не крануліся з месца. Не на тых хлопцаў ён трапіў, каб трымцелі перад кожным ёлупнем, хоць ён і мацнейшы за нас. Санька яму так і адрэзаў:

— Не нукай, не запрог!

— Будзеш нашым камандзірам, тады — і камандуй,— падтрымаў Саньку і я, ужо гатовы да бойкі, якой, здавалася, не мінуць. Ды і Санька таксама напагатове. Няхай не думаюць, што мы вясковыя, дык з нас можна вяроўкі віць. Як кажуць, трапіла каса на камень. Яны стаяць, і мы стаім. Маўчым. Глядзім спадылба. Сапём раздзьмутымі ноздрамі. Нашы праціўнікі паглядваюць на свайго завадатара, мабыць, чакаюць сігналу.

Але завадатар сігналу не даў. Крыху падумаўшы, ён сказаў раптам амаль што мірна:

— Ну і не трэба, не аддавайце нам чэсці, толькі вучылішча вам не бачыць, як сваіх вушэй.

— А гэта ж чаму так? — яршыста спытаў Санька.

Здаецца-такі, мы адчапіліся ад гэтых нахабнікаў не зняважаныя.

— А таму, што скажу генералу, і не прымуць,— агарошыў нас «камандзір», а яго таварышы пры гэтым спачувальна ўздыхнулі, і выгляд у іх быў такі, быццам мы з Санькам беспаваротна асуджаны лёсам.

— У вучылішчы не трэба такія неслухі,— дабіваў нас тым часам праціўнік, прыкмеціўшы, што мы з Санькам абвялі,— тут трэба дысцыпліна, а такіх, як вы, і на гарматны стрэл сюды не пускаюць.

Мы з Санькам не ведаем, верыць яму ці не верыць. Няўжо яго генерал паслухае? А калі падумаць, дык чаму б і не. Можа, ён генеральскі любімчык, а можа, і зусім нейкі родзіч, а там, чаго добрага,— і сынок. Тады, пішы прапала наша артылерыя, і застанёмся мы проста задавакамі няшчаснымі, тады нам у вёску хоць не вяртайся — куры засмяюць. Дык ці да гонару тут? Яшчэ невядома, дзе яго згубіш, а дзе — знойдзеш. I мы здаліся.

Санька яшчэ мацней засоп носам, пачырванеў так, што і рыжоцця яго стала не відаць, моўчкі адышоў на тое месца, адкуль пачынаў падыход да «начальства» выхаванец Казлоў, выгнуў дугой свае, як у пеўня, грудзі і рушыў.

Не, што вы мне ні кажыце, а яшчэ ніхто і ніколі ні ў адной арміі свету так не вітаў самае высокае начальства, як Санька гэтых падшыванцаў у пагонах. Стараючыся трымаць ногі нягнуткімі кіямі, ён так таўчэ пляц падэшвамі парыжэлых матчыных ботаў, што толькі пыл курыць, а вакол мала не коціцца рэха. Ідзе ён, нібы драўляны, і мне здаецца, што ад такой хадзьбы ў яго вось-вось адваліцца галава. Вайсковы картуз, які Санька носіць з самай акупацыі, ссунуўся на яго строгія вочы, а рука, прыкладзеная лодачкай да сшытага суровай ніткай казырка, матляецца, не іначай нежывая. Карціна атрымалася нават больш уражлівая, чым у таго падлізы-выхаванца. Задаволеная ею, ненавісная нам троица рагатала ўпокат, асабліва — галоўны з іх. А калі яшчэ і я ўслед за Санькам затупаў бацькавымі чаравікамі — яны і зусім пасінелі, хоць вадой адлівай, адзін з іх толькі прастагнаў:

— Ой, не магу — цырк на дроце...

Пакуль яны заходзіліся ад смеху, мы з сябрам выбралі момант і — ходу. Але не тут яно было.

— Эй, шпакі! Стойце!— пераняў нас закапёршчык усёй гэтай валтузні.— А на КПП вас правяралі? Што вы несяце ў сумцы?

— Харч,— здзіўлена адказаў Санька, з гатоўнасцю адшпільваючы процівагазную сумку, у якой ляжаў праснак, спечаны бабуляй мне на дарогу з новага жыта, і з дзесятак Санькавых яблыкаў, прыпасеных ім загадзя для паходу ў вучылішча ў суседавым садзе.

— Правер,— загадаў свайму паслугачу той зануда з лычкай, і выхаванец Казлоў, які паказваў нам, як трэба хадзіць перад начальствам, заглянуўшы ў наш процівагаз, радасна ўсклікнуў:

— Яблыкі!

Не паспелі мы і вокам плюснуць, як яны ўжо гаспадараць без дазволу ў нашым хатулі, як хочуць: перабіраюць у тры рукі антонаўкі, валожкі, пуціўкі, глядзяць, дзе спялейшае ды каб не чарвівае. А грызуць яны з такім апетытам, так смачна хрумсцяць, што я аж засумняваўся, а ці такі ўжо і сытны артылерыйскі паёк, як нам распісваў Юрка. Хруст такі стаіць, нібы ў калгаснай стайні, калі коням дасі буракоў. Вось цяпер гэтыя хлопцы ў абмундзіраванні нечым падобныя і на нас — яны таксама яблыкі любяць, толькі садоў тут, відаць, няма. А каб і былі — у пагонах не палезеш: званне не дазваляе. Тут у каго хочаш апетыт разгуляецца. Ну, а нахабнасці ім не трэба пазычаць: самі ласуюцца і нам дазваляюць.

— Частуйцеся, не саромейцеся,— ветліва запрашаюць яны нас, калі з усёй садавіны засталася самая зеляніна ды чарвяточына.

Вось цяпер толькі, калі мы ўжо і не чакалі, і з'явіўся наш Юрка, адкуль — ніхто і не бачыў, нібы з неба ўпаў.

— Здароў, хлопцы,— радасна павітаўся ён са мной і з Санькам за руку і папракнуў: — Я іх шукаю па ўсім вучылішчы, а яны тут ужо знаёмых завялі.

Мы адразу павесялелі, абстаноўка ўмомант змянілася, цяпер у нас з тымі сілы роўныя. Цяпер, калі справа дойдзе да чаго такога, яшчэ паглядзім, хто каго. Ды і нашы так званыя знаёмыя гэта зразумелі. Яны перасталі хрумсцець яблыкамі, і іх важак, адразу перамяніўшы тон, спытаў у нашага збавіцеля:

— Землякі?

— Землякі,— пацвердзіў Юрка і, відаць, здагадаўшыся, што тут адбылося, важка дабавіў:— I калі вы іх яшчэ раз зачэпіце хоць пальцам — справу будзеце мець са мной.

Вось так яно ўсё павярнулася. А то — чэсць ім аддавай. Генералу ён, бачыце, скажа. Знайшоўся тут начальнік. Цяпер мы за Юркам, што за каменнай сцяной. Яго аўтарытэт і раней быў для нас высокі, а цяпер вырас вышэй за генеральскі.

Мы радасна крочым з ім па падмеценых і абкладзеных пабеленай цэглай дарожках і захапляемся, як ён хвацка вітае сустрэчных афіцэраў, стройны, падцягнуты, усё на ім як уліта, пілотка набакір, пагоны з фальговай акантоўкай ззяюць золатам, не пагоны — эпалеты.

Па дарозе ў прыймовую камісію, дзе, на думку Юркі, трэба праверыць, ці ёсць мы ў экзаменацыйным спісе, ён нас між справай крыху і адукаваў. Аказваецца, усё не так проста, як нам думалася. Аказваецца, што ўсе такія юнакі, як мы, дзеляцца на двое: на шпакоў і апаўцаў. Шпакі — гэта тыя, хто яшчэ толькі паступае ў вайсковае вучылішча, як мы, напрыклад, і тыя, хто і не збіраецца паступаць, словам — народ цывільны. Няма пагонаў — значыць, ты шпак. А шпак ён і ёсць шпак. Ён ні бум-бум у вайсковай службе, пра артылерыю — і гаварыць не варта. Для яго, скажам, простая рэч — гаўбіца ці марціра — цёмны лес. Ён толькі дзюбу, нічога не разумеючы, раскрые і слухае: у адно вуха заляцела, з другога — вылецела.

Мы з Санькам з захапленнем пераглянуліся і непрыкметна закрылі разяўленыя раты, якімі лавілі кожнае Юркава слова.

Апаўцы — людзі іншага гарту. Гэта такія, як Юрка. Слова гэта складзена з літар «А», «П» і «В», што значыць артылерыйскае падрыхтоўчае вучылішча. Але каб мець званне апаўца, трэба правучыцца не менш года. Па нашаму з Санькам разумению, гэта без пяці мінут афіцэр. А першагоднік — гэта яшчэ не апавец, а салага, гэта ўсё адно, што рыба такая — салака супраць селядца. Тыя, што да нас прыставалі, таксама яшчэ, на Юркаву думку, салагі.

Хутчэй бы ўжо нам з Санькам здаць уступныя экзамены, хутчэй бы са шпакоў — ды ў салагі!

Напярэдаднi штурму

Мы з Санькам — дзеравеншчына. Вось пражылі свой хлапечы век і нічога яшчэ толкам не бачылі, апрача немцаў, пажараў, бульбы-гнілушкі. Толькі таго і свету было, што сямігодка, поле, луг ды гарадскі рынак, дзе мы прадавалі шчаўе, каб купіць сабе сшыткі і кніжкі. I не дзіва, што цяпер мы ходзім па вучылішчы, і многае нам у навіну. Прывёў Юрка ў спартыўны зал — раты разявілі: вялізны ж, як гумно, а вокны пад самай столлю. Хваробу ты праз іх што-небудзь на вуліцы ўбачыш. Адна сцяна наогул не наша, Юрка кажа — шведская. На ей ад столі да падлогі драўляная рашотка. Нейкія рэйкі ў кутку стаяць на жалезных нагах з нікеляванымі круцёлкамі. Гэта нібыта спартыўныя брусы. А для чаго яны, бог святы знае.

А народу тут, як у вулеі, і ўсё — шпакі. Гэта ж іх столькі рвецца ў афіцэры! А ўсіх жа, мабыць, не возьмуць. Значыць, і мы з Санькам можам праляцець міма. I ў нас павіслі насы.

— Ну, будзе штурм!— пацвердзіў нашу боязь і Юрка, але, заўважыўшы наш кіслы выгляд, тут жа і падбадзёрыў:— Трымайце хвост пісталетам — прарвёмся.

Узяўшы нашы «выклікі», ён знік у шумным, устрывожаным хлапечым натоўпе, а мы засталіся адны, без павадыра. Адчуванне такое, быццам нас кінулі ў ваду, а мы не умеем плаваць. Куды тут сам паткнешся, у каго спытаеш, што і калі будзе? Вакол такі ж разгублены, нястрыжаны і зануджаны народ. I толькі зусім нямногія, чалавек гэтак пяць ці шэсць, ходзяць гогалямі. Яны і пастрыжаны па-гарадскому, і апрануты, і абуты чысцей і багацей за астатніх. Адзін нават парыцца ў летніку, такі ён важны. Ходзяць гэтыя гогалі сваім гуртам, трымаюцца ўпэўнена, фанабэрыста і размаўляюць ужо так культурна, што нам, вясковым, далека да іх скакаць. Гэтак размаўляла ў нашай школе толькі Ала Бобрыкава, ці прасцей — Бабрыха, дачка калгаснага бухгалтара, які прыехаў да нас аднекуль з далёкага горада. Дык мы ей за гэта праходу не давалі, як сустрэнем, так і падкусім: «Моя мама городская, говорит на букву «гэ»: Гриша, гад, гони гребенку, гниды голову гризут!» А яна не заставалася ў даўгу і абзывала нас замурзанай дзярэўняй. Так гэта цягнулася, пакуль з-за яе не пачаў рабіць нам паскудствы малады кінамеханік, які прыязджаў па нядзелях у вёску са сваей перасоўкай. Ён перастаў нас пускаць у кіно, а яе — калі ласка, і без білета. Мусілі мы прыкусіць языкі.

Шуміць, хвалюецца спартзал. У некаторых у руках падручнікі: у каго геаметрыя, у каго алгебра, а адзін, бачым, з хіміяй прахаджваецца. Тут у нас з Санькам і сэрцы пад лёд. Няўжо і хімію здаваць трэба? Хоць Юрка і гаварыў, што толькі рускую мову і матэматыку, але ж начальства магло і перадумаць, бо калі раскінуць мазгамі, дык артылерысту без хіміі нельга. Павінен жа ён ведаць, як ды з чаго робяць порах і тол. Без пораху і толу не стрэліш і не ўзарвеш. А мы з Санькам хімікі нікудышныя, хіба што ваду ад малака і можам адрозніць.

Па-мойму, яе і нашы падлюбскія настаўнікі гэтак жа разумеюць. У нас, у школе, пакуль што няма яшчэ ні сапраўднага хіміка, ні хімічкі. Выкладалі нам гэты прадмет то Бісектрыса, настаўніца па матэматыцы, то сам дырэктар. Хімічылі мы з імі да выпускных іспытаў і цвёрда ўразумелі толькі адно — формулу вады. Дык яна ж такая простая, што і каню можна ў галаву ўбіць, не тое што нам. Мудрасці там: «аш» два і «о». Словам, калі ўзяць дзве вадародзіны — гэтыя самыя «аш», ды адну кіслародзіну — тое ж самае «о», а затым старанна ўсё гэта перамяшаць у якой-небудзь пасудзіне, хоць і ў карцы,— вось табе і вада. Да практычных доследаў справа, праўда, у нас не дайшла, таму што ў Падлюбічах няма дзе ўзяць чыстага вадароду і кіслароду, усё даўно само перамяшалася ў калодзежах, у раўчаку і возеры. Для чаго толькі формула прыгадзілася, дык гэта Саньку скласці верш пра свае боты:

Мае боты, брат, таво — Прапускаюць аш два о —

што значыць: дзіравыя і цякуць.

Але неўзабаве прыйшоў Юрка, і нашы хімічныя пакуты скончыліся. Ён зноў пацвердзіў, што хімія — гэта выдумкі, затое матэматыку будуць патрабаваць — толькі трымайся, таму што ў артылерыі без яе нельга і кроку ступіць. Хто не ўмее лічыць, таго тут і трымаць небяспечна: яшчэ, крый божа, умажа па сваіх, што і касцей не збярэш.

Але нас з Санькам ім баяцца не варта, усё ж такі ў школе нас Бісектрыса хваліла і ставіла пяцёркі. Мабыць, у нас ёсць шанцы.

— Шанцы шанцамі,— сказаў на гэта Юрка,— а усё адно будзьце гатовы, бо на адно месца два ахвотнікі. Так што будзе вялікі штурм,— паўтарыў ён зноў сваё.

I тут хлопцы, што гаманілі між сабой побач з намі, раптам прыціхлі і хуценька некуды падаліся. Правялі мы іх вачыма, а там, ля дальняй сцяны спартзала, шпакі нешта ўжо штурмуюць: шумяць, базараць, штурхаюцца, піхаюцца, заднія мала на галовы пярэднім не лезуць. Аказваецца, пакуль мы тут варон лавілі, там нехта павесіў расклад экзаменаў і яшчэ нейкія паперы. Ну што ж — штурм дык штурм. Кінуліся і мы з Санькам, паспрабавалі локцямі пратачыцца ў натоўп, але куды там — палец не лезе. Пачалі шыі выцягваць і падымацца на дыбачкі — нічога не відаць. А Юрка падышоў і толькі падаў голас — ану, пастараніцеся — і перад ім дарога. Вось што значыць вайсковая форма, вось што значыць бліскучыя пагоны. Мы следам ідзём, а на нас глядзяць і, мабыць, зайздросцяць. Зразумела, што кожны хацеў бы мець такога заступніка. Нават тыя гарадскія гогалі пазіраюць на нас з павагай.

Чытаем мы разам з Юркам, што там у паперах на сцяне напісана, і радуемся — першы экзамен толькі паслязаўтра — можна яшчэ д'яблу рогі абламаць, не толькі падрыхтавацца. Мы з Санькам запісаны ў адну групу — выручым адзін аднаго, калі што. Словам, вешаць носа сапраўды не варта. Будзем трымаць хвост пісталетам.

Прачытаўшы ўсё, што нам было трэба, мы так жа, без перашкоды, спакойна і важна выйшлі з хлапечага акружэння ўслед за Юркам, нібы ад'ютанты за генералам.

I тут яго апякунства над намі на гэты дзень, на вялікі жаль, скончылася. Ён пачаў з намі развітвацца, бо служба — не дружба: яму трэба ісці ў казарму і рыхтавацца да нейкага там дзяжурства. Ён і нам раіў не губляць часу, а бегчы дахаты ды сесці за падручнікі, каб асвяжыць у памяці формулы. Але мы крыху забарыліся. Іншыя ж не разыходзяцца, а чагосьці чакаюць, дык чаго ж мы пабяжым? Што ў нас, дома коз воз ці дзяцей загарадзь, дык галодныя сядзяць? А тут яшчэ што-небудзь, глядзіш, і разведаем.

Ходзім мы з Санькам па залу, то да аднаго гурту прысуседзімся, то прытулімся да другога, і ўсё прыслухоўваемся, пра што гаворка. А гаворка ідзе карысная, людзі ўсё ведаюць. На матэматыцы, напрыклад, лепш не трапляцца да жанчыны. Ёсць тут, у вучылішчы, такая выкладчыца, чорная, у акулярах — ну і змяя! Варухнуцца не дае, не тое што шпаргалку перапісаць. А вось маёр ёсць у іх — той добры. Так што нам з Санькам — кроў з носа — трэба трапляць да маёра.

А ў прыймовай камісіі, кажуць, сам генерал — жудасць!

А ў каго слабы зрок, таго медыцынская камісія «зарэжа». Мы з Санькам на вочы не скардзімся, а там — хто ж яго ведае. Можа, пакажуць такое, што пад мікраскопам не ўбачыш.

I чым больш, тым страшней. Адно нас толькі крыху суцяшае — сірот будуць браць у першую чаргу. А мы з Санькам усё ж сіроты, хоць і не круглыя: у яго няма бацькі, а ў мяне — маткі. Можа ж, яны хоць трошкі ўлічаць тэта.

Стаім мы з сябрам, памяркоўна гэтак раздумваем, і раптам нехта з парога як крыкне:

— Выхадзі строіцца!

Вось як яно бывае. Тэта ж шчасце, што мы Юрку не паслухаліся і не змыліся адсюль. Выходзіць, і ён не ўсё наперад ведае. Ідзіце дамоў, а тут сама служба пачынаецца. Вось потым кусалі б локці.

Строіліся мы доўга: спачатку ўсе мітусліва тоўпіліся табуном, штурхаючыся, наступаючы адзін аднаму на ногі, як быццам на пляцы не хапала прасторы. А нам з Санькам і зусім не знаходзіцца месца ў страі: куды ні кінемся — ужо занята, адусюль выпіхваюць, ледзь прыляпіліся ў самым хвасце. Стаім. Хвалюемся. Ну, думаю, правільна бабуля журылася пра мае штаны, не вернемся мы ўжо сёння ў Падлюбічы, не давядзецца іх даношваць Глыжку. Вось зараз скамандуюць: «Шагам марш!» — і павядуць у сталоўку ці яшчэ куды. Можа, і пераапранаць. Мы ж не ведаем іх парадкаў. Але немалады ўжо старшына, ні даць ні ўзяць — вясковы дзядзька, толькі ў абмундзіраванні, у картузе з казырком-лапатай, які доўга, цярпліва назіраў за пастраеннем, з першых слоў паставіў нас у тупік:

— Тут усе іншагароднія? Штосьці вас, гаўрыкі, многа.

Мы з Санькам, адчуўшы нядобрае, закруціліся: а мы — хто, іншагароднія ці якія?

— Гамяльчанам выйсці са строю!— скамандаваў старшына.

Многа выйшла, чалавек з дваццаць. Я таксама памкнуўся быў пакінуць строй, але Санька ўтрымаў мяне за рукаў.

— Ты што — з Гомеля?— насмешліва спытаў ён, і ў гэтай насмешцы была ўпэўненасць, што нас з ім каманда старшыні не датычыцца.

I добра, што я не выйшаў. Аказваецца, нас сапраўды павядуць зараз у казарму ўладкоўваць на начлег і возьмуць на часовае катлавое забеспячэнне. А гамяльчане няхай сабе шуруюць дамоў і ходзяць потым здаваць экзамены па раскладу. Тэта іншагароднім няма куды дзецца, а у іх бацькі не за гарамі. Але і наша з Санькам свята было нядоўгім. Яго хапіла якраз на столькі, колькі спатрэбілася часу старшыне, каб праверыць усіх па спісу. Якіх там прозвішчаў толькі не было: і Кузняцоў і Гецьман, і Сіманян... Былі такія, што з першага разу і не прачытаеш, а вось нашых, звычайных, вясковых прозвішчаў старшына так і не выгукнуў. Стаім мы, разгубленыя, збянтэжаныя, і не ведаем, што рабіць, ці самім выходзіць, ці чакаць, пакуль не вытураць. Нарэшце Санька адважыўся і падаў голас:

— А Макавей?

— Макавей? — перапытаў старшына і моўчкі ўтаропіўся ў паперы, а ўвесь строй павярнуў на нас галовы і пачаў разглядваць хто з цікаўнасцю, а хто з усмешкай, мы аж пачырванелі. Надзеі ўжо не было ніякай.

— А які горад?— зацікавіўся старшына, нічога не вычытаўшы ў сваіх спісах. I зноў усе ў наш бок галовы — круць. Некаторым не відаць, дык аж шыі выцягваюць. Хоць пад зямлю праваліся.

— Дык не горад жа, а сяло Падлюбічы,— зрабіў я нясмелую спробу ўтлумачыць някемліваму старшыне, хто мы такія, а ён мне на гэта і секануў:

— Не паложана! Тут толькі далёкія, а вы мясцовыя. Выходзь!

Мы з Санькам выйшлі, як пабітыя, а нам у спіну нейкі жаргаўнік яшчэ і кінуў:

— Ну і сяло-о!

Зыркнуў я цераз плячо — а гэта той самы гарадскі гогаль у рабым суконным летніку. Яшчэ стаіць і хмыліцца. Вялікі герой. Нездарма кажуць, бачна пана па халявах. Правільна старшына на яго цыкнуў:

— Разгаворы ў страі!

Іншагародніх павялі ў казармы, а мы з Санькам, пакрыўджаныя і раззлаваныя, узялі кірунак на радзіму. Няма праўды на свеце: яны, бачыце, далёкія, а мы на сваіх дваіх пятнаццаць вёрст сюды адмахалі, ды цяпер столькі ж трэба, каб дома быць. А ўжо і сонца на захадзе.

Хаця, калі падумаць, трэба было паслухаць Юрку, дык ужо і дома былі б, і не трапілі б у гісторыю. А то захацелі разумнейшымі быць. Катлавое забеспячэнне нам падавай, а можа, яны на нас і не гатавалі. Што ж, абыдземся і каржом з новага жыта, яшчэ і яблыкам загрызём, што застаўся ад тых салагаў.

Мінуўшы КПП, мы зноў разуліся, перакінулі абутак цераз плячо І дзе крокам, дзе подбегам прыпусцілі па Батарэйнай. Крыўда паціху ўнялася, цяпер у нас на языках толькі матэматыка: катэты, гіпатэнузы, вуглы, градусы і паралельныя прамыя, якія ніколі не перасякаюцца, хоць ты іх вядзі ўсё жыццё.

Там паглядзім, хто з нас — сяло, а хто — сталіца.

Вось табе i пагоны ў кiшэнi!

Да экзаменаў заставаўся ўсяго адзіны дзень. Бацька з Глыжкам з раніцы пайшлі ў калгас вазіць на ток снапы, а следам, упораўшыся ля печы, майнула і бабуля з сярпом. Мы з Санькам, сышоўшыся ў нашай хаце, селі за геаметрыю асвяжаць у галаве тэарэмы. У хаце было ціха, і нам ніхто не перашкаджаў, апрача знадаедлівых мух. Вось калі мы пачалі каяцца ў мінулых школьных грахах! Вучылі, называецца, абы помніць да вечара, абы Бісектрысу вакол пальца абвесці. Цяпер цяжка тое асвяжаць, што ў галаве толькі пераначавала. А трэба ж, калі сабраліся з калгаса ў артылерыю! I мы так стараліся, што калі нашы прыйшлі на абед, у нас з Санькам у галовах была ўжо каша: вострыя вуглы пераблыталіся з тупымі, градусы з радыусамі і халера з хваробай. Да вечара мы наогул пачмурэлі. У мяне нават пачалі перасякацца паралельныя прамыя лініі, з якімі, калі верыць падручніку, яшчэ ніколі такога не здаралася.

А ноччу мне нават саснілася бісектрыса. Не, не наша настаўніца па матэматыцы, не Мар'я Антонаўна, якую мы між сабой у класе так называлі з-за яе высокага росту і худзізны, а самая натуральная бісектрыса — прамая лінія з геаметрыі, якую і хлебам не кармі, а дай толькі падзяліць вугал надвае. Ляжу гэта я сабе на печы, а яна і заходзіць у хату — ні чалавек, ні звер, ні машына, а штосьці такое, як лінейка ці вяроўка, падзеленая на сантыметры і міліметры. I даўжынёй з качаргу. Я адразу скеміў: бісектрыса, хто ж яшчэ. Дзверы за ей, нібы ў казцы, самі зачыніліся, і яна пытае ліслівым голасам:

— Дзе ў вашай хаце вуглы?

Мне каб спалохацца, а я — ні грама, але сэрцам чую, штосьці яна нядобрае задумала, і пачынаю грубіць:

— А табе нашто?

— Дзяліць,— кажа,— буду.

I вось бярэ яна сваё дзяліла, падобнае на брыгадзірскую казу, якой мераюць поле, і пачынае з кута. Раз адмерала, два, тут мяне і зусім злосць узяла. Ах жа ты, думаю, хлудзіна няшчасная, цябе ж не прасілі, не звалі. Знайшлася гаспадыня на чужыя вуглы! I як закрычу ўголас:

— Не дам дзяліць, бацьку скажу!

А яна мяне як штурхне ў плячо сваей казой і бабульчыным голасам пытае:

— Што гэта ты дзяліць сабраўся?

А я толкам яшчэ не прачнуўся і мармычу:

— Вуглы дзяліць не дам!

— А хто іх збіраецца дзяліць? — здзівілася бабуля.— Здаецца ж, мірна жывём, бацька яшчэ не ажаніўся, мачыхі яшчэ вам не прывёў. А там бог святы ведае. Можа, яшчэ і давядзецца,— перавяла старая на сваё і ўздыхнула. А калі даведалася, што гэта ў мяне быў такі сон, і прадракла:

— Давучышся ты са сваёй анцілерыяй, што і не тое падзеліш.

3 дому мы з Санькам у той дзень выйшлі на досвітку і ў вучылішча прыйшлі рана — баяліся спазніцца. Ды і клопат у нас быў важны: сесці там, дзе не будзе той змяі ў акулярах, трапіць да спагадлівага маёра. Можа ж, хоць адным вокам што падгледзім, калі будзем гінуць.

Але то ўсё былі летуценні. Хто ў нас там пытаў, дзе каму хочацца сесці. Пастроілі групамі, як мы былі запісаны ў спісах, зрабілі пераклічку, і пайшлі шпакі, наступаючы адзін другому на пяткі, па класных пакоях — што нам з Санькам удалося зрабіць пры такой строгасці, дык хоць сесці за адзін стол. Усё ж такі, калі таварыш побач, спакайней. А на стале ўжо кожнаму па два аркушы паперы са сшыткаў у клетачку, а на паперы пячатка і нумар. Не пераменіш, не схітруеш. А калі ў клас зайшлі экзаменатары, не ведаю, як Санька, я ж проста абвяў увесь. Яна! Чорная і ў акулярах! Гэта ж каму не шанцуе, таго і бацька лупцуе. А з ей яшчэ і лысаваты капiтан у падмогу. Добры маёр камусьці іншаму дастаўся.

I што яны прыдумалі, змяя з каштанам? На дзвюх дошках напісалі розныя задачы, а потым паказалі, якому раду якую з іх рашаць. Ну і колькі той карысці, што селі мы з Санькам побач? У яго капітанская задача, а ў мяне — змяіная, у яго — на тупыя вуглы, а ў мяне — на вострыя. Тут не падгледзіш і не падкажаш, выграбайся сам як можаш. Ды і яны між сталамі шастаюць, нібы заведзеныя, боязна нават вокам скасавурыцца, не тое што галаву павярнуць. Правільна казаў Юрка: тут толькі трымайся.

Але, на наша здзіўленне, задачкі аказаліся лёгкімі. Рашылі мы іх не самыя першыя, але і не апошнія. Першы я паклаў ручку і пацёр далонь аб далонь ад задавальнення, а потым і Санька следам за дзедам. Калі мы, паклаўшы на экзаменатарскі стол свае рашэнні, выходзілі з класа, там яшчэ чалавек з дзесяць сядзела хто як: хто грыз ручку, хто ў глыбокай задуменнасці трымаўся рукой за галаву, хто шкроб у патыліцы. А яны кажуць — сяло!

На экзамене па алгебры нашы рады парадзелі, там-сям за сталамі ўжо сядзела па адным, але мы з Санькам ужо не так калаціліся, хоць зноў быў і той жа клас, і тыя ж парадкі, і тыя ж экзаменатары. Па чацвёрцы за геаметрыю ў нас было ўжо ў кішэні. Не такая яна і лютая тая чорная ў акулярах, як мы наслухаліся. Гэта хто двойку атрымаў, хто ўжо за парогам, для таго — канешне.

Пасля алгебры мы хадзілі па вучылішчы як свае, не ведаючы яшчэ і адзнакі. Гэта Юрка надаў нам упэўненасці. Прыбегшы ў вучэбны корпус, калі мы ўжо выйшлі з класа ў калідор, ён сам перарашаў нашы задачкі і сказаў, што ўсё ў нас правільна, менш як па чацвёрцы не будзе, калі мы чаго там не нахамуталі. А пасля гэтага павёў нас і ў сталоўку, дзе ён быў на той дзень дзяжурны. Праўда, там ужо ўсё паелі, але знайшлося і нам па поўным алюмініевым карцы кампоту і лусце добрага, сапраўднага хлеба, а не такога, як мы ядзім дома, у якім палавіна бульбы і рознай іншай мешані, каб мука так не разыходзілася. Словам, пасля алгебры мы ішлі з Санькам дахаты амаль шчаслівыя і сытыя. Я, праўда, быў менш сыты за Саньку. Са сваей лусты я нёс палавіну дамоў на пачастунак Глыжку.

Па фізіцы было вуснае апытанне. Трымцелі ўсе, як цюцькі на марозе! А са мной здарылася такое, што я ледзь не пасівеў. Той самы капітан, што быў і на матэматыцы, загадаў мне рашыць на дошцы задачу. Задача як задача — нічога мудрага, мы ў школе спраўляліся і не з такімі. Перамножыўшы кілаграмы на метры, я, хуценька знайшоў адказ і бадзёра далажыў:

— Атрымалася дзве конскія сілы, таварыш капітан!

I тут у класе як зарагочуць! Не ўсе, праўда, а толькі двое з тых культурных гогаляў, і асабліва у рабым летніку. У мяне і сэрца спынілася, вушы заняліся агнём: усё — праваліўся. Канец свету. Гляджу на дошку нібы на новыя вароты, і нічога не разумею, рука з мелам трасецца, не іначай у ліхаманцы. I раптам вушам сваім не веру.

— Малайчына. «Пяць»!— сказаў капітан і, звяртаючыся да веселуноў, дадаў:— Розніцы няма, што конскія, што лашадзіныя. Ён беларус. Фізіка на ўсіх мовах — фізіка, і смяецца той, хто смяецца апошні. Вось вы,— паказаў ён пальцам на рабы летнік,— ідзіце-тка да дошкі і пакажыце нам, ці ёсць у вас падставы рагатаць.

А я, толькі выйшаўшы за дзверы, нарэшце добра ўцяміў, чаму мяне паднялі на смех. А капітан! Не, гэта не каштан, а родны бацька. Хоць бы ён даў таму шляхціцу што-небудзь такое, каб той праваліўся. Яшчэ пабачым, як яно будзе. Мяне такі мае конскія сілы вывезлі, паглядзім, як ён выедзе на сваіх лашадзіных.

Мы з Санькам не ішлі дамоў, а таўкліся пад дзвярыма класа, каб дачакацца, як выйдзе той рагатун. Таўкліся і яго сябры.

I вось ён выйшаў, чырвоны і збянтэжаны. Таварышы акружылі яго цесным гуртам, трывожна зашапталіся. Падчулі і мы — тройка. Гэта нас вельмі расчаравала. Тройка яшчэ не значыць, што ён праваліўся. Вось калі б кол, было б добра — толькі б яго тады і бачылі ў вучылішчы. Але і так мае самалюбства было ўсцешана. Няхай нос не дзярэ. Сталіца мне знайшлася.

I вось надышоў дзень, калі мы здалі апошні экзамен — напісалі рускі дыктант. Адзнак мы яшчэ не ведаем, іх вывесяць на дошцы аб'яў толькі заутра, але Санька так упэўнены, што нам пашанцуе і з дыктантам, быццам гэта і не экзамен, а семачкі. Хто ж яго тады і напіша, як не мы — лепшыя грамацеі сёмага «А»? Вось чаму мы на крылах ляцім дамоў і пасвістваем.

I як нам не свістаць, калі на нашым шляху да запаветнай мэты не засталося ніводнай перашкоды? Прауда, будзе яшчэ медыцынская камісія, але ж мы не зломкі якія, каб яе баяцца. Рукі і ногі на месцы, галава варыць, вочы і вушы, нібы ў добрага ката, усё бачаць і чуюць за пяць вёрст. Дык што нам камісія? Таму і дома яшчэ з парога я ўсім сваім пахваліўся, што мае пагоны ў шапцы.

...Прыйшоў вечар, мабыць, апошні для нас з Санькам вечар у роднай вёсцы. Адмыкалі на вуліцы каровы, вяртаючыся з лугу. Угаманіліся на вербах вераб'і, сытыя пасля дзённых налётаў на проса. Улёгся пыл пасля коней, якіх пагналі на луг у начное. I каля Скокавага двара абазвалася балалайка. 3-за экзаменаў мы з Санькам не былі на пагулянках чорт ведае колькі — сходзім у апошні раз. Там, у нашай артылерыі, мабыць, такой волі не будзе. I, кажучы па сакрэту, хацелася крыху і пакрасавацца перад падлюбскімі шпакамі — Смыкам, Косцікам-балалаечнікам і Чыжыкам, калі ён не ў начным,— хоць мы ў гэтым сабе і не прызнаваліся. Ды і Каця з Сонькай-Кучараўкай няхай паглядзяць, задавакі мы няшчасныя ці не.

Але на пагулянцы нас чакала расчараванне. Каці і Сонькі не было. Дзяўчаты сказалі, што яны таксама нацэліліся ў навуку, хочуць паступіць у тэхнікум і таму сядзяць вечарамі ў Глёкаў і дзяўбуць граматыку. Тэта добра. Значыць, не ходзяць без нас гуляць.

На пагулянцы адразу зрабілася нецікава. Для прыстойнасці мы крыху пастаялі, перакінуліся слоўцам-другім з хлопцамі і пайшлі, так з ніводнай і не станцаваўшы. Хацелася непрыкметна змыцца, але наўздагон нам паляцела ўсё ж дзявочая насмешачка:

— Ох-ох, ваша высакароддзе, камандзіры!

Ахвота была з імі звязвацца. Мы з Санькам вышэй за гэта, нават не азірнуліся і, не змаўляючыся між сабой, пашыбавалі да Глёкавай хаты.

У адным з акон было святло. 3-за фіранкі чуваць ціхая дзявочая гамонка. Яны, Каця з Сонькай. Зубраць. Тут мы з Санькам і пачалі шпацыраваць міма акон туды і назад пад свой любімы марш. Санька вядомы свістун, а тут перасвістаў самога сябе. Як мог, дапамагаў я. Раз за разам, праходзячы пад самымі вокнамі, мы на момант сціхалі і прыслухоўваліся, якое атрымоўваецца ўражанне. Ага, у хаце стала ціха — пачулі. Бачым, фіранка калышацца — падглядваюць. А потым дружна гэтак:

— Хі-хі-хі!

I болып нічога. Колькі мы пасля ні тапталіся, колькі ні маршыравалі, за акном — нібы вымерлі. А потым і лямпа патухла. Не выйшлі.

Тут Санька не на жарт раззлаваўся, а я дык і зусім разгневаўся. Падумаеш — цацы! Бачылі мы такіх. Ды мы, можа, там, у сябе ў артылерыі, і не такіх паненак знойдзем. Пойдзем у звальненне ў горад і пазнаёмімся. 3 намі тады любая пойдзе. А яны няхай хіхікаюць. I ад уяўлення таго, як гэтыя зубрылкі будуць румзаць і кусаць сабе локці, калі мы пад крэндзель будзем гуляць з гарадскімі, адразу зрабілася лягчэй на душы. Але крыўда ўсё ж засталася. 3 ей мы і разышліся па хатах.

А раніцай усё гэта забылася. Мы былі ўжо ў вучылішчы, калі яно яшчэ толькі паснедала і строем з песнямі ішло ад сталоўкі, нам карцела хутчэй даведацца, ці прынялі нас.

Мы думалі, што будзем першыя, але ў спартыўным зале была ўжо процьма іншагародніх, якія жывуць у казармах, ды і мясцовых — хоць гаць гаці. Яны ўюцца каля сцяны, дзе вывешаны паперы, быццам мошкі мак таўкуць: адны падыходзяць, другія адыходзяць, трэція зноў вяртаюцца, вачам сваім не вераць, хто смяецца, хто руку сябру паціскае, а хто і стаіць моўчкі, апусціўшы галаву, або здзіўлена пазірае па баках — няўжо гэта праўда, што мяне не залічылі?

Санька ў спісе прынятых знайшоў сябе адразу і балюча пляснуў мяне па плячы:

— Ёсць!

А ў мяне — нібы вочы завязаны. Усе прозвішчы на сваю літару прачытаў і зверху ўніз, і знізу ўверх — няма. Сэрца — нібы ў калодзеж упала, і ногі ледзь стаяць.

— Не можа таго быць!— расхваляваўся і Санька.— Глядзі, каб куды так не ўціснулі, не па алфавіту. Не святыя ж яны, могуць і памыліцца.

Прайшліся мы з ім у дзве пары вачэй па ўсім даўжэзным спісе ад нейкага Анікеева да якогась Яцука — ніхто мяне нікуды не ўціснуў, няма мяне сярод тых, каго прынялі. Крыўдна да болю, я ледзь не плачу. Я ж так стараўся, так зжыўся з марай пра вучылішча, пра артылерыю, што лічыў ужо сябе без пяці мінут там, у казармах, у страі са звонкай песняй, каля гармат, і вось — на табе, як абухом па цемю. Кінуліся мы да другой паперы — адзнакі па дыктанту. Тут усё і высветлілася: Саньку — тры, мне — два. Вось дзе я спатыкнуўся, вось дзе пагібель мая.

Цяпер і Санька свайму святу не рады, ён таксама нібы апушчаны ў ваду, але спрабуе мяне суцешыць, маўляў, не ўсё тое і святло ў акне, што вучылішча. Жывуць жа людзі і без яго, не паміраюць. Ён сапраўдны сябра і дзеля мяне гатовы на ўсё:

— Хочаш, і я забяру свае дакументы? Пайшлі яны свіней пасвіць, каб я вучыўся ў іх без цябе.

I я веру, што гэта не проста прыгожае слоўца. Ён можа, ён такі. Але што мне з таго толку — сам не гам і другому не дам? Ён пад гарачку забярэ, а потым усё жыццё каяцца будзе, а я застануся вінаваты. Не хачу я, няхай вучыцца з богам. А мне заставацца вечным шпаком.

Тут адкуль ні ўзяўся Юрка, прыбег даведацца пра нашы поспехі і, даведаўшыся, толькі свіснуў:

— Ну і ну-у, і як ты, Іван, умудрыўся?

А чорт жа мяне ведае, вось умудрыўся ж. Пра што і не думаў, на тым спатыкнуўся. У школе менш чацвёркі ніколі не было, а тут як насланнё нейкае.

Але неўзабаве ўсё высветлілася. Юрка схадзіў у прыймовую камісію, кагосьці там папрасіў і вярнуўся з маім дыктантам.

Выйшлі мы з шумнага спартыўнага зала далей ад цікаўных вачэй, селі на лавачку пад сасной і пачалі разглядваць, на чым я спёкся. А вось на чым — на падвоеных літарах. І памылкі ў асноўным зроблены ў адным сказе, дзе гаварылася, што нейкі прафесар ехаў пасажырскім аўтобусам па нейкай там трасе. Вось гэты самы прафесар са сваёй паездкай мяне і падвёў пад манастыр, каб ён назад не вярнуўся. Усё я напісаў з адной літарай «с»: і прафесар, і пасажырскі, і траса. Проста з галавы вылецела, што па-руску трэба з дзвюма. А там яшчэ і па дробязі назбіралася: недзе проста літару прамінуў, дзве-тры коскі паскупіўся паставіць — і бывай, вучылішча! I ўсё з-за той мымры, што нам дыктавала,— не магла крыху на падвоеных пасіпець, як сіпела наша падлюбская русіца.

I вось я вяртаюся дахаты адзін, без Санькі. Яго паставілі ўжо ў строй і павялі ў сталоўку есці артылерыйскі паёк, а мне і яшчэ такім жа недарэкам вярнулі пасведчанне аб адукацыі, сказалі суцяшальнае слова, што наша яшчэ ўсё наперадзе, і адправілі прэч з вачэй.

Я іду не з вучылішча, я іду з хаўтураў, пахаваўшы сваю артылерыю, свае афіцэрства. Што дома бацьку сказаць, які грошы, пазычаныя ў дзеда мне на новыя штаны, вярнуў ужо назад? А крый божа сустрэнецца хто з настаўнікаў, да якіх таксама дайшла слава пра нашы з Санькам поспехі,— скрозь зямлю мала праваліцца, згарэць можна ад сораму. I хто нас прасіў трубіць: пагоны ў шапцы, пагоны ў кішэні? Саньку пашанцавала, а мая шапка аказалася дзіравая. Вось табе і гарадскія паненкі пад крэндзель. Тут да сваіх цяпер носа не паказвай.

Спачатку я хацеў пераседзець дзе-небудзь за ваколіцай вёскі да цёмнага, каб потым прашмыгнуць, нібы мыш, у свой двор, не сустрэўшы на вуліцы нікога з аднавяскоўцаў, але перадумаў. А ці не лепей зараз, пакуль усе на працы? Толькі не трэба ісці па вуліцы, а па-за гародамі, а потым цераз платы, цераз парканы, дзе дабрачынныя людзі і не ходзяць, а толькі зладзеі ды ўцекачы. Сабак я не баюся. Сабака пабрэша, самае страшнае — за лытку грызне, а пытаць жа не будзе, здаў я экзамены ці не. Значыць, і славы не разнясе.

Наша хата на замку — яшчэ ўсе ў калгасе, і мяне сустрэў толькі Жук, завіляў хвастом, пачаў лашчыцца, за што і атрымаў добрага выспятка. Не лез бы ўжо хоць ён са сваімі пяшчотамі. Сабака зашыўся ў будку і, пакуль я адмыкаў хату, пакрыўджана паглядваў адтуль на мяне, быццам пытаючы: чым ён тут вінаваты?

Хоць і лета, я залез на печ і пакутую, і суцяшаю сам сябе: трэба яно мне, тое вучылішча-мучылішча, шчасце вялікае — строем хадзіць ды кожнаму казыраць. Не вялікі страх і ў калгасе парабіць да салдатаў, толькі вось хлопцы мянушку якую-небудзь прылепяць — гэта ўжо абавязкова. Ну, што ж — пражыву і з мянушкай.

Калі бабуля прыйшла з калгаса, я ўсё яшчэ перажываў.

— Чаго ты там стогнеш? — спытала яна, сеўшы на ўслон перахліпнуць з дарогі.— Захварэу, ці што?

Няпраўда, я не стагнаў, гэта я так уздыхаў, нібы кавальскі мех. А наконт хваробы бабуля добрую думку падала. Цяпер я ведаю, што сказаць бацьку: медыцынскую камісію не прайшоу — «зарэзала»! Дактары праклятыя! Медкамісія — гэта вам не двойка за дыктант. Я ж невінаваты, што здароўя няма.

Так я яму і сказау за вячэрай, нават вокам не міргнуў. Трэба ж як-небудзь пасля ранейшай пахвальбы свой гонар ратаваць. I бацька толькі рукамі развёў — ну і ну, Саньку-замухрышку прапусцілі, а мяне, такога дзябёлага і вышэйшага за яго на галаву,— забракавалі. Тут у самы акурат заступілася за мяне бабуля:

— Чаго ты прычапіўся да чалавека? Санька не валяўся ўсю зімачку з сыпняком, а гэты ледзь выкараскаўся з таго свету. Думаеш, усё гэта бокам не выйшла?

I бацька паверыў.

Пазней за ўсіх заявіўся дахаты Глыжка. Яны з бацькам сёння з апошнім возам снапоў прыпазніліся, дык давялося хлопцу самому на луг каня ў табун адганяць. Убачыўшы мяне, брат кінуўся да стала:

— Ну што, Іван, узялі?

Бабка яго хуценька астудзіла:

— Ідзі памыйся, нячысцік мурзаты! Не бачыш, у чалавека гора — дахтары зарэзалі.

Нячысцік стаіць і вачыма лыпае — зарэзалі, а я жывы.

Генералы ўсё могуць

Ці мала кім можна стаць у жыцці. Хіба на артылерыі свет клінам сышоўся? Бацьку, напрыклад, нават болып падабаецца машыніст паравоза. Залез сабе ў паравозную будку, націснуў што трэба, павярнуў рычаг, даў гудок — паравоз пабег па рэйках, а ты сядзі і куры. Праўда, перад станцыяй ужо асцерагайся, тут глядзі, семафор адкрыты ці не. Калі адкрыты — шуруй сабе далей, ні на што не звяртай увагі, а закрыты — стой і пыхкай парай. Бацьку адзін знаёмы машыніст катаў на паравозе яшчэ да вайны, таму ён усё гэта і ведае. I мундзіры ў іх зараз не горшыя за афіцэрскія, толькі чорныя. Вядома ж, людзі больш каля вугалю. I пайкі ў іх, кажуць, па вайсковай норме. I грошы ім даюць добрыя. Чым не лацвей? А той знаёмы машыніст, калі яго папрасіць, дапаможа мне ўладкавацца ў іх школу — павучуся і буду таксама ездзіць на паравозе ды з акенца паплёўваць. Бацька напяваў мне гэта, пакуль і спаць не палеглі.

— А не хочаш — глядзі сам,— заключыў ён у рэшце рэшт і дзьмухнуў на лямпу.

Ляжу я, а вочы хоць выкалі — не спіцца, усё думаю, куды мне дзецца. Яно і настаўнікам было б нядрэнна, раней мне хацелася ім быць, і ў школе агітавалі, але тут, мабыць, нічога не атрымаецца. Не будзе рэшата бобу, як звычайна гаворыць бабуля. У тэхнікуме, кажуць, стыпендыя такая, што за адзін дзень можна праесці. Гэта, каб тэхнікум быў недалёка ад хаты, дык прыбег ды паабедаў, хоць нішчымніцай. Ды і з вопраткай туга — далей няма куды. Чуў я, як бацька перад сном уздыхнуў:

— Гэта ж цяпер, старая, нам на штаны хлопцу трэба разжывацца, ды і світку нейкую на зіму не шкодзіла б. Парсюка збыць, ці што?

Словам, нарабіў клопату той дыктант і мне і бацьку. Але няхай ён не вельмі журыцца — я і сам сабе зараблю. Падумаю добра і пайду ў прычэпшчыкі. Яны часта змяняюцца. Кажуць, што цяжка. Нічога, перажыву. На плузе за трактарам ездзіць — не пешкі хадзіць. Канешне, зямлі пад'ясі болей, чым хлеба, затое заробкі пастаянныя.

А лепш за ўсё — у конюхі, памагатым да Пецькі Чыжыка. Ён жа мой аднагодак, дык што я з табуном не спраўлюся? Праўда, з Пецькам даглядае коней і дзед Каўрач, але там таго дзеда столькі — адзін кашаль застаўся. Як на луг табун гнаць, дык на каня трэба падсаджваць, быццам на печ. Вось я на яго месца і стану. Таксама што ні дзень, дык працадзень, а то і паўтара.

— Ну калі тое і будзе, то хіба па восені, як снапы звязуць і бульбу пакапаюць,— сказаў раніцай бацька, пачуўшы пра мае намеры пайсці ў конюхі,— а пакуль што паставіць цябе брыгадзірка хутчэй за ўсё на мае месца — снапы вазіць, а мяне, відаць, пашле на малатарню, бо мужыкоў там мала, ды і тыя калекі.

А бабулі мае конныя задумы прыйшліся не па душы:

— Табе на кані гарцаваць, а мне штаны латаць? Дзе гэта я намеюся тых латак ды нітак?

— Там яно яшчэ відаць будзе,— супакоіў яе бацька, і мы пайшлі на калгасны двор, пайшлі ўсёй сям'ёй: наперадзе бацька з бабуляй, за імі я і Глыжка з пугай цераз плячо.

Нінка-брыгадзірка, чорная ад сонца, нібы галавешка, убачыўшы мяне, узрадавалася, як роднаму сыну.

— Вось малайчына, што вярнуўся ў брыгаду,— затараторыла яна, па-мужчынску здароўкаючыся са мной, а потым разанула сябе рукой па шыі,— мне мужыкі во як трэба.

Пакуль што ніхто з мяне не смяецца: мужчыны кураць пад кузняй, жанчыны гамоняць сваім гуртам. Нікому я не ў галаве. Дарма толькі ўчора, вяртаючыся з вучылішча, хаваўся ад людзей, нібы бадзяга з Сахаліна.

Але ў хлапечым гурце мяне сустрэлі зусім інакш.

— Здароў, афіцэр! — весела павітаўся са мной Косцік Скок, наш балалаечнік, і ўсе хлопцы рагатнулі, а Скачок — ён з тых, што дзеля прыгожага слоўца бацькі не пашкадуе,— пачаў клоуна з сябе строіць.

— Калі б вы бачылі, хлопцы, як ён на апошнія пагулянкі прыходзіў! — I пайшоў перад усімі вылузвацца: грудзі выгнуў дугой, нос задраў на неба, губы закапыліў і давай віхляць худым задам у дзіравых штанах. Усе так і пакаціліся ад смеху, нават гэты парсюк Глыжка засакатаў. Чые тут нервы вытрымаюць? Кінуўся я з кулакамі — і пачалася заваруха, і пакаціліся мы па мурагу. Але хлопцы не далі душу адвесці, наваліліся гуртам і разбаранілі. Клопат такі — адзін на адзін дзе-небудзь сквітаюся. Аднак калі тое яшчэ будзе, а мянушка ўжо да мяне прыліпла — Афіцэр. У вочы і за вочы. Давялося змірыцца — што ты зробіш? На ўсіх з кулакамі кідацца не будзеш — сам зубоў не напасешся. Ды і мянушка не такая ўжо крыўдная. Вунь аднаго хлопца з хутара Кастагрызам дражняць, і то прывык.

I вось пачалі разбіраць са стайні коней. Дарослыя дзядзькі выводзяць больш дужых і спакойных. Іх запрагаюць у жняяркі-лабагрэйкі — ёсць такія дзве на ўвесь калгас і ў іх абы-каго не запражэш, не кожны конь можа жаць. Іншага ў лабагрэйцы не ўтрымаеш ніякімі цуглямі, калі яна застракоча нажамі, нібы кулямёт, ды замахае зубатымі крыламі. У коней таксама нервы ёсць, як гаворыць Чыжык.

Больш маладых ды кідкіх разбіраюць хлопцы, што возяць снапы. Пайшлі і мы з Глыжкам выводзіць свайго Стрыгунка. Як будучы конюх, я пільна да ўсяго прыглядаюся: ці ёсць тут хоць які парадак. Здаецца, што ёсць. Стайня, праўда, нікудышняя. Да вайны дык была з бярвення, але яна згарэла, калі праходзіў фронт. А гэтую зляпілі на жывую нітку: толькі слупы драўляныя, а сцены — пляцень з лазы, абмазаны глінай. Многа дзе гліна абсыпалася, і скрозь дзіркі відаць вуліца. Трэба будзе пасля жніва сказаць Нінцы, каб хоць воз гліны прывезлі, ды ўсё замазаць — зімой дзьмуць будзе.

А ўсярэдзіне — мірыцца можна. На кожнага каня станок, на кожным станку таблічка, на таблічках надпісы хімічным алоўкам: «Буланы», «Слепка», «Таптун», «Адольф», «Стрыгунок». Праўда, напісана карава і з памылкамі, але я сам потым перапішу, у мяне почырк добры.

Хамуты таксама развешаны па парадку — кожнаму каню свой. Вось гэта правільна, чужы хамут шыю табе намуляе да крыві, і не ўгледзіш калі. А што сядзёлкі і дугі абы-дзе — гэта недагляд, гэтак, прабачце, у гаспадароў не робіцца, мой дзед Мікалай не пахваліў бы. Калі я прыйду сюды, кожны конь не толькі хамут, а будзе мець усё свае, асабістае; я вазьмуся і за Пецьку, і за Каўрача, бо толку не будзе.

Стрыгунок сустрэў мяне і Глыжку радасным іржаннем, аж затанцаваў у станку. Разумнік мой, не забыўся. Не заездзілі яго тут без мяне? Не, не заездзілі. Чысты, гладкі, бакі крутыя, крыж надвое колецца. I хто б мог падумаць, што з таго карослівага, ледзь жывога з голаду жарабяці, знойдзенага намі з Санькам на лузе, вырасце такі прыгажун, што хоць ты яго — на карцінку ды ў рамачку? А можа, гэта толькі мне так здаецца? Не, і Глыжка згодзен, што можна ў рамачку.

Весела бяжыць наш Стрыгунок, распусціўшы хвост і грыву па ветры, ногі лёгкія, крок шырокі, бяжыць, аж калёсы грукацяць, падскокваючы на няроўнай дарозе. I пуга яму не трэба.

Добра ён цягне і воз са снапамі жыта, толькі гужы рыпяць. I чыста ўсё разумее: па роўнаму ідзе спакойна, а перад узгоркам сам бярэ разгон, як быццам хто яго навучыў, што так лягчэй. Глыжка перакананы, што Стрыгунок, калі мы што-небудзь пра яго гаворым, таксама ўсё цяміць. Нездарма ж ён у той час вушы натапырвае.

За працай на душы палягчэла, пакрыху пачало забывацца мае крушэнне на экзаменах у вучылішчы, быццам было гэта ўжо не дзень назад, а летась-пазалетась. Дзесяць вазоў мы з Глыжкам да вечара прывезлі, столькі, колькі і бацька рабіў. Пасля вячэры хацелася хутчэй упасці і заснуць. Баляць мае рукі-ногі, а спіна, што ў старога дзеда — не сагнуць. Але варта мне было толькі легчы, як зноў розныя думкі ў галаве, адкуль толькі і ўзяліся. Цікава, а што там Санька сёння дзень рабіў, мабыць, ужо і мундзір атрымаў, новыя чаравікі, ходзіць там і казырае. Ну, і няхай казырае. А я нікому казыраць не буду, я — птушка вольная. Шчасце вялікае — цягнуцца перад кожным у струну.

Затое я бульбай з кіслымі гуркамі павячэраў, а ён, можа, нават макаронамі. За ўсё жыццё мне адзін раз толькі давялося іх пакаштаваць, гэта тады, як у вайну ў нашай вёсцы італьянцы стаялі, дык іхні повар дазволіў кацёл падшкрэбці. Ой, і смачна было, увесь век еў бы!

Затым розныя клопаты па стайні мяне адолелі. Не прыдумаю, дзе ўзяць фанеры на новыя таблічкі коням, дзе хімічным алоўкам разжыцца. I вось яшчэ — ці варта ад дзеда Каўрача пазбаўляцца? Хто тады настроіць хамут, хто аброць сшые, калі яна парвецца? Гэтага, мабыць і Чыжык не ўмее. Задумаешся тут. Хаця мяне, можа, яшчэ і не паставяць конюхам, старшыня ці хто іншы ўпрэцца.

А на вуліцы ўжо цёмна. Недзе затрынкала балалайка, дзявочы смех рассыпаўся пад вокнамі звонкім гарохам. Каля Скокавай хаты пачынаюцца танцы. Крутануўся я на другі бок, быццам прыпякло: хоць вы ў зараз медныя трубы зайграйце — не выйду.

I раптам каля самай нашай хаты дзяўчаты заспявалі прыпеўку, ды так гучна — хто каго перакрычыць, ды са смехам:

Запляту я ў косы бант, А мой мілёнак — лейтэнант. А як будзе капітан, Ён мне купіць сарафан!

Мяне нібы варам абдалі. Каб вам скулле ў глотку — а калі бацька не спіць? Вось гадзюкі, вось кобры праклятыя, дня не мінула — паспелі прыдумаць. Вось зараз выскачу ды спушчу Жука з ланцуга, але што толку, калі ён, чорт, не куслівы.

Я думаў, што на гэтым усё і скончыцца, а яны зноў:

Ой, дзяўчатачкі, я скора Падчаплю сабе маёра, Буду есць салодкі торт, Буду ездзіць на курорт!

Відаць-такі, бацька не спаў, а можа, спаў ды прачнуўся, толькі з яго ложка раптам пачуўся не смех, а нейкае прыглушанае кудахтание, быццам трохі і з плачам:

— Кху-кху-кху, каб вы скіслі, верціхвосткі. Глядзі ты на іх — і ў чынах разбіраюцца, і ў акладах.

I бабка са свайго кутка адгукнулася:

— Ідзі ты ўжо патрусіся трохі пад іх балабайку-хварабайку, а то будуць шчадраваць усю ноч, як пад Новы год.

Хутчэй жа іх балалайку шашаль паточыць, чым я пайду на тыя танцулькі пасля такіх прыпевак. Ды і Алёшка ж Скачок там будзе, з якім я не расквітаўся яшчэ за ранішні цырк. Не, няхай танцуюць цяпер самі, без мяне, хоць да упаду. А я, як толькі прыдбаюць мне новыя штаны, буду хадзіць танцаваць на Хутар. Там — гармонік з бубнам, а не задрыпаная балалайка.

I за прыпеўкі таксама разлічуся. Я ведаю, хто іх складае — Надзька Сіпакова. Яна яшчэ толькі школу канчае, а ўжо прыбілася да дзяўчат з нашага гурту, і не толькі прыбілася — пачала імі верхаводзіць, яны ўсе ёй у рот глядзяць. А было б там на што гляд-зець — нізенькая, кругленькая, нос піпкай і такая ўжо смяшлівая, быццам яе ўвесь час нехта казыча. I яшчэ — калі ў маёй Каці вяснушкі толькі на носе і дзе-нідзе на шчоках і толькі вясной, дык у гэтай рагатухі — круглы год ад вуха і да вуха, быццам яе хто знарок цагляным пылам напудрыў. Ёй скажаш:

— Ух, рыжая!

А яна:

— Ха-ха, што рыжэй, то даражэй!

Вось за гэта за ўсё ў яе і мянушка такая — Гарбуза.

3 гэтай самай Гарбузой мне і трэба разлічыцца за прыпеўкі. Яны ў яе самі з языка скачуць. Яна жыва не будзе, калі за вечар не прыдумае іх дзве-тры. I пра што хочаш, на што вока кіне. Вось каб і мне самому пра яе скласці што-небудзь смешнае. Хаця б так:

Ах ты, рудая Гарбуза...

А цяпер само просіцца — каза, просіцца, а не клеіцца.

Хіба вось так:

Ах ты, рудая Гарбуза, Як сідарава каза, Ты ў мяне паскачаш I горка заплачаш.

Так я і заснуў, больш нічога лепшага не прыдумаўшы. Калі б Санька — той змог бы, галавы не ламаючы, якую хочаш казу да гарбуза прыляпіць.

Яшчэ два дні я вазіў потым з Глыжкам снапы, яшчэ два вечары Надзька-Гарбуза дапякала мяне ўсё новымі прыпеўкамі, а бабуля — яхіднымі парадамі.

— Выйдзі ўжо, калі прысушыў дзеўку.

А на трэці дзень надвячоркам адбылося такое, што і ахнуць мала. Толькі селі мы сям'ёй вячэраць, вярнуўшыся з поля, а на парог — дзядзька Калдоба, наш участковы міліцыянер, пры поўным, як гаворыцца, парадзе. Госць ён у нас рэдкі і сваім нечаканым прыходам усіх нас азадачыў. Я нават разгубіўся, ці не па маю душу ён прыйшоў з-за той бойкі са Скачком на калгасным двары, ці па Глыжку, які сёння ўкраў у калгасным садзе з дзесятак антонавак. За суседскія — нічога, а за калгасныя могуць і засудзіць ці бацьку штраф прыпаяць — народнае дабро. Закон цяпер наконт гэтага суровы.

Але Калдоба ні мяне, ні Глыжку не арыштаваў.

— Мой Юрка,— сказаў ён, прывітаўшыся,— прыходзіў сёння з вучылішча, хацеў пабачыць вашага Івана, ды не знайшоў. Дык вось ён пераказаў: няхай заўтра ідзе — яго як быццам іхні генерал выклікае.

Усе за сталом так і анямелі, а я збянтэжыўся і перапалохаўся яшчэ больш, як тады, калі думаў, што мне за бойку нагарыць. Гэта ж у галаве не змяшчаецца — сам генерал! Усе на мяне глядзяць, нібы ніколі да гэтага не бачылі. Сам генерал — падумаць толькі!

— Вось і пакет яму,— дабіў нас зусім Калдоба, з усмешкай падаючы мне нейкую шэрую паперку.— Каб па пошце доўга не ішоў, вось мой Юрка за кур'ера і даставіў.

Бацька пераняў з маіх рук «пакет» — звычайную паштоўку без маркі,— прабег вачыма напісанае сам, а потым ужо вярнуў мне. А там усяго некалькі слоў: прыбыць у вучылішча 25 жніўня, а чаму і для чаго — ні гу-гу.

Калі Юркаў бацька, пажадаўшы ўсяго найлепшага, пайшоў з хаты, бабуля кінулася ў паніку. У яе свае трывогі: чалавека кліча генерал, а ў чым да яго пойдзе тэты чалавек? Да генералаў, мабыць жа, у такіх штанах не ходзяць. Ці даўно яна іх латала — перад першым паходам у вучылішча, а я на снапах іх зноў падраў, на мне ўсё гарыць — не напасешся. I я супакоіў старую:

— Не перажывай, нікуды я не пайду!

Але гэта ўстрывожыла бацьку: як гэта я не пайду? Генерал жа дарма клікаць не будзе, а калі кліча, значыць, справу да мяне мае. Можа, ён дактарам там даў наганяй і загадаў прыняць мяне і з маім бракам, калі ён у мяне ёсць. Генералы ўсё могуць, на тое яны і генералы. Ён, мой бацька, у арміі паслужыў, дзякуй богу, і да вайны, і на вайне, і сам камандзір — усё ж такі сяржант, што таксама немалы чын пры трох класах адукацыі,— і генералаў добра ведае: гэта народ сур'ёзны, і грэбаваць імі не варта.

Ды хто ж гэта сказаў, што я, Іван, грэбую генераламі? Мне проста, між намі кажучы, боязна з непрывычкі і сапраўды сорамна з-за сваіх штаноў. Ды і адкуль бацька ведае, што мне можа зрабіць генерал? А ён можа мне загадаць нанава перапісаць дыктант, і, калі зноў правалюся, тады ўжо хлуснёй пра медкамісію не адбаярышся, тады ўжо і зусім хоць дамоў не вяртайся.

Мне супраць бацькі крыць няма чым і таму хапаюся за бабульчыны трывогі пра маю вопратку:

— А як я ў гэтым пайду? Што я скажу?

А ў бацькі і тут свае козыры. Па-першае, генерал не з неба ўпаў і павінен разумець цяперашнія нашы дастаткі. А па-другое, размаўляць з ім не трэба. Яны гэтага не любяць. Гэта бацька на сваей скуры спазнаў. Яны любяць, каб ім толькі рапартавалі.

I тут бацька вылез з-за стала і паказаў, як гэта робіцца. А робіцца вельмі проста. Вось падыходзіш ты да генерала — руку да скроні і еш яго поедам вачыма, а сам у той жа час, не шкадуючы голасу, крычы: «Таварыш генерал! Іван Сырцоў з'явіўся!» I баяцца іх няма чаго. Бацька на фронце сутыкнуўся аднойчы нават з маршалам, і той яго не ўкусіў. А тут усяго генерал, ды яшчэ, мабыць, не самы важны, калі паставілі над такімі, як мы з Санькам.

А бабуля мяне з другога боку цярэбіць:

— Бяжы на возера ды хоць трохі памыйся, бо, калі па-добраму, дык цябе і адмочваць трэба.

Затым на Глыжку наляцела:

— Кідай сваю бульбу — не з галоднага краю, цэлая яна будзе, потым увамнеш.

Толькі брат вылез з-за стала — яна яму змылак у рукі і рагожу:

— Спіну патры не лянуючыся. Ды змылак не ўтапі, ідал бязрукі, я ўжо год яго берагу!

Увесь вечар у хаце было столькі тлуму, быццам на пажары. Не паспеў я з Глыжкам прыйсці з возера, вымыты дзеля заўтрашняга візіту да генерала чысцей за шкло, бабка похапкам пачала зашываць штаны, а потым пабегла іх праць на раўчак. Пакуль сонца сядзе, дык яшчэ высахнуць. А бацька знайшоў шавецкую лапу і ўзяўся падбіваць падэшвы на салдацкіх чаравіках, якія пачалі ўжо прасіць кашы. Затым ён наваксіў чаравікі дзёгцем, каб не былі такія каляныя і рудыя.

Вось ужо на вуліцы дзяўчаты і прыпеўкі пра лейтэнанта з маёрам заспявалі, мабыць, да іх яшчэ не дайшло, што мяне выклікае генерал. Але ў хаце да іх ніхто не прыслухоўваецца, яшчэ ўсім нам няма ўгамону. Бацька цяпер за цырульніка. Пасадзіўшы мяне пад самую лямпу, ён кароціць мне віхор. Я прашу, каб ён зрабіў «пад польку», а ён просіць, каб я не круціў галавой, а то зробіць «пад Катоўскага».

А бабуля тым часам гыркае на стале качалкай-рубчаткай — прасуе мае штаны, бо пасля мыцця іх нібы карова пажавала. З-за гэтага самага гыркання і прыпевак з балалайкай з вуліцы не чуваць.

У рэшце рэшт бабуля прышыла да каўняра кашулі замест згубленага армейскі гузік ад зношанай ушчэнт бацькавай гімнасцёркі і хукнула на лямпу. Усе ўгаманіліся і ляглі спаць. Вось як яно бывае, калі цябе знянацку пакліча генерал.

Ды яно і раніцай яшчэ адзін раз генерала ўспомнілі. Выйшлі мы, паснедаўшы, з двара. Бацька, бабуля і Глыжка, каб ісці ў калгас, а я — у вучылішча. Тут сустрэлася наша суседка, цётка Пёкла, паглядзела, што такі прыбраны і нават у чаравіках, быццам у сваты сабраўся, і спытала ў бабкі:

— Хіба ваш хлопец не ў калгас?

— Ат,— зняважліва махнула старая рукой і не то пахвалілася, не то паскардзілася,— маўчы, мая тайка, генерал жа во заве.

Атрымалася ў яе так, быццам гэта для нас звычайная рэч і ўжо знадаелі ёй гэтыя генеральскія перазовы горш за горкую рэдзьку.

Мы развіталіся, мне пажадалі ўдачы, і я з кволай надзеяй у душы адправіўся ў дарогу. Што яно будзе і як яно будзе — цёмная ноч. Добра было б, каб я спадабаўся генералу.

Баця i маятнiк

Я ніколі ў жыцці яшчэ не бачыў сваіх генералаў. Нямецкага ў вайну — давялося, дык і то здалёк. Праўда, гэта я зараз думаю, што то быў генерал, а можа, гэта і не ён, можа, якая іншая важная шышка ў пагонах пляцёнкай. Помню толькі, што бегалі перад ім немцы нібы апантаныя, цягнуліся ў струну, ляскалі абцасамі, а калі садзіўся ў легкавушку, нават дзверцы яму салдат адчыніў. Сам, бачыце, не мог — пан вялікі. А свае генералы нашу вёску чамусьці абміналі, хоць рознага войска цераз яе ішло і нямала, ці, можа, і заязджаў каторы, ды не трапіўся мне на вочы. Канешне, я разумею, што свой генерал — тэта свой, але ўсё ж такі і не са звычайнага поля ягада — начальства вялікае, не калгасная брыгадзірка цётка Нінка. А мне ж не толькі на яго глядзець, мабыць, і размаўляць давядзецца, штосьці ж ён у мяне пытаць будзе. Добра, калі дагаджу адказам, а калі, крый божа, язык праглыну ці буду мямліць свае «ыгы»? Тут трэба набрацца смеласці. I ўсю дарогу я то набіраўся яе, то зноў губляў, і чым бліжэй да вучылішча, тым меней яе заставалася.

На мае шчасце, адразу на КПП сустрэў Юрка, як заўсёды, увесь адпрасаваны і начышчаны. Ён, аказваецца, даўно мяне тут пільнуе, каб зноў не прычапіліся якія-небудзь салагі. Юрка сам мяне правядзе ледзь не да генеральскага парога, каб я не бадзяўся абы-дзе, а своечасова быў на месцы як штык. Дзеля гэтага ён нават змыўся ад свайго старшыны, за што, вядома, можа і нагарэць, калі той схамянецца. Ну, скажыце, як такога таварыша не любіць? Гэта ж не Юрка, а — родны брат. 3 такім, як кажуць, і ў разведку можна ісці. А калісьці я думаў, што ён самахвал,— там, на нашых вясковых танцах.

— Ты генерала не бойся, не будзь мямляй,— быццам заглянуўшы ў маю душу, падбадзёрвае мяне Юрка дарогай,— у нас Баця справядлівы. Праўда, і строгі, але стружку здымае больш з афіцэраў.

Маім вушам не верылася: генерал і — Баця. Я гэтаму вельмі здзівіўся і абрадаваўся, душа крыху супакоілася, пачала вяртацца мая адвага. Калі б ён яшчэ і стружкі не здымаў, можна было б і зусім асмялець. Толькі ж чаго мяне кліча той Баця?

— А недабор,— растлумачыў Юрка.— Прыймовая камісія перастаралася, многа адсеяла.

Цяпер я ў душы злараднічаў: так ім і трэба, а то пераборлівыя вельмі — той ім не падыходзіць, гэты ім не падабаецца, падавай ім адных выдатнікаў. Гэта ж добра, што Баця-генерал справядлівы, мабыць, ён паказаў той камісіі, дзе ракі зімуюць, каб не грэбавалі такімі, як я.

У доўгім калідоры, пад дзвярыма генеральскага кабінета, якія абабіты чорнай цыратай, з надпісам на шкляной таблічцы: «Начальнік вучылішча» таўклося адсеяных душ з пятнаццаць. I ў мяне ўжо каторы раз за сённяшні дзень зноў спынілася сэрца. Па тварах хлопцаў я здагадаўся, што паперка ў маёй руцэ — гэта яшчэ не ўсё, што казаць «гоп» яшчэ рана. Напэўна, генерал сам высеўкі перасявае. I як у ваду глядзеў!

Нас пачалі выклікаць у кабінет па адным. Першыя двое выскачылі з кабінета праз адну-дзве хвіліны з усмешкай на ўсе зубы — залічаны. А ў іх жа таксама адзнакі на экзамены былі не золата. Народ пад дзвярыма павесялеў, а з народам — і я. Прарвёмся!

А трэці быў там з паўгадзіны. Што там генерал з ім робіць, чаму так доўга трымае? Смялейшыя спрабавалі нават падгледзець у замочную шчыліну — ні хваробы не відаць. Хлопцы затрывожыліся — і нездарма: выйшаў ён адтуль чырвоны, разгублены, нічога нам не сказаў, толькі ў роспачы махнуў рукой і падаўся моўчкі на вуліцу. А што тут гаварыць — не прынялі.

Пасля гэтага выклікалі мяне. Я пераступіў генеральскі парог нібы ў сне, пераступіў і адразу разгубіўся, бо зразумеў, што гэпаць па генеральскай падлозе маімі чаравікамі, як вучыў нас с Санькам той салага пры першым нашым з'яўленні ў вучылішчы, мабыць, нельга: падлога тут далікатная — не з дошак, а нейкіх клёпак у елку,— таму па бацькавай навуцы і пачаў рапартаваць з самага парога:

— Таварыш генерал!

I не пазнаў свайго голасу, быццам я свісток праглынуў, такі ён аказаўся тонкі. А мне ж трэба быць бойкім, смелым хлопцам. I, збіўшыся, я залямантаваў яшчэ гучней:

— Таварыш генерал! — і зусім заблытаўся.— З'явіўся... прыбыў... Сырцоў... па вашаму загаду... не — выкліку!..

Атрымаўся не рапарт, а гора, і будзе дзіва, калі мяне адсюль не вытураць за такі рапарт.

Генерала я пазнаў адразу, хоць за сталом сядзела трое: ён зусім сівы і старэйшы за астатніх, зусім не такі, як мне ўяўлялася. Я чамусьці думаў, што ў яго павінна быць пуза, як у туза, бо генералаў жа, мабыць, нішчымнай бульбай не кормяць, мабыць, ім і сала неўпоед, а ён сядзіць худоба худобінай, на шчоках глыбокія барозны зверху ўніз, адно што мундзір і залатыя пагоны, а так і не сказаў бы, што генерал. Афіцэры, што былі з ім побач, моўчкі ўсміхаліся, гледзячы на мяне, а сам ён — ні-ні, сур'ёзны, толькі сказаў:

— Не ўмееш і не трэба. Падыдзі бліжэй.

Тут і пасыпалася, нібы з мяшка: адкуль я, хто бацька, ваяваў ён ці не, хто яшчэ ў сям'і ёсць. Гэта ўсё цікавіліся афіцэры, і я адбіваўся ад іх як мог: дзе бойка адказваў, а дзе злятала з языка адно «ыгы». А генерал тым часам маўчаў, разглядваў нейкія паперы. Хоць бы ён спыніў іх, а то я ўжо і потам пакрыўся. Нарэшце абазваўся і ён:

— Па матэматыцы ў яго даволі прыстойна, нават пяцёрка ёсць...

I ў мяне камень зваліўся з душы: значыць, Баця за мяне. Правільна Юрка казаў, што ён справядлівы, а гэтыя прычапіліся як сляпы да плота — хто, ды што, ды адкуль?

— А вось што будзем з двойкай рабіць па дыктанту, а? — гэта ўжо генерал звяртаўся да мяне.— Што скажаш, хлопча?

А што я скажу? Сказаць мне няма чаго, я толькі стаю і сам сабе думаю: будзь ты чалавекам, генерал, паглядзі на мяне — я ж харошы. Ну, з кім не бывае? Але да яго мае думкі не даходзяць, ён разгаварыўся не на жарты. Яму не трэба невукі. Што такое афіцэр, ды яшчэ артылерыйскі? Ён павінен быць пісьменным, і не проста пісьменным, а шырока адукаваным чалавекам, каб разбірацца не толькі ў гарматах, ён павінен быць, нібы дома, і ў літаратуры, і ў мастацтве, і, калі хочаце, у музыцы. Афіцэр — гэта свецкі чалавек, а не салдафон з пустой галавой, за яго не павінна быць сорамна, калі ён выйдзе на людзі, каб на яго не паказвалі пальцам і не гаварылі: а яшчэ афіцэр! Ён павінен быць узорам для сваіх салдат, якіх яму давядзецца вучыць і выхоўваць, і наогул — для ўсіх. Афіцэрства не ў залатых пагонах, не ў зорках на плячах, а ў высокай культуры.

I чым болын генерал гаворыць, тым менш у мяне надзеі: няма ў мяне ні такой культуры, ні свецкасці, якой яму хочацца, адно што нос ужо рукавом не выціраю. Ну, і ў музыцы крыху петру — «Сербіянку» ад «Страдания» адрозніць магу.

Але ўсяго таго, чаго ён ужо нагаварыў, яму яшчэ мала. Афіцэр павінен валодаць і замежнай мовай, а тут, калі ласка,— і ў сваёй, нібы ў цёмным лесе.

— Ты зразумеў, хлопча? — спытаў, нарэшце, мяне генерал.

Я ўсё зразумеў, апрача аднаго — прымаюць мяне ці выганяюць,— і на ўсялякі выпадак хацеў сказаць «так точно», а атрымалася зноў праклятае «ыгы».

— Ну, калі «ыгы»,— падвёў вынік генерал,— то запішам мы цябе ў другую батарэю да падпалкоўніка Асташэўскага. А за рускую мову, хлопча, вазьміся як след!

— Благадар-ру! — адчаканіў я тут жа чыста па-руску і з паперкай у руцэ, якую мне даў афіцэр, што сядзеў побач з Бацем, выпырхнуў з кабінета, ледзь дзверы лбом не высадзіў ад радасці.

— Прынялі! — выпаліў я хлопцам, што пакутавалі яшчэ пад генеральскімі дзвярыма, і яны зноў павесялелі.

— Прынялі! — радасна сказаў я Юрку, які чакаў мяне на двары, каб не мазоліць вачэй начальству каля генеральскага кабінета. Юрка таксама абрадаваўся, моцна паціснуў мне руку, але, прачытаўшы паперку, што мне далі ў генерала, чамусьці расчаравана прысвіснуў:

— Да Асташэўскага?

Я ўстрывожыўся: што такое, чым яму не падабаецца падпалкоўнік Асташэўскі?

— Маятнік? Гэта ж самы занудлівы камбат...

— А чаму — Маятнік?

— Сам убачыш,— загадкава ўсміхнуўся мой апякун.

Але маю радасць нішто не магло зацьміць. Я ўжо — не шпак, мяне прынялі ў вучылішча, я генерала не спалохаўся, дык што мне цяпер нейкі Маятнік? Ён жа мяне не з'есць. Вядома, было б лепей трапіць да маёра Барданоса, якога так нахвальвае Юрка, той быццам свой у дошку, але ж тут ужо капрызіць не будзеш, не дома, каб строіць гіморы.

Нарэшце мы з Юркам развіталіся, ён пайшоў у сваю казарму, а я ўжо — у сваю. На лесвіцы, што вяла на другі паверх, праверыў, ці ўсё мае на сваім месцы. Здаецца, усё: кепка на макушцы, каўнер кашулі зашпілены на вайсковы гузік, адно што раменьчык на штанах трэба падцягнуць на апошнюю дзірачку — падвяло жывот. Толькі вось бацькавым чаравікам нічога не зробіш. На дзёгаць, якім іх наваксілі дзеля чарнаты, наліпла столькі пылу, што не відаць ні чорнага, ні рудога. Тут ужо чысці іх хоць трэсні, а блішчаць яны не будуць. I толькі прывёўшы сябе ў поўны парадак, я ўзяўся за клямку высачэзных і цяжкіх дзвярэй. Якая яна там, казарма?

Першы мне трапіўся на вочы новаспечаны салага. Стрыжаны «пад Катоўскага», у новай вайсковай адзежы, якая тапырылася на ім лубам, ён, нібы каменны, стаяў ля сцяны калідора побач з тумбачкай і глядзеў на мяне, як пралетарый на буржуя — падазрона і сурова. Я зразумеў, што ён касцьмі ляжа, а чужынца не прапусціць. Пранізаўшы мяне пільным позіркам, ён ледзь-ледзь усміхнуўся пагардлівай усмешкай. Зразумела — на яго стрыжанай галаве пілотка з зоркай, на плячах пагоны, пояс з меднай бляхай, а на мне з вайсковай амуніцыі ўсяго бацькаў гузік ды скараходы. Толькі пляваў я на яго усмешку.

— Падпалкоўніку ад генерала!

Вось гэта я яго агрэў! Куцы і важнасць падзелася, разгубіўся хлопец, не ведае, што рабіць, бо сам зялёны. Ён спачатку быў памкнуўся з маёй паперкай кудысьці бегчы, а потым схамянуўся і зноў да тумбачкі прырос, вярнуў мне яе назад. Можна падумаць, што ў той тумбачцы золата і яе нельга пакінуць без нагляду. Я хачу ісці ў дзверы, а ён мяне не пускае — стой. Ну і стаім адзін супраць аднаго, нібы казлы, сустрэўшыся на кладцы. Ён, бачыце, днявальны і пастаўлены тут, каб не пускаць пабочных асоб. Што гэта за чын такі, я дагэтуль і не чуў, але думаю, што невялікі. У мяне генеральская папера, і днявальны мне не перашкода: выбраў момант, калі ён даў зяўка, і — з калідора ў казарму.

Дык вось яна якая — гумно ў калгасе меншае! Справа і злева ўздоўж сцен з вялізнымі вокнамі даўжэзныя рады ложкаў. Між імі мітусіцца абмундзіраваны, стрыжаны народ — галовы, быццам качаны. Што робяць хлопцы, не разумею: ці то яны прыбіраюць, ці то сцелюць пасцелі. Адзін побач са мной, прыгнуўшыся да спінкі ложка, цэліцца, нібы з ружжа, і рукой махае то туды, то сюды, а іншыя па яго камандзе раўняюць спінкі ложкаў, каб было, быццам пад лінейку. Сярэдзіна казармы ложкамі не застаўлена — вуліца вуліцай. Па ей туды-сюды шпацыруе афіцэр, назіраючы за хлапечай мітуснёй. Дзіўна мне, вясковаму, на ўсё гэта глядзець, хаця я па бацькавых расказах прыблізна так сабе казарму і ўяўляў.

Але вось афіцэр спыніўся. Высокі, крыху ў жываце паўнаваты — і пачаў на месцы ківацца. Заклаўшы вялікія пальцы рук за сваю папругу, ён то падымаецца на насках, то ападае на абцасы і ўсім тулавам хістаецца — наперад-назад, назад-наперад,— а сам арліным позіркам паглядае вакол сябе. Дык гэта ж і ёсць Маятнік — падпалкоўнік Асташэўскі.

I тут ужо я падлогі не пашкадаваў — не з далікатных клёпак — і добра такі тупнуў разы са тры, падыходзячы да яго. Па-мойму, падпалкоўнік вельмі здзівіўся майму нечаканаму з'яўленню, ён нават перастаў ківацца і здзіўлена спытаў:

— А гэта яшчэ што за з'яўленне Хрыста народу?

Я лыпаю вачыма, не магу даўмецца, якое дачыненне мае да мяне Хрыстос, а ўсім, хто гэта пачуў, смешна. Генеральскую паперку падпалкоўнік прачытаў уважліва, нават глянуў на адваротны чысты бок, ці не напісана і там чаго. А затым — мала мне было ў Баці — свой пачаў допыт:

— Як здаў геаметрыю?

— Чатыры,— буркнуў я пад нос.

— Не чую!

Мала таго, што Маятнік, дык ён яшчэ і глухі.

— Чатыр-ры! — бадзёра паўтарыў я яму.

— А фізіку? — не супакоіўся ён.

— А фізіку — на «пяць»,— з годнасцю і з разлікам на яго недачуванне гучна адказаў я.

Чую, што паласкавеў:

— Глядзі, які Ньютан! Малайчына!

Думалася, што пасля гэтага ён адчэпіцца, не — зноў цягне жылы:

— А дыктант?

Памятаючы бацькоўскі наказ, да гэтага пытання я еў падпалкоўніка вачыма, так ужо глядзеў яму ў твар, як наш заўсёды галодны Жук на кавалак хлеба, адно хвастом не віляў, дык толькі таму, што ў мяне няма, а тут апусціў галаву і прашаптаў, ледзь сам сябе пачуў:

— Двойка.

Не, не такі ён ужо і глухі, пра двойку дык і шэпт пачуў. Яго нібы ўкусілі ці варам аблілі:

— Што? Двойка! Выганю!

3 сёмага неба, на якім я ўжо быў пасля размовы пра фізіку, я паляцеў у апраметную. Уся казарма прыціхла, быццам у ей не было ні душы. Няма чаго і казаць, што калі б было можна ў тэты момант мне куды-небудзь знікнуць, зашыцца ў якую-небудзь шчыліну ці вераб'ём выпырхнуць у фортку, то я не чакаў бы і хвіліны. Але я не мыш і не верабей — нікуды не зашыўся і не выпырхнуў, а стаю ёлупнем і, як гаворыцца,— ні мур-мур. Праўда, я не зусім гэтаму Маятніку веру, не такі я ўжо і прасцяк: калі сам генерал з маёй двойкай змірыўся, дык куды ён дзенецца — усяго падпалкоўнік.

Але ўсё адно страшна.

— Выганю! — грозна паўтарыў ён яшчэ раз мне ў макушку і больш спакойна дадаў: — Калі ў першай чвэрці не выправіш на чатыры. Будзеш потым хадзіць невукам па горадзе і чытаць шыльды па складах, дзярэўня-матухна.

I я зразумеў, што навальніца мінула, нікуды ён мяне не выганіць, што мяне хутка абмундзіруюць, як і ўсіх, паставяць, нарэшпе на катлавое забеспячэнне і буду я есці армейскi паек і вучыцца. А за двойку няхай падпалкоўнік вельмі не хвалюецца: за чвэрць можна чорту рогi абламаць, не тое што вывучыць граматыку. Не буду я чытаць шыльды па складах, няхай не грозіць.

Асмялеўшы я падняў галаву i зноў пачаў есці яго вачыма на поўныя зрэнкі. I тут краем вока ў самым дальнiм куце казамы зауважыў Саньку — галава голая, нiбы гаршчок, вушы лапухамi. Ён радасна мне ўсмiхаецца i падмiргвае. Жывём, дружа!

Што за чын такi — каптэнармус?

— Дзяжурны, каптэнармуса сюды!— зычна гукнуў падпалкоўнiк i зноў пачаў то падымацца на наскі, то апускацца на абцасы начышчаных да бляску ботаў. А я стаю — рукі па швах — i стараюся ўцямiць што за чын такі каптэнармус — i навошта ён падналкоўніку спатрэбіўся.

Здаецца ж, у школе з ваенкіраўніком мы добра штудзіравалі ўсе вайсковыя званнi, а каптэнармус сярод iх не трапляўся. Выходзщь, што і ваенкiраўнiк не ўсё ведае, хоць i хвалiўся, што ён былы афiцэр.

А подпалкоўнiк ужо зусім супакоіўся, мабыць, забыў пра маю двойку стаiць i ўсё хістаецца, разглядваючы мяне зверху ўніз, а я ўкрадкi разглядваю яго. Твар у падпалкоўніка нейкі стомлены, i хонь не скажаш што худы, пад вачыма чорныя, запалыя кругi, нiбы акуляры, а самi вочы сумныя і заклапочаныя. Вось ён кiнуў кiвацца не спяшаючыся, абышоў вакол мяне i так цяжка ўздыхнуў, што мне шкада яго стала. Можа, гора якое ў чалавека? А можа, я яму не па густу, дык думае, як збавiцца ад такога золатка.

I тут з'яўляецца знаёмы мне старшына — той самы, што нас з Санькам вытурыў са строю, калi мы прымазаліся да іншагародніх яшчэ да здачы экзаменаў, ён мяне цяпер не пазнаў, а я яго — як аблупленнага: нос — бог семярым нёс, казырок — лапатай, а вайсковай выпраўкай i не пахне. Дзядзька з калгаса, а не старшына. I прозвiшча калгаснае — Хамутоў. Гэта яз Яго рапарту падпалкаўнiку дазнаўся толькi што. Дык няўжо гэта ён i старшына i каптэнармус адразу?

— Старшына, вазьміце-тка вы гэтага нямытага Ньютана ды зрабіце яму такую апрацоўку, каб аж чарцям моташна стала, і не тое што вопратку — скуру здыміце,— распарадзіуся падпалкоўнік,— а то ён нам можа дыверсантаў напусцiць.

— Яшчэ і як можа, таварыш падпалкоўнік,— згадзіўся старшына, ацаніўшы мяне кароткім позіркам, і загадаў:— За мной!

Што падпалкоўнік меў на ўвазе пад дыверсантамі, тут вялікім здагадзькам быць не трэба. Хоць і сорамна прызнацца, а ёсць яны ў мяне — вошкі, тут бога няма чаго гнявіць. I нас з бабулькай не трэба вінаваціць: гадамі мыла ў вочы не бачылі. Яго ў нашай краме, ды і ў гарадскіх магазінах, днём з агнём не знойдзеш, а купляць на базары з рук, у спекулянтаў,— цана кусаецца, трэба мех грошай. За мыла аддасі і без штаноў застанешся, не будзе чаго і мыць тым мылам. Вось і золіць старая нашы транты попелам. А попел што? Яго дыверсанты баяцца, але не вельмі.

Толькі ж як гэта каптэнармус мяне будзе так жудасна апрацоўваць, што чарцям стане моташна? Пакуль тым чарцям, дык мне першаму ад такога загаду крыху не па сабе. Яшчэ абмажуць чым-небудзь смярдзючым, як тады пасля сыпняку хату аблівалі. Будзе тады — хоць нос затыкай. А могуць і тым самым дустам, пра які бабка марыць не менш, як гіра мыла, але таксама нідзе здабыць не можа. Словам, знойдуць сродак, што, чаго добрага, скура і сапраўды злезе. Але ўсе ж вунь жывыя, і я не памру. Што людзям, тое і нам.

Загадаўшы пачакаць яго ў калідоры непадалёку ад днявальнага, які цяпер мне на хвост солі можа насыпаць, а не выгнаць, каптэнармус прывёў сюды яшчэ трох такіх жа, як і я, з былых адсеяных, а сам зноў знік за дзвярыма з незразумелым надпісам «Капцёрка». Відаць, тут і будуць нас заліць, бо слова гэта нейкае дзяручае.

Пакуль ён там быў, мы крыху паміж сабой і пазнаёміліся, можна сказаць, толькі абнюхаліся. Хлапчыну, што стаяў бліжэй да мяне, звалі проста Толікам, затое прозвішча гучнае — Гецьман. Штосьці ёсць у ім такое ваяўнічае, казацкае. Я нават пазайздросціў, хаця сам Гецьман ціхі, рахманы, нібы цяля. Ён, аказваецца, з Рэпак, што на Украіне.

А побач з ім з густымі кучаравымі валасамі — Лёва. Гэтаму не стаіцца на месцы, ён нібы на іголках. Прозвішча Белкін, а сам магілёўскі. Легка запамінаецца — Лёва з Магілёва.

Самы высокі з нас, чорны і гарбаносы — Надар. Мне здалося, што я недачуў, і перапытаў:

— Назар?

А ён чамусьці пакрыўдзіўся і паўтарыў гучна, нібы глухому:

— Надар — гавару табе па-руску. Грузія. Чуў — не?

Нарэшце дзверы капцёркі адчыніліся, і старшына не запрасіў нас у яе, а вынес два ладна такі напоўненыя нечым мяшкі. Адзін з іх ён усучыў мне, другі — Лёву, і мы ўсе чацвёра пайшлі табуном услед за ім на вуліцу. Тут каптэнармус узяў нас у шоры, адразу даў зразумець, што мы ўжо на вайсковай службе, а тут кампанія больш за двух табуном не ходзіць, а ходзіць строем. Таму ён і паставіў нас у калону па адным, і мы бадзёра пакрочылі немаведама куды, адтоптваючы адзін аднаму пяты. Праўда, наш камандзір падказваў, якую за якой нагу трэба ставіць на зямлю:

— Левай, левай!

Але гэта мала дапамагала, і ўсё адно мы доўга яшчэ блыталіся ў дзвюх сваіх нагах: хто — левай, а хто — правай. За казармай нам сустрэўся такі ж строй.

— Ну і гвардзейцы ў нас з табой,— сказаў чужы старшына нашаму, а наш яго абнадзеіў:

— Нічога — абчэшуцца.

— Вы ім камандуйце: сена-салома! — параілі старшынам двое выхаванцаў-старшакласнікаў.— Яны ж не разумеюць, дзе левая нага, дзе правая!

I весела зарагаталі нашай «калоне» наўздагон. Але ў канцы маршу мы пайшлі ўжо ў лад. А заканчваўся ён каля прыземістага цаглянага будынка — каля лазні.

Апрацоўка была не абы-якая — санітарная. Пачалася яна з таго, што старшыны ўзялі машынкі і за пяць мінут абалванілі ўсім галовы, хоць шаром пакаці. Пры гэтым наш дабрадушна пасмейваўся:

— Кажуць, у іх дыверсантаў няма. Ды яны тут строем ходзяць, аж сцежкі павытоптвалі!

Усе мы пакорна ішлі пад машынку, толькі наш грузін спахапіўся ў пусты след, калі паглядзеўся ў асколак затуманенага люстэрка, прымацаванага на сцяне.

— Вай-вай!— усклікнуў ён.— Як мама пазнае, а?

А я, зірнуўшы ў тое шкельца, нічога не сказаў, а толькі падумаў: бывайце, танцы ў парадным мундзіры, на паўгода, не менш. Не галава — кавун, і вушы выраслі.

3 нашай вопраткай расправіліся яшчэ горш, як з чубамі. Старшына загадаў скінуць з сябе ўсё да ніткі ў вялікую фанерную скрыню, а затым паклікаў дзеда-качагара і кіўнуў пальцам:

— У печ!

Я абрадаваўся: нарэшце абмундзіруюць, не павядзе ж ён нас адсюль у чым маці нарадзіла. Чаго мне было толькі шкада, дык гэта бацькавых салдацкіх чаравікаў. На мае здзіўленне, пашкадаваў іх і каптэнармус.

— Чые? — спытаў ён і, звязаўшы парай, сунуў у іх паперку з маім прозвішчам. Мабыць, аддасць назад.

Са старшынскіх рук мы трапілі ў рукі дзядзькі ў белым халаце. Гэта быў санітар. Ён дастрыгаў тое, чаго не выстрыглі старшыны,— пушок, у каго ён ужо вырас пад пахамі і яшчэ дзе-небудзь,— і тут жа квачом пэцкаў выстрыжаныя месцы сапраўды такім смярдзючым, што карболка супраць яго — адэкалон. Было гідка і сорамна. Але што тут зробіш? Цярпі казак — атаманам будзеш.

I вось стаім мы ўсе перад старшынамі стрыжаныя, аблавухія, голенькія, парахманелыя, канфузімся, што на такіх на нас глядзяць чужыя людзі. А санітар дык яшчэ і пад'ягорвае: нам, маўляў, не ў вайсковае вучылішча, а прамым ходам — у медыцынскае. Там шкілеты патрабуюцца для вывучэння касцей, там нас адразу схапілі б. Асабліва, на яго думку, прыгадзіўся б я. Там мяне медыкі з рукамі адарвалі б для сваёй навукі. На мне ўсё відаць: і маслы, і пазванкі, і рэбры.

Як каму, а мне гэтыя жарты не спадабаліся. Разумнік вялікі. Няхай бы сам на нішчымнай бульбе з гуркамі пасядзеў, дык я пабачыў бы, які ён карак наеў бы. Дзякуй, каптэнармус Хамутоў за мяне заступіўся.

— Не плявузгай ты абы-чаго, а калі гаворыш, дык адкусвай,— асадзіў ён «медыка».

Апошні раз да гэтага дня я мыўся ў лазні яшчэ да вайны. Добрая тады ў калгасе была лазня, вялікая, цэлая хата з трысценам. Стаяла яна на беразе нашага раўчака, перагароджанага ў тым месцы грэбляй, каб было куды распараным да чырвані мужыкам і нырнуць. А што пары было ў парылцы — за адзін крок чалавека не відаць, хоць «ау» крычы. Аднойчы я пайшоў з бацькам парыцца, дык мне чужы дзядзька па недагляду галаву памыў і спіну рагожай пацёр, думаючы, што мые свайго хлопца. Вось колькі было там пары! Нам, падшыванцам, аж млосна рабілася. Але ў пачатку вайны лазня згарэла.

Толькі ж вы не падумайце, што ўсю вайну і два гады пасля яе я жыў нямыты. Летам у возеры купаўся, націраючыся глеем — адзін чорт, што і мыла, толькі не пеніцца. А зімой іншы раз, калі ўжо зусім ад «дыверсантаў» паратунку не было,— у ночвах без глею, затое вада з попелам — шчолак. Праўда, у ночвах не наныраешся, але можна было жыць. Усе так жылі і жывуць пакуль што ў Падлюбічах.

А тут я ў гарадской лазні, у цаглянай. Зайшоў туды, дзе мыюцца,— ну і гамарня! А вады — разлівай колькі хочаш, яна розная з кранаў цячэ: і вар, і такая, нібы з калодзежа — лёд лёдам. Больш таго — пад столлю каля сцяны два сіты жалезныя, і адтуль вада ліўнем ільецца, толькі пакруці круцёлкі на трубе. Вось гэта раскоша — свет не бачыў! А тут яшчэ кожнаму далі па брусочку сапраўднага гаспадарчага мыла велічынёй з запалкавы карабок, якіх накроіў каптэнармус ніткай з вялікага бруса — не мыццё, а свята.

Вельмі добра ў тутэйшай лазні, цэлы б дзень мыўся, але ж трэба і галаву на плячах мець. Пасля памыўкі будуць жа новую абмундзіроўку даваць, так што варон лавіць не трэба, а то застануцца якія абноскі. Тады і будзе: на табе, нябожа, што нам нягожа.

I ці доўга тут мыць той стрыжаны макацёр? Пены з мыла напусціў, пад дожджыкам з-пад сіта абдаў — і паў-Івана гатова. Яшчэ пяць мінут пайшло, каб намыліць шыю ды Гецьману з Рэпак пацерці мне спіну. Мабыць жа, салдаты доўга не пялёскаюцца: ту-ды-сюды і — крокам руш. Хлопцы пырскаюцца, весела галёкаюць, абліваюцца з тазікаў вадой, шчасліва смяюцца, а я непрыкметна круць — і за дзверы. Пакуль яны там будуць бесклапотна шалець, дык мне ўжо ўсё новае выдадуць на выбар.

— Гатовы?— здзівіўся каптэнармус, і ў яго аж вочы пакруглелі.

— Гатовы!— бадзёра пацвердзіў я і нават пажартаваў: — Чаго там доўга размывацца? Яшчэ вароны схопяць, падумаюць, што сыр.

— Ну, калі гатовы, то ідзі сюды,— кіўнуў ён мне пальцам. А на лаве побач з ім раскладзены гімнасцёркі з пагонамі, штаны з чырвонымі канцікамі, горкамі ляжаць пілоткі, майкі і трусы — усё, што мы прывалаклі сюды ў мяхах.

Каптэнармус, замест таго каб даць мне тое, што належыць, раптам не на жартачкі раззлаваўся. Тут і пачалося! А хто мне з вушэй мыла будзе вымываць — нянька? А за вушамі? Там жа рэпу можна сеяць. Пад каптэнармусавым пальцам на маім плячы адкуль і ўзяліся брудныя качолкі. А ногі? Яны ж у мяне — не раўнуючы, кірзавыя боты. Мне іх за месяц не адмыць, калі нават буду вельмі старацца. I так пагнаў мяне старшына назад, што я ледзь дзверы лбом не высадзіў у мыльню:

— Ах ты, караўка!

3 такім жа поспехам пасля мяне вярнуўся назад і Генацвале — так мы паспелі ўжо ахрысціць нашага грузіна. А пасля спробы Лёвы з Магілёва ў мыльню з'явіўся і сам старшына Хамутоў, голы і з бярозавым венікам у руцэ.

— Скончылася мае цярпенне,— сурова сказаў ён.— Вы што — паслеплі? Парылкі не бачыце?

А ўслед за нашым каптэнармусам і не наш завітаў, і таксама з венікам. Тут ужо сапраўды як толькі з нас скура не пааблазіла. Гэта ж не парылка ў іх, а нейкае пекла: дыхнуць нельга, вушы ў трубачку скручваюцца ад спякоты, нібы лясная лістота на агні. Калі якога «дыверсанта» не выстрыглі і не атруцілі смярдзючым квачом, у гэтым пекле сам ногі выцягне. Мы охаем пад венікамі, звіваемся вужамі, а старшыны дзеда-качагара ахайваюць:

— Што гэта сёння стары слаба напаліў?

Пасля такой апрацовачкі і качолкі перасталі качацца, і мае ногі адмыліся — белыя, нібы ў паненкі, такімі я іх у жыцці не бачыў, і наогул пад рукой цела рыпіць, як капусны качан. I ўсе мы пачырванелі не горш за спелыя вішні. Аднаму толькі Гецьману дрэнна зрабілася, яму «медык» нешта нюхаць даваў.

3 лазні мы ідзём і ззяем ужо ў пілотках, у гімнасцёрках, у лёгкіх чаравіках. Праўда, некаторыя не зусім задаволены, а сярод іх і я: вопратка шыракаватая і ў плячах, і ў поясе, і каўняры — цэлыя прорвы. Але каптэнармус нас суцешыў: па-першае, усё пашыта на нармальных людзей, а не такіх заморкаў; па-другое, мы яшчэ будзем расці і раздавацца ў плячах, а дзяржава нам — не дойная карова, каб пераапранаць нас потым цераз кожны месяц; а галоўнае — мы ад'ядзімся, а яно пасля прачкі сядзе і тады будзе ў самы акурат. Ён жа гэта ведае. Толькі што нам з яго ведаў? Нам хочацца, каб адразу хоць плечы раздаліся, хоць абмундзіраванне сселася. Вельмі добра было б, каб ён тут жа і павёў нас ад'ядацца. Ён і павёў.

У сталоўцы, куды нарэшце прымаршыравала наша «калона», было ўжо бязлюдна. Вучылішча толькі-толькі паабедала і пайшло сытае з песнямі, якія яшчэ чуваць у аддаленні. А тут усяго некалькі выхаванцаў бразгочуць, не іначай у кузні, алюмініевымі міскамі і карцамі, прыбіраючы іх са сталоў. Я крыху затрывожыўся: як жа — будуць нас чакаць, ужо ўсё паелі і лыжкі аблізалі. I ўсё з-за старшынскага чыстаплюйства, з-за яго бярозавага веніка, каб ён згарэў.

Так яно, мабыць, і ёсць — старшына падышоў да акенца ў глухой сцяне сталоўкі, што падобна на амбразуру, за якім быў нехта ў белым халаце, і да маіх вушэй данеслася падазронае слова — «расход». Расход — не даход, тут любому зразумела, і, значыць, будзем мы смактаць лапу да вечара. Але, на мае здзіўленне, на падаконніку з'явілася каструля, з якой падымалася лёгкая пара. Нічога не зразумела: гавораць адно, а робяць другое. Тут трэба ўсё матаць на вус.

Паабедалі мы — царам такога не падаюць: расольнік на мясным навары — і такі, што лыжка стаіць, самай гушчы зачэрпалі, прасяной кашы па талерцы, і рыба да яе — называецца траска, а затым яшчэ і салодкі чырвоны кісель. Усё падмялі чыста. Праўда, з хлебам у мяне атрымалася няўвязка. Я ўсё бярог сваю порцыю, многа не адкусваў, каб хапіла і на расольнік, і на кашу, і на кісель, але перастараўся — засталося. Дык я яго, ужо выходзячы са сталоўкі, дажаваў нішчымны. Яно яшчэ і лепш — хоць адчуў смак чыстага хлеба. А ён, мабыць, не горшы за той, які прадаюць у горадзе па картках. Словам, можна жыць, калі такога хлеба застаецца пажаваць і пасля кісялю.

Справіліся мы з абедам хутка — каптэнармус і вокам плюснуць не паспеў, а можна было б і яшчэ хутчэй, калі б не манернічалі адзін перад адным. На чужых людзях усё ж такі няёмка каўтаць, не разжаваўшы, хоць і галодны, а непрыстойна. Ды і каптэнармус час ад часу тармазіў: то яму не сёрбай на ўсю сталоўку, то не чвякай — не ля карыта, то рукой не бяры — ёсць відэлец. А відэлец рэч ненадзейная, адвернецца старшына — зноў рукой. Але калі б мы ведалі, што будзе далей, то так старанна міскі не выскрабалі б і так ужо вельмі не манернічалі, а паспяшаліся б у казарму, дзе нас чакаў новы сюрпрыз. Я і думаць пра такое не думаў. Ну, здавалася б, што нам ужо трэба, якой такой трасцы? Памылі-напарылі, апранулі-абулі, накармілі-напаілі — лепш ужо і быць не можа. Не, аказваецца,— можа. Прывёўшы «калону» ў казарму, каптэнармус нечакана загадаў:

— Нікуды не разыходзіцца, атрымаць рэчавае забеспячэнне!

Катлавым мы ўжо толькі што забяспечыліся, абмундзіраванне далі, дык што ж яшчэ нам дадуць? Але што б там ні далі, адмаўляцца не буду. Як мая бабуля гаворыць: б'юць — бяжы, даюць — бяры.

Спачатку ўсе аднесліся да гэтага спакойна, але калі з капцёркі першы выйшаў Генацвале з абярэмкам рознага дабра, мы захваляваліся і, хоць нас засталося ўсяго трое, умудрыліся пад дзвярыма зрабіць такую ж таўкучку, як за хлебам на вуліцы Батарэйнай. Кожны пачаў лезці наперад, асабліва гэты Лёва з Магілёва. Ну і жук! Я яго плячом адпіхваю, а ён учапіўся за клямку кляшчом — не адарваць. А тут яшчэ тое цяля — Гецьман з Рэпак — між намі ўціснулася. Але я ўсё адно першы праслізнуў: толькі Лёва дзверы адчыніў, я — коўзь — і там.

Дык вось яна якая — таямнічая «капцёрка»! Таго ў ніводным магазіне няма, што ёсць тут: просціны, шчоткі, падушкі, вакса, шынялі, зубны парашок, мыла, чаравікі — усяго патроху, аж вочы разбягаюцца. I ўсё дарма, без грошай — толькі распісвайся ў ведамасці, што атрымаў. Усяго за некалькі мінут я наставіў сваіх подпісаў у каптэнармусавых паперах, мабыць, у пяць разоў больш, чым за ўсё сваё жыццё. Яно і не дзіва, бо апрача абмундзіравання, якое было ўжо на мне, і розных іншых рэчаў, без якіх не можа абысціся ні адзін вайсковы чалавек,— артылерыйскіх эмблем на пагонах, зорачкі на пілотцы, папругі з меднай бляхай,— старшына надаваў мне яшчэ і такога, якое хіба дзяўчатам і трэба, ды не ў кожнай яно цяпер і ёсць. Духмянае мыла, напрыклад, і аж трайны, а не адзінарны, адэкалон. Такое і Каці з Сонькай не снілася, не кажучы пра падлюбскіх шпакоў. А хоць і насоўкі, каб у голую жменю не смаркацца. Зразумела, што ад гэтага давядзецца адвыкаць, а зубы чысціць — прывыкаць. Нездарма ж выдадзена скрыначка з парашком і шчотачка ў футлярчыку. Словам, будзем квітнець і пахнуць! Нават іголку не забыўся каптэнармус укалоць мне ў пілотку і абматаць яе крыж-накрыж зялёнай ніткай, каб я ведаў, як гэта робіцца. А белых нітак — поўную катушку! Я імі павінен падкаўнерыкі падшываць. Не хапала мне толькі напарстка. Завяршылася рэчавае забеспячэнне дзвюма свежымі просцінамі. Старшына праверыў мае подпісы ў ведамасці, дапамог згрузіць усё дабро ў навалачку і — марш з капцёркі. Наступны!

Вось і заканчваецца першы дзень маёй вайсковай службы. Цяжкі гэта быў дзень, мітуслівы: Баця, Маятнік, санапрацоўка, капцёрка, перастаноўка ложкаў, пастраенне, вячэра і прагулка строем пасля яе, зноў пастраенне, вячэрняя паверка і нарэшце — падрыхтоўка да сну. Усе сцелюцца, а я ламаю галаву, што рабіць з дзвюма просцінамі. Усё жыццё я абыходзіўся без іх: драную світку пад бок, саматканай посцілкай накрыўся — і глядзі сны. А тут іх аж дзве. Ну, адну рассцялю падыспад, зверху — ёсць байкавая коўдра. Не іначай памыліўся старшына-каптэнармус. Гляну навокал — ва ўсіх па дзве і ўсе адну на адну рассцілаюць. Ну што ж, мабыць, тут мода такая, ад багацця шалеюць. I мне не мулка будзе на дзвюх.

Тут днявальны з парога крыкнуў «адбой» — зарыпелі, зайгралі па ўсёй казарме металічныя сеткі на ложках, я таксама шмыгнуу пад коўдру, выцягнуў ногі, далонь пад шчаку — раскоша, аж не верыцца. Пад бокам на сетцы са спружынамі ватовы матрац, і пасля цаглянай чарэні на печы мне мякка так, як богу на аблоках.

Цікава, а што там зараз дома пра мяне думаюць бацька, бабуля, Глыжка? Баюся, яны і здагадацца не могуць, што ў мяне было сёння на вячэру, на чым я зараз сплю. Тэта ж калі сказаць, што да чаю было па два драбкі цукру і па акрайчыку белага хлеба са смятанкавым маслам — белага з маслам, дык хто ў Падлюбічах паверыць? Мне самому не верылася, нават шкада было есці. I кажуць, тут кожны дзень так. Значыць, можна жыць, можна вучыцца. Толькі з маслам і белым хлебам я рабіў бы не так — не даваў бы кожны дзень камару на дзюбку, а збіраў бы ўвесь тыдзень, а тады — усё разам. Так я і сам толкам наеўся б, і Глыжку гасцінец прынёс калі-нікалі, як пачнуць пускаць у звальненне.

Духмяным мылам, што даў каптэнармус, пакуль што мыцца не буду, хопіць мне і таго змылка, які збярог у лазні і ўкрадкі схаваў у сваёй тумбачцы. А цэлы брусок аднясу бабулі, яна за свой век, мабыць, такога не бачыла. Вось няхай помніць маю дабрату. А можа, бацьку аддаць? Яму таксама няма ўжо з чаго пену на бараду пускаць, калі голіцца. Не — бацьку, калі мне яшчэ дадуць.

Мабыць, зараз каля Скокавай прызбы самыя танцы. Каб туды з'явіцца такім, якім я цяпер ёсць, вось раты разявілі б! Рудая Гарбуза прыкусіла б язык са сваімі прыпеўкамі, а то раскрумкалася: мой мілёнак — лейтэнант. Толькі з гэтым трэба пачакаць, няхай на кавуне адрастуць хоць тыя тры сантыметры, якія нам будзе дазволена мець, як і старшакурснікам.

I так мяне адолелі розныя думкі і мары, што я не пачуў, як да ложка падышоў старшына.

— Дзе ваша прасціна? — затармасіў ён мяне за плячо.

Гэта было так знянацку, што я падхапіўся, нібы на пажар, і першае, што падумаў — укралі, казённую прасціну ўкралі. Толькі як яны сумелі з-пад мяне? Хуценька глянуў — на месцы, не ўкрадзена.

— Дык вось жа яна!— аж усміхнуўся я ад радасці.

I старшына засмяяўся прыглушаным смехам: пасля адбою ўголас нельга. На яго думку, сукін я кот, цемра беспрасветная. У якім лесе я вырас, што накрыцца не умею? Казарма таксама ціхенька захіхікала, але старшына цыкнуў — прыціхла. Ён накрыў мяне сам спачатку той прасціной, што была лішняя, а затым ужо коўдрай. А здагадаўся ён, што я няправільна накрыўся, вельмі проста — тут парадак такі: бераг верхняй прасціны трэба загортваць на коўдру, каб тая не мусолілася ад потнай шыі. І спаць абавязкова на правым баку, каб сэрцу было вольна. Век не падумаў бы, што майму сэрцу не ўсё роўна.

Каптэнармус Хамутоў на дыбачках пайшоу далей, недзе там яшчэ кагосьці шэптам патрывожыу. Вось цяпер я зразумеў, што за чын — каптэнармус. Генералісімус — галоўны зверху, а каптэнармус — знізу. Нездарма ў іх званні заканчваюцца на гэтае самае «мус». Толькі ў іх, а больш — ні ў кога, падумау я, засынаючы.

Служба — не дружба

Ад бацькі я неаднойчы чуу, што салдат спіць, а служба ідзе. Першай маёй вайсковай ноччу служба ішла добра — да раніцы і на другі бок не перавярнуўся і ніводнага сну не пабачыу. Прачнууся я таму, што нехта штосьці закрычаў нібы рэзаны, прачнууся і нічога не разумею: дзе я і хто я — няма печы, няма хаты, няма бацькі з бабуляй, і Глыжкі не відаць. А вакол, нібы растрывожаны мурашнік, мітусяцца хлопцы: хто хапае штаны, хто гімнасцёрку нацягвае на плечы, хто абувае ужо і чаравік. Шум, гам, тарарам. Куды яны так, ці не на пажар? Тут і мяне само сабой падкінула з пасцелі: ды я ж — вайсковец, вось хто я! I на мяне не іначай пчолы напалі, так я пачаў кідацца, каб не адстаць ад усіх. А яно, калі вельмі спяшаешся, заусёды што-небудзь ды не так: у штаны ўскочыў правільна, а гімнасцёрку чорт на мяне навалок задам наперад. Пакуль яе распранау ды зноу апранау — абувацца няма калі, у казарме пусцее. Шкарпэткі — у кішэню, чаравікі — на босую нагу і вопрамеццю — на вуліцу ужо самы апошні. А куды і чаго, сам не ведаю.

Строй ужо стаіць, выраўніваецца, ціхенька перашэптваецца, а перад ім сам падпалкоўнік Асташэўскі моўчкі ківаецца то на насках, то на абцасах, незадаволена пачмыхвае носам, з нецярпеннем паглядваючы на гадзіннік. А тут яшчэ і я з казармы выскачыў нібы Піліп з гароху. Быццам тое куранятка, што спазнілася пад квактуху, а потым з ціўканнем бегае вакол яе і не можа зашыцца пад выратавальнае крыло, так і я пад строгім позіркам афіцэра не магу сабе знайсці месца ў страі, куды ні памкнуся — сцяна. Так мне і не ўдалося схавацца за чужыя спіны, падполкоўнік спыніў маю бегатню.

— Станьце тут! — паказаў ён мне пальцам месца не ў страі, а перад строем.

I я стаў з пачуццём асуджанага на смяротную кару. Тэта ж, мабыць, самае малое, што мне будзе — загадае ўсё, што на мне здаць і адправіць самога назад дамоў па шпалах як міленькага. Няхай бы што хацеў рабіў, толькі не гэта. Я кляну сам сябе апошнімі праклёнамі і разам з сабой той матрац, на якім так соладка спіцца. Вось гэта пачаў службу — няма чаго сказаць, малайчына. Будзе чым дома пахваліцца.

А перад строем сорамна: сто пар вачэй на мяне глядзяць, і ўсе чужыя, апрача Санькавых; і глядзяць гэтыя вочы па-рознаму: якія са спачуваннем, якія з простай цікаўнасцю, а некаторыя і з насмешкай.

Але, як кажуць, з вялікага грому — малы дождж. Падпалкоўнік загаварыў не столькі сурова, як насмешліва:

— Ну што, сонная цяцера, ты спаць сюды прыйшоў? Спаць трэба было ў мамы на прыполе, а тут служба, разгільдзяй.

I мне стала спакайней: нічога, відаць, страшнага не будзе, а будзе мараль. Але мараль маралі — розніца. Гэта была доўгай, нуднай і крыўднай. Яна прабірала да пячонак. Такім, як я, аказваецца, нельга нічога даверыць. Я засну ў каравуле на пасту, і тады ўсю батарэю возьмуць цёпленькую без адзінага выстралу. Я магу заснуць і каля гарматы на агнявой пазіцыі — тады нас падавяць варожыя танкі.

Падпалкоўнік неяк здагадаўся, што мае шкарпэткі не на нагах, а ў кішэні, і загадаў іх адтуль выцягнуць і паказаць усім, быццам усе іх ніколі не бачылі. Па страі прабег вясёлы смяшок. Камандзіру батарэі не спадабалася і мая вайсковая выпраўка, таму што ўся гімнасцёрка сабралася наперадзе, а не за спіной, як гэта ей належыць. Таму, апрача цяцеры і разгільдзяя, я — яшчэ і пянцюх. Але ён з мяне зробіць чалавека, ён мне пакажа, дзе ракі зімуюць, і навучыць шанаваць званне будучага афіцэра савецкай артылерыі, ён не дазволіць такім, як я, ганьбіць сваю батарэю. I каб мне служба не здавалася мёдам, на першы выпадак хопіць і вымовы перад строем. А там будзе відаць, што са мной рабіць. Мараль скончылася, як і ўчора, калі ён заліў мяне за двойку: выганю, будзеш шыльды ў горадзе чытаць па складах, невук. Мне было ўжо вядома, што «шыльды» — яго любімая пагроза, як і тое, што ў яго ёсць і іншая мянушка — Грызь. Нездарма Юрка Калдоба ўчора хмыкаў, калі даведаўся, што генерал мяне накіраваў у гэтую батарэю.

У жыцці іншы раз бывае, нібы ў кіно: толькі я ўспомніў Юрку, а ён тут і стаіць непадалёку ад падпалкоўніка. Я проста яго не заўважыў. Не да парасяці свінні, калі яе смаляць. А ён, па ўсім відаць, таксама будзе нейкім над намі настаўнікам, бо гэта яму падпалкоўнік загадаў:

— Вядзіце на фіззарадку!

Ну і Юрка — хітруга! Сябра мне называецца. Не мог учора пахваліцца, што ўжо ў камандзіры выйшаў. Вось ён, як заусёды, нібы толькі што з карцінкі сышоў, што вісіць у казарме каля люстры, статны, адпрасаваны, падцягнуты. Крыху незнаемым мне металічным голасам ён скамандаваў:

— Ба-та-рэ-я-я! Прама — арш! — і пабег побач са строем лёгкім крокам выпеставанага скакуна.

У страі я апынуўся побач з Санькам. Ужо амаль суткі, як мы жывём у адной казарме, я ўжо паспеў паслухаць дзве маралі за гэты час і атрымаць вымову, а пагаварыць з сябрам усё не выпадала. Ды і тут пад тупат сотняў чаравікаў не вельмі разгаворышся, а калі павысіш голас, дык адразу — разгаворы ў страі! Таму Санька на хаду толькі моцна паціснуў мне руку і радасна кінуў некалькі слоў:

— Усё добра! А Грызя не бойся. Ён кожную раніцу ловіць тых, хто спозніцца, і аднолькава грызе. Не ты першы!

— Разгаворы ў страі!

Санька змоўк, а я сабе думаю пад тупат ног: дудкі ён мяне цяпер зловіць, той Грызь. У мяне на плячах не пусты гаршчок, а з галавой каго хочаш можна аб'ехаць на вараных. Вось вазьму і ўмудруся легчы звечара ў штанах — усё ж раніцай хутчэй будзе. Гiмнасцёрку на плечы — і я ўжо ў страі. Няхай іншых ловіць, у каго мазгаўня не варыць. А то, бачыце, дагаварыуся — з-за мяне танкі батарэю растопчуць.

Што такое сапраўдная фіззарадка, я толкам да гэтага не ведаў. У нас у школе глядзелі на фізкультуру скрозь пальцы. Звычайна яе замянялі іншымі ўрокамі, а калі і не замянялі, дык мы проста тую гадзіну валялі дурня. Апрача хіміка, у нас не было і фізкультурніка. А нашы настаўніцы — яшчэ тыя спартсмены! Не распранаючы верхняй вопраткі, каб не акалець у халодным, нібы вуліца, калідоры, крыху рукамі памахаем, нагамі падрыгаем і — зноў у клас, дзе з рота ідзе пара.

А тут фіззарадка дык фіззарадка. Спачатку Юрка нас гнаў рыссю вакол казармы, а потым па стадыёне, як Пецька Чыжык ганяе на луг калгасны табун, гнаў да той пары, пакуль мы не засапліся і не пакрыліся потам. Гэта называецца лёгенькай прабежкай. Затым, пастроіўшыся шырокімі радамі, услед за Юркам мы пачалі рабіць розныя выкрунтасы: то, сагнуўшыся крукам, махалі растапыранымі рукамі — уяўлялі з сябе млын, то скакалі на насках казламі, аж селязёнка ёкала і трэслася галава, то білі паклоны, дастаючы пальцамі рук пальцы ног, то лупцавалі, нібы баксёры, паветра, то, выпрастаўшыся, нібы дошка, лажыліся на зямлю, кранаючыся яе толькі рукамі і нагамі і нічым болей іншым, пачыналі адпіхвацца ад яе, аж трашчалі рукі ў маслах, а затым зноў апускацца, нібы нюхалі росную траву. На другім ці трэцім адпіхванні я здаўся і лёг на жывот — так нюхаць глебу лягчэй. Гляджу — і суседзі не дурні. Самае лёгкае практыкаванне — гэта расслабление: тут стой і махай нежывымі рукамі, нібы стомлены бусел, ды ўздыхай на поўныя грудзі, як па роднаму бацьку.

Пасля фіззарадкі па дарозе ў казарму мы зноў сумелі з Санькам перакінуцца слоўцам-другім. Гэта ўжо наконт Юркі. Калі яго не часова, а назаўжды паставілі намі камандаваць, то будзе нам з Санькам не служба, а маліна. Усё ж як ні кажы, а свой чалавек: на адной вуліцы выраслі, на адны пагулянкі хадзілі. Няважна, што мы танцавалі толькі «Сербіянку», а ён і ў вальсе круціўся ў які хочаш бок. I тут ужо як ні круці, а будзе нам палёгка.

I нашы светлыя надзеі збыліся ў той жа дзень. Намнога загадзя да абеду батарэю ўжо каторы раз пастроілі зноў. Прайшла чутка, што нас падзеляць на ўзводы і тады, апрача падпалкоўніка, над намі будзе яшчэ процьма новага начальства. Мы с Санькам сталі побач, каб трапіць у адзін узвод. Думалася, што нас так і дзяліць будуць, як стаім — адсюль і дасюль.

Падпалкоўнік Асташэўскі з'явіўся ў казарму на дзяльбу не адзін, а ў акружэнні цэлай світы афіцэрства. 3 ім былі два маёры і два капітаны. Пасля каманды «вольна» падпалкоўнік абвясціў, што гэта будуць нашы камандзіры ўзводаў, і папрасіў іх любіць і шанаваць. Яны нас будуць непасрэдна выхоўваць, яны нас выведуць у людзі. Затым нас перастроілі па ранжыру. Цывільны чалавек, зразумела, не ведае, што гэта за штука, дык я скажу. Ранжыр — гэта калі на чале строю стаяць дылды вышынёй з каланчу, а ў хвасце — заморкі кату пад пяту; а потым, калі ад макушкі каланчы працягнуць уяўны шнур да макушкі апошняга недаростка, дык усе галовы ў страі павінны быць, нібы пад лінейку. Вось тады строй будзе строем, а не як плот з няроўнымі аполкамі. Доўга нас перастройвалі, каб дабіцца ранжыру, бо шнура ж на самой справе не было, а ўсё на вока. Нас з Санькам перастаўлялі разоў пяць: то паміж намі трапяцца высокія, то нізкія. У выніку мы апынуліся адзін ад аднаго чорт ведае дзе. Відаць, ляснулі нашы надзеі быць у адным узводзе.

Нарэшце начальства ў ахвоту наранжырылася. Падпалкоўнік не адзін раз крытычна агледзеў строй з абодвух канцоў, ці па-нашаму, па-вайсковаму — флангаў — і не знайшоў, да чаго прычапіцца. Калі чыя галава крыху і псавала прамую лінію, дык уразаць жа не будзеш. Вось толькі цяпер маёры і капітаны адлічылі кожны сабе па парадку, не выбіраючы, па дваццаць пяць чалавек і пачалі іх запісваць у свае блакноты.

Мы з Санькам трапілі ўсё ж да аднаго камандзіра: розніца ў вышыні ў нас аказалася не такой і вялікай — я вышэйшы за сябра ўсяго на галаву. Вось толькі з камандзірам узвода нам крыху не пашанцавала. У іншых узводах камандзіры — глядзець люба, усе з сябе афіцэры — нічога не скажаш, асабліва ў першым узводзе, дзе сабраліся хлопцы гвардзейскага росту. У іх і маёр высокі, статны, чорныя валасы — хваляй, і голас грамавіты. А наш капітан Захараў, як ён нам толькі што назваўся, і лысаваты, і рабаваты, і ў акулярах, губы тоўстыя, нібы каржы. Але клопат такі — нам з ім не цалавацца, абы не вельмі строгі быў. Выклікаючы па прозвішчу, ён да кожнага з нас пільна прыглядаўся праз шкельцы акуляраў і то ўздыхне, то моршчыцца. Нечым мы яму не падабаемся, і хутчэй за ўсё — сваім ростам. Дасталася капітану адна драбяза згодна таму самаму ранжыру. Мабыць, глядзіць і думае: ну, шкеты!

Калі афіцэры справіліся з перапіскай і пераклічкай, я думаў, што ўжо больш цікавага і нечаканага нічога не будзе. Камбат ёсць, камандзіры ўзводаў ёсць — начальства па вушы, толькі слухайся. Але тут яно толькі і пачало проста на вачах множыцца. Афіцэры сталі ў строй кожны на чале свайго ўзвода, а падпалкоўнік як грымне каманду «смірна», аж шыбы ў казарме зазвінелі.

— Слухай загад!

Загад быў начальніка вучылішча. Мабыць, таму падпалкоўнік чытаў яго так гучна, падкрэсліваючы кожнае слова, каб не праляцела міма нашых вушэй, сам стаяў, нібы статуя, не ківаўся і не хістаўся. Загад жа генеральскі, і разам з загадам тут як бы прысутнічаў і сам генерал. У мяне, прынамсі было такое адчуванне. Вось і дажыўся я нарэшце да таго, што стаю ў сапраўдным страі, а не з падлюбскімі хлапчукамі на поплаве, які зарос дзядоўнікам і крапівой; і чытаюць мне загад сапраўднага генерала, а не выдуманага намі, самазванага Чапаева ў асобе Санькі. Тут забудзеш, што трэба і дыхаць.

А з загаду так і сыплюцца пасады і званні: выхаванца выпуск-нога курса Калдобу назначыць старшыной батарэі і прысвоіць яму званне — старшына; выхаванца Пятачэнку назначыць памочнікам камандзіра ўзвода і прысвоіць яму званне — сяржант. Новаспечанае начальства выходзіць са строю, каб усе яго бачылі, і стаіць, нібы аршын праглынуўшы. Аж не верыцца, што мінуту назад гэта былі звычайныя смяротныя, як і ўсе мы, а цяпер яны маюць над намі ўладу, дадзеную ім самім генералам. Ды колькі іх! Я падлічыў, што дванаццаць. Але самае дзіўнае не ў гэтым. Самае нечаканае і дзіўнае ў тым, што перад строем стаіць і Санька Макавей — камандзір аддзялення, а па званню — яфрэйтар. Для мяне гэта — нібы гром з яснага неба. Калі і як ён паспеў выслужыцца? Розніца ж паміж маёй і яго выслугай усяго тры дні — на столькі пазней мяне прынялі ў вучылішча з-за той праклятай двойкі, і ён ужо — на табе — яфрэйтар. Я чалавек не зайздрослівы, не кар'ерыст, а тут крыўдна.

А Саньку не пазнаць. Спачатку, праўда, і ён разгубіўся, то бляднеў, то чырванеў, затым узяў сябе ў рукі, апрытомнеў, стаіць, нібы штык, напускае на сябе суровасці. Як жа — шышка на роўным месцы. Баюся, што цяпер да яго на казе не пад'едзеш.

Загад скончыўся словамі «генерал-маёр Сцяпанаў». Падпалкоўнік іх прачытаў, асабліва выдзеліўшы голасам, нібы пячатку паставіў, каб да ўсіх дайшло, што гэта нам не жартачкі.

А ў вачах у Санькі суровасці ўсё больш і больш. Яе прыбаўляецца па меры таго, як падпалкоўнік, прачытаўшы загад, расказвае, што значыць малодшыя камандзіры і як мы іх павінны слухацца. А слухацца мы іх павінны больш за роднага бацьку, бо ў арміі загад начальніка — закон для падначаленага. А гэта значыць: як Санька што вякне, тое — для мяне і закон, і ўжо не смей агрызацца, не смей слова насуперак сказаць. Легка гэта мне будзе, калі мы іншы раз у спрэчках даходзім і да рук? Рэдка, праўда, але было. А там хто яго ведае: можа, ён да мяне ўжо так і не будзе чапляцца, па-зямляцку?

Тут камбат нібы ўгадаў мае думкі і давай вучыць новаспеча-нае начальства, якім яно павінна быць патрабавальным і строгім. Цяпер для іх, для камандзіраў, не павінна быць ні свата, ні брата, ні друга-таварыша — усе перад імі павінны быць роўныя. За панібрацтва іх таксама па галаве не пагладзяць. Гэтым яны будуць падрываць дысцыпліну — самае святое ў арміі. А каб яе не падрываць, для гэтага трэба захоўваць субардынацыю. Я дагэтуль і слова такога не чуў мудрагелістага. Аказваецца, на думку падпалкоўніка, у жыцці наогул, а ў арміі асабліва існуе такая службовая лесвіца, што хто на ей вышэй сядзіць, той мае болей права загадваць, а хто — ніжэй, той абавязаны болей слухаць. Не слухаецца нікога толькі на самым верее, а слухаецца ўсіх на свеце — на самым нізе. У нашым вучылішчы на самым версе генерал, а на самым нізе такія, як я. А Санька, выходзіць, ужо мне на галаву сеў. Вось гэтая ўяўная лесвіца і ёсць субардынацыя. Але бабульчынымі словамі можна было б сказаць прасцей: гусь свінні — не таварыш.

Словам, агарошыў нас падпалкоўнік гэтай субардынацыяй. Гэта ж калі на яе маліцца, дык я згублю вернага таварыша, з якім жыў душа ў душу ўсё жыццё. А Саньку мне наогул шкада, бо яму ж нельга мець ні свата ні брата, хоць жыві сіратой, як горкая рабіна ў чыстым полі.

Калі строй распусцілі, пачалося вялікае свяшчэннадзейства — прышыванне лычак. Прышыць лычку на пагон — гэта табе не латку на калена пасадзіць, не гузік да каўняра кашулі прышпандорыць. Там галоўнае, каб трывала было, каб і сабака зубамі не адарваў. Карацей — справа будняя, звычайная, прывычная. А лычка — вайсковы знак адрознення камандзіра ад радавога. Яе даюць не кожнаму і не кожны дзень. Скажыце, вы многа ў сваім жыцці знасілі лычак? Вось жа і яно! Гэта толькі так здаецца, што там і працы той два разы іголкай укалоць. Можа, яно і два, але як?! Санька, амаль што без пяці хвілін кравец, які на матчынай швейнай машыне мне нават кепку пераліцаваў, і той тры разы свае лычкі прышываў і зноў адпорваў. А пра тых, хто іголкі ў руках не трымаў, і гаварыць не варта.

А лычкі той — хвосцік жоўтай шаўкавістай стужкі. Але і з ёй Санька праваждаўся з паўгадзіны. Дык гэта ж яшчэ і я парады даваў, як лепш рабіць. Аднак нашы з ім погляды цяпер не сыходзяцца: мне здаецца, што трэба бліжэй да гузіка, а яму — што бліжэй да эмблемы — дзвюх перакрыжаваных гарматак; мне здаецца, што роўна, а яму — што крывавата.

— Адчапіся!— гаркнуў раптам Санька на мяне чужым голасам.— Без дарадчыкаў абыдземся.

Не, вы бачылі? На вачах мой сябра ператвараецца ў яфрэйтара. Хацеў я паслаць яго з лычкамі разам туды, дзе Макар цялят не пасвіў, ды спахапіўся, успомніў пра субардынацыю. Я надзьмуўся і думаю, як мне з ім далей жыць, а ён на мяне — нуль увагі, накінуў на сябе гімнасцёрку і круціць галавой, разглядваючы свае плечы са знакамі адрознення. Так можна вочы пакрывіць і пазванкі на шыі вывіхнуць. Такіх розглядаў яму здалося мала — пабег у калідор, дзе вісела вялікае люстра. А там іх з лычкамі цэлы рой, ледзь адзін аднаго не адпіхваюць, быццам жаніхі ў сваты збіраюцца. Нам, ра-давым, аж смешна на іх глядзець.

Пакруціўшыся перад шклом, Санька вярнуўся да свайго ложка, зноў распрануўся і ўжо ў каторы раз пачаў перашываць нанова, дабівацца, каб лычка была, нібы прыклеена. Вось нарабілі хлопцу клопатаў з гэтым званнем!

Затое калі батарэю зноў пастроілі, ён не туліўся ўжо на левым фланзе сярод самых недарослых, а насуперак ранжыру стаў на чале свайго аддзялення, хоць быў усяго па плячо правафланговаму. Вось якое цяпер ён мае права, яго і ранжыр не датычыць.

А вечарам, калі афіцэры, апрача дзяжурнага, адслужыўшы дзень, пайшлі дамоў, уся батарэя і я асабіста адчулі на сабе, што лычкі — гэта не толькі права стаяць на камандзірскім месцы, гэта яшчэ і цвёрдая ўлада. Вячэрнюю паверку праводзіў Юрка ўжо ў старшынскіх пагонах. Ва ўсіх у нас яны таксама не цалкам чорныя, як у артылерыйскіх салдат, а абшытыя па беражку жоўтым, пад золата, на Юркавых жа наогул чорнага амаль не відаць. У яго лычак — удоўж і ўпоперак, пагоны, нібы афіцэрскія, адно што — зорак не хапае.

— Я,— важна сказаў Юрка, прахаджваючыся перад строем,— страявы старшына, а старшына Хамутоў — каптэнармус. Яго справа — шмоткі, а мая — строй. Лавіце розніцу, салагі, каму з нас першаму чэсць аддаваць!

Пасля такіх слоў аўтарытэт каптэнармуса памерк. Юрка як бы спіхнуў яго са сваей папярочкі на службовай лесвіцы на адну ніжэй. Быццам на адной дваім там цесна.

Але і страявы старшына, ды яшчэ амаль наш аднагодак, а мне дык і зусім зямляк і таварыш — не сам камандзір батарэі. Няхай у яго будзе хоць у роце чорна, як у нашага Жука, усё адно ён не такі страшны, як сам Грызь. I мы ў страі адчуваем сябе вальней. Асабліва другая шарэнга.

У другой шарэнзе наогул многа пераваг. У першай стаіш перад начальствам, нібы пад промнем пражэктара, слуп слупам: не паварушыся, з нагі на нагу не пераступі, а каб пераміргнуцца з таварышам — і думаць забудзь. А ў другой, па-за спінамі пярэдніх, нібы за плотам; начальству відаць, ды не ўсё. Тут можна дазволіць сабе і сякія-такія вольнасці: пераміргнуцца, аслабіць нагу па камандзе «смірна», словам — можна паварушыцца. У другой, я ўжо не кажу пра трэцюю і чацвёртую, ёсць нават свая страявая забава. Называецца яна «па качану». Хоць забава і небяспечная, але ж вельмі смешная. Тут трэба выбраць момант, калі камандзір не глядзіць у твой бок, а ў паперу ці яшчэ куцы, асмеліцца і пярэдняга па голай макушцы — пстрык! А тады ўжо і стой нібы мыла з'еўшы: я — не я, і карова не мая. Другая шарэнга кісне ад смеху, чырванее ад натугі, каб не зарагатаць, але ўсе маўчаць, хіба каторы слінаю пырсне праз сцятыя зубы. Паспрабуй пікнуць — апынешся перад строем. Усе шышкі ад начальства за забавы другой шарэнгі ляцяць на першую, на таго, хто атрымаў пстрычку:

— Сідараў, не круціцца ў страі!

— Кузняцоў, апошні раз папярэджваю!

Можна пстрыкаць і не на макушцы, па адтапыранаму вуху таксама добра атрымліваецца. Але пры падпалкоўніку, ды і пры іншых афіцэрах, зрабіць «па качану» не кожны яшчэ і асмеліцца, хіба які ўжо сарвігалава, якому і мора па калена. Я, напрыклад, баяўся. А пры Юрку асмеліўся. Пагляджу-пагляджу на макушку Лёвы з Магілёва, і рука свярбіць. Ды што я, горшы за астатніх? Падсцярог момант, калі Юрка-старшына апусціў вочы ў спіс батарэі, і — пстрык! — па Лёвавай стрыжанай мазгаўні. Ды гучна так атрымалася, нібы па пустым гарбузу. Не паспеў Лёва і галаву павярнуць, каб глянуць, хто яго пачаставаў, як раздаўся металічны старшынскі вокліч:

— Сырцоў, выйсці са строю!

Я не адразу і ўцяміў, што гэта мне, так спадзяваўся на сваю беспакаранасць: за спінамі ж не відаць, ды і Юрка свой чалавек, не будзе ж ён земляка і таварыша перад строем зневажаць.

А ён зняважыў. Ды яшчэ і як. Праўда, маралі, як падпалкоўнік за спазненне на фіззарадку, не чытаў, але пакараў больш сурова, чым той. Маім вушам нават не верылася.

— За парушэнне дысцыпліны ў страі адзін нарад на кухню без чаргі! — абвясціў Юрка.

Можа, ён мяне не пазнаў? Стрыжаныя і ў аднолькавай форме, мы ўсе тут, нібы з інкубатара, усе на адну калодку шытыя. Я хацеў было сказаць: кінь, маўляў, Юрка, апамятайся, гэта ж я — Іван, але толькі рот раскрыў, а Юрка яшчэ больш сурова:

— За спрэчку з камандзірам — яшчэ адзін нарад!

Цяпер да маёй свядомасці дайшло, што служба — не дружба, а Юрка ў пагонах — не Юрка, а страявы старшына, правая рука камбата, і, каб не адхапіць трэцяга нарада, паслухмяна выгукнуў «ёсць!» і, пасаромлены, пакорна стаў на свае месца. Шчокі і вушы гараць полымем: сорамна перад суседзямі па шарэнзе, якім я паспеў да гэтага пахваліцца, што старшына мне не ішоў і не ехаў, мы, маўляў, з ім разам свіней пасвілі. Тады мне зайздросцілі, а цяпер яхідна ўсміхаюцца і глядзяць, нібы на першага ў свеце брахуна. На іх месцы я б таксама не паверыў. Так сябры не робяць. Цяпер я з ім здароўкацца не буду, век рукі не падам, няхай хоць на калені падае. Буду па субардынацыі: казырну — і каціся сваёй дарогай. Бачылі мы такіх землякоў.

А раніцай, на снеданні, і Санька сваю ўладу паказаў. Села наша аддзяленне за стол, і, як заўсёды, атрымалася замінка — ніхто не хоча кашы дзяліць. У кожнага свае прычыны: той не ўмее, той далека сядзіць, дык няёмка, а я блізка сяджу, ды баюся ворага нажыць. Дзяльба кашы — справа далікатная. Не дакладзеш — гора, перакладзеш іншым — сабе мала.

Тут яфрэйтар Макавей, а для мяне — проста Санька з лычкай, падняўся і беспярэчна загадаў:

— Сырцоў, прызначаю вас пастаянным развадзяшчым!

Дзіка, нязвыкла мне чуць гэтае самае «вас» з Санькавых вуснаў, але што ты зробіш, трэба мірыцца — службовая лесвіца, каб ей ліха. I я, навучаны ўчора Юркам, не палез у пухір, нібы аса. Буду «развадзяшчым». Калі падумаць, апалонік у руцэ — таксама ўлада, хоць за тэта лычак і не даюць. Цяпер ад мяне залежыць, каму густое сярбаць, а каму — ваду. Безумоуна, я буду справядлівым, але хто мяне пакрыўдзіць, няхай не скардзіцца. А можа, і не ўсе гушчу любяць, тады мне прамая выгада, бо я яе люблю. Нездарма мая бабуля часта гаворыць, што гушча дзяцей з хаты не разганяе.

А для пачатку, калі на абед дадуць суп, пялёсну я Саньку адной юшачкі, каб сваіх не забываў.

«Развiтанне славянкi»

Мінула некалькі дзён. Усе мы ўжо збольшага пазнаёміліся і пакрыху прывыкаем да свайго новага жыцця. Калі паслухаць, як мы паміж сабой размаўляем, дык і не падумаеш, што салагі. Гаворку ад старшых курсаў мы легка перанялі. Тут, аказваецца, замест слова «спаць» модна гаварыць «кімарыць», а замест «есці» — «рубаць». Новыя хромавыя чаравікі чамусьці называюцца «шкарамі», а зношаныя, рамантаваныя — «глебадавамі», або карацей — «гэ-дэ». Хітрун, гультай, абібок — гэта «сачок». Але гэта не абавязкова абраза, бо сачок сачку — розніца. Калі ты «сачкануў» ад заняткаў ці ўцёк ад начальства, за гэта таварышы не асудзяць, а хутчэй наадварот — скажуць у захапленні: «Ну і сачок!» Гэта амаль што ухвала, маўляў, які ён смелы і знаходлівы! А вось калі ўсе свае працуюць, мыюць, напрыклад, па загаду старшыны ў казарме падлогу ці падмятаюць дарожкі на двары, а хто-небудзь пры гэтым прыкідваецца, што ў яго баліць галава або жывот, ці наогул стараецца уцячы, выдумаўшы нейкую прычыну,— вось гэта ўжо натуральны сачок. Такіх ніхто не церпіць, такому і надаваць па шыі маглі б, ды камандзіры забараняюць самасуд; пра такіх начальства патрабуе дакладваць. Але хто ж даложыць, калі гэта лічыцца апошняй нізасцю, хто захоча, каб яму прыклеілі мянушку «фіскал»?

Ёсць у нас і сакрэтны ад начальства вокліч «атас!», як і ў маракоў «палундра!». Скажам, прылёг ты на ложак у ненаkежны час і кімарыш, а тут — старшына. Таварышы абавязкова цябе папярэдзяць аб небяспецы: «Атас!» Коратка і зразумела — ратуйся, хто можа.

Звычайны шпак, мабыць, не ўсё і зразумеў бы, калі б пачуў, напрыклад, такую нашу размову:

— Табе не ціснуць гэ-дэ?

— Не, шкары ў самы акурат.

— То пойдзем іх пачысцім, а то скора рубаць.

— Ды каб хутчэй, а то хочацца кімарыць.

— А я днём не люблю, думаю сачкануць.

— Атас, Маятнік!

I размова сціхае. Падпалкоўнік страшэнна не любіць такой, як ён кажа, тарабаншчыны, за яе ён здымае з нас стружку, так што — «атас!». А наш «кэп» Захараў, пачуўшы такое, гідліва моршчыцца і замест маралі коратка гаворыць:

— Племя... мумбу-юмбу.

Але яны для нас пакуль што не аўтарытэт, да іх проста не даходзіць гэты шык і бляск. Уяуляю сабе, калі б мы з Санькам прыйшлі ў свае Падлюбічы і загаварылі гэткім чынам дома ці на танцах, вось бы там раты адкрылі. Адкуль ім пачуць такое. Сяло!

Санька. Гэта мая пакута, мой боль. Я ўжо тут да многага амаль прывык: да парадку, да раскладу, да пад'ёмаў і адбояў з іх мітуснёй і беганінай, ужо не ем, а рубаю, не сплю, а кімару. Не магу прывыкнуць толькі да аднаго, не магу змірыцца, што Санька цяпер мой непасрэдны начальнік. Мне усе здаецца, што цяпер ён не такі, як быў. Горды нейкі, ці што?

Ды і яму, відаць, са мной не мёд. Як камандзір ён павінен трымаць мяне ў строгасці, не дапускаць панібрацтва, але яно, гэта самае панібрацтва, іншы раз з яго само па сабе лезе. Як забудзе пра лычкі — свойскі хлопец. Адразу ў яго і размовы людскія:

— Гэта ж добра, Іван, што мы з табой матэматыку любім, а то не паступілі б.

А то ўздыхне і так скажа:

— А ў Міронавым садзе даўно, мабыць, грушы паспелі. Твой Глыжка цяпер аб'ядаецца.

У такія хвіліны мы сядзем побач, успомнім што-небудзь свае, што засталося па-за сценамі вучылішча, а то і заглянем у яшчэ няясную, але ружовую будучыню — крыху памарым. Ды яно і зразумела,— што ж яму цяпер сябраваць толькі з яфрэйтарамі?

I раптам яго нібы муха якая ўкусіць, зноў пачынае паказваць свой нораў. У канцы першага тыдня свайго ўладарання ён мне нават вымову ўляпіў. Я ўжо каторы вечар умудраўся класціся спаць у штанах, каб раніцай не кідацца нібы ўгарэламу на «фізуху», дык ён падгледзеў і засіпеў, як змей:

— 3-з-зараз жа распраніся! Аб'яўляю табе на першы раз вымову!

I з такім гэта ён запалам сказаў, што можна было падумаць: у другі раз аддасць пад трыбунал, якім нам ужо гразіўся падпалкоўнік, шкадуючы, што мы яшчэ не дараслі да вайсковай прысягі. Яшчэ гады два трэба, а каму — і тры.

А то аднойчы маю засланую пасцель раскідаў. Не так, бачыце, я заслаў. Ну, крыху была яна ўзгоркамі, крыху не цаглінай была падушка, бо ў ёй жа і не гліна, а штосьці мяккае, хоць і не пух. Вось ён адразу: сік-брык — гатова, засцілай, Іван, зноў. Самадур, а не Санька. Ох, і крыўдна мне тады стала.

А пераняў ён гэта ад Юркі. Убачыў, як той неахайную пасцель разбурыў у трэцім узводзе, дык і ён услед. Як гусак, так і гусяня. Думае, што можна старшыне, тое можна і яфрэйтару. Праўда, потым, калі мы засталіся ўдвух, ён даў задні ход.

— Ты,— кажа,— прабач. Усе ж ведаюць, што ты мой сябра, і калі ты не будзеш слухацца, дык і астатнія пачнуць сачкаваць. Яны ж на цябе глядзяць.

Тут сэрца мае памякчэла, але душа довадаў не прыняла. Па-мойму, гэта не Санька гаворыць, а яфрэйтар Санькавым голасам. Выходзіць, што з-за яго лычак я павінен у аддзяленні першую лямку цягнуць.

Хаця, калі прабачэння просіць, значыць, яму наша сяброўства — не трын-трава. Мабыць, не нацешыўся яшчэ ўладай, а калі саб'е аскому, дык нікуды не падзенецца, будзе зноў хлопец свойскі. Ды, відаць, і я — добры ёрш. Але які ні ёрш, а не быў бы такі, калі б мне далі яфрэйтара. Калі б мне далі яфрэйтара, я... я рабіў бы так, як вучыў мяне бацька: каб і сабе было добра, і таварышу. А як гэта робіцца? А ці жыву я зараз па бацькавай навуцы? Не такая яна і простая. Тут задумаешся.

Задумаешся, але не вельмі, няма часу доўга думаць. Заняткі ў вучылішчы пачнуцца першага верасня, як і ў звычайных школах. Засталося якіх-небудзь тры дні, а мы яшчэ хадзіць у страі не ўмеем. Падпалкоўнік Асташэўскі аж кіпіць ад абурэння, калі глядзіць на наш строй, у яго тады такі пакутлівы выгляд, быццам чалавека замучылі зубы. На яго думку, гэта не строй, а атара авечак або статак гусей. Ён праваліцца ад сораму пад зямлю, і адбудзецца гэта менавіта першага верасня, калі генерал перад пачаткам заняткаў будзе рабіць вучылішчу страявы агляд. Першы страявы агляд у нашым з Санькавым вайсковым жыцці, ён і нам не дае спаць, мы не ведаем яшчэ, што гэта такое, і таксама баімся праваліцца пад зямлю. Дзіва хіба, калі нават афіцэры з-за яго так непакояцца? Вось таму кожную вольную хвіліну нас вучаць хадзіць. Ды мы і самі стараемся навучыцца.

А хітрая ж гэта штука! Шаснаццаты год мы з Санькам ходзім па зямлі, а толькі цяпер зразумелі, што ходзім не так. Трэба ж выглядаць арлом, а не мокрай курыцай, трэба нагу на зямлю ставіць цвёрда, а не цягнуць яе як нежывую. Пакуль што, на думку камбата, ніхто не скажа, паглядзеўшы на нас, што гэта ідзе гвардзеец, хоць мы і носім вайсковую форму з артылерыйскімі эмблемамі. А трэба наадварот. Як птушку па палёту, так і нас па хадзе людзі павінны пазнаваць здалёк і без формы, нават у цывільнай адзе-жы; трэба, каб любы і кожны, пабачыўшы нас яшчэ за вярсту, адразу мог падумаць сам сабе: а то ідзе вайсковы чалавек, адразу відаць афіцэрскую костачку. А мы — э-эх! Дзе нашы грудзі? Не, падпалкоўнік згарыць ад сораму перад генералам.

Вось чаму цяпер кожны дзень ад снедання і да абеду, а потым яшчэ і пасля дзённага сну, так званай мёртвай гадзіны, мы вучымся хадзіць. Мы ходзім па адным, па двое, шарэнгай, аддзяленнем, узводам і батарэяй. Нам гэта ўжо знадаела, абрыдла, мы ідзём на страявую, нібы на катаргу, нам здаецца, што мы ўжо навучыліся, а паглядзім на старшакурснікаў, і завідкі бяруць. Супраць іх мы сапраўды — статак. А хочацца ж даказаць. Нас не так камбат дапякае, як «старыя» сваім пагардлівым позіркам і сваім пыхлівым выглядам. У кожнага з іх на твары напісана: яны — афіцэрская ко-стачка, а мы — салагі.

Але не так гэта проста ўсёй шарэнгай у дзесяць чалавек, ды хоць і ў чатыры, усім разам падымаць нагу роўна на дваццаць сантыметраў, як гэта трэба па страявой навуцы. Як тут вызначыць, падняў ты яе на дваццаць ці ўжо — і на ўсе трыццаць? Гэта ж каб можна было спыніцца ды памераць лінейкай. Хаця па камандах Юркі відаць, што мы з гэтымі сантыметрамі скупімся. Ён увесь час патрабуе:

— Вышэ-э ногу!

Дык мала ж падымаць, трэба яшчэ і насок адцягваць, каб падэшва была паралельна зямлі, а потым ужо і адбіваць поўнай ступнёй, а не дзяўбці жвір абцасамі, нібы казёл, і не дыбаць на пальчыках. Мы — не балерыны, каб хадзіць на дыбачках. Мы — страевікі, а таму і ногі не павінны гнуцца, нібы на шарнірах. Пра калені мы павінны забыцца. Няма ў нас каленяў пасля каманды «страявым!». Яны нам не трэба! Добра ім камандаваць, а тут паспрабуй выключыць тое калена, калі яно жывое і само без цябе гнецца, хоць ты клёпку якую да нагі прыбінтуй.

Не будзе добрага строю, калі ты забудзеш і пра раўненне. Тут ужо як хочаш, а глядзі на грудзі чацвёртага ад цябе чалавека, сам не вытыркаючыся наперад. А мне трапіўся чацвёрты чалавек з такімі грудзямі, быццам у вераб'я калена. Каб іх убачыць з-за трэцяга крутагрудага хлопца, прыходзіцца ўсё ж вытыркацца або так выварочваць шыю, быццам падглядаеш з-за вугла. Хоць ты выйдзі са строю, паглядзі на тыя грудзі, калі гэта ўжо абавязкова трэба, а потым зноў станавіся ў строй. А начальства з-за гэтага думае, што я сутулы, і ўвесь час крычыць, каб не горбіўся.

А нашаму каштану Захараву яшчэ не падабаецца і тое, што мы пры хадзе падскокваем усім тулавам, быццам верхам на кані. Па яго, дык трэба хадзіць так, каб ногі адбівалі крок, а на галаве стаяла шклянка з вадой і ні кроплі з яе не разлілося. Вось тады мы можам лічыць сябе сапраўднымі страевікамі. Хадзі і думай, што ты нясеш на галаве ваду. Але каб хто-небудзь з нас змог так хадзіць нават праз пяць год, ён не спадзяецца і не разлічвае на гэта. Тут трэба мець талент, гэта — ужо мастацтва, экстраклас. Такія страевікі сустракаюцца рэдка. Вось ён, калі быў маладым лейтэнантам, дык мог. Ды і цяпер яшчэ, хоць і быў паранены ў нагу, можа нам даць некалькі ачкоў наперад.

Канешне, каштан прайшоў перад узводам прыгожа, але каб на яго галаве устояла якая-небудзь пасудзіна з вадой, я сумняваюся. Хоць капітанская галава і не так трэслася, як трасуцца нашы, калі мы гэпаем падэшвамі па зямлі, але ўсё-такі прыкметна было, што і яна не плыве па паветры асобна ад тулава.

Не ведаю, як каго, а мяне пахвальба ўзводнага камандзіра кранула за жывое. Падумаеш, штукар. Не адзін ён такі. Мне таксама закарцела навучыцца насіць на галаве шклянку з вадой, каб усім падцерці нос з гэтай страявой падрыхтоўкай. А тут і зручны выпадак здарыўся папрактыкавацца. Нарад на кухню Юрка замяніў мне нарадам па казарме — днявальным. Трапіў на тое днявальства і Лёва з Магілёва, толькі я, як вы помніце,— без чаргі,— а ён — па чарзе. За «качан» мы з ім у той жа вечар памірыліся, калі мяне пакаралі, так што былі мы з ім заадно — мая задума наконт шклянкі з вадой яму таксама спадабалася.

I вось калі батарэю павялі на пляц і ў казарме не засталося ні душы, мы падмялі падлогу, выцерлі пыл, дзе нам было загадана, і, падпільнаваўшы момант, калі дзяжурны з трэцім днявальным пайшоў у сталоўку накрываць для абеду сталы, узяліся за трэніроўку ў пакоі для ўмывання. Шклянкі ў нас не было, а быў алюмініевы карэц. Няма чаго і думаць, каб ён, напоўнены вадой, хацеў стаяць на макушцы. Лёва быў на «шухеры», а я доўга і старанна масціў гэтую праклятую пасудзіну сабе на пілотку і, здаецца-такі, прымасціў. Быццам усё і добра. Але варта было мне не тое каб зрабіць крок, а ледзь зварухнуцца, як карэц перакуліўся мне на спіну і загрукатаў па цэментавай падлозе. За каўнер налілося вады. Лёва весела рагатнуў і, кіўнуўшы мне, каб я заняў яго пост, самаўпэўнена сказаў:

— Вучыся, пакуль я жывы.

3 Лёвавай макушкі карэц зваліўся не на спіну, а на пагон і абліў рукаў. Аказваецца, не так гэта і проста стаць такім страевіком, як хочацца капітану. Насіць на галаве посуд з вадой яшчэ больш складана, чым хадзіць, не згінаючы ногі.

Але ўпартасць бярэ свае. Пасля пятага ці шостага практыкавання, калі нас з Лёвам можна было ўжо і выкручваць, мне ўсё ж удалося, не дыхаючы, зрабіць пару крокаў, пакуль карэц не нарабіў грукату. Лёва зрабіў — тры.

I тут мы страцілі пільнасць. Калі на парозе ўмывальні з'явіўся капітан Захараў, я якраз наважыўся адправіцца ў новую дарогу з карцом на галаве, а Лёва, затаіўшы дыхание, чакаў, што з гэтага будзе, і не паспеў крыкнуць «атас». Я так і застыў па стойцы «смірна», а пракляты карэц на гэты раз, замест таго каб знікнуць з капітанскіх вачэй, стаіць, нібы цвіком да макушкі прыбіты.

Што падумаў капітан, гледзячы на гэтую карціну, сказаць цяжка, можа, яму здалося, што я з глузду з'ехаў ці перавучыўся ўжо за тры дні, але ён таксама нейкі момант слова сказаць не мог — аслупянеў з неданесенай да губ папяросай у руцэ. Ну, цяпер мне будзе дык будзе на арэхі. Каштан — гэта не старшына Юрка і не яфрэйтар Санька. Гэты ўжо адваліць на поўную катушку, тут ужо, мабыць, не адным і не двума нарадамі пахне. Не мінуць мне гауптвахты, ці, па-нашаму, «губы». I буду я, арол малады, сядзець у цямніцы сырой як міленькі.

Да каштана, нарэшце, вярнулася здольнасць размаўляць, і ён спытаў:

— Што гэта за водныя працэдуры?

Маўчок.

— Страявая? — нарэшце здагадаўся ён і сам без нашага з Лёвам адказу. Тут ён весела зарагатаў і так захліпнуўся папяросным дымам, што я думаў, не адкашляецца, давядзецца паміж лапатак кулаком біць. Не — адкашляўся, толькі слёзы выступілі.

— Здыміце,— замахаў ён рукой, бо голас яшчэ перасядаў,— з галавы гэты дурацкі гаршчок і прывядзіце сябе і ўсё тут у парадак.

Пранясло. Без нарада і «губы». Адыходзячы, узводны толькі адно сказаў:

— Ну і племя!

Словам, не ўдалося нам з Лёвам, як след патрэніравацца, каб стаць страявымі асамі. Цікава, а што зрабіў бы нам падпалкоўнік, заспеўшы за такімі практыкаваннямі? Да вечара, мабыць, грыз бы, не адну мы ў яго шыльду прачыталі б па складах — невукі. А капiтан нічога — свой дзядзька.

Дзіўная і прыемная нечаканасць адбылася на страявой падрыхтоўцы на наступны дзень. Калі нас прывялі на пляц, там стаялі ўжо салдаты з трубамі — духавы аркестр. А духавую ж музыку я так люблю, што гатовы слухаць яе і дзень і ноч. Яшчэ змалку за мной бабуля заўважыла гэтую ненармальнасць. Варта было па гучнагаварыцелю, які вісеў на слупе каля сельсавета, абазвацца трубе, як я кідаў усё на свеце: капаць агарод, пасвіць парсюка, нават вядро вады, што не данёс да сенцаў,— і бег на злом галавы пад той слуп на хвалюючы заклік медзі. Бабуля мяне не разумела. Калі гучнагаварыцель змаўкаў, а я вяртаўся ў свой двор, яна мне звычайна гаварыла:

— Спявай песні, хоць трэсні, а есці не прасі. Абібок ты, а не музыка.

Дык то ж толькі гучнагаварыцель — шэрая бляшаная штуковіна на слупе, а тут — жывы аркестр, які я наогул бачыў толькі адзін раз у жыцці і то вельмі даўно. Гэта было яшчэ да вайны, як памёр наш першы старшыня калгаса. Не помню ўжо, як яго і звалі, помню толькі, што хавалі з трубамі. Уся веска сышлася тады іх паслухаць, а без нас, хлопцаў, нічога не абыходзілася. Дарослыя на нас сіпелі, бо хаўтуры ўсё ж, хоць і без папа, але ўсё адно мы таўкліся пад нагамі трубачоў, спрабавалі заглянуць у нутро самай вялікай трубы, кожнаму хацелася ўкрадкі грукнуць па гулкаму баку, велічынёй з дзежку, барабана, але нікому гэта не ўдалося, бо барабаншчык пагразіў нам сваей булавой. А я ўжо круціўся вакол той музыкі, што бабуля баялася, каб услед за старшынёй, чаго добрага, у магілу не ўскочыў. Зразумела, што атрымаў у каршэнь. А тут яшчэ грузавік — таксама немалое дзіва па тым часе. I калі трубачы селі на яго і паехалі, дык я бег за ім аж за аселіцу, людзі думалі, што са свету збягу.

Вось і цяпер, калі я ўжо даўно не хлапчук з рэпанымі нагамі і не ў штанах са шлейкамі цераз плечы, а стаю ў вайсковым страі, і цяпер, як толькі старшына — галоўны над усім аркестрам — узмахнуў рукамі і грымнуў марш, мяне пранізала электрычнасць з макушкі да пят, у мяне засвярбелі падэшвы, так захацелася ісці страявым крокам. Высока ўзвілася каманда:

— Батарэ-э-я-я, шагам арш!

I... атрымалася — горш не прыдумаеш: хто — у лес, хто — па дровы. Адны ідуць пад вялікую басавітую трубу, другія — пад тоненькую свістульку, трэція — пад барабан. Адразу ж:

— Бат-тарэя, стой!

Нам што — вядзьмець на вуха наступіў? Аказваецца, і страевікам трэба мець хоць які-небудзь слых, хоць такі, як у бервяна. У аркестры, на думку падпалкоўніка, галоўнае — гэта барабан. Трубы няхай сабе граюць што хочуць і як хочуць, гэта нас не датычыць, гэта толькі для красы. 1х мы павінны прапускаць міма вушэй і слухаць толькі барабан! Вось тады будзе ў страі парадак. А хто будзе заслухоўвацца на розныя трэлі, той няхай ідзе ў балет і служыць там спячай прыгажуняй, а ў арміі рабіць яму няма чаго. Нам, невукам, самы раз шыльды чытаць па складах, разявіўшы рот.

Падпалкоўнік адышоўся ўбок, каб здаля пабачыць, як яно пойдзе далей пасля яго растлумачэння, а Юрка-старшына зноў:

— Бата-а-рэ-я-я!

А барабан: бум-бым, бум-бым. На «бум» — левай нагой, на «бым» — правай. Тут і мудрасці, аказваецца, на паўкіпця. Пайшла батарэя нібы па масле! Юрка вакол строю ўецца: то яму раўненне не падабаецца, то здаецца, што ў кагосьці адмах рукі няпоўны, то хтосьці ногі нізка падкідвае, то тулава нехта заваліў, а нехта згорбіўся, то нашы падбародкі не на аднолькавым узроўні — словам, хапае клопатаў і начальству. А тут яшчэ ў першай шарэнзе такая агіднасць выявілася — ходзіць там адзін шыварат-навыварат, якой нагой ступае, тую і руку наперад выкідвае. Захацеў бы, дык так не зробіш. Хіба спецыяльна натрэніраваўшыся. Давялося гэтага артыста вывесці са строю, і цяпер ён са сваім камандзірам узвода маршыруе асобна, разбіраецца там са сваімі рукамі і нагамі.

А я хаджу і спрабую ўявіць сабе, што ў мяне на галаве шклянка з вадой, ды яшчэ перажываю за свой музычны слых. Камбат жа гаварыў, каб слухалі толькі барабан, а мне і трубы лезуць у вушы. Куды тут падзенешся, калі басавітая труба з дрыжаннем у голасе як зацягне нешта такое пяшчотна-салодкае, крыху журботнае, штосьці роднае да болю, дык аж на душы зашчыміць. Быццам яна бядуе аб нечым. А ёй падпяваюць маладыя, высокія галасы малых труб, не іначай дочкі супакойваюць маці. А іх падтрымлівае дзед-барабан: так-так, так-так!

Калі наш строй ідзе міма аркестра, я парушаю загад начальства — не гляджу ў патыліцу пярэдняга «байца», а гляджу на трубы, на моцна надзьмутыя шчокі музыкантаў, пачырванелых ад натугі. Мне хочацца разгадаць сакрэт: на што скардзіцца вялікая труба, якая абвілася абаранкам вакол тулава пасівелага ўжо трубача, і чым яе суцяшаюць трубы-дзеці.

— Сырцоў, стаць у строй!— раптам развеяў мае мроі рэзкі старшынскі голас.— Ты што — заснуў?

А я і сам не заўважыў, як згубіў раўненне і апынуўся крокі на два збоку ад строю, а за мной пайшлі і астатнія. Строй спынілі.

Падпалкоўнік так і ведаў — зноў Сырцоў. Доўга яшчэ я буду выпрабоўваць яго цярпенне? Чаго я вачыма плюскаю? Ах, задумаўся! Мысліцель знайшоўся. Мары ў страі — самая шкодная рэч, іх трэба выкінуць з галавы, тут трэба толькі вушы, каб слухаць камандзіра і барабан, калі ён ёсць. Чалавек, здольны лунаць у аблоках нават пад каманду «левай-левай», можа забрысці ў цёмны лес, нават не заўважыўшы, і цёпленькім трапіць у лапы ворагу. На батарэю будуць ісці варожыя танкі, а такі летуценнік, як я, будзе лічыць на вярбе грушы, пакуль на яго не наедуць. На фронце быў такі выпадак, дык разява-камандзір пайшоў пад трыбунал. Але супраць лунацікаў у нашага камбата ёсць сродак. Праўда, пакуль што ён яго не прыменіць, але цярпенне ўжо на мяжы трываласці. Калі яно лопне, усе лунацікі пойдуць чытаць шыльды, але ўжо не ў сценах вучылішча. Асабліва гэта датычыць закаранелых і невыправімых.

А я, мабыць, такі і ёсць, бо, замест таго каб падумаць пра свае паводзіны, праз хвіліну-другую ўжо забыўся пра шыльды, пра ўсю гэтую мараль. Калі аб'явілі перапынак, я з найболыш цікаўнымі хлопцамі пайшоў да аркестрантаў, якія, паклаўшы трубы на мурог, перакурвалі. Тут я і дачуўся, што марш, які так развярэдзіў мне душу, называецца «Развітанне славянкі». А Лёва пахваліўся, што ён і словы ведае. Яго бацька як быццам таксама трубач і браў у сваім Магілёве Лёву на рэпетыцыі і на розныя гарадскія святы, дзе трэба было іграць на трубах.

Вечарам, у вольную гадзіну, я прыліп да Лёвы нібы сляпы да плота і не адставаў ад яго, пакуль ён не перапісаў па памяці мне ўсю «Славянку». А яшчэ я дазнаўся, што марш гэты вельмі старадаўні, яго ігралі яшчэ тады, калі слаўныя палкі Расіі хадзілі ў паход вызваляць балгар ад туркаў, таму што балгары — таксама славяне, як і мы. А можа, Лёва тут што-небудзь і наблытаў? Але ўсё гэта мне вельмі спадабалася.

Цяпер кожны раз, калі нас выводзяць на страявую падрыхтоўку і калі аркестр іграе «Развітанне славянкі», я заўсёды яму ў думках падпяваю і мне лягчэй ідзецца.

— Тру-у, тру-ру-ру,— пачынае басавітая труба, а я ўслед за ёй:

Прощай, отчий край, Ты нас вспоминай...

I тут да нас з басавітай трубой далучаюцца астатнія галасістыя трубы:

Прощай, милый взгляд, Прости-прощай, прости-прощай.

I я ўяўляю сабе легендарных салдат, заліхвацкіх камандзіраў, а не такіх, як наш Грызь-Асташэўскі, я чую поступ палкоў Расіі і бачу, як непадалёку ад дарогі стаяць мае аднасельцы, а сярод іх — адна славянка. Кацяй завуць. А разам з палкамі Расіі іду і я. Мне шкада Кацю, якая махае хусцінкай услед, шкада і самаго сябе. I тут трубы ледзь не плачуць:

Прощай, милый взгляд, Не все из нас придут назад.

Гэта ж і я магу не прыйсці назад. А славянка ўсё будзе чакаць і чакаць. Мне б вельмі хацелася, каб чакала. Хаця, чаго добрага, можа ей і іншы які славянін знайсціся замест мяне. Косцік Скачкоў, напрыклад, або той жа Пецька Чыжык. Тут, мабыць, трэба штосьці рабіць, хоць пісьмо напісаць. Некаторыя ж з нашай батарэі хлопцы пішуць. А то адкуль яна будзе ведаць, што мяне трэба чакаць? Я ж нічога ёй пра гэта не гаварыў, бо такое сказаць не адразу адважышся. Ды і сама ж яна таксама мне не мелася.

Такая ж думка выспела і ў Санькі. Вечарам, у вольную гадзіну, ён, нягледзячы на субардынацыю, падышоў да мяне сам і сказаў:

— Пойдзем дамоў напішам, каб не журыліся, мне канверты каптэнармус даў.

Шсьмо бацьку я напісаў хутка. Бацьку ясна што пісаць: прынялі, абмундзіравалі, кормяць добра, у начальства я ў пашане. Напісаў, што яго чаравікі таварыш каптэнармус не выкінуў, а беражэ ў сваей капцёрцы і абяцаў мне аддаць, калі будуць нас пускаць у звальненне. Не забыў упамянуць, што выдалі мне дзве просціны, цяпер я на адной сплю, а другой накрываюся. Затым перадаў прывітанне бабулі, Глыжку, усім блізкім і знаёмым — вось і ўсё пісьмо.

Каці пісьмо не пісалася. Не знаходзіцца такіх слоў, як мне хочацца. А мне хочацца, каб яна ведала, што я яе не забываю, часта пра яе думаю, што я хачу з ёй сябраваць, што нядрэнна было б і фотакартку яе мець. У нашага Генацвале ёсць картка дзяўчыны, дык і я ж не горшы за яго. Няхай бы і ў мяне была. А ў той жа час хочацца мне перад Кацяй і фасон вытрымаць, каб занадта пяшчотна не атрымалася, а то яшчэ ўявіць сабе, што на ёй і свет клінам сышоўся.

Саньку добра — ён паэт, сядзіць сабе, на столь вочы задраўшы, і штосьці шэпча, быццам моліцца. Гэта ён на столі рыфмы вышуквае, а потым ужо іх запісвае. Вядома ж, не маці складае верш, а сваёй Кучараўцы. Што ў яго там выходзіць, не падгледзіш — далонню закрывае.

Але і я выйсце добрае знайшоў, напісаў — будзь здароў! Служба, маўляў, у нас суровая. Не сёння-заўтра пачнуцца артылерыйскія стрэльбы. Некаторыя, праўда, іх баяцца, а мне — напляваць. Але і пры такой службе я ўспамінаю сваё сяло і «нашы з табой сустрэчы». Пра «сустрэчы» я, зразумела, падпусціў для лірыкі, каб не аддавала адной службай ды салдатчынай, а якія то былі «сустрэчы» — няма там чаго і ўспамінаць. Іншыя хлопцы, кажуць, што абдымаліся, а то і да пацалункаў даходзіла. Толькі трапілася ім не Каця. Гэта ж — як дзікая каза. Ледзь што не па ёй — і дай бог ногі. Так што сама і вінавата, што былі ў нас з ёй такія «сустрэчы». I закончыў я сваё любоўнае пасланне добра, таксама вершамі, як і Санька, а можа, яшчэ і лепшымі, чым у яго. Я запомніў, як старшакурснікі спявалі ў страі:

Прощай, не горюй, Слез горьких не лей, А лучше поцелуй, Когда вернусь из лагерей!

Так я ўсё і напісаў. Толькі сумняваюся, каб яна ліла па мне горкія слёзы.

Канверты каптэнармус нам даў фабрычныя, толькі без марак. Замест марак на іх сінія трохкутныя штэмпелі са словам «вайсковае». Для нас гэта яшчэ лепш за марку — адразу відаць, што пісьмо пісаў не абы-хто. Штэмпеля мне здалося мала, таму ў куточку канверта я вывеў друкаванымі літарамі слова «вайсковае» ды яшчэ і падкрэсліў тлустай лініяй. Я помню, як людзі хваляваліся ў вайну, калі атрымлівалі такія канверты. Няхай і ў Каці заб'ецца сэрца.

Батарэя цi казацкая вольнiца?

Заўтра першы дзень вучобы, заўтра ўрачысты развод на заняткі. Начальнік вучылішча генерал-маёр Сцяпанаў з гэтай нагоды будзе рабіць страявы агляд, а затым прымаць парад. Гэта, мабыць, штосьці ўжо такое незвычайнае, што і свет не бачыў. Наша батарэйнае камандаванне на чале з падпалкоўнікам Асташэўскім у такой жа паніцы, у якой была і мая бабуля, калі пачула, што мяне выклікае сам генерал. Дык яна ж турбавалася, што мяне няма як апрануць, каб выправіць у людзі. А тут мы апрануты з іголачкі, ды начальству здаецца, што мы не ўмеем насіць свае абновы — няма выпраўкі. Гімнасцёрка моршчыцца на жываце, а трэба, каб маршчыны былі за спіной, а жывот — гладкі, нібы барабан. Белыя падкаўнерыкі прышыты ў каго як: то тырчыць на цэлы палец, то іх зусім не бачна, то гармонікам, то сікась-накась. Юрка пастроіць батарэю, праверыць і паадрывае цераз двух трэцяму. Я прышыў нічога сабе, а Юрка адпароў — белая нітка яму не падабалася, яна наскрозь прайшла пункцірам вакол каўняра. Думаў, што сыдзе і так — не сышло.

А з гузікамі колькі марокі? Век я іх насіў дагэтуль і ніколі не чысціў. Мне і ў галаву такое не магло цюкнуць. А тут выдумалі, каб медзь золатам блішчала. Ды і напрышывалі ж іх процьму. Далі нам дошчачкі са шчылінамі, куды гузікі трэба запіхваць, і мы шуруем шчоткамі ды паплёўваем на свае шураванне, пакуль яно не пазалоціцца.

У старшыны-каптэнармуса Хамутова з намі клопатаў поўны рот. У калідоры каля электраразетак паставілі два сталы, ён вынес з капцёркі два электрапрасы, а цяпер дрыжыць, каб мы не папалілі свае штаны, таму што не-не ды і запахне гарэлым. Хто зусім не ўмее, таму ён сам дапамагае прасаваць, а тым часам і вучыць.

Зусім не ўмею і я. Дзе я мог такому навучыцца? Я прас бачыў толькі ў адной нашай настаўніцы, дык у той жар з печы насыпалі. А ў нашай хаце для прасавання рубчастая качалка ёсць. Вось калі б мне яе далі, дык не горш за бабулю змог бы. А то засцілай штаны спачатку нейкай марляй, фыркай на марлю вадой і толькі потым ужо ездзі па стале прасам. А што там, пад марляй, са штанамі робіцца, дык хваробу ты ўбачыш.

Старшына Хамутоў глядзеў-глядзеў на мае здзекі над штанамі і плюнуў — узяўся вучыць. Доўга вучыў і як штаніны складваць, каб «стрэлка» была акурат пасярод, і як пальцам спрабаваць, ці гарачы прас, і як пырскаць вадой, каб яна імжыла, а не біла з рота струмянём, нібы з крана. Калі навука скончылася, мне, ужо навучанаму, і рабіць не было чаго — штаны адпрасаваліся ўсім на зайздрасць. «Стрэлкі» вострыя, нібы лязо.

Перш чым генерал, свой агляд нам зрабіў камандзір батарэі. Ён і камандзіры ўзводаў пералічылі на нас усе гузікі і гаплікі, бязлітасна выкаранілі да адзінай маршчыны на жыватах, праверылі, быццам добрыя гаспадары вупраж на конях перад далёкай дарогай, як падцягнуты паясы, пацікавіліся, ці начышчаны нават заднікі чаравікаў, ведаючы наш агульны грэх чысціць абутак толькі спераду, як гаворыцца, для старшыны, і мала таго — скамандавалі паказаць рукі, быццам баяліся, што ў нас не ўсе пальцы на месцы. Не, пальцы аказаліся на месцы, але ў многіх былі пазногці з жалобнай палоскай. Давялося таму-сяму ісці караціць кіпці.

Але і пасля ўсяго гэтага начальству не хацелася распускаць строй. Здаецца, калі б можна было, камбат да заўтрашняга дня трымаў бы нас, каб мы не садзіліся, не лажыліся, не згубілі свой глянец да генеральскага вока.

Трывога начальства перадалася і нам. Калі бывалыя афіцэры так турбуюцца перад гэтым самым страявым аглядам, дык пра нас i гаварыць няма чаго. Так, мабыць, і жаніхі не хвалююцца перад вянцом. Ой, што гэта будзе? Кожны з нас, кладучыся спаць, ужо так акуратна і далікатна складваў сваю вопратку нанач, быццам была яна не са звычайнай, а з заморскай тканіны, з якой і шыюць толькі прынцам. Барані божа, каб «стрэлкі» папсаваліся. А калі б на яе хто сеў, хоць і незнарок, ці як-небудзь інакш пакамячыў, дык таго кожны з нас жыўцом з'еў бы.

I што вы думаеце? Знайшоўся такі адчайны чалавек. Раніцай кінуўся я апранаць гімнасцёрку — і не магу апрануць: рукаў завязаны тугім вузлом. Не думаў я, што і тут знойдуцца такія ж жартаўнікі, як і ў нас, у Падлюбічах. Гэта, бывала, пойдзеш купацца на возера, плаваеш, ныраеш, а пра штаны не забывай — падыдуць на бераг хлопцы з чужога гурту і такога табе вузла засабачаць, што будзеш паўдня развязваць зубамі, прадаючы дрыжыкі галяком. А тут жа казарма, днявальны на варце, і ўсё роўна ўмудрыўся якісь чорт. У роспачы ад таго, што не мінуць мне новага пакарання, стаў я ў строй у майцы, трымаючы гімнасцёрку ў руках.

— Зноў — Сырцоў,— ужо без здзіўлення сказаў падпалкоўнік і зморшчыўся, нібы ад зубнога болю. Відаць, я пачынаю яму ўядацца ў пячонкі.

— Вузел,— падаў я нясмелы голас без надзеі апраўдацца.

— Хто? — сурова спытаў камбат, адразу ўцяміўшы, у чым тут справа.

Вядома, што ніхто не прызнаўся. Строй стаіць, маўчыць, ва ўсіх нявінны выгляд, усе — анёлы. Хто зрабіў, той баіцца, а хто бачыў, той не скажа па іншай прычыне, з-за якой нават я не сказаў бы, калі б і ведаў таго вузлавяза. «Фіскал», данос — гэта ганьба, і наадварот: прыняць муку за таварыша — пачэсна.

На думку камбата, мы — дзіцячы сад, а не будучыя афіцэры. Дзяржава адкрыла для нас артылерыйскія падрыхтоўчыя вучылішчы, каб даць нам сярэднюю адукацыю, якой мы не змаглі атрымаць з-за вайны, каб мы потым сталі курсантамі-артылерыстамі, а мы? Фабзайцы мы натуральныя. Ён, калі б яго воля, нам і пагоны забараніў бы насіць. Народ недаядае, а нам хлеб з маслам дае, каб вырасціць сабе абаронцаў. А хто з нас гэта цэніць? Можа, той, хто вузлы на гімнасцёрках завязвае і камандзіраў не слухаецца? Вось трапім мы ў нармальнае артвучылішча, будзем курсантамі, прымем прысягу, там з намі чыкацца не будуць, як тут. Ледзь што — і пад трыбунал! Тэта нам не ў мамы на прыполе. Не забыўся падпалкоўнік і пра шыльды, якія мы будзем чытаць па складах, калі ў яго не хопіць цярпення з намі няньчыцца. А канчатковы прысуд быў такі: днявальным за дрэнную службу аб'явіць вымовы. Словам, мой рукаў не абышоўся тым разявам дарма. Ды і мяне не пахвалілі. Я, на думку камбата,— расцяпа. Што ж мне — трэба было ноч не спаць і вартаваць свае рукавы?

3-за страявога агляду ў той дзень у нас не было нават фіззарадкі, а зноў паступіла каманда прывесці сябе ў парадак. I зноў хлопцы ўзяліся за гузікі і спражкі, не шкадуючы ваксы, наводзілі бляск на чаравікі, мыліся, не забываючы пра шыю і вушы. Перад адзіным батарэйным люстрам у калідоры казармы была чарга і таўкатня. Я дык разы са тры паспеў перад ім паахарашвацца, а некаторыя і болей. Усе мы зіхацелі гузікамі, эмблемамі і спражкамі, сонечныя зайчыкі адбіваліся ад нашых чаравікаў. Словам, як адзін прыгажуны, юныя, рухавыя. Эх, калі б такім паказацца дома! Там, напэўна, сказалі б: «Няўжо тэта наш Іван!» Але прыйшлі на пастраенне афіцэры, і адразу стала бачна розніца паміж намі і імі.

На афіцэраў я за вайну наглядзеўся. Розныя яны былі: і ў салдацкіх кірзачах, і ў хромавых ботах, і ў ватовых фуфайках, і ў паўкажухах. А такіх бачыў толькі ў кіно пра парад Перамогі ды яшчэ ў фільме «Нябесны ціхаход». Толькі кіно — і ёсць кіно. Гэта — усё адно што сон. А тут наяве. Мундзіры цалкам абшыты бліскучымі гузікамі: два рады — наперадзе і чатыры гузікі — зза-ду. Паясы — тканыя з залатых нітак. А галоўнае — узнагароды: ордэны і медалі. Ордэнскія планкі такога ўражання не робяць, тут яшчэ трэба разбірацца, якая з іх што значыць. А так паглядзеў — і чытай.

Паглядзеў наш узвод на свайго капітана Захарава і зашаптаўся. Усе мы адразу заганарыліся. Дарма што капітан лысаваты і слепаваты, затое ў яго на грудзях іканастас — будзь здароў: дзве Айчынныя вайны, баявы Чырвоны Сцяг, дзве Чырвоныя Зоркі і медалёў не злічыць. Вядома, што і ў астатняга нашага афіцэрства не пустыя грудзі, але ў каштана ўзнагарод больш. I, нягледзячы на свае заслугі, ён на нас яшчэ ні разу не накрычаў, нікога не назваў разгільдзяем і расцяпам. Мы толькі чулі ад яго адно: «У, племя... мумба-юмба!» Мы пачынаем яго пакрыху любіць. Мы нават яму мянушку яшчэ не далі.

Але больш за ўсё мяне ўразілі не шыкоўныя мундзіры і не мноства ўзнагарод, мяне проста ашаламілі афіцэрскія белыя пальчаткі. Такое цяжка ўявіць сабе і ў сне: чырвоныя камандзіры і дваранскія белыя пальчаткі. Ходзяць тут, бачыце, князямі, быццам і не нашага роду-племені. Добранькі б я быў калі б з'явіўся ў сваіх Падлюбічах у белых пальчатках сярод лета. От, сказалі б, запанеў. Ды ўсе людзі пальцам на мяне паказвалі б.

Здзівіў нас той раніцай і старшына-каптэнармус Хамутоў. Няма чаго граху таіць, першыя два-тры дні, калі старшына нас мыў, апранаў і ўкладваў спаць і мы не ведалі яшчэ пра субардынацыю, то думалі, што ён тут цар, бог і вайсковы начальнік. А потым, калі Юрка Калдоба — страявы старшына — перад строем аб'явіў, што справа каптэнармуса толькі «шмоткі», мы перасталі таму і чэсць аддаваць. Падумаеш, кладаўшчык у пагонах, а мы — будзем афіцэрамі. Праўда, ён і не дабіваўся нашай «чэсці», а больш назаляў нам іншымі, на наш погляд, дробязнымі прычэпкамі: убачыць збіты насок чаравіка і пачне бурчаць, што на нас не напасешся; гузік згубіўся — дзяржава нам — не дойная карова; мыла нехта забудзе ва ўмывальні — зноў бяда, зноў пра дзяржаву напомніць. А то раніцай перад снеданнем нас пастрояць, і ён пачынае рабіць праверку на «форму дваццаць чатыры». Мы трымаем перад сабой вывернутыя майкі, а ён вышуквае «дыверсантаў». Знойдзе хоць аднаго на ўвесь узвод і ўвесь узвод пагоніць у той жа дзень у лазню. Астатнія насміхаюцца — вашыўцы. Ну, за што яму казыраць?

А сёння мы паглядзелі на яго новымі вачыма. Выйшаў ён на пастраенне, а на грудзях — тры ордэны Славы! Вось табе і мешкаваты дзядзька з калгаса. Камбат і той першы казырнуў старшыне і нават паздароўкаўся за руку. Выходзіць, што наш кантэнармус — герой. Цікава даведацца, што ён такое зрабіў там, на вайне? «Славу» абы за што не даюць, гэта з нас кожны ведае. Шкада, што ніхто не асмеліўся ў яго спытаць пра гэта ў лазні, калі ён нас парыў. Мне кінуліся тады ў вочы яго шрамы на спіне і на плячы. Але што гэта цяпер за дзіва? Цяпер болей мужчын са шрамамі, чым без іх, ёсць без рук, без ног, сляпыя і абгарэлыя, толькі вельмі рэдка каторы з іх з трыма «Славамі», як наш каптэнармус. Не ведаю, як хто, а я цяпер яму буду чэсць аддаваць.

Падпалкоўнік Асташэўскі баіцца, што мы не здолеем як след на страявым аглядзе паздароўкацца з генералам. Таму, перш чым весці нас на пляц, ён пастроіў батарэю, сам прытварыўся начальнікам вучылішча і патрабуе, каб мы віталі яго, быццам генерала. Ён нам:

— Добры дзень, таварышы!

А мы яму, глытаючы словы, каб не адстаць ад агульнага тэмпу, у сто глотак у адказ:

— Здра...жада...тааш...ерал!

Тэта значыць: здравія жадаем, таварыш генерал.

Каля суседняга пад'езда казармы — другая батарэя салагаў, з імі свой «генерал» здароўкаецца. І ў нас, і ў іх атрымліваецца так гучна, што, мабыць, і ў горадзе чуваць, але не вельмі складна: то нехта паспяшаецца і раней за ўсіх гаркне «здра», то нехта запозніцца і ў пусты след адзінока вякне «ерал».

I вось на пляцы ўсё вучылішча. Высокую драўляную агароджу, за якой недалёка ўскраінная вуліца горада Батарэйная, нібы галкі, абселі хлапчукі. Мне знаёма іх зайздрасць. Дзяжурны на КПП час ад часу зганяе іх з паркана, але варта яму адысціся, як яны з'яўляюцца зноў.

А далей было, нібы ў сне. Недзе там далека, дзе стаяў старшы курс, нехта пеўнем праспяваў каманду:

— См-і-і-і-рна! Для сустрэчы-ы-ы!

Грымнуў аркестр — і не дыхай.

Аркестр то іграе, то змаўкае нечакана, нібы выключанае радыё: пік — і годзе. I тады праз паўхвіліны да нас даносіцца стогалосае «здра...жада...тааш...ерал». Гэта генерал пад музыку ідзе ўздоўж строю і здароўкаецца з батарэямі. Мне з трэцяй шарэнгі не відаць, як ён робіць той агляд: адпорвае ці не неахайна прышытыя падкаўнерыкі, як наш Юрка-старшына, паварочвае ці не шарэнгі, каб паглядзець, як начышчаны заднікі. Вось таму мяне крыху і бярэ трывога, ці не расшпіліўся які гузік, ці так сядзіць на галаве пілотка, ці не сабраліся там маршчыны на гімнасцёрцы. Але па камандзе «смірна» не паварушышся, не праверыш. Стой, нібы статуя.

А што, калі ён мяне пазнае? Мы ўсё-такі крыху з ім знаёмыя. А калі яму далажылі, як я мыўся ў лазні пад прымусам каптэнармуса ці як «па качану» ўклеіў Лёву Белкіну? Затрывожышся тут.

Але не толькі я трывожуся, астатнія таксама стаяць пад напругай, уся батарэя не дыхае. Кінуў я краем вока позірк на Саньку, дык у таго твар акамянелы і пот на носе выступае. Калі б у тэты момант яму села на нос і пчала, дык ён і вухам не павёў бы.

Аркестр зноў крыху паіграў і захліпнуўся — вось ён, начальнік вучылішча, перад намі. А я гляджу і не пазнаю генерала — той і не той. У кабінеце ён быў не такі. Тады вочы яго свяціліся то спагадай, то ледзь прыкметнай усмешкай, голас яго мне здаваўся добрым. Ён не сварыўся на мяне за двойку, не пагражаў выгнаць з вучылішча, а быццам раіўся: што мы з ей будзем рабіць, хлопча? Быццам мая двойка наша з ім, агульная. То быў Баця, а гэта — генерал. Погляд строгі, ніякіх табе ўсмешак. Замест планак — ордэны і медалі. А іх столькі, што жывога месца на грудзях няма — ад каўняра і амаль да пояса. Як у старадаўняга віцязя латы. Крок ступіць — і чуваць перазвон. Нялёгка, мабыць, насіць гэтыя латы.

Генерал не правяраў ні падкаўнерыкаў, ні пазногцяў на руках, ні заднікаў на чаравіках, ён толькі акінуў строй пільным позіркам (я думаю, ці не палюбаваўся крыху) і, прыклаўшы руку да казырка з залатым дубовым лісцем, гучна прывітаўся:

— Здрасце, будучыя артылерысты!

Дарэмна так хваляваўся з-за нас камбат. Як набралі мы паветра поўныя грудзі, як грымнулі ў адказ сваё «здра...жада...тааш...ерал», дык дай божа і старшакурснікам так. Яно калі з сапраўдным генералам, дык па-сапраўднаму выходзіць. А то хацеў, каб перад ім, падпалкоўнікам, мы так горла дралі. Хтосьці там, праўда, піскнуў у канцы нашага «здра-жада...», дык тое не ў залік. Генерал таго піску, здаецца, і не пачуў. Гэтак жа дружна мы пракрычалі і «ўра», калі ён павіншаваў нас з пачаткам навучальнага года. А затым пад музыку генерал завярнуўся і пайшоў.

I гэта ўсё? А мы чысціліся, мыліся, прасаваліся, шылі, перашывалі, глядзеліся ў люстра болып за суткі, калі тут страху на дзве мінуты. Каб я быў генералам, то пахваліў бы за гэта, а ён глянуў і нават не здзівіўся нашай выпраўцы, як быццам так і трэба кожны дзень.

Гэта я так, між іншым, а на самой справе радавацца яшчэ рана, наперадзе, як казаў наш падпалкоўнік, яшчэ будзе парад. Як мы пакажам сябе яшчэ на тым парадзе? А парад такі: пасярэдзіне пляца стаіць генерал з двума палкоўнікамі, мабыць, сваімі намеснікамі, а мы павінны перад імі прайсці, як гэта тут называецца, урачыстым маршам. А гэта ж вам не абы-што, асабліва для салагаў. Таму пад сэрцам і халадок. Крый божа з нагі збіцца.

Першымі пад гукі «Славянкі» ідуць старшакурснікі — дзве батарэі па сто чалавек. Вось гэтыя ідуць як пішуць. Нас проста зайздрасць бярэ. Сто чалавек крочаць, як адзін, сто ног, як адна, уздымаюцца, нібы пад лінейку, і сто рук адначасова робяць адмах. Раўнюсенькі квадрат строю, здаецца, плыве па зямлі, і толькі моцны поступ ста пар чаравікаў напамінае, што ён усё-такі ідзе, маршыруе. Твары ва ўсіх старшакурснікаў сур'ёзныя, засяроджаныя і, я сказаў бы, ужо крыху афіцэрскія. Куды нам, салагам!

Але і мы не падкачалі. Мы вельмі стараліся: выгіналі грудзі дугой, дружна гэпалі падэшвамі, напіналіся як маглі, каб паказаць тую гвардзейскую жылку, па якой нас можна адрозніць ад цывільных людзей. Мы задаволены, што ніхто не збіўся, ніхто нікому не наступіў на пяту, хоць самыя апошнія ў хвасце, як мы завём іх, шкеты, і крочылі з падскокамі, каб не адстаць. А я прайшоў міма генерала і не паглядзеў на яго ў гэты раз, бо вельмі пільнаваў патыліцу Генацвале, які па ранжыру ходзіць спераду ў мяне. Усё, здаецца, добра, усё як мае быць, а наш камбат незадаво-лены. Мабыць, ён зайздросціць іншым камбатам, якія камандуюць старшакурснікамі.

Цяпер камандзіры батарэй стаяць у генеральскай свіце, а мы зноў павінны ісці міма іх, толькі на гэты раз ужо не ўрачыстым маршам, а са страявымі песнямі, без аркестра. Відаць, генерал — вялікі аматар песень. Тут нам ёсць магчымасць паказаць сябе, бо ў нашай батарэі добры запявала — голас, нібы ў палкавой трубы. Можа, і паднімем настрой камбату.

Але тут, як на тое гора, высветлілася, што наш запявала асіп. Яшчэ ўчора ён добра заводзіў наш любімы з Санькам «Марш артылерыстаў», а сёння сіпіць гусаком. Ці ён вады з-пад крана перапіў, бо на вячэру была салёная траска, ці перагрэўся, а потым пасядзеў на скразняку — сіпіць.

Вось ужо каля генеральскай світы старшакурснікі дружна грымнулі: 

Взвейтесь, соколы, орлами, Полно горе горевать. То ли дело под шатрами В поле лагерем стоять!

Не паспела ўлегчыся рэха ад «сокалаў»,— новая батарэя:

Стоим на страже Всегда-всегда, И если скажет Страна труда: «Дальневосточная, смелее в бой!..»

А ў нас паніка, поўны канфуз. Камандзір першага ўзвода маёр Варэніч разгубіўся. Хто яшчэ ўмее запяваць? Ніхто не ўмее, а можа, і ўмее, ды не асмеліцца. Што ж гэта будзе, калі ўсе пройдуць з песнямі, а мы — моўчкі? Што падумае генерал? Нам трэба ўжо набрацца голасу, а мы яшчэ і не пачыналі, хоць да генерала нейкая сотня-паўтары крокаў. Уліплі. Узнялі настрой свайму камбату, называецца.

I раптам, калі ўжо да нашага канчатковага правалу заставалася крокаў пяцьдзесят, Гецьман з Чарнігава, Толік-ціхоня, завёў чыстым высокім голасам:

Распрагайце, хлопцы, коней Ды лягайце спачываць, А я пайду ў сад зялёны, Ў сад крынічаньку капаць.

Нашы афіцэры, я думаю, каб маглі, дык пад зямлю праваліліся б. Капітан Захараў за галаву схапіўся, але ніхто чамусьці каманды «адставіць» не падаў. Відаць, вырашылі: гінуць — дык з музыкай. Але песня надзіва наладзілася. Толіку кінуўся на падмогу і я, а потым і Санька. Мы гэтую песню ад яго маці-хахлушкі перанялі. Знайшліся і яшчэ хлопцы, што падтрымалі. А хто слоў не ведаў, той проста голас пад матыў пачаў падаваць. А прыпеў з другога разу ўсе падтрымалі. Ён такі просты, што там і запамінаць няма чаго. А тут яшчэ Санька як свісне! А мы ўсёй батарэяй:

Эх! Раз, два, тры, каліна, Чарнявая дзяўчына Ў садзе ягады брала!

Праходзім мы міма генерала, а наш камбат, які стаіць каля яго, і вочы рукой закрыў, ці то каб лепш у песню ўслухацца, ці то каб нас і не бачыць. А генерал нічога — стаіць і ўсміхаецца.

Гэтай песні нам хапіла якраз да вучэбнага корпуса. Перад самым уваходам Санька апошні раз свіснуў, мы гаркнулі:

Эх, крынічаньку капаць!

I — батарэя, стой! Усе мы крыху ўзбуджаныя ад перажытага, узбуджаныя і задаволеныя, што так добра выкруціліся з гэтай песняй, што не разгубіліся ў крытычны момант і пастаялі за гонар роднай батарэі. Афіцэры, бачым, таксама павесялелі, так што нас могуць за знаходлівасць яшчэ і пахваліць.

Пакуль камандзіры ўзводаў нам расказвалі, якім парадкам разыходзіцца па класах і як сябе паводзіць на занятках, падаспеў і камбат. Ён быў таксама ўзбуджаны, але не так радасна, як мы, а хутчэй наадварот — проста кіпеў ад абурэння. Мы стаім па стойцы «смірна», а падпалкоўнік ходзіць перад намі туды-сюды. Нарэшце, ён спыніўся і яхідна сказаў:

— Мы можам сябе павіншаваць, таварышы афіцэры. Вы ведаеце, як генерал адазваўся аб нашай батарэі? Вясёлая батарэя — вось як!

Мы ўсе ў недаўменні: ну і што, добра гэта ці дрэнна? Па-мойму, дык нічога ў гэтым кепскага няма, было б значна горш, калі б мы не праспявалі гэтае самае «распрагайце», а прайшлі моўчкі, нібы нямкі. А падпалкоўнік вірадуе:

— Артысты пагарэлага тэатра! Таксама мне — хор Пятніцкага! Можа, у наступны раз і ў скокі пойдзеце? Запявала, выйсці са строю!

Выйшлі адразу двое: той, што быў прызначаны старшыной, ды згубіў голас, і добраахвотнік Гецьман — выйшлі, як на плаху, з пакаяннымі галовамі.

— Хто з вас запяваў, а хто свістаў?

Тут і Санька выйшаў, нібы на гарачую патэльню. Ну, думаю, дасвістаўся і мой міленькі дружочак, а то ўсё мне ды мне. Зараз падпалкоўнік дасць такога жупла, што будзе помніць да новых венікаў, перастане нос задзіраць, будзем мы адным мірам мазаныя.

Убачыўшы гэтую троицу, камбат нібы абрадаваўся:

— А-а, вось яны — запарожцы. Казацкая вольніца. Падавай ім коней.

I звярнуўся да строю:

— Можа, яшчэ хто ведае і «Гоп са смыкам», дык заадно выходзь.

Па праўдзе сказаць, я ведаю, але дудкі выйду, няхай не спадзяецца.

Скончылася гэта ўсё, як і заўсёды, натацыяй. Ён не дазволіць, каб мы тут разводзілі казацкую вольніцу. Ах, мы — запарожцы, ах, гайдамакі! Мала нам добрых страявых песень? Але справа не дайшла да таго, што ён «запарожцаў» павыганяе і будуць яны, невукі, тады чытаць шыльды па складах,— у пад'ездзе зазвінеў электрычны званок. Нам каманда — па класах, а камандзірам узводаў — застацца. Мабыць, будзе і ім жупла без нас, асобна.

Педант

У вайсковым вучылішчы — не ў нашай сельскай школе. Мінула ўжо два гады пасля вайны, але там і дагэтуль сядзяць вучні за самаробнымі з грубых дошак даўжэзнымі «партамі» па шэсць-сем чалавек і пішуць на старых газетах замест сшыткаў. А тут мы расселіся з Санькам за фарбаваным сталом удвух, нібы якое начальства. I падручнікаў — не адзін на ўвесь клас, а на кожнага ўсе. Сшыткі таксама сапраудныя, як даваенныя, папера белая і гладкая, аж пісаць на ей шкада. Пра ручкі, алоўкі і гаварыць не варта. Гэта тут і за дабро не лічыцца. I пра чарніла галава не баліць, не забывай толькі падліваць яго з бутэлькі, якая стаіць за шафай. Адным словам, калі урока не вывучыш ці палянуешся рашыць задачы, дык і спаслацца няма на што. Тут не скажаш, што кніжкі не было ці Глыжка адзіную тваю чарніліцу ў школу занёс, дык не было чым пісаць. Адно што ручкі былі не аўтаматычныя, як у Лёвы, якую ён прывёз з дому. Гэта была трафейная ручка з «вечным» пяром і гумавай піпеткай. Яна набірае ў сярэдзіну столькі чарніла, што хоць цэлы дзень пішы, а ўсяго не выпішаш. Праўда, пасля кожнай чарговай запраўкі ў Лёвы заўсёды сінія рукі, а бывае, што яна і пускае лужыны на паперы. Але Лёва ей усё роўна даражыць і ганарыцца, а мы яму зайздросцім. Такой мы з Санькам і ў жыцці не бачылі. Шкада, што і нам такіх не выдалі.

Але, на вялікі жаль, вучаць нас не таму, на што мы з Санькам, паступаючы ў вучылішча, вельмі разлічвалі. А мы разлічвалі, што няхай сабе і не з першага дня, але ж хоць праз месяц-другі нас пачнуць дапускаць і да гармат, калі тут вучылішча артылерыйскае, а там, глядзіш, хоць у канцы навучальнага года пачнём ужо і весці агонь. Калі нейкія там дзяўчаты-зенітчыцы стралялі ў вайну за нашымі агародамі па нямецкіх самалётах, дык хто ж нас, думалася, будзе марынаваць? Нас навучыць лягчэй: мы смялейшыя за дзяўчат — раз і мужчыны — два. Але да якіх гармат нас пакуль што толькі дапусцілі, дык гэта да тых, што стаяць каля параднага пад'езда вучэбнага корпуса на драўляных, абкаваных жалезам колах. Як нам сказаў наш каштан Захараў, гэта гарматы часоў першай імперыялістычнай вайны, так званыя трохдзюймоўкі. У свой час гэтая гармата славілася сваей скарастрэльнасцю, за што яе называлі яшчэ «каса смерці». Цяпер дзве гэтыя «касы» стаяць каля пад'езда, і побач з імі нашы старшакурснікі іншы раз фатаграфуюцца «на памяць», прымаючы розныя гераічныя позы. Мы ім зайздросцім, але нам не было яшчэ калі і дыхнуць, а галоўнае — у нашай батарэі няма і занядбалага фотаапарата. I вельмі шкада, бо Лёва гаворыць, што ён змог бы. А пакуль што мы можам толькі пастаяць каля гарматы, пакратаць яе рукамі, а то і пасядзець на металічнай станіне, афарбаванай у зялёны колер. Вось табе і ўся артылерыя. Так што агонь мы будзем весці, мабыць, не скора.

I што ж, думаеце, мы вучым? Фізіку, геаметрыю, трыганаметрыю, літаратуру і мову, гісторыю і розную іншую заалогію. Ну, матэматыка нам трэба. Гэта, як гаворыцца, хлеб артылерыста. А навошта нам стары Дзяржавін з яго одамі разам? А навошта нам розныя жукі, чарвякі і нават млекакормячыя драпежнікі? Без іх што — страляць нельга? А яшчэ ў класе над дошкай партрэт палкаводца Кутузава павесілі. Глядзіць на нас той палкаводзец са сцяны адзіным сваім вокам і, мабыць, думае: эх вы! Знайшлі чым займацца,

А яшчэ транспарант павесілі над пад'ездам, дзе стаяць дзве трохдзюймоўкі: «Артылерыя — бог вайны». Пры такой навуцы і рак на гары свісне, пакуль станеш гэтым богам.

Не, а хто нас вучыць! Мы думалі, што будуць адны маёры ды палкоўнікі, а на першы ж урок па матэматыцы прыйшла тая самая змяя, што прымала ўступныя экзамены, чорная, у акулярах. Цяпер яна назвалася — Фаіна Маркаўна. Ды і апрача яе хапае цывільных выкладчыкаў. Усе гэта настаўнікі з гарадскіх школ. Праўда, кажуць, што генерал выбраў самых лепшых, але ж усё адно — без пагонаў. 3 выкладчыкаў было ўсяго чацвёра вайскоўцаў, і сярод іх, на здзіўленне,— выкладчык рускай літаратуры і мовы. Вось ужо што выкладаць цывільнаму чалавеку і бог казаў. Дык — не, даручылі маёру, а матэматыку, бачыце, Фаіне Маркаўне.

Яно няхай бы было і так, але ж перад пачаткам кожнага урока, мы, людзі ў пагонах, ды і не ў абыякіх, павінны пры з'яўленні ў класе нейкай там, скажам, Ганны Сцяпанаўны, падаваць каманду «ўстаць, смірна!», а потым яшчэ і рапартаваць, што наш узвод да заняткаў гатовы, быццам перад намі сам камбат. А ніхто ж не падумаў, як гэта прыніжае наш гонар, нават сам генерал. Вядома, многія з настаўнікаў самі гэта разумеюць і не чакаюць рапарту, а адразу махаюць рукой, маўляў, садзіцеся. Але ж не такія, як Фаіна Маркаўна. Гэта любіць рапарты, слухае іх ад пачатку і да канца, стоячы і сама навыцяжку. Кажуць, што апрача грошай цывільнаму настаўніку даюць у нас яшчэ і сухі паёк: розныя прадукты, што па цяперашнім галодным часе даражэй за грошы. Вось яна і стараецца, здымае з нас скуру. Мы яе баімся не менш за камбата.

3 пачаткам вучобы наша жыццё пайшло па строгаму парадку. Няма ўжо той мітусні, якая была ў першыя дні майго вайсковага жыцця: скончыліся санітарныя апрацоўкі і медыцынскія агляды, чэргі пад дзвярыма капцёркі і ліхаманка перад страявым аглядам. Цяпер мы наперад ведаем, як пройдзе дзень: пад'ём, фіззарадка, умыванне, чыстка гузікаў, прышыванне свежых падкаўнерыкаў і ранішні агляд. Правераць нашы малодшыя камандзіры, як мы прычапурыліся,— і з песняй на снеданне. Затым з песняй на заняткі, з заняткаў — з песняй на абед. Весела жывём.

Пасля абеду адпачынак — «мёртвая» гадзіна. Хочаш спі, хочаш не, а ў пасцель кладзіся і нішкні, іншым сон не трывож. Не адсохла таму галаву, хто гэтую «мёртвую» гадзіну выдумаў. Адна марока з ёй: то распранайся, то апранайся, то разбірай пасцель, то зноў засцілай, а спаць і няма калі. Калі б яны амярцвілі гадзіны дзве-тры, дык можна было б і паслухаць, як шэпчацца пер'е ў падушцы. А так не варта і засынаць. Я звычайна думаю пра сваю вёску, пра радню, пра Кацю. Цікава, паступілі яны з Сонькай у тэхнікум ці не? Штосьці няма на мае пасланне ні пісьма, ні прывітання. Хочацца загаварыць пра гэта з Санькам, ложак яго побач з маім цераз праход, але той, відаць, па яфрэйтарскаму абавязку прыкідваецца, што спіць. Як тая ліса, спіць і курэй бачыць.

Пасля «мёртвай» гадзіны — зноў з песнямі ў клас. Пачынаецца самападрыхтоўка да заўтрашніх заняткаў, або, як сказаў бы шпак, мы вучым урокі. Тут ужо ніхто табе ў гэтым не перашкодзіць, ніхто не скажа «ідзі курэй з проса згані», ці «дроў насячы», ці «вады прынясі», як гэта дома часта рабіла бабуля. Калі ў хаце ці на агародзе была работа, у яе па маёй вучобе галава не балела. А тут у нашага начальства баліць. Ад чаго-чаго, а ад самападрыхтоўкі не сачканеш. 3 намі на самападрыхтоўцы заўсёды капітан Захараў. Мы робім практыкаванні, рашаем заданы, а ён, каб у класе было ціха, сядзіць за выкладчыцкім сталом і чытае тоўстыя раманы.

Калі ў капітана раман вельмі цікавы, тады мы, вывучыўшы формулы і вершы, можам ціхенька і пашаптацца, напісаць дамоў Ці сяброўцы жыцця. Хто ўмее, можа і маляваць, ці, як Санька, складваць вершы, або, як і капітан, узяцца за «Трох мушкецёраў», або і проста лунаць у паднябессі. Крый божа, калі кніжка ў капітана сумная. Тады ён часта ад яе адрываецца, падымае вочы на кожны шорах, а то і ходзіць паміж сталамі, з якіх умомант знікаюць пісьмы, вершы, малюнкі і «мушкецёры». Бывае, што хто-небудзь і не паспее схаваць. Тады перад ім трэба ўставаць і, стоячы навыцяжку, слухаць натацыю. Яго натацыі кароткія, не тое што ў падпалкоўніка Асташэўскага, але са шпількай. Спачатку нас пацяшалі яго любімыя слоўцы пра племя мумбу-юмбу, а цяпер крыўдзяць, у іх чуецца пагарда і насмешка. Гэта ж ён, мабыць, нас лічыць за дзікуноў.

— Я вас наскрозь бачу,— заканчваючы сваю мараль, звычайна хваліцца капітан сваёй празорлівасцю.

Але і мы яго раскусілі — не сляпыя. Павага, якая была зацяплілася, калі ён прыйшоў на страявы агляд увесь ва ўзнагародах, паціху пачала атухаць, і ён ужо носіць у нас мянушку Педант.

У вестыбюлі вучэбнага корпуса вісяць намаляваныя салдаты, сяржанты і афіцэры, а зверху друкаваны надпіс: «Форма адзення ваеннаслужачых Савецкіх Узброеных Сіл». Ды можна падумаць, што малюнкі афіцэраў на той плакат рабілі з нашага капітана, толькі губы намалёваны меншыя, не як каржы-скавароднікі.

Усе афіцэры ў вучылішчы — акуратысты, а капітан Захараў — акуратыст адпеты. Ён увесь такі адпрасаваны, бліскучы, падкаўнерык заўсёды бялейшы за снег, боты — глядзецца можна. Адным словам, прыходзіць на службу, нібы на парад або ў сваты. 3-за сваіх ботаў ён заўсёды ў задняй кішэні штаноў носіць аксамітку, акуратна загорнутую ў паперу. Ад казармы да «вучэбкі» прайшоў — аксамітку з кішэні, і ўмомант на яго ботах ні пылінкі. У казарму вернемся — зноў аксамітку пускае ў ход. I дзіўная рэч — боты ж, вядома, у ваксе, а капітанская аксамітка заўсёды чыстая, нібы новая. I як жа назавеш такога чалавека, калі не Педант?

А вось з аблічча капітан няўдалы. Там, на малюнках, усё прыгажуны маляваныя, а ў яго і залысіны, і поўныя шчокі ў рэдкім рабацінні, а пра губы вы ўжо ведаеце. Затое ён заўсёды чыста паголены, наадэкалонены, і ёсць падазрэнне, што капітан пудрыцца.

Але гэта яшчэ — не дзівацтва. Дзівацтва — што ён узяў сабе ў галаву і нам хоча ўдзяўбці, быццам на свеце трэба жыць па гадзінніку мінута ў мінуту. Самападрыхтоўка ў нас пачынаецца роўна ў пятнаццаць гадзін, калі запіпкае радыё, даючы сігналы дакладнага часу, цюцелька ў цюцельку. Яна ідзе роўна чатыры гадзіны і нуль секунд — ні болей і ні меней. Праз кожныя пяцьдзесят мінут нам даецца перапынак — дзесяць мінут і таксама нуль секунд. Аднойчы дзяжурны забыўся выцерці перад заняткамі дощку. На гэтую справу па капітанскаму гадзінніку яму спатрэбілася дзве мінуты. У той дзень самападрыхтоўку мы скончылі пазней на дзве мінуты і нуль секунд. Словам — педант. Над ім пасмейваюцца нават афіцэры:

— Таварышы, праверце гадзіннікі — маёр Захараў ідзе.

I што вы думаеце? I правяралі, і падкручвалі. Па батарэі хадзіў такі жарт: па Захараўскаму гадзінніку звярае час маскоўскае радыё. Нам, яго выхаванцам, гэта падабаецца і не падабаецца. Падабаецца тады, калі іншыя ўзводы пасля самападрыхтоўкі яшчэ слухаюць натацыі па дзесяць, а то і пятнаццаць мінут. Капітан Захараў і на секунду не затрымае. Не падабаецца ж тады, калі іншых адпускаюць на мінуту-другую раней, калі ўсе ўжо выбягаюць з класаў, а мы яшчэ сядзім. Каштан Захараў і на секунду раней не скамандуе «ўстаць!».

Сярод старшакурснікаў пра нашага каштана ходзіць такая легенда. Кажуць, аднойчы правяраць вучылішча прыехала нейкае высокае начальства, нейкі вялікі генерал ледзь не з Масквы.

Пасля праверкі назначыў той вялікі генерал збор усяму нашаму афіцэрству ў вызначаны час, каб пахваліць, а хутчэй за ўсё даць наганяй. Зразумела, тут кожны прыбег крышачку раней, каб не спазніцца. I вось той наганяй сама пачаўся, як з'явіўся капітан Захараў.

— Дазвольце прысутнічаць.

Маскоўскі генерал і так быў не ў гуморы, а тут яшчз нейкі каштан, бачыце, спазняецца. Якая можа быць у вучылішчы дысцыпліна, калі нават афіцэры сабе дазваляюць спазняцца?

А каштан яму:

— Ніяк не, таварыш генерал, зараз роўна той час, што вы назначылі, і нуль-нуль секунд.

Што там было, што там было! Генерал яшчэ больш узлаваўся.

— Маглі б,— крычыць ён,— і на мінуту раней прыйсці, калі я з Масквы прыехаў!

А наш капітан быццам яму так адказаў:

— Дакладнасць — ветлівасць каралёў, таварыш генерал.

Словам, наш каштан — кароль дакладнасці. Ён ніколі не спяшаецца і ніколі не позніцца. I самая вялікая для яго абраза — сказаць, што ў яго гадзіннік барахліць. Недакладнасць для яго горш за любую неахайнасць, нават за такую, як адсутнасць гузіка ці падкаўнерыка.

Але апранацца па карцінцы і жыць па секунднай стрэлцы для нас яшчэ нічога не значыць. Пахваліцца, што ён кожнага з нас наскрозь бачыць,— таксама невялікая мудрасць. Можна і так ляпнуць, не бачыўшы. Гэта любы салдафон і тупіца сумее. Так думаем мы, і асабліва — Коля Кузняцоў. Гэта той самы тып, што паступаў у вучылішча ў рабым летніку і насміхаўся з мяне, што я — сяло. Сам ён — масквіч і да гэтага часу, хоць мы зараз аднолькава апрануты і абуты, задзірае перад многімі нос, кпіць з на-шай мужыцкасці і хваліцца, што ён знаёмы з многімі сталічнымі славутасцямі, быццам ён і самога спевака Уцёсава, якога мы амаль кожны дзень чуем па радыё, бачыў так блізка, як зараз нас з Санькам. Вось гэты Кузняцоў і паабяцаў на перапынку ўсяму ўзводу даказаць, што капітан — салдафон і тупіца.

Праверка капітана пачалася з геаметрыі. Пасля Колевай абяцанкі ў прадчуванні краху капітанскага аўтарытэту мы сядзім у класе ціха, нібы мышы пад венікам, старанна робім чарцяжы, вучым тэарэмы, і ўсе чакаем, што яно будзе. А бедны капітан, не ведаючы, якая пад яго падводзіцца міна, захапіўся чарговым раманам. I вось падымаецца Коля-масквіч.

— Таварыш капітан,— пачаў ён няшчасным голасам,— дазвольце звярнуцца.

I такім ягняткам прыкінуўся, такой казанскай сіратой — памры, а не здагадаешся, што хоча падкузьміць.

— Не магу зразумець тэарэму, таварыш капітан.

Капітан Захараў адарваўся ад рамана, раней як загарнуць кнігу, паклаў у яе спецыяльную акуратненькую закладачку, і мы ўсе затаілі дыханне, перасталі чытаць і пісаць, утаропіліся ў яго хто з цікаўнасцю, а хто і з яхіднай усмешачкай. Паглядзім, як ён будзе выкручвацца. Гэта яму не мундзір, не гадзіннік, а навука геаметрыя. Цыкаць на нас пад мінутную стрэлку легка, а вось няхай пакажа, які ён камандзір над тэарэмамі і формуламі.

На наша здзіўленне, капітан Захараў не разгубіўся, на што разлічвалі завадатары праверкі, не стаў аднеквацца, маўляў, гэта не мая справа, а спакойна спытаў:

— Хто яшчэ не разумее?

У Колі-масквіча знайшліся паплечнікі, і яны дружна паднялі рукі.

Гучна пастукваючы, па класнай дошцы забегаў мел. Капітанская рука чэрціць лініі, вуглы і дугі імгненна, упэўнена і прыгожа без лінейкі і цыркуля. Стракацяць кулямётам мелавыя пункціры. Адначасова капітан паспявае тлумачыць, што робіць яго рука ў даны момант: чаму яна правяла прамую лінію, чаму перарывістую, чаму намалявала вугал і чаму гэты вугал менавіта такі, а не большы і не меншы, і што было б тады, калі б так не было.

Мы не паспяваем звяраць чарцёж на дошцы з чарцяжом у падручніку, усё яшчэ спадзеючыся, што каштан спатыкнецца — зробіць памылку. А ён чэша, нібы па пісаным, і растлумачвае яшчэ больш зразумела, чым Фаіна Маркаўна. У рэшце рэшт ён з сілай дзеўбануў дошку мелам — паставіў кропку. Усё. Тэарэма даказана. Далонню аб далонь ён абцерушыў з рук мелавую пудру і, абвёўшы клас насмешлівым позіркам, сказаў, нібы варам абварыў:

— Гэта не зразумела толькі тэлеграфнаму слупу. Ці і яшчэ каму-небудзь не зразумела?

Не, нам усім ясна, што капітана геаметрыяй не ўкусіш. Ён абцёр рукі спачатку анучкай, якой мы выціраем дошку, а затым — і ружовай хустачкай з правай кішэні кіцеля. 3 левай кішэні ён выцягнуў блакітную хусцінку і прамакнуў, нібы прамакаткай, лоб, на якім выступіў пот. У жоўты насавік ён высмаркаўся, калі ўжо сеў за стол. Усе пераглянуліся і заўсміхаліся, але ўголас ніхто не хіхікнуў: усё ж такі не хто-небудзь, а капітан, вельмі не разрагочашся. Я быў гэтым так уражаны, нават рот адкрыў. Колькі жыву, такога чыстаплюйства не бачыў. Гэта ж колькі трэба было б каптэнармусу насавікоў нам раздаць, калі б і ў нас былі такія манеры. Вось бурчаў бы, што дзяржава нам — не дойная карова.

На перапынку мы выбеглі на гэты раз не ў калідор, а на двор і там па-за гарматамі часоў імперыялістычнай вайны, далей ад капітанскага вока і вуха, нарагаталіся да колікаў у жываце. Аказваецца, тры хустачкі — гэта яшчэ што! Мішка Цыганкоў — ёсць у нас такі штукар ва ўзводзе — пяць уяўных насавікоў скарыстаў, перадражніваючы капітана: адзін — зноў жа на рукі, другі — на лоб, трэці — на нос, а чацвёрты і пяты — на губы і на вочы. Так ён жыва нам усё гэта паказаў, што кіно — і годзе.

Але як мы ні смяяліся, а усё ж павінны былі прызнаць, што капітан у матэматыцы — малаток. Калі ён у гісторыі і літаратуры так петрыць, тады многае можна яму дараваць, нават і тое, што — педант. Толькі якую б яму шпільку падсунуць, якую вайну, які бунт, каб ён макам сеў?

— Нічога, я яму загадаю загадку,— паабяцаў усім той жа Коля Кузняцоў, які сам сябе лічыць разумнейшым за нас.— Ён у мяне пагарыць, як швед пад Палтавай.

Што гэта будзе за такая загадка, Коля нам не прызнаўся, не палічыў патрэбным, і праз дзесяць мінут і нуль секунд мы сядзелі ўжо ў класе, стомленыя ад смеху. Перад намі падручнікі па гісторыі, але ніякая гісторыя не лезе ў галаву. Цікава, што там за такую загадку прыдумае наш маскоўскі мудрэц, ад якой капітану будзе так, як шведам пад Палтавай. Усе мы сядзім і паглядваем то на Колю Кузняцова, то на камандзіра-выхавацеля, які і не падазрае, што пад яго вядзецца падкоп. I вось яно пачынаецца. Коля зноў падымаецца з-за стала і зноў такім рахманым, нявінным голасам пытае:

— Таварыш капітан, скажыце, калі ласка, а як там, пад Палтавай, было з артылерыяй у Пятра Першага і ў шведскага караля?

Вось гэта ён яму ўрэзаў, не дату бітвы спытаў, нават не пра яе значэнне, а менавіта — як у іх было там з артылерыяй. Мы ж артылерысты і павінны гэта ведаць. Мне нават шкада стала каштана. Не трэба было ўжо так таму Колю. Амаль дзвесце пяцьдзесят гадоў мінула ад Палтаўскай бітвы, нават унукі пятроўскіх салдат паўміралі — хто можа сказаць, як яно там было, калі ў падручніках не напісана? Ой, сядзе наш Педант у лужыну. Вядома, ён можа і Кузняцова пасадзіць на месца, каб не быў такім разумнікам, але ж тады Коля будзе перад намі герой, а капітан — тупіца. Не зайздрошчу я яму.

Але каштан у лужыну не сеў, не пасадзіў ён на месца і Колю без адказу, а пасадзіў у лужыну ўсіх нас. Аказалася, што яго і ў ступе таўкачом не зловіш. Ён, здаецца, нават абрадаваўся такому пытанню. Можа, ён адчуў у ім артылерыйскі патрыятызм, адданасць свайму роду войска? I зноў заляскатаў мел па дошцы. На ей адзін за адным узнікаюць кружочкі з трыма рысачкамі ўсярэдзіне — гэта артылерыйскія агнявыя пазіцыі, рускія і шведскія. I ўсё так дакладна і падрабязна, быццам капітан сам расстаўляў і Пятру Першаму, і шведскаму каралю Карлу іх гарматы. I тут мы дазналіся, што з артылерыяй у нас было ўжо і тады добра: рускія пад Палтавай мелі сто дзве гарматы, а шведы — трыццаць дзевяць. Ні больш і ні менш.

А ўсё гэта таму, што пакуль іх Карла разгульваў з войскам па Еўропе, уяўляючы сябе непераможным палкаводцам, цар Пётр не спаў у шапку, не сядзеў склаўшы рукі на троне, як гэта робяць іншыя цары і каралі. Цар быў і майстрам, і артылерыйстам, ды яшчэ якім — не роўня нам, бамбардзірам!

Капітан расказвае нам усё гэта з такім захапленнем, так хваліць цара, быццам той яму блізкая радня, а мы аж раты паразяўлялі. Ён проста знішчае нас рознымі цікавымі падрабязнасцямі і лічбамі. Яму ўсё вядома: колькі было забітых, параненых і палонных, колькі спатрэбілася рускім вазоў для трафейнай зброі і амуніцыі, нават колькі часу на разгром варожай арміі — дзве гадзіны і трыццаць мінут. Тут капітан паглядзеў нават на свой гадзіннік, быццам правяраючы сябе, ці правільна ён сказаў, ці не памыліўся на некалькі секунд. I калі ён паклаў мел і пачаў выціраць губы, рукі і лоб, вымаючы з розных кішэняў розныя для гэтага хустачкі, мы ўжо не звярталі на такое дзівацтва ўвагі, як быццам так і трэба. Мы былі яшчэ там, пад Палтавай, у парахавым дыме пятроўскіх гармат. Каштан нас пакарыў, разграміў і ўзяў у палон, як Пётр Першы шведаў.

Цяпер для нас Педант — жалезны аўтарытэт, і многія непрыкметна пачалі пераймаць яго замашкі і манеры. Першы Санька разжыўся ў каптэнармуса абрэзкам шынялёвага сукна і пачаў насіць яго ў задняй кішэні штаноў замест аксаміткі. Цяпер і ён счышчае пылінкі са сваіх чаравікаў гэтым сукном і мне яго дае, калі папрашу. Толік Гецьман зноў жа ў каптэнармуса выпрасіў шматок белага паркалю, быццам на падкаўнерыкі, і цяпер мае дзве насоўкі. Тады да старшыны Хамутова паткнуліся былі і іншыя, але той раптам заўпарціўся, нікому больш нічога не даў, сказаўшы, што дзяржава нам — не дойная карова.

А Лёва Белкін і Надар Дадалішвілі, ці, як мы яго клічам, Генацвале, у якіх бацькі, мабыць, багацейшыя за майго, напісалі дамоў, каб ім купілі наручныя гадзіннікі ці выслалі грошы на іх, маўляў, жыць тут без гадзінніка немагчыма, усё па секундах, і таму служба ў бедных ідзе кулём. Мне таксама вельмі хочацца мець гадзіннік, але пісаць такое бацьку я і думаць баюся. Дзе ён што возьме, калі і сам ходзіць у адных штанах у будні і на святы? Не ісці ж яму красці. Вось таму аднойчы на самападрыхтоўцы я намаляваў на руцэ чарнілам гадзіннік. Іншыя ж малююць рознае: то якар з ланцугом, то пранізанае стралой сэрца. А я — гадзіннік. Добры атрымаўся, як і ў капітана. Вось толькі бранзалет намаляваць не паспеў, таму што быў заспеты якраз на цыферблаце. У Педанта, мабыць, сёння была нецікавая кніга, вось я і не ўбярогся. Паглядзеў капітан на мой жывапіс і скамандаваў:

— У казарму бягом марш! Дзесяць мінут нуль-нуль — змыць! Мумба-юмба!

Праўда, знайшоўся мне і напарнік, толькі не з гадзіннікам, а з сэрцам, пранізаным стралой. Вось мы і патупацелі разам да ўмывальніка.

Педант. Шкада яму, каб я хоць такі гадзіннік на руцэ крыху панасіў.

Дзядзькi i шкеты

У першым узводзе самыя рослыя хлопцы батарэі. Не скажаш, што тэта волаты з шырачэзнымі плячыма і магутнымі мускуламі,— такія ж заморкі, як астатнія, але ёсць вышынёй амаль з камбата. Самыя высокія яны і самыя худыя; вырас на неба гледзячы, а абмундзіраванне вісіць на іншым нібы на калу. Асабліва — ёсць там у іх такі — па прозвішчу Анікееў: шыя, быццам у гусака, плечы такія, што пагоны вісяць на іх крыламі, і ўпалыя грудзі, нібы ў яго іх і няма. Хто б нас ні строіў — старшына ці сам камбат,— заўсёды мы чуем адно і тое ж:

— Анікееў, дзе вашы грудзі?

Вось тады ён выгне свае рэбры дугой. Словам, мы дражнім яго — Здыхля. А ўвесь першы ўзвод разам — дзядзькі. Калі хочаш з іх якога падкалоць, дастаткова сказаць:

— Эй, дзядзечка, дастань з-пад страхі верабейку.

Не ведаю, што ў гэтым крыўднага, але яны крыўдзяцца.

А наш, чацвёрты, узвод самы нізкарослы. Так мы падабраліся, калі батарэю дзялілі на ўзводы па ранжыру. Я дык яшчэ нічога сабе — стаю ў страі бліжэй да галавы ўзвода, а тыя, што ў самым хвасце, або, па-нашаму, па-вайсковаму, на левым фланзе, тыя зусім кату пад пяту. 3 імі каптэнармус намучыўся, пакуль абмундзіраваў, ніяк не мог падабраць ні штаноў, ні гімнасцёркі. Давялося яму вадзіць іх у майстэрню і ўсё ўшываць і караціць. Затое цяпер стаяць хлопцы ў страі, як жалудочкі. Дык вось дзядзькі нас называюць шкетамі. Згадзіцеся, што іх мянушка больш крыўдная за нашу. Гэта ўжо амаль абраза. А ў нас жа хлопцы — золата, не кажучы пра мяне з Санькам. Пра нас з ім тут гаворкі няма — мы ў таварышаў па службе ў аўтарытэце. Хоць бабуля і казала, што шалудзівыя, але ўсё-такі партызаны і падпольшчыкі. Калі мы разыдземся, дык тут пра нашы прыгоды ў час акупацыі хлопцы слухаюць раты разявіўшы, нават не вераць. Асабліва — пра Санькаў расстрэл. Даводзіцца бажыцца не толькі Саньку, а і мне, што так яно і было.

А яны кажуць — шкеты.

А наш памочнік камандзіра ўзвода, правая рука каштана Захарава? Няма больш у батарэі такога памкамузвода. Калі з нас назначалі малодшых камандзіраў і прысвойвалі ім званні, дык каму далі толькі малодшага сяржанта — дзве лычкі, каму яфрэйтара — адну, а толькі нашаму Міцьку Яцуку адразу прысвоілі званне сяржанта — тры лычкі. Зразумела, гэта не за прыгожыя вочы, а за баявыя заслугі. Ніводзін выхаванец нават, па-мойму, са старшых курсаў, не мае і заваляшчага медаля, а наш Міця — «За адвагу». Што, па-вашаму, і ён шкет?

Мы ўсе да адзінага ведаем пра яго лес. Міцька сам пра сябе неяк пасля адбою да апоўначы расказваў паўшэптам, калі ў яго спыталі пра медаль.

У нас з Санькам было жыццё — не мёд, а ў яго і зусім. Бацька загінуў на фронце, а маці згубілася ў час адной з бамбёжак у чужым для яго горадзе, куды яны трапілі з эшалонам эвакуіраваных. Дзесяцігадовы Міцька застаўся адзін, нібы палец. Хадзіў галодны і халодны, карміўся, як давядзецца, прасіў і нават краў на вакзалах у баб-гандлярак. Потым неяк прыбіўся да салдат-артылерыстаў, стаў сынам палка. Гэта было не рэдкасць у вайну. Помню, я і сам хацеў з дому збегчы са штабам, які кватараваў у нашай хаце, але салдат-кашавар перашкодзіў — знайшоў пад брызентам у штабной машыне. I мяне адправілі дамоў з боханам хлеба ў руках, не даўшы паваяваць.

А Міцьку пашанцавала, яго артылерысты прыгрэлі, і ён дайшоў з імі аж да Германіі. Там і медаль заслужыў. А подзвіг ён здзейсніў такі. У адным нямецкім гарадку, толькі што занятым нашымі, пайшоў ён з лейтэнантам са ўзвода разведкі і яшчэ адным салдатам выбраць месца для начлегу сваей батарэі. Зайшлі ў адзін пусты дом — нічога сабе, можна размясціцца. I салдатам ёсць дзе адпачыць, і гарматы ёсць куды паставіць. Лейтэнант з байцом хадзілі наперадзе, а Міцька ўсё адставаў, разглядваў нямецкае жыллё разявіўшы рот. I раптам бачыць ён, што з-за вушака дзвярэй, міма якіх лейтэнант з салдатам прайшлі, не заглянуўшы, высунуўся фашыст і цэліцца з аўтамата яго баявым сябрам у спіны. Але... першы паспеў выстраліць Міцька. У яго руцэ быў трафейны пісталет «вальтэр». Хваліцца Міцька не будзе, ён не застрэліў фашыста — прамазаў. Затое лейтэнант паспеў адскочыць за вугал, а потым даць па тых дзвярах аўтаматную чаргу і зрэзаць фашыста напавал. Калі б Міцька не адстаў, а хоць на мінуту разгубіўся, лейтэнанту, а то і ўсім траім была б амба. Вось за гэта Міцьку і далі медаль — за выратаванне камандзіра, за адвагу і знаходлівасць. Вось які ў нас памкамузвода, сяржант Дзмітрый Яцук. А дзядзькі кажуць — шкеты.

Пасля вайны Міцьку была прамая дарога ў сувораўскае вучылішча, але на яго пісьмо адазвалася з дому маці. Міцька і надзею згубіў, што калі-небудзь яе знойдзе,— адазвалася. Была яна пад той бамбёжкай, калі яны разлучыліся, цяжка паранена і лячылася па шпіталях. Затым вярнулася дамоў. Якое там сувораўскае вучылішча — хутчэй да маці! Ды і не хацеў ён у сувораўскае, у пяхоту, паваяваўшы ў артылерыі.

Пажыў Міцька дома з паўгода, пачаў хадзіць у школу, і зноў спасцігла яго гора — раптоўна памерла маці. Дагнала яе бамбёжка і дома, прыкончыла. Куды дзецца Міцьку? Да цёткі. Цётка добрая, але кавалкам хлеба не-не ды папракне. А затым і зусім у дзіцячы дом здала — сіроцкі прытулак. Вельмі не спадабалася там хлопцу, былому сыну палка. На словах шкадуюць, па галоўцы гладзяць, а сэрцы халодныя, рукі чужыя. Уцёк. Злавілі — зноў уцёк, хацеў знайсці свой былы полк — няхай адпраўляюць у сувораўскае, хоць і пяхота. Абы не дзетдом, хоць там і кормяць, і апранаюць. Але зноў трапіў у дзетдом, толькі ўжо ў іншы. Збег бы і з таго, калі б не выхавацель, былы афіцэр — калека без нагі. Быў той чалавек без нагі, але з душой. I Міцька пры ім супакоіўся. Словам, доўга слухаць, а ўсё не раскажаш. Скончыў Міцька сем класаў у апошнім дзетдоме, адтуль і трапіў да нас. Сцяпан Макаравіч, той самы калека-выхавацель, сам яго прывёз у наша вучылішча.

А яны кажуць — шкеты. У якога яшчэ камандзіра ўзвода ёсць такая правая рука, як у нашага капiтана?

Гэта што датычыць баявой славы. Але і талентамі наш узвод бог не пакрыўдзіў, не абдзяліў. Узяць хаця б таго ж Гецьмана з Рэпак. Вы не глядзіце, што ён хлопец ціхі, рахманы, слова лішняга не скажа, а паслухалі б вы, як ён спявае. Праўда, спявае ён не пры ўсіх. Гэта ён толькі адзін раз асмеліўся ў страі зацягнуць: «Распрагайце, хлопцы, коней...» Але, пасля таго як камбат прыгразіў разагнаць казацкую вольніцу, больш не асмельваецца. У страі песню заводзіць адзін з дзядзькоў, той, у якога голас, нібы ў палкавой трубы. А Гецьман так не крычыць. Ён спявае ціха, шчыра, ад сэрца. Гэта, праўда, яшчэ не ўсе ва ўзводзе ведаюць, але я аднойчы падчуў.

Неяк увечары, калі па распарадку дня ў нас вольная гадзіна, выйшаў я за казарму, дзе расла старая ніцая вярба. Там была лавачка, і мне хацелася пасядзець на ей у адзіноце: чамусьці тужліва было на сэрцы. I раптам у прыцемках бачу, што хтосьці там ужо сядзіць, і чую песню:

Дзіўлюся на неба і думку гадаю: Чаму ж я — не сокал? Чаму не лятаю? Чаму ж ты мне, божа, ды крылаў не даў? Я б землю пакінуў і ў неба злятаў.

Гэта быў Толік-ціхоня, і спяваў ён такім шчырым, чыстым і прачулым голасам, так ён прасіў у бога крылаў, што і мне захацелася іх мець. Гецьману, мабыць, трэба крылы, каб злятаць у Рэпкі, а я на сваіх злятаў бы ў Падлюбічы, пакружыўся б над роднай хатай белым буслам і хоць адным вокам паглядзеў, як там жывуць мае. Хоць я тут сыты, апрануты і абуты, і ўсё ў мяне ёсць, каб вучыцца, і хоць я не бог ведае на якой чужыне — усяго пятнаццаць кіламетраў да двара, а як захочацца іншы раз дамоў, дык хоць ты плач. Вось і ідзеш пад ніцую вярбу на лавачку, марыш тут пра той час, калі ўжо нас пусцяць у звальненне. А пад вярбой сёння і Гецьман у бога крылы просіць. I як! Такога ў дзядзькоў спевака няма. А яны кажуць — шкеты.

Лёву Белкіна вы ўжо крыху ведаеце. У яго таксама музычная душа, і яшчэ больш тонкая, чым у Гецьмана. I яно было б дзіўна, калі б тэта было не так: у Лёвы бацька — трубач. А яблык ад яблыні, як вядома, далека не падае. Толькі любіць ён чамусьці пераважна не нашы, а італьянскія песні. Сядзяць гэта хлопцы вечарам у ленпакоі, хто кніжку чытае, хто дамоў піша, хто гуляе ў шашкі, а Лёва стане ля акна, глядзіць на вуліцу і спявае:

Выйду к морю, выйду к морю я под вечер, Там одну красотку встречу С золотистыми роскошными кудрями И с улыбкой на устах.

Спявае ён, па-мойму, хораша, як гэта можна пачуць часта і па радыё, асабліва калі пачне залівацца тонкім голасам на прыпеве:

Тири-томба, тири-томба, Тири-томба, песни пой!

Калі Лёва спявае, ён нічога не чуе і не бачыць вакол сябе: можна падумаць, што там, за акном казармы, ужо і сапраўды Італія з морам і з красунямі ў залацістых кучарах. Лёва слухае толькі свой голас і прыкметна ім любуецца.

Калі яму знадаядуць мора і красуні, ён пачынае «выйдзі-выйдзі». Гэта, па яго словах, і не песня, а нейкая тарантэла. Што гэта такое, самі спытайце ў Лёвы. Вось ён набірае паветра поўныя грудзі і цягне бясконца:

Выйди-выйди-выйди-выйди, выйди ко мне. Буду-буду-буду-буду, буду ждать при луне.

I калі Лёва ўсім ужо так натаранціць у вушах, што сцерпу няма, хто-небудзь ды не вытрымае:

— Лёва, выйдзі ты лепш адсюль сам, пакуль цябе не вывелі.

Ён тады крыўдзіцца, закапыльвае ніжнюю губу і выходзіць. А праз мінуту адкуль-небудзь з пустой умывальні зноў даносіцца «выйдзі-выйдзі». Там Лёва ў гордай адзіноце дапявае свае «тарантэлы».

Але гэта не адзіная Лёвава здольнасць. Ён запэўнівае нас, што ўмее фатаграфаваць. Калі ў яго будзе «лейка», а хоць які-небудзь іншы апарат, тады ён здыме нас каля «касы смерці» — будзь здароў! Дзядзькі з першага ўзвода будуць лопацца ад зайздрасці.

Не дзе-небудзь, а ў нашым чацвёртым ўзводзе ёсць і мастак, якога цэніць сам камбат, падпалкоўнік Асташэўскі. Гэта мой недалёкі сўсед па ложку і цёзка — Іван Расошка. Калі па праўдзе сказаць, ён самы мурзаты ва ўзводзе чалавек. Яго рукі заўсёды ў розных фарбах: чырвоных, зялёных, жоўтых і сініх. Паспеў ён і на гімнасцёрку ўжо не адну пляму пасадзіць. Дык што ж вы хочаце? Мельнік заўсёды ў муцэ. Калі б гэта я хадзіў з такімі рукамі або хто іншы, дык начальства ўжо даўно жыўцом з'ела б.

Яму таксама спачатку перападала на арэхі за неахайны выгляд, а потым усе як бы і змірыліся, махнулі рукой. Нічога тут не зробіць Санька-яфрэйтар і нават Юрка-старшына, калі яго сам камбат выклікае да сябе ў канцылярыю і загадвае маляваць розныя стэнды: «Нашы выдатнікі», «Дакументацыя батарэі». Але каб вы паглядзелі, як у нас усё размалёвана: чырвоныя сцягі, дубовае лісце, перавітае чырвонымі стужкамі, артылейрыйскія эмблемы, розныя гарматы, хоць і невядома якога калібру і прызначэння. I ўсё, нібы жывое. Зайшоў да нас у казарму аднойчы генерал, дык вельмі хваліў Расошкава мастацтва. А самога Расошку на той час ад генерала ў капцёрку схавалі, бо ён і сам, як на грэх, тады быў добра размаляваны.

Само сабой зразумела, што і наша ўзводная насценгазета «Залп», якая вісіць ў класе вучэбнага корпуса, заняла першае месца на батарэйным аглядзе. У нас самая прыгожая газета.

А яны кажуць — шкеты.

Але, вядома, ні спевакі Гецьман і Белкін, ні нават мастак Расошка не карыстаюцца такой вядомасцю і ўвагай, як Мішка Цыганкоў. Дзе Мішка, там заўсёды весела, там заўсёды смех. Нават у страі, дзе і пікнуць нельга, на Мішку глядзець небяспечна: не ўтрымаешся, рагатнеш і адхопіш ад камандзіра вымову, а то і нечарговы нарад. Хоць ён і рускі, але ёсць у яго сапраўды нешта цыганскае: чарнявы, рухавы і шальмаватыя вочы навыкаце. Яго між сабой мы так і называем — Мішка-шэльма.

Ну і штукар! Ён умее гаварыць не сваім голасам і так крыўляецца, такія строіць морды, што і мёртвы зарагоча. 3 тыдзень ён цешыў нас, паказваючы, як капітан Захараў выцірае рукі, твар і губы хусцінкамі. Калі ўсё гэта нам знадаела, узяўся за падпалкоўніка Асташэўскага. Але на гэтым ледзь не спёкся.

Вось Мішка стаіць перад намі, заклаўшы рукі пад папругу, ківаецца маятнікам, то падымаецца на дыбачкі, то апускаецца рэзка на абцасы і падпалкоўніцкім голасам чытае нам мараль:

— Што? Выганю, невукі! Будзеце хадзіць па горадзе і чытаць шыльды па складах!

Вакол яго сабралася паўбатарэі, і ўсе так захапіліся, ўсе так рагаталі, што не заўважылі, як і калі падышоў і сам падпалкоўнік, стаў ціхенька па-за спінамі і назірае, як яго перадражнівае Мішка-шэльма. Зразумела, што ніхто і не крыкнуў выратавальнае «атас!». Усе схамянуліся толькі тады, калі камбат сам абазваўся.

— Тэ-эк! — сказаў ён.— Што яшчэ нам пакажаш, цыркач?

Мы ўмомант разбегліся, нібы мышы ад кошкі, а Мішка стаіць перад падпалкоўнікам навыцяжку, рукі па швах, глядзіць нявінным позіркам і вокам сваім цыганскім не міргне.

А падпалкоўнік, сам таго не заўважаючы, раскачваецца так жа, як толькі што рабіў Мішка, і ўчыняе допыт, як ідзе ў Мішкі вучоба. Па матэматыцы «чатыры»? Тэ-эк! А па гісторыі! Тэ-эк! А чаму гузікі не блішчаць? А хто яму будзе прышываць свежы падкаўнерык? Тэ-эк! Словам, прыдзіраецца да чаго толькі можа. Адно што не спытаў, чаму ў Мішкі вочы лупатыя. Але ўсё абышлося.

— Марш з вачэй, цыркач! — скамандаваў у рэшце рэшт камбат і не аб'явіў, што нас вельмі здзівіла, нават вымовы.

А як Мішка можа падрабляцца пад рыбака-вудзільшчыка! Тут ужо без адзінага слова, моўчкі. Вось ён пільна-пільна глядзіць на ўяўны паплавок, а рукі тым часам круцяць цыгарку, дрыжаць — «рыбалоў» хвалюецца. Вось штосьці клюнула — махорка рассыпалася. Але клюнула штосьці вялікае. Раз-два! — не выцягваецца. Вуды, зразумела, ніякай няма, але мы бачым, як яна ўсё больш і больш гнецца. Так і ёсць — парвалася леска, і Мішка ляціць на падлогу. Цяпер трэба «рыбалову» здымаць штаны і лезці адчапляць кручок. Асабліва смешна глядзець, як «вудзільшчык» баіцца халоднай вады. Мішка робіць выгляд, што ён босы і голы, увесь дрыжыць, ляскае зубамі. Вось «рыбалоў» памачыў асцярожна нагу ў «рэчку» і адскочыў, затым — другую, зноў адскочыў. Нарэшце адважыўся і палез. Але як палез! Нам глядзець — і то холадна.

Ну вось — даўно трэба было адразу акунуцца. Мы бачым, як «рыбалоў» паўзе па дне «рэчкі» ў пошуках кручка, як ён там вось-вось захлынецца, як ён хапае паветра шырока адкрытым ротам, вынырнуўшы з вады.

Усё ў парадку, можна «вудзіць» далей. I Мішка зноў пільна-пільна глядзіць на ўяўны паплавок і ніяк не можа рукамі, якія дрыжаць, скруціць уяўную цыгарку, бо зноў «клюе».

Паглядзець на гэта відовішча прыходзіць уся батарэя, у тым ліку і дзядзькі.

Вось табе і шкеты.

Пра грузіна Надара Дадалішвілі можна было б не расказваць, бо ён не спявае, не малюе, не ўмее выкідваць такіх конікаў, як Мішка-шэльма, а тым больш не падпольшчык, не партызан, як мы з Санькам, і не сын палка, як Міцька Яцук. Але ў яго шырокая душа. Неяк я ўбачыў у Надара ножык-сцізорык, прыгожанькі такі ножык з перламутравымі тронкамі. Ну і пахваліў. Надар вельмі абрадаваўся маёй пахвале і спытаў:

— Табе сапраўды падабаецца?

I ўжо зусім нечакана:

— На, бяры! Цяпер гэта твой нож.

Пачаў я аднеквацца, упінацца, маўляў, як гэта так: гэтакую рэч і задарма бяры? Тады ён кінуўся ў крыўду:

— Ты мне друг ці вораг? Бяры, гавару табе!

Каб не стаць яму ворагам, я ўзяў і цяпер шыкую з Надаравым ножыкам, калі трэба завастрыць аловак ці ў сталоўцы трапіцца тоўстая луста хлеба. Ды калі луста і ў рот лезе, дык усё адно ножыкам разрэжу, каб лішні раз на яго паглядзець.

А яшчэ Надар запрашае ўсіх, хто яму падабаецца, да сябе ў Грузію ў госці. Зразумела, не зараз, а цераз год, на будучае лета, калі ў нас будзе водпуск. Кожнаму свайму госцю ён звычайна гаворыць:

— Будзеш шашлык кушаць, вінаград, чабурэкі, сіцыві.

Што гэта такое, апрача вінаграду, мы з Санькам не ведаем, але думаем, гэта, мабыць, смачней і за бульбу з салам, і за драчонікі. А пра вінаград ведаем: у кіно бачылі. Мы з Санькам таксама запрошаны ў Грузію.

Праўда, нам яшчэ можа быць і адмоўлена, бо Надар гэта іншы раз робіць. Вось Лёву Белкіна ён быў запрасіў, а затым чамусьці яны не паладзілі, і Лёва атрымаў адмову:

— Не паедзеш у госці, не будзеш кушаць вінаград, шашлык і чабурэкі!

Затое астатнія запрошаныя могуць, канешне, паехаць і ў Грузію. Абы захацелі.

А яны гавораць — шкеты. Ды ніводнаму дзядзьку Грузіі не бачыць як уласных вушэй. У іх няма свайго грузіна. І ў астатніх двух узводах няма.

Я, вядома, тут не пра ўвесь свой узвод расказаў. Увесь узвод — гэта дваццаць пяць чалавек. Я расказаў толькі пра тых, з кім цяпер таварышую. Але завяліся ў мяне і ворагі. Нямнога, праўда, адзін. Гэта Сцёпка Рубцоў з Растова-на-Доне.

Я ў сваім аддзяленні (а гэта паўузвода), як вядома, па Санькавай міласці— «развадзяшчы»: дзялю за сталом суп і кашу. I вось аднойчы пасля абеду адводзіць мяне за вугал сталоўкі Сцёпка Рубцоў, каржакаваты і даволі-такі дзябёлы хлопец, і ваяўніча гэтак гаворыць:

— Ты мне мяса кладзі як след, самую вялікую порцыю. Сам не еш, а мне каб было. А не тое — помні!

— Гэта ж чаму? — крыху быў разгубіўся я.

— А таму, што канчаецца на «у»,— сурова адрэзаў Рубцоў, пранізваючы мяне злосным позіркам прыжмураных вачэй, а затым усё ж растлумачыў: — Я з Растова. Чуў пра такое: Адэса — мама, а Растоў — тата? Мы там не любім такіх фраераў, як ты. Мы ім робім — чык! — і вашых няма!

I тут ён адтапыраным пальцам энергічна ткнуў сябе ў жывот, паказаў, як яны там, у Растове, робяць гэтае самае «чык» такім фраерам, як я. I, відаць, каб мне не падумалася, што з растоўскіх блатных ён самы апошні, пайшоў на адкрытасць:

— Хто такі Прынц, ты чуў? Дык вось — ад яго імя ўвесь Растоў дрыжыць і міліцыя рыдае. А я,— тут ён ткнуў пальцам сябе ў грудзі,— з яго прыдворных. Запомні — і рот на замок. А мяса каб было.

Не паверыў я ні адзінаму яго слову. Бярэ, вядома, на пушку, як у нас гаворыцца. Так яму і сказаў:

— Не брашы ты, як сабака. А калі б і так, дык тут табе не Растоў. Таксама мне прыдворны.

— Ну помні, фраер! — прыгразіў ён мне напаследак, і на тым мы разышліся.

Вядома, я нікому пра гэта не расказаў, апрача Санькі, і тым больш не данёс каштану Захараву. I не таму, што я баюся гэтага «прынца», а таму, што не хачу быць фіскалам. Санька таксама не хоча. Ён толькі параіў:

— Плюнь ты на яго і разатры.

I я плюнуў. Лішняга мяса, калі яно трапіцца ў супе, яму як не даваў, так і не даю, а «прыдворны прынца» ўвесь час моўчкі свідруе мяне злоснымі вачыма. I я так думаю, што вузел на рукаве маёй гімнасцёркі, за які я ледзь не адхапіў нечарговы нарад,— ці не яго рук справа.

Словам, у сям'і не без вырадка. А так усе нашы хлопцы — золата, не кажучы пра нас з Санькам, і таму крыўдна нам слухаць ад іншых узводаў, што мы — шкеты.

Вось афіцэры гавораць, што яны ведаюць пра нас усё на свеце, што бачаць кожнага наскрозь, што чуюць, чым мы дыхаем. Вядома, ведаюць, бачаць і чуюць, але не ўсё. Яны ведаюць нас толькі на вучобе, па нашых паводзінах у страі, па нашым голасе, калі мы днявалім ці дзяжурым і падаем каманду «смірна» пры іх з'яўленні. Але не ўсё тое жыццё, што вучоба, строй і дзяжурства. Гэта толькі частка нашага жыцця, астатняе ж, галоўная яго частка — па-за строем і дзяжурствам. Яно ў нашых думках і душах, пачуццях і ва ўзаемаадносінах паміж сабой. Усяго гэтага нашы афіцэры, па-мойму, і не ведаюць. Яны нават не здагадваюцца, якое саперніцтва, якая патаемная вайна ідзе паміж дзядзькамі і шкетамі. Дзядзькі намі пагарджаюць, глядзяць зверху ўніз з вышыні свайго росту, у іх свае размовы, больш пра дзяўчат. Мы, шкеты, адносімся да іх жартаўліва-насмешліва, падвяргаем сумненню іх рыцарскія вартасці, іх перавагу над сабой, і гэта іх кранае за жывое.

За нашы пад'ягоркі яны шчодра расплачваюцца пстрычкамі па «качану», а то могуць зрабіць і «вуксаля». Зловіць цябе гэтакая дубіна, абхопіць тваю галаву рукой, прыцісне да сябе, што не паварушышся, затым плюне сабе на вялікі палец другой рукі і правядзе мокрым пальцам па тваёй галаве супраць шэрсці. Раз правядзе — адзін «вуксаль», два разы — два «вуксалі». Ды яшчэ ж прыціскае палец на ўсю моц. Гэта вельмі балюча, аж слёзы выступаюць. Так, мабыць, было балюча тым, з каго індзейцы здымалі скальп. Што ты хочаш: сіла ёсць — розуму не трэба.

Праўда, «вуксалі» робяцца рэдка і не ўсімі дзядзькамі. Але ёсць там у іх адзін дуралом па прозвішчу Лобан. Вось той на такую расправу над шкетамі — мастак. Аднойчы наш Пiскля, самы дробненькі ў нас хлопчык Косцік Лямешка, прыбег у размяшчэнне ўзвода ўвесь у слязах. Толькі што ва ўмывальні Лобан зрабіў яму тры «вуксалі». Уся Косцева віна перад Лобанам была толькі ў тым, што ён агрызнууся і сказаў:

— Дзядзька, дастань верабейку!

Мы ўсе абурыліся і нават раілі Косцю далажыць калі не капiтану Захараву, то хоць старшыне, таму што тры «вуксалі» — гэта ўжо замнога. Гэта ўжо занадта дала волю рукам тая дубіна. Але Косця дакладваць адмовіўся наадрэз. Ён — не фіскал, ён сам яму пакажа, таму Лобану, ён адпомсціць. 3 гэтага і пачалася вайна паміж шкетамі і дзядзькамі.

Непрыемнасці ў дзядзькі Лобана пачаліся ўжо наступнай раніцай. Ён і яго таварыш спазніліся ў строй на фіззарадку, і старшына ўляпіў ім па вымове і папярэдзіў, што пры паўтарэнні спазнення дасць па нечарговаму нараду драіць гальюн — прыбіральню. А яны апраўдваліся, хтосьці ім, бачыце, пераставіў ноччу чаравікі: у аднаго аказаліся абодва левыя, у другога — абодва правыя. Пакуль разабраліся, дык і спазніліся.

Шкеты адразу здагадаліся, чыіх рук гэта справа — нашага Пісклі, вось толькі ніхто не мог зразумець, калі ён паспеў зрабіць такую дыверсію. Усе мы толькі падзівіліся яго выдумцы, усе яе ўхвалілі і паміж сабой ад душы пасмяяліся. Будуць ведаць, як нос задзіраць. Мы, бачыце, шкеты, а яны дык гвардзейцы, чэрці даўгавязыя.

— Пагуляйце трохі, ён у мяне яшчэ і ваксы пад'есць!— пакляўся перад намі Косцік.

Мінула два дні, і наш мсціўца стрымаў слова. Пад'есці, праўда, Лобан ваксы не пад'еў, а зубы пачысціў. Вакса была так удала замаскіравана ў карабку з зубным парашком, што Лобан яе і не заўважыў — акунуў шчотку ў парашок і давай шураваць па зубах. Ну і смеху было, на ўсю умывальню! Уся батарэя рагатала, ледзь не поўзала, асабліва — наш узвод, гледзячы на тое, як Лобан то паглядзіць на сваю шчотку, то яе панюхае і недаўменна пытае:

— Хлопцы, адкуль тут вакса?

Адкуль. Няхай не будзе такі лёгкі на руку, дык і ваксы не будзе на зубной шчотцы. Вось цяпер няхай паплюецца, нібы вярблюд.

Затым наступіла зацішша. Сэрца нашага Пісклі памякчэла. Але нечакана вайна успыхнула зноу. Гэта, я б сказау, быў яе грузінскі перыяд. Пакрыўджаны тым жа Лобанам, Надар Дадалішвілі аж скрыгатаў зубамі.

— Усё — кроўная помста! — кіпеў ён.

Усе, хто гэта чуў, спрабавалі супакоіць Надара, каб справа да крыві не даходзіла, а то яшчэ, чаго добрага, зарэжа чалавека з-за пстрычкі па «качану». У іх там, у Грузіі, кажуць, з гэтым проста: ледзь што — адразу кінжал.

— Не будзе кінжал,— супакоіў нас Генацвале, і ўсе мы, затаіўшы дыхание, крыху чагосьці пабойваючыся, пачалі чакаць Лобанавай крыві без кінжала.

У нас ва ўсіх завялася такая дурная прывычка — ляжам спаць, начальства ўсё разыдзецца, і то ў адным куце казармы, то ў другім пачынаюцца дуэлі на падушках. Падушкі то лётаюць, нібы гарматныя ядры, то дуэлянты, узяўшы іх за рагі, лупцуюць адзін аднаго, аж пер'е ляціць. Вядома, не кожны вечар, а былі такія баталіі. Распачыналі іх час ад часу і Лобан са сваім суседам.

Вось аднойчы яны разжартаваліся: Лобан суседа падушкай — цоп, а той у адказ — шмяк! I замест гарэзлівага смеху раздаўся тут на ўсю казарму крык і енк. Прыбег дзяжурны, падхапіліся суседзі, запалілася святло — сядзіць Лобан і зіхаціць добрым такі сіняком пад вокам. Паглядзелі ў суседаву падушку, а ў навалачцы — ладны кавалак цагліны. Сусед божыцца-клянецца, што ён туды яго не клаў, а пацярпеўшы не верыць. У казарме шум, толькі наш узвод «спіць».

Тут нехта выказаў здагадку:

— Гэта, мабыць, шкеты. Наш узвод адразу прачнуўся:

— Ага! Ты паспрабуй дакажы!

Гармідар стаяў у казарме да апоўначы, пакуль нехта не крыкнуў.

— Атас! Дзяжурны па вучылішчы!

Дзяжурны па вучылішчы — афіцэр. Святло ўмомант пагасла, і батарэя прыціхла — спіць. Раніцай камбату ніхто пра гэта, зразумела, не далажыў, а на яго пытанне, адкуль у Лобана такі цудоўны ліхтар, той зваліў усё на вушак дзвярэй, у які ён быццам незнарок урэзаўся.

— А вушак цэлы? — яхідна спытаў падпалкоўнік Асташэўскі, на чым і скончылася. Следства не было. Але цяпер дзядзькі глядзяць на нас зусім коса.

I тут у нас адбылася здрада. Якраз наступіла мая чарга разлічвацца за крыўду з тым дылдам Лобанам. Ох, і хітрую ж я прыдумаў супраць яго штуку. Тры дні я падпільноўваў момант, калі ў казарме нікога не будзе, і падпільнаваў. Я разабраў Лобанаў ложак і саставіў яго на жывую нітку, каб той, хто на яго ляжа, загрымеў у тартарары. I Лобан загрымеў. Праўда, нічога з ім не здарылася: не ўдарыўся, не набіў шышкі, а толькі крыху спалохаўся. I зноў узнікла пытанне — хто? Вось тут мяне і прадаў «прыдворны прынца» — Сцёпка Рубцоў. Апошнім часам ён стаў вялікім прыяцелем з Лобанам, увесь час каля дзядзькоў ашываецца, аддана глядзіць ім у рот, а яны за гэта паляпваюць яго па плячы. Відаць, купіў іх сваімі растоўскімі байкамі.

Лобан расквітаўся са мной трыма «вуксалямі», пагразіў у другі раз пяць адваліць і здуру прызнаўся, адкуль яму вядома пра ложак.

Увесь наш узвод аб'явіў Сцёпку байкот. Усе пакляліся не размаўляць з ім да магілы і не глядзець нават у яго бок. Такія байкоты мы іншы раз аб'яўляем тым, хто перад намі правінаваціцца, але ж усяго на тыдзень-другі, а тут — да магілы. Здрада таварыству — горш нічога быць не можа, гэта нават горш за крадзеж.

Сцёпка адчуў, што такое байкот, адразу. 3 ім ніхто не размаўляе, ніхто не адказвае на яго пытанні, усе глядзяць на яго з гідлівасцю. Ён ходзіць між намі, нібы пабіты сабака, спрабуе да таго-сяго падлашчыцца, ледзь не віляе хвастом. Вакол нямая сцяна. Няхай ідзе да сваіх дзядзькоў-заступнікаў і ліжа ім пяты. Мне іншы раз нават шкада яго, але выказаць гэтага не магу: тады я сам буду здраднікам.

Этыкет i этыкетка

У чым-чым, а ў вучобе ў нас вялікая строгасць. Тут не залянуешся. Капітан Захараў з уласцівай яму педантычнасцю правярае класны журнал кожны дзень, і мала таго што правярае, ён завёў сабе сшытак, куды запісвае ўсе нашы адзнакі. Бывае, што і сам забудзеш, па якім прадмеце ў цябе тройка, дык Педант табе напомніць. А тут, браткі, ставяць тройкі за тое, за што ў нашай сельскай школе адвалілі б пяцёрку.

Запісвае каштан, апрача адзнак, у свой сшытак і яшчэ нешта цікавае пра нас. Нам думаецца, што тыя запісы не надта пахвальныя, і кожнаму хочацца ў іх заглянуць. Але гэта нікому яшчэ не ўдалося: «чорны» сшытак, як ён у нас называецца, хоць вокладка на ім і зялёная, капітан не пакідае на стале і на мінуту, а носіць яго ў палявой сумцы.

Ну, з капітанам зразумела: ён наш камандзір, і не проста камандзір, а выхавацель. Яму трэба ўсё ведаць да драбніцы. Але ж раз у тыдзень класныя журналы ўсіх узводаў носяць і падпалкоўніку Асташэўскаму, які праглядвае іх у сваім кабінеце — канцылярыі батарэі. Пасля прагляду таго-сяго ў кабінет выклікаюць на «гутаркі», якія мы называем санапрацоўкай. Толькі з лазні чалавек можа выйсці такім чырвоным. Нам, шкетам вельмі па душы, калі падпалкоўнік гутарыць з дзядзькамі. У нас тады ва ўзводзе свята.

Паміж многіх «цывільных» навук, якім нас вучаць, уціснулася і адна ваенная — стралковая падрыхтоўка. Выкладае яе сам капітан Захараў, наш камандзір-выхавацель. Гэта лёгкі для нас з Санькам прадмет. Хто з хлопцаў у Падлюбічах не ўмее разабраць і сабраць карабін? I навучыў нас гэтаму не школьны ваенкіраўнік з адзінай сваёй вучэбнай вінтоўкай, ды і тая з прасвідраваным ствалом, каб не страляла. Навучыла нас вайна. Многія нашы аднагодкі нават разбіралі снарады і міны, а калі што не разбіралася — у ход ішлі зубіла і малаток. Многія разбіралі, але не усе разабралі: хто без рук застаўся і вачэй, а хто і на могілках ляжыць. Так што карабін для нас — не навіна, не вялікае дзіва.

Але капітан умее пра ўсё расказваць так цікава, што вушы развесіш. Здаецца, пакажы яму Глыжкаву рагатку, з якой малы страляе па вераб'ях, і то ён раскажа пра яе што-небудзь небывалае. А тут карабін. Вось і пачалася гісторыя стварэння стралковай зброі наогул — з тых часоў, калі кітайцы выдумалі порах, і да нашых дзён. Доўгая гэта была гісторыя — на цэлую гадзіну. А затым пачалася тэорыя: «сцебель-грэбень-рукаятка-зуб-адсечка»—і ўсё гэта на адной жалязячыне, затворы.

Затвор нам хутка знадаеў з яго «сцеблямі» і «грэбнямі», і цяпер мы чакаем, калі нас павядуць на даўно абяцанае стрэльбішча. Вось там мы з Санькам, мабыць, сябе пакажам. Але на стрэльбішча ўсё не вядуць і не вядуць. Ды і сама стралковая падрыхтоўка ў класе, калі мы збіраем і разбіраем карабіны, бывае рэдка. Праклятая хімія — значна часцей. А ў ёй, як ні стараюся, я не разумею ні вуха ні рыла. Праўда, цягну на чацвёрку пры дапамозе шпаргалак.

Светлы дзень надышоў для нас з Санькам, ды і для новых нашых таварышаў, калі ў раскладзе ўрокаў вычыталі нечаканае для сябе: «азнаямленне з матэрыяльнай часткай артылерыі». Вось калі яно пачынаецца. А то — карабін. Ды з карабінам толькі пяхота ваюе. А мы — артылерысты. Значыць, нам гарматы падавай. Вось толькі не разумею, чаму знаёміць з той самай матэрыяльнай часткай нас павядуць у нейкі артылерыйскі парк. Не разумею, а спытаць саромеюся. Да смерці не люблю, калі з мяне смяюцца.

У маім уяўленні парк — гэта тое месца, дзе гуляюць людзі, калі ім няма чаго рабіць. Бачылі мы гэта з Санькам на ўласныя вочы. Аднойчы, калі мы насілі на базар прадаваць шчаўе ды рана распрадалі, бо тавар пайшоў ходка ў той дзень, захацелася нам пагуляць па горадзе, на людзей паглядзець і сябе паказаць. I трапілі ў парк. Уваход быў платны, але білеты недарагія. Прыкінулі, дык цана ім — адна кучка шчаўя. Ну і не паскупіліся — пайшлі. I я вам скажу, не пашкадавалі.

Было для нас прыгожа ў парку і цікава. Высокія старыя ліпы стаяць роўнымі радамі, дубы і розныя іншыя дрэвы, назваў якіх я не ведаю і зараз, бо не бачыў такіх у Падлюбічах. Дарожкі вакол роўныя, падмеценыя, аж прыемна па іх ісці босымі нагамі. I мноства кветак: і на розных градах, і абапал дарожак. А пасярод парку гучнагаварыцель іграе духавую музыку, тут жа танцуюць розныя танцы гарадскія кавалеры і дамы. Пастаялі і мы тут з мяшкамі-крапіўнікамі пад пахамі, у якіх носім звычайна свае шчаўе. Калі з нас пачалі пасмейвацца розныя франты, а больш — франціхі, падаліся да руінаў былога княжацкага палаца. Там таксама было цікава: палонныя немцы разбіралі бітую цэглу. Словам, гулялі мы па парку доўга, пакуль нас ногі насілі і жываты не падвяло пад дзевятую рабрыну з голаду. А як жа, дарма хіба мы грошы плацілі?

Вось такім я ўяўляю сабе парк. Дык то ж — культуры і адпачынку. А што значыць артылерыйскі парк, у які мы пойдзем? Няўжо там таксама і дрэвы, і кветкі? А паміж дрэў і кветак стаяць, мабыць, гарматы, і гуляюць там адны артылерысты. Сумна адным, без дзяўчат.

Якое ж мае было здзіўленне і расчараванне, калі гэта аказаўся голы двор, без адзінага дрэўца і кусціка, а на яго пляцы стаіць некалькі розных гармат. А яны — «парк»! Сказалі б — гарматнае стойбішча ці яшчэ як. Мабыць, той, хто гэта выдумаў, сапраўднага парку і не бачыў.

Капітан Захараў пастроіў нас перад гарматамі і доўга, падрабязна тлумачыў, якая з іх як называецца і якая паміж імі розніца, для чаго кожная з іх служыць. Раней мне было ўсё адно: пушка — і годзе. Не, пушка пушкай, а гаўбіца гаўбіцай. Пушка з даўжэзным ствалом і страляе напрамкі — у лоб. 3 яе лепш за ўсё па фашысцкіх танках смаліць. Гараць як міленькія. А ў гаўбіцы ствол карацейшы і больш задраны ўверх. Вось з яе можна і цераз гару снарад перакінуць прама ворагу на галаву. 3 аднаго пушачнага ствала можна два зрабіць для гаўбіцы. Гэта толькі не артылерыстам усе гарматы здаюцца аднолькавымі. А мы цяпер з Санькам ведаем, што і да чаго.

Крыху ўжо адукаваныя, на перапынку, які аб'явіў капітан на дзесяць мінут і нуль секунд, мы з Санькам і Толік Гецьман падышлі да салдат, якія ў самым канцы двара чысцілі, па нашаму цяпер разумению, гаўбіцу. Салдат было ўсяго чацвёра з сяржантам на чале.

— Гаўбіцу чысцім? — спытаў я, прывітаўшыся, каб не думалі, што мы тут лыкам шытыя.

— Правільна, таварышы будучыя лейтэнанты, гаўбіцу,— пацвердзіў салдацкі сяржант, выціраючы прамасленым пакуллем рукі.— А вы тут што, на экскурсіі?

Гэтае пытанне здалося мне недарэчным і крыху крыўдным, а сам сяржант — някемлівым, недалёкім чалавекам. Што ж ён, не бачыць, якія ў нас на пагонах эмблемы? А калі бачыць, дык мог і ўцяміць, што мы яму — не пяхота, каб хадзіць у артылерыйскі парк проста на экскурсію. Гарматы для нас, артылерыстаў,— звычайная абыдзёншчына.

— У нас тут вучоба,— мусіў я растлумачыць някемліваму сяржанту.

Яго салдаты таксама перасталі працаваць і прыслухоўваюцца да нашай з сяржантам размовы. Мне здаецца, што яны скептычна паглядваюць на нас, на нашу форму — штаны навыпуск і хромавыя чаравікі. Самі ж вядома ў чым — у кірзачах.

— I многаму вы ўжо навучыліся?

Прызнацца, што мы толькі яшчэ пачалі, што сёння мы тут першы раз і, выходзіць, быццам і сапраўды на экскурсіі, нам не хочацца, і мяне чорт пацягнуў за язык:

— Парадкам!

Атрымалася гэта ў мяне даволі задзірліва.

— Ну-а,— з павагай працягнуў сяржант,— тады іншая справа.

Салдаты з усмешкай паміж сабой пераглянуліся. Няхай сабе пераглядваюцца: яны — толькі салдаты, а мы будзем афіцэрамі. I тут сяржант неяк па-свойску, шчыра нас папрасіў:

— Хлопцы, не ў службу, а ў дружбу, нам тут няма калі, дык схадзіце вы ў майстэрню — вунь яна побач — і прынясіце нам вось канала ствала. Скажыце, што я прасіў, і вам дадуць. Яфрэйтар там ёсць, артмайстар.

Ну што ж, калі б ён нам загадаў, дык, можа, і не пайшлі б, бо чужы, незнаемы сяржант — невялікі для нас начальнік. А тут чалавек папрасіў — трэба ўважыць. Майстэрня, прыземістая цагляная будыніна, была сапраўды за якіх-небудзь сотню крокаў, і мы ўсе трое пабеглі па тую вось.

— Якую вось? — перапытаў нас яфрэйтар, які корпаўся да нашага прыходу ў нейкіх жалязяках на варштаце. Рукі ў яго былі чорныя ад металу, такая ж гімнасцёрка і штаны. Ледзь-ледзь ён здагадаўся — якую, а здагадаўшыся, аж засмяяўся.

— Ну і сяржант, ну і дае. Скажыце яму, што ў мяне няма такой восі. Была ды пагнулася, трэба выпрамляць. Так і перадайце.

Так мы і перадалі: была ды пагнулася, артмайстар будзе яе выпрамляць. Вы б пачулі, які каля гаўбіцы грымнуў рогат. Усе салдаты смяюцца, а сяржант і голас страціў, толькі сіпіць.

Урэшце мы здагадаліся, што з гэтай воссю нешта тут нячыста, што мы ўліплі ў нейкую смешную гісторыю. А ў чым яе сакрэт, не ведаем.

Не пашанцавала нам і тады, калі прыбеглі да свайго ўзвода. Ён ужо стаяў у страі, і капітан, гледзячы на свой гадзіннік, строга спытаў, чаму спазніліся аж на трыццадь секунд. А паўмінуты ў артылерыі — гэта нам не жартачкі, калі снарад пралятае ўсяго за секунду мала не кіламетр. За гэты час можна з гарматы стрэліць, паглядзець у бінокль, ці трапіў снарад у цэль, сесці і закурыць. I наогул: дакладнасць — ветлівасць каралёў і галоўная вартасць артылерыста, мумба-юмба. Словам, узяў нас Педант у такі абарот, што дзецца няма куды, аж сваімі тоўстымі маслюкамі трусіць. Мусілі мы абараняцца, валіць віну на таго сяржанта-жартаўніка. Мы харошыя, гэта ён нас прымусіў насіць вось канала ствала.

— Ну, тады іншая справа,— засмяяўся капітан і змяніў гнеў на міласць. Дазволіўшы нам стаць у строй, ён сказаў: — Гэта стары артылерыйскі жарт-насмешка над навічкамі. Помню, і я на гэтую вуду калісьці папаўся. Вось канала ствала — гэта ўсё адно што дзірка ад абаранка. Слухайце ўсе, каб не трапляліся ў смешнае становішча...

Ну і жук той сяржант, ну і хітруга. На чым ён нас падкузьміў, на такой простай рэчы.

Ва ўзводзе дзядзькоў яшчэ не было заняткаў у артылерыйскім парку, і наш Пiкля ўвечары разыграў дзядзьку Лобана.

— От скажы,— прыстаў ён да таго,— якая вось у канале ствала? Ага, і не знаеш.

— Адчапіся,— адмахваецца Лобан ад шкета,— жалезная.

— Сам ты дубовы! — трыумфальна смяецца Пiскля і спрытна ўвільвае ад пстрычкі па «качану».

Так мы і жывём сабе. Санька камандуе аддзяленнем, я — «развадзяшчы» за сталом, з пераменным поспехам ідзе вайна паміж намі і дзядзькамі. Першае знаёмства з гарматай дадало ўсім артылерыйскага гонару. Цяпер мы яшчэ з большай пагардай глядзім на цывільных настаўнікаў. Словам, усё ўсталявалася, усё ідзе сваім парадкам, і нічога новага мы ўжо ў сваім жыцці не прадбачым. А яно вазьмі і аб'явіся.

Я і слова такога не чуў — этыкет. У адзін звычайны дзень мы вычыталі яго ў раскладзе ўрокаў. Што гэта яшчэ нам за навука? 3 чым яе ядуць? Яна цывільная ці вайсковая? Гэта было для ўсіх поўнай нечанасцю, таму што і падручнікаў нам такіх не далі, і ў класным журнале для яе не адведзена спецыяльнаи старонкі.

Першым, хто нам растлумачыў яе сутнасць, быў Коля Кузняцоў — самы гарадскі з усіх гарадскіх чалавек. Што не кажы, масквіч.

— Эх вы — лапці! — пагардліва сказаў ён.— Простай рэчы не разумееце. Этыкет — гэта правілы абыходжання з дамамі.

I паказаў нам гэтыя правілы наглядна: галантна пакланіўся, пашархаў па падлозе нагой, памахаў рукой, быццам у ёй і сапраўды быў мушкецёрскі капялюш — і ўсё гэта ў мой бок:

— Выбачайце, мадам! Калі ласка, мадам! Пардон-мерсі!

Калі ў гэтым і ўвесь этыкет, тады нашаму масквічу па ім пяцёрка забяспечана. Ды і мы, крыху патрэніраваўшыся, маглі б дабіцца поспехаў. Толькі скажыце, калі ласка, дзе гэта вы бачылі, каб вайскоўцы перад дамамі падмяталі падлогу сваімі пілоткамі? Ды мяне забі і зарэж, дык я перад Кацяй не буду вылузвацца гэтакім манерам. Яна ж падумае, што я здзекуюся або з глузду з'ехаў. Жартуе, канешне, наш масквіч. Але што гутарка ідзе менавіта пра манеры, гэта мы зразумелі, гэтаму мы паверылі, бо знайшліся і яшчэ такія, якія чулі нешта падобнае пра этыкет. Паверылі мы цяпер і ў чутку, што наш генерал з былых дваран. Ён як быццам перайшоў на бок Чырвонай Арміі ў грамадзянскую вайну, калі быў яшчэ маладым прапаршчыкам. Перайсці ён перайшоў, а сваіх замашак не кінуў і цяпер. Вось па яго міласці мы і будзем вывучаць за здарова жывеш лішнюю навуку. Гэта ён прыдумаў, каб у яго вучылішчы быў гэты самы этыкет. I я веру гэтым размовам, бо нездарма ж ён, калі помніце, на прыёме ў сваім кабінеце мне талдычыў: афіцэр павінен быць культурны, афіцэр павінен быць культурны!

Наш узвод раздзяліўся надвае: адны — за, другія — супраць этыкету. Па-мойму, гэта таксама лішняе. Мы і так хлопцы хоць куды: глупства не скажам, чужога не возьмем. А паклоны біць — выбачайце. Шкада, што не ад нас толькі гэта залежыць: загадаюць — будзеш вучыцца.

Усе выкладчыцы і выкладчыкі прыходзілі да нас у клас самі. Самі і прадстаўляліся, хто яны такія. А тут ужо, мабыць, па этыкету новую выкладчыцу прывёў у клас капітан Захараў.

— Ала Аркадзьеўна,— неяк урачыста абвясціў ён,— прашу любіць і паважаць. Яна будзе выкладаць новы прадмет.

Ала Аркадзьеўна нам з Санькам вельмі спадабалася, і мы з ім мнагазначна пераглянуліся. Па-мойму, такіх я дагэтуль і нідзе не бачыў, апрача хіба ў кіно. Русявыя пышныя валасы, тварык такі акуратненькі, вочы з чорнымі вейкамі, нос у меру і поўныя пунсовыя губы. I ўся — нібы лялька. I галоўнае — маладая ж. Калі б дзе проста так сустрэў, дык і не падумаў бы, што яна ўжо настаўніца, ды яшчэ і па такой навуцы, як этыкет. Дзяўчына — і годзе.

Хлопцам яна, мабыць, таксама прыйшлася па сэрцу, таму што ўсе прыціхлі, адно глядзяць на яе на поўныя вочы. Ды і ў нашага капiтана губа не дурная. Ні на адным уроку, якія праводзяць іншыя выкладчыкі, ён не прысутнічаў, толькі на нашай самападрыхтоўцы чытае раманы, а тут рассеўся на апошнім радзе і не збіраецца ісці. Што ён, у этыкеце, па-вашаму, не петрыць, дык сабраўся ўрок слухаць? Тут і сляпому відаць, што прываражыла яго гэтая Ала.

У класе павеяла салодкім водарам духоў, і яна зашчабятала пра свой этыкет. Праўду казаў Коля Кузняцоў — гэта ўсё пра ветлівасць. Ах, якія мы павінны быць выхаваныя, якія галантныя, усім даваць дарогу, здароўкацца са старэйшымі і нават паміж сабой, а перад дзяўчатамі і жанчынамі так забягаць, што быццам яны ўсе прынцэсы або князёўны. Мы павінны быць рыцарамі. Словам, нялёгкая нам дасталася доля, народжаным мужчынамі.

Мы не столькі слухаем, колькі глядзім на яе, і пад нашымі позіркамі яна часта чырванее. Ад звышвыхаванасці, ці што? А можа, ад скептычных усмешак? А хутчэй за ўсё таму, што мы ж — не дзеці, а хлопцы на падбор, хоць і шкеты. I ўсе ў пагонах. Гэта табе не цывільныя шпакі.

Калі яна ужо надта расспявалася пра дзяучат і жанчын, пра далікатнасці абыходжання з імі, адзін з «рыцараў», па-мойму, Мішка Цыганкоў, з-за маёй спіны абазваўся ўголас:

— I ў чарзе за хлебам саступаць?

Ала Аркадзьеўна разгубілася і ў каторы ўжо раз зачырванелася вішняй. Але тут яе выручыў капітан.

— Разгаворчыкі!— строга асадзіў ён цікаўнага.— Вам гавораць пра этыкет, а вы пытанні задаеце без дазволу!

Так Мішкава пытанне і засталося без адказу. Мабыць, і гэтай пігаліцы-красуні, і капітану з ёю разам няма тут чаго сказаць. Чарга за хлебам — не рыцарскае гульбішча: саступіш — сам будзеш галодны. Вось як тут быць, каб і хлеба прыдбаць, і рыцарам застацца?

На перапынку ў нас толькі і размоў было, што пра Алу.

— Во, этыкетка! — паказаў вялікі палец Коля Кузняцоў, і мы з ім згадзіліся.

— Нічога сабе,— сказаў і Косцік-Пiскля.

Адзін толькі Мішка Цыганкоў не можа жыць без «цырка». Склаўшы губы банцікам, ён прайшоўся перад намі па-дзявоцку і прашчабятаў Алы Аркадзьеўны голасам:

— Вы павінны быць рыцарамі, мальчыкі.

Не паспелі мы ўдосталь насмяяцца, як з класа выбег Лёва Белкін, а за ім наўздагон — наш мастак Расошка. Мастак рабіў спробы выхапіць з Лёвавых рук нейкую паперу, а той са смехам адбіваўся. I вось папера пайшла па нашых руках. Гэта аказаўся партрэт Алы. Не тое каб вельмі, але Этыкетку ў ім пазнаць можна. Значыць, наш мастак ужо гатовы — уліп па вушы, закахаўся. Востры на язык Коля-масквіч на гэта сказаў:

— Любви все возрасты покорны.

Наступныя заняткі Алачка-Этыкетка, як мы цяпер называем новую выкладчыцу, праводзіла ўжо не з адным нашым узводам, а з усёй батарэяй разам. Праходзілі яны ў сталоўцы, калі ўжо ўсё вучылішча паабедала. Нашу батарэю з абедам спецыяльна затрымалі, і мы дзеля навукі хадзілі галодныя цэлую лішнюю гадзіну. Гэта каб на занятках нам ніхто не перашкаджаў. Справа сур'ёзная — Алачка будзе нас вучыць культурнасці. Гэта мы так самі здагадаліся, бо якая ж можа быць яшчэ ў сталоўцы навука.

I вось на нашых сталах апрача нарэзанага хлеба і бачкоў з супам белыя сурвэткі, відэльцы і тупыя, нібы бабульчына капаніца, нажы. Гэта ўсё называецца сервіроўкай стала. Праўда, відэльцы на сталах заўсёды ёсць, калі мы і не вучымся есці, а проста ядзім, але імі мала хто карыстаецца, хіба ўжо які вялікі інтэлігент.

I пачаліся пакуты і смех: сурвэтку за каўнер, нібы маленькаму слюняўчык, відэлец — у левую руку, нож — у правую. Каму гэта патрэбны такія манеры? Ды мяне бабулька заўсёды па левай руцэ біла за сталом, калі я браў ёю што-небудзь, апрача хлеба. Ды я свой век пражыў без розных там відэльцаў і, калі было што есці, ніколі з-за стала галодным не вылазіў. А тут катлета — напалавіну з хлебам, і яе трэба рэзаць, нібы ў цябе зубоў няма. А паспрабуй яе яшчэ да рота данесці левай рукой ды на відэльцы. Не, лыжка — больш надзейны інструмент: і хутчэй, і ямчэй.

Але відэльцы яшчэ што? Не ў іх уся культура і ўвесь этыкет. Тут трэба есці так, быццам табе і не хочацца, спакойна, разважліва, нібы цялятка жвачку жуе. А мы ж пазвыкалі — аж за вушамі трашчыць — не жуём, а «рубаем». Нам гэтыя манеры не ішлі не ехалі. Калі глядзяць на нас Алачка і афіцэры, манернічаем, а як толькі адвернуцца — зноў па-свойму. I ўрок культурнай яды скончыўся датэрмінова.

— Усім і ўсё зразумела? — спытала Ала Аркадзьеўна, раптам убачыўшы хутка апусцелыя талеркі.

— Не,— знайшоўся жартаўнік у другім узводзе,— калі б зноў паўтарыць.

Батарэя зарагатала, а Этыкетка пачырванела.

Тут афіцэры на нас прыкрыкнулі, і на гэтым заняткі скончыліся. А вячэралі мы ўжо па-людску, без шляхецкіх замашак. Вядома, мы зразумелі, як паводзяць сябе за сталом згодна этыкету, але ж гэта, мабыць, трэба не кожны дзень і не ўсюды, дзе-небудзь толькі ў вялікіх гасцях. Паклічуць — не падкачаем, пакажам і этыкет.

А між тым некаторыя з нашага ўзвода часта пачалі ўздыхаць. I не без прычыны. Мабыць, тут вінавата Алачка. Адзін з такіх пакутнікаў — Коля Кузняцоў. Яе партрэт, намаляваны Расошкам, ён тады ў калідоры гаспадару так і не аддаў, хоць і пад'ягорыў, што каханню ўсе ўзросты падуладныя.

— Я аддам яго ей,— палохаў ён беднага мастака, і той аж бляднеў пры гэтым і чырванеў. Але партрэт аказаўся ў Колевай тумбачцы, прымацаваны да ўнутранага боку дзверцаў. Праўда, павісеў ён там мала — сарваў Юрка-старшына. Словам, мы ведаем цану Колевай бравады — пакутуе тайна.

А пачуцці Вані Расошкі навідавоку. Гэты ўсё малюе і малюе даму свайго сэрца па памяці. Два новыя партрэты Алы-красуні наш капітан ужо адабраў у яго на самападрыхтоўцы. Мы думалі, што яму адразу будзе ад каштана наганяй, але з першым партрэтам абышлося. Педант толькі ўважліва паглядзеў на тое маляванне і ў задуменнасці сказаў:

— Так-с, мой юны друг, вам трэба не тут вучыцца, але калі вы ўжо трапілі сюды па волі лесу, то будзьце ласкавы вывучаць трыганаметрыю.

А наганяй ужо быў на другі дзень за новы партрэт.

Лёва Белкін таксама цяпер чамусьці часта спявае ў пустой умывальні:

Выйди-выйди-выйди-выйди, выйди ко мне. Буду-буду-буду-буду, буду ждать при луне.

Дык не ўсе ж умеюць маляваць і спяваць. Ёсць што ўздыхаюць і непрыкметна. А Мішка Цыганкоў вельмі смешна паказвае на перапынках нашых пакутнікаў, то закатваючы вочы пад лоб, то хапаючыся за сэрца з самым няшчасным выглядам.

I вось аднойчы...

Гэта адбылося на ўроку танцаў, якія таксама ўваходзяць у этыкет. Я не верыў калісьці Юрку, што тут будуць нас вучыць і танцаваць. Дык вось вучаць. I не якой-небудзь там «Сербіянцы». I не пад балалайку, не пад гармонік з бубнам, а пад духавы аркестр. Мабыць, чакаюць нас у далейшай нашай службе частыя балі, таму танцы тут усе бальныя: вальс, кракавяк, падэкатр, пэдэспань, ці, як мы яго называем, «пайдзі спаць».

Але пакуль што мы ўзяліся толькі за вальс. Ала-Этыкетка спачатку вучыць нас, як запрашаць даму. Iх, аказваецца, запрашаюць не так, як мы Кацю з Сонькай: «Эх, хадзем патанцуем!» Тут трэба кланяцца. Зразумела, не так, як перад іконай, а толькі галавой гэтак кіўнуць, быццам яна хоча ў цябе адваліцца. Прытым абавязкова і абцасамі ляснуць. Так належыць па этыкеце.

У нас дам няма, і таму батарэю падзялілі надвае: палавіна — кавалеры, палавіна — дамы. Я — кавалер, а Санька — дама. Я паківаў галавой, Санька папрысядаў, парагаталі і перамяніліся ролямі: я папрысядаў, а Санька паківаў галавой. I ўсе так. Па камандзе Алы Аркадзьеўны. Затым яна гучна папляскала ў далоні і звонка на ўвесь спартзал абвясціла:

— Паказваю вальс. Хто ў мяне будзе кавалерам?

Я баяўся, каб мяне не выбрала, бо танцор з мяне лыкавы, толькі ногі ёй у лакірках адтапчу і нараблю смеху. Але яна прайшла міма нашага ўзвода, міма трэцяга і другога і выбрала сабе грэнадзёра з першага, правафланговага. I каго вы думаеце? Лобана! Усе шкеты ледзь зубамі не заскрыгаталі. Я ўжо не кажу пра нашых «рыцараў», дамай сэрца якіх яна была. Гэта быў для іх удар, чорная здрада.

А Алачка-красуня, быццам так і трэба, лётае матыльком над гукі аркестра па спартыўнай зале вакол свайго «кавалера», толькі лакіркі мільгацяць. I Лобан, халера, ад яе не адстае, аж пачырванеў увесь ці то ад хвалявання, ці то ад гордасці. Словам, прыпаднесла Ала наглым паклоннікам добрую пілюлю.

Паказваючы нам, як гэта трэба, Ала Аркадзьеуна танцавала з Лобанам цэлы урок, аб нечым з ім нават перагаворваючыся. Батарэя таксама танцавала, аж сцены спартзала былі цесныя. А вечарам «кавалер», кладучыся спаць, сваім хлопцам хваліўся, што праводзіў Алачку пасля заняткаў аж да КПП. У яго быццам і змова з ёй ёсць сустрэцца і пайсці ў кіно, калі нас пусцяць у звальненне. I гэта такім шэптам, што ўсёй казарме чуваць.

— Усе яны такія,— суцешыў свайго суседа Ваню Расошку наш Піскля.

Усе дык усе. Той Лобан і збрэша — дорага не возьме. Паслухаеш яго, дык усе дзеўкі перад ім ніц падаюць штабелямі. А я думаю, што нашы з Санькам не такія. Падлюбскія дзеўкі верныя.

Стомленае сонца

Як мая бабка гаварыла, дома і салома ядома. Гэта я наконт таго, што хоць і кормяць нас з Санькам у вучылішчы па курсанцкай норме, хоць і водзяць тут па два разы на тыдні бясплатна ў кіно, хоць мы тут чыстыя і дагледжаныя, а родны двор сніцца. Іншы раз як захочацца дамоў, дык хоць вый. Ну, здаецца, што я там добрага ў сваім жыцці бачыў? Нішчымную бульбу, латаныя штаны, плут ды касу з дзяцінства? Але дурное сэрца разумную галаву не слухае. Яму не загадаеш. Цягне, і ўсё тут. Усяго таго благога быццам і не было, засталося ў памяці толькі добрае, а што — і сказаць цяжка. Усё! Пах сена, вогнішчы ў начным, ціўканне вераб'ёў на вербах, хлапечая вольніца, бабульчын насмешлівы і мудры голас, бацькавы рукі ў сасновай смале-жывіцы, Кацін смех, адданыя Жукавы вочы, знадаедлівы Глыжка — у кожнага свае. Нават тое, што бацька неяк даў лупцанкі, успамінаецца цяпер з замілаваннем. Правільна даў: не трэба было таптаць грады пад дзедавай грушай. Мала што яны салодкія. Гэта не апраўданне.

Старшакурснікаў дык тых кожную нядзелю пускаюць у звальненне. I ў суботу — адразу пасля заняткаў. А мы толькі з зайздрасцю глядзім, як яны, начышчаныя, адпрасаваныя і шчаслівыя, паспешліва бягуць то адзін, то другі, то цэлай групай за вароты КПП. Некаторых з іх за варотамі чакаюць дзяўчаты і радзей — маці. А каго тут ніхто не сустракае, тыя — ногі ў рукі і з ветрам наперагонкі — у горад. У тых, мабыць, спатканні ў парку або дзе-небудзь каля кінатэатра. А нам застаецца толькі глядзець ім услед скрозь шчыліны ў агароджы. Адно суцяшае, што і яны былі калісьці салагамі, і не толькі яны, а і генералы. Дачакаемся і мы свайго часу. Але калі нас адпусцяць, дык не пабяжым у парк на злом галавы, мы паляцім прама дамоў, бо няма ўжо сцерпу слухаць, як Гецьман з Рэпак спявае: «Гляджу я на неба і думку гадаю».

А пракляты Маятнік усё нас не адпускае і не адпускае. То ён на генерала спасылаецца, маўляў, генерал не дазваляе, хоць мы і ведаем, што Баця добры, то ён палохае тым, якія небяспекі нас чакаюць у горадзе, быццам вайсковы патруль нас там толькі і чакае, каб схапіць за неаддачу чэсці афіцэру, то яшчэ якую прычыну прыдумае. Знайшоў каго палохаць. Няхай нас патруль спачатку дагоніць. Не ведаю, што салагам з другой батарэі гаворыць іх камандзір, падпалкоўнік Барданос, але і тыя яшчэ ў звальненні не былі.

Як ні дзіўна, а лягчэй гэта перажываюць далёкія. Сябровак жыцця яны яшчэ ў горадзе не завялі, а ў Грузію ці нават і ў Рэпкі за некалькі гадзін туды і назад не збегаеш. Яны з гэтым змірыліся і жывуць ад пісьма да пісьма. А тут жа блізка локаць, ды не ўкусіш. Даводзіцца і нам жыць ад пісьма і да пісьма.

Але пішуць нам з Санькам з Падлюбіч не густа. I асабліва — мне. Бабка не ўмее, бацьку, відаць, няма калі, каб часта пісаць, а з Глыжкі вядомы пісар: накрэмзаў аднойчы аршыннымі літарамі, дык і то пра тое, што нейкі Коля хацеў у яго адабраць гільзу ад ракеты і яны з-за гэтага пабіліся. Маўляў, у крыўду ён сябе не дае і я магу тут быць спакойным. А ў каго якое здароўе, дык і не ўпамянуў.

Праўда, з Кацяй перапіска ў мяне завязалася частая. Такая частая, што не хапае і пра што пісаць. А тут яшчэ падпалкоўнік строга папярэдзіў, каб мы ў пісьмах не выдалі ваенную тайну і асабліва каб яго прозвішча — Асташэўскі — не выдалі, бо шпіёны ж не спяць. Пра парадкі ў вучылішчы — таксама нельга. Вось я і пішу толькі пра тое, што шпіёнам без карысці: што мы тут вучым, якую кніжку новую прачытаў, якое кіно нам паказвалі, як нас кормяць. Па-мойму, у гэтым асаблівай тайны няма. Хіба вось пра харчы. Але няхай ведаюць, што мы тут не галодныя. Як аднойчы сказаў наш капітан Захараў, чым лепшы ў нас апетыт, тым страшней будзе забеспячэнцам і імперыялізму.

А яшчэ, каб Каці было цікавей, я тое-сёе і выдумляю. Маўляў, мы ўжо страляем тут з розных гармат і мяне ледзь не параніла снарадам. Няхай крыху дзеўка паперажывае, пахвалюецца — ласкавейшая будзе. Вось Санька, той стрыкуліць сваёй Кучараўцы вершамі, аж гай гудзе. А мне застаецца толькі зайздросціць. Калі я бяруся за вершы, дык у мяне то слова лішняе, то яго не хапае. Вуглавата неяк атрымліваецца. А вось душой адчуваю — ёсць у мяне штосьці такое да Каці ў сэрцы, што просіцца ў верш. Проста так гэтага не скажаш.

Каця таксама мне нічога такога пра пачуцці не піша. Жыву з Сонькай на кватэры... Гаспадыня добрая... Па нядзелях ходзім дамоў па бульбу... Баіцца, каб не атрымаць двойку — стыпендыі не дадуць... Дома куры падохлі — ці не атруціў сусед... I рознае такое. Але мне ўсё адно цікава. Асабліва па душы тое, што ў іх тэхнікуме сумна — рэдка бываюць танцы. I вельмі добра! Няхай іх зусім там не будзе. А то яшчэ пазнаёміцца з якім гарадскім. Гарадскія, яны жвавыя.

У канцы кожнага пісьма яна прыпісвае: «Чакаю прывета, як салавей лета». Вось гэты «салавей» і бярэ больш за ўсё за сэрца. А то яшчэ і кветачку намалюе. У адказ на кветкі я пачаў маляваць артылерыйскія эмблемы — гарматныя ствалы крыж-накрыж. Трэба, каб адчувалася мужнасць. Піша не абы-хто — артылерыст. Няхай цэніць.

I вось надышоў ён, той радасны і хвалюючы дзень, калі па батарэі разнеслася чутка: заўтра у нас будзе звальненне! Сам капiтан сказаў, каб яго памочнік, сяржант Міцька Яцук, падрыхтавау яму спіс жадаючых. Захваляваўся ўзвод і ўся батарэя. Як? Што? Каго будуць пускаць, няўжо ўсіх жадаючых? Не, не ўсіх, а толькі хто заслужыў — добра вучыцца і дысцыпліну не парушае.

Тады мне капцы. Правільна выкалана ў таго растоўскага «прынца» на руцэ — «няма ў жыцці шчасця». Аднак хоць і са слабай надзеяй, але запісаўся і я. Рускую мову я ўжо выправіў, на першым жа дыктанце атрымаў чацвёрку. Так што тут падпалкоўніку няма да чаго прычапіцца. Але ж ён можа ўспомніць мае спазненне на фіззарадку, і тую вясёлую забаву «па качану». Тады Санька пойдзе адзін — ён заслужаны. Трэба будзе папрасіць, каб ён хоць дома там не расказваў пра мае конікі і перад дзеўкамі не распускаў язык. Няхай скажа, што я на дзяжурстве. А лепш за ўсё — у каравуле. Прауда, каравульнай службы мы не нясём — усё, што трэба вартаваць, вартуюць салдаты,— але адкуль яны там ведаюць. Затое гучыць важка. Асабліва ацэніць бацька, сам былы ваяка. Ён ведае, што такое каравул.

Але, на маю вялікую радасць, ніхто мяне са спісаў не выкрасліў, нават падпалкоўнік Асташэўскі. Які добры чалавек. Зла не помніць. А то плявузгаюць пра яго рознае: і прыдзірлівы, і занудлівы, і Маятнік, і Грызь. Калі крыху і пагрызе, дык ад іх адпадзе. Ну і народ.

Хто не служыў у арміі, той і не хадзіў у звальненне, а значыць, і не ведае, якая гэта радасць. Асабліва калі ты ідзеш першы раз, калі цябе яшчэ не бачылі дома ў вайсковай форме. Белыя падкаўнерыкі падшываюцца так, як ніхто іх не падшывае і перад генеральскім страявым аглядам,— ні маршчынкі, ні складачкі. Гузікі, эмблемы і спражкі даўно гараць золатам, а іх усё чысцяць і чысцяць зубным парашком, а яшчэ лепш — асідолам — спецыяльна для гэтага прыдуманай маззю. Каля стала з электрычным прасам чарга, да люстра не прабіцца — народ збіраецца ў звальненне. Вакол вясёлы смех і гамана: ты куды? а ты куды? а давай пойдзем туды. Ва ўзводах ідзе часовы абмен з тымі, каго пакрыўдзіў лес, каго выкраслілі са спіса. Выбіраюцца чаравікі па назе, гімнасцёркі не такія шырокія ў плячах, картузы, якія не лезуць на вушы. Святая справа — аддаць усё лепшае і прыгажэйшае таварышу. А не аддасі, дык і сам потым не прасі. Такі закон.

Каму мы толькі нічога не далі б і не памянялі, дык гэта той дубіне Лобану з першага ўзвода. Гэта — каб ён не фарсіў перад Алай-Этыкеткай, да якой, мабыць, і збіраецца. I куды чалавека нясе, калі гэта сапраўды так? Яна ж, пігаліца, хоць і маладая, але ж яму не пара — гадоў усё-такі на пяць старэйшая за яго, калі не на больш. Магчыма, што ён пыл нам пускае ў вочы: ведайце, маўляў, нашых, драбяза. Канешне, у нас пад носам яшчэ не хадзіла лязо брытвы, а ў Лобана ўжо ходзіць, бо там расце нейкі рудзенькі машок, які ён называе шчаціннем.

Але пыл ці не пыл, усё адно нічога не дадзім. Няхай і не просіць.

Аднак Лобан у шкетаў нічога і не папрасіў. Ён і без нас прыбраўся не толькі па форме, але і па модзе.

Эх, мода-мода, і чорт цябе выдумаў на нашу галаву! Нават сюды, у армію, яна лезе. Тут жа ўсё распісана і размалявана: што, як і калі насіць. Тут жа форма адзення зацверджана самым галоўным з маршалаў. Вышэй гэтага, мабыць, не скочыш. Але мода мацней і за маршала. Яна можа форму перайначыць.

Нам выдалі афіцэрскія картузы, пра якія мы з Санькам столькі марылі. Здаецца, куды ўжо лепш? Але такія картузы сярод выхаванцаў вучылішча не ў модзе. У іх, бачыце, казыркі вялікія, а верх малы. Амаль усе старшакурснікі ходзяць у картузах, у якіх казырочак усяго на тры пальцы, ён ледзь прыкрывае лоб, затое верх вялікі, нібы рэшата, і так туга нацягнуты, быццам барабан. Вось гэта шык!

А падпалкоўніку Асташэўскаму такі «шык» не падабаецца. Ён строга папярэдзіў, што калі ўбачыць у батарэі такога модніка, будзе той моднік хадзіць у старым, зношаным картузе, але па форме. А пра звальненне няхай і не думае. Ён не дазволіць парушаць форму адзення. Калі яна каму не падабаецца, няхай ідзе прэч з вучылішча і чытае ў горадзе шыльды па складах. Вось чаму мы з Санькам казыркі яшчэ не ўрэзалі, але ў батарэі ўжо знайшліся такія.

Гімнасцёркі ў нас таксама не па модзе. Іх варта было б і ўкараціць, каб не былі такія доўгія, нібы падол у спадніцы. Але тут справа паправімая, трэба толькі ўмець падпяразвацца, а то можна ніз падгарнуць і падшыць, не адразаючы.

Горш справа са штанамі: дудачкі! Ну хто, скажыце, носіць такія штаны, калі ў модзе клёш? Вось матросам — тым пазайздросціш. А тут толку з таго, што сукно сіняе і чырвоныя афіцэрскія канты. Відаць, той, хто іх кроіў і шыў, ні чорта ў сапраўдных штанах не разбіраецца.

Але і гэтае гора — не бяда. Мы ўжо ад старшакурснікаў даведаліся, як можна з дудачак зрабіць клёш. Па-першае, можна разжыцца такой жа матэрыі, з якой пашыты штаны, і ўшыць у дудачкі кліны. Будзе клёш не горшы за матроскі. Дзе разжыцца? А для гэтага трэба дружыць з каптэнармусамі. У іхніх капцёрках чаго толькі не знойдзеш. Трапляюцца там і старыя, зношаныя штаны. Вось з іх можна і выкраіць кліны. Ёсць і такі спосаб, што і ўшываць нічога не трэба. Можна выразаць кліны з фанеры, якой хочаш шырыні. Зразумела, іх у штаны не ўшыеш, тут іншае. Штаны трэба намачыць, а затым пад гарачым прасам нацягваць іх на фанеру. А сукно трывае, расцягваецца, толькі не трэба ўжо цераз сілу, а то дудачкі трэснуць па швах, а то і распаўзуцца па жывому.

Вось калі ты гэта зробіш ды яшчэ ноч пераспіш на тых клінах разам са штанамі, паклаўшы іх пад падушку, дык раніцай будзе ў цябе клёш на заглядзенне. Такі клёш мае перавагу нават перад расшытым. У расшытых, быў выпадак, хлопцы аднойчы прыйшлі са звальнення пасаромленыя. Iм патруль лязом парэзаў устаўныя кліны. Ды і ў вучылішчы начальства трэба аббягаць — загадае распароць. А клёш цэльнарасцягнуты ўсіх ставіць у тупік: і патруля і начальства. Паглядзяць, што нічога не ўшыта, і плячыма паціскаюць. А пройдзе дзень-другі, і ўсё становіцца на месца: сукно садзіцца. Вось у гэтым недахоп такога клёшу. Перад наступным звальненнем зноў трэба яго нацягваць на фанеру. А штаны ж, вядома, не жалезныя — часта рвуцца пры гэтым, халера.

Усе гэтыя прамудрасці нам знаёмыя, але мы з Санькам перад першым звальненнем баімся іх прымяніць. Можа быць, што падпалкоўнік сам праверыць кожнага, раней чым выпусціць за парог казармы. Тады не захочаш той і моды.

Так яно і здарылася. Падпалкоўнік усіх, хто ідзе ў звальненне, правярае сам. Ну, думаю, дзядзька Лобан пагарыць, выляціць са строю шпунтам. I тады мы яму весела праспяваем «напрасно старушка ждёт сына домой». Пад «старушкой» маючы на ўвазе Алу Аркадзьеўну, вядома.

Але Лобан аказаўся не такім лапухом, як нам думалася. Ён стаў на праверку ў звычайным абмундзіраванні і, толькі атрымаўшы запіску аб звальненні, пайшоў пераапранацца ў моднае, пазычанае ў кагосьці з батарэі другакурснікаў. Там у яго знайшліся прыяцелі. Нічога — не пагарэў тут, дык у горадзе, дасць бог, схопяць патрулі.

I вось мы з Санькам, агледжаныя камбатам з галавы да ног і бласлаўлёныя ім на добрыя паводзіны ў людзях, ужо за варотамі КПП. Наперадзе амаль паўсутак волі — ідзі куды хочаш, бяжы на ўсе чатыры бакі. I планы ў нас проста-такі напалеонаўскія — ісці і ўсіх пакараць сваім выглядам і падарункамі. Мы сёння людзі багатыя. У мяне за плячыма рэчавы салдацкі мяшок, а ў ім для бабулі два брусочкі духавітага мыла, якія былі выдадзены мне для ўмывання. Я іх збярог, сам карыстаючыся змылкамі, што заставаліся пасля лазні. Няхай старая хоць у канцы свайго жыцця памыецца туалетным мылам, няхай панюхае, як яно пахне. Яна век такога не нюхала.

Бацька таксама будзе рады, бо я нясу назад яго салдацкія чаравікі, у якіх ён выпраўляў мяне ў вучылішча. Толькі ён цяпер іх не пазнае. Я наваксіў іх казённай дармавой ваксай так, што аж блішчаць. А галоўнае — старшына Хамутоў знасіў іх у нашу майстэрню, і там іх так падбілі, што зносу не будзе. Нават жалезныя падкоўкі ёсць на абцасах і насках. Тут, канешне, дзякуй старшыне. Я яго не прасіў рамантаваць, бо нават не ведаў, што гэта можна. Гэта ён сам, паглядзеўшы на іх, сказаў:

— Што ж ты панясеш бацьку такія развалюхі.

Цяпер чаравікі быццам новыя. Чым не падарунак?

Ёсць і Глыжку як абрадаваць: пара артылерыйскіх эмблем, два пяры для ручкі, аловак і дзесяткі з два драбкоў цукру. Эмблемы і пёры, канешне,— драбяза, яны ёсць у нас у запасе, а вось з цукрам атрымалася няёмка. Ужо ведаючы, што пайду ў звальненне, я ўчора за вячэрай і сёння на снеданні піў чай нішчымны. Гэта заўважыў Генацвале і прычапіўся, чаму гэта я постую. Каб ён чаго не падумаў, давялося прызнацца, што брата хачу пачаставаць. Тады Надар бліснуў вачыма.

— Ты мне друг?

I свой цукар аддаў. Санька, Лёва і Гецьман таксама адмовіліся піць чай з цукрам. Няёмка атрымалася. Але цяпер хлопец хоць у роце пасалодзіць. А я, калі дома разжывуся яблыкамі, дык аддзячу.

Санька таксама нясе свае мыла матцы. Словам, мы ідзём дамоў не з пустымі рукамі. I не з пустымі кішэнямі. Нам выдалі аклады за месяц па салдацкай норме. Так што хлопцы і пры грашах. I, па нашаму разумению, не малых. Гэтак мы прыкінулі, што, можа, хопіць сфатаграфавацца і перад сваімі ўхажоркамі шыкануць — купіць ім грамаў па сто цукерак-падушачак з павідлам усярэдзіне, а то і па дзвесце. Душы ў нас шырокія. Вядома, нядрэнна было б звадзіць іх і ў гарадское кіно, але гэта ўжо як хопіць сродкаў.

Горад мы мінулі хутка, як цяпер можам сказаць, фарсіраваным маршам, і нідзе, на шчасце, не сустрэлі патруля. Трапіўся на вочы толькі адзін лейтэнант. Хоць і пехацінец, але прывіталі, і ён нам у адказ казырнуў. У звальненні і з пяхотай трэба лічыцца. Прычэпіцца, і што ты яму зробіш, калі ён афіцэр, а мы яшчэ нават і не курсанты? Будзеш стаяць і слухаць мараль.

Дзе мы толькі далі сабе пярэдых, дык гэта каля пустой вітрыны магазіна, які трапіўся нам па дарозе. Тут яно, як на ліха, у Санькі шнурок развязаўся, а ў мяне з лямкамі рэчавага мяшка зрабіўся непарадак. Вось з-за гэтага і спыніліся, а то яшчэ некаторыя падумаюць, каб паглядзецца ў шкло. Мы толькі па адным ці па два разы глянулі ў яго і пайшлі сваей дарогай.

Дома мяне не чакалі. Я ж не пісаў, што прыйду, бо і сам гэтага да апошняга не ведаў. Адчыніў я ціхенька дзверы — бабка ў адзіноце каля акна Глыжкаву кашулю латае. Не азірнуўшыся яна працягнула апранаху ў мой бок і сказала:

— На, насі, шамадзёрга. Можа, да вечара і хопіць.

Толькі калі я засмяяўся, старая азірнулася і адкрыла ад здзіўлення бяззубы рот. Клубок нітак пакаціўся з прыпола на падлогу, а бабка пляснула ў далоні.

— А божачка ж ты мой! Хто ж гэта да нас прыйшоў. Я ж думала, што памру і не ўбачу.

А потым падхапілася і закрычала некуды ў сенцы:

— Грышка! Грышка! Дзе цябе чэрці носяць? Бяжы бацьку пашукай!

Глыжка не адгукнуўся, і старая паскардзілася:

— Хоць на ланцуг саджай. Са школы — і за парог. А сёння нядзеля, дык, мабыць, на край свету збег.

Гэта для мяне — не навіна, мяне ўразіла іншае, як бабка кінулася да ўслона, на які я намерыўся сесці. Яна жвава абагнала мяне і выцерла ўслон фартухом, быццам перад вялікім госцем.

— А то ў нас знаеш, як тут,— быццам апраўдваючыся, сказала яна пры гэтым,— не паспяваеш прыбіраць. А ў цябе ж усё такое новае ды дарагое.

Мне стала няёмка, што бабка перада мной так забягае, і я ўзяўся за пустое вядро, каб схадзіць па ваду і тым паказаць, што я не такі ўжо і пан. А старая зноў:

— Ой, дзіцятка, кінь! Там лужына ля калодзежа, яшчэ ўтопчашся ў гразь сваёй абуўкай. Прыбяжыць той басурман, сам прынясе.

Басурман вядома хто — Глыжка. Калі я прыйшоў з вадой, ён ужо быў дома і абмацваў мой рэчывы мяшок. А неўзабаве прыйшоў і бацька, стомлены і даўно няголены.

Прыйшоўшы з вайны, ён рэдка бывае вясёлы, а больш якісь суровы, заклапочаны, заўсёды ў вачах яго нейкая цяжкая дума, многа курыць і ўздыхае. А тут, бачу, абрадаваўся, усміхнуўся. Здароўкаючыся са мной, нават пажартаваў — раней, як падаць мне, ён абцёр сваю руку аб штаны, а затым ужо і працягнуў:

— Ну, давай тваю афіцэрскую.

Бабуля кінулася падаваць абед, замітусілася каля печы, а бацька пакуль што разглядвае мяне. Сеўшы на лаву, ён папрасіў, каб я павярнуўся перад ім туды-сюды. Абмундзіраванне яму таксама спадабалася, але, не ў прыклад бабулі, ён знайшоў да чаго і прычапіцца. Дзе былі мае вочы, калі я браў сабе чаравікі? Не мог узяць на нумар большыя? Наперадзе зіма, а нага яшчэ расце — не ўлезе ануча. Вось тады я паўсміхаюся, калі ногі абмарожу, тады пафаршу. Але лепш за ўсё для салдата боты, ды яшчэ калі ёсць суконная ануча — і валёнкі не трэба. Калі ён служыў, дык заўсёды браў боты на нумар большыя і гора не знаў: і зімой цёпла, і летам мазалёў не насіў. Салдат з мазалём — гэта паўсалдата, асабліва ў паходзе. I куцы глядзіць наш старшына?

Супакоіўся бацька толькі тады, калі я сказаў, што наш старшына глядзіць туды, куды і ён. Мне далі чаравікі сапраўды навырост. А гэтыя я ўзяў у таварыша схадзіць у звальненне.

Мае падарункі ўсім прыйшліся па душы. Бабка панюхала мыла разоў пяць. Ах, як пахне, ды малое. Калі б ей вялікі брус звычайнага, не з духамі, дык яшчэ лепш было б. Бацька, праўда, ад сваіх чаравікаў не ахаў, але дзякуй сказаў і пахваліў майстра, які добра падбіў падэшвы і падкоўкі, а таксама і старшыну Хамутова — разумны чалавек. А Глыжка і зусім на сёмым небе. Такое багацце хлопцу прываліла: эмблемы, пёры, аловак і яшчэ цукар. Праўда, бабка палавіну цукру тут жа адабрала.

— Адразу з'ясі, дык язык праглынеш разам з салодкім,— сказала яна.

Глыжка не пярэчыў, а толькі вачыма прасачыў, куды старая яго схавала. Я ўпэўнены, што друга ён там не праляжыць.

Селі абедаць. Як я любіў раней густы ячменны крупнік! Ды яшчэ з алеем. Адзін мог паўчыгунка з'есці. А тут паспытаў — развучылася, ці што, яго бабка варыць? Цыбуля смажаная плавае. А я яе не люблю, адганяю лыжкай у бакі. Вось і бульбіна трапілася з «козлікам» — таксама яе ўбок.

Бацька глядзіць на ўсё гэта і хмыкае ў вусы. Заўважыла і бабуля, што я ем пераборліва, і — плісь мне лішнюю лыжку алею, каб прыбавіць смаку. I раптам няўпэўнена неяк спытала ў бацькі:

— Яешню зрабіць, ці што?

Ну, калі бабка адважылася на яешню, значыць, я сапраўды — незвычайны госць. Простым гасцям яе не падаюць. Я ж ведаю, што такое яйкі. Не паспеюць куры знесціся, як іх адразу — на базар, каб разжыцца якую капейчыну. У калгасе ж грошай не плоцяць, а на ўсё трэба: і на штаны, і на газу, і на соль. Ды і кожная курыца яшчэ абкладзена падаткам. Ей трэба нанесці яек не толькі на базар, а яшчэ і дзяржаве, інакш прыйдуць з сельсавета і будуць гразiцца на нядоімку яе апісаць, каб забраць самую. Вось, мабыць, бацька і невясёлы ад такога жыцця. Але тут ён бабку падтрымаў:

— Давай! Калі ўжо такое свята, рэж апошні агурок!

— А, не трэба,— запярэчыў я, бо стала сорамна, што яны дзеля мяне ідуць на такое — яешню будуць рабіць.

— Чаго там — не трэба? — разышоўся бацька.— Што мы, горш за тых, каму носім на базар? З'ядзім — не падавімся!

Больш за ўсіх яешні быў рады Глыжка. Ён еў яе не спяшаючыся, адкусваў па чуць-чуць, каб на даўжэй хапіла. За ядой зайшла размова, як там кормяць, у вучылішчы. Ну, я і пахваліўся, што паёк добры, нават масла даюць аж па дваццаць пяць грамаў у суткі.

— Тады, канешне,— згадзіўся бацька,— што той алей супраць масла? У арміі не прападзеш.

I пачаў ён успамінаць, што калі і ён быў да вайны чырвонаармейцам, дык тады таксама добрыя пайкі давалі. А хто з поварам сябраваў, той наогул жыў прыпяваючы. Бацька раіць і мне пасябраваць з поварам. Аж слухаць смешна. Ну, што ён разумее, калі быў тады ўсяго толькі салдатам? Але ж бацьку гэтага не скажаш. Няхай стары хваліцца, як яму зямляк-повар наліваў у кацялок першы апалонік з самага верху катла, дзе адзін тлушч, а другі — з дна, дзе толькі гушча. Вось гэта было сытна. У вайну, праўда, як даводзілася: часам — з квасам, парой і з вадой, а то і без вады.

Не прамінуў бацька, каб не напомніць, як трэба служыць — старацца. Вось ён стараўся, дык, нягледзячы на малапісьменнасць, і сяржантам стаў.

3 бацькавых размоў вывады зрабіла бабка.

— Вось так, нячысцік,— сказала яна Глыжку, прыбіраючы са стала,— вучыся як след, калі хочаш быць камандзёрам, а не — сядзі на нішчымніцы.

Глыжка — хлопец ужо ладны, перайшоў у чацвёрты клас, даўно ўжо не картавіць, хоць і носіць сваю дзіцячую мянушку.

— Не камандзёрам, а камандзірам,— паправіў ён старую і вылез з-за стала.

Калі прыйшоў Санька, бацька зрабіў агляд і яму. А потым папрасіў нас стаць побач і весела сказаў:

— Ты паглядзі, старая, якія арлы. Прапалі дзеўкі, пасохнуць на сухары.

Бабуля, гледзячы на нас, крыху паплакала, успомніла маю маці — вось каб тая пабачыла. Затым яна супакоілася, высмаркалася ў фартух і супакоіла бацьку наконт дзевак.

— Ты за дзевак,— кажа,— вельмі не перажывай. Яны цяпер такія, што і самі захамутаюць гэтых цялят.

Мы з Санькам, крыху пачырванеўшы, хмыкнулі. Многа яна ведае, старая, якія цяпер дзяўчаты і якія цяпер мы. А яна зноў:

— Не хмыкайце — знойдуцца, калі ўжо не зацуглялі.

Пільнае вока ў бабулі: нам сапраўды карціць ісці з хаты, Санька ўжо даўно мне падміргвае, але пасля такіх бабульчыных слоў адразу не пойдзеш, трэба ж хоць для прыстойнасці пасядзець і пагаварыць, каб падазрэнні ў старой не ўмацаваліся. А яно ж не сядзіцца, мы нібы на іголках. У нас часу мала, а яшчэ ж трэба купіць падушачак з павідлам, яшчэ трэба знайсці, дзе жывуць нашы дзяўчаты, бо мы толькі адрас ведаем, а самі ж там ніколі не былі. Было б, зразумела, лепей, калі б мы іх заспелі ў вёсцы. Але Санька ўжо разведаў, што яны тут толькі пераначавалі, а раніцай, нагрузіўшыся бульбай, пайшлі ў свой тэхнікум.

У рэшце рэшт мы ўсё, здаецца, дома расказалі пра сваё вучылішча, усім, чым было, пахваліліся і пачалі збірацца ў дарогу. А бабуля не хоча мяне пускаць.

— Хоць бы пераначаваў,— просіць яна.

Але тут яе ўжо астудзіў бацька. Ён разумее, што служба — не дружба, што з гэтым у арміі строга. Гэта калі ў калгасе не выйдзеш на працу — прагул, а ў войску — дэзерцірства. За гэта — трыбунал.

Перад трыбуналам бабка адступіла, і мы пабеглі б з хаты адразу, але згубіўся мой картуз. Ляжаў на куце і прапаў.

— Гэта ўжо той ідал схапіў,— здагадалася бабка і выйшла разам з усімі на вуліцу, каб пашукаць Глыжку. На шчасце, «ідал» далека не збег. Ён красаваўся ў картузе перад сваімі таварышамі каля двара.

У горад мы прыйшлі хутка. Ляцелі на ўсіх ветразях: разлічвалі дагнаць Кацю і Соньку ў дарозе, думалі, што з бульбай яны не вельмі разгоняцца, калі цяжкія ношкі, дык будуць адпачываць, але не дагналі. Давялося самім, як сказаў бы падпалкоўнік Асташэўскі, хадзіць і чытаць шыльды, шукаць вуліцу, шукаць дом, дзе яны жывуць. Але ж аказалася, што знайсці не так проста: шыльды шыльдамі, ды вуліцы ж цяпер вядома якія: дом стаіць, двух няма — то пажарышча, якое зарасло бадыллём, а то паўразбураныя сцены, калі дом быў цагляны. Але недзе і там, пад кучамі камення, мабыць, у падвалах жывуць людзі, бо ёсць на руінах і нумар дома. Але язык, як кажуць, і да Кіева давядзе. У адной маладзіцы спыталі, у дзеда, у дзядзькі, у дзяўчыны — і знайшлі-такі. Санька спыніўся і праспяваў:

Вот эта улица, Вот этот дом, Вот эта барышня...

Дом аказаўся не ах які — драўляная, якая асела ад старасці, хата. Праўда, вялікая — на два ганкі. Калісьці яна, мабыць, была і прыгожая, бо вокны і падстрэшнікі аздоблены разьбой. Але засталіся ад той разьбы адны сляды. Жалезны дах таксама па вільчыку ўвагнуўся.

Вось тут і жывуць нашы студэнтачкі. Толькі як з імі ўбачыцца — свіснуць ці зайсці? Вырашылі зайсці: бог ведае, што будзе з тым свістам, усё ж такі не дома, не ў Падлюбічах. Ды і ў пагонах жа...

Толькі не так гэта проста ўзяць і зайсці. Там жа і гаспадыня ёсць, і невядома, як яна адносіцца да розных там ухажораў, яшчэ пакажа нам, дзе парог. Страх, праўда, невялікі, але ж у нас ёсць і свой гонар.

Зайшлі мы прыстойна, культурна. Далікатна пастукалі ў дзверы — нам ніхто не адказаў, у цёмным калідорчыку пад каструляй толькі злосна сіпеў прымус. Пастукалі ў другія дзверы — выглянула сівая бабуля ў акулярах:

— Вам каго?

— Зямлячак шукаем.

3-за бабульчыных плячэй паказала галаву Каця і войкнула:

— Ой, адну хвіліначку!

Чуем, за дзвярыма падняўся нейкі перапалох: шушукание, бегатня, данеслася яшчэ адно «ой!». Калі мы пераступілі парог, «зямлячкі» сядзелі ўжо на канапе з такім выглядам, быццам сабраліся фатаграфавацца. Праўда, крыху збянтэжаныя і пачырванелыя.

Бачым, што дзяўчат мы ўразілі сваей не проста вайсковай, а амаль што афіцэрскай формай. А як жа — на нас і ў горадзе аглядваліся. Бабуля ў акулярах таксама нас з цікаўнасцю агледзела і знікла ў калідоры, мабыць, пайшла да свайго прымуса.

I вось сядзім мы ўжо з чвэрць гадзіны, а размова не клеіцца.

— Ну, як вы?

— Нічога,

— А вы?

— Нармальна.

Дзяўчаты чамусьці саромеюцца, зрэдку перашэптваюцца і без прычыны хіхікаюць. На стале ляжаць некранутымі нашы цукеркі-падушачкі, хоць Санька і прапаноўваў ужо не раз:

— Частуйцеся.

Узялі ўсяго па адной.

Там, у вёсцы, дык мы з імі былі бойкімі. I размаўляць пра што знаходзілася, і жарты жартавалі. А тут і ў нас языкі нібы не свае. Можа, што ў гасцях? Ды і дзяўчаты нашы ўжо нейкія не такія. Лічы, што дарослыя. Колькі мы іх тут не бачылі, а як папрыгажэлі. У Сонькі плойка гарадская, а Каця, здаецца, свае канапелькі на носе і шчоках прыпудрыла.

Выручыла нас гаспадыня. Яна вярнулася з калідора, апранула фуфайку і сказала:

— Я, дзяўчаткі, пайду займу чаргу за хлебам на заутра, а вы ж тут так не сядзіце. Вазьміце патэфон, пайграйце, патанцуйце. Да вас жа такія кавалеры, прыйшлі, а вы...

Патэфон у гаспадыні стары, спружына слабне — трэба часта падкручваць, іголкі тупыя, пласцінкі ўсяго дзве, ды і то на адной з іх нейкія арыі. Затое на другой — танга, як па заказу. Хоць яно і вельмі шыпіць, але словы разабраць можна.

Утомленное солнце Нежно с морем прощалось, И тогда ты призналась, Что любишь меня.

Мы з Санькам падняліся з табурэтак і паказалі сваю свецкасць: паляскалі абцасамі, паківалі галовамі, як вучыла нас Ала-Этыкетка,— прашу, мадэмуазель! Каця з Сонькай пераглянуліся і пырснулі смехам.

Утомленное солнце...

Я з Кацяй танцую танга. I як танцую — па навуцы! Гэта не тое таптанне на мурагу каля двара дзядзькі Скока.

Нежно с морем прощалось...

Каця стараецца, але ўсё адно часта не можа трапіць мне ў лад, бо я выкідваю розныя нечаканыя, мудрагелістыя каленцы, так званыя «па». Для маіх «па» трэба спартыўны зал, а тут пакойчык цесны, і мы то налятаем на табурэткі, то ўпіраемся ў шафу, то штурханулі стол, на якім стаіць патэфон. Ад штуршка ў ім штосьці заела, і ён зашыпеў адно і тое ж:

И тогда ты призналась... И тогда ты призналась... И тогда ты призналась...

Калі б жа прызналася, а то не прызнаецца. Ды і я не прызнаюся. Гэта ў кіно легка: ах, я цябе кахаю, дарагая! А мне тады і глядзець на тое кіно сорамна. А ім нічога — цалуюцца. Рэдка каторая дасць па вуху.

А патэфон знае сваё — шыпіць:

Что любишь меня...

У Санькі нешта палюбоўныя справы не ладзяцца. Нягледзячы на свецкае запрашэнне, Соня танцаваць не пайшла. Яна зашылася ў самы куток каналы за стол і чамусьці пачырванела. Мой сябра спачатку збянтэжыўся, а затым надзьмуўся і холадна сказаў:

— Ну, як хочаш...

Я і сам здзіўляюся, што гэта з дзеўкай стала? Была такая ахвотніца патанцаваць, а цяпер чамусьці ў яе ахвоту адбіла. Можа, ей такое шыкоўнае танга не падабаецца? А можа, і горш — сам Санька?

Калі пласцінку паставілі нанова, ён зноў яе запрасіў ужо без усякага этыкету, па-свойску:

— Ну, хадзем.

Усё роўна не пайшла. Толькі на гэты раз ледзь не заплакала, аж слёзы на вачах. Танцы разладзіліся. Паслухалі арыю з другой пласцінкі. Нічога цікавага — нехта басам аж стогне, што «людзі гінуць за метал». А мы і без металу можам загінуць, калі спознімся ў вучылішча са звальнення, таму і пачалі развітвацца.

Я з Кацяй выйшаў на ганак, каб сказаць ёй штосячкі без сведкаў, а Санька, мабыць, з той жа мэтай застаўся ў кватэры. Зразумела, будзе высвятляць, што гэта за конікі такія яго сяброўка выкідвае. У мяне ж на думцы выпрасіць у Каці яе фотакартку, але таксама карціць спытаць, якая сёння Кучараўку муха ўкусіла.

— Усё вам трэба знаць,— з неахвотай сказала Каця.— Саромеецца Соня: сядзіць босая, няма чаго абуць.

— Як?

— А так. Сёння ў туфлі падэшва адвалілася, а другіх няма. Пакуль знашу іх да шаўца, будзе сядзець дома і ў тэхнікум не пойдзе.

Фотакартку мне Каця толькі паабяцала, але замест яе падала нешта іншае ў рукі.

— Не глядзі.

Засаромелася і пабегла за дзверы. Я разгарнуў — насоўка. Вышываная. А гэта што-небудзь, хлопцы, ды значыць, калі дзяўчына дорыць хусцінку са сваімі ініцыяламі.

«ЧэПэ»

Раніцай пасля звальнення ў мяне быў прыўзняты настрой. Я жыў яшчэ ўчарашняй пабыўкай, у вушах яшчэ гучала танга пра стомленае сонца, якое ўчора танцаваў з Кацяй, і мне захацелася пры электрычным святле разгледзець падораную ею хусцінку. Цікава, што яна там навышывала?

Але жыць у казарме — усё адно што на люднай вуліцы. Тут не схаваешся ад чужых вачэй ні на печ, ні за печ, ні ў сенцы. Здаецца ж, ніхто не бачыць, што ты там разглядваеш, усе паспешліва апранаюцца, абуваюцца, каб не спазніцца на фіззарадку, але гэта толькі здаецца. Ёсць лупатыя. Мішка Цыганкоў, пракляты цыркач, выхапіў у мяне хусцінку з рук і ўрачыста закрычаў:

— Ура пакарыцелю дамскіх сэрцаў!

Я кінуўся коршакам, гатовы выдраць яго бессаромныя вочы, але хусцінку перахапіў Коля Кузняцоў.

— Апошнія навіны,— абвясціў ён на ўвесь узвод,— наш Іван завёў раман! Вось палюбоўны трафей! Глядзіце і зайздросце!

Яны смяюцца над самым маім патаемным, над тым, чаго не павінна ведаць ніводная душа, што я так і берагу і чым так даражу, за што можна ісці і на смяротны бой. Але мае кулакі не дасягаюць мэты, хлопцы ад іх спрытна ўхіляюцца. Ух, што б я ім зрабіў у той момант! Спапяліў бы і попел па ветры развеяў.

Мабыць, выгляд у мяне быў даволі адчайны, таму што Лёва Белкін, вяртаючы мне хустачку без супраціўлення, збянтэжана сказаў:

— На, чорт шалёны. I пажартаваць нельга.

Ды і астатнія жартаўнікі, мабыць, зразумелі, што перасалілі, пачалі са мной загаворваць, быццам нічога і не здарылася такога. Але ўва мне яшчэ кіпіць гнеў, я змрочны, суровы і непрыступны, нібы каменная сцяна. Тады яны пачалі хваліцца адзін перад другім, але каб чуваць было і мне. Яны, бачыце, таксама не лыкам шытыя. Хусцінка — гэта яшчэ што!

Мы бяжым на фіззарадку, з фіззарадкі, засцілаем пасцелі, а Цыганок яшчэ і расказвае, і паказвае, як яны ўчора адбілі ў шпакоў класных дзяўчат, як ім давялося потым змагацца, калі шпакі наляцелі на іх цэлым гуртам, як на яго свіст прыбегла яшчэ некалькі нашых, пасля чаго праціўнік быў пасаромлены і рассеяны. Праўда, і самім пераможцам давялося потым ратавацца ўцёкамі ад патруля так, што дай бог ногі. Але, кажучы па-вайсковаму, усе з'явіліся ў размяшчэнне своечасова і без страт, нават без сінякоў.

Так быццам было з гэтымі двума. А вось некаторых наадварот — прымалі з гарачымі абдымкамі, а праводзілі і зусім ледзь не са слязамі.

Усё гэта можна было б і слухаць, і прыняць за праўду, калі б самахвалы раней добра згаварыліся і так не блыталіся: то яны, бачыце, сустрэлі тых класных дзяўчат у парку, то — на вуліцы; да фіззарадкі размова ішла пра пяцярых шпакоў, а пасля фіззарадкі іх ужо набралася столькі, што і не злічыць. Ды і Лёваву знаёмую, якая то абдымаецца, то пралівае па ім слёзы, завуць то Лідай, то Людай.

— Трапло ты,— не вераць яму хлопцы.

Я таксама не веру, але ў размову не лезу, моўчкі засцілаю пасцель. Добра, што хоць ад мяне адчапіліся.

I раптам усю гэтую пахвальбу, жартачкі, хіханькі і хаханькі спыніў Косця Лямешка — наш Піскля. Ён першым заправіў пасцель і, пакорпаўшыся ў сваёй тумбачцы, разгублена спытаў:

— Хлопцы, а хто ў мяне мыла ўкраў?

Пытанне нечаканае, крыўднае, дзікае. Такога ў нас яшчэ не было, каб красці. Калі гэта жарт, то жарт яшчэ больш няўдалы, чым з маёй хустачкай. Гэта абраза кожнага з нас асобна і ўсяго ўзвода цалкам, самага дружнага і з'яднанага ўзвода ў батарэі. За такі жарт можна атрымаць і па шыі. Коля Кузняцоў так Косціка і папярэдзіў:

— Піскля, асцярожна на паваротах!

А Толік Гецьман, не паверыўшы пачутаму, павучальна, з уласцівым яму ўкраінскім гумарам сказаў:

— А ты, кум, хавай, як я хаваю,— і, заглянуўшы ў тумбачку, недаўменна развёў рукамі.

— Схаваў? — хмыкнуў Піскля.

— Схаваў,— уздыхнуў Толік,— далёка схаваў, аж сам не знайду.

I ўзвод захваляваўся, забурліў. Аказалася, што выдадзенае нам каптэнармусам два дні назад на новы месяц туалетнае мыла «Сунічнае» знікла не толькі ў Пісклі і Гецьмана, прапала яно і ў Колі-масквіча, і ў Генацвале, і ў Лёвы, і ў Расошкі-мастака, і ў майго растоўскага непрыяцеля Сцёпкі Рубцова, і яшчэ ў таго-сяго — чалавек у дзесяці.

Хлопцы забыліся пра ўсё на свеце: і пра маю вышываную хустачку, і пра гераічную перамогу над шпакамі, і пра Лёваву знаёмую, якая пралівае па ім слёзы. Усіх цяпер хвалюе толькі адно пытанне: хто?

У галаве не змяшчаецца, што сярод нас завёўся зладзюга. Гэта ў горадзе, кажуць, іх многа. Аднойчы з Санькам, прадаючы шчаўе на базары, самі бачылі, як абкрадзеная на вачах сельская цётка галасіла ўголас і крычала гвалт. Але ніхто ёй не мог дапамагчы: ні міліцыянер, ні суседкі-гандляркі. Быў тут, кажуць, адзін, круціўся ў капелюшы, а цяпер шукай учарашні дзень.

Запомніўся і яшчэ адзін даволі страшны выпадак. У магазіннай чарзе зноў жа ў вясковай бабы-разявы нейкі кішэннік умудрыўся выцягнуць грошы нават з-за пазухі. А баба, як гаварылі навокал людзі, салдацкая ўдава з плоймай дзяцей. I прадала яна карову-карміцельку, каб пабудаваць хату і вылезці з зямлянкі. Дык вось у той магазіннай чарзе яе і абчысцілі. I людзі ж, напэўна, бачылі, але пабаяліся рот адкрыць. Усім вядома, што бандзюгі — адчайны народ. Яны могуць і нажа даць у бок, а самі змыцца.

Толькі на шчасце той беднай жанчыны, трапіўся ў чарзе смелы чалавек — дэмабілізаваны матрос-франтавік. Як расказвалі ў натоўпе сведкі, схапіў той матрос кішэнніка за рукаў і кажа:

— Аддай цётцы грошы, гад!

Але кішэннік, відаць, быў добры бандзюга: выхапіў лязо брытвы і ў адказ:

— Многа бачыш, марачок!

Цэліўся ён разануць па вачах, ды не на таго трапіў. Ну і біў жа яго матрос — глядзець было жудасна: і пад дых, і па зубах, і ў вуха. Пра гэта мы ўжо не чулі, а самі бачылі. А народ — гарой за марака. Чалавек на фронце жыццём рызыкаваў, дык не хапала яшчэ, каб тут на яго розная погань руку падымала, каб з-за нейкага бандзюгі да маткі не дайшоў.

Словам, у горадзе рот не разяўляй і асабліва глядзі там, дзе цесна ад людзей: многа рукатых развялося. Ды і ў цягніках ёсць такія спецыялісты. Нам з Санькам, праўда, ездзіць на цягніках не даводзілася, але людзі кажуць, што гэта так. Наш памочнік камандзіра ўзвода сяржант Яцук — чалавек бывалы. Дык ён нам расказваў, напрыклад, такое, што аж не верыцца. Ну проста анекдот. Ехаў як быццам у пасажырскім вагоне адзін афіцэр з Германіі. Паклаў ён свой чамадан з падарункамі для сям'і сабе пад галаву, лёг, не распранаючыся і не разуваючыся, на полку і задрамаў. I раптам чуе, што нехта сцягвае ў яго бот з нагі. «Ну-ну,— думае афіцэр,— давай-давай, я зараз табе, паразіт, пакажу, дзе ракі зімуюць. Толькі ты сцягнеш бот, я цябе і схаплю, сокал ты мой ясны». I яшчэ болей прытварыўся, што сніць. Жулік, не сцягнуўшы адзін бот, узяўся за другі. Тут ужо і зусім цікава стала, што ж той задумаў? «Давай-давай,— усміхаецца сам сабе афіцэр,— зараз ты ў мяне заспяваеш». А злодзей у той момант — цап чамадан з-пад галавы і ходу. Падхапіўся маёр ці капітан— хто ён там быў,— а бегчы не можа, каб дагнаць. Пакуль нацягваў боты, таго і след прастыў. Цю-цю, як кажуць, чамадан з падарункамі, быў і сплыў. Вось якія спецыялісты бываюць.

Дык то ж на базары, то ж у цягніку, дзе вакол чужыя, незнаёмыя людзі, у якіх на лбе не напісана, злодзей перад табой ці сумленны чалавек. А тут жа не базар і не вакзал, а казарма — цяпер роднае наша жытло. I тут не чужыя людзі, а свае хлопцы. Ды і якія хлопцы — не розная ж там шантрапа, а будучыя афіцэры. Вось што ўсіх заядае. Няхай нам і рана яшчэ гаварыць пра афіцэрскі гонар, але свой ганарок у нас ужо ёсць. Крадзеж і шпака не ўпрыгожвае, а пра нас і гаварыць няма чаго.

Ды і ўзвод жа наш не абы-які. Дарма, што шкеты, а ў вучобе дзядзькоў перамаглі. У нас аж трое выдатнікаў: сяржант Міцька Яцук, Коля-масквіч і Мішка Цыганкоў. Іх прозвішчы, напісаныя нашым жа мастаком Расошкам пад золата, красуюцца ў калідоры казармы побач з тумбачкай днявальнага на чырвоным стэндзе ў абрамленні дубовага лісця, перавітага стужкамі. А з дзядзькоў там усяго адзін. Усяго адзін і з другога ўзвода, а ў трэцім узводзе і наогул яшчэ выдатніка няма. Так што мы на першым месцы.

Не так даўно нас пахваліў камбат і за знешні выгляд. Пераймаючы замашкі свайго каштана, многія з нас таксама сталі педантамі не горшымі за яго: і гузікі гараць золатам, і чаравікі суконкамі заўсёды налакіраваны. Дык што ж цяпер будзе з нашай добрай славай пасля прапажы мыла? Цяпер жа на вочы не паказвайся дзядзькам. Само сабой зразумела, што і каштан Захараў, і камбат, падпалкоўшк Асташэўскі, не пакінуць гэтага проста так. Ой, што будзе, што будзе!

Увесь узвод усхваляваны, але больш за ўсіх кіпяцяцца Коля Кузняцоў і, як мне ні дзіўна, растоўскі Сцёпка Рубцоў. Коля і Сцёпка — гэта ж дзень і ноч.

Калі шчыра прызнацца, дык многім з нас хацелася б хоць крыху быць падобным на Колю. Адзін яго знешні выгляд чаго варты. Ён у нас агульнапрызнаны прыгажун: высакародны, хоць і крыху хударлявы твар, тонкі з гарбінкай нос, а не то як у нас з Санькам — кірпатыя піпкі, і вялікія шэрыя вочы з такімі густымі вейкамі, што любая дзяўчына пазайздросціла б. Хлопцы кажуць, што з-за ўсяго гэтага з ім нецікава хадзіць у звальненне: небяспечны сапернік.

Але галоўнае не ў прыгажосці. Коля — інтэлігент ва ўсіх адносінах. За сталом ён есць толькі па этыкеце, у размовах ад яго толькі і чуеш: «калі ласка», «выбачайце», а калі з насмешкай, то — «пардон».

А яшчэ ён, мабыць, самы начытаны сярод нас. I памяць у яго на зайдрасць. Кожны вечар пасля адбою наш узвод звычайна доўга не можа заснуць. Затаіўшы дыхание, усе мы слухаем Колевы пераказы кніг пра дзівосныя прыгоды адчайных людзей: пра адважных маракоў, індзейцаў і піратаў. Вось ужо на працягу двух тыдняў ён шэпча нам перад сном пра подзвігі высакароднага рыцара Айвенга, шэпча, пакуль у казарме не знойдзецца якая-небудзь зануда і не пачне абурацца:

— Эй, шкеты, дайце заснуць!

Апрача ўсяго, Коля ў нас вялікі гусар. Ён шкадуе, што не нарадзіўся тады, калі былі гэтыя самыя гусары. Калі ўжо быць вайскоўцам, дык толькі такім, як яны. Вось гэта былі людзі, вось гэта афіцэры! Неймаверная адвага, пагарда да смерці, а галоўнае — крыштальнае сумленне, высокі гонар: ледзь што не так — дуэль.

Хоць і мінулі тыя часы, але Коля ўсё ж такі гусарыць як можа. Ён, напрыклад, не скажа, дзе мой картуз ці шапка, а абавязкова — ківер. Пагоны называе эпалетамі. З-за свайго гусарства даводзіцца яму іншы раз і пакутаваць. Зрабіў сабе Коля неймаверна бліскучыя «эпалеты» з фальгі — камбат загадаў зняць ды яшчэ вымову ўляпіў перад строем за парушэнне формы адзення. А то неяк разлёгся ён на ложку, думаў, што начальства няма, ляжыць і напявае:

Скатерть белая залита вином, Все гусары спят непробудным сном. Лишь один не спит...

А тут адкуль ні вазьміся — Юрка Калдоба, наш старшына, і — атрымай, гусар, нарад на кухню бульбу чысціць!

Да крадзяжу мыла Коля аднёсся таксама па-гусарску.

— У свой час яго, гада, выклікалі б да бар'ера,— сурова сказаў ён, маючы на ўвазе пад гадам злодзея,— і ні ў кога не здрыганулася б рука. Падумаць толькі, якая погань ёсць сярод нас!

Дык гэта ж Гусар, а Сцепка хто такі, каб кіпець гневам? Сам жа мне па сакрэце хваліўся, што растоўскі жулік. Ды і не радавы, а яшчэ і дружбак нейкага Прынца. Дарэмна я тады пра ўсё гэта хлопцам не расказаў, Саньку паслухаў. Хаця паспрабуй раскажы, калі ён можа і адмовіцца ад сваіх слоў, сказаць, што проста ўзяў на пушку, каб напалохаць дзеравеншчыну. Вось і будзеш тады хадзіць у баязліўцах і паклёпніках. I цяпер я думаю, а ці не яго гэта рук справа — прапажа мыла. Думаю, а доказаў у мяне няма. Як кажуць, не схапіў за руку — не злодзей. Тым больш што і сам ён абкрадзены і цяпер так гэтым абураны, што аж распінаецца.

— Правільна, біць такіх трэба,— падтрымлівае ён нашага Гусара,— і без розных там бар'ераў, а ў зубы. Накарміць яго тым мылам, каб век помніў.

Але ад яго ўсе адварочваюцца, як быццам і няма Сцёпкі, быццам гэта пустое месца. Байкот, які быў яму аб'яўлены за тое, што ён здрадзіў узводу ў час нашай скрытай вайны супраць дзядзькоў, яшчэ не забыты. Усе трымаюць марку, з ім ніхто не хоча размаўляць, хоць ён і паводзіць сябе цяпер вельмі аддана. Асабліва Сцепка падтаквае малодшым камандзірам, сяржанту Яцуку і Саньку — усяго яфрэйтару. Не паспее з іх хто і рот адкрыць, а ён ужо — ёсць! Хоча выслужыцца. Вось і цяпер заглядвае ў вочы Міцьку Яцуку:

— Гэта ж пляма на ўсіх нас. Праўда, таварыш сяржант?

Байкот не байкот, а камандзір павінен аддаваць загады, гэта не лічыцца парушэннем угавору, і Яцук, не адрываючыся ад падкаўнерыка, які ён у гэты момант падшываў, строга скамандавау:

— Выхаванец Рубцоў, марш мыцца!

Шырокі, крыху прыпухлы, заўсёды блішчасты, нібы намаслены, Сцёпкаў твар, на якім толькі што было столькі бязмежнай адданасці, расчаравана патух.

— Ёсць! — паслухмяна шчоўкнуў Сцёпка абцасамі і, узяўшы прычындалле для ўмывання, знік.

Цяпер вакол ажывіліся, загаварылі амаль усе разам, цяпер тут усе, здаецца, надзейныя. Што рабіць? Прасцей за ўсё далажыць начальству, няхай яно само шукае злодзея і карае. Але многія з гэтым не згодны. Па-першае, не варта самім сябе ганьбіць. Начальства падыме вэрхал, пачнецца якое-небудзь следства, пачнуць усіх цягаць да камбата ў канцылярыю — сораму не абярэшся. А па-другое, начальства для злодзея — не самае страшнае: яно будзе з ім панькацца, выхоўваць, сарамаціць, аб'явіць вымову ці яшчэ што, а па мордзе не дасць. Коля Кузняцоў у гэтым перакананы на ўсе сто. А гэтага ўсім мала. I справа тут ужо не ў самім мыле, хоць яно цяпер і дарагое, а ў тым, што не можам мы жыць з такім чалавекам побач, гонар нам не дазваляе.

— Цёмную, толькі цёмную! — настайвае Пiскля.

Так жа, як і Яцук, ён сам былы дзетдомавец і перакананы, што лепшага сродку для перавыхавання людзей, нячыстых на руку, і розных фіскалаў няма. На ўсё жыццё любы красці перастане. I робіцца гэта проста: чалавек пяць сакрэтна змаўляюцца між сабой, накрываюць ноччу соннага паразіта коўдраю, каб той белага свету не бачыў, ды і лупцуюць хто чым. Моўчкі лупцуюць, каб гад па голасу каго не пазнаў. I канцы ў ваду.

— Так і з вучылішча можна вылецець,— спрабуе астудзіць Косціка заўсёды памяркоўны Гецьман.— Чуў, нябось, што Маятнік гаварыў пра самасуд.

— А хто дакажа, калі сакрэтна,— стаіць на сваім Косцік,— а знойдзецца фіскал — і таму цёмную.

I смех і грэх слухаць гэтага Пісклю: самога паўжменькі, а ваяўнічасці вагон. Як сказала б мая бабка, хоць мала сілы, ды многа задзіры.

Але тут многае залежыць ад Міцькі Яцука, ён усё ж старэйшы сярод нас па ўзросце на год-два. I па званию — сяржант. Даложыць ён капітану — будзе вэрхал, не даложыць — будзе свой суд і расправа. Як кажуць, шыта-крыта, каб ніхто не знаў. Але Яцук пакуль што маўчыць, падшывае свой падкаўнерык і маўчыць. Ён заўсёды трымаецца крыху ў баку ад усіх ці то па свайму характару, ці па субардынацыі, каб мы не селі яму на галаву. Мы яго за гэта крыху недалюбліваем, аднак права камандаваць сабой прызнаём: былы сын палка, франтавік, прайшоў, як кажуць, Крым і Рым, і Стары Быхаў, дзе і чорт не дыхаў. Як тут не прызнаеш?

Вось Міцька нарэшце апрануў гімнасцёрку, бліснуў медалём і зрабіў ласку — абазваўся:

— Дакладваць, хлопцы, давядзецца: гэта ж — «чэпэ».

Слова «чэпэ» прымусіла задумацца нават па-баявому настроенага Пісклю, і ён змоўк, але тут на дапамогу яму прыйшоў Коля Кузняцоў. Праўда, ён не агітаваў за цёмную, але разняхаіў так:

— Пачакай з дакладам, камандзір. Давай мы самі разбяромся. Дазнаемся — хто, тады і даложым.

— Правільна,— падтрымалі Колю ўсе, хто чуў гэтую размову,— толькі як дазнацца?

— Ша, хлопчыкі,— супакоіў Коля народ і ўдарыў зноў сваёй начытанасцю: — Пра сышчыка Шэрлака Холмса чулі? Прыменім яго дэдуктыўны метад, і ўсё тайнае стане яўным. Я за гэта бяруся. I — ціха.

Не ведаю, як на каго, а на мяне дэдуктыўны метад вельмі падзейнічаў. Я ўпершыню чую такое. I хоць не ведаю, з чым той метад ядуць, але ўпэўнены, што цяпер Сцепка Рубцоў нідзе не дзенецца. Тут яму не Растоў-тата.

Падзейнічаў, відаць, метад і на нашага сяржанта. А можа, і не метад. Можа, тое, што і ён не бог ведае якая шышка: з намі спіць, з намі за адным сталом есць, з намі вучыцца. Толькі што б там ні было, а, здаецца, паддаўся Міцька ўгавору.

— Хм,— хмыкнуў ён і задумаўся.

Затым падалі каманду строіцца, і батарэя пайшла на снеданне. Наш узвод, на здзіўленне, паводзіць сёння сябе ў страі ўзорна: ні жартаў, ні пстрычак, усе маўчаць, нібы каго пахавалі. Не спадзеючыся на Сцепку Рубцова, яго спецыяльна папярэдзілі, каб пра «чэпэ» ні гу-гу.

Я, праўда, спакойны, мая душа на месцы. Як гаворыць бабуля, не чапай нічога — не бойся нікога. Адкуль мне было ведаць, што нада мной збіраюцца чорныя хмары.

Усё таемнае становiцца яўным

Усё пачалося з таго, што на перапынку Сцепка падсцярог мяне ў калідоры аднаго і зларадна сказаў:

— Ну, кораш, цяпер ты ў мяне ў руках, будзеш пад маю дудку скакаць.

— Пайшоў ты! — пагардліва кінуў я ў адказ, хоць такая яго заявачка мяне зацікавіла і крыху ўстрывожыла. На што гэта ён намякае?

Хай на што хоча гэты нахабнік намякае, а размаўляць з ім не варта: і самому не хочацца, і хлопцы будуць касавурыцца, калі завядзеш з ім шашні. Толькі не тут яно было: Сцепка заступіў мне дарогу і сказаў такое, што мне стала не па сабе:

— А мыла хто спёр, фраер? Думаеш, я не бачыў, як ты хаваў яго ў рэчмяшок перад звальненнем?

Ад крыўды і абурэння мяне аж закалаціла. Тут трэба было б урэзаць кулаком яму ў грызлы, умазаць як след па гэтай плоскай і шырокай, нібы лапата-хлебніца, мордзе, па яхідных прыжмураных вочках, але я разгубіўся і не ўрэзаў, і не ўмазаў, а толькі зароў зверам:

— Гэта было мае мыла, гад, мае!

Тут зазвінеў званок, з вуліцы ў клас з гоманам і тупатам рынуліся ўсе нашы, і я нічога не паспеў даказаць таму паразіту. Не чакаючы, пакуль нас убачаць разам, ён прыпусціў у клас першы і толькі кінуў мне напаследак:

— Будзеш разумнікам, нікому не скажу. Закон — тайга!

Нічога сабе аладачкі! Я і душой невінаваты, а ён, бачыце, нікому не скажа. Ды што ж гэта на свеце робіцца?

У класе я сяджу нібы на іголках: усё не магу супакоіцца. Гэта ж падумаць толькі, што плявузгае гэты гад Сцепка! Ды я за ўсё жыццё парушыны чужой не ўзяў, калі не лічыць, зразумела, яблыкаў з суседскіх садоў. Дык гэта ж зусім іншы каленкор. Каб вырасці ў вёсцы і не зрабіць такі грэх, трэба ўжо зусім святым быць. А тут такое! I павярнуўся ў яго, паразіта, язык.

А што будзе, калі ён і сапраўды вякне хлопцам сваю хлусь? Прапаў я тады з лапцямі. Хоць і гавораць: не чапай нічога — не бойся нікога, а паспрабуй іншы раз даказаць, што ты не вярблюд. Мне здаецца, я трапіў якраз у такое становішча. Што я перад звальненнем хаваў мыла ў рэчмяшок, супраць гэтага не папрэш. Гэта, апрача Сцёпкі, бачылі і іншыя, могуць пацвердзіць. Дзіўна, што яны пра гэта яшчэ маўчаць. А калі ўсё-такі думаюць?

Самае правільнае, відаць, пакуль не позна, трэба самому расказаць хлопцам, што то за мыла і куды я яго аднёс. А як дакажаш? Сапраўды можна падумаць, што на злодзеі і шапка гарыць.

Праўда, маю нявіннасць можа пацвердзіць Санька, але ўсе ведаюць, што мы з ім землякі і дружбакі. Скажуць, што з аднаго поля ягады. Куды ні кінь — усё клін. Аж галава пухне.

Можа, і сапраўды не дражніць гэтага аглаеда Сцепку? Аддам яму сёння за абедам сваю порцыю мяса, няхай падавіцца. Адкуплюся данінай, абы маўчаў. Я так баюся пра сябе дрэннай пагудкі, што гатовы пайсці і на такое. Вядома, калі-небудзь праўда ўсплыве, але правільна гаворыць мая бабка: пакуль сонца ўзыдзе, раса вочы выесць.

Матэматычка чэрцщь на дошцы мелам розныя чарцяжы, тлумачыць нам новы урок, але да мяне сёння даходзіць туга. Я гляджу на дошку нібы на новыя вароты, раблю толькі разумны выгляд, а сам — не запамінаю нічога. Побач Санька сапе. Ён так стараецца, перамалёўваючы чарцяжы ў свой сшытак, што аж высалапіў язык. Сцепка сядзіць справа ад мяне цераз праход паміж сталамі і, калі я паварочваю галаву ў яго бок, змоўніцкі мне падміргвае. Ад гэтага аж кошкі скрабуць на душы. Знайшоўся мне кораш. Закон — тайга.

Чым больш я думаю пра яго, тым больш губляюся. Што ён за тып, гэты Сцёпка? Разумны чалавек не будзе хваліцца першаму сустрэчнаму, што ён жулік. Гэта ўжо зусім трэба з глузду з'ехаць. А пра Сцёпку такога не скажаш: у яго, здаецца, усе дома. Вучыцца не горш за іншых. Дык вось жа пахваліўся. Да гэтага часу не магу ўцяміць, праўду ён гаварыў ці не, калі за сталоўкай патрабаваў ад мяне большых порцый і пагражаў расправай па-растоўску. Можа, проста правяраў, ці не пабягу дакладваць, ці не фіскал я. Я, канешне, не фіскал і ніколі ім не буду, а ён невядома хто. Можа, і сапраўды дружбак блатнога Прынца, ад якога рыдае міліцыя. Вунь якая нахабная ухмылка!

Не разумею, як яго прынялі ў наша вучылішча, калі ён такі. Няўжо генерал разам з прыймовай камісіяй не змог яго раскусіць? Здаецца ж, былі такія строгасці. Мяне дык вунь як круцілі — з усіх бакоў: хто бацька, хто матка, чым я сам дыхаю.

Загадка для мяне і сённяшняя размова з гэтым прайдохам у калідоры. Чаго ён дабіваецца? Ці не сам ён мыла свіснуў, а на мяне хоча зваліць? Хутчэй за ўсё так яно і ёсць. А тое, што і яго таксама абабралі, што ён гатовы ў зубы злодзею даць,— усё гэта цень на пляцень.

Але тут мяне збівае з панталыку гэты самы яго закон — тайга. Калі вінаваты, дык, мабыць, маўчаў бы ў жменю і дыхаў у дзве дзірачкі, а то ж лезе на ражон. Ды яшчэ і тайну абяцае захоўваць. Не, хутчэй за ўсё не ён.

А што, калі падумаць так? Пра свае блатное жыццё да вучылішча, дапусцім, ён гаварыў мне праўду — з языка сарвалася, а цяпер чысты, мыла не краў. Дапусцім, што ён сапраўды ўпэўнены, што гэта маіх рук справа. Тады, паабяцаўшы нікому не гаварыць, ён хоча знайсці сабе хаўрусніка, друга-прыяцеля, ці, як ён кажа, кораша. Хочацца ж яму з кім-небудзь сябраваць, а тут на табе, само ў рукі валіцца, знайшоўся такі ж, як і ён, два боты — пара. Для гэтага і трэба яму закон — тайга.

I тут мяне раптам асяніла новая думка: усё так, ды не так. Ён проста бярэ мяне на пушку: ты, маўляў, блатны, і я блатны — свае людзі, чаго там хавацца. I тут жа мяне прадаў бы, калі б мой лыч быў у пуху. Тады б ён абяліў сябе і хадзіў перад хлопцамі ў героях. Вы, так сказаць, мной пагарджаеце, размаўляць са мной грэбуеце, а я вунь які — злачынцу выкрыў. Ну і круцель, ну і прайдзісвет.

А я і вушы развесіў, у паніку кінуўся, дурань. Ледзь даніну яму не пачаў плаціць, гэтаму абармоту. Дудкі яму цяпер, а не кроўную порцыю! У такім выпадку паддацца — гэта ўсё роўна што прызнацца. Тады б ён сапраўды з мяне вяроўкі віў, а то і зрабіў казлом адпушчэння.

Дадумаўшыся да такога, я крыху супакоіўся. Страх знік, засталіся толькі злосць, абурэнне і прага чым-небудзь насаліць гэтаму нахабніку, толькі насаліць высакародна, не скардзячыся начальству. Скардзіцца — гэта ўсё адно што і данесці, гэта доля слабых і подлых, падлізаў і кар'ерыстаў. Тут я заадно з Колем Кузняцовым: вельмі шкада, што мінулі гусарскія часы. Э, калі б мне гэты падонак такое сказаў, як сёння ў калідоры, гадоў сто назад!

Перада мной, нібы на яве, паўстае карціна дуэлі. Мы страляліся б за дрывяным складам. Гэта, мабыць, самае глухое месца. Там, за штабелямі бярвення, часта хаваюцца нашы сачкі, калі батарэю выводзяць падмятаць дарожкі на тэрыторыі вучылішча, і не было яшчэ выпадку, каб начальства іх там застукала. Не перашкодзілі б нашаму паядынку і ў соснах за стадыёнам.

Маім секундантам — Санька. Ён мяне адгаворвае не рызыкаваць жыццём і пайсці на міравую, але няхай і не стараецца: гусары абразы не даруюць.

А хто будзе секундантам у Сцёпкі, прыдумаць не магу. Наўрад ці згодзіцца хто з нашых хлопцаў. Хіба што задавака Лобан з першага ўзвода, які, здаецца, з ім васькаецца.

3 кніжак я ведаю, што на дуэлі павінен прысутнічаць і доктар. Тут горшыя справы. Не паклічаш жа маёра з нашага лазарэта: той дзядзька строгі, адразу сапсуе ўсю абедню. Хіба што запрасіць медсястру Люсю, якая ставіць градуснікі і дае пілюлі, калі мы заглядваем у санчасць у надзеі на вызваленне ад заняткаў. Толькі штосьці я не помню, каб у дуэлях прымалі ўдзел і жанчыны. Што з іх возьмеш? Яшчэ наробіць слёз, гвалту, страціць прытомнасць. Абыдземся і без медыцыны. У правшах бываюць выключэнні. А не, дык паклічам таго самага санітара, што рабіў нам санапрацоўку ў лазні, калі нас толькі-толькі залічылі ў вучылішча. Таго мы, мабыць, упросім.

I вось дуэль. Я цэлюся з пісталета Сцепку ў сэрца, а на майго праціўніка аж глядзець сорамна: дрыжыць нібы асінавы ліст, румзае горкімі слязьмі, на каленях просіць злітавацца і клянецца, што не будзе болып займацца паклёпамі.

Чорт з ім, няхай жыве! Я выстраліў уверх, з соснаў з крыкам разляцеліся вароны, і тут... зазвінеў званок: заняткі скончыліся.

Фаіна Маркаўна развіталася і пайшла з класа. Наш сяржант Яцук скамандаваў выходзіць строіцца, і я з гусарскай даўніны апынуўся ў сённяшнім дні. Вось ён і Сцёпка — паразіт, не спалоханы, не заплаканы, нахабна ўсміхаецца і ўкрадкі ад іншых мне падміргвае. Праходзячы міма, ён сказаў так, каб было чутна толькі мне:

— Не хвалюйся, закон — тайга.

Мяне зноў бытта ўкусілі, але агрызнуцца я спазніўся: той ужо выйшаў з класа. I я зноў у трывозе, зноў на душы неспакойна, настрой сапсаваўся — белы свет нямілы. А тут яшчэ гэты зубаскал Цыганок насміхаецца.

— Хлопцы, глядзіце, як наш ухажор пакутуе.

I ўсе рагочуць. Мне б іхнія клопаты.

А тут, як на тое ліха, не выпадае пагаварыць з Санькам. Ён увесь час на людзях: то камандуе аддзяленнем, то вакол яго проста так таўчэцца народ. А мне трэба хутчэй і па сакрэце.

У трывозе я не звёў вачэй на «мёртвай» гадзіне і на самападрыхтоўцы сяджу як у ваду апушчаны. Санька, вывучыўшы ўрокі, у муках творчасці грызе аловак — піша верш, а я збіраўся напісаць Каці, але колькі ні пачынаў — не той настрой. Так і цягне мяне на расчараванне жыццём, на людскую вераломнасць і на ўсё такое, з-за чаго лермантаўскі Пячорын лез пад кулі. Дапісаўшыся да поўнага зняверу ў шчасце наогул, я скамячыў ліст і схаваў яго ў кішэню. Цьфу на мяне! Разнюніўся перад дзеўкай. Артылерыст, называецца.

Але душа шукае выйсця, і рука сама сабой малюе на прамакатцы чэрап і скрыжаваныя косці. Я яму пакажу, гэтаму Сцёпку!

Скончылася маё маляванне тым, што капітан Захараў, стаміўшыся чытаць тоўсты раман, непрыкметна падышоў да майго стала. I вось я ўжо стаю навыцяжку, апусціўшы вочы долу, а ён разглядае маю прамакатку і на пацеху ўзводу быццам мяне і хваліць:

— А нічога, нічога... Здольнасці ёсць. Толькі дазвольце спытаць, пірацкі герб гэта што — ваш ідэал?

Няма чаго і гаварыць, што выгляд у мяне быў далека не зухаваты.

Пагаварыць з Санькам пра падкопы, якія робіць пад мяне ненавісны Сцёпка, мне ўдалося толькі ў вольную гадзіну перад вячэрняй паверкай. Захоўваючы канспірацыю, я завёў яго ва ўмывальню і толькі там раскрыў набалелую за дзень душу. Канешне, тут я пераступіў святую запаведзь — начальству не скардзіцца, не фіскаліць. Але тут асобы выпадак. Каму Санька — начальства, а мне ўсё-такі — блізкі сябра. Тут павінна быць скідка. Ды я зусім і не скарджуся, я проста раюся па-прыяцельску, як мне быць: напляваць на ўсё і расцерці, далажыць капітану ці як-небудзь так прыструніць таго паразіта Сцёпку?

А што Санька? У яго таксама розуму скарбы. Камень з майго сэрца ён не зняў, а яшчэ больш яго развярэдзіў. Спачатку, праўда, ён загарэўся, закіпеў гневам:

— Правучыць яго трэба як след, гада!

— Правільна! — абрадаваўся я. Іншага ад сябра і не чакаў і тут жа прапанаваў свой план расправы — давай заманім за дрывяны склад і адлупцуем.

Вот тут мой Санька і задумаўся.

— Не так гэта проста,— паскроб ён у патыліцы,— тут трэба яшчэ мазгамі раскінуць.

— Ды што тут раскідваць? — не церпіцца мне хутчэй даць Сцёпку дыхту, так не церпіцца, што аж ногі не стаяць на месцы і свярбяць кулакі:— Заўтра ў час фіззарадкі і правучым. А то распусціў язык.

Але Санька толькі сапе ды ў задуменнасці хмыкае, быццам у яго ў горле перасохла:

— Тут разумееш... як табе сказаць...

Гэта мяне вывела з раўнавагі. Тут і разумець няма чаго, чаму ён такі нерашучы. Як жа: я — радавы, а ён, бачыце,— яфрэйтар, камандзір аддзялення. А нядаўна прайшла чутка, што нашым яфрэйтарам прысвояць званне малодшых сяржантаў. Некаторыя з іх запасліся ўжо новымі лычкамі. Вось ён і віляе, баіцца падмачыць аўтарытэт. I мяне апанавала такая злосць, што я не ўтрымаўся і ляпнуў:

— Кар'ерыст ты няшчасны.

Санька аж узвіўся ад злосці, пачырванеў, люта зыркнуў вачыма:

— А ты... а ты...

Але болей нічога сказаць не мог і, грукнуўшы цяжкімі дзвярыма, выбег з умывальні нібы абвараны. Вельмі хлопец пакрыўдзіўся.

I тут ёсць за што. Кар'ерыстаў у нас не любяць не менш за фіскалаў, з імі ніхто не хоча звязвацца, ад іх утойваюць свае сакрэты, ад іх трымаюцца ўбаку. Хочаш з таварышамі жыць душа ў душу — выбірай адно з двух: павагу хлопцаў ці начальніцкую любоў. Угоднікам у нас цяжка жыць. Не, ты можаш начальства паважаць і нават любіць, як усе мы паважаем капiтана Захарава, толькі не падлашчвацца, а калі яно пачне цябе выдзяляць без меры, часта ставіць у прыклад ці даваць паслабленні, усе на гэта будуць глядзець коса. Гэта я ў вучылішчы адразу наматаў на вус. Вось чаму так раз'юшыўся Санька. Ведаючы ягоны характар, я думаю, што цяпер да яго доўга і на казе не пад'едзеш. I як гэта ў мяне з языка сарвалася? Не хацеў жа я.

Але хацеў ці не хацеў, а справа зроблена. Пагаварылі, называецца. Вось ужо другі дзень мой сябра ходзіць з казённым тварам, стараецца мяне не заўважаць, а калі ўжо без гэтага не абысціся, то звяртаецца да мяне толькі па прозвішчу і на «вы», як і належыць па вайсковаму статуту:

— Сырцоў, папраўце пасцель!

Або:

— Таварыш выхаванец, перашыйце падкаўнерык.

Неяк забыўшыся, што мы з ім у контрах, я нешта хацеў спытаць у яго па-прыяцельску, дык ён мне:

— Адставіць размовы!

I глядзець у мой бок не хоча, парсюк у лычках. I я таксама пакрыўдзіўся і пачаў як мог яму назаляць. Нашы камандзіры аддзяленняў не любяць, калі іх называюць яфрэйтарамі, і ў хаду часцей зварот «таварыш камандзір». Гэта іх нібыта ўзвышае. Дык вось гэтым самым яфрэйтарствам я Саньку і дапякаю, дзе трэба і не трэба, пытаюся ў яго дазволу:

— Таварыш яфрэйтар, дазвольце ісці мыцца.

А памыўшыся, зноў:

— Дазвольце апрануць гімнасцёрку, таварыш яфрэйтар.

Хлопцы пасмейваюцца і не разумеюць, чаму гэта я, як Яны гавораць, выпендрываюся. А гэта я, між намі кажучы, трымаю хвост пісталетам. На душы кошкі скрабуць, а паказваць гэтага не хочацца. Няхай мой дарагі сябручок так нос не задзірае. Абыдуся. Так яно і ідзе ўжо трэці дзень.

А тайна прапажы мыла пакуль што так і застаецца тайнай. У адзіночку я супраць паразіта Сцёпкі, які пры кожным зручным выпадку не прамінае мне падміргнуць, так нічога талковага і не прыдумаў, ні на што не адважыўся і рады, што хоць пакуль ціха. Усе мае надзеі цяпер толькі на нашага Шэрлака Холмса — Колю Кузняцова, на яго дэдуктыўны метад. Калі той метад дасць вынікі, то ўсё само сабой адпадзе: злодзей будзе выкрыты, Сцёпкава падазрэнне развеецца, а сам ён атрымае ад мяне ў лыч, калі ён нават і невінаваты. Каб не плявузгаў абы-чаго. I зраблю я гэта пры ўсіх. I без Санькі спраўлюся. А Санька няхай беражэ аўтарытэт. Я з ім болыш і ў звальненне да дзяўчат не пайду.

Вакол Колі ўвесь час круцяцца Мішка-цыркач і Генацвале. А гэта ўжо само па сабе гаворыць, што ў нашага сышчыка няма да іх і ценю падазрэння, і я цішком ім зайздрошчу.

Яны паводзяць сябе вельмі таямніча, страшэнна сакрэтнічаюць, а пра што шэпчуцца, не дапытаешся ні за якія пернікі. Пра каго ў іх там ідзе гаворка, можна здагадацца хіба па позірках. Не вельмі дасведчыя ў вышуку, Колевы прыбліжаныя не-не ды і паглядваюць на таго, хто ў іх на языку. Але гэта трэба быць ужо вельмі пільным, каб здагадацца.

Апрача таго, Коля з тыдзень чапляўся да ўсіх з рознымі недарэчнымі пытаннямі, ці, як гавораць хлопцы, вераломнічаў. Але ўся яго вераломнасць, усе яго хітрыкі шытыя белымі ніткамі. Яны толькі нас злавалі.

Першы, да каго прычапіўся Кузняцоў, быў Піскля. Той у звальненні хадзіў у кіно і ўжо, можа, разоў пяць расказваў пра кінакарціну. I не толькі расказваў, а і паказваў на жэстах: гэты таго — бух, той гэтага трах! Здорава было! Дык нашаму Шэрлаку гэтага мала.

— А як называецца кінатэатр? — дапытваецца ён.

— Ну гэтага... як яго... Луначарскага,— не адчуваючы каверзы, спакойна адказаў Косцік.

— А фільм?

Тут ужо допытны пакрыўдзіўся на следчага:

— «Гуляла каза па Дунаю» — во як! Правяральшчык мне знайшоўся.

Неўзабаве на Колю ўжо крыўдзілася паўузвода, і асабліва — я: мяне ён абразіў да глыбіні душы. У мяне ён як бы між іншым хацеў даведацца, ці далека тут базар і па чым там мыла.

— Па грашах, а хто пытае — па вушах,— адрэзаў я бабульчыным прыслоўем, мяркуючы так, што гэта камень у мой агарод. Цяпер я не хачу нават і размаўляць з той сталічнай цацай.

Быў момант, калі наша следчая троица ўжо амаль святкавала перамогу. Ей трапіліся дзве-тры паперкі ад цукерак, і было высветлена, што іх гаспадаром з'яўляецца Лёва Белкін. Здавалася б, якое дачыненне маюць тыя паперкі да прапажы мыла? Аказваецца, самае непасрэднае.

Многія думаюць, што Лёва — адпеты скупердзяй. Амаль кожную раніцу, перад тым як апрануць гімнасцёрку, ён дастае з нагруднай кішэні атрыманае нядаўна грашовае забеспячэнне і старанна яго пералічвае. Тады хлопцы насмешліва пераміргваюцца паміж сабой: скупы рыцар. Гэта ж падумаць толькі, нават у звальненні, нягледзячы на гарадскія спакусы, не патраціў ні капейкі. Мала таго, апошнім часам ён робіць спробы выгадна прадаць каму-небудзь з нас сваю трафейную аўтаручку, якой так ганарыцца. Ён прапаноўваў яе і мне, пераконваў, што толькі па знаёмству аддае за бясцэнак. I я купіў бы, але больш палавіны свайго жалавання прашыкаваў на падушачках.

3-за таго, што над ім смяюцца, Лёва не хоча ні перад кім апраўдвацца, закусіў цуглі і пакрыўджана маўчыць. А што ім гаварыць? Хіба яны зразумеюць? Ён паглядзіць, ці будуць яны смяяцца потым, калі ў яго будзе фотаапарат. Яны будуць тады бегаць следам і канькаць: «Лёва, зрабі з мяне фота». Дулю ім з макам.

Фотаапарат — гэта той пункцік, на якім Лёва звіхнуўся. Тут трэба сродкі. Звычайную ламачыну, ужо не кажучы пра трафейную, з рук на таўкучцы не возьмеш менш як за пяцьсот рублёў. Лёва ведае, ён ужо некалі прыцэньваўся. Яшчэ на «гражданцы», у Магілёве. Можна і за бохан хлеба, але дзе яго возьмеш? Лішняга ў нас няма.

Па ўсіх падліках патрэбная сума ў Лёвы набярэцца праз год без малога. Гэта, канешне, калі ён будзе эканомным чалавекам і зберажэ ўсё да капейкі сваё грашовае забеспячэнне, калі ўдасца выцыганіць у бацькоў яшчэ якую сотню-паўсотні і калі за аўтаручку дадуць добрую цану.

Усё гэта я ведаю, таму што Лёва мяне чамусьці ўпадабаў, ён мне давярае і дзеліцца са мной сваімі ружовымі, амаль нязбыўнымі планамі. Больш таго — ён абяцае мяне потым, калі ў яго будзе апарат, бясплатна фатаграфаваць. Мне не давядзецца канькаць: «Лёва, зрабі з мяне фота».

I трэба ж было, каб з кішэні штаноў разам з насоўкай выцягнулася ў народу на вачах паперка ад цукеркі і ўпала на падлогу.

— Лёва, ты казну згубіў,— пажартаваў нехта з хлопцаў, а нашы следчыя тут як тут. Ім абы зачапіцца. Яны мнагазначна пераглянуліся і пачалі шаптацца. I іх можна зразумець: чалавек сваіх грошай не траціць, дык за што ж ён купляе такія дарагія цукеркі? Аж у паперках.

Так на Лёву лёг цень падазрэння, і гэта вывела яго з сябе. Ён проста месца не знаходзіць.

— Сышчыкі-прышчыкі. Знайшлі вялікую тайну. Чалавека пачаставалі, дык яны прыдраліся.

— Хто? Можа, камбат?

— Пры чым тут камбат? — адбіваецца Лёва.— Пачаставала мая баба.

I так гэта па-мужчынску грубавата, так важна было сказана — «мая баба»,— што многія паглядзелі на Лёву з ухвалой. Над закаханымі без памяці ў нас хоць і дабрадушна, але пасмейваюцца. Іх называюць пакутнікамі. Пра мяне дык было сказана: так гінуць на вачах лепшыя людзі. А сапраўдны сэрцаед пакутаваць з-за кахання не будзе. Мая баба — і ўсё тут. Гэта па-гусарску. Вось чаму на Лёву паглядзелі з павагай.

Але знайшліся і прыхільнікі чыстага кахання, такія, напрыклад, як Коля Кузняцоў. На ўсё гэта ён з насмешкай сказаў:

— Таксама мне рыцар! Вучылі-вучылі яго этыкету, а ён дзявочыя цукеркі лопае, замест таго каб самому рабіць прэзенты.

— А што тут такога? — не здаўся Лёва.— Яе мама — дырэктар магазіна. Не збяднее.

На гэтым пытанне наконт паперак было вычарпана. Лёву паверылі, хоць за ім і канчаткова замацаваўся аўтарытэт карыслівага чалавека. Сказана, скупы рыцар. Усё ў яго з разлікам, нават знаёмства з дзяўчатамі. I тут ён шукае выгаду.

Але і вера ў здольнасці ўзводнага Шэрлака Холмса таксама паліняла. Цяпер народ глядзіць на яго разам з памагатымі даволі скептычна: чым бы дзіця ні цешылася... Нехта ім нават прыдумаў агульную мянушку — мыльная камісія.

А дні не ідуць, а бягуць па цвёрдаму, пісанаму вайсковаму парадку. Здаецца, толькі што былі пад'ём і фізо, і вось ужо — вячэрняя паверка і адбой. Праляцеў дзень, нібы кур'ерскі поезд.

Вось ужо нам прачыталі і генеральскі загад аб пераходзе на зімовую форму адзення. Зноў мітусня і хваляванне: старшыня-каптэнармус нам выдае новыя шынялі і шапкі. Зноў клопаты, як нам перайначыць звычайныя аблавухі ў прыстойныя «ківеры». I паперайначвалі: дзе трэба распаролі, куды трэба ўставілі нягнуткі кардон — заглядзенне. Праўда, цяпер аблавух не падвяжаш матузкамі пад барадой, але ў гэтым няма і неабходнасці. Хто гэта з нас будзе хадзіць целяпнём. Холад — не холад, а «ківер» на макушцы, няхай вушы хоць паадпадаюць. I крыху набакір. Малайца і соплі грэюць, як сказала б мая бабка.

3 Санькам мы паспелі памірыцца, і цяпер нас зноў вадой не разальеш. Ды цяпер яго, калі б і хацеў, не падкусіш яфрэйтарствам. Напярэдадні Кастрычніка ўсім нашым камандзірам аддзяленняў прысвоілі званне малодшага сяржанта. Цяпер мы іх успрымаем усур'ёз, і насмешкі скончыліся. Жарт Мішкі-цыркача наконт таго, што малодшы сяржант — гэта ўсяго двойчы яфрэйтар, поспехаў не меў. Ён пражыў усяго адну раніцу і заглух.

У чарговым звальненні мы з Санькам, не чакаючы, пакуль Лёва прыдбае фотаапарат, паспелі сфатаграфавацца ў новых шынялях і «ківерах». I так гэта ўдала ў нас атрымалася, што, пакуль мы схадзілі да сваіх дзяўчат на спатканне, партрэты былі ўжо гатовы. Атрымаліся мы прыгажэйшымі, чым нават разлічвалі. Хлопцы такія — не скажаш, што з Падлюбіч,— не пазнаць. Такі партрэт не сорамна паслаць каму хочаш, не толькі Каці.

А на Кастрычніцкае свята зноў быў парад, толькі ўжо не ў вучылішчы, а на галоўнай гарадской плошчы. Я нават не думаў, што так радасна ісці ў страі, калі на цябе глядзіць народ. Адчуваеш сябе чорт ведае якім важным. А ў дзяўчат на тратуары аж вочкі бегаюць: столькі прыгажуноў, і ўсе — віцязі. Толькі мы суровыя і непрыступныя, не кожную яшчэ ўдастоім і позіркам. Няхай сохнуць.

За ўсімі гэтымі падзеямі прапажа нейкага там мыла забылася сама па сабе. Пра тое, што ёсць ва ўзводзе сярод нас чалавек, нячысты на руку, перасталі і думаць. Ды і ён сябе больш ніяк не праяўляе. Ці проста затаіўся, ці адумаўся і перавыхаваўся, хто ж яго ведае? Сцёпку ўжо, відаць, знадаела мне падміргваць, ён больш не чапляецца да мяне. Камбат маўчыць, і я гэтаму рады. Няхай яна, як казала дома бабка, ідзе на сухі лес, такая струшня.

А тут і яшчэ ў мяне радасць: маё старанне па службе і ў вучобе заўважыла начальства. Да гэтага ў нарад мяне назначалі толькі днявальным. А ў днявальнага ж вядома якія абавязкі: то прыбірай, то падмятай, то пыл выцірай, то стой слупам каля тумбачкі і пільнуй начальства, каб не празяваць з камандай «смірна». А дзяжурны тым часам ходзіць ды толькі распараджаецца. Чаму не лафа?

Дык вось і мяне назначылі дзяжурным па батарэі. Расцём! У маім падначаленні трое днявальных: Пiскля, Генацвале і Расошка-мастак. Мая ўлада над імі, няхай хоць і на адны суткі,— не гульня на падлюбскім поплаве ў чапаеўцаў, а ўлада сапраўдная, законная, яна належыць мне па вайсковаму статуту. Няхай скажуць супраць хоць слова. Я здыму з іх стружку, аж пішчаць будуць. Мне трэба такі парадак, каб нідзе — ні парушыны, а каля тумбачкі — у струну. Ад адчування такой улады ў мяне на душы патака. А ў Санькі ж такая слодыч, мабыць, кожны дзень. Цяпер я яго разумею: тут трэба несці службу, а гэтыя ёлупні цара нябеснага толькі і глядзяць, каб сачкануць.

Няма чаго і казаць, што я з усёй сілы стараюся апраўдаць высокі давер, днявальным не даю і прысесці. Я знаходжу пыл і бруд там, дзе яго ніхто да мяне не знаходзіў: за ўмывальнікамі, пад тумбачкамі, за партрэтамі палкаводцаў. У самых глухіх кутках казармы патрывожаны зімовы сон усіх батарэйных павукоў.

Хлопцы ўжо на мяне касавурацца. Я ведаю, што яны думаюць — кар'ерыст. Ім напляваць, што ў арміі павінен быць парадак. Пасля адбою я і пікнуць не даў батарэі, адразу паклаў канец розным шэптам і перашэптам, хіханькам і хаханькам. У мяне мусіў маўчаць нават Коля Кузняцоў, які звычайна да апоўначы дурыць галаву суседзям прыгодамі розных там мантэкрыстаў і гусараў.

— Ну і цэрбер,— сказаў нехта з цемры на гэта. Шкада толькі, што я не пазнаў голасу. Ну і прыструніў бы!

Нарэшце, стомлены ад службовай стараннасці, я лёг адпачыць, разоў пяць перад гэтым загадаўшы днявальнаму, каб будзіў у выпадку чаго. Цяжкая ты, ноша ўлады. Нават засынаючы, я думаю, як раніцай больш удала адрапартаваць падпалкоўніку пра свае дзяжурства. Ох і любіць Маятнік, каб яму рапартавалі гучна, выразна і камандзірскім голасам. А як толькі разгубішся, пачне ківацца і завядзе сваё алілуя:

— Што? Не абедаў? Паўтары яшчэ раз, мямля!

Сон у мяне быў неспакойны, перарывісты, але і той патрывожылі сярод ночы. Мне сама пачала трызніцца якаясь бязглуздзіца: быццам бабка затачылася нейкім чынам у строй батарэі, мне сорамна з-за яе вясковых рызманоў, я хачу яе выгнаць са строю, а яна смяецца бяззубым ротам і не хоча выходзіць. I тут нехта далікатна пачаў тармасіць мяне за плячо:

— Таварыш дзяжурны. А, таварыш дзяжурны! Прачніцеся. Расплюшчыў я вочы — ні строю, ні бабкі — Піскля, прыклаўшы палец да вуснаў, папярэджвае, каб не было шуму:

— Т-с, ціха. Ён там!

— Хто? — не разумею я спрасонку.

— А чорт яго знае,— растлумачыў мне днявальны.

— Дзе?

— У падпалкоўніцкім кабінеце...

Я адразу скеміў: там злодзей. Трэба браць. А можа, і не проста злодзей. Можа, каго-небудзь цікавяць нашы сакрэтныя дакументы, спісы афіцэрскага саставу, напрыклад, наш распарадак дня ці загады камбата. Тады гэта шпіён, а можа, яго правая рука.

— Будзі астатніх днявальных,— аддаў я Пiсклю загад, а сам рынуўся да дзвярэй батарэйнай канцылярыі, каб злачынец, пакуль мы тут шушукаемся, не змыўся. Я нават задаволены, што на маім дзяжурстве здарылася такое, і адчуваю сваю значнасць і выключнасць. Падумаць толькі: уся батарэя спіць і ў вус не дзьме, а я тут, можа, рызыкую і жыццём. Раніцай пра мяне, канешне, загавораць. Я не з тых разяў, што праспалі Чапаева.

За дзвярыма канцылярыі сапраўды чуваць нейкі шорах. У замочную шчыліну відаць святло. Шчыра кажучы, мне крыху страшнавата, ёсць невялікі нервовы калатун. Вельмі шкада, што нас, дзяжурных, нічым не ўзбройваюць. Дзяжурныя па вучылішчы афіцэры, не бойся, ходзяць з пісталетам, а тут бяры невядома каго голымі рукамі.

Калі днявальныя сабраліся ў мяне за спіной, я рашуча штурхнуў дзверы, але яны аказаліся закрытыя з сярэдзіны.

— Адкрывай! Дзяжурны! — прыгразіў я.

Шорах за дзвярыма сціх, а затым і патухла святло, але дзверы не адчыніліся. Праходзіць мінута-другая — ціха. Каб той гад праз акно не ўцёк. Праўда, яны на зіму забіты, устаўлены двайныя рамы і заклеены паперай. Дык можна шкло разбіць. Але мы на другім паверсе. Не так проста выскачыць: можна і ногі паламаць.

— Днявальныя, пад акно! — гучна загадаў я, каб зламыснік пачуў і зразумеў, што шляхі да адступлення ў яго адрэзаны, а сам пачаў зноў грукаць у дзверы.

Асада канцылярыі цягнулася мінут дзесяць. У рэшце рэшт злачынец зразумеў, што яму нявыкрутка, і адшчапіўся. Я пераступіў парог, уключыў святло і расчараваўся: ніякі гэта не шпіён. Гэта Сцёпка Рубцоў. Куды і падзелася яго нахабная самаўпэўненасць. Дрыжачымі рукамі ён спрабуе засунуць на месца шуфлядку пісьмовага стала, але тая перакасілася і не слухаецца. Ён такі разгублены, што не можа і слова сказаць.

— Што ты тут робіш? — сурова спытаў я, а ён бледны, нібы малако.

— Я гэта... папяросы хацеў,— нарэшце пралепятаў ён, а потым пачаў прасіцца: — Слухай, будзь корашам, не дакладвай. А? Ты ж — не фіскал. А?

Такім я сабе яго і ўяўляў, калі марыў пра дуэль, разгубленым і вартым жалю слімаком. Але цяпер радасці ў мяне чамусьці няма. Я таксама не ведаю, што мне рабіць. На душы паскудна, мне чамусьці сорамна, няёмка. Мяккае ўсё-такі сэрца, хоць бабуля і казала, што яно ў мяне каменнае.

Сцепку я адпусціў спаць, так нічога яму і не паабяцаўшы, а сам задумаўся. І думкі апанавалі мяне нялёгкія. Ну далажу я, дык выганяць жа гада з вучылішча. Куды ён потым дзенецца? Будзе, як кажа падпалкоўнік, чытаць у горадзе шыльды па складах. Форму адбяруць, пераапрануць у свае абноскі, і — шуруй, Вася, на ўсе чатыры! Жудасць.

Ды і дакладваць — не вельмі прыемная справа. Хоць ён і кіпця майго не варты, а ўсё ж аднакашнік. Чаго добрага, ва ўзводзе знойдуцца такія, што падумаюць, быццам я — фіскал. Няхай бы без мяне разбіраліся. Не хачу я той і славы.

Але і ўтаіць начное здарэнне не выпадае: глядзі, каб самому даражэй не абышлося. Дакажы потым, калі ўсё адкрыецца, што ты не аднаго з ім поля ягада. Скажуць, што хаўруснік. Ды і як гэта я ўтаю? А ў днявальных хіба языкоў няма?

I я далажыў. Калі падпалкоўнік прыйшоў на службу, батарэя ўжо вярнулася з фіззарадкі і ўмывалася. Не паспеў камбат пераступіць парог казармы, як я немым голасам залямантаваў каманду «смірна!». Прадуманы загадзя рапарт ільецца, нібы вывучаны на памяць верш.

— Таварыш палкоўнік! За час майго дзяжурства ў батарэі ніякіх здарэнняў не адбылося, апрача таго, што выхаванец Рубцоў, тайна прабраўшыся ў ваш кабінет, шнырыў у вашым стале!

Здаецца ж, так добра адрапартаваў, як гаворыцца, па ўсёй форме, а Маятнік незадаволены. Кіўнуўшыся некалькі разоў, ён яхідна спытаў:

— Як гэта тайна прабраўшыся? А днявальны спаў ці варон лавіў? Расцяпы!

Піскля, які якраз і падпільнаваў злачынца, аказаўся не менш красамоўным за мяне:

— Ніяк не! Каб не заснуць, я хадзіў у той час абмыцца халоднай вадой!

— I пакінуў свой пост, расцяпа!

А затым і пачалося:

— Рубцова да мяне!

Не прайшло і паўгадзіны:

— Сяржанта Яцука да падпалкоўніка!

Многіх у той дзень выклікалі ў канцылярыю батарэі. Выклікалі са сталоўкі, з заняткаў. Днявальныя насіліся ад казармы да вучэбнага корпуса, быццам фельд'егеры па загаду яго вялікасці. Не мінулі яны і маю асобу — таксама паклікалі. Падпалкоўніку, аказваецца, ужо вядома і пра мыла, якое ў нас прапала, і пра рэчавы мяшок, з якім я хадзіў у звальненне. Вось табе і закон — тайга.

Ну і горача было на тым камбацкім допыце. Я чырванеў там і бялеў, давялося нават слязу пусціць. Але ў рэшце рэшт камбат паверыў, і ўсё для мяне скончылася шчасліва.

А Сцёпка павучыўся з намі яшчэ ўсяго дзень. Затым яго выклікалі з урока, і калі пасля заняткаў мы прыйшлі ў казарму, то ўжо яго не заспелі. Але мне ён пакінуў развітальнае «бывай». На сваёй пасцелі я знайшоў паперу, на якой было паспешліва накрэмзана алоўкам: «Помні, кораш, мы з табой яшчэ сустрэнемся». Наслуханы пра замашкі жулікаў, я крыху сумеўся, але праз якую гадзіну і супакоіўся: Сцёпка з Растова, а я туды не збіраюся.

Між тым стала вядома, што ў кабінеце ён свіснуў не толькі папяросы, а і грошы, якія камбат чамусьці пакінуў у стале, што са сталоўкі зволена адна з кухарак. Ёй як быццам Сцёпка збыў мыла, а ў камбата прызнаўся. Словам, у сям'і не без вырадка. Быў такі і сярод нас. Не гусар. За што і паплаціўся.

А я цяпер самы вядомы ў батарэі чалавек. Праўда, хлопцы глядзяць на мяне розна: хто з павагай, а хто і з халадком. Не трэба было начальству дакладваць, выслужвацца: самі б разабраліся.

Знайшліся мне разумныя галовы. Няхай бы сталі на мае месца.

Не так проста нас падкаваць

Калі нам няма за што прачытаць мараль, а падпалкоўнік Асташэўскі ў гуморы, тады ён па-бацькоуску нас павучае. Перакатваючыся па звычцы з наскоў на абцасы і мнагазначна трымаючы перад сабой палец, ён не стамляецца нам паўтараць:

— 3 вучылішча вы павінны выйсці добра падкаванымі. Можаце быць упэўнены, што я пра гэта паклапачуся.

Тое ж самае талкуе нам і капiтан Захараў.

Помню, і генерал на Кастрычніцкім парадзе ў сваёй прамове перад строем таксама сказаў, што вучылішча — гэта кузня кадраў. Калі б дзядзька Пятро, наш вясковы каваль, паслухаў, у якой пашане тут яго рамяство, дык ад гонару і з людзьмі, мабыць, перастаў бы вітацца.

Бацькоўскія павучанні камбата нам знадаелі, і мы слухаем іх са скрытай пагардлівай усмешкай: зноў ён за свае. Затое калі застаёмся адны, даём волю жартам. Куды Маятніку супраць каптэнармуса?

Вось хто нас падкаваў не на словах, а на справе. I на ўсе, як гаворыцца, чатыры: па дзве падкоўкі на кожны чаравік. Адна — на абцас, другая — на насок. Ідзеш па бруку — толькі звон стаіць, а ў цемры і іскры ляцяць.

Канешне, афіцэры маюць на ўвазе не тыя падковы, што ёсць у капцёрцы яшчэ і ў запасе. Яны гнуць свае: вучоба і дысцыпліна, дысцыпліна і вучоба. Асабліва націскае камбат на Статут унутранай службы, пра які да вучылішча я і не падазраваў. Гэты статут, на думку падпалкоўніка, мы павінны ведаць назубок, ён павінен быць у нас у крыві, а ён — сядзіць ужо ў пячонках.

У крыві ў нас пакуль што «гражданка» з яе звычкамі і замашкамі. Лічы, што паўгода мінула, як мы носім пагоны, а яна з нас ніяк не выпетрываецца.

Адзін забывае, што ён не дома, і прапускае міма вушэй каманду «пад'ём». Але тут не разаспішся: ці таварышы пабудзяць, ці сяржант гаркне:

— Гэта табе не гражданка!

Другому ісці ў сталоўку строем — нож востры ў сэрца: так і хочацца прабегчыся зайцам. За гэта таксама не хваляць.

Але самая распаўсюджаная цывільная звычка — насіць рукі ў кішэнях. Тут начальства, калі ўбачыць, што ў цябе «рукі ў брукі», аж з сябе выходзіць. Справа дайшла да таго, што старшына Юрка Калдоба загадаў мне кішэні ў штанах зашыць. Так і хадзіў я на пацеху ўзводу без кішэняў цэлы тыдзень, пакуль не адвык.

Хоць Санька ўжо — малодшы сяржант, але і ў ім сядзіць яшчэ цывільны чалавек, шпак. Ён не можа пазбавіцца сваёй школьнай звычкі пісаць вершы. Наша стыхія цяпер — траекторыя палёту снарада, а ён, дурны, забівае сабе галаву рыфмамі.

Што Санька — паэт, ва ўзводзе пакуль што ведаюць мала: я ды яшчэ двое-трое хлопцаў, якія сядзяць у класе за суседнімі сталамі. Сам паэт, праўда, хацеў бы, каб яго дар быў наогул у сакрэце: піша ўкрадкі, засланяючыся ад чужога вока рукой, а напісанае хавае так, як падпольшчык лістоўкі.

Але шыла ў мяшку не ўтоіш. Нашы з Санькам суседзі не-не ды і паварочваюць галовы, каб то што-небудзь спытаць, то папрасіць сцірку, то памачыць пяро ў наша чарніла, як быццам яно тут смачнейшае. Ну, зразумела, і страляюць насмешлівымі вачыма па вершаваных радках.

3 чарнавікоў свае творы Санька перапісвае ў асобны сшытак. I бачу я, што пад кожным вершам ён піша яшчэ і адрас нашага вучылішча, і дату. Ці не думае ён, што тэта хто-небудзь калі-небудзь будзе вывучаць? Калі так, то гэта прадбачліва.

3 паэтаў, якіх мы праходзілі на уроках літаратуры, самы любімы ў Санькі — Лермантаў. Ён нават перамаляваў з падручніка яго партрэт у свой запаветны сшытак. Праўда, атрымалася не вельмі падобна, але па эпалетах мундзіра можна пазнаць, каго мастак меў на ўвазе.

Мне смешна на ўсё гэта глядзець: як жа — роднасныя душы. Той — паэт і афіцэр, і гэты — амаль што паэт і амаль што афіцэр. Высока хлопец бярэ!

Са сваім сшыткам Санька носіцца як з пісанай торбай ці як Лёва са сваёй «казной». У класе, калі аб'яўляюць перапынак, ён не забывае схаваць яго ў стол, а ў казарме — кладзе пад матрац. I чым больш Санька хаваецца, тым больш бярэ хлопцаў цікаўнасць, што там за сакрэт.

Слава да Санькі прыйшла нечакана. Праўда, прыйшла яна, як кажуць, не з таго боку і не такая, пра якую, я думаю, мараць паэты. Аднойчы на адным з перапынкаў у час самападрыхтоўкі, калі Санька адлучыўся з класа, Коля Кузняцоў выкраў яго запаветны сшытак. Як гэта здарылася, не бачыў і я.

Я ўбачыў гэта ўжо тады, калі Кузняцоў, заскочыўшы на табурэтку і трасучы Санькавай творчасцю над галавой, закрычаў:

— Увага! Увага, Панове гусары! Слухайце, здзіўляйцеся і ганарыцеся: мы дыхаем адным паветрам з геніем!

А потым, разгарнуўшы сшытак, пачаў уголас чытаць, працягнуўшы свабодную руку ў прастору:

— А. Макавей. «Элегія». Прысвячаецца С.

Хлопцы сцішыліся, а Піскля спытаў:

— А што гэта такое — элегія?

— Як што? Жыццё, і слёзы, і любоў,— не палез за словам у кішэню чытальнік.— Словам, ціхі смутак. I не задавай толькі такіх пытанняў выкладчыку літаратуры — схопіш двойку, турак.

I, адкінуўшы артыстычна галаву назад, ён пачаў шпарыць па Санькаваму сшытку:

Куды б мяне ваенны лёс ні кінуў — У дальні гарнізон ці ў нечаканы бой,— Мне не забыць цябе ні на хвіліну, Заўжды мне будзе сніцца вобраз твой!

Хлопцы заржалі на ўвесь клас, пасыпаліся воклічы:

— Во дае!

— Ну і ўлопаўся пііт!

— Акын!

А Мішка Цыганкоў, малітоўна склаўшы рукі, з пакутніцкім выглядам узняў вочы ў столь і шэпча:

— Ах, вобраз... ах, не забуду...

Мне трэба было заступіцца за Саньку, але я не паспеў: якраз на «вобразе» ён і з'явіўся ў клас сам і адразу рынуўся на дэкламатара, чырвоны і раз'юшаны. Магчыма, што дайшло б і да рукапашнай, але Коля аддаў «элегію» без супраціўлення.

— Здаюся,— міралюбна сказаў ён і падняў руку ўгору.

Наступіла няёмкае агульнае маўчанне.

Каб разрадзіць атмасферу, Мішка Цыганкоў паспрабаваў звесці ўсё на жарт. Ён заклаў рукі пад папругу, захістаўся, як гэта робіць падпалкоўнік Асташэўскі, і падпалкоўніцкім голасам загаварыў:

— Таварыш Макавей, вы павінны выйсці са сцен вучылішча добра падкаванымі, а вы займаецеся чорт ведае чым!

Гэта было вельмі смешна, але Санька жарт не ўспрыняў.

— Заткніся, цыркач,— сурова адрэзаў ён і хмуры сеў на свае месца, пры гэтым сшытак дэманстратыўна адкрыта паклаў на стол.

— Фу-ты ну-ты — пііт! — насмешліва кінуў на гэта Мішка.

3 гэтага часу такая мянушка за Санькам і замацавалася. А калі ўжо вельмі хочуць яго дапячы, тады называюць і зусім вершаплётам. Казаў жа я яму як чалавеку: плюнь ты на сваю паэзію. Дык не, хоць кол на галаве чашы. Нават цяпер, пасля агульнага асмяяння «элегіі», ён не заракаецца і крэмзае свае рыфмы на розных чарнавіках і прамакатках. Праўда, свой сшытак ужо схаваў так, што і я не ведаю, дзе ён.

Доўга і мужна пераносіў Санька насмешкі, адбіваўся ад цікаўных, калі тыя прыставалі з роспытамі, што гэта за таямнічая С, вобраз якой яму сніцца. Чапляліся і да мяне, бо я гэта павінен ведаць. Ага, трымай кішэню — так і скажу, што гэта Соня-Кучараўка. Можа, ім захочацца ведаць, чый вобраз і мне сніцца?

I вось мы самі таго не заўважылі, як дажылі да свайго свята — Дня Савецкай Арміі. У гэты дзень нам адмянілі заняткі. У гэты дзень у нас быў святочны абед — макароны па-флоцку і па дзве порцыі фруктовага кісялю. А ўвечары, начысціўшы гузікі і спражкі, мы пайшлі ў клуб на канцэрт.

Спачатку наш Баця — сам генерал — выступіў з прамовай. Вельмі было прыемна слухаць, як ён гаварыў, што на нас спадзяецца народ, што мы цяпер — яго абаронцы. Між іншым, ён пахваліў і нашу батарэю. Падпалкоўнік Асташэўскі пры гэтым, седзячы за чырвоным сталом прэзідыума, расправіў плечы і горда павёў галавой. I мы таксама з ганарком пачалі аглядвацца на старшакурснікаў. З'елі? А то ўсё — салагі ды салагі.

Пасля генерала на сцэну нечакана выйшаў наш выкладчык літаратуры маёр Казлоўскі і сказаў нечаканыя словы:

— Аб'яўляюцца вынікі літаратурнага конкурсу, прысвечанага Дню Савецкай Арміі! Першае месца падзялілі выхаванец выпускнога курса Маеўскі і выхаванец першага курса Макавей!

Усё вучылішча запляскала ў далоні, і генерал таксама, а наша батарэя закруціла галовамі, шукаючы вачыма Саньку.

Тым часам маёра Казлоўскага змяніў на сцэне першы з паэтаў, незнаемы мне старшакурснік Маеўскі, і пачаў чытаць не што-небудзь, а... паэму. Чытаў ён бадзёра, гучна і складна, падмацоўваючы словы энергічнымі жэстамі. Адразу відаць — зух — і не першы раз пажынае лаўры. Аказваецца, яго ўсе тут ведаюць: па зале пайшоў шэпт:

— Ну, дык гэта ж Маеўскі.

Чаго-чаго толькі не было ў той паэме: і залп «Аўроры», і чырвоныя сцягі, прабітыя кулямі, і тачанкі, і танкі, і вераломныя ворагі, і наш суровы поступ. I ўсё ў склад, усё ў лад. Ну, думаю, чаго ж ужо наплёў Санька, што не паддаўся гэтаму Маеўскаму і таксама заняў першае месца? Здаецца ж, ужо нічога такога гераічнага і няма, чаго б не памянуў гэты паэт.

I вось Санька на сцэне. «Смялей!» — хочацца крыкнуць мне, бо хлопец зусім разгубіўся, пачырванеў, не ведае, куды дзець рукі, бездапаможна азіраецца на маёра Казлоўскага, і той яго жэстам супакойвае.

Нарэшце-такі ён набраўся духу і не сваім голасам абвясціў:

— «Рускі штык»!

— Гучней! — крыкнулі з задніх радоў.

— «Рускі штык»! — па-дзявоцку тонка пралямантаваў бедны паэт і ўжо не спыніўся, пакуль і не скончыўся яго твор.

А скончыўся ён хутка, таму што гэта была не паэма, а ўсяго кароткі верш.

Рускі штык. Яго спазнаў Радзімы нашай люты вораг. Яго Сувораў гартаваў...

Памянуўшы яшчэ Кутузава і маршала Жукава, Санька заклікаў нас «сухім трымаць заўсёды порах» і на гэтым змоўк. Я спалохаўся, што ён забыўся, як яно ў яго далей, але гэта было ўжо ўсё, канец.

Па-мойму, Саньку вучылішча апладзіравала яшчэ гучней, чым Маеўскаму, асабліва наша батарэя. А затым генерал уручыў яму цэлы стос кніг і паціснуў руку.

Вось як яно бывае: я думаў, што вершы нам у артылерыі не трэба, а тут генерал за іх падарункі дае і цісне рукі.

Калі шчаслівы Санька сеў побач са мной на сваё месца, усе пацягнуліся да кніг, усім захацелася на іх паглядзець. А і ёсць на што: «Аповесць пра сапраўднага чалавека» і два таўшчэзныя тамы Пушкіна. А галоўнае — усе яны з генеральскім подпісам і пячаткай.

Канцэрт таксама быў цікавы. Зводны хор вучылішча так спяваў «непобедимая и легендарная», што ў клубе дрыжалі шыбы. Медсястра Люся тонкім голасам выводзіла «Синий платочек». Але па-сапраўднаму развесяліў усё вучылішча наш Мішка Цыганкоў. Ён моўчкі, без адзінага слова паказаў, як рыбак рыбу вудзіць, і ўсе браліся за жываты. А генерал нават слёзы выціраў хусцінкай. Пра Саньку ў той момант усе быццам і забылі.

Але перад адбоем у казарме ў нас толькі размоў было, што пра яго перамогу на конкурсе. Кніжкі з генеральскім подпісам хадзілі па руках. На іх устанавілася чарга — хто за кім будзе чытаць.

Цяпер Саньку зайздросцяць, хоць і не хочуць у гэтым прызнавацца. Сваю зайздрасць хлопцы хаваюць за жартамі:

— Ты, Сань, цяпер руку не мый, дай нам патрымацца пасля генерала.

А хоць:

— Жывём, мужыкі: у нас цяпер свой акын!

Так да Санькі прыйшло прызнанне. Цяпер у яго ўжо ёсць паклоннікі. Лёва Белкін, напрыклад, за ім хвастом ходзіць. Ён прыстае, каб Санька напісаў элегію і для яго Люды. Зразумела — ад імя Лёвы. Лёва тады сам падпішацца. Няхай дзяўчына думае, што і ён паэт. I хоць Санька пакуль што не згаджаецца, але, мне здаецца, Лёва яго даканае.

Ходзіць за Санькам і рэдактар нашай насценгазеты «Залп» Іван Расошка. Напісаць заметку нас не дапросішся, дык вось цяпер рэдактара выручае наш «акын». Расошка перапісвае яго творы друкаванымі літарамі, аздабляе іх сцягамі і артылерыйскімі эмблемамі, і атрымліваецца вельмі прыгожа — усім падабаецца. Нават капітан Захараў, прачытаўшы аднойчы Санькаву «Оду савецкай гаўбіцы», з адабрэннем хмыкнуў:

— Хм! Пясняр у стане воінаў.

Але на паэзіі свет клінам не сышоўся. Наступіў час, калі загаварылі і пра мяне, хоць я вершаў і не пішу.

У нас у вучылішчы выкладаюць тры замежныя мовы: англійскую, французскую і нямецкую. Кожны вывучае тую, якую пачаў у школе, на «гражданцы». У залежнасці ад гэтага так і мы падзелены: англічане, французы і немцы.

Нам, немцам, пашанцавала і не пашанцавала на выкладчыцу. Пашанцавала таму, што ей гадоў ужо, можа, столькі, колькі і маёй бабулі. Дык мая бабка яшчэ — ого! — можа трушком аббегчы ўсю вёску, ды і на агародзе, няхай ей бог дае здароўя, з капаніцай і з лапатай з ей яшчэ ці справішся. А гэтая, здаецца, дзьмухні — і паваліцца: сівая, рыхлая, заўсёды задыхаецца і добра-такі недабачвае. Яна носіць акуляры з такога тоўстага шкла, быццам дно ў бутэльцы.

Пры такой настаўніцы можна ў класе на галаве хадзіць. I калі мы не ходзім, дык толькі таму, што званне не дазваляе: усё-такі ў пагонах. I той жа Міцька Яцук можа цыкнуць — сяржант. А вось круціцца можна як хочаш, і мы круцімся, перапісваем адзін у аднаго, амаль уголас падказваем, амаль адкрыта карыстаемся шпаргалкамі, а то і проста робім глупства — гуляем у «марскі бой», крыжыкі-нулікі.

А не пашанцавала нам таму, што яна — натуральная немка, не з нашых, недзе там вывучаных у інстытуце,— Ірма Генрыхаўна. Тут ужо ей не схлусіш, не адкажаш прыблізна: мову ведае, як і мы сваю, і прыдзіраецца з-за кожнай дробязі. Калі б не яе слепата, сядзелі б мы на двойках.

Больш таго — яна хоча, каб мы гэтую мову палюбілі. За што? Наслухаліся мы яе ў вайну, дагэтуль у вушах стаіць. Іншы раз заплюшчыш на ўроку вочы, і паўстае перад табой які-небудзь фрыц у касцы. I хоць мы разумеем, што Ірма Генрыхаўна тут ні пры чым, усё адно гэта справы не мяняе. 3 любоўю да нямецкай мовы ў нас ва ўзводзе, як кажуць, туга.

Але наша немка не губляе веры і настойліва патрабуе, каб мы ведалі назубок верш пра нейкую русалку, ці, як гэта па-іхняму,— ларэляй.

— Вы толькі паслухайце, як гэта прыгожа гучыць,— ледзь не спявае яна ад захаплення:

Ich weib nicht, was soll es bedeuten, Das ich so traurig bin2.

Мы слухаем, але нашы душы глухія.

— Гэта ж вялікі Гейнэ!

Але і вялікі Гейнэ на нас не дзейнічае, не ідзе любоў — і ўсё тут. Чаго толькі Ірма Генрыхаўна дабілася, дык гэта таго, што замест першай мянушкі Гросмутэр (бабуля), яна атрымала новую — Ларэляй.

Вядома, што сапраўдныя русалкі, якія заманьваюць маладых рыбакоў у рачныя віры, усе да адной красуні неймавернай пекнаты, а наша Ірма сівая, з маршчыністым тварам, ужо слепаватая гросмутэр. У гэтым уся соль.

I вось надышоў час экзаменаў. Толькі цяпер усе спахапіліся: экзамен жа будзе прымаць не адна Ірма Генрыхаўна — камісія. Там, мабыць, на падказках і шпаргалках не выедзеш. Не ва ўсіх жа акуляры з бутэлечнага дна.

Ніводнага прадмета цяпер ніхто так не баіцца, як нямецкай мовы. I ўсе вінавацяць начальства: навошта нам далі гэтую Ларэляй? Гэта з-за яе мы зіму правалялі дурня.

Цяпер нямецкую граматыку не выпускаюць з рук, носяць яе нават у казарму, каб і там, калі выпадзе вольная хвіліна, хоць крыху «пашпрэхаць».

Але, на наша шчасце, камісія аказалася не вельмі суровая: сама Ірма Генрыхаўна і яшчэ такі ж, як і яна, боскі адуванчык. Толькі і розніцы, што без акуляраў. I хлопцы ажылі.

Першыя выйшлі з класа з даволі-такі высокімі адзнакамі. Але то былі самыя з нас падкаваныя, самыя зубрылы і ціхоні, якія паводзяць сябе нават на уроках Ларэляй цішэй травы. А такія смелыя, як я, ціснуцца пад дзвярыма і ахвотна прапускаюць паперад усіх, хто захоча.

Нарэшце надышоў і мой час. I тут мне шалёна пашанцавала. Выбіраючы экзаменацыйны білет, я неяк нязграбна правёў рукой па стале, і некалькі білетаў упалі на падлогу.

— О, mein, Got!3— спалохана ўсклікнула Ірма Генрыхаўна і, замест таго каб загадаць мне падабраць білеты, яна, мабыць, баючыся, каб я не выбраў там сабе лёгкі, кінулася рабіць тэта сама. А з ёй разам, мне на радасць, і яе памочніца. А стол застаўся без нагляду. Ну хто, скажыце, утрымаўся б тут ад спакусы і не выбраў у той момант, што душа пажадае?

I я выбраў. Праўда, ледзь не пагарэў. Калі экзаментаркі пачалі вылазіць з-пад стала, у маіх руках аказаліся два білеты. Лішні класці на стол было позна. Раздумваць ужо не было калі, і я склаў іх роўненька ў руцэ адзін пад адзін.

Экзамены пайшлі нібы па масле. Мала таго, што я сам адрапартаваў на «чатыры», дык лішні білет саслужыў яшчэ службу і хлопцам. Усё пайшло ланцужком: па майму лішняму білету што трэба падзубрыў Лёва, а свой потым перадаў Пісклю, Пiскля адказваў па Лёваваму, а свой перадаў Генацвале — і пайшло, і паехала. Шпараць хлопцы па-нямецку нібы рэпу грызуць.

Ірма Генрыхаўна толькі радуецца:

— Gut, Knabe, gut!4

Ёй і няўцям, чаму так раптам узнялася паспяховасць па яе прадмету: самыя тупіцы цягнуцца на «добра».

У той дзень я хадзіў у героях. Хлопцы цопалі мяне за плечы і хвалілі:

— Малайчына, выручыў!

Бяда толькі ў тым, што слава пра маю знаходлівасць надта далека разышлася, і на наступны дзень пасля заняткаў днявальны мяне выклікаў да камбата.

Я іду да яго з чыстым сумленнем, забыўшыся і думаць пра ўчарашні экзамен. Нават адрапартаваўшы аб сваім прыбыцці, не мог здагадацца, што ў таго на ўме.

Седзячы за сталом, падпалкоўнік Асташэўскі неяк яхідна на мяне паглядзеў і спытаў таксама яхідна:

— Ну, як поспехі?

— Добрыя,— насцярожыўся я.

— I па нямецкай?

Тут мая душа і пайшла пад лёд: няўжо знае, няўжо выдалі? Словам, чуе кошка, чыё сала з'ела. Але выгляду не падаў:

— I па нямецкай — «чатыры»...

— Ліпавыя! — крыкнуў ён і, падняўшыся з-за стала, пачаў хадзіць па канцылярыі. Я стаю ні жывы і ні мёртвы, паварочваю за ім галаву, раблю на яго раўненне.

Размова была доўгая і цяжкая. Дакладней кажучы, гаварыў толькі ён, а я слухаў, праглынуўшы язык, які я нядобры. Я — прайдоха і хлус. У мяне сумленне і не начавала. Я не варты таго, каб насіць пагоны. Я запляміў гонар батарэі. Падпалкоўнік яшчэ падумае, што са мной рабіць.

— Фокуснік,— заключыў ён і на гэтым, здаецца, выдыхнуўся. Але ненадоўга.

Вярнуўшыся за стол, ён загаварыў зноў, толькі ўжо больш спакойна:

— Як будзе па-нямецку «ёсць»?

— Іст,— не даў я маху.

— Вось і праспрагай мне гэта «іст», каб я паверыў тваёй чацвёрцы.

Ну што ж ён думае, я зусім ужо дурань неадукаваны? Ды гэтае яго «іст» у нас у зубах завязла. I, прыбадзёрыўшыся, я бойка пачаў:

— Іх бін!

I, як гэта часта бывае, ад хвалявання ў мяне раптам усё вылецела з галавы. У разгубленасці я не магу ўспомніць, як яно будзе далей. «Іх бін» — гэта значыць «я ёсць». «Ты» — па-нямецку будзе «ду». А як жа тут зменіцца іхняе праклятае «іст»?

— Ду... ду... — услых успамінаю я.

— Біна? — хітра прыжмурыў вочы падпалкоўнік, і я абрадаваўся падказцы:

— Ду біна!

I тут толькі схамянуўся:

— Не! Ду біст!

Але ўжо было позна: што трэба, падпалкоўнік уведаў.

— Вось што, ду-біна,— падбіў ён рахунак,— неўзабаве ўсе атрымаюць месячны водпуск і паедуць да бацькоў, а «ду»,— тут ён тыцнуў у мой бок пальцам,— будзеш сядзець у мяне ў казарме і зубрыць. Фокуснік! I запомні, ты ў мяне адсюль выйдзеш добра падкаваны.

Ох і зарэзаў мяне гэты Маятнік без нажа. I даліся яму гэтыя падковы!

Ударым маслам па хваробе!

Дзе куюць, дык там жа і гартуюць. Ці так Юрку Калдобе загадана, ці ён сам гэта прыдумаў, але нават у мароз і ў завею ён ганяе нас на фіззарадку без гімнасцёрак, у адных майках. Спачатку дрыжыкі бяруць, а потым і сапраўды не холадна — у казарму вяртаемся пад парай.

Затым ён становіцца ля дзвярэй умывальні і туды не пускае ўжо і ў майках, а адтуль — хто не памыўся да пояса. Я, карыстаючыся тым, што ён — мой зямляк, памкнуўся быў выйсці з умывальні з сухім жыватом, але і мяне не выпусціў. Як стаў старшыной, і на брычцы не пад'едзеш.

Нягледзячы на ўсё гэта, у батарэі рэдка хварэюць. Калі ў каго з носа і пацячэ, дык гэта лічыцца за шчасце. Тады можна пайсці ў лазарэт да Люсі. Яна памерае тэмпературу, і, калі бог дасць, можна атрымаць ад фіззарадкі вызваленне, а то і паваляцца дні тры ў лазарэтнай пасцелі. Ні табе пад'ёмаў, ні адбояў, ні камбата, ні сяржанта — любата.

А хто ўмее, у каго варыць мазгаўня, той і тыдзень можа там праляжаць. Для гэтага трэба толькі непрыкметна пацерці градуснік аб сукно — штаны там ці шынель. Тут у цябе тэмпература такая падскочыць, якую ты хочаш. Можна і без сукна абысціся — пастукаць градуснік пстрычкай. Толькі трэба знаць меру.

Наслухаўшыся пра гэтыя хітрасці, мне таксама аднойчы захацелася сачкануць ад заняткаў. Усе сачкуюць, а я што, рыжы? Пстрыкнуў па градусніку раз, пстрыкнуў другі, і калі Люся паглядзела, што яно ў мяне там паказвае, у яе ледзь вочы не палезлі на лоб. Тэмпература аказалася такая, што мяне ў самы раз было б ужо і пахаваць — усе сорак два, а далей шкалы не хапіла.

Люся пакратала мяккай далонькай мой лоб, міла ўсміхнулася і пачала выбіраць шпрыц. Я занепакоіўся:

— Гэта вы мне?

— А каму ж?

— Дык мне, можа, гэта... пілюлю.

— А можа, мне далажыць таварышу маёру медыцынскай службы?— пакінула нарэшце яна ў спакоі свае шпрыцы.

Тут я, зразумела, даў ходу.

Каму часцей за ўсё ўдаецца папесціцца ў лазарэце, дык гэта Мішку-цыркачу. Той як захоча сачкануць — і заўсёды без промаху.

Часты госць нашай медыцыны і Коля Кузняцоў. Гэтаму не трэба і махляваць. Гэты бярэ сваёй знешнасцю і гусарскім абыходжаннем. Люся ад яго, як кажуць хлопцы, без памяці. Варта Колю чыхнуць — і ў яго пасцельны рэжым.

Але апошнім часам зачасціў у лазарэт і Косцік Лямешка, наш Піскля. Ён і пабіў усе рэкорды па сачкаванню. Невядома, чым ён толькі бярэ, бо да спрытнасці рук, якой валодае Мішка Цыганкоў, яму далека, а да гусарскага выгляду і яшчэ далей. Піскля дробненькі, худзенькі, вастраносенькі, нібы сінічка. Яму не дапамагае і наш курсанцкі паёк. Не па кані корм. I вось глядзі ж ты — від на Мадрыд, а ўцёр нос і нашым сачкам-прафесіяналам.

Яго часта кладуць у лазарэт на тры-чатыры дні. А неўзабаве пачаў адлежвацца і па тыдню. Пасля апошняй лёжкі, вярнуўшыся ў казарму, Піскля ўсім на здзіўленне пачаў збірацца ў горад, чысціць гузікі, перашываць падкаўнерык. I гэта ў будні дзень. Зайздросна, канешне.

I асабліва зайздросна Колю Кузняцову: Піскля пойдзе ў горад з Люсяй. Яна павядзе яго ў гарнізонны шпіталь на абследаванне, бо наш медыцынскі маёр не можа сам у Косцевай хваробе разабрацца. Але тут нічога страшнага няма: у шпіталі яго не ўкусяць. Затое такая дарога. У суправаджэнні Люсі.

I хлопцы жартуюць.

— Піскля, лаві момант — завядзі яе ў рэстаран!

— Лёва, пазыч чалавеку грошай, не будзь жмотам!

У Лёвы капейкі не выпрасіш, але, разумеючы, што гэта жарт, ён храбрыцца:

— А што? Хоць тысячу!

Але з гэтага звальнення Косцік Лямешка ў батарэю не вярнуўся. На вячэрняй паверцы, калі старшына выгукнуў яго прозвішча, замест тоненькага, дзіцячага «я» мы пачулі сяржанцкі басок:

— Шпіталь!

Спачатку гэтаму ў нашым узводзе не прыдалі асаблівага значэння. Падумаеш, шпіталь. Людзі ў вайну траплялі туды ледзь жывыя, наскрозь прастрэленыя, і то вылечваліся. Вунь у нашага каптэнармуса рана на спіне, нібы плугам па ей прайшліся, і нічога, яшчэ які здаровы дзядзька: у лазні чорта з два яго ў парылцы пераседзіш. А ў Пісклі і прышчыка няма: што яму будзе?

Але мінуў тыдзень, мінуў другі, а ён усё лечыцца. I тут пайшла па ўзводу трывожная чутка: хвароба ў хлопца сур'ёзная. Коля Кузняцоў знарок схадзіў у лазарэт, пачараваў там крыху Люсю, і тая выдала тайну.

— Пацямненне на лёгкіх,— сказаў ён нам.

— Елкі зялёныя,— аж прысвіснуў наш сяржант Міцька Яцук,— дык гэта ж пахне керасінам!

— Гэта пахне чахоткай,— паправіў яго ўсёзнайка Коля, і на яго зашыкалі:

— Не каркай, знахар.

Тым не менш знахар не змоўк:

— Калі знойдуць палачкі Коха...

— Тады што?

— Тады будзе плоха,— у рыфму адказаў Коля.

Цяпер ва ўзводзе ніхто Пісклю не зайздросціць: так «сачкаваць» ніхто не хоча. Гэта табе не ручаіна пад носам, што сёння ёсць, а заўтра няма.

А жыццё ў батарэі ідзе як і ішло: пад'ём, загартоўка, вучоба. Дні бягуць. I раптам навіна: усім медыцынскі агляд. Загад генерала.

Гэты агляд мы звязваем з Косцевай хваробай і не хітруем, калі нас гады ў рады водзяць строем на ўколы. На гэты раз усе пайшлі пакорна, нібы авечкі. Няхай глядзяць, няхай і колюць, калі такія пірагі.

А дактароў у наш лазарэт наехала столькі, колькі я дагэтуль іх у гурце і не бачыў. Адны слухаюць цябе ў трубачку, другія лічаць зубы, трэція і чацвёртыя заглядваюць у нос, у вушы і яшчэ неўма куцы. Нас узважваюць, абмяраюць грудзі, мераюць рэйкай рост, даюць ціскаць нейкую блішчастую штуковіну, што паказвае моц нашых рук, прымушаюць дзьмухаць у гумавы шланг — хто больш выдзьме. Словам, усё так, як і тады, калі нас прымалі ў вучылішча, толькі яшчэ больш пільна.

Але нікога не забракавалі. Усё абышлося добра, калі не лічыць, што наш мастак Ваня Расошка крыху здрэйфіў і страціў пасля ўколу прытомнасць. Дык яно і не дзіва: укол быў нейкі трайны — адразу ад трох хвароб — і балючы, халера, трываць нельга. Мне і то давалі нюхаць нашатыр.

А яшчэ я здзівіў дактароў, калі мяне ўзважылі. Калі Люся сказала маёру медыцынскай службы, колькі я пацягнуў, той, зазірнуўшы ў медыцынскую картку, дзе былі запісаны мае ранейшыя кілаграмы, аж веры не даў.

— Не можа быць. Прыкінь яшчэ раз.

А потым і сам падышоў да вагаў, каб пераканацца на ўласныя вочы.

— Дзесяць кілаграмаў прыбаўкі,— усё яшчэ як бы сумнява-ючыся, сказаў ён доктарцы за суседнім сталом,— было сорак, а стала пяцьдзесят.

Доктарка з цікаўнасцю паглядзела на мяне паверх акуляраў і зазначыла:

— Чаго ж тут здзіўляцца? Значыць, прымалі яго сюды дыстрофікам.

Апошняе слова мяне так зацікавіла, што я яго запомніў і ў казарме спытаў у Кузняцова, што б гэта значыла?

— Здыхляк,— растлумачыў ён адным словам,— а табе навошта?

Тут я прыкусіў язык: яму зусім неабавязкова знаць, якім мяне сюды прымалі.

I чаму тут дактарам здзіўляцца? Хіба дома той харч, што тут? Будзеш здыхляком на нішчымнай бульбе, ды яшчэ і тая ўжадобку. А тут жыць можна, хоць нам і знадаела прасяная каша ды ячменная шрапнель, дык не макаронамі ж аднымі нас карміць, не паны.

Але ёсць у нашым пайку такое, на што ніхто не глядзіць раўнадушна, ад чаго ніхто не адмаўляецца — масла. Праўда, яго там столькі і даюць — на адзін раз лізнуць, але даюць штодзённа. А калі не масла, дык маргарын. Мне такія замены нават падабаюцца: маргарыну перападае паболей. Але гэта рэдка бывае.

Намазваючы скібкі, усе мы адчуваем сябе шчаслівымі. Ну каму, скажыце, яшчэ даюць масла? Салдатам не даюць, фабзайцам не даюць. А дзе вы бачылі, каб яго елі цывільныя людзі? Аднойчы, будучы ў звальненні, я пахваліўся гэтым бабцы, дык яна мяне папрасіла:

— Ты хоць пры Глыжку маўчы, яму, беднаму, і лыжка алею — свята.

Калі пра нас так клапоцяцца, значыць, мы таго варты, мы — абаронцы народа. Як кажа наш капітан, чым мы лепш ядзім, тым страшней імперыялізму.

3 гэтым маслам мне, як «развадзяшчаму», цэлая марока. Каб яго раздзяліць на порцыі, трэба вока ды вока і спрытная рука. Па першым часе, пакуль я не напрактыкаваўся, былі ў хлопцаў і крыўды. I тады нехта прапанаваў: няхай «развадзяшчы» бярэ сваю порцыю апошні. I гэта стала законам. Тут ужо хітры не хітры, а сабе болып не ўдзеліш.

Але цяпер я ў гэтай галіне — спец: парэжу як у аптэцы, можна не мераць і не важыць. Заканчваючы дзяльбу, я звычайна даю папярэднюю каманду:

— Не хапай, не хапай...

Вось хлопцы падрыхтаваліся, відэльцы напагатове, і гучыць каманда:

— Хапай!

Момант — і талерка пустая. Застаецца толькі паглядзець, што засталося на маю долю.

Вось чаму на Колю Кузняцова ўсе паглядзелі, як на ненармальнага, калі аднойчы перад пастраеннем на вячэру ён сабраў у казарме вакол сябе гурт і сказаў:

— Хлопцы, ёсць прапанова сёння масла не есці...

— Правільна! — прымаючы гэта за няўдалы жарт, не даў яму дагаварыць Мішка Цыганкоў.— Будзем пасціць, нібы манахі, адмовімся ад скаромнага...

— У яго тэмпература,— выказаў здагадку Лёва Белкін.

— Канчай, туркі! Дайце сказаць,— супакоіў Коля ўсхваляванае таварыства і ўзняў руку, просячы ўвагі: — Я прапаную масла не есці, а сабраць яго як болей і перадаць у шпіталь Пiсклю. Яму трэба харчавацца толькі маслам, тады пляма на лёгкіх знікне. А хто не згодзен — справа добраахвотная. Жмоты няхай лопаюць.

— А калі яго там сестры пажруць? — засумняваўся Лёва, але на яго так паглядзелі, што ён стушаваўся: — Ды я што? Я, як усе.

А ўсе — за. Якія тут могуць быць размовы, калі трэба таварыша ратаваць? Не ведаю, як у каго, а ў мяне аж на душы зрабілася лягчэй. Можна сказаць, што справа з Косцікавай хваробай вырашана: адкормім хлопца маслам — і ўсё тут. Якія плямы супраць масла ўстаяць?

Тое, што мы п'ём чай з нішчымным хлебам, за вячэрай не засталося незаўважаным. За суседнімі сталамі на нас глядзелі, як на дзівакоў, і паціскалі плячыма. Каб у нас адмовіцца ад ежы, трэба быць адважным. Быў ужо такі выпадак, калі адзін узвод не захацеў есці перасолены суп, дык справа дайшла да генерала. А як жа: тут забаставаць за сталом — гэта ўсё адно што не выканаць баявое задание. Надзвычайная падзея. Дома што? Не хочаш — не трэба, вельмі прасіць не будуць, можа, толькі ўедліва скажуць: губа тоўстая — кішка будзе тонкая. А з-за супу такое ўзнялося, што ўсе на цырлах хадзілі. Камандзір — выхавацель таго ўзвода і наш доктар, кажуць, атрымалі добры наганяй, а повара ледзь не звольнілі.

Дык то ж нейкі суп, а тут масла. Такога, відаць, нідзе не было, каб яго не елі. І папаўзлі чуткі ад стала да стала: бастуюць, абдурылі хлопцаў, абважылі. I правільна, што бастуюць, няма чаго нас дурыць.

А без нашага камбата, што без солі, нідзе не абыдзецца. Іншых камандзіраў батарэй рэдка пабачыш у сталоўцы, хіба толькі тады, калі яны дзяжураць па вучылішчы. Дык і то сходзяць на кухню разам з маёрам медыцынскай службы, здымуць з варыва пробу, як гэта належыць ім па статуту, і толькі іх і бачылі. А наш як жа — бацька родны, прыпрэцца і мазоліць вочы: праверыць, як хлеб нарэзаны, зазірне ў бачкі, у якіх разносяць першае па сталах, нават панюхае, чым адтуль пахне, возьме на выбар лыжку ці алюмініевы карэц, агледзіць з усіх бакоў. А калі мы «парубаем», пройдзе яшчэ міма сталоў: усё даедзена ці не?

Усе вольнанаёмныя, што працуюць на кухні, не любяць нашага камбата і баяцца страшэнным чынам. Я сам, калі адбываў тут на-рад, чуў, як яны бурчалі: зноў гэты хмыр прыпёрся.

Ды і нам не падабаецца абедаць ці вячэраць пад яго наглядам: ні павярніся лішні раз, ні зарагачы, бо ён стаіць дзе-небудзь збоку і ківаецца маятнікам, быццам кавалкі лічыць, колькі ты іх панёс у рот, быццам сочыць, ці добра ты разжаваў, ці правільна відэлец трымаеш, ці не парушаеш як-небудзь за ядой Статут унутранаи службы. За гэта яго ўсё вучылішча называе вечны дзяжурны па кухні.

Няма чаго і казаць, што ён таксама ўбачыў некранутае намі масла, і вось ужо — тут як тут, нібы з-пад зямлі вырас. Пастаяў, моўчкі паківаўся над сталом, узяў у рукі талерку, панюхаў, абвёў недаўменным позіркам кожнага з нас і раздражнёна спытаў:

— А гэта што за бунт на караблі? Сяржант, далажыць!

Санька падскочыў, нібы на спружыне:

— Гэта мы для Пісклі!

— Для каго?— не зразумеў падпалкоўнік, і пайшло, і паехала: — Што гэта яшчэ за мянушкі? Тут каровін статак ці басяцкая маліна?

Каб ведаў ён, як мы яго дражнім, не тое яшчэ заспяваў бы. А Санька тым часам, зразумеўшы, што даў маху, хуценька паправіўся:

— Для выхаванца Лямешкі ў шпіталь, таварыш падпалкоўнік.

Уцяміўшы, што тут бунтам не пахне, камбат збавіў тон і зноў абвёў нас вачыма, чамусьці ўздыхнуў і ўжо не вельмі ўпэўнена прагаварыў:

— Усё адно парушаеце. Усюды павінен быць парадак. У шпіталі яму даюць, што належыць... па норме. I ў казарме харч трымаць нельга. Разведзяце мне розных грызуноў і тараканаў.

I, ужо сабраўшыся ісці, загадаў, ткнуўшы пальцам у Саньку:

— Зойдзеце да мяне ў канцылярыю.

Яго загад мы зразумелі так: будзе нашаму аддзялённаму добрая прачуханка. Пры падначаленых камбат яго не захацеў распякаць, каб не падарваць Санькаў начальніцкі аўтарытэт: статут забараняе.

Нягледзячы на забарону, масла мы ўсё-такі аднеслі ў казарму. Праўда, і хаваліся, нібы кошка з крадзеным салам. Спачатку паставілі ў тумбачку да Пісклі. Не, ненадзейна. Гаспадара няма, яшчэ хто-небудзь адпалавініць, паласуецца. Перанеслі ў тумбачку да Генацвале: усім вядома, як ён чуйна спіць.

Масла ў цеплыні растала, распаўзлося па талерцы. Бог ведае, у чым і як яго несці цяпер у шпіталь. Выручыў нас, як заўсёды, каптэнармус Хамутоў. У таго знайшоўся салдацкі кацялок, а ў капцёрцы — надзейнае месца, дзе масла не знойдуць камбат і грызуны.

Пакуль насіліся з маслам як чорт з дудой і Санька прыйшоў ад камбата. Акружылі мы яго гуртком: што? як? ці вельмі нагарэла? А Санька загадкава гэтак і гаворыць:

— Ну, хлопцы, трымайцеся на нагах, не губляйце прытомнасць.

— Ды што такое? Не цягні ката за хвост?

— Во! — урачыста паказаў Санька цэлую жменю грошай, ды і не абы-якіх — адны дзясяткі.

— Няўжо Маятнік даў? — разгубіліся ўсе.

— Ён! — пацвердзіў Санька і, стаўшы ў позу, пачаў перадражніваць падпалкоўніка: — На вашу адказнасць, сяржант. Пойдзеце ў звальненне, паспрабуйце купіць мёду для выхаванца Лямешкі, а па прыбыцці даложыце. Ды не гандлюйцеся, як бабы. Паводзьце сябе дастойна.

— Ну, малато-о-к,— толькі і сказаў на гэта Мішка Цыганкоў, маючы на ўвазе камбата. А мы ўсе проста аслупянелі. Вось гэта нумар выкінуў наш Маятнік. Хто б мог падумаць, што і ў яго ёсць сэрца?

Калі Санька сказаў, што з ім дазволена пайсці да Косціка ў шпіталь і яшчэ чалавекам пяці, тут наогул закрычалі «ўра». Ды гэта ж не камбат, а золата. Хто сказаў, што ён зануда. Не, над намі абы-каго не паставяць.

За снеданнем масла ўжо не еў увесь узвод, а не толькі наша аддзяленне. I камбат, шпацыруючы міма сталоў, гэтага не заўважыў.

I вось мы на чале з Санькам крочым у горад. Мы — гэта я, Коля Кузняцоў, Толік Гецьман, Генацвале і Лёва з Магілёва. Лёва нясе кацялок з маслам і ўсю дарогу канькае:

— Хлопцы, ну давайце па чарзе.

3 намі збіраўся пайсці яшчэ і Ваня Расошка, але ў апошні момант пагарэў: перад звальненнем падпалкоўнік правяраў, ці добра мы прыбраліся, і вытурыў Расошку са строю з-за гімнасцёркі, запэцканай фарбай. Вядома — мастак.

Разжыцца мёдам можна толькі на базары, і толькі там мы зразумелі, што не простая гэта справа — купіць добры мёд. Калі б яго прадавалі толькі напагляд, дык яно хутчэй можна выбраць, а то ж даюць і лізнуць з уласнага пальца. А ён адзін за другі саладзейшы.

Пачалі мы выбар у барадатага дзядзькі. Першы, як камандзір, лізнуў Санька, паплямкаў губамі і зрабіў выгляд, што прыслухоўваецца да смаку. За Санькам — я. Соладка, аж горка. За мной — Коля. За Колем працягнуў да лыжкі палец Гецьман, але Гецьману, Лёву і Надару лізнуць ужо не ўдалося: дзядзька схамянуўся і прыбраў лыжку, пашкадаваў:

— Іш вы, купцы-малайцы. Так і будзеце ўсёй камандай? А ў кармане вош на аркане.

— На, глядзі,— паказаў пакрыўджаны Санька падпалкоўніцкія купюры,— яшчэ і цябе купім!

— Ды я што? Каштуйце, калі ласка,— адразу змяніў пласцінку скупы гандляр.

Лёва быў працягнуў свой палец, але хлопцы на яго цыкнулі. Мы ўжо ўзлаваліся.

I адразу, убачыўшы, што мы пры грашах, увесь мядовы люд ажывіўся:

— Бярыце ў мяне, таварышы ваенныя, добры мядок, ліпавы!

— Лугавы! Лугавы! 3 розных кветак!

— Калі ласка, грачнёвы!

Лёва, каб зноў не застацца з носам, дзе не пярэчаць, ліжа адзін і той жа мёд і па два разы. Ды і ўсе мы добра насаладзілі ў роце. А Санька — вопытны базарны жук. Мы з ім у свой час нямала шчаўем пагандлявалі і ведаем правіла: хочаш купіць выгадна — не хвалі тавар. I Санька не хваліць, моршчыцца, а гледзячы на яго — і мы.

Купілі мы мёд тады, калі ўжо не было ў каго выбіраць,— у апошняй за прылаўкам бабкі. Мёд у яе быў не саладзейшы, чым у іншых, але ж не заходзіць на другі круг, трэба і меру ведаць. Тут Санька не зморшчыўся, кіўнуў галавой: вось ён, маўляў, самы лепшы.

У палату да Косціка нас не пусцілі, але ён умудрыўся выйсці сам. На дварэ вясна, ужо сышоў снег, вакол шалеюць вераб'і, але ад ракі цягне сырым ветрам, і мы знайшлі пад сцяной будынка зацішны куток, дзе прыгравае сонца і дзе нас не знойдуць шпітальныя медсестры. На Косціку вялікі, не па росту, сіні бальнічны халат, з дарослай нагі тапачкі-шлёпанцы, і ў гэтых уборах ён здаецца нам яшчэ больш дробненькім і зусім няшчасным. Да таго ж ён прыкметна ў шпіталі пахудзеў, нос яшчэ больш завастрыўся, а пад вачыма сіне.

Пiскля нам абрадаваўся невядома як: горача ціснуў кожнаму рукі, шчасліва смяяўся, усіх нас хваліў:

— Ой, малайцы, што прыйшлі. Я ўжо зусім тут занудзіўся. Так хочацца ў батарэю, што ўзяў бы і ўцёк.

— Паспееш у батарэю,— суцешыў я яго і пажартаваў:— Пасачкуй крыху.

— Ага, пасачкуй,— уздыхнуў Косцік.— Кожны дзень уколы, пілюлі. Ну яго, такое сачкаванне.

Тут і хлопцы на мяне ўз'еліся:

— Ты скажаш таксама.

Нягледзячы на тое, што мы былі ў скрытым месцы, нагаварыцца нам не ўдалося. Толькі збольшага расказалі батарэйныя навіны, не паспелі яшчэ і ашаламіць яго маслам з мёдам, адкуль ні вазьміся — медыцынская сястра.

— Лямешка, гэта што за фокусы? — наляцела на Косціка яна.— Я ўжо з ног збілася, яго шукаючы, а ён тут прахалоджваецца. Марш у палату!

Мы паспрабавалі былі яе ўгаварыць, каб дазволіла Косціку пабыць з намі яшчэ, Коля-гусар адпусціў ей нават камплімент наконт цудоўнага характару, што быццам бачна па яе вачах, але нічога не дапамагло. Горш таго, яна накінулася і на нас, прыгразіла доктарам, каб мы не парушалі рэжым. Вось мымра!

Развітваючыся, Косцік раптам павесіў нос:

— Баюся, хлопцы, што справы мае кепскія.

Мы пачалі яго ўгаворваць, каб не браў у галаву, але ён безнадзейна махнуў рукой:

— Калі зноў рэнтген пакажа, могуць перавесці ў акруговы шпіталь, а хоць і зусім камісаваць.

I пайшоў, так больш і не аглянуўшыся. Па плячах, што ўздрыгвалі пад бальнічным халатам, можна было здагадацца, што ён заплакаў.

Цяпер кожную суботу наш узвод не есць масла, а ў нядзелю хто-небудзь адносіць яго ў шпіталь. Апрача нас, Косціку дапамагчы няма каму. Ён — дзетдомавец. Можа, нашы перадачы яму і дапамогуць, і пракляты рэнтген нічога не пакажа.

А мы ўжо не салаги

Экзамены прайшлі паспяхова. Я нават па хіміі чацвёрку нахімічыў. Нам прачыталі загад генерала аб пераводзе на другі курс, і цяпер мы — не салагі. Цяпер і нам можна глядзець на будучых першакурснікаў зверху ўніз. А яны ўжо ўюцца ля канцылярыі вучылішча, табуняцца на КПП — здаюць дакументы для паступлення. Ну і шпакі, глядзець смешна, такія яны палахлівыя, рахманыя, асабліва — дзярэўня. Я для іх — аўтарытэт, а Санька — яшчэ большы.

Збылася і мара Лёвы Белкіна: ён купіў-такі сабе патрыманы фотаапарат «Масква». У раскрытым выглядзе апарат уяўляе сабой чорны гармонік са шкляным вочкам на канцы — аб'ектывам.

Як і абяцаў, Лёва нас з Санькам сфатаграфаваў першых. Здымаліся мы каля гарматы, што стаіць на цэментаваным падмурку каля параднага пад'езда вучэбнага корпуса. Санька сеў на станіну і ссунуў пілотку набакір, а я, стоячы побач, паклаў яму руку на плячо, а ў зубы ўзяў афіцэрскі акурак з-пад «Казбека», спецыяльна знойдзены для такога ўрачыстага моманту. Няхай думаюць, што тут ужо і куру, і не абы-што. Праўда, за такі здымак ад камбата або ад каштана Захарава можа і нагарэць, бо курыць нам строга забаронена, яшчэ болып строга, чым у звычайнай школе. Але так прыгажэй. Без папяросы несамавіта.

Хоць Лёва раней на многіх ва узводзе і злаваўся, калі яго дражнілі скупым рыцарам з-за грошай, якія ён збіраў на сваю пакупку, але цяпер ягонае сэрца змякчылася, так што быў сфатаграфаваны і ўвесь узвод разам. Толькі вось узводная картка атрымалася такая, што трэба добра прыгледзецца, каб пазнаць, дзе на ей хто. Нейкая яна, быццам у тумане.

— Бой у Крыму, усё ў дыму,— сказаў на гэта Коля Кузняцоу. Наш фатограф і сам такога не чакаў і цяпер збянтэжана апраўдваўся, маўляў, яму папера такая трапілася.

А мы з Санькам атрымаліся нічога сабе — героі, і не ў такім ужо і тумане. Гэтае фота я абавязкова падару Каці: вельмі я тут сімпатычны. Няхай яе сяброўкі зайздросцяць. Не ў кожнай ёсць такі артылерыст.

Неўзабаве наступіла каманда складаць спісы з нашымі адрасамі — хто куды паедзе ў водпуск. Замітусілася батарэя, забегала, захвалявалася: цэлы год гэтага дня чакалі. Цяпер кожнаму хочацца запісацца першым, усе баяцца, каб нашы камандзіры чаго не наблыталі, усім хочацца хутчэй дамоў: Колю Кузняцову — у Маскву, Гецьману — у Рэпкі, Лёву — у Магілёў, Надару — у Грузію.

Адзін я спакойны і сумны. Спакойны таму, што мая хата блізка, мне не трэба выпісваць дакументы на дармавы воінскі білет, а сумны таму, што ці давядзецца мне ісці дамоў хоць пешкі. Камбат жа пагражаў трымаць мяне ўсё лета ў казарме, каб я вызубрыў нямецкую мову. А што, калі так і будзе?

I вось у разгар гэтай радаснай мітусні ў казарму, нібы з неба, упаў наш Пiскля.

— А вось ён і я! — звонка абвясціў ён аб сваім прышэсці. Гэта было так нечакана, што ўсе паглядзелі на яго, нібы на дзіва, нібы чалавек вярнуўся з таго свету. Чаго там граху таіць, некаторыя яго, між намі кажучы, ужо і спісалі.

— Ну як, што?— пасыпалася з усіх бакоў.

— Трывога была дарэмнай!— крыкнуў шчасліва Косцік.— Адбой! Старая прастуда.

Хлопцы закрычалі «ўра» і кінуліся гушкаць Пісклю на руках. I так ён ужо лётаў, што калі б у апошні момант не паспелі падхапіць, дык грымнуўся б аб жалезную спінку ложка. Было б тады з аднаго Пісклі двое.

Калі ўзвод угаманіўся, Надар Дадалішвілі, між іншым, у Косціка спытаў:

— Куды ў водпуск едзеш, дарагой?

Высветлілася, што, апрача дзетдома, Косціку ехаць няма куды. Але нічога, можна і ў дзетдом.

— Зачэм дзетдом? Паедзем у Грузію! — ажывіўся Надар і так пачаў запрашаць, так распісваць, што я і сам згадзіўся б там пабыць, калі б мне не трэба было ўсё-такі ў Падлюбічы. Падумаць толькі: і Надараў тата, і мама, і дзядуля Гурам, і бабуля Марыям там начэй не спяць — чакаюць Пісклю. А што ён там будзе есці! Вінаград, чабурэкі, а то і шашлык. Вах! Дарагі госць будзе наш Косцік у Грузіі.

— Згаджайся! — раяць яму хлопцы.

I Косцік згадзіўся.

Нарэшце вырашыўся і мой лес. Падпалкоўнік усё-такі мяне пакараў, але не так страшна, як гразіў. Усё лета сядзець у казарме і вывучаць нямецкую мову мне не давялося, а ўсяго двое сутак. Але што гэта былі за суткі? Кожны дзень — год. Там Санька ўжо ў Падлюбічах красуецца, а ты тут сядзі. Ды калі б жа проста сядзі, а то, калі ўсе раз'ехаліся, я і яшчэ двое такіх жа штрафнікоў пад камандаваннем старшыны-каптэнармуса разбіраем і выносім з казармы ложкі і розную іншую мэблю. Будзе рамонт. I ў гэтым наша шчасце. Апошні ложак вынеслі — няма дзе жыць — і нам аддалі адпускныя білеты.

I вось я дома. Бабка не ведае, куды мяне пасадзіць, і кожны раз пытае, што гатаваць — бульбу цэлую ці патаўчы. Бацька таксама глядзіць, нібы на карціну. Вельмі ён адабрае мяне ў вайсковай форме. Глыжка не здымае маёй пілоткі са сваей галавы. Не паспееш пакласці, ужо няма, на вуліцы.

А па вечарах — вядомая гісторыя. Толькі змеркнецца, ідуць дзяўчаты на пагулянку і, параўняўшыся з нашай хатай, пачынаюць пад самымі вокнамі:

Зачем ты в наш колхоз приехал, Зачем нарушил мой покой...

Бацька дзе-небудзь на двары яшчэ курыць перад сном, а бабка порацца па гаспадарцы: абірае бульбу на заўтра ці мые посуд. I тут яна не праміне, каб не сказаць:

— Ну во, вераб'і сцішыліся — канарэйкі пачалі. Гэта не твая так тонка выводзіць?

А затым і паспачувае:

— А гора дзеўкам, асабліва пераросткам. Колькі хлопцаў вайна забрала. Дык ты ўжо хоць не гуляй абы з кім. Яны цяпер ліпучыя.

— Сам знаю, з кім гуляць! — злуюся я на бабку.

Іншы вечар дзяўчаты дапякаюць мяне прыпеўкамі:

3 афіцэраў аж рагочуць Нашы куры на дварэ: Бульбы есць ужо не хочуць, Дай картошкі, дай пюрэ!

Выдумалі яны і такую:

Лейтэнанты, лейтэнанты Многа ганарацца. Без загаду камандзіра Цалаваць баяцца.

Папалі, як кажуць, пальцам у неба. Яшчэ пазаўчора я асмеліўся. Думаў, што Каця пасля гэтага пакрыўдзіцца і ўцячэ ў свой двор,— не, засталася.

На танцах адбыліся змены. Цяпер каля Скокавага двара, дзе дрынкае балалайка, таўчэцца ўжо наш Глыжка з такімі, як сам, а мы з Санькам і нашы дзяўчаты ходзім толькі на мост, што на шашы, дзе грае гармонік, куды дарога раней нам была заказана: праганялі.

Але і пад гармонік я позна не танцую. I не таму, што тут часцей за ўсё наярваюць «Сербіянку», а мне падавай цяпер «Падэспанец» ці танга. Ёсць у нас з Кацяй запаветнае месцейка, куды мы стараемся непрыкметна ад усіх хутчэй змыцца,— гэта лавачка пад вярбой каля Буслікавага двара, недалёка ад возера.

Цішыня. Веска спіць. На начной вадзе дарожка ад месяца. Мы з Кацяй марым. Вось стану я лейтэнантам, а яна настаўніцай. Тады...

Што будзе тады, пра гэта я і роднаму бацьку яшчэ не заікаюся. Ён жа можа і пасмяяцца. А ці не рана ты, скажа, думаеш пра сватоў?

Але гэта будзе. Усё, як мы задумалі, збудзецца.

Сяркоў, I. К.

С99 Мы з Санькам...: аповесці.— Мінск.: Мастацкая літаратура, 2015.— 477 с.

ISBN 978-985-02-1159-0.

Перевыданне шырока вядомых сярод юных чытачоў аповесцей Івана Сяркова «Мы з Санькам у тыле ворага», «Мы — хлопцы жывучыя», «Мы з Санькам — артылерысты...». Праўдзіва і цікава, з уласцівым аўтару гумарам расказваецца ў трох творах, сабраных пад адной вокладкай, аб пакручастых жыццёвых сцежках вясковых хлопцаў Івана Сырцова і Санькі Макавея.

УДК 821.161.3-93

ББК 84(4Беи)-44

Літаратурна-мастацкае выданне

Сяркоў Іван Кірэевіч

МЫ 3 САНЬКАМ...

Аповесці

Адказны за выпуск В. А. Шніп

Мастацкі рэдактар Б. А. Макаранка

Тэхнічны рэдактар Л. I. Астрэйка

Стылістычныя рэдактары Ю. В. Тыркіч, С. В. Умец, Н. В. Філіповіч

Падпісана да друку 12.08.2015. Фармат 60х90 1/16.

Папера афсетная. Гарнітура Minion Pro. Друк афсетны.

Умоўн. друк. арк. 30,00. Улік.-выд. арк. 29,11. Тыраж 2000 экз. Заказ 275.

Выдавецкае рэспубліканскае ўнітарнае прадпрыемства «Мастацкая літаратура»

Міністэрства інфармацыі Рэспублікі Беларусь.

Пасведчанне аб дзяржаўнай рэгістрацыі выдаўца, вытворцы, распаўсюджвальніка друкаваных выданняў № 1/5 ад 09.07.2013.

Пр. Пераможцаў, 11, 220004, Мінск.

; e-mail@maslit.by

ААТ «Паліграфкамбінат імя Я. Коласа».

Пасведчанне аб дзяржаўнай рэгістрацыі выдаўца, вытворцы, распаўсюджвальніка друкаваных выданняў № 2/3 ад 04.10.2013.

Вул. Каржанеўскага, 20, 220024, Мінск.

Примечания

1

КПП — кантрольна-прапускны пункт.

(обратно)

2

Я не ведаю, што гэта значыць, Чаму я такі сумны (ням.). (обратно)

3

О, божа мой! (ням.)

(обратно)

4

Добра, хлопчыкі, добра! (ням.)

(обратно)

Оглавление

Мы з Санькам — артылерысты...

  Шпакi

  Напярэдаднi штурму

  Вось табе i пагоны ў кiшэнi!

  Генералы ўсё могуць

  Баця i маятнiк

  Што за чын такi — каптэнармус?

  Служба — не дружба

  «Развiтанне славянкi»

  Батарэя цi казацкая вольнiца?

  Педант

  Дзядзькi i шкеты

  Этыкет i этыкетка

  Стомленае сонца

  «ЧэПэ»

  Усё таемнае становiцца яўным

  Не так проста нас падкаваць

  Ударым маслам па хваробе!

  А мы ўжо не салаги

  Fueled by Johannes Gensfleisch zur Laden zum Gutenberg