«Книга об Антихристе и о прочих действах иже при нем быти хотящих»

Книга об Антихристе и о прочих действах иже при нем быти хотящих (fb2) - Книга об Антихристе и о прочих действах иже при нем быти хотящих 1147K скачать: (fb2) - (epub) - (mobi) - Епископ Арсений Уральский (Швецов)

Епископ Арсений Уральский Книга об Антихристе и о прочих действах иже при нем быти хотящих

Издание подготовлено при участии Тверской старообрядческой общины храма святителя Николы Чудотворца в Москве

Епископ уральский и оренбургский Арсений (в миру – Онисим Васильевич Швецов) (1840–1908 гг.) – один из выдающихся деятелей старообрядчества. Труды епископа Арсения, среди которых – «Истинность старообрядствующей иерархии…»

«Оправдание старообрядствующей святой Христовой Церкви». «Показание всеобдержности двуперстного сложения.» «Книга об антихристе…». «Апология», являются классикой старообрядческой литературы.

Предисловие

Известно убо да будет хотящему прочитати книгу сию. Убо идеже в ней аще обретаются на краех страниц или внутри сицевыя знаки «», и те строки противу их разумей, яко они от божественнаго писания избрание. А идеже сих знаков на краех не обретается, то те строки от нас приложение, в той же разум божественнаго писания, яко да яснейши оный открыется. Ты же о сем да не весьма позазриши дерзости нашей, якоже и пристойно: понеже како убо не дерз будет сей, иже не имея богословных и философских глубочайших глаголов, иже не стяжавая риторских и грамматических беззазорных словес, пачеже аще не имый превысокаго богословнаго разума и духа пророческа, и начиная, и емляся тех, имже не у видел есть кончины. Сего ради то во извет полагаем, яко послушание паче имения благаго, упование же не посрамляет и любовь не отпадает, по апостолу: и сею в союз связуеми есмы яхомся повести сей, исполняюще прошение неких христолюбцев, иже усильно и многократно нас о сем просиша, еже бо объяснити разум о антихристе, занеже ныне мнози многочастне и многообразие о сем мудрствуют. Мы же на сие тех прошение с надеждею на Отца Небеснаго, немудрыя умудряюща и младенцы вразумляюща, покусихомся показати о сем постатейно в главизнах осьминадесяти, и в коейждо их свое последование содержати.

Однакоже не свое что взаконевающе, или утверждающе, но вся, яже зде глаголемая, писанием божественным сотверждаются. Сие бо опасно блюдохом, да не на паучине суемудреннаго коего мнения, яко на песце крепости и соотвержения непричастном, но на твердом камени святоотеческих писаний и праваго святых отец толкования, вся, яже зде писана суть, основание имут. Избрахом же и положихом зде от различных священных книг, ихже во время сие близ нас обрести возмогохом. Есть же убо и еще некия книги, которыя зело бы нужны к сей потребе, однако тех книг в настоящее время при нас не обретеся, а за краткостию времени, скорости ради сего писания, от негде за дальним разстоянием при себе имети не успели. Обаче же и в тех книгах не иное кое о сем лежит мудрование, но то же, еже и в сих, иже зде положишася: разве то было бы лучше, да яснейше оказалося оное мудрование, и вернейше свидетельство при многих послусех. Однако имущему ум можно есть и симиудовлетися: яко да при устех двою или триех свидетелех, рече Господь, станет всяк глагол (Мф., 18, 16). Зде же не два или не три свидетели священнии, но мнози суть, якоже книгу сию прочитав, обрящеши.

Еще же и о сем известно да будет, яко в силе священнаго писания многосугубы лежат святых отец наказания: тако и о антихристе во многих действах сугубообразны суть толкования, сиречь, по чувственному и по таинственному разумению. Обаче мы тое сказание зде не положихом, которое обретается в переносном иносказательном смысле, но токмо то показуем, которое имеет самосущественный разум и яве святыми отцы откровенный, ему же и сбытися чувственно подобает неотрочно в предыдущее время. А по таинственному смыслу – тайна уже деется беззакония, якоже рече апостол (2 Сол., 2, 7). И аще тогда во дни апостол уже деяшеся тайна беззаконию, то кольми паче и ныне деется, и потом деятися имать. И якоже деется тайна беззакония о антихристе мысленно по писанию, тако по святоотеческому явственному толкованию содеятися имать о нем и чувствственнол-таинственный и чувственный разум окончавающи. Таинственный же разум в Святом писании к сему приличествующий сицев есть: называется Христос солнцем, Церковь – луною, пророки – горами, апостоли – холмами, святители – звездами, мир – морем, учение – водами, или реками, и прочая многа подобна сим. И ащеубо преносная сказания мысленная не достоит отревати, то много паче существословная разумения долженствует приимати, яже святыми отцы явственне протолкованная: обаче таинственная преводне реченная писания таинственно и разумети надлежит, а чувственная чувственно и разсуждати потребно есть. Аще ли же кто таков обрящется, иже вся чувственная действа, хотящая быти, отвержет, и вознепщует, яко ничто, а мысленная и таинственная точию приимати будет, или мысленным сказанием чувственная закрывати и опровергати, или от иного паки писания ко иному преносити будет, прелагающи в другий разум, то таковый всячески заблудити имать и истины не познати, но отнюд обрящется святому писанию развратник и Богу противник, и, по святому Григорию Богослову, сонносудец (Соборник большой, слово второе на Пасху).

Сие же яко тако есть, покажется отчасти чрез малейший сей пример. Исаиею пророком глаголет Господь: «Небо Ми есть престол, земля же подножие ногам Моим» (Исаия, 66). Ин же пророк глаголет: «Покланяйтеся подножию ногу Его, яко свято есть» (псалом 98). Зри убо, подножие Божие сказуется земля: и земле ли велит другий пророк покланятися? Никакоже: что бо неистовства сего будет окаяннее! Видиши ли зде, до чего довести может таковый смысл, еже бы инаго разума писание взимати и ко иному преносити (якоже ныне нецыи творити обыкоша). Таковых же причин и подобных сим начасте в священном писании обрящется. Сего ради, аще и писанием утверждается, но не бывает истинно, понеже от инаго разума взято, и другой (разум) насилован бысть. Темже единаче всюду невозможно во един и тойже разум Святое писание приводити, аще и под тем же званием будет. Сице убо и о вышереченных разумети подобает, сиречь, идеже аще речется о солнце или луне, или море, или земле, или о ином чем таковом, то не всегда и не повсюду сия разумеются по таинственному смыслу, но разве аще где зело редко, всюду же паче по чувственному приемлются: сего ради всегда относити в духовный разум не безвредно есть. И о сих обрящеши пространнее во главе четвертой книги сея.

Еще же боголюбию твоему и о сем зде извещаем, тщаливейший читателю, аще обрящеши зде в книге сей напомяновены некия ереси или нововводства, да не соблазнився вознешцуеши, аки бы мы что от таковых оправдаем или похваляем, еже святии отцы не предаша. И сего ради предупредивше изъявляем, да не будет лжа сия на нас: ибо яже святии апостоли и святии отцы предаша и утвердиша, тая самая и мы прияти и утвердити тщимся, а еже они отринувше проклята, то все и мы отревающе проклинаем. С сими же и иную всякую неполезную вредительную новость, яже будет святоотеческому преданию противна, от великия даже до малыя, яко мерзость некую гнушающеся опровергаем. Писаны же зде оныя нововводства не яко их оправдующе, но яко они не суть антихрист, ниже печать его; о сем показующе и многими обстоятельствы изъявляюще, и сия вся Святым писанием утверждающе, якоже прочитав, узрети имаши.

Глава 1

Начало книги сей и изъявление, что есть речь сия «антихрист»

«Во свете живыи неприступнем, Иже сыи Сияние славы Отчи, Господь наш Исус Христос, Свет истинный, Иже просвещает всякаго человека грядущаго в мир, якоже и Сам Той рече, глаголя: Аз свет в мир приидох, ходите, дондеже свет имате, да тма вас не имет: иходяйвотме не весть камо идет» (Ин., 12,46, 35). И паки: «Азесмь свет миру, ходяи по мне, не имать ходити во тме, но имать свет животный». К сему же Свету истинному живому Богу припадаем, молящеся, кождо в себе, вопия зовущи: «Призри и услыши мя, Господи Боже мой, просвети очи мои, дане когда усну в смерть» (псалом 12). И паки: «Открый очи мои, и разумею чудеса от закона твоего. Пути оправданий твоих вразуми мя, и настави мя на путь заповедей твоих» (псалом 118). Псе есть путь истинный, сиречь заповеди Божия, по нему же ходиша вси святии, и се есть путь царский, якоже писание глаголет: «Путем царским ходите, не уклояющеся ни на десно, ни на шуе» (Числ., 20, 17). «Многия бо неправды пути, правды же точию един. Заблуждение бо различно и многолично, и безчинна некакова вещь, истина же едина: не точию сие глаголет о догматех, но и жительстве» (Апостол Толковый, зач. 80, л. 239). И в таковых путех безчисленных нецыи в ведении заблуждают, не хотяще по узкому пути ходити, но избравше себе различны путие неправды, по них же ходяще, самохотне погибают, якоже глаголет писание: «Яко кождо искушается, от своея похоти влекомь и прелыцаемь» (Пак., 1, 14). И паки суть нецыи заблуждают от неведения и неиспытания божественнаго писания.

«Велия бо стремнина и пропасть глубока писаний неведение, сие и ереси породило есть, сие и житие растленно введе» (Маргарит, слово 3 о Лазаре); «Сие всяческим виновно есть злым, еже не ведети писаний» (на Послание коласаем нравоучение 9). «Велико зло, еже не ведети писания, от сего безчисленная злая раждаются, от сего лютый возрасте еретический недуг, от сего небрегома и неисправлена жития» (Алфа и Омега, гл. 82, Никон Черныя Горы, сл. 8). Паки же от растленнаго и неисправленнаго жиия бывает совершенное неразумие и погибель, якоже пишет: «Се тма жестока в недоумении их погибоша, зане не имеша мудрости. Источник же, и мать, и корень мудрости добродетель, а все лукавство от безумия начинается. Темже и глаголет: зачало премудрости страх Господень» (Алфа и Омега, гл. 19 и 82). «Что ради не разумеваем почитаемых? Азубо мню, яко имамы сердце непокориво и гневливо и самомниво, и того ради не разумеваем писаний. Якоже Соломон рече, в злохитрую душу не внидет премудрость» (Соборник, гл. 39, л 448). «Ничтоже бо тако несмысленно и буее, якоже грех» (Алфа и Омега, гл. 14, (ссылка на) нравоучение на Послание Коринфом). «Зриши ли, како ничтоже есть несмысленнейше человека, живущаго во гресе» (на Евангелие от Матфея нравоучение 11). Отсюду научаемся, яко в лепоту глаголаше Христос: яко творяй злая не приходит к свету, и яко нечистое житие возбраняет высоким догматом, не оставляя прозрительному явитися помышления. Якоже убо несть мощно в прелести сушу и право живущему пребыти в прелести когда. Сице несть удобно в лукавстве воспитавшемуся (сиречь в беззаконии живущему) воззрети скоро на сущую в нас догмат высоту, но достоит всех очищатися страстей хотящему ловити истину, еже бо сих свободився и прелести свободится, и получит истину» (Беседа 8 на

1-е Послание Коринфом). «И везде многое о житии тщание творити Господь повелевает: не возможно бо человеку праве живущу, и от всех страстей свобождену, презрену быти когда, но аще и заблудити прилунится ему, вскоре его Бог ко истине приведет» (на Евангелие от Матфея беседа 24). Плотский человек, сиречь, иже к настоящим пригвоздивыйся, и в тех выну сый, и духовнаго действа кроме быв везде отъити может и заблудити идеже хощет. Слуга же Духа, и от инаго водимый и обводимый, не может властен быти своего хотения всюду, сущей оттуду власти привязав е» (Беседа 3-я на

2-е послание Коринфом). Ельмаубо мнози пути, ведущий в погибель, и мнози учители неправде, о нихже апостол глаголет: «Возлюбленнии, не всякому духу веруйте, но искушайте духи, аще от Бога суть. Яко мнози лжепророцы изыдоша в мир, прельщающе и прелыцаеми» (1 Ии., 4, 1; 2 Тим., 3, 13). О сих и Сам Господь сказует, научая, како познавати их и блюстися от них: «Внемлете же от лжих пророк, иже приходят к вам во одеждах овчих, внутрь же суть волцы хищницы. От плод их познаете их» (Мф., 7, 15). Сие же реченно Господем, сугубо в святоотеческих писаниях приемлется, сиречь о еретиках, еще же и о тех, иже житие растленно имущих, лице же добродетели являющих» (на Матфея беседа 23).

Нужно же есть сих познати комуждо нас, да не некто паче чаяния сия постраждет. Вельми бо процветает греховное нечестие и священнаго писания небрежение, паче же и развращение по своим кождо похотем. Темже убо и не удобно есть таковым уразумети истую силу божественнаго писания, и не заблудити. И о сем много бы потребно есть глаголати, обаче да глаголет комуждо совести своея обличение. Понеже нам настоит днесь долженствующее беседословие не яко о сих весьма взыскати, но общаго всех врага и противника Христова, сиречь антихриста, божественным писанием показати, елико вразумит нас Господь по Своей Его прещедрой милости и открыет ум разумети писания духоносных отец, священное любомудрие святых апостол, и пророк лежащее о сем предсказание, иже прежде толиких времен прорекоша. Яко имамы оскорблени быти во время пришествия самаго того антихриста, хотящего быти при самой уже кончине мира сего. Сказаша же и действа пришествия его: яко родитися имать от скверныя девицы, от простаго рода, от еврей суща, и яко во образе человечестем будет, и яко царем и богом прозовется и покажется, зане имать чудеса сотворити велия и страшна, и тем прельстити многия, аще возможно и избранныя. И яко в то время послет Господь пророки Своя, Илию и Еноха, человеком во обращение и утвержение, ему же во обличение, он же, ем, убиет их. И яко воцарится время уреченно, рекше три лета и шесть месец. И яко поклонившихся ему запечатлеет своею печатаю, имущею число ббб. И яко в то время неизреченны скорби будут, яковы же не бывали от сложения мира. И о всех сих святии отцы, известно предсказавше, предаша последним родовом: темже и сбытися неотрочно подобает во свое время на кончину времен.

Нецыи же из нынешних людей, паче же из покрещеванцев, о всех сих инако возмудрствоваша, что и повсеместно утверждают, аки бы всем сим уже сбывшимся. Мнят же быти в духовном точию смысле, а не паче и в чувственном действе. И сим убо тако быти утверждают; свидетельства же о всех сих таковаго их мудрования священным писанием доказывают. Обаче же, аще и писанием доказывают, но не бывает истинно таковое их доказательство сих ради двух вин. Первая, яко они к таковому мнению приводят в свидетельство писание таково, еже (втораго или третьяго разсуждения или толкования, ибо в Святом писании иногда многосугубо бывает толкование) святыми отцы сказанное преносне или иносказательне. А разум сущий, прото л кованный теми же отцы святыми, того оставляют не причем, закрывающе его и попирающе иносказательным преносным тем толкованием. Вторая же, яко они к свидетельству тому писание взимают на мнозе от негде от инаго разума и не о сих реченное, и тое писание преносят к другому разуму, яко да поставят и утвердят свое мудрование, и чрез сия не точию не истинствуют, но и великое бывает божественному писанию насилие. Сему же бывати не безбедно есть, сего ради и запрещено деяние таковое, якоже в Книге Кириловой пишет, глаголя: «Ниже собирати речения от писания, о ином и ином глаголанная, насиловати тех ко иному разуму, да волю нашу поставим» (гл. 37, л. 401 об.). Еще же чрез сицевое таковых о сем мудрование не точию бывает едино просто насилование, но и велие противление же и развращение священному писанию, пророческому и евангельскому проречению и святых апостол преданию, и богоносных отец сказанию. Аще же едину йоту или черту от священнаго писания развратити, то беду души немалу приносит: убо кольми паче не безбедно будет, толико о сих множество писаний во иный разум превратити, сущий же разум, протолкованный уже святыми отцы, – и того оставити аки лжива, стати же при своем мнении, аки при истиннем. И сего ради таковое мудрование показуется корнем и матернею неправде и многому заблуждению; темже и боязненно есть, да негли и в ересь вменится. Сего ради нужно есть и зело потребно божественным писанием с великим взысканием объявити, яко не духовное точию разумение, но и чувственное пришествие о антихристе мудрствовати подобает. Аще же и недовольны есмы мысленною силою к таковому подъятию, сиречь историографскому о сем показанию и опасному ведению же весьма и изъяснению, но за хотящих наследовати благоразумие, яве, яко с тем и спасение, и в недежде на Отца небеснаго, Ему же поспешествующу и слово утверждающу, коснемся повести. Но прежде даже не внидем в сказание о самем том антихристе, убо подобает первее изъявити о речи антихриста.

ВОПРОС. Что значит сие речение – антихрист?

ОТВЕТ. Значит сие проивника Христова: сие же речение есть греческое, сложенное же от двою речию: егда бо начинается речется анти, и сие знаменует противника. Егда же речется христ: христ же есть помазан. Называется же и мессиею, а и мессия сказуется тоже помазан: хрисмаубо гречески, месса же еврейски. И тако обоя сия речения анти и христ, совокупя во едино, бывает антихрист, сиречь противник Христу. Сие же яко тако суть, божественным писанием утвердитися может. Святый апостол Павел пишет: «Яко аще не приидет отступление прежде, и открыется человек беззаконию, сын погибели, противник» (2 Сол., 2, 3–4). И святый Ипполит глаголет: «Во всех изравнитися хощет Спасу нашему сопротивник и сын погибельный» (Соборник, гл. 8). И в синоксаре в неделю мясопустную глаголется о втором пришествии Христове: «И яко преди Его пришествия приидет сопротивник Христу». И преподобный Иоанн Дамаскин глаголет: «Не к нам приидет, но к иудеом; не за Христа, но на Христа, сего ради и антихрист глаголется» (книга 4, гл. 27). Подобно сим и в прочих святых книгах обретается. И сицевое есть сказание о речении сем, антихрист. Обаче вестно да будет, яко сие не имя ему есть, но приличное ему по противлению наречение. Имя же его ниже по последованию покажем. Зде же первее сказати подобает от святаго писания, еже что есть той антихрист, и кто сей хощет быти.

Глава 2

Сказание, что есть антихрист, и кто сей будет

Антихрист убо есть истый и начальнейший супостат и враг Христов, и гонитель великий, иже приити имать при кончине мира сего. Ныне же нецыи инако о сем мудрствуют и многообразно антихриста разумеют. Убо антихриста мнят быти нечестие, или неправославие, или ереси, или отступление, сиречь от веры православный. Инии же мнят антихриста быти самого диавола, или сатану. И другие мнят антихриста быти Иисуса, ради прибавления литеры «и» осьмеричныя. А другие антихриста мнят быти папу римскаго по отступлении. Нецыи же антихриста мнят быти российскаго императора. А инии, паче же и мнози, антихриста мнят быти всех еретиков. Инии же еще нечто таково называют и мнят быти антихристом. Обаче вся сия таковых мнения кроме истины суть, и вси тако мудрствующий весьма заблуждают в стропотных путех своих мнений. А яко тако есть, познавается многими обстоятельствы святаго писания и яснейшаго святых отец сказания, иже на мнозе о антихристе сказуют, таковаго же мнения не имеют, но единомудренно являют, яко он во образе человека, или, паче, яко человек будет, а не сатана, ниже ино что. И о сем святый апостол Павел явственно сказует, глаголя: «Яко аще не приидет отступление прежде, и открыется человек беззаконию», и прочая (2 Сол., зач. 275). На сию строку святый Иоанн Златоустый в беседах сицево толкование творит: «Кто же есть сей, убо ли сатана? – Никакоже, но человек некий, всякое егово приемляй дей». На сем убо месте примечать надобно есть, яко что есть антихрист, апостол о нем глаголет, и человека его быти предает. Такожде и Златоуст, стих сей толкуя, не преведе разума апостолова на что-нибудь иное, сиречь сего человека не претолкова инако, и не рече, яко есть диавол или ереси, или отступление, или ино что таково, но сказует тоже человеку ему быти. И кто ныне вторый Златоуст явится, иже бы могл после толкования его инаково толкование наводити, его же он не наведе? Еда ли не разуме, Христова уста имея, писано бо есть: «Златоустова уста, Христова уста» (Триодь в неделю Пасхи). Паки той же на вышереченный стих в Толковом Апостоле глаголет: «Яко не сатана сей будет, но человек некий, и всякий образ сатанин получивыи» (зач. 275). Такожде и Ефрем святый в книге своей глаголет: «Родит бо ся воистинну от жены скверны сосуд ему (сиречь диаволу), не сам родится сатана, но во образ его приидет прескверный яко тать» (слово 105). И в синоксаре в неделю мясопустную сице о нем глаголет: «Обаче не сам диавол в плоть претворится, якоже из Дамаска (Иоанн) глаголет, но человек из блуда родится, и все сатанино действо подымет». И Ипполит святый о нем сице сказует: «Во образе человечи явися Господь, и той (сиречь антихрист) подобие во образе человечи изыдет» (Соборник, гл. 8). И в Книге о Вере во главе 30-й пишет, глаголя: «Атой антихрист человек будет беззакония сын». В Кирилове книге в знамении 8-м сице писано: «Помощь диавол себе взяв буих сопротивников ожидание, наипаче же от жидов приведет беззаконна человека, волхва, еретика, отметника, чародея» и прочая. Преподобный Иоанн Дамаскин в книге 4-й, в слове 27-м о антихристе глаголет: «Не сам убо диавол будет человек, по Господню вочеловечению, да не будет, но человек из блуда родится и подымет все действо сатаны; проведый бо Бог безместное удущаго его произволения попустит вселитися в него диаволу». В Апокалипсисе, в главе 19-й, святый Иоанн Богослов глаголет: «И ят бысть зверь и с ним лживый пророк, жива ввержена быста в езеро огненное». На сие святый Андрей сицево творит толкование: «Яко антихрист и лживый пророк, сия оба в телеси неистлеема, ввержена будут в геенну огненную, еже има будет смерть и убиение Христовым повелением».

Вей же святии отцы тако мудрствуют о антихристе, не в преносном коем смысле, но в самом истинном человеческом образе быти ему сказуют; и что сего сказания яснейше толиких и таковых учителей? Паче бо света вещественна очеса умнии просвещают, и паче трубы и грома ушеса душ наших оглашают. Где убо глаголющий и мнящии, якобы антихрист сатана есть, или ино что таково? Толико бо святых отец сие отрицают: вей же сказуют, яко человек будет. Развращающий же Святое писание зде обретают удобно место развращению, убо глаголют: аще антихрист человек есть, то человек есть и папа римский, такожде и император российский, и се антихрист есть.

Однако, аще истиннолюбно о сем разсмотрети кто хощет, той уведети может многими посредствы, яко российский царь неприличествует быти антихристом сих ради вин:

Понеже сей российский царь не от иудейска есть рода: той же антихрист от иудей родится. Понеже сей рода царскаго: той же не от царей, ни от царска рода быти хощет (ниже, гл. 12). Понеже сей токмо царем есть и нарицается, а той царем и богом имать прозватися (ниже, гл. 12). Понеже сей никого же принуждает, дабы ему вместо Бога покланялися: той же сице не покланяющихся мучити и убивати будет (ниже, гл. 15 и 17). Понеже сей ничтоже дивно сотвори мечтанием: той же имать творити мечтанием таковая чудеса, яковаже и Христос содея (ниже, гл. 12). А понеже сия тако суть, убо явственно есть, яко папа римский, наипаче же царь российский несть антихрист, такожде и прочий таковии человецы, чрез сия же признаются, яко они не суть антихристи. Аще же еретицы и мучители нарицаются антихристи, обаче нарицаются тако по некоему уподоблению, а не по самосущественному истиннословию: истиною бо не суть антихристи, но его предотечи, и о сем покажется во главе третьей.

Нецыи же паки называют отступление антихристом, приводяще писание от бесед Иоанна Златоустаго, якобы он (в разум апостола) нарицает отступление антихристом. Но возьмем сполна оная словеса Златоустова для удобства ко объявлению. Апостол: «Да никтоже вас прельстит ни по единому же образу, яко аще не приидет отступление прежде, и открыется человек беззаконию, сын погибельный», и прочая. Златоуст: «О антихристе зде беседует, и велия открывает тайны, что есть отступление: то самого антихриста нарицает отступление, яко многих имущаго погубити и отставити» (2 Сол., зач. 275, беседа 3). Сие внимательно надлежит смотрети, и смотревши, ведати, яко зде Златоуст не нарицает отступление антихристом, но нарицает антихриста отступлением: убо толкуя апостолом Павлом реченное отступление, глаголя: «самого того антихриста нарицает отступление». И что сего сказания яснейши, егда рек – самого того антихриста? Такоже и в Толковом Апостоле вышереченный стих толкует, и наипаче светлейши являет, глаголя: «О антихристе зде беседует, и велия являет тайны, отступлением бо антихриста нарицает, яко многия хотяща отлучити от Христа, и погубити, аще возможно будет, и избранных; и человека беззакония онаго же нарицает, ибо безчисленная злая сотворит и прочих принудит, да сотворят; сыном же погибели того ради, яко и сам погибнет и многих погубит» (Апостол толковый, зач. 275). Уразумети и зде всякому имущему ум удобно есть, яко не нарече отступление антихристом, но нарицает отступлением того паки антихриста. Ибо аще бы хотел нарещи отступление антихристом, то речь сию рек бы сице: отступление антихристом нарицает. Обаче тако не речено, но виждь, яко не у речи антихриста, но у речи отступления две буквы приложишася, рекше, мъ, и бывает речь сия не просто отступление, но отступлением. Темже и яве есть, яко не отступление нарицает антихристом, но самого того антихриста называет отступлением.

Еще же и следующая словеса (сиречь рядом сих в беседах и во Апостоле толковом) не попущают разумети отступление за антихриста сих ради причин, понеже глаголет: «Яко той антихрист человек будет, и яко безчисленная злая сотворит, и прочих принудит, да сотворят: и яко той дела велия соделает и знамения покажет чудна. Отступление же, или ереси, или нечестие все едино может разуметися, обаче оно не человек есть, ниже имать человеческаго образа. Еще же и оно никого и принудити к себе не может, зане вещь не самодвижна есть и не существена, но от других делаема бывает: темже не оно само к себе принуждает, но от любящих его принуждения к нему бывает. Еще же оно и никаких знамений или чудес творити не может, занеже не суть животно, ниже самодвижно есть, якоже речеся. Сего ради откровение объясняется, яко отступление не есть антихрист, и не нарицает его Златоуст антихристом, но того антихриста называет отступлением.

Темже, опаснаго ради о сем ведения, положим зде некий пример: яко убо Христос нарицается Пастырь, и Дверь, и Путь, глаголя: «Аз есмь Пастырь добрый» (Пн., 10, 11). И паки: «Аз есмь Дверь, Мною аще кто внидет, спасется». И паки: Аз есмь Путь и Истина и Живот» (Пн., 14, 6). К сим же и прочими многими таковыми нарицается Христос. Пастырие же и двери и путие, и прочая таковая не нарицаются «Христос». Сице подобнообразне и антихрист зде нарицается отступлением, а не отступление антихристом. И паки, якоже еретики многими именованиями в писании нарицаются: овогда бо врагами и противниками называются, овогдаже звездами прелестными, а иногда «облаками безводными и древесами безплодными» (Иуд., зач. 78). И паки вратами адовыми (зане ими, аки вратами во ад нисходят последующий им). Многими же и другими именами, подобными сим, еретицы нарицаются. Тако и антихрист многими именованьми называется. Зде же апостол нарече его отступлением и сыном погибели, яко многих хотяща погубити, и яко сам той погибнет. Темже Златоуст, сие толкуя, яве глаголет: «Того самого антихриста нарицает отступление» (Беседы); или сице: «Отступлением бо антихриста нарицает» (Апостол толковый). Темже что сего явнаго толкования яснейши?

Знати же потребно есть, яко антихрист многими именованиями в священном писании называется (ниже, гл. 5): овогдаже и сатаною или диаволом нарицается. Обаче выше святоотеческим писанием явственно сие сказася, яко не сатана сей будет. Темже яве есть, яко ино есть диавол, ино же антихрист: тако и зде наречеся той антихрист отступлением, обаче ино есть отступление, ино же антихрист. Сего ради не подобает мнети за едино, слияв и совокупив о сих разумение: понеже едино предваряет, другое же потом последует – антихрист последует. И аще едино прежде идет, другое же по нем, убо явственно показует разньство, яко ино есть отступление, и ино самый той антихрист. А яко тако суть, доказывается Святым писанием. Во Апостоле, в предисловии к солуняном втораго послания, глаголет: «Не прежде бо быти ему (сиречь второму пришествию Христову) аще не отступление прежде приидет, и потом антихрист, сын погибельный». И в Книге Кирилове, в знамении седмом, глаголет: «Первое бо готовит диавол отступление и разрушение в человецех, даже того ради с радостию его (сиречь антихриста) приимут, егда приидет». Ниже: «И се есть уже отступление, и ожидаем врага, иже помалу пошлет пред собою предотечь своих, даже и сам на готовое пришед останок уло». В той же книге на листе 15 сице: «Первее бо приидет отступление, потом человек беззаконию сын погибели, противник антихрист».

Выше показахом от божественнаго писания, яко антихрист не сатана есть. Идеже паки явственно показуется, яко и отступление не есть антихрист: отступление бо сказуется просто отступление от веры православныя. Подобно же сему и ересь, и нечестие: вся бо сия едина суть: идеже бо ересь, тамо и нечестие, а идеже нечестие, тамо и отступление: и идеже паки отступление благочестия, тамо и ересь и нечестие. Аще сия именами хотя и разликуют, но едино есть просто рещи нечестие: темже и зело яве есть, яко не суть сия антихрист. Еще же и сие присмотрися, яко святии отцы о самом том антихристе сице сказуют: ов глаголет, яко человек быти имать (Апостол, Златоуст и прочий), ов же сказует, яко человек из блуда родится (Иоанн Дамаскин); ин же повествует, яко в телеси имать быти (святый Андрей во Апокалипсисе); ин же свидетельствует, яко по привидению вся содеет, и рождение, и плоть, и прочая вся (синоксарь в неделю мясопустную). Подобно же и другий пишет, яко родится по привидению, и мечтательную плоть своему существу восприимет сосуд (Ипполит, в Соборнике). Обаче от всех сих явственно показуется единогласное любомудрии, яко той антихрист неотрочно имети будет образ человеческий, якоже и Христос, и существом будет человек, но токмо сатану в себе будет носити от самаго младенства своего, якоже показуют святии отцы в своих писаниях. О сем паки Ипполит святый яве сказует, глаголя: «Во образе человечи явися Господь, и той подобие во образе человечи изыдет». Где глаголющий о нечестии и мнящии, акибы тое самый антихрист есть? Нечестие бо, отступление и ереси не имеют коего существа или человеческаго образа, но бывают сия за оскудение и лишение благочестия, по глаголющему: «Идеже света лишение, тамо тме пришествие» (Катихизис большой, гл. 23, л. 102). Какоубо нечестию, вещи не существенней, имети образ человеческий? – Отнюд не возможно! Темже яве есть, яко отступление несть антихрист. И от всех сих вышереченных святых отец повествований познавается, яко той самый антихрист человек будет: родится же не от супружества законнаго, но от жены блудныя девицы. Якоже бо Христос родися от Марии Пречистыя Девы, тако и противник Его, антихрист, родитися имать противообразне, от жены, скверныя девицы, от еврей сущи. Темже и явствуется, яко будет он таимичищь (зазорный), а не сын законный, и в лепоту нарицается он сыном беззаконным, яко и родится беззаконно, и яко велия собеззаконнует.

Показахом зде Святым писанием и прочими резонами, яко диавол, и отступление, и нечестие, и ереси не суть антихрист. Подобие и о нововводном имени Исусове и о агньце покажется ниже, яко и сия несть антихрист. Еще же и о папе римском и о прочих еретиках последовательне во главе 3-й изъяснится, яко и сии не суть антихристи, но его предотечи.

Глава 3

О антихристе, о еже како мнози антихристи, и како суть един антихрист

Всех убо противников и врагов Христовых, сиречь еретиков, и царей гонителей и мучителей во Святом писании антихристами нарицает, ради их еже ко Христу противления: и таковыя антихриста начашася от времене самаго еже на небеса Христова вознесения, яже есть сии: Симон волхв и прочий по нем, Арий, Македоний, Несторий и Махмет, турский законодавец. А от царей нечестивых, гордых же и лютых мучителей, каков бе Нерон, Севир, Валериан, Максимиан, Диоклитиан и прочий таковии. Сих всех в писании антихристами нарицает, как еретиков, так и нечестивых гордых царей и лютых мучителей. Овии бо злочестивым своим учением рабов Христовых погубляху, овии же мучением за веру Христову убиваху: и о таковых антихристах глаголет Иоанн Богослов: «Не всякому духу веруйте, но искушайте духи, аще от Бога суть, яко мнози лживи пророцы изыдоша в мир» (1 Ин., 4, 1). И паки глаголет: «Слышасте, яко антихрист грядет, и ныне антихриста мнози быша» (1 Ин., 2,18).

Мнози убо бяху прежде и ныне суть в мире таковые антихриста, противницы Христовы, но нам не о тех зде ныне надлежит глаголати: сии бо бяху антихристи точию уподобительне, свойственне же и существенне не беша антихристи, но токмо предотечи его. Якоже бо имя Исус сугубо разсуждается, сиречь во обществе и свойстве. Во обществе же, рекше общие, таковым бо именем нецыи в Ветхом Законе нарицахуся, якоже Исус Наввин, Исус Сирахов, Исус Оседеков и прочий. В свойстве же, сиречь яко сие имя Исус свойственно есть Самому Тому Исусу Спасителю и Богу нашему, якоже рече ангел: «Родит же Сына, и наречеши имя Ему Исус, Той бо спасет люди Своя от грех их» (Мф., 1, 21). Онии же три мужие названи быша Исусами того ради, еже они суть образ и подобие истиннаго Господа нашего Исуса Христа (Большой катихизис, гл. 1). И егда солнце ста глаголом Исуса Наввина, чесо же ради тако бысть? Образ бе Исусов оное имя, того ради сие бысть (Апостол толковый, зач. 330, и Маргарит, слово 2-е о серафимех). И паки: якоже имя «Христос» сугубо разсуждается, первое во обществе, второе же в свойстве: и во обществе убо таково есть разсуждение, яко общие сим именем «Христос» нарицахуся православнии царие яко помазанницы: «Христос» бо греческое слово, еже помазанника знаменует. Сего ради и во Израили первый царь Саул нарицаем был Христом от царя Давыда, якоже он рекл к мужем своим: «Не буди мне ничтоже от Господа, аще сотворю глас сей господину си Христу Господню, еже воздвигнути руку мою нань, яко Христос Господень есть сей» (1 Царств, 24, 7). И паки ко убившему царя Саула сице глаголет: «Како не убоялся еси воздвигнути руки своея на Христа Господня?» (2 Царств, 1, 14). И паки Самуил пророк того же царя Саула Христом нарицает. Зри в книге первых царств главу 12. Подобие и Давыд нарицается Христом, якоже во псалме глаголет: «Величая спасения царева, и творяи милость Христу своему Давыду» (Псалом 17, 51). И паки чрез того же Давыда Бог глаголет: «Не прикасайтеся помазанному Моему» (псалом 104,15) – или помазанным Моим, или Христом Моим, якоже пишет в других переводах. В толковании Псалтыри стих сей сказуется о помазанных Аврааме и Исааце и Иакове, понеже и сии нарицаются пророками и христами, сиречь помазанниками. Аще же миром и не помазани, но духовне помазани, занеже и христи нарицаются.

Зри о Христе Господе: Христос нарицается от помазания, понеже то к плоти свойственно. «Коею же речеши хрисмою помазан? Миром воистину несть помазан, но духовное являет помазание, сиречь Духом помазан, понеже писание тех помазанными наричет, а в начале в помазании Дух есть, и того ради елей вместо Духа почитается. И наричет писание помазанными, кои елеем не суть помазани, глаголя, не прикасайтесь духом Моим, сиречь помазанным Моим, и во пророцех Моих не лукавнуйте. Тогда не бе чин помазания, еже елеем бывает» (Апостол толковый, л. 225). О таковых христах в минеи четии 30 ноября в слове поучительном сице писано: «Мнози убо христи, но вси смерти подлежащий. Авраам Христос, но во гробе истле. Исаак такожде бе Христос, но кости его во гробе лежат. Бе Иаков Христос, но смерти подлежащ. И Моисей бе Христос, но в коем месте погребен, не вемы. Давыд подобно бе Христос, но вси смертини быша». И в Евангелии недельном в неделю святых отец пред Рожеством Христовым сице писано: «Яко христи нарицаются царие и иереи, сиречь помазанники: помазовахубося святым елеем от рога помазуемаго на главу й точаща». И се есть имя Христос во обществе. Второе же разсуждение в свойстве, сие пресвятое имя Христос, свойственно есть Самому Тому единому истинному Христу, Спасителю нашему, Помазаннику Божию и Богу, о Нем же глаголется: «Помаза Тя Боже Бог Твой елеом радости паче причастник Твоих» (псалом 44, 8). И паки инде глаголет: «Дух Господень на Мне, Егоже ради помаза Мя» (Исаия, 61, 1), и прочая. «Сие бо греческое слово «Христос», а еврейски «Мессия», толкуется помазанник. Ибо на восприятие плоти помазан совершением Святаго Духа, яко Царь, превыше всех царей, и Священник, превыше всех священник, и Пророк, превыше всех пророк» (Катихизис большой, гл. 1). Преподобный Иоанн Дамаскин глаголет: «Яко всяк богоносный человек Христос глаголатися может, но не Бог естеством» (книга 3, слово 12). И святый Феофилакт глаголет: «Мнози быша христи, иже и цари глаголются, и архиереи, но ни един от тех бе Сын Бога благословеннаго» (Благовестник, от Луки зачало 65). И паки той же глаголет: «Понеже христи мнози нарицахуся, священницы вей и царие, Христос же един по существу Отца Сын» (там же, от Матфея зач. 67).

Сия убо рекохом о Исусе и о Христе, речем же и о Бозе. Якоже бо сие имя «Бог» сугубо паки разсуждается святыми отцы, общественне и свойственне, еже сице имать. Святый Иоанн Дамаскин о сем глаголет: «Аще Царь царствующим и Господь господствующим, и Бог богом, и Содетель всех, и Господь глаголется, всячески и святии, и господне, и царие, не естеством, но яко страстьми царствующия и единствовавшия Богу, и Того причастием» (книга4, гл. 15). И в Катихизисе большом во главе 56-й сице пишет: «Не Сам един Творец сим именем «Бог» нарицается, но и тварь Его сим словом, еже «бог», глаголется. Святый апостол Павел к Коринфом в послании глаголет: «Аще и суть глаголемии бози мнози господне мнози, но нам един есть Бог Отец, и прочая. Тварь же не достойно есть тако нарицати, но некоего ради подобия всякое от них сим именем нарицается. Первое ангели нарицаются бози, того ради, яко они суть посланники Божии. Потом же и людие, иже суть царие, господне, судии и наместники, иже сидят на месте Его и владычествуют человеки. Обычай же есть писанию и чрево называти бога, иже объядающиися и пияницы, и прочий страстнии человецы, иже угождают похотем своим аки Богу. Паки же и кумиры – беси – нарицаются бози, ихже люди в Бога место почитают. Глаголет бо, бози язык бесове суть. Сия же вся не по естеству нарицаются бози, ниже по причастию, но токмо подобия ради гордыни древния. По естеству же един Господь Бог праведный и истинный Вседержитель и Творец всея твари. Сей достойно сим именем нарицается Бог, и есть тако».

Показахом зде от священнаго писания, яко имя «Исус» во обществе и свойстве разсуждается. Бяху убо и инии Исусы, но един есть истинный Исус Спаситель, Господь Бог наш: прочий же Исусы токмо образы и подобия Его быша. И якоже мнози христи в писании нарицаются, но един есть истинный Христос Бог наш. И якоже мнози бози и господне мнози именуются, но един есть существом истинный Господь Бог, Творец всея твари; прочий же бози глаголются или по благодати всыновления, якоже святии ангели и святии человецы, или по подобию, якоже царие и князи и судии земли, или по заблуждению, якоже бози язычестии бесов, и прочая такова: во обществе бо и сии богами нарицаются. Свойственне же и существенне, иже естеством божественным, истинный Бог един есть, а не мнози, о чем всякому правоверующему христианину известно.

Тако подобообразне разумети подобает и о антихристе, о нем же есть сугубо разсуждение: первое во обществе, второе же в свойстве. В обществе убо, яко всех еретиков и противников Христовых во Святом писании антихристами нарицает ради их еже ко Христу противления, самому же тому антихристу уподобления, понеже истиною они не суть антихрист, но его предотечи, или образы некия и подобия: сего ради и Нерона Златоуст нарицает образом антихристовым (беседы на 14 поел., и Апостол толковый, зач. 275). В свойстве же, яко свойственно есть сие нарицание единому тому антихристу, свойственнообразно и самосущественно в скончании мира грядущему. О нем же Сам Господь рек ко иудеом глаголя: «Аз приидох о имени Отца Моего, и не приемлете Мене, ин же приидет о имени своем, того приемлете» (Ин., 5,43). А апостол глаголет: тогда «открыется человек беззаконию, сын погибели, противник, и превозносяися паче всякаго глаголемаго бога или чтилища» (2 Сол., 2, 3). И пророку Даниилу ангел о зверех толкуя глаголет: «И по сих востанет царь, иже преспеет злобами вся, иже прежде его, и три цари смирит, и словеса к Вышнему соглаголет, и святыя Вышняго смирит, и помыслит пременити времена и закон», и прочая (гл. 7). Святый Ипполит о сем повествует, глаголя: «Тогда же, егда сам хощет самообразне приити, что убо или кое не сотворит лукавство и лесть, и мечтание». Подобно сему и Ефрем преподобный глаголет: «Велик подвиг братие во времена она, на всех человецех, паче же на верных, егда будут знамения и чудеса от самого того змия». Такожде и в Златоусте древлеписменном, подобно и в печатном, в неделю 25-ю сице пишется: «Тогда антихрист начнет яве ходити с бесы своими, до конца прельщая и погубляя человеки, дондеже приидет с небесе Господь наш Исус Христос». Еще же и в Книге Кирилове в знамении 7-м сице глаголет о вразе: «Иже помалу послет пред собою предотеч своих, даже и сам на готовое пришед останокуловит». И паки в знамении 6-м святии отцы Златоуст с Феофилактом сице глаголют: «Иже бысть в сени жертвы храма Соломоня, и то совершися и исполнися в самой истине по глаголех пророческих. Сие же такожде начинают посланницы антихристовы, сына беззаконнаго, но не у кончина, дондеже сам приидет, и с ним совершится и исполнится мерзость вседневнаго запустения». Дозде Книга Кирилова и глаголы о самообразнем пришествии антихриста.

Еще же ведати надлежит реченное святыми отцы, иже вей глаголют о самом антихристе, якоже речеся, нарицают его сам. Темже кто есть сам? Понеже убо якоже и о Христе пророком Исаием речено: «Се Бог наш суд воздаст, Сам приидет и спасет нас» (гл. 35). И паки той же рече: «Ни ходатай, ни ангел, но Сам Господь спасе я» (гл. 61). Темже и ирмос поется сице: «Ни ходатай, ни ангел, но Ты Сам Господи воплощься, и спасе всего мя человека» (глас 2, песнь 4). Прежде убо посла Бог закон и пророки, и не возмогоша спасти человечество; по сих же Сам Той Бог прииде и спасе нас.

Тако разумеется и о антихристе: приидоша убо еретицы и мучители, противницы Христовы, иже убо частне и уподобительне антихристами нарицаются, но не сам. По сих же и самый той приидет, о нем же выше речеся, прельщая человеки и останок уловляя и губя. Онии же вей противницы Христовы аще и антихристами в Святом писании называются, но паки абие предотечами его быти сказуются, якоже и суть. Ибо и папа римский по отступлении многократно в писании антихристом называется, но паки тойже папа предотечею ему именуется, якоже о сем в Книге о вере во главе 30-й сице глаголется: «От великаго Карла, всю власть от тех времен царскую и святительскую папа на себе привлече, вкупе царь и святитель наречеся, не явный ли сей антихристов предотеча». Такожде и в Книге Кирилове в знамении 8-м пишется: «Якоже прежде перваго Христова пришествия паче всех идолов был един наивящший идол в Вавилоне, при царе Навуходоносоре, такожде и нынешним многим лжехристом един есть наивящыпий папа, иже оному последнему антихристу предотеча». И паки в той же главе сначала сице пишется: «Якоже Христос времени пришествия Своего и кончины века никому не сказа, но токмо знамения некая и разделения поведа ради антихристов, котории оному последнему антихристу человеков вкупе приведут» и прочая.

От сихубо святых отец сказаний, кажется, возможно всякому имущему ум разсуждати и разумети разньство самого того антихриста с прочими антихристами, сиречь с его предотечами, или по участию некоему тако нареченными. Ельмаубо не токмо еретицы или нечестивии мучители в писании антихристами нарицаются, но и человецы благочестивии тако называются за некое еже ко Христу противление. И о сем аще и вмале, но напомянуся в книге Кормчей, в толковании 52-го правила святых апостол, яко епископа или презвитера за оную вину нарицает антихристом. В Патерике же азбучном и в книге Никона Черныя Горы, и в Прологе в 22-й день октября и в 22-й день марта, и в книге Алфа и Омега в 51-й главе писано, яко осуждаяй иного антихрист есть.

Обаче сии и онии нарицаются тако по некоему ко антихристу уподоблению, истиною же не суть антихристи. Якоже и сии того ради сице называются, понеже осуждением искренняго восхитивше на ся сан Христов, ибо разсуждати о сих и осуждати их единаго Бога суть. Такожде и папа римский, егда назва себе таковым папою, а не папою просто, но папою и судиею всея вселенныя, того ради святой отцы нарекоша его антихристом: понеже восхити на ся не точию власть духовную и царскую, но и Божию, ибо судиею быта всея вселенныя единаго Бога есть. Однако и сей антихрист, сиречь папа и с прочими еретиками не суть антихрист, но его предотечи, якоже выше во главе сей яве показуется.

Но и еще ли некто противоречит глаголя: что убо святый Иоанн Богослов глаголет, «яко антихрист грядет, и ныне антихристи мнози быша?» (1 Пн., 2, 18). И паки глаголет: «Всяк дух, иже не исповедует Исуса Христа в плоть пришедша, от Бога несть, и сей есть антихристов, егоже слышасте, яко грядет, и ныне в мире есть уже» (1 Пн., 4, 2–3). Что же и Павел апостол, еще жив сый, к солуняном сице глаголет: «Тайна уже деется беззакония». И от сих ясно показуется, яко и при апостолех был уже антихрист в мире. И аще тогда деяшеся сия тайна и был уже антихрист в мире, то кольми паче ныне в мире настоит. Вы же како глаголете, аки бы и еще он не прииде в мир?

Отвещаем. Святый Иоанн Богослов сие глаголет не о самом том антихристе, но о еретиках и лжепророках, предотечах его, тогда бывших во времена апостолов, ибо на сей стих в Толковом Апостоле сице сказуется: «От толкования. Тогда мнози и лжеапостоли от диавола введени быша, творящеся евангельское учение имети. Сих назнаменуя, евангелист глаголет: и се есть антихрист, еже слышасте, яко грядет, и уже в мире сем есть» (л. 202). Еще же о сем сказуя, святый Иоанн Дамаскин глаголет: «Всякубо не исповедуяй Сына Божия и Бога в плоть пришедша, антихрист есть: обаче свойственнообразно и изрядно антихрист глаголется, в скончание века грядый» (книга 4, гл. 27). Зде внимательно зрети подобает, яко и сей святый в стихе сем явственно разньство показует сих уподобительне нареченных антихристов с последним сущим оным антихристом. О сих глаголет: «Всяк не исповедуяй Сына Божия в плоть пришедша, антихрист есть. О оном же сказует, яко свойственнообразно в скончании века приити имать. Свойственнообразно же, сиречь не в предотечах уже, якоже ныне, но во своем его образе. Подобно и Ипполит святый (якоже выше рехом) глаголет: «Тогда же, егда сам хощет самообразне приити, и начнут зрети его человецы истинно». И паки в Книге Кирилове в знамении 11-м сице пишется: «Яко святии апостоли тогда онех отступников и сводителей людей Божиих с собою, антихристами нарицали, такоже и ныне всех еретиков и сводителей антихристами оному последнему служащими быти разумей». Темже убо удобно разумеется, и явствено является, яко святое писание всех Христовых противников антихристами нарицает, не просто же, но по оному последнему антихристу, предотечами и слугами тех именует: тако и нам разумевати подобает. Сего ради и сие, реченное евангелистом, яко антихрист в мире уже, разумети подобает, <что> «в мире уже, но не во своем ему лице, а в его предотечах. Подобно нечто и во Евангелии обретается, ид еже Христос глаголет о Иоанне, и называет его Илиею, глаголя: «Илия убо приидет прежде и устроит вся: глаголю же вам, яко Илия уже прииде, и не познаша его, но сотвориша о нем, елика восхотеша. Тогда разумешаученицы, яко о Иоанне Крестителе рече им» (Мф., 17, 11–12). Зде Христос о Илии глаголет, яко приити имать, и яко прииде уже, но како приити имать, аще уже прииде? Сие разумети подобает, яко приити имать самый той Илия во своем си лице на кончине мира: прииде же уже тогда в подобном себе лице, сиречь во Иоанне Крестителе. «Понеже бо Илия и Предотеча едино служение имут. Иоанн бо первому пришествию предотеча бысть, Или я же второму хощет быти» (Благовестник, Мф., зач. 40). И якоже прииде Илия в лице Иоаннове, и прииде Иоанн во имени Илиине, сиречь не яко той Илия бе, но уподобительне Илиею наречен, по образу служения. Так и антихрист приде уже во своих ему предотечах, а не во своем лице. Тако приидоша и предотечи его во имени его, сиречь не яко истиною антихристи, но наречени тако по образу, еже к нему некоего в действах уподобления. И чрез них деяшеся тогда, и ныне деется тайна беззаконя, якоже рече апостол: «Тайна уже деется беззакония». Тайною беззакония апостол нерона нарицает, по сказанию святаго Златоуста на сей стих: подобно и прочих мучителей и еретиков, чрез нихже деется тайна сына беззаконнаго.

Якоже во Христово первое на землю пришествие образне начало имать негли от времен адамских: предзнаменовашебося оное на многих вещех и лицах, сиречь на Авеле, неповинно по зависти от своего брата убиенном; на Ное, избавлыпем человеческий род от потопления; наМелхиседеце, священнице выну пребывающем, ни начала днем, ни животу конца имущем; на Исааце, от Авраама на жертву вознесенном; на Иосифе, от братий своих проданном, и последи царствовавшем ими и всем Египтом; на Моисеи, свободившем Израиля от работы фараоновы; на Давыде кротком царе израилеве, гонимом от Саула; на Ионе пророце, три дни и три нощи во чреве китове пребывшем. На всех же сих лицах, еще же к сим и на прочих многих лицах же и вещех, оттогда деяшеся тайна спасения нашего, хотящаго быти чрез истиннаго Спасителя и Бога нашего Исуса Христа. Обаче во своем лице тогда Христос не у прииде в мир. Егда же прииде и явися, тогда открыся сия тайна сокровенная от века и от родов, якоже рече апостол: «Бых служитель по смотрению Божию, данному мне в вас исполнити слово Божие, тайну сокровенную от всех век и от родов, ныне же явися святым Его: имже восхоте Бог сказати, кое богатство славы тайны сея во языцех, иже есть Христос в вас, упование славы, Егоже мы проповедуем» (Кол., 1, 25–28). Уже бо престаша тогда образи и тайно действующияся подобия, и скончашася самою истиною, егда Сам Христос самообразне прииде.

Тако подобообразно надлежит разумети и о антихристе, ибо образовательно пришествие его начатся негли от времен Христова во плоти на земли пребывания, обаче не во своем ему лице от тогда даже до ныне пребывает, еже не возможно, но чрез его предотеч тогда деяшеся и ныне деется тайна его, сиречь уподобительная участная того злоба и Христу противление. О нем же видится и Иоанну Богослову рещи, яко антихрист в мире уже. И яве есть, яко таковый антихрист в мире уже тогда и ныне, сиречь того злоба и Христу противление в предотечах антихристовых тайнодейственне бывающее. Егда же истый той антихрист самообразне приидет, тогда открыется тайнодейство сие, и скончается самою истинною вещию, якоже апостол глаголет: «Тогда открыется человек беззаконию, сын погибельный» и прочая (2 Сол., 2, 3). И Ипполит святый глаголет: «Аще бо сам и не являяся ныне сын погибельный, невидимо нас ратуя, кознем и заколением нас отводит и устремляет. Тогда же, егда сам хощет самообразне приити» и прочая (Соборник, гл. 8). И преподобный Иоанн Дамаскин сказует свойственнообразно ему быти, якоже выше показахом.

И от всех сих вышеписанных святоотеческих сказаний удобно признается, яко самый той антихрист, свойственнообразно грядущий, не бе в мире тогда при апостолех. Понеже аще бы тогда при апостолех той антихрист был уже в мире, то почто бы святии отцы назнаменали ему время будущее? Яве того ради, понеже не бе его тогда в мире: паче же яко они после апостолов были нецыи от близ, инии же и от далече временем. Обаче тии назнаменуют ему время не прошедшее, аки бы при апостолех, ниже настоящее, аки бы при них, но будущее. Святый Ипполит в слове своем во многих местех время будущее являя, о нем глаголет: приидет, родится, изыдет, чудеса сотворит, и прочая такова. Сей святый бе по Христе в лето 261-е.

И святый Кирил Иерусалимский, бывый по Христе в лето 345-е, сей глаголет: «Приидет же преждереченный антихрист сицевым подобием» (знамение 9). И паки: «Ожидаем врага, иже помалу пошлет пред собою предотечь своих, даже и сам на готовое пришед, останок уловит» (знамение 7). «К жидом приидет, яко Христос, и от жидов прият имать быти» (знамение 4). «Ложно Христом прозовется, и тем прозванием жидов прельстит» (знамение 8). «И полчетверта лета будет люто царствовати» (знамение 9).

Преподобный Ефрем бе по Христе в лето 373-е, иже глаголет: «Не будет же во время то страшное покоя на земли, егда приидет змий». И паки: «Егда приидет прельстити всяческих, во свое время на кончину времен». И паки: «И кацем образом приидет на землю, родитбося воистинну» (слово 105).

Златоуст святый бе по Христе в лето 402-е, сей же сице глаголет: «Уже начинают посланницы антихристовы, сына беззаконнаго, но не у кончина, дондеже сам приидет» и прочая (Апостол толковый, зач. 150). И инде глаголет: «Егда бо приидет он, ничтоже повелевает здраво, точию от знамений ложных уверится». Ниже: «На погибель бо человеком приидет, вся подвигнет, вся возмутит» (2 Сол., беседа 4).

Преподобный Иоанн Дамаскин бе в лето по Христе 735-е, иже в 4-й книге своей, во главе 27-й глаголет: «Требе есть знати, яко подобает антихристу приити». Ниже: «Народится убо из блуда и внезапу привостанет и восцарствует. Приидет же в знамениих и чудесех лжи» и прочая.

Святый Никифор Каллист, иже бе в лето 844-е, то же повествуя, глаголет: «Преди же Христова втораго пришествия приидет сопротивник Христу, и чудеса сотворит, елико убо и Христос содея» и прочая (синоксарь в неделю мясопустную).

Святый Феофилакт, архиепископ болгарский, иже написа толкование на четыре евангелисты, сей же бе в лето 1071-е по рожестве Христове, иже глаголет: «И до ныне ищут евреи удержати Христа, но не удержат Его, ни познают, антихриста бо удержати имут и поклонятся ему» (толкование на Мф., зач. 29). «Пришед бо Господь на облацех не обрящет веры на земли, токмо не во мнозех» (Лк., зач. 88). Выше: «Тольма бо удержит тогда сын беззакония, якоже прельстити и избранныя аще возможно». И инде рече: «Приидет антихрист яве, яко себе единаго хощет явити, яко един бог есть» (Ии., зач. 17). Такожде и инде во всех четырех евангелистах при потребе всюду время будущее антихристу являет.

Еще же восточнаго благочестия блюститель и поборник, западнаго же кривоверия и прочих еретиков обличитель, благия ревности и мудрости исполненный муж, белорусец Стефан Зизаний, иже бе от рожества Христова в лето по тысящи в конце шестаго и в начале седмаго столетия, во время благовернаго князя Василия Острожскаго, который просил того церковнаго учителя Стефана, да протолкует слово 15-е в книге оглашений святаго Кирила Иерусалимскаго, в коем святый Кирил полагает 11 знамений антихристова настатия. И то слово святаго Кирила толкуя, многая же к тому и своя прилагает, обаче и сей антихристу время будущее являет, глаголя: «Будет бо беда велия вскоре, якова же не была от начала мира, и потом не будет: в то время, в не же он, последний антихрист православных хрситиан везде тружати и мучити начнет» (Книга Кирилова, гл. 4). В то же время прельстятся мнози, и о том убо мало есть потребы писати, но еже ныне содевается» (знамение 3). «Понеже сам последний едины полчетверта лета имать пребыти» (знамение 9). И якоже сия, тако и прочая многа сим подобная глаголет.

Еще от рожества Христова по тысяще, в седмом сте летех, бе священный учитель иеромонах Азария, имже написася книга о правой вере и сочинися книга Алфа и Омега. Сей бе муж духовнаго состояния и святых писаний ведатель премудрый, и восточнаго благочестия хранитель великий, еретических же соборищ обличитель изрядный: яко такова его книги его являют. Сей в Книге о вере, во главе 30-й, о антихристе сице глаголет: «А той антихрист человек будет, беззакония сын. И родится, якоже глаголет Ипполит Римский, от девицы нечистыя, жидовки сущия, от колена Данова. И будет исперва смирен, и доброе житие проходя. И сотворит чудеса, не истиною же, но привидением, и все действо диаволе восприимет, и возлюбит жиды и возвысит их. А правоверных прелюте изгоняти будет».

Еще же по рожестве Христове в лето 1630-е, и прочая по сих, во время святейшаго патриарха Филарета московскаго и всея России, польским протопопом Лаврентием Зизанием сочинена бысть Книга Катихизис большой, яже свидетельствовася самем патриархом, и что излишно или непотребно в ней обретеся, то отложися: и чего недоста, то дополнися, таже и печатным тиснением издася. Такожде и в сей книге, в главе 23-й, в знамении 17-м, будущее время антихристу являет, глаголя: «Потом же приидет антихрист, имать же царствовати три лета и месец шесть, и чудеса мечтанием и лжею и волхвованием творити, и тогда будет велие и лютое мучение» и прочая.

Подобно сим в священном писании безчисленное множество доказательств обретается, яко святии отцы знаменают самому тому антихристу время будущее, род мужеский, число единственное. Якоже святый Иоанн Златоуст глаголет: «Не бо во идолопоклонение введет он, но богопротивен некто будет, и всех разорит богов, и повелит кланятися себе вместо Бога». Ниже о Нероне глаголет: «Аще бо прежде времене онаго обретеся, рече, иже не много остаяшеся в злобе, что дивно, аще уже будет» (2 Сол., беседа 4). Видиши ли, не глаголет сего, яко богопротивно нечто будет, или настоит, сиречь акибы ереси или нечестие, яве яко и тогда уже настоящия: но глаголет, «некто будет», являет род мужеский, якоже рехом, число же единственное и время будущее. Тем и ниже рек: «Что дивно, аще уже будет». И не един точию Златоуст тако предает, но и мнози священнии учителие, ихже и зде отчасти показахом, бывших по временом от воплощения Христова до лет 1600 и болыпи, иже вей показуют, яко до сих лет не прииде в мир сам антихрист: вей бо время будущее являют. Темже убо яве есть, самый той антихрист не бе тогда прежде в мире при апостолех, ниже при отцех, сия написавших.

Или и еще некто зде обретает удобно место противлению, глаголющи: «Аще тогда и не прииде той антихрист, обаче от лет 1666 всяко уже пришел есть по сказанию, еже в Книге о вере».

Отвещаем. Выше объявихом показание святых отец, яко до сих 1666 лет не прииде в мир самый той антихрист, понеже вей они по своим временом быша, назнаменали ему время будущее. А по сих летех убо не обретается свидетельствованнаго древлеправославною Церковию о сем учителя и писателя, кроме новых учителей. Темже и писания о сем будущее время назнаменующаго взять неоткуду, разве паки от тех же древних святых отец сказаний. Сего ради полагаем ниже святоотеческая тоя о сем сказания и знамения, являющая то, яко не точию до сих или от сих 1666 летех, но даже и доныне не пришел есть в мир той антихрист. Убо всяк, иже имать ум, и безпристрастне прочитав тая их о сем сказания и знамения, может вразумитися, яко тако есть.

Глава 4

О рождении антихристове, и о бытиях чувственных, писанных же во иносказательном таинственном разуме

Иаков, нареченный Израиль, сын Исааков, внук Авраамов, име сынов дванадесять, имже имена суть сия: Рувим, Симеон, Левий, Иуда, Заулон, Исахар, Дан, Гад, Иасир, Неффалим, Иосиф, Вениамин. Сей же Иаков – Израиль – егда бысть уже близ своего скончания, тогда призва сыны своя и рече им: «Соберитеся, да повем вам, чему быти в вас в последняя дни: совокупитеся и послушайте мене, сынове Иаковли» (Быт., 49, 1).

И благословляше всех сих сынов своих достодолжным благословением, якоже ему вразумися Духом Божиим. Тогда пророчески провозглашаше рождение Христа Бога нашего, хотящее быти от колена Иудова, такожде и рождение антихристово, хотящее быти от колена Данова. Рече убо о Христе четвертому своему сыну Иуде, глаголя: «Иудо, тебе восхвалят братия твоя, руце твои на плещу враг твоих, поклоняттися сынове отца твоего. Скимен львов Иуда от леторасли сыне мой взыде, возлег и поспа яко лев, и яко скимен, кто возбудит и: и не скончается князь от Иуды, ни старейшина от чресл его, дондеже приидет на менение ему, и той чаяние языком» (стихи 8—12). И сие проречение о Христе, от колена Иудова раждаемом. Подобно и о антихристе рече седмому своему сыну, Дану, глаголя: «Дан да судит людем своим, яко едино есть племя во Израили. И да будет Дан змий на распутии, седя на пути и хапля пяту конску» (стихи 16–17). И Моисей пророк о сем сице глаголет: «Дан львичищ скочит от Васана» (Второз., 33, 26). Подобно сим Иеремия пророк глаголет: «От Дана слышана есть ржания коней их, от гласа вопля поборник его подвигнута вся земля» (Иер., 8,16). На вся же сия пророчествия толкование творит в повести своей о антихристе святый Ипполит папа римский, вся бо оная в свидетельство приводя, сице глаголет: «Господу бо Исусу Христу по плоти на землю пришедшу от святыя чистыя Девы, Иудино племя восприимшу, от него же пришед царское сродство изъяви, по Иакову, иже в благословении возглашающему к своему сыну. Иудо, тебе восхвалят братия твоя, руце твои на плещу враг твоих. Скимен львов Иуда от леторасли сыне мой взыде. Возлег поспа яко лев и яко скимен, кто возбудит его. Не оскудеет князь от Иуды, ниже вождь от стегну его, дондеже приидет емуже щадится, и той чаяние языком. Виде ли Иаковли глаголы ко Иуде глаголемы, и на Господе исполняемы? Таковая же убо и о антихристе патриарх взывает. Темже якоже о Иуде пророчествова, тако и о сыне своем Дане. Ибо Иуда сын ему бяше четвертый, и Дан же бяше и той сын ему седмый. Да будет Дан змий при пути седя, хапля пяту коню. Змий убо кий сей? Но иже изначала прельстивый Адама. Но понеже многих ради достоит показати глаголемая не обленимся. Яко убо воистину от колена Данова хощет родитися и противитися мучитель сый царь и судия, лютый диавол. Рече пророк: Дан судит людем своим, яко сый едино племя от Израиля. Но речет кто, яко о Сампсоне речеся, яко от колена Данова родися, и суди людем двадесять лет: еже бо о Сампсоне отчасти бысть, совершенное же на антихристе исполнится. Глаголет бо Иеремия сице: спех от Дана услышим, борзостию коня его потрясется вся земля. И паки Моисей рече, скимен львов Дан искочи от Васана. Но яко да не погрешит кто о Спасе речей быти глагол сей. Да поставит ум, Дан рече скимен львов: колено именова Даново, объяви предлежащее, от нихже хощет сопротивник родитися. Якоже убо от колена Иудова раждается Христос, сице и от колена Данова родится антихрист». Ниже: «Обрезан Спас в мире бысть, и той подобие обрезан будет. Во образе человечи явися Господь, и той подобие во образе человечи изыдет. От еврей Христос возсия, и той от иудей родится». Ниже: «Во всех изравнитися хощет Спасу нашему сопротивник и сын погибельный. Ельма бо Спас миру спасти хотя род человечь, от чистыя и присно Девы Марии родися, тем же образом и сопротивник от скверныя жены изыдет на землю, родитжеся по привидению от девицы. Бог бо плотски к нам прииде, по плоти нашей, юже Сам сотвори Адаму и всем иже от Адама, разве греха. Сопротивник же аще и плоть приимет, но все в привидении. Како бо юже взем плоть, и ратовати ю имать в ню облекся? Непщую бо возлюбленнии, яко мечтательну плоть своему существу восприимет сосуд, сего ради и от девы якоже бы рещи родится, яко дух, аще и плоть многим явится, иже тогда» (Соборник, гл. 8) И святый Никифор Каллист глаголет: «Преди же Христова втораго пришествия приидет сопротивник Христу, и родится, якоже глаголет божественный Ипполит Римский, из жены скверны девицы от еврей сущи от племени Данова, иже бяше отрок Иакову. Обаче по привидению вся содеет и рождение и плоть и прочая вся» (синоксарь в неделю мясопустную). И в книге о правой вере, во главе 30-й, глаголет: «А той антихрист человек будет, беззакония сын. И родится, якоже глаголет Ипполит Римский, от девицы нечистыя, жидовки сущия, от колена Данова». Преподобный Ефрем в книзе своей сице глаголет: «Воистинну бо истинный Бог зачатся во чреве, Тойже воплотися, Тойже родися от святыя Девы в плоть нашу». Подобно же сему и о вразе глаголет: «Родитбося воистинну от жены скверны сосуд ему. Не сам родится сатана, но во образ его приидет прескверный яко тать» (слово 105). Во Апокалипсисе в седмой главе святый Иоанн Богослов, вчиневая вся дванадесяте колена Израилева, и от коегождо колена исчитая по дванадесяти тысящ запечатленных от ангела печатию живаго Бога, начинает же порядок племен не по обычаю и сродству сынов Израилевых, но во первых полагает колено Иудово, таже и прочая по ряду. Колено же Даново ко оным не причте, ниже помяну, но отнюд остави. Темже сие место внимательно смотрети надлежит двух ради сих вин, или обстоятельств: первое, яко чесо ради колено четвертаго Иаковля сына Иуду впреди прочих положи, а не перваго, Рувима? Второе, яко почто колено седмаго сына, Дана, не сопричте к числу прочих, но всячески претече? Еда той не сын бяше Иакову? Воистину сын, якоже и прочий. По вышереченных зде и по иных святоотеческих писаниих показуется, яко сего ради колено четвертаго сына Иаковля Иуды напреди положи, понеже то колено царское, и яко от того по плоти родися Христос Бог наш. О сем и апостол к евреом пиша глаголет: «Яве бо яко от колена Иудова возсия Господь наш Исус Христос» (Евр., 7, 14). А колено седмаго сына Иаковля, Дана, сего ради не сопричте к прочим, понеже от того родитися имать антихрист. Сице бо святый Андрей во Апокалипсисе место сие толкуя глаголет: «Назнаменати же и сие достоит, яко колено Даново, зане из него антихрист родится, того ради к прочим не причтеся» (глава 7).

И что писания сего яснейши о рождении антихриста, хотящаго родитися от колена Данова? И аще плотское сродство и колено ему писание являет, убо яве есть, яко чувственно быти ему показует. Аще бо он чувственно не родится от жены рода еврейска, от колена Данова, то и Христос разве не родился чувственно от жены рода еврейска, от колена Иудова? Ибо обоих – Христово и антихристово рождение Святое писание сказует неизменно от же девиц рода еврейска. О сем же всем известно, яко Христос чувственно родися от девицы рода еврейска: тако подобает и антихристу чувственно родитися от девицы рода еврейска. Но не тако родится антихрист, якоже родися Христос: како бо может таковаго врага рождение уподобитися Христову рождению: «Зачатие бо его безсеменно и рожество несказанно» (глас б, ирмос 9). Аще же и несказанно, обаче чувственно от Святыя Девы от рода еврейска родися, «и наземли явися, и с человеки поживе» (Богородичен воскресен 8-го гласа). Тако и антихрист чувственно имать родитися от скверныя жены блудницы, по привидению от девицы, от еврей сущия, колена Данова, от страны Галилейския. Якоже премудрый старец Филипп пишет в сочинении своея книги, нарицаемой «Душезрительное зерцало», сиречь беседословие души с телом, стих 91: «Душа. Да воистину ли сатана сам хощет воплотитися, и существо его с плотию растворитися, душу имущу и ум словесныя силы, и человек существенный будет, рабыня? Плоть: «Ни, Госпоже моя, ни непщуй се отнюд; но от родаубо Данова и страны галилейския, отроковица, девица мнимая, всескверная же всяко, родит тогда человека, от скверны блудныя: и в него сатана абие внидет, и все его действо приимет злейшее, быв во изступлении изумлен от него, и с ним вся лютая соделает и сотворит».

Зде ясно списатель «Душезрительнаго зерцала» показывает, что врагу сосуд родится от скверны блудныя, си есть, от растленныя жены, рода еврейска сущия от колена Данова, по видению от девицы. Подобится некако проклятый Христову рождению, якобы от девицы родится без Семене, якоже и Христос (якоже Ипполит глаголет: сего ради и от девы якоже бы рещи родится, яко дух). Зде списатель и страну показует, что ему родитися от девицы жидовки, которая есть от страны галилейския. Сему согласно доказывает и Афанасий Великий во ответах ко Антиоху князю, «что антихристу подобает изыти от Галилеи, отнюду же и Христос изыде» (ответ 110), и во образе человечи явится, и от человек видим будет, якоже рече апостол: «Тогда открыется человек беззаконию» и прочая (2 Сол., 2, 3). И Ипполит святый глаголет: «Во образе человечи явися Господь, и той подобие во образе человечи изыдет». И паки: «И начнут его зрети человецы истинно». Но токмо по списателю «Душезрительнаго зерцала» и по Иоанну Дамаскину сатану будет в себе носити. Первый глаголет: «И в него сатана абие внидет, и все его действо приимет злейшее, быв во изступлении изумлен от него, и с ним вся лютая соделает и сотворит». Вторый глаголет: «Проведый Бог безместное будущаго его произволения, попустит вселитися в него диаволу».

Но иже не хотяй последовати таковому любомудрию святаго писания, якоже в прочих местех любопрится, тако и зде глаголет: от еврейска рода девка не суть дева, но есть се жидовская вера, от нея же давно уже родися антихрист, сиречь нечестие.

О сем выше показахом во главе второй книги сея, яко ино есть антихрист, ион же есть нечестие, или ересь. И яко сие просто нечестие, или ереси суть, а не антихрист. Еще же, яко нечестие, или ереси, не от жидов произыдоша, но самоособне в языках быша. Темже деву жидовку не прилично есть зде мнети за жидовскую веру, но подобает разумети самого того человека естеством. Ибо сие не о вере жидовской святии отцы сказуют, но о деве, яже от колена Данова. Якоже бо от колена Иудова бысть святая Дева Богородица, от Нея же по плоти родися Христос: тако от колена Данова будет и сия скверная дева, от нея же имать родитися антихрист. Атпе ли же кто речет, яко сия скверная дева не естеством тако дева, но скверная жидовская вера, таковый да речет и о Деве Богородице, яко и Она да будет вера, а не девая естества человеческаго. Но сие рещи всякий стыдится, ведая, яко не мысленно и не от веры, но чувственно от человека – Девицы Марии родися Христос, иже и веру от небесе принесе и предаде. Тако и о антихристе мысленно рещи да постыдится, ибо и той такожде не мысленно от веры, но от человека, сиречь от нечистыя девы родится, иже и большее принесет нечестие.

Сие же двояким смыслом разумевати не безбедно есть, сиречь, еже бы колено Иудово и девую Матерь Божию, и рожество Христово чувственно: а колено Даново и деву от него сущую, и рождение антихристово аки бы мысленно. И таковое двоеразумие явно видится быти погрешение и несправедливость, понеже святии отцы во едином чувственном разуме не преносительно обоя сия приемлют, глаголюще: «Ельма бо Спас миру, спасти хотя род человечь, от чистыя и присно Девы Марии родися. Тем же образом и сопротивник от скверныя жены изыдет на землю. Якоже убо от колена Иудова раждается Христос, сице и от колена Данова родится антихрист. Во образе человечи явися Господь, и той подобие во образе человечи изыдет. От еврей Христос возсия, и той от иудей родится. Яко убо воистинну от колена Данова хощет родитися» (Ипполит, Слово об антихристе, Соборник, гл. 8).

Ельма же сия тако суть в самой истине, понеже сице Иаков-Израиль прорече, Моисей же и Иеремия пророцы предсказаша, яко от еврей от колена Данова имать изыти антихрист. Сие же их пророчество Ипполит святый в слове своем во свидетельство и утверждение приведе, и яснейшее толкование сотвори, обаче инуде не относит разума и глагола пророческаго, но таяжде яснейше сказует, яко той от еврей от колена Данова от нечистыя жены девицы родится. Такожде и святый Никифор патриарх цареградский и списатель книги о правой вере, и сочинитель «Душезрительнаго зерцала» – все сии сказуют антихристу родитися от еврей от колена Данова от скверныя девицы, а не преводя на иный мысленный разум, сиречь акибы сия не естеством дева, но жидовская вера или кое нечестие, или ино что таково, но яве тако быти сказуют Никифор Каллист и о правой вере списатель, Ипполита святаго во своих писаниях о сем во свидетельство приводят и тому последуют, якоже выше во главе сей писано. И аще убо сии и прочий вышеписаннии и инии таковии святии отцы о сем прямо по писмени сказуют, а таинственнаго некоего смысла не показуют, того ради и нам достоит такожде разумети, зане блаженно есть святоотеческому сказанию последовати, а не своему умышлению и погрешению подверженному умствованию, якоже нецыи творити обыкоша: иже не хотят тако о сих любомудрствовати, но свой некий таинственный приводят разум: аще хотя и свой, но Святым писанием мнятся утвердити, обаче писание взимают не от сего разума, но о ином чем реченное: аще же и о сих бывает, но и то в другом преводном разсуждении. Тем же, аще и писанием доказывают, но не бывает истинно таковое тех доказательство и мудрование, якоже зрится. Понеже в силе божественнаго писания многообразны суть разумения, аще и под единым именем речения, но начасте имут другий разум: якоже и выше в предисловии речеся о небеси и земли, о солнце и луне, и звездах, о горах и водах, и прочем.

Зде же о сих хотя мало нечто речем о горах и водах, чрез сия же и прочая объясняется. Убо существенне нарицаются горами и холмами чувственныя земленыя горы и холмы. И пресвятая Дева Богородица начасте горою нарицается (Даниил, гл. 2). Апостоли же и пророцы горами и холмами нарицаются (Маргарит, слово 13). И святая соборная и апостольская Церковь горою нарицается (Маргарит, слово 10, л. 528). Небо и небесная благая горами нарицаются (Соборник, гл. 6, ст. 14). Еще же сильныя жития сего (сиречь царие и князи и вей судии земли, и иже богатством изобилующим) и иже церковнаго чина сущии горами нарицаются (Апокалипсис толковый, гл. 6, зач. 18). И гордыя человецы горами нарицаются. И еретицы, сиречь о инославных учащий, яко и тии горами глаголются (Благовестник, от Марка, л. 69). И сатана, или диавол и вси беси горами и холмами нарицаются (Апокалипсис толковый, гл. 8, Евангелие толковое, неделя 10). Подобно и о водах: яве водами наричются чувственныя воды, ихже пием. И народы, сиречь вси человецы водами нарицаются (Благовестник, от Луки, л. 32, Апокалипсис, гл. 17). И Сам Той Христос Водою нарицается, и учение Христово водою нарицается, и Дух Святый водою нарицается (Евангелие толковое, неделя о самаряныни и неделя пятьдесятницы). К тому же и еще под именем воды и гор многия иныя вещи разумеются. И якоже о сих, тако подобно и о вышереченных, к тому же и о иных прочих, сице в священном писании разумеется, аще бо и то же едино имать наречение, но ину в себе носит смысла силу. Темже в таковом многообразном различных вещей под единым именем наречении, некто по неведению или по коей либо страсти своей может святое писание с подобающаго разума на ин разум прелагати: и с пристойнаго лица на ино лице, и с приличнаго времени на ино время неподобие и развратне преносити, себе же и прочих таковых, яков же сам он, прельстити. Сего ради чтущему святое писание должно есть благоразумно почитати, не гордостию и любоначалием, ниже завистию и тщеславием, но безпристрастно разсуждати.

Еще же не отрочно нужно есть чтущему разумети, что о чем речено и с каковым разумом, а не сливати вещи, сиречь еже бы взяти кое писание, не о том реченное, и примесити тое к другому разуму, якоже о сем творят нынешния покрещеванцы, иже не подобие с истаго разума на ин некий разум святое писание преносят, усильное ему противление творяще, якоже бы сице рещи: слышаще глаголющее о днех царствования антихристова: «Тогда глад крепок по всей земли, тогда рыдание неутешно, тогда плач безмерен» (Собор-ник, гл. 8). И паки: «Тогда глад будет велик, вещем всем превращающимся» и прочая (синоксарь в неделю мясопустную). Они же сим чувственно быти не приемлют, но токмо мысленно. Слышаще бо реченная в Евангелии: «И бысть глад крепок в стране той, не глад хлеба, но глад неслышания слова Божия» (неделя блуднаго сына). И Амосом пророком глаголанное сице: «Посланный глад на землю не глад хлеба, ни жажда водная, но глад неслышания слова Божия» (Амос, гл. 8). Сие же пророком глаголанное на все время состояния человеческаго, от Адама до скончания мира, ибо и Адам не услыша слова

Божия, рекше, преступи заповедь Сотворшаго и. Такожде и в Евангелии речено о человецех грешных, когда-либо буди удаляющихся от Бога неподобными делы и деяньми. Вышереченнии же сия прелагают на дни царствования антихристова. Подобно же сему преносят они речения развратне о солнце и о луне, о земли же и мори и о прочих многих таковых.

Темже хотящему разумети истинное, подобает во всяком писании опасне разсматривати время и лице и разум глаголющих и глаголемых. И аще сего не будет, то всяк таковый может абие прельститися и истины не познати, якоже о сем в Толковом Апостоле на листах 612-м, 636-м и 685-м пишется сице: «Нужно есть, божественная писания разумети хотящим, истязовати со многим опаством плоды и лице и ум глаголющаго. И аще сего не соблюдем, многия наведем сомневания, и вся опровергнутся, и ни единой вещи истинно разсудити не возможем. И того ради многия в ереси различныя впадают. Соблажняются убо не храняще меры, и егда на едины страну уклоняющеся не благо ходити начинают, тогда не зрят на прочая свидетельства святаго писания, имже бы от умышления своего востягнулися, и в той истине и воздержании пребыли, яже с обоих свидетельств умерена».

Обретается убо в священном писании нечто сицево, яко некая бытия чувственно бывшая или быти хотящая, от неких святых отец оная преводне и приточне приемлема и сказана, якоже им лепо к полезному, и сего в писании на мнозе обретается. Аще же тому единому преносному и приточне сказанному смыслу последовати будем, уклоняющеся на ту едину страну, а не зряще на сущия бытия и прочая свидетельства святаго писания, и аще не истязующе ума глаголющих, но от инаго разума к другому будем относити и показовати (якоже вышереченнии), то может изобрестися и доказатися Святым писанием, яко не точию антихрист чувственно не будет, но яко и Христос не воплотился есть и не бе на земли чувственно. И что бы таковаго окаянства и невежества горши было! И како сие будет? Может сие быти сицевым показанием. В книге Числ, в главе 24-й, пишет Моисей о Христе, глаголя: «И бысть Дух Божий на Валааме, и восприим притчи своя, и рече: возсияет звезда от Иакова, и востанет человек от Израиля, и погубит князи моавли, и пленит вся сыны Сифовы». И в книге Бытия глаголет: «Востав Иаков на нозе и иде на землю восточную к Лавану Вафуйлеву сирску, к брату Ревекки матери своея, и даде ему Лаван обе дщери своя Лию и Рахиль, ими же оженися Иаков, и родишася ему сынов 12 от жен его и от рабынь их. И разбогате муж зело, и бысть ему скот мног, волове, рабы и рабыни, и верблюды и ослы» (Быт., 29 и 30).

В другом же писании о сих сказуется сице: «Израиль же нарицается всяк зряй умом Бога и разумно слышай божественная» (Евангелие толковое на Введение Богородицы). И паки: «Израиль бо глаголется ум зряй Бога» (Соборник, гл. 61, 5). А сыны его – помыслы, а скоти его – безсловесныя части души, ярость и похоть (Благовестник, от Иоанна, л. 66). И паки: «всяко естьубо Лаван мир сей, Рахиль же – всяка душа зрительна, Лия же – всяка душа деятельна» (Соборник, гл. 60, стих44). Ащеубо Лаван – мир сей, Израиль – ум, зряй Бога, Лия же и Рахиль – душа, а сынове их – помыслы, то где чувственный Израиль-Иаков со своими женами и сыновы? – Ибо по сему писанию не были они чувственно. И аще их не бывало, убо от кого чувственно Христос родися от колена Иудова, иже бяше сын Израилю?

Еще же нечто подобно сим и во Евангелии обретается: «Бе же некто боля Лазарь от Вифании, от веси Мбриины и Марфы, сестры ея. И рече Исус учеником своим, Лазарь друг нашуспе». И паки: «По мале рече, Лазарь умре» (Ин., зач. 39). В другом же писании о сем сице сказуется: «И ныне всяк человек умираяй Лазарь нарицается» (Толковое Евангелие и синоксарь в суботу праведнаго Лазаря). И паки инде: «Друг бо умерый – ум, сестры же – плоть и душа». И еще на ином месте глаголет: «Разумей же Марфу убо действительную добродетель, Мбрию же видение» (Благовестник, от Иоанна, зач. 39, от Луки, зач. 54). И паки во Евангелии повествуется: «Егда восхоте Исус Господь ехати во Иерусалим на вольную страсть, тогда ученицы приведоша жребя ко Исусови и вседе на не. Предходящии же и вслед грядущий вопияху глаголюще: осанна благословен грядыи во имя Господне, и вниде во Иерусалим Исус» (Мр., зач. 49). Глаголет евангелист, яко вседе Господь на жребя, или, якоже инде речено, на коня. Что есть конь? Господь сед на коня, на люди язык (Благовестник, от Луки, л. 208). Ирмос же сице поется: «Вседе на коня на ангелы Твоя Господи». Или инде: «на апостолы Твоя Господи, и прият руками Си узды их, и спасение бысть еждение Твое» и прочая. И вниде Исус во Иерусалим: что же есть Иерусалим? Иерусалим есть мирное житие (Евангелие толковое, неделя 25). Егда же Господь воплотися и на земли явися, и с человеки живяше, тогда со ученики Своими хождаше по земли пречистыми Своими стопами, яко да освятит ю хождением ног Своих, и плаваше в мори в корабли, да освятит воды Своим шествием. В другом же смысле землю человеки наричет, или землю сердца человеческая нарицает. А морем житие се нарицает или называет (Апостол толковый, зач. 312, Благовестник, от Марка, л. 23). Еще же в толковом Евангелии о сих сице глаголет: «Разумеем и мы братие, яко корабль – Христова Церковь в море жития в мире сем обретаема» (неделя 5 и 23). Подобно же сим обретается в божественном писании неисчетное множество о различных действах, лицех же и вещех, яже чувственно бывшая, мысленно же не приемлются: обаче же зде преминуем за малостию книги сия, разве мало нечто показахом токмо о сих, что есть Иаков-Израиль, и что жены его, и сынове его, и скоти его, и что есть Лазарь и сестры его, и что жребя, нань же Христос вседе, и что Иерусалим, и что море и корабль, в нем же Христос плаваше. О сих же убо всех всякому человеку есть известно, вей бо со опаством знают, яко вся сия реченная, лица, вещи же и действа чувственно были во свое их тогдашнее время. Обаче святии отцы, идеже аще им потребно бысть, приемлют преводне в таинственном смысле, аки бы тое разумно, а не чувственно бывшее. Подобно разумети долженствует писание и о антихристе, чувственное бытие его, быти хотящее, любомудрствовати. Аще же некая писания обретаются о нем и по таинственному сказанию, то таковая разумевати надлежит на подобие оно, якоже и о Христе рехом: занеже в священном писании начасте находится, яко чувственная лица и действа в разумная относятся.

Еще же и обычай таков имут святии учители, яко и едину кую-либо вещь во многоразличное свидетельство приимати, и многообразное толкование на ню издавати, ово ради приключившейся им тогда таковой потребы, ово же ради болыпаго и яснейшаго ведения, и ради человеческаго добронравия и душевнаго исправления и спасения. Сего ради и о антихристе сказуют существенне и преводне или чувственне и тайнодейственне. Темже обоя сказания достоит опасне наблюдати, чувственная приимати и тайнодейственная не отвергати. Обаче чувственная и разумети подобает чувственно, тайнодейственная же тайнодейственно. Сиречь яко сия тайна беззаконию отдавна и прежде деяшеся, и ныне деется, и по сем деятися имать: и се есть тайнодейственне. Чувственне же сице разумети надлежит: яко и доныне еще истый той антихрист не прииде в мир, но приити имать.

И аще сице о сем будем разумевати, то по всему святому писанию будет сходно и святых отец сказанию всюду обрящется согласно. Аще ли кто будет разумевати таинственне паче, и последовати по смыслу преносному токмо, то никак не возможно будет соедините святых отец сказания, но большая половина останется туне и ни при чем, аки бы лживая. И не точию аки бы кий святый един другому обрящется несогласен, но кииждо их и сам к себе возмнится быта противен. Прочее же сокративше сие, показати время о имени сего врага и местника – антихриста.

Глава 5

О имени зверине, сирень антихристове

Якоже убо Христос Господь Бог наш многа имать имена, яже есть сия: Исус, Слово Божие, Восток, Еммануил, Велика Совета Ангел. О Исусе рече ангел Богородице: «И се зачнеши во чреве, и родиши Сына, и наречеши имя Ему Исус» (Лк., 1, 31). Исаия же пророк глаголет: «Се девая во чреве приимет и родит Сына, и нарекут имя Ему Еммануил» (Исаия, 7, 14, Мф., 1, 23). Таможе речено: «Нарицается имя Его Велика Совета Ангел». Темже и ирмос поется: «Бог сыи мира Отец щедротам, великаго совета Ти Ангела, мир подавающа послал еси нам» (глас 1, песнь 5). И паки ирмос: «Исаия ликуй, Девая бо име во чреве и породи Сына Еммануила, Бога же и человека, Восток имя Ему» и прочая (глас 5, песнь 9). К сим же и еще многа имать Христос имена: нарицается Жизнь, Свет, Пастырь, Овча, Камень, Путь, Мышца, Дверь, Агнец и прочая. Еще же нарицается Тельцем, Львом, Единорогом, Солнцем и Звездою Утреннею, и Денницею и прочими многими. Вся же сия и прочая имена Христова являют нам, еже о нас Его благоволение, правду же и избавление, владычество Его и смирение и прочая устроения. Тако и антихрист многа имать имена ради его злонравия и лукавства, гордости же и лютости и прочих его коварств. Нарицают его святая писания змием, зверем, львом и зверем седмиглавым, врагом, губителем, диаволом и сатаною и бесом преисподним, сопротивником и супостатом, человеком греха и беззакония, мерзостию запустения, сыном погибельным и беззаконным, злым вождем, агнцем неправедным, древним завистником, истовым пакостником и прочими таковыми. Обаче от сих некая имена обща суть: понеже могут нарещися и нарицаются во Святом писании теми именами не антихрист точию, но и предотечи его, еретики и мучители, и прочий злии и беззаконии человецы. Темже убо есть имя некое собственное, которое свойственно есть самому тому единому антихристу. Сие же во святых книгах написано нигде не обретается, токмо святый Иоанн Богослов во Апокалипсисе едино число имени сего по счету являет глаголя: «Тогда никтоже возможет ни купити ни продати, токмо кто имать начертание, или имя зверя, или число имени его. Зде мудрость есть, иже имать ум, да сочтет число зверино, число бо человеческо есть, и число его 666». Толкование. «Истое число имени его якоже и прочая писания о нем время явит и искушение тогда бодрствующим. Аще бо была бы потреба яве разумети таково имя, иже бы узрел его открыл бы, но не изволи божественная благодать во святых книгах написанному быти пагубному имени его. Искушением же многа имена может кто обрести число сие имуща, по греческому языку и по иному, якоже се: лампетис, венедиктос, злый наставник, истовый пакостник, древлеклеветник, агнец неправедный. От сих бо имен от противных лести его наречеся, свою славу в студе полагаяи» (Апокалипсис толковый древлеписьменный, гл. 13). В печатном же киевопечерском, по сказанию святаго Андрея Кесарийскаго сим именам сицево положение: «лампетис, сиречь освеченный, тетиан – солнце, латеинос – латинник, венедиктос, еже сказуется благословенный, негли по подражанию воистину благословеннаго Христа Бога нашего, какое одигос – злый наставник, палаи васканос – древлезавистник, алифис влаверос – истинновредитель, амнос адикос – агнец неправедный». О сем числе имени антихристова Ипполит святый в Соборнике глаголет: «Еже непщую, не бо опасно свем сего писания, многа бо имена в числе сем обретаются, суть же сия: злый вождь, агнец неправедный, древлезавистник, потрясет вельми, титин, еже преисподнии бес». И сия убо суть тако о имени антихристове.

Нецыи же сказуют, якобы сие число 666 не имя знаменует, но время пришествия и убиения антихристова, обаче святии отцы Ипполит Римский и Андрей Кесарийский не о летах разумеют, но о имени его. К сим же еще и Ириней святый сказует число сие не о летах быти, но о имени его. Сказание же таково сего святаго Иринея обретается во Апокалипсисах древлеписьменных (зач. 38), аще же и не во всех весьма, обаче во многих. Есть же и собственный толковой Апокалипсис сего святаго Иринея.

Ельма же святии отцы о сем 666 числе сугубообразно разумеют: нецыи убо о имени антихристове разумеют, якоже рехом, друзии же о времени пришествия его. Темже обоя сия достоит приимати неотвергающи. Обаче мудрость немала видится быти, еже бы сие число в лета полагати, и от коего времени исчисление исполнения лет начати. Сего ради и Богослов о сем наведе рек: зде мудрость есть: ибо аще кто считать будет от времени воплощения Божия Слова, то явленно есть, яко лета ббб давно проидоша и скончашася близ шестаго Вселенскаго Собора, и от нынешних времен дальнаго разстояния. Темже отсюду познавается, яко не от того времени считати надлежит. Аще ли кто считать будет паки от Рожества Христова и положит пред числом оным тысящу лет, и тако всего числа будет 1666 лет. Обаче сицевое разумение не согласно будет с вышереченными святыми отцами Иринеем и Ипполитом, и Андреем, понеже тии не прилагают тысящу, якоже речеся, но токмо числя ббб, а не более: темже тысяща сия противна будет оных святых отец разумению и исчислению, еще же и самому тому Иоанну Богослову наипервее воспротивоборствует, зане и сам он не глаголет тысящу, но токмо ббб. И сие число не о летах полагает пришествия антихристова, но о имени его глаголет. Ащели же и в лета положит кто, то не от Христова воплощения считать достоит, но от некоего инаго нарочитаго времени, Богу ведомаго, и от имущих дух дарования разумеваемаго и познаваемаго. Ибо и о Христове воплощении, и Иерусалима запустении, и евреев распленении предсказанное число лет седмицами, еже у Даниила пророка обретается. Нецыи же из нынешних числят от Адама, но несть тако, и о сем ниже речется святых отец сказание.

Темже убо и вышереченнии святии отцы, с ними же и любомудрец Иустин Философ, иже и мученик бысть, вей сии кииждо их во свое время на Апокалипсис толкование творяще, не уставляют непокровенно времени от негоже бы начати сих лет числити исполнение и не прилагают тысящу, но токмо то едино ббб число сказуют, якоже их толкование на сие число свидетельствует: и сие же не о летах разумевают, но о имени зверине явственне глаголют. Сего ради и сочинитель книги о правой вере в 30-м слове тоя книги, егда положи сие число в лета и приложив ко оному тысящу, тогда не всячески просто со извещением изрече, аки бы по исполнении сих лет приидет абие и восцарствует последний самый той антихрист, но двояким и не весьма неотрочным, якоже зрится, смыслом разумевая, паче же страхом ны обуздывая, сице глаголет: «Кто весть аще в сих летех 1666 явственных предотечев его или того самого не укажет?» Разум же в сих словесех сицев видится быти: кто весть, сиречь убойтеся, яко уже приближися о антихристе реченное число, яве яко и скончание мира, чему надеяться, кто бы весть, аще в сих летех 1666, того самого антихриста не укажет, негли бо укажет: вемы бо яко будет, но не вемы времене уреченнаго, негли на сие число приидет: аще ли же и не приидет, но всяко что недоброе случится. Темже и опасатися того повелевает, ибо ниже (яко сице имать) явственно сказует глаголя: «По тысящи лет от воплощения Божия слова Рим отпаде со всеми западными странами от восточныя Церкве. В пятьсотное же и девятьдесять пятое лето по тысящи жителие в Малой России к римскому костелу приступили и на всей воли римскаго папы заручную грамоту дали ему Се второе отрвание христиан от восточныя Церкви. А по исполнении лет числа 1666 не непотребно и нам от сих вин опасение имети, да не некое бы что зло пострадати по преждереченных исполнения писания свидетельств, яко настоит день Христов, якоже рече апостол. И несть ли быти готовыми подобает, аще кто достигнет тех времен, на брань с самим диаволом».

На сем месте нецыи ныне не точию антихриста не пришедша не познавают, но наипаче утверждают, акибы от сих 1666 лет стоим уже на брани с самим диаволом. Стоим убо на брани с диаволом не от сих лет токмо, но во все время жития нашего, якоже рече апостол: «Несть наша брань к крови и плоти, но к началом и ко властем, к миродержителем тмы века сего, к духовом злобы поднебесным» (Ефес., 6, 12). И паки тойже глаголет: «Оружия воинства нашего не плотская, но сильна Богови на разорение твердем» (2 Кор., 10, 4). И Петр апостол глаголет: «Трезвитеся, бодрствуйте, зане супостат ваш диавол, яко лев рыкая, ходит, искии кого поглотити» (1 Петр., 5, 8). А о сем речении, «аще кто достигнет тех времен на брань с самим диаволом», подобает разумети, которых тех, не сих 1666, но тех, сиречь самых последних времен, хотящих быти при самом том антихристе, тогда бо с самем сатаною очевидно братися имут, по сказанию святаго Кирила Иерусалимскаго и Стефана Зизания, о чем подробнее будет сказано ниже во главе 17-й. Тако и сей учитель, то есть списатель «Книги о вере», тоже сказует: по внегда бо рещи ему римлян и унитов от восточнаго православия отпадение, и нам того на сие 1666 число опасение: потом и оная времена, по сих хотящая быти, на брань с самим диаволом, наскоре предложи. На подобие то, якоже во Евангелии, егда рек Господь своим учеником о разорении Иерусалима, и тогда внезапно абие о антихристе беседует, глаголя: «Тогда аще кто речет вам, се зде Христос или онде, не имите веры». От толкования: «А еже тогда, не помышляй, яко егда вышереченная о Иерусалиме будут, но веждь, яко свое есть писанию се: якоже и Матфей по рожестве Христове глаголет: во днех онех прииде Иоанн. Которых днех: убо еда ли по рожестве Христове? Ни: но нарочно. Тако убо и зде глаголет тогда: не егда Иерусалим запустеет, но по временем пришествия антихристова» (Благовестник, от Матфея, зач. 99 и от Марка 60). Еще же и в беседах евангельских сказуется: «На горе Елеонстей седящу Исусу, и о иерусалимском запустении и о пришествии Его ученицы Его уведети искаху. Весте же разстояние времен: рек бо о разорении Иерусалима, и соверши о сем слово, и имея о скончании мира глаголати, приведе: тогда сия будут» (на Матфея беседа 10). Тако и зде глаголет, аще кто достигнет тех времен, рекше самых последних, приближенных уже дневи втораго пришествия Христова. Или иносказательне может и сице разуметися: понеже святая соборная и апостольская Церковь Духом Святым провиде большую брань, хотящую быти от диавола на сия времена 1666 лет, сиречь наибольшее смятение и развращение, соблазны и размешение в вере и человецех. Того ради, яко чадолюбивая мати, заранее о сем предсказует своим чадом, якоже чрез прочих священных учителей, тако и чрез сего опасатися повелевает, дабы внезапу что не пострадати. Сиречь опасне блюстися развращений и новизн от Рима или от инуду негде грядущих, но пребывати непозыблемо в древлеправославных святоотеческих содержаниях.

Однако видится, яко не с тем тако предает, акибы по исполнении сих 1666 лет абие начнется самосущественное царствование антихристово, сего не глаголет, но сице рече: тогда не непотребно и нам опасение имети, да не некое бы что зло пострадати по преждереченных. Сиречь, подобает опасатися, дабы такожде не пострадати, якоже и преждереченнии римляне и литовцы, тии бо воистину пострадали, ибо по отступлении от восточныя Церкве впадоша во многоразличныя развращения и ереси. Такожде по сему проречению и зде в Белицей России на сия лета нечто немало пострадали, зане же древлеправославныя святыя книги от церквей аки непотребны изнесши, в тех место новыя приняли, в них же обретаются на мнозе некия нововводныя чины же и уставы, и несогласия со староцерковными святыми книгами, противности же и порицания древлецерковным православным содержанием.

Темже убо яве есть, яко долженствует до сего точию оное проречение относити, а не самого антихриста пришедша на сия лета помышляти. Ибо якоже выше во главе второй книги сея показахом, яко отступление, или нечестие, или ереси не суть антихрист, но сия ино есть, и просто ереси, ино же антихрист. Тако и сей списатель «Книги о вере» явственно сих разньство показует, о антихристе сице глаголет: «А той антихрист человек будет, и родится, якоже глаголет Ипполит Римский, от девицы нечистыя, жидовки сущия от колена Данова». А о ересех рек, яко «по исполнении лет числа 1666 не непотребно и нам от сих вин опасение имети, да не некое бы что зло пострадати по преждереченных». Преждереченнии же кое зло пострадали? Убо ли яко антихрист в то время по тысящи лет к ним прииде? Ни: сам бо выше рек, не яко тогда уже прииде, но родитися ему и быти в будущее время глаголет. Темже кое зло они пострадали, явственно сказует, яко от восточныя Церкви отступили: такожде и зде в России на сие реченное время таковаго же некоего зла опасатися повелевает, еже и бысть, якоже рехом.

О антихристове же пришествии божественное писание не предает непокровенно летняго исчисления, еже бы в кая лета быти ему, но токмо то едино явственно сказует, яко будет на кончине мира: время же определенное закрывает числом неразумным, яко тако разсудися в смотрении неизследованных судеб Божиих. Тем и сам той Иоанн Богослов являет, яко сие число не о летах паче разумети надлежит, но о имени антихристове, рече бо: «Начертание или имя или число имени его» (Апок., гл. 13). Число же сказует токмо ббб, а тысящу не предает. Аще бы он разумевал сие число о летах пришествия антихристова на сие время 1666 лет исполнения, то и тысящу приложил бы, и не бы рекл число имени его, но глаголал бы число лет исполнения. И паки не бы глаголал, зде мудрость есть. Кая убо мудрость есть, поряду лета считати? А яко тысящу лет не предает и не глаголет лет исполнения, но глаголет «зде мудрость есть»: убо явственно открывает, яко сие число не о летах пришествия антихристова, но о имени его есть. Сего ради и вышереченнии святии отцы не в лета сие число полагают, но имя антихристово исчисляют буквами, число сие содержащими, обретающимися во имени его. И образнеуподобляюще, для ведения многая имена представляют, а во всех исчитается число ббб.

Нецыи же из нынешних людей, ругающеся сему, нас подсмеивают, яко мним исчислятися письменами имени антихристову: обаче во свое время смех оных, сему ругавшихся, в плач претворится, зане не наше есть се умышление, но святоотеческое сказание, еже выше во главе сей положихом. И несть сие необычно, есть бо и инде во святом писании таковое имен исчисление, якоже о приснодевей Марии Богородице сице зрится: «Егда бывшу гладу во еллинех велику зело, храм сотворше, и вшедше в кумирницу вопросити Аполлона кумира своего, коему богу нарещи храм. Прорцы нам, о пророче Аполлоне! Чий будет храм сей, и чему есть быти. Аполлону же не попущаему молчати, но женому от обоюду от неизглаголемыя силы, отвеща им, глаголя сице: аз бо поведаю вам единаго Бога вышняго Царя, Егоже слово без тля, а в Пречистей Деве носим будет, Тому будет храм той. Имя же Девицы дважды “о”, дважды “s”» (Книга Кирилова, л. 118). И се есть число имени Пресвятыя Богородицы Марии, ибо егда сочтется число всех литер во имени сем «Mapia», тогда обрящется всего 152.

И в книге «Алфавите» древлеписменном толкования иностранных речей в письмени 4-м, списателя книги «Диоптры» имя исчисляется письменами сице: «Диоптра, сиречь зерцало, сию книгу написал Филипп Философ, имя его содержит число 980, ихже слог сицев: «Ф1Л1ППОС». Такожде и в других местех святаго писания обретается сей обычай, яко имена литерами исчисляются. Подобообразно убо и антихристово имя числом изображается. Не восхоте бо божественная благодать во святых книгах написану быти пагубному имени: но токмо число имени того являют, сиречь сочетши число в письменех во имени его обретающихся, и всего числа будет в них ббб, якоже выше во многих именах объявися.

Однако разумети подобает, не яко толико имен антихристу будет, елико гадательне речеся, но зрится, яко едино будет ему имя по подобию вышереченных, которое заключит в себе вышереченное число ббб. О сем же не весьма известно, яко которым языком может тогда изследовано быти число имени его, понеже Апокалипсис написан от святаго Иоанна Богослова языком греческим: самое же имя антихристово негли языком еврейским наречено будет: ибо от еврей родится и обрежется (по любомудрию святаго Ипполита), сего ради и именем еврейским языком должен назватися.

Еще же и сие знати потребно есть, яко убо той антихрист нарицается или изображается змием или зверем и прочими таковыми: тогда не подобает помышляти тако, аки бы он во образе змиеве или зверине будет. Якоже убо Христос нарицается Тельцем, и Львом, и Агньцем и изображается о седми рогах и седми очах: все же сие не вид Христов значит, но иная благая Его устроения: вид же Его, или зрак, есть человеческий, якоже апостол глаголет: «Се же да мудрствуется в вас, еже о Христе Исусе, Иже во образе Божии сыи не восхищением непщева быти равен Богу, но Себе умалил, зрак раба приим, в подобии человечестем быв, и образом обретеся якоже человек» (Филип., 2, 5–7). Тако подобно и о антихристе разумети достоит, яко сия его изображения и наречения змиева и звериная и прочая таковая не вид его показуют, но лукавство и злый его нрав, суровство, яд же и свирепство, и прочее таковое являют. Вид же человеческий будет, а не ин каков, якоже священное писание свидетельствует, еже выше во главе второй изъявися.

Глава 6

Сказание о последней године, и о последнем часе

Выше показахом, яко исчислением лет не возможно познати пришествия антихристова, занеже в кое время определенное принта имать, отнюд не известно: токмо же то едино известно, яко приидет в последнее время, на кончине мира.

На сие же рекут нецыи глаголюще: ныне уже последнее время, ныне кончина мира, якоже Иоанн Богослов глаголет: «Дети последняя година есть, и якоже слышасте, яко антихрист грядет, и ныне антихриста мнози быша, от сего разумеваем, яко последний час есть» (1 Иоанн., 2, 18). Такожде и Павел апостол предает глаголя: «Егда прииде кончина лету, посла Бог Сына Своего единороднаго» и прочая (Гал., 4, 4).

Отвещаем к таковым: яко антихрист грядет, и ныне антихристи мнози быша, о сем показано выше во главе 3-й. А о последней године и о последнем часе сие двояким смыслом может сказатися. И первое сказание сицево есть, еже во Апостоле толковом на сей стих сказуется: «Научив убо на дела благая волею Божиею и укрепив, учит й от времене, яко при дверех уже мира сего конец. И се есть знамение, еже злобе умножитися» (Апостол толковый, л. 196). Понеже праведнии мужие Духом Святым зряще и видяще отдалена будущая, яко близ сущая, или яко настоящая вменяюще. Темже и Иезекииль пророк глаголет: «Се день Господень, се конец пришел есть» (Иез., 7, 10). И Иоиль вопиет: «О люте мне, яко близ есть день Господень» (Иоиль, 1,15). И Софоний взывает: «Яко близ день Господень великий, близ и скор зело» (Соф., 1, 14). И Сам Господь во Евангелии глаголет: «Аминь аминь глю вам, яко грядет час, и ныне есть, егда мертвииуслышат глас Сына Божия» и прочая (Ин., 5, 25). И апостолом Своим глаголет: «Вы искони со Мною есте» (Ин., 15, 27). И апостол Павел глаголет: «Благословен Бог и Отец Господа нашего Исуса Христа, якоже избра нас о Нем прежде сложения мира» (Еф., 1, 4). И Петр апостол сказует: «Избавление честною кровию Своего Агньца непорочна и пречиста Христа, предуведеннаго убо прежде сложения мира» (1 Петр., 1, 20). И во Апокалипсисе глаголется: «Агнец заколенный от сложения мира» (гл. 13, 9).

Всем же есть известно, яко заклан бысть Той Агнец Христос, по сложении мира в лето 5533-е, вся бо Духу Святому и дальняя яко настоящая вменяются. Сего ради Иаков апостол сице глаголет: «Долготерпите убо братие моя, утвердите сердца ваша, яко пришествие Господне приближися» (Пак., 5, 7). Такожде и Павел вопиет: «Еще бо мало елико елико, грядыи приидет и не укоснит» (Евр., 10, 37). И паки тойже: «Сия же вся писана быша в научение наше, на няже концы век достигохом» (1 Кор., 10,11). Сию же строку святый Иоанн Златоуст в беседах сице толкует: «Егдаже речет концы веком достигоша, ничтоже ино глаголет, разве яко настоит прочее судище страшное» (Беседа 23, на послание к Коринфом). И еще тойже глаголет: «Яко час нам уже от сна востати, при дверех бо рече суда время стоит. Близ воскресение, близ Суд Страшный, близ день аки пещь горящая» (Беседа 24, на послание к Римляном). И паки тойже рече: «Се к кончине прочее достигохом, множайшее бо во вселенней проповедася Евангелие: прочее настоит кончина, убоимся возлюбленнии» (Нравоучение 21, на послание к Евреом). И еще тойже в Маргарите глаголет: «Ельмауже к нам конец веков приспе» (слово 13). Пн паки рече: «Бежим мира чада, и яже в мире, яко время скончания приближися» (Алфа и Омега, гл. 44). Подобно и Ефрем преподобный в слове о антихристе глаголет: «Да не неверуем убо, яко позде се будет на земли, время бо приближися, и на самой громаде злобы сея стоим вей, и отнюд веры не емлем» (слово 105).

Убо якоже рехом, яко святии будущая и дальняя зрят, аки близ сущая, или паче аки настоящая: и не точию аки настоящая, но аки бы уже прошедшая. Понеже что для нас кажется будущим, то в Божием предведении и определении есть яко прошедшее. Сего ради и пророцы начасте будущия вещи именем времене прошедшаго нарицают. Сице Давыд о Христе глаголет: «Векую шаташася языцы и людие поучишася тщетным, предсташа царие земстии и князи собрашася вкупе, на Господа и на Христа Его» (псалом 2). Тогда не у бо сия быша. И инде глаголет: «Сего ради помаза тя Боже Бог Твой елеом радости паче причастник Твоих» (псалом 44, 8). Сие же не бысть тогда, егда сице речеся. «Егда бо бысть плоть Слово (пишет Иоанн Дамаскин), тогда именоватися глаголет Христа Исуса, ионеже помазася елеем радости, сиречь духом от Бога Отца. Ведательно, яко многащи употребляет божественное писание прошедшаго времене вместо будущаго, яко по сих на земли явися и с человеки поживе. Не у бо явися, ниже поживе Бог с человеки, егда сия глаголахуся. И на реце вавилонстей, тамо седохом и плакахом, не у бо сия быша» (книга 4, гл. 6).

И якоже убо сии вышереченнии святии отцы к сим же и прочий, паче же и пророцы и апостоли глаголют. Яко близ день Господень, и яко конец пришел есть, и настоит судище страшное, и прочая. Зряху бо они, якоже речеся, будущая аки настоящая. Тако и Иоанн Богослов глаголет: «Дети, последняя година, и последний час есть». Аще же бы тогда уже во время пророков и апостолов конец пришел есть, и беяше последняя година и последний час, и настояло судище страшное, то что бы было доселе? И како продолжися оттоле и даже доныне мирское стояние и век человеческий: и не бысть разрушения и кончины и втораго пришествия Христова даже и до днесь? Темже отсюду познаваем, якоже святии пророцы и апостоли, тако и сей, рекше Иоанн Богослов, зря будущая яко настоящая, и дальняя яко близ сущая, и оттоле даже до скончания мира все настоящее житие вменяет, аки едино лето, или аки един час, противу неисчетной безконечности жизни будущия, тако рек: зане же един день пред Господем, яко тысяща лет, и тысяща лет яко день един. Темже и святый Иоанн Златоустый все житие настоящее за едино мгновение полагает (нравоучение 9-е на 1-е послание к Коринфом и нравоучение 2-е на послание к филиписеом). Подобно и прочий святии о краткости жития сего и приближения кончины и втораго пришествия Христова глаголют. Однако видится, яко не с тем, аки бы толь кратко житие се, или аки бы тогда уже приближися скончание мира и второе пришествие Христово, но противу жизни будущаго века толь кратко житие се, егоже они за ничто вменивше, а будущее житие и второе Христово пришествие всегда пред очима аки близ имуще, тако глаголют, якоже выше речеся. И се есть сказание первое о последней године и о последнем времени и часе.

Другое же сказание сицево есть: егда святии апостоли глаголют «дети, последняя година» и паки, егда прииде кончина летом, и прочая подобная сим, то от сих ясно показуется, яко и тогда при воплощении Христове и при апостолех уже бе последняя година, или лето, сиречь последнее время. Темже егда убо услышим глагол о последнем времени настоящих ныне лет, то не подобает помышляти определенное некое время, кончину мира сего являющее: но разумети достоит о времени неопределенном, понеже сугубо разумение имать время последнее. Есть убо время последнее определенное, егоже предел всем есть известен, яко всякое лето, всякий месяц, всякий день и час определены суть времена и кончина их. Ино же есть время последнее неопределенное, егоже кончины ведати невозможно. Тако егда видим человека состаревшася, глаголем, яко человеку сему последнее уже время: аще же и вемы, яко последнее, обаче неопределенное, ибо не знаем известно, когда той состаревшийся скончается. Тако подобает разумети и о последнем времени мира сего. От рожества убо Христова, и от времен святых апостол наста последнее время, но та кончина и последнее время отнюд неопределенно. Сего ради весь век мира сего, от начатка его и даже до скончания, изобразуется от любомудрых веком жития единаго человека. Понеже человек в божественном писании нарицается мир вторый и мир малый, зане вся в нем обретаются та, яже имать мир великий. Сей же мир малый, сиречь человек, имеет три степени: юность, мужество и старость. Тако и великий сей мир имеет три степени, яже суть три закона. Первый закон естественный, от Адама даже до Моисея, и се есть юность мира. Вторый закон Моисеов от Моисея даже до Христа: и се есть мужество мира. Третий закон евангельский, сиречь новая благодать: и се есть мира старость, и последняя година, о ней же рече святый Иоанн Богослов: «Дети, последняя година есть» (о трех законах зри в Благовестнике, от Луки зачало 70, л. 141).

Еще же и инем образом изобразуется. Сей убо малый мир, сиречь человек, имать пять степеней, сиречь пять времен, по нихже шествуя от единаго в другое преходит даже до скончания своего. Первое время – младенство, второе – отрочество, третие – юношество, четвертое – мужество, пятое – старость. Тако и великий мир, или век сей, имать пять степеней, сиречь пять времен, от нихже от единаго в другое преходит, шествуя до скончания своего. Первое время – от Адама до Ноя, и се есть младенство мира. Второе – от Ноя до Авраама, и се есть отрочество мира. Третие – от Авраама до Моисея, и се есть юность мира. Четвертое – от Моисея до Христова перваго пришествия, и се есть мужество мира. Пятое – в самое пришествие и оттоле даже до скончания, и се есть мира старость и последнее время, сиречь последняя година, о ней же рече святый Иоанн Богослов: «Дети, последняя година есть» (о пяти временах века сего зри в Большом Соборнике на листу 684-м).

Убо и о последнем часе сему же подобно сказание. Якоже бо малаго сего мира, сиречь человека, вся его жизнь аки единаго дне в пяти часех изобразуется, наподобие реченных пяти степеней, имать же сице. 1) Первый час до заутра, сиречь от юна возраста. 2) Третий час, иже есть двадесяти и пяти летом. 3 и 4) Шестый же и девятый час, иже по тридесяти летех в совершение возрасте мужеском. 5) Единонадесятый час в старости (о сих часех человека зри в Благовестнике, от Матфея зачало 80).

Тако и великаго сего мира весь век, аки единаго дне, в пяти часех по книге «Алфа и Омега» описуется. 1) Час первый заутра, еже есть начало света – от Адама до Ноя. 2) Час третий – от Ноя до Авраама. 3) Час шестый – от Авраама до Моисея. 4) Час девятый – от Моисея до воплощения Господня. 5) Час единонадесятый – от воплощения Господня до скончания мира сего (Алфа и Омега, гл. 32). И се есть последний час, о нем же рече святый Иоанн Богослов: «Дети, последняя година есть», и яко последний час есть. Обаче да весть прочитаяй, яко сия последняя година и час, сиречь последнее время, весьма есть неопределенно, но надолзе протязающееся зрится.

Антихристу же приити сказует Святое писание не в таковое последнее время неопределенное, но в последнее время определенное, на самой уже кончине мира сего, во оной седмице, сиречь последних седми летех, якоже пространнее о сем ниже в книзе сей множицею, паче же во главе 18-й, покажется. А яко человек нарицается мир вторый и мир малый, зри о сем в книге Григория Богослова, Иоанна Дамаскина, в Большом катихизисе во главе 38-й, в книге о правой вере во главе 16-й, и в книге «Алфа и Омега» во главе о Адаме и человеце, подобно и в прочих книгах.

Глава 7

О знамениях являющих антихристово пришествие

«Яко святии апостоли тогда онех отступников и сводителей людей Божиих с собою антихристами нарицали, такожде и ныне всех еретиков и сводителей антихристами оному последнему служащими разумей» (Книга Кирилова, гл. 4, знамение 1). Темже убо от сих и от прочих во главе второй, наипаче же третьей, означенных святых писаний удобно есть видети и уразумети, яко сии вси антихриста, сиречь еретики и отступники уподобительне нарицаются антихристи, истиною же не суть антихристи, но предотечи его. Самый же той антихрист своеобразие и существенне грядущий и до ныне не прииде в мир и не царствует. Понеже тако явствуется от всех вышереченных сказаний и обстоятельств, а наипаче от приличных ему хотящих быти знамений сих: от сана, от места, от времени и действ. Егда бо речено от сана, тогда разумети достоит, яко он царем и богом прозовется. Егда бо речено от места, сиречь яко он престол свой имети будет не инде где, но во Иерусалиме. А егда речено от времени, сиречь яко времени царствования его не много будет, токмо три лета и шесть месяцев, и то в самое скончание мира. Егда же речено от действ его познати его, сиречь яко он мечтанием и лжею и волхвованием имать чудеса сотворити велия и дивна и страшна, ими же и избраннии нецыи прельститися имут. С сими же знамениями еще и иная знамения многа хощут быти, являющая настатие на землю самого того последняго антихриста, и пришествие же его и самого его аки перстом показующая.

Ради же опаснаго ведения представим поряду сия и оная знамения, антихристово пришествие являющая, яже сицева суть: 1) разрушение и кончина царства или самовладения римскаго, и самого того града разорение. 2) Востанут лжехриста и лжепророцы, и яко со антихристом вкупе приидет некий лжепророк чудный по образу Крестителя Иоанна. 3) Чувственное во плоти пришествие Еноха и Илии пророков, во обличение антихристу, во обращение же евреов, и утвержение верных. 4) Изменение жития еврейскаго. 5) Чудеса быти хотящая Енохом и Илиею. 6) Яко ой антихрист царем и богом прозовется и покажется. 7) Яко во Иерусалиме граде престол его будет. 8) От антихриста убиение Еноха и Илии пророков, и паки абие воскресение их. 9) Яко тогда не во образе уже, но в самой истине станет мерзость запустения на месте святе. 10) Яко тогда антихрист поклонившихся ему аки Богу запечатлеет своею печатию, имущею число ббб. 11) Яко тогда мучительства и скорби таковы будут, яковы же не бывали от сложения мира. 12) Яко самодержавствия антихристова, мучительства же и скорбей оных мало некое время будет: сиречь токмо три лета и шесть месяцев, таже абие вторым славным Христовым пришествием сия разрушатся. И о сих убо знамениях намнозе в божественном писании повествуется. Ныне же таковая знамения еще не совершаются, темже ясно показуется, яко антихрист самообразне не у прииде в мир, ниже воцарися. Егда же той приидет, тогда от сих знамений всяко познан будет бодрствующими, понеже сия знамения не иному кому или чему, но самому токмо единому антихристу, и тогда будущему, а не нынешнему времени приличествуют и пристойность имут: ихже и сказанием священнаго писания изъявити потщимся.

Знамение 1 Разрушение и кончина царства, или самовладения римскаго, и самаго того града Рима опустение

В книге святаго пророка Даниила, во главе второй, изъявляет Дух Святый усты пророческими четыре начальнейшая царства пребывающая, и даже до скончания мира одно по другом последующия. Изъявляется же сие образом тела, егоже глава злата (первое царство, ассирийское), перси сребрени (второе царство, персское), чрево медяно (третие царство, греческое), голени железни (четвертое царство, римское). Рече убо Даниил: «Ты царю видяше, и се тело едино, велие тело то, и обличение его округло, стоя пред лицем твоим, и образ лица его страшен. Тело, егоже глава от злата чиста, руце и перси и мышцы его сребрене, чрево и стегне медяне, голени железни, и часть некая скудельна». Сиеже видение в тойже главе толкует сам Даниил пророк Навуходоносору царю ассирийскому, глаголя: «Ты еси царю глава злата, емуже Бог даде крепость и державу, и постави тя властелина всем, и вслед тебе востанет царство другое, мнее тебе, еже есть сребро. Царство же третие, еже есть медь, иже соодолеет всей земли. И царство четвертое креплее аки железо, и якоже железо стончевает и смягчевает все, такоже и то утончит и умягчит все. И еже виде нозе и персты часть железа, часть же глины, царство оно разделено будет, и от корене железна будет в нем, якоже виде железо смешено с глиною. И персты ножнии, часть железна, часть же глиняна, часть некая царства будет крепка, и от себе само будет сокрушенно» (гл. 2). Сию же главу святыи Симеон Метафраст от лица пророка Даниила толкует, сице глаголя: «Глава злата ты еси, о царю Навуходоносоре, и прежде тебе бывшие царие вавилонстии. Востанет же по тебе царство другое мнее тебе, еже есть сребро. Две же руце и мышца знаменуют два народа персидский и мидский, имущия прияти царство вавилонское. По сих будет царство третие, еже есть медь, будет же то Александр Македонский, и разрушит онех царствование. Четвертое ж ецарство будет креплее, аки железо, якоже бо железо стончевает и умягчает все, и медь, и сребро, и злато, сице и царство оно утончит и умягчит все: царство же то будет римское. Две же голени знаменуют две части того царства: восток и запад, еллинов и римлян. Персты, отчасти железны, отчасти же глиняны, знаменуют, яко послежде разделится то царство на многия части и ослабеет яко скудель, и само от себе будет сокрушено» (книга «Метафраст», дек. 17).

И паки пророк Даниил инем образом виденная о сих четырех царствах сказуя глаголет: «Аз Даниил видех в видении моем нощию, и се четыре ветри небеснии налегоша на море великое, и четыре зверие велицыи исхождаху из моря различии между собою. Первый, аки львица, имущи криле и прочая. И се зверь вторый, подобен медведице и в части единой ста, и прочая. В след сего видех, и се зверь ин аки рысь, тому же крыла четыре и прочая. В след сего видех, и се зверь четвертый, горд и страшен, и крепок излиха, зубы его железни и велии, и ногти медяни, ядый и отончевая, останок же ногами попираше. Тойже различаяся излиха паче всех зверей прежних, и рогов десять ему: и смотрих же в розех ему, и се рог другий (11-й) мал взыде пред ними. Трие же рози преднии исторгнушася ему от лица его», и прочая (гл. 7).

И ангел там же ниже сказует сия пророку, глаголя: «Сии зверие велицыи четыре: четыре царства востанут на земли, яже возмутся и преймут царство святии Вышняго, и возмут ё до века, и до века век. И вопрошах о конечне звери четвертом, яко беяше различен от всего зверя, и горд излиха, ядый и отончевая, останок же ногами попираше, и прочая. И рече (ангел): зверь четвертый – царство четвертое есть на земли, еже преспеет вся царства и пояст всю землю, и поперет ю, и посечет ю, и десять же рог ему, десять царей востанет, и по них востанет другий (11-й, еже есть антихрист), иже преспеет злобами вся, иже прежде его, и три цари смирит, и прочая». О сем же вышереченнем теле, егоже Навуходоносор виде, и о четырех зверех, образующих на земли четыре царства, едино по другом преимуществующих до скончания мира, святый Ипполит папа римский пространно толкует сице: «Приведу же в среду достоверна свидетеля пророка Даниила, иже сония Навуходоносору разреши, и от царства (его) даже до скончания показа путь неуклонен шествовати хотящим воистины явлении. Ниже: Перваго зверя рек Даниил, сиречь львицу, иже от моря исходящую, вавилонское бывшее царство в мире назнаменовает: то суще образа златаго глава, и прочая. По львице убо втораго зверя зрит пророк подобна медведице, еже бяше перьси (сребряни образа), по вавилонянох бо держаша персы, и прочая. Се третий зверь пардос, иже бяше еллины… иже показася во образе медь. Потом же рече четвертаго зверя страшна и ужасающаго, зубы его железни, и ногти его медяни. Котории сии? То римское царство, еже есть железо, имже сокрушатся яже прежде его царства, и обладает всея земли царствия. Посем убо что остает сказати нам? Разве следобы ног образа: в них же часть убо железна, часть же скудельна, смешено во едино обоя. Тайно бо объяви десятьми персты ног образа десять царств, иже от него востающих, якоже сказа Даниил. Смотрях бо зверя, сиречь четвертаго, и десять рогов по нему, в них же взыде ин рог, якоже отрасль, и три яже прежде его искорени. Егоже являет рога отрасль, самого антихриста быти, иже воставити хощет иудейское царство. Трие же рози, иже хотят пред ним искоренитися, три царства являют: египетское, левийское, ефиопское, ихже убиет ополчением брани, яко удержав всех» и прочая (Соборник, гл. 8).

Показахом зде священным писанием четыре монаршества приснопоминаемая, яже едино по другом последовательне будут существовати даже до скончания. Прочее показати достоит четвертаго сего, еже есть римскаго монаршества разрушение, о нем же нам от начала главы сея надлежит слово. И о сем во Апокалипсисе святый Иоанн Богослов сказует, глаголя: «И зверь егоже видех подобен берыси, инозе его яко медвежи, и уста его яко уста Львова. Толкование. Чрез рысь убо еллинское, чрез медведя же персское, а чрез льва вавилонское царство знаменуется, имиже будет державствовати антихрист, аки римский царь грядущий и начальство римское разоряющий, егда пальце (персты) ножныя скудельныя узрит, имиже разделение царства на десять частей является, яко немощное и удобостираемое» (Апокалипсис, зач. 37).

Еще же о сем святый Иоанн Златоустый сказует, внегда толкуя оный стих, апостолом Павлом реченный о антихристе: «И ныне одержащее весте, явитися ему во свое ему время». Златоуст: «Сие рече о римской власти, дондеже бо та не разрушится, он не приидет, егда престанет, рече, и конец приимет римская власть, тогда явится беззаконник, рекше антихрист, егда бо разрушится римская власть, тогда антихристово зачнется властельство. И держати начнет не токмо человеческую, но и божию власть. Римское бо царство тогда до конца разрушит антихрист» (Апостол толковый, зач. 275). Подобно сему и в Беседах сказуется сице: «И ныне одержащее весте, во еже явитися ему во свое ему время. Тайна бо уже деется беззакония, точию сдержай ныне дондеже от среды будет, и тогда явится беззаконный. Златоуст: «Что убо есть одержащее явитися ему, сиречь возбраняющее, инииубо Духа благодать глаголют, инии же римскую власть, имже аз наипаче слагаюся». Ниже: «Ельма же о римстей власти сие глаголет, точию держаяй ныне донележе от среды будет, сиречь власть римская егда возмется от среды, тогда он приидет. И влепоту. Донележе бо сея власти будет страх, никтоже скоро покорится, егда же тая разорится (тогда той антихрист) нападет на безначальство, и человеческую и Божию поищет похитити власть. Якоже бо яже прежде сего разоришася царствия, сиречь, мидское от вавилонскаго, вавилонское от персскаго, персское от македонскаго, македонское от римскаго, тако и сие от антихриста, а он от Христа, и к тому не содержит. И сия со многим изъяснением Даниил нам предает» (Беседа 4 на Второе послание Солуняном).

И еще сказуется погибель, разорение же и вконец разрушение града Рима ветхаго, под именем Вавилона, сиречь падение и опустение Вавилона значит опустение стараго Рима. Последование сицево есть, сказует тайновидец Иоанн Богослов во Откровении своем о Вавилоне, описует же того во образе жены любодейцы, глаголя: «И прииде един от седми ангел имущих седмь фиал, и беседоваше со мною, глаголяй ми: гряди семо, покажу ти осуждение великия блудницы, седящия на водах многих, с нею же соблудиша царие земстии, и упишася живущии на земли от вина блуда ея. И отведе мя в Дусе в пустыню, и видех жену седящую на звери червлением, полнем имен хульных, имущем глав седмь и рогов десять. И жена, юже видел еси, есть град великий, иже имать царство над царьми земными. И жена бе облечена в порфиру и червлень, и позлащенна златом и драгим камением и бисерами, имущая чашу златую в руце своей, полную мерзостей и нечистоты блужения своего, и на челе ея имя написанное тайна: Вавилон великий мати блудников и блудниц и мерзостей земских» (Апокалипсис, гл 17).

На сия словеса о Вавилоне различна имеются разумения и сказания, суть же сия: Вавилоном убо нарицается самый истый той град Вавилон персский, в нем же многи быша муки. Ибо во оном царствоваху первый в мире мучитель царь Неврод, по сказанию Библии: Навуходоносор, Атиох, иже бяху негли проображением антихристу, от тех стран хотящу изыти, якоже сказует святый Андрей во Апокалипсисе во главе 9 и 16. Паки Вавилоном нарицается и весь мир сей, и всего мира смешение, и житейское смущение, или мятеж. Всюду бо суть греси различнии, и святых крови пролияны быша.

И еще Вавилоном непщуется греческий Царьград, или Константинополь, иже зрится стоящ при водах на седми холмах: темже и называется гречески Епталофос, сиречь седмихолмие. И отсюду неким возмнеся, аки бы о сем граде рекл есть ангел Богослову: «Прииди да покажу ти суд любодейцы великия, седящия на водах многих». И паки: «Седмь глав, горы суть седмь, ид еже жена седит на них».

Еще же под именем Вавилона наивернейши разумеется ветхий Рим, иже есть в земли италийстей, стоящий на седми горах, при водах многих, сиречь при мори, или яко обладающий многими народы. «Воды бо, рече, людие и народы суть, племена и языцы, идеже любодейца седит». И паки: «И жена, юже виде, град великий есть, иже имать царство над царьми земными» (Апокалипсис, гл. 17). Зде яве извещавается ветхий Рим быти Вавилоном, кий бо ин таков град, иже бы имел такову власть над цари многими, якоже старый Рим, иже беяше властелин всея вселенныя, по свидетельству святаго Евангелия: «Изыде, рече, повеление от кесаря августа, написати всю вселенную» (Лк., 2, 1). И паки Апокалипсис глаголет: «И седмь глав, седмь горы суть, идеже жена седит на них». И паки: «Видех жену пияну кровьми святых, и кровьми свидетелей Исусовых».

Сия апокалипсическая словеса весьма приличествуют ветхому Риму, стоящему на седми горах, при водах многих, обладающему многими народы, в нем же и кровь святых пролияся, якоже верховных апостол, тако и прочих безчисленно святых мученик. Ибо римстии кесари, наченше от времен святых апостол чрез триста лет, не точию в Риме, но и во всей вселенней гониша Церковь Божию, и зельно оскорбляху христиан, и многи крови проливаху. Видиши ли, каков есть Рим со своими кесарьми? И влепоту речеся о нем, яко пияну ему кровьми святых и кровьми свидетелей Исусовых. Темже явственно есть, яко под именем Вавилона разумеется старый Рим, егоже нарицает Вавилоном достоверный свидетель святый апостол Петр в соборном своем послании, глаголя: «Целует вы Церковь, яже в Вавилоне соизбранная и Марко сын мой» (1 Петр., 5, 6). На сей стих святии отцы толкование творяще сказуют, сие рещи Петру апостолу о старом Риме (Апостол толковый, л. 179). И святый Андрей в толковании Апокалипсиса глаголет: «От деяний и сбытая налагаются имена на грады». Ниже: «И старый же Рим Вавилон в послании Петрове нарицается». В предисловии книги о Святом Дусе восточнаго учителя Дидима (егоже толкования в Толковом Апостоле обретаются) писано сице: «Егда бех рече в Вавилоне, сиречь в Риме, и порфироносныя блудницы обретахся житель».

Сего Вавилона, иже изобразуется во образе жены любодейцы, сиречь ветхаго Рима разрушение, изъявляет Богослов в 17-й главе Апокалипсиса, глаголя: «И видех жену пияну кровьми святых, и кровьми свидетелей Исусовых, и дивихся, видев ея дивом великим, и рече ми ангел, что дивишися? Аз ти реку тайну жены сея, и зверя носящаго ю, седмь глав имуща, и рогов десять». Ниже: «И зверь иже бе и несть, и той самый осмый есть, и от седмих есть, и в пагубу пойдет». От толкования: «Зверь антихрист есть, осмый убо, яко по седми царствах на прелесть и запустение земли востаяй». Сущее. «И десять рогов, ихже видел еси, десять царей есть, иже не у царство прияша, но область яко царие на един час приимут со зверем. Сии едину имут волю, и силу и область свою зверю отдадут». Ниже: «Сии возненавидят блудницу, и запустевшую сотворят ю нагу, и плоть ея снедят, и сожгут ю огнем. Бог даде в сердце их сотворити волю Его, и сотворити едину волю и дата царство свое зверю, дондеже скончаются словеса Божия.

Паки Богослов во главе 18-й Апокалипсиса глаголет: «И по сих видех инаго ангела нисходяща с небеси, имущаго власть велию, и земля освятися от славы его, и воззва крепким гласом (велиим) глаголяй: «Паде, паде Вавилон великий, и прочая». Ниже: «В сердцы своем глаголет, яко сежу царицею и несмь вдова, и рыдания не увижду. Сего ради во един день приидут язвы ея, смерть, рыдание и глад, и огнем сожжена будет, зане крепок есть Господь Бог осуждей ю. И возстенются ея, и возрыдают о ней царие земстии соблудившии с нею». Ниже: «Егдаузрят дым сожжения, издалече стоящий, за страх мучения ея, глаголюще: горе, горе град великий Вавилон, град крепкий, яко во един час прииде суд твой. И купцы земстии плачут и рыдают о самих себе, яко бремя их никтоже купует ктому, бремя злата и сребра, и камене драгаго, и бисера и виссона и порфиры, и червленя и шолка, и прочая». Ниже: «Купцы сих обогащыпиися от нея издалеча станут за страх мучения ея, плачуще и рыдающе, и глаголюще: горе, горе град великий, облечен быв в виссон и порфиру и червлень, и позлащен златом и камением драгим и бисерами: яко единем часом опусте толикое богатство». Ниже: «И взят един ангел крепкий камень велий, аки жернов, и вверже в море, глаголя: тако стремлением ввержен будет великий град Вавилон, и не обрящется ктому.

Толкование (печатнаго Апокалипсиса киевскаго): «Тако стремлением ввержется Вавилон великий град, якоже, глаголет, жернов погрязает стремлением в море, аще и разорение Вавилона сего напрасно будет, яко ниже следу его сохранитися по сих. Сие бо знаменует оскудение и исчезновение гудцев и мусикий и прочих песней. Вину же глаголет, яко вся языки своим сладкопением и отравным чарованием прельсти, и кровей пророческих и прочих святых бысть приятелище. Ими же всеми и нечестивому у персов Вавилону подоболепно знаменатися: яко многих святых крови по различным временем, даже доныне, приемшу, и яко волхвовании и чародеянии и прелестьми выну радующуся. И сие нам есть дело молитвы и изволения, да сей носяй пророкованная приимет мздовоздаяния гордыни, яже на Христа и на рабы Его. Но мнится некако противлятися сему непщеванию, от древних церковных учителей реченное, яко сия пророкованная суть на Вавилон, иже у римлян. За еже видени быша десять рози в четвертем звере, сиречь в римстем начальстве, и из него един возрастающий и искореняющий три, и прочия покаряющий, и тако приидет, яко царь римский: преображением и притворением убо еже паки устрояти и обновляти, согревати же и воспитовати начальство их: истинною же, еже соделати конечное его разорение. Темже, якоже речеся, не погрешил бы кто подобающаго, истолковал аки во едином телеси из начала даже доныне, державствующее царство сие, яко воистину излиявшее крови апостолов и пророков, и мучеников. Ибо якоже един лик, и едино воинство, и един град глаголется, аще и изменяются исполняющий сих коегождо: сице и царство едино, аще и во многая лета и места разделяется и разсецается».

И паки тойже святый Андрей по древлеписьменному Апокалипсису в зачале 53-м глаголет: «Сию любодейцу друзии римский град мнят, яко на седми гор стоящь» и прочая. На то же зачало толкование инаго сицево: «Женою нарицвет римский град, седяй на водах многих, сиречь, обладаяй множеством людей, одежржа бо Рим всю вселенную: седмь же глав глаголет, седмь гор, на них же римский град, их наричут сице: Палатинус, Квелиналис, Целиус, Авентинус, Вомналис, Капетолюс, Есквилиус. А еже глаголет на звери червлене исполнь имен хульных, сим знаменует царей римских, гонивших Церковь Божию, и побивших мученик Его: яко Иерусалим видится на двух горах стоящ: Вавилон же великий на равнине: точию Рим самый на седми горах». Западный учитель Иероним святый, толкование творя на четвертую надесять главу Исаии пророка, глаголет: «Падет и сокрушится Вавилон, седяй на седми горах, порфировидная блудница, еяже падение и мучение изъявляет Апокалипсис».

Речет ли кто, яко Рим и римское царство давно уже разрушися и конец прият, даже от лет Карула Великаго, якоже свидетельствует святое писание в Книге о правой вере во главе 30-й, тако глаголющи: «На конец бо римскаго царства подобает всему совершитися. Что же? Несть ли убо совершилося о римских царех, яко престати сим царствовати: но ниже убо слышится имя римских царей за многая лета в последнее ныне время, якобы рещи от Великаго Карула». И в Книге Кирилове, в знамении 9-м, в толковании глаголет: «Яко от того времене антихристово царство в Риме зачнется, якоже глаголет: егда исполнятся лета римскаго царства, еже есть когда уже Римом цари не имут владети, якоже и ныне видим, иже не владеют». И отсюду явствуется, яко давно уже в Риме царская власть разрушися и антихристово царство начася.

Отвещаем: сие речение, яко от того времени антихристово царство в Риме начася, не свойственно-образное царствование от тех тех времен разумети подобает, но царствование чрез предотеч его бывающее, самого же его царствование в будущее время хотяще быти: понеже яве тако сказуется в том же толковании 9-го знамения рядом оных словес, рече бо: «Яко до его (антихристова) пришествия в Риме предотечи его римское властодержство и власть царскую приимут, имже имут властодержства множитися, и ему самому место уготовят: и то явно в Риме от того времени настала власть антихристовых предотеч, егда власть царей римских в Риме престала». Подобно и в Книге о вере, такожде рядом вышеписанных глагол сице пишет: «Всю же власть от тех времен (сиречь от Карула Великаго), царскую и святительскую папа на себе привлече, вкупе и царь и святитель наречеся, не явный ли сей антихристов предотеча» (гл. 30, л. 272).

Видиши ли, яко от оных времен не самый той антихрист в Риме воцарился есть, но его предотечи токмо держат власть царскую, и ему самому место уготовляют. И сего ради во опасное ведение возмем сполна оная словеса. Святый Кирил Иерусалимский в знамении 9 глаголет: «Приидет же преждереченный антихрист сицевым подобием. Егда исполнятся лета римския власти, то уже близ есть кончина миру: тогда востанут десять царей римских в разных градех, во едино время властьствующих. Таже паки по тех единыйнадесять антихрист, мечтательною злою хитростию приимет власть римскую. Тогда же трех царей прежде его бывших победит, других седмь имея под собою, и прочая. Толкование. Двоя подобия о наставании антихриста на царстве римском Кирил святый, от пророчества собрав, нам исповедает. Первое, от того времене антихристово царство в Риме зачнется, якоже глаголет, егда исполнятся лета римскаго царства, и не глаголет егда возмущено будет, но егда исполнятся лета, еже есть, когда уже Римом цари не имут владети, якоже и ныне видим, иже не владеют. Не разумею же, аще римское царство антихрист первое имать возмутити, а потом, своею силою взяв, сести на нем. Или не могл бы тако скоро где инде таковыю власть прияти, понеже сам последний едины полчетверта лета имать пребыти, но до его пришествия в Риме предотечи его римское властодержство и власть царскую приимут, имже имут властодержства множитися, и ему самому место уготовят. Се суть антихристовы предотечи и его властели, якоже Златоустый пишет, глаголя, егда изгубится римская власть, тогда антихристово начнется властельство: и то явно, в Риме от того времене настала власть антихристовых предотеч, егда власть царей римских в Риме престала, тогда человек духовный папа римский Божию и святительскую власть нача держати». И паки выше в знамении 2-м в толковании пишется: «Ибо дух антихристов, един от духовных старейший, Лев Третий папа римский, бывый по Рожестве Христове 884 лета, той содела сие: иже первое вси западныя властодержства от области греческия и от цареградскаго престола отведе и другаго царя в Риме у себе учини Карула Великаго».

В римском же летописце Барониеве сказуется, подобно и в Книге о правой вере, во главе 20-й, яко сей папа римский Леон, или Лев III, бе в лето 797-е по Христове воплощении, раздор же царства римскаго от греческаго, сиречь учинение на римское царство царя Карула Великаго, бысть в лето 800-е, о сем тамо зри лето Господне 797-е.

И паки в Книге Кириловой во главе 4-й, знамении 9-м, пишет: «А вси тии слуги того ради творят, даже место своему властелю антихристу приготовят: того ради Христос в та последняя времена верным Своим явственно повеле блюстися. Ибо о всем о том назнаменовано явственными глаголы, иже и простейший человецы видяще и слышаще разсудити могут, яко антихристу предотечами его место самодержавное царское мира сего уготовано будет, и немало царей мира сего к престолу его приведени будут, и поклонятся и предадутся ему, понеже он, последний антихрист, не явится, дондеже первое, по пророчеству, к престолу своему слугами своими седмь царей прельстити и прилучити имать, и якоже повелит, они тако и начнут творити, с нимиже и других трех царей победит, и тако вскоре мало окаянный властьствовати будет». И ниже в той же главе и знамении толкует, глаголя: «Показует нам, како и коим обычаем последняго антихриста на оном престоле римском надеятися имут, якоже глаголет: тогда востанут в Риме десять царей, в разных местех будут, к римскому единонадесятому царству воедино в послушании будут. Тогда в Риме на том единонадесятом царе, иже есть последнем антихристе, скоро содеятися имать. Ибо седмь царей в послушание свое антихрист к римскому престолу слугами своими в то время добровольно и без брани взыскати имать, а трех паки войною и силою с иными седмию цари достанет».

Темже от сих писаний яве есть, яко не самообразное антихристово царствие в Риме бысть от лета 800-го, или от лета 884-го, но в его предотечах, приготовляющих место ему, сам же той не бысть в Риме или в мире от тогда, ниже ныне есть: но быти ему по сих назнаменуется, иже и триех великих царей убиет, а прочих седмь лестию под себе имать покорити.

Ныне же нецыи мудрствуют, якобы сии десять царей не чувственно приемлются в писании, но духовно, сиречь три сия – вера, любовь и надежда, седмь же – суть седмь таинств церковных. И се есть цари, ихже аки бы антихрист покори под себе от давных уже времен. Темже и римское царство разрушися и Рим падеся, аки бы токмо духовным падением, во время от восточныя Церкве отступления, то аки бы тогда и царем сим от антихриста бысть убиение и покорение. А инии умствуют паки не духовно, но чувственно сих царей, и утверждают то, аки бы сии цари прошли уже в прешедших разных временех, кииждо во свое время в разных землях бывши. Обаче таковое мудрование не достоверно быти является сих ради: понеже сказует божественное писание, яко сии цари при самом том антихристе малое некое время приимут, о нихже во Апокалипсисе Иоанну Богослову сказует ангел, глаголя: «И десять рогов (зверю), ихже видел еси, десять царей есть, иже не у царство прияша, но область, яко царие един час приимут со зверем. Толкование. Десять же рогов и Даниил виде предваряющих антихриста: из нихже три искореняяй, прочия покорит проклятый, един же час, или краткое лета глаголет, или един час годища, сиречь обращение солнечное, еже есть тремесячие, после емуже антихристови аки преимущему покорятся» (Апокалипсис толковый печатный, зач. 54).

И что сего толкования яснейши, иже не о духовных каких царех сие толкует, но о чувственных, зане и малое время им быти тогда определенное сказует, рекше три месяца, а не более. Тако же и Ипполит святый яве на лице изводя сих реченных трех царей показует, глаголя: египетскаго, ливийскаго и ефиопскаго. Святый же Кирил Иерусалимский и время сих десяти царей сказует, глаголя: «Тогда востанут десять царей римских в разных градех, во едино время властьствующих» (знамение 9). Видиши ли, не рече царей иных языков, но глаголет царей римских, и не в разных временех, но во едино время властьствующих.

Сие святое писание внимательно смотрети подобает: убо глаголет овогда царей римских, овогда же египетскаго, ливийскаго и ефиопскаго. Вся бо суть истины исполнь: понеже глаголет, «яко немало царей мира сего к престолу его приведени будут, и поклонятся и предадутся ему». Ниже в толковании: «Ибо седмь царей в послушание свое антихрист к римскому престолу слугами своими в то время добровольно и без брани взыскати имать, а трех паки войною и силою с иными седмию цари достанет» (Книга Кирилова, знамение 9). Видиши ли, глаголет царей седмь, и в другом месте седмь, о тех же прежних глаголет, и паки три. Вси же сии хощут быти во время самаго того антихриста, при оном вконец римскаго царства разрушении и града Рима чувственном падении. А яко падение чувственное хощет быти, изъявляет сие Апокалипсис, чрез плач и рыдание царей земских, и купцев такожде: «Овии яко о сластех греховных, овии же яко никтоже тамо бремен их купует, мира и Ливана и корицы, и прочих всех. И глас гудец и мусикий не имать слышатися» (Апокалипсис, гл. 18). На сия святый Андрей чувственно толкование творит: «И чрез плач сущий о нем написуя (рече) великую напасть, иже приимет хвалящия первее о царствии и чести. Сей внезапу будет потреблен, да и след его не обрящется ктому, се бо являет (рече) гудец и мусикии, и прочих песней оскудение.

Отсюду явственно познавается не духовное токмо, но и чувственное Рима падение, сиречь разорение. Негли бо сего ради дважды рече, паде, паде. Паде жеубо отдавна духовным падением: чувственным же еще не бысть сие и доднесь, и свидетельствуют нынешния летописныя книги, яко российския, тако и иностранныя. И книга Мирописание, в нейже имеется описание всея вселенныя. Такоже и гражданския мартирологи, в нихже сказуется о российской и прочих землях описание жительства, веры же и обычая и разстояния их. В сих же книгах, как прежних, так и нынешних, явственно сказуется, яко град той Рим не опустошися, аще и в нечестии сый, обаче цел и невредим пребывает. Градом же тем Римом и около его странами в велицей власти, чести же и славе обладает и превзятельне владычествует папа, темже и страны оныя называются Владыкины. В защищение и хранение римскаго папина начальства имеют они государя австрийскаго, аще же и не в Риме он жительство имеет, обаче царь римский называется. И о всех сих зри в вышереченных книгах.

Темже отсюда изъявляется, яко не у прииде Рим во опустение и начальство его в конечное разрушение, от времен убо Карула Великаго, даже до настоящих ныне лет, аще царей римских власть в Риме и престала, якоже речеся, самодержат же тую папы, обаче они суть, по вышереченному, антихристовы предотечи, и самому ему место уготовляюще. Егда же сам той приидет, тогда сию власть отдадят ему, по глаголющему о них сице: «Иже Божию и святительскую власть в Риме восхитив, и по всему миру разширяют и держат, и предадут оному последнему князю мира сего, еже есть антихристу» (Кирилова книга, знамение 9).

Или кто глаголет, яко аще антихрист доныне еще не царствует в Риме, но уготовляется ему место, то почто ему разоряти, иже самем делом ожидающаго его града? И паки: аще град той разорится и опустится, то како в пустом граде царем ему быти? Отвещает на сие Апокалипсис, сказуя о десяти царех, иже область свою отдати имут антихристу. И паки о тех сице рече: «Сии любодейцу (сиречь град той) возненавидят и запустевшу сотворят ю нагу, и плоть ея снедят, и сожгут ю огнем. Бог бо дал есть в сердца их сотворити волю Его… яко прилепишася греси ея даже до небесе, и помяну Бог неправды ея».

Прочее же где престолу антихристову быти, покажем ниже в 7-м знамении. Зде убо внимати подобает силе сего знамения, священным писанием изъясненнаго, от котораго явно зрится, яко не у прииде в мир антихрист, подобает бо в пришествии его до конца разрушену быти римскому начальству, и разорену самому тому граду Риму, по вышереченным. И еще присмотритися достоит по вышеписанным, иже Навуходоносором, царем ассирийским, виденное тело, у него же голени железни и часть некая скудельна: и на сие выше пространно сказано священным писанием, яко сии голени знаменуют царство Римское. А якоже телу оному голени две суть, тако и царство римское двочастно бысть: на востоце от Константина Великаго начало имущее в новом Риме, сиречь в Константинополе, и на западе в ветхом Риме. И сокрушенной убо сущей единей голени, сиречь монаршеству римскому, на востоце чрез турков, пребывает же еще другая голень на западе, и пребывати будет даже до пришествия антихристова.

Темже убо и от сего знамения уверитися можно, яко и ныне еще не прииде в мир самый той антихрист: ибо не прииде в конечное разорение и падение Рим и его начальство. Аще же его еже над вселенною властельство и разрушися и восточная часть отъяся, но его держава пребывает. Аще же уже и преклонися к падению, но обаче не отнюд падеся, имать бо и еще едину голень по обычаю стоящу, яже стояти будет до тех времен самого того антихриста, яко тако явствуется от всего вышеозначеннаго в главе сей божественнаго писания.

Глава 8

Знамение 2 Востанут лжехристи и лжепророцы, и яко со антихристом вкупе приидет некий чудный лжепророк по образу Крестителя Иоанна

Во святом Евангелии рече Господь: «Блюдитеся да никтоже вас прельстит, мнози бо приидут во имя Мое, глаголюще, яко аз есмь Христос, имногипрельстят». От толкования: «Мнозиприидут, яков же бе Иуда галилеянин, яков же Февда, иже глаголахуся от Бога послани» (Благовестник, от Матфея зач. 98). И паки глаголет: «И рекут вам, се зде Христос или онде, не изыдите, не пожените. Яко бо молния блистающися от поднебесныя, на поднебесней светится, тако будет Сын Человеческий в день Свой» (Лк., зач. 86). И паки: «Тогда соблазнятся мнози, и друг друга предадят, и возненавидят друг друга, и мнози лжепророцы востанут и прельстят многия» (Мф., зач. 98). В Книге же о вере во главе 23-й пишет: «Еда не явишася ныне чрез отступление Православия лживыя пастыри и ложныя пророки? Или не поведают быти зде и онде Христа? Или не являют Его в драгих чертозех и в светлых одеждах, во множестве богатств и во временных наслаждениих, в надписании истинной церкви?» И в Книге Кирилове в первом знамении глаголет: «Мнози приидут во имя Мое глаголюще, яко аз есмь Христос, и многих прельстят. Сия же еже было отчасти, еже есть Симон волхв и Менандр, и инии окаянии начальницы еретицы» (л. 21 об.).

Обаче нам убо надлежит зде сказати не о тех лжехристах и лжепророках, иже от прежде уже приидоша, отчасти бывше: и не о сих, о нихже речеся, иже и ныне Христа являют в драгих чертозех и в светлых одеждах, в богатствах же и наслаждениих: но о тех, иже и еще не приидоша, но хощут быти, и знамениями и чудесами человеков прелыцати. О нихже Сам Господь прорече, глаголя: «И тогда аще кто речет вам, се зде Христос, или онде, не имите веры. Востанут бо лжехристи и лжепророцы, и дадят знамения и чудеса, еже прельстити аще возможно и избранный. Вы же блюдитеся, се прежде рех вам» (Мф., зач99). От толкования. «А еже тогда, не егда Иерусалим запустеет, но по временем пришествия антихристова» и прочая. И паки глаголет: «Тогда востанут лжехристи и лжепророцы, и дадят знамения велия и чудеса, якоже прельстити аще возможно и избранный». От толкования. «Еже бо есть глаголанное сице тогда? Сиречь егда хощет антихрист приити, будут ложнии христи и ложнии пророцы, мечтанием бесовским явления творяще пред очима зрящих, яко прельстити некия, елико бо аще не трезвятся, и праведнии прельститися имут» (до зде Благовестник). В Книге Кирилове во главе 4-й глаголет: «Якоже Христос времене пришествия Своего и кончины века никому не сказа, токмо знамения некая и разделения поведа, ради антихристов, котории оному последнему антихристу человеков вкупе приведут, иже прежде его пришествия востати имут и изменят дела и глаголы зрящии, и приидут ихже ожидаем чуднее и паче сих». И в Соборнике святый Ипполит пишет: «Ибо по еже вознестися Ему (сиречь Христу) ко Отцу, бысть о них что. «И восташа нецыи глаголюще, яко аз есмь Христос, якоже Симон волхв, и мнози, имже несть ныне время имен воспомянути. Темже и в последняя дни скончания подобает паки востати лжехристом, людем мужем глаголющим, яко аз есмь Христос, и многи прельстят. Подобает бо сим первее быти, и тако явитися сыну погибельному, сиречь диаволу».

Якоже убо Христу Спасителю нашему хотящу воплотитися, прежде Его мнози предъидоша пророцы, и овии отдалече Его воплощения, овии же отблиз, предвозвещающе о Нем, дабы удобнее были человецы ко принятию Его: тако и пред антихристом отдавнауже мнози предъидоша лжехристи и лжепророцы, уготовляюще ему люди развращенны: напоследок же приити имут чуднее и паче сих, якоже речеся. И якоже пред Христом по всех онех святых пророцех прииде един некий пророк паче всех пророк, и более всех в рожденных женами, иже есть Предотеча Иоанн, мало Христа предупреждающе и Того перстом показуя рек: «Се агнец Божии вземляи грехи всего мира» (Ин., зач. 3). И паки рече: «Яко Сей есть Сын Божии». И ко Христу людей обращая, глаголет: «Покайтеся, приближибося Царство Небесное» (Мф., зач. 5). И еще глаголет: «Грядет Креплии мене во след мене, Емуже несмь достоин преклонся разрешити ремень сапог Его. Аз убо крестих вы в воде, Той же крестит вы Духом Святым» (Мр., зач. 1). Тако и по многих лжехристах предотечах антихристовых будет един некий паче сих чудный предотеча, мало антихриста предваряюще. О сем же лжепророце, антихристовом предотече, святый Иоанн Богослов, во Апокалипсисе сказуя, сице глаголет: «И видех инаго зверя восходяща из земли: и имяше два рога подобна агньчима, глаголаше яко змий, и власть перваго зверя всю творит пред ним, и творяше землю и живущая на ней, да поклонятся зверю первому, егоже исцеле язва смертная его. И творит знамения велия, да и огнь сотворит нисходити на землю пред человеки. И прельщает живущая на земли знамений ради яже дана быша ему сотворити пред зверем». От толкования. «Вся же сотворит (глаголет) чародеянием и мечтами, отступника лжехриста предотеча, на прелесть человеческую, да мнят бога быти антихриста, яко от делателя сицевых чудес свидетельствуема, и несумненную славу приемлюща, по подражанию Крестителя, приводящего Спасителю Верующия. Любопрится бо ложь, на прелести человеков, еже подражати истине. Не чудно же есть во очесех прельщаемых, да видят огнь с небесе сходящ, идеже и во истории Иовли уведехом сего низшедша и скоты его сожегша, по Божию попущению и сатанину действу» (Апокалипсис толковый печатный, зач. 37).

Сие внимательно разумети подобает, ибо зде явствует, яко тогдашнее прельщение на человеки приидет не от недоумения и лыцения некоего спроста в догматех веры, якоже при прочих еретицех бывает, но от знамений и чудес тогда хотящих быти уверятися имут. Ныне же ниже слышатся таковая чудеса где или от кого бывающая. Темже от сего знамения явно показуется, яко еще антихрист не прииде в мир, ниже воцарися: вся бо сия во оная будущая времена содеятися имут. И по вышереченным убо от сего лжепророка чрез чудеса и область антихрист аки бог проповедан будет. Обаче тогда послани будут истинная пророка Енох и Илия, во еже проповедати людем, да не приемлют того. И о сем последовательне в третием знамении покажется.

Глава 9

Знамение 3 Чувственное во плоти пришествие Еноха и Илии пророков, во обличение антихристу, во обращение же и утверждение человеком

Первее о сем подобает священным писанием показати, яко сия пророка Енох и Илия с плотию взяты быша, и даже доселе во плоти живи пребывают. О Енохе в книге Бытия речено: «И поживе Енох, и угоди Богу, и не обреташеся, зане престави его Бог» (гл. 5). И Сирах глаголет: «Енох угоди Господеви, и преложися образ покаяния родом» (гл. 44). И паки тойже: «Ни кто же создан бысть тако, яко Енох на земли: той бо вознесен бысть от земли». Святый Иоанн Златоуст на словеса апостола: «По вере умроша сии вси, не приемше обетования» (Евр., зач. 328), глаголет: «Двое зде истязати достоит, како рек: преложи Еноха не видети смерти и не обреташеся, и глаголет, по вере умроша сии вси». Ниже: «По вере умроша, рече, сии вси, еже вси зде, рече, не понеже вси умроша, но понеже изяту бывшу оному, умроша сии вси, ихже вемы умерших» (беседа 23). Еще на словеса апостола: «Верою Енох преложися не видети смерти, и не обреташеся, зане преложи его Бог» (зач. 326). В Толковом Апостоле пишет: «Енох преложен жив в явлении Божия силы, еже по нем родом яко могущи сохранити от крепости смертныя и не умрети». Ниже: «Жив бо преложися Енох, и еще жив, где же и како, не явлено» (л. 1020). И паки в зачале 328 глаголет: «По вере умроша вси, не приемше обетования». В толковании: «Двоего зде искати подобает: выше бо рече, по вере умроша вси». Ниже: «Но иже по вере умроша вси, приими кроме Еноха». И в Соборнике во главе 69-й пишет: «Седмый от Адама в роде Енох, иже неумре, но преложися, еже не видети смерти». И в Прологе ноября в 8-й день глаголет: «Ангелом же взят бысть Енох, и пренесен бысть на место рая, яко не видети ему общия с человеки смерти даже и до втораго снития Господня еже на землю». И декабря в 17-й день: «Енох не вкусивыи и доныне смерти». И в книге печатной Иоанна Златоустаго, в неделю 2-ю поста: «Постися Енох, и взят бысть с плотию на небо, и доныне жив есть». И сия убо до зде о Еносе.

О Илии же в книгах четвертых Царств пишет сице: «И бысть идущима Илии и Елисею, и идоста и глаголаста: и се колесница огненная, и кони огненнии. И разделиша между обема, и взят бысть Илия вихром яко на небо» (4 Царств, гл. 2). И Сирах глаголет: «Илия взявыися вихром огненным, и колесницею огненных коней, вписан во обличение на времена» (Сирах, гл. 48). И во Евангелии пишет: «Егда преобразися Господь пред ученики Своими, и се явишася им Моисей и Илия с Ним собеседующа». От толкования: «Почто убо Моисей и Илия явишася? Яко да явят, яко закону и пророком Господь Той есть, яко живых и мертвых Владыка есть. Илия бо пророк есть, и жив есть еще: Моисей же законодавец и умре» (Благовестник, от Матфея зач. 70). И в Прологе августа в 6-й день, в поучении на Преображение Господне, глаголет: «Сего ради Моисея от мертвых представи, Илию же от живых, являя, яко Той есть Судия живым и мертвым, и яко вся воскресит». В беседах святый Иоанн Златоустый глаголет: «Илия пророком глава, Богу друг». Ниже: «Даже доднесь еще не скончавыйся». В Прологе июля в 20-й день, в торжественном слове сице речено: «Что же глаголет ко Илии Бог: взыди ты ко Мне, да Аз к человеком сниду: взыди ты с плотию, да Аз сниду взяти плоть безплотныи. И непомнозе взятся Илия в трусе яко на небо. Вперив ум к премирным, и тело бысть совосхищено уму». Паки в той же день в повести жития его в конце глаголет сице: «Святый пророк Божии Илия огненною колесницею с плотию взят сыи, жив есть даже доныне во плоти, виден бысть во время Преображения Господня на Фаворе от святых триех апостол, и паки виден будет плотскими смертными человеки пред вторым Господним на землю пришествием. Избежав прежде от меча Езавелина, постраждет в то время от меча антихристова, и не токмо яко пророк, но яко мученик болыния славы сподобится от праведнаго Мздовоздаятеля Бога» (Четь минея). В Толковом Апостоле в зачале 20-м на листу 64-м пишет: «Егда крести апостол Филипп каженика, взыдоста от воды: ангел же Господень восхити Филиппа». От толкования. «Почто восхищен бысть Филипп? Да божественное явится бывшее, и да не мниши, яко человек бе прост, понеже восхитився, от места на место пренесен бысть: подобно яко Илия быв от места на ино селение преставися». Ниже. «Илия вознесен бысть, не глаголет же в коем месте: подобно и Енох преложися от места на место. В соборных убо книгах не глаголет, где есть, в сокровенных же глаголет яко в рай. Аще тако есть, смотри о Илии, якоже глаголет, вознесен бысть на небо, в рай преставлен бысть». И паки в зачале 105-м о нем глаголет: «Яко он и по днешнии день не умре». В Соборнике во главе 47-й пишет: «Во время убо распятия и воскресения Христова, егда благоразумный разбойник вниде в рай, и се явистася одесную страны восточныя два мужа стара деньми, и красна и дивна лицем, и вопросих ею глаголя: вы кто еста? Един же от нею рече ми, аз есмь Илия Фезвитянин, иже колесницею огненною восхищен на небо: а се со мною Енох, иже есть словом Божиим преложен зде, и еще есма смерти не вкусили». И в беседах апостольских святый Иоанн Златоустый глаголет: «Мнози ищут, где преложися Енох, и во что преложися, и почто не умре ниже той, ниже Илия. И аще еще живут, како живут, и в каковом образе суть? Но излишнее есть всячески еже о сих искати: яко бо преложися сей, и яко взят бысть он, рекоша писания. Где же суть и како, не приложи к тому, ничтоже бо паче нужных глаголют» (22-я беседа на Послание к евреом).

Зде глаголет святый Златоуст, яко излишнее есть о сих искати, сиречь где преложишася, и почто не умроша, и како живут, и в каковом образе, и глаголет яко о сем и святая писания не рекоша. Кая писания? Писания зде глаголет ветхозаветная, а не Новаго Завета. Обаче и ветхозаветная писания явственно показуют, яко сия пророка Енох и Илия во плоти взяти быша. Новаго же Завета писания и святоотеческая сказания со всяким опасством подробно изъявляют, яко сии во плоти взяти быша, и яко даже во днесь не умроша, но живи пребывают, и яко на кончине мира приидут во обличение антихристу, и яко от него убиени будут, и яко по трех днех паки воскреснут, и прочая. О сих и сам той Златоуст прилучившейся потребе начасте во своем писании сказует. Такожде и прочий святии отцы, ихже и зде во свидетельство приводим, вей единомудренно сказуют, о всем том повествующе. Но излишнее есть о сих искати тогда, егда не предлежащей и не принуждающей потребе: и о сих всячески излишне будет испытовати, еже како живут. Обаче о сем известно сказуют святая писания, яко не умроша, но живи суть даже доселе.

Но иже не хотяй последовати разумению божественнаго писания, якоже в прочих местех, тако и зде обретает место развращению, глаголя: живи суть доселе Енох и Илия, и не токмо Енох и Илия, но и вей святии живи суть. Пишет бо, яко «праведницы во веки живут». И паки: праведный во веки жив будет. И паки Господь глаголет: «Творяи волю Мою не имать умрети во веки». Подобно сим и прочая глаголет и противоречит таковый.

Но внимательно испытовати надлежит, понеже человеку два суть живота, две же и смерти, сиречь, есть живот духовный, и есть живот плотский: сугуб убо человек, сиречь, от души и тела состоящийся. Сего ради сугубый ему и живот и смерть прилежит, рекше телесный и душевный. Телесный живот человеку есть, еже души с телом сопряжение: душевный же живот – правда и Царствие Небесное. Телесная смерть человеку есть, еже души от тела разлучение: душевная же смерть – грех и вечное мучение. И сия яко тако суть, да сам кииждо хотящий разсмотрети может, понеже на мнозе о сих в священном писании обретается. Оное же вышеписанное речение, яко праведницы не умрут во веки, или во веки живут, тако убо и вей глаголем, яко праведницы вей во веки живут: обаче живут они животом духовным, а не телесным. По телесному же вей онии святии умроша, ибо апостол, егда древних святых, угодивших Богу, приведе во свидетельство, потом рече: «вей сии умроша» (Евр., зач. 328). На сие же сказует Златоуст, глаголя: «Но иже по вере умроша вей, приими кроме Еноха». Ибо тогда потреба надлежала к свидетельству о Енохе едином, сего ради не помянув о Илии. В других же местех писания и о Илии тоже сказует, и о сем выше во главе сей показахом, и паки ниже в главизнахузриши.

Что же дивно, яко святии вей умроша, не точию бо святии телесне умирают, но и Сам Господь Исус Христос на кресте вися тако издше, или умре, якоже свидетельствует святое Евангелие, глаголющее сице: «Исус же пущь глас велии, издше» (Мр., зач. 68). Видиши ли, яко и Сам Господь и вей святии умроша телесне, кроме сих Еноха и Илии. Живут же вей святии во веки животом духовным, а не телесным. О Илии же и Енохе во Святом писании речено не о духовном животе, но о животе телесном, и не о душевной смерти, но о смерти телесной, понеже и они не умроша телесною смертию, якоже прочий святии: темже и речеся сие о животе тех, животе телесном. Тако бо яве познавается от многих средств божественнаго писания: ибо мало выше во главе сей писано от Евангелия и от Пролога, еже на Преображение Господне, яко Илию представи Господь от живых, а Моисея от мертвых: и глаголет, яко Илия жив, а Моисей умре. И во Второзаконии сказуется, яко скончася Моисей раб Господень (гл. 34): о Илии же сказуется, яко он даже до днесь не скончася (18-я беседа на Послание к римляном, зач. 105). И аще бы сие речено о Илиине животе духовном, то таковым животом и Моисей жив есть, зане же и он праведен есть: но речено, яко Моисей скончася, Илия же не скончася. И от сего ясно показуется и всякому возможно есть познати, яко зде святыми отцы речено о Енохе и Илии не о духовном точию животе, яко живи суть, но о животе телесном: якоже и паки выше писано во главе сей от Пролога о Илии пророце, яко и тело его уму его совосхищено бысть: темже и до ныне жив есть вкупе души его с плотию неразлучне пребывающей, тако и приидет на кончине мира, во обличение антихристу и утверждение верным.

И о сем Сам Господь свидетельствует во Апокалипсисе, глаголя: «И дам двема свидетелема Моима, и будета пророковати дней тысящу двесте шестьдесят, облечена во вретища. Сия еста две маслине, и два светильника пред Господем земли стояща». Толкование. «Сия (два свидетеля) Еноха и Илию мнози от учителей разумеша, яко время от Бога еже пророковати яже на кончине приимета, над три лета от трех сот и шестидесяти дней числимая» и прочая (Апокалипсис, зач. 30).

И в Прологе июля в 20-й день сице пишет: «Сей Илия, иже огнь с небесе трищи сведыи». Ниже: «И на небеса колесницею огненною вознесенный, и в Преображение с Моисеом на Фаворе Христу представыи. Сей и второму пришествию Христову с Енохом приити <имать> ко обличению всеконечнаго нечестия антихристова и утешению благочестия вверенный».

В той же день подобно и в летописных святцах сице глаголет: «Сей Илия предвари Рожество Христово лет за 816. И колесницею огненною яко на небеса вознесен». Ниже: «И на Фаворе в Преображении Христу представ, и паки пред вторым пришествием Христовым с Енохом приити имать».

И преподобный Ефрем в книзе своей в слове 105-м, внегда рече о антихристове царствовании и мучительстве, и прочих при нем действах, и по сих сице глаголет: «Прежде даже сия не будут, внегда послет Господь Илию Фезвитянина и Еноха, яко милосерд, яко да скажет благоверствие роду человеческому, и проповесть со дерзновением благоразумие всем, да не веруют, ни вдадутся страха ради ложнаго. Разумеем, возлюбленнии, безчисленное милосердие Спаса нашего, яко ни во время оно оставит человеческаго рода без проповедания истины, но послет пророки проповедати Божии разум, да вси на суде без ответа будут, егда приидет с небесе со славою Отчею».

И преподобный Иоанн Дамаскин в четвертой книзе своей, во главе 27-й, сказует, яко «во время антихристова пришествия послани будут Енох и Илия». И в синоксаре в Неделю мясопустную о втором пришествии Христове глаголет: «Преди же седми лет, якоже глаголет Даниил, приидет Енох и Илия, проповедающа людем не приимати его (сиречь антихриста). Сей же ем их умучит, таже и главы их отсечет».

Святый Иоанн Златоуст на Второе послание к солуняном глаголет: «Ибо Илия приидет тогда верных утверждая. И сие глаголет Христос, Илия приидет и устроит вся. Сего ради речеся о Иоанне еже духом и силою Илииною, сиречь туюжде восприимет службу: якоже сей предотеча бе перваго пришествия, тако и он будет предотеча второму и славному Его пришествию, и на сие храним есть» (беседа 4). И в Евангелии недельном на Рожество Иоанна Предотечи: Евангелие: «Вей бо пророцы и закон до Иоанна прорекоша: и аще хощете прияти, той есть Илия хотяи приити». От толкования. «И аще благоразумно судите и независтно, той есть Иоанн, егоже рече пророк Малахия, Илия хощет приити: ибо Иоанн и Илия едину службу имеют. Иоанн убо первое пришествие преди тече: Илия же будущее пришествие предварити хощет».

Подобно сему и Феофилакт святый сказует в Благовестнике в зачале 40-м, от Матфея, о чем зри тамо. И паки в той же книзе в зачале 71-м сице пишет: «Евангелие. Вопросиша Исуса ученицы Его, глаголюще, что убо книжницы глаголют, яко Илии подобает приити прежде. Толкование. Прельщающе народы книжницы глаголаху, яко несть Он Христос, аще бо Христос бы глаголаша, Христу Илия пришел бы прежде, не ведяще яко два пришествия суть Христова, имже предотеча первому Иоанн, второму же Илия. Евангелие. Исус же отвеща рече им, Илия бо приидет прежде и устроит вся. Глаголю же убо вам, яко Илия убо прииде, и не познаша его, но сотвориша ему елика восхотеша». Ниже: «Тогда уразумеша ученицы, яко о Иоанне Крестителе рече им. Толкование. Еже бо глаголет приидет, являет яко и еще не дошел есть, приити же имать предваряя второму пришествию, и устроит всех обретшихся послушливех к вере Христове, (от) еврей ко отчему наследию приводит их, яко отпадших. А еже глаголет, яко Илия убо прииде, Предотечу Иоанна глаголет». Ниже: «Тогда убо возостроумившеся ученицы разумеша, яко Иоанна Илию глаголет, понеже предотеча бысть первому Его пришествию, якоже и Илия будет второму пришествию.

И в Прологе июля в 20-й день в поучительном слове сице глаголет: «Пророцыубо вей воплощение Сына Божия, послани быша жестокосердечному проповедати Израилю. Илия же един не токмо ко Израилю послан бысть, но и ко второму Его пришествию предотеча сохранен есть, за еже проповедати, яко уже при дверех владычний приход, и лукавое предсказати мечтательное и мерзкое царство антихристово.

К сему еще нецыи от святых отец сказуют, яко и Иоанну Богослову приити тогда вкупе в Енохом и Илиею, о сем убо Ипполит святый глаголет: «Первому убо пришествию Иоанна Крестителя (Христос) имеяше предотечу, второмуже Еноха и Илию, и Иоанна Богослова явити хощет. И зри Владычнее человеколюбие, како в последних временех человеческий род промышляет и милует, яко ниже тогда кроме пророк нас оставляет, но и тех послет к научению нашему, и обращению и извещению о сопротивнаго пришествии, якоже рече о сем Даниил провещав: глаголет бо завет завещаю седмицы единыя, и в полседмицы возмется моя жертва и жрение, едину бо седмицу седмих лет назнаменает, яже убо на последок будет, и убо полседмицы возмут оба пророка со Иоанном, еже проповедати во всем мире о антихристове пришествии, сиречь дней 1260» (Соборник, гл. 8).

Еще же и во Апокалипсисе рече ангел Иоанну Богослову, глаголя: «Подобает ти паки пророчествовати в людех, и в племенех, и в языцех, и в царех многих. Толкование. Сими показуется, или яко не абие (по видении) божественнаго откровения виденная конец восприимут, но подобает блаженному чрез Евангелие свое и чрез настоящий Апокалипсис даже до скончания мира пророчествовати будущая чтущим. Или яко не у сей евангелист смерти вкуси, на концы же приидет, прелести антихристовы приятелище возбранити имый» (зач. 29).

И в Благовестнике на Иоанна в толковании зачала 67-го сице писано: «Рече же Христос о Иоанне, аще хощу сему пребывати, се же есть живу быти до скончания мира, и тогда мучитися за Мя, имже и рекоша жива его. От антихриста же хощет убиен быти со Илиею проповедающа Христа. Лжа бо поистинне лжа, еже без смерти быти человеку. Аще бо и Енох и Илия не умроста, но обаче смертны: тако и сей, аще и не умерл бе, но убо умрет».

В Книге о правой вере, во главе 30-й пишет сице: «Во время пришествия антихристова послани будут от Бога Енох и Илия, по писанному во Апокалипсисе, и Иоанн евангелист с ними, ко утвержению верных. Енох о законе естественном, Илия же о законе писанном, а Иоанн о законе благодати».

Сие речение, яко Илия утверждати будет человеков о законе писанном, не сице разумети подобает, якобы он утверждати и обращати будет к сени законней, ей же прешедшей, якоже пишет: «Прейде сень законная благодати прешедши». Но потребно разумевати, яко вен сии, сиречь Енох и Илия, и Иоанн Богослов, верных утверждати будут, а неверных обращати не к закону Моисеову, но к закону евангельскому в веру яже во Христа Сына Божия и Бога. Ибо и закон естественный и закон писанный, такожде веровати научают и всячески к закону евангельскому отсылают, яко сущу совершену. Темже и апостол глаголет: «Сень бо имыи закон грядущих благ» (зач. 323). И Сам Христос глаголет: «Не приидох разорити закона, но исполнити» (Мф., зач. 11). И паки: «Аще веровали бысте Моисею, веровали бысте и Мне, о Мне бо той писа» (Ин., зач. 17). Моисей же сице писа в законе о Христе, глаголя: «Пророка вам воздвигнет Господь от братии вашея, Того яко мене послушайте» (Второз., 18). Такожде и естественный закон, или совестный, к тому же самому приводит, сей же закон дан от исперва человеку первозданному Адаму, и прочим всем иже от Адама. Сего ради древний святии мужие не требоваху писания, но самым законом созерцахуся, и сему последующе угодиша Господеви, и память их в род и род. А яко попрахом сей закон, темже бысть нам потреба писания, егоже древним святым и еще не бысть даровано от Бога, яко кроме сего чрез совесть разумеюще познати Господа, и творити угодная пред Ним, якоже рехом. И от сего естественнаго закона взят бысть Енох, от писаннаго же закона – Илия, иже и приидут тогда верных утверждати, а неверных в христианскую веру обращати. И о сем выше во главе сей показахом, еще же и ниже в знамении 4-м пространнее покажется.

Но якоже убо «прежде Христова воплощения о Илии слух некий держашеся от иудей, яко Илия приидет прежде Христа: обаче фарисее не яко лепо есть толковаху о Илии, но развратиша зле, истину крыюще» (Благовестник, от Марка зач. 39). Тако и ныне вся сия повествования святыми отцы о пришествии сих пророков Илии и Еноха нецыи развращают, истину крыюще, или паче неведуще. Мысленно же некако во иносказательном разуме сия приемлюще, сице глаголют: пророки суть пророческая словеса, или все божественное писание и закон, зане и богатому Авраам святый рекл: братия твоя имут Моисея и пророки. Еще же к сим и иная некая писания приводят, которая аще и не о сих речена, но всячески кроме сего разума.

Обаче кажется можно бы всякому познати от вышереченных сказаний святых отец, яко не мысленно, но чувственно будет пришествие сих пророков Илии и Еноха, ибо, якоже выше от Пролога сказахом, еже о Илии пророце речено, яко сей на небеса колесницею огненною вознесенный, и на Фаворе Христу представый, сей и второму пришествию с Енохом приити вверенный: то же и в летописи глаголет, якоже и в прочих писаниих, а не глаголет, аки бы что другое приидет, но о существе того самого пророка глаголет, иже на колеснице огненней вознесенный, иже на Фаворе с Моисеом Христу представый, сей и паки с Енохом приити имать, глаголет, а не словеса пророческая, и не божественное писание и закон, якоже ныне нецыи мнят, неведущии силы священнаго писания. Не таковым ли Христос во Евангелии глаголет: «Прелыцаетеся неведуще писания, ни силы Божия» (Мф., зач. 91). Темже убо испытайте писания, глаголет Господь (Ин., зач. 17). И буи некогдаумудритеся (псалом 93). Яко сие речено о пришествии Еноха и Илии, о самых тех по существу пророках речено, а не о словесах пророческих, и не писании и законе. Не писание бо предста с Моисеом Христу на Фаворе, но самый той святый пророк Илия, тому убо и паки с Енохом приити глаголет пред вторым пришествием Христовым. Закон и священное писание прииде в мир прежде, неже Христос воплотися: по воплощении же Христове евангельский закон, или благодать и истина, яже Исус Христом бысть, яже от святых апостол и их преемников святых отец всюду во весь мир промчеся. И какому еще послатися от Бога и приити писанию и закону?

О сих же святых пророцех Илии и Енохе вей священнии учителие единомудренно во своих писаниих предают, яко послани будут от Бога, и приидут еще в будущее время, пред вторым Христовым пришествием, якоже выше во главе сей показахом, и имущему ум может довлети ко вразумлению. И таковое пришествие сих пророков великое есть знамение, являющее время антихристова пришествия. Дондеже убо антихрист не приидет, дотоле и пророцы сии не приидут: они же и до ныне еще не приидоша, и от сего является, яко и антихрист не прииде.

И паки: донележе сии пророцы не приидут, дотоле ниже антихрист воцарися: занеже антихристово свойственнообразное царствование в единой и той же седмице будет с пришествием сих пророков, якоже сказует святый Ипполит, иже Даниилом пророком реченную седмицу в свидетельство приводит, глаголя: «Даниилу убо рекшу, седмицы единыя поставлю завет Мой, седмь лет показа: в полседмицы проповедати пророком, и в полседмицы, сиречь в триехлетехипол, царствует антихрист на земли» (Соборник, гл. 8). И в Книге о вере пишет, яко во время пришествия антихристова послани будут сии пророцы. Такожде и в других священных книгах сказуется, ихже зде являем. И сие убо знамение явственно показует, яко ныне самый той сущий антихрист не прииде в мир, понеже сия пророка Илия и Енох не приидоша, якоже Святое писание показует. Еще же и житие еврейское свидетельствует, яко той антихрист и сии пророцы не приидоша: ибо и до ныне евреи живут неизменно во своих обычаях, держащеся сени законныя. Егда же пророка сия Богом послани будут и приидут, тогда евреи изменят свои нравы, ихже ныне держатся, и о сем покажем ниже в знамении 4-м.

Глава 10

Знамение 4 Изменение жития еврейскаго: овии бо веровавше Христу в крещение обратятся Илиею и Енохом, овии же ко антихристу, егоже они аки Христа ожидают, и тогда приимут его, егда приидет, якоже сказа Христос

О сем убо обращении в то время евреев ко Христу Сам Господь пророком Малахием глаголет: «И се Аз посылаю вам Илию Фезвитянина, прежде пришествия дне Господня великаго и просвещеннаго, иже устроит сердце отца к сыну, и сердце человека ко искреннему, да не пришед поражу землю внезапу» (Малахия, гл. 4). Такожде Исус Сирахов в книзе своей глаголет: «Илия взявыися вихром огненным, и колесницею огненных коней. Вписанный во обличение на времена, уставити гнев пред яростию, и обратити сердце отец на сыны, иустроити колена Ияковля» (Сирах, гл. 48).

Нецыи же ныне глаголют, якобы сие пророчество уже исполнилось на Иоанне Предотечи при первом пришествии Христове.

Отвещаем. Приемлется убо сие пророчество и о Иоанне Предотечи, но обаче приточне и частне: самое же истое действо совершитися имать на самом том сущем Илии пророце: ибо святый Феофилакт ясно сказует в Благовестии Иоанна, в толковании зачала 58-го, и сие пророчество во свидетельство приводит, глаголя: «Слепота бо Израилеви бысть: тем и о рабе архиереове, образ бе уха урезание. А еже исцелити паки ухо рабу, являет еже послежде устроение израильтяном разума ныне отъятаго. Ибо Илия пришед устроит я во Христа, и сочетает я, яко отца суща нам сыновом, якоже и Малахия прорече». И святый Златоуст в 57-й беседе на Матфея пишет, глаголя: «Евангелие. И вопросиша Исуса ученицы Его глаголюще: что убо книжницы глаголют, яко Илии подобает принта прежде. От толкования. Два бо глаголет писание пришествия Христова, сие же бывшее и будущее». Ниже: «Но и втораго пришествия предотечу глаголет Илию быти. Перваго бо бысть Иоанн, егоже и Илию Христос нарицаше, не яко Илия бе, но яко служение исполняше онаго. Якоже то той предотеча будет втораго пришествия, тако и сей перваго бысть. Но книжницы сия сливающе и народ развращающе, оное едино второе пришествие воспоминаху пред народом и глаголаху, яко аще сей есть Христос, подобаше Илии предварити». Ниже: «Кое убо есть речение, еже Христос наведе? Яко Илия приидет тогда прежде втораго Моего пришествия. И ныне прииде Илия, Иоанна тако нарицая, сей прииде Илия. Аще же Фезвитянина взыщеши, приидет. Сего ради и глаголаше, Илия убо приидет и устроит вся. Кая вся? Яже пророк Малахия глаголаше: се послю вам Илию Фезвитянина, иже устроит сердце отца к сыну, и сердце человека ко искреннему, да не пришед поражу землю вконец. Видиши ли опасство пророческаго речения? Егда бо Иоанна Илию нарече Христос, общаго их ради служения, да не вознепщуеши, яко сие и от пророка речеся, приложи и отечество его, глаголя: фезвитянина, Иоанн же не бе фезвитянин. И ино же с сим полагает знамение, рекий, да не пришед поражу землю вконец, второе Его страшное являя пришествие». Ниже: «Являя убо яко прежде онаго суд имеющаго пришествия приидет Фезвитянин, сие рече, и вину вкупе являет пришествия его. Кая же вина? Да пришед увещает иудеов веровати Христу, и да не вей вкупе погибнут пришедшу Ему. Тем убо и Сам, то им приводя на память, рече, устроит вся, сиречь, исправит неверие иудеов тогда обретаемых. Темже и зело опасне рече, не рече бо обратит сердце сына ко отцу, но отца к сыну, понеже бо иудее бяху отцы апостолом. Се рек, яко обратит учением сынов их, сиречь апостолов, сердца отцев, сиречь рода иудейска мысль. Евангелие. Глаголю же вам, яко Илия уже прииде, и не познаша его, но сотвориша ему елика восхотеша. Толкование. Зде же глаголет яко прииде, и паки яко Илия приидет и устроит вся. Но да не смутишися, ниже погрешительно быти слово вознепщуеши, аще овогда его приити имуща, овогда же пришедша глаголет, вся бо сия истинна суть. Егда бо рече, яко Илия приидет и устроит вся, зде самого Илию рече, и будущее тогда евреев обращение. Егда же рече, яко той есть Илия, хотяй приити, зде Иоанна глаголет, по образу служения Иоанна Илию нарицая. Ибо пророцы коегождо от благознаменитых царей Давыда нарицаху, (а) иудеов (нарицаху) князей содомских и сынов ефиопских от нрава их. Тако и зде, якоже бо Илия втораго Христова пришествия будет, тако Иоанн перваго бысть предотеча».

И преподобный Иоанн Дамаскин в четвертой книзе своей глаголет: «Послется же тогда Енох и Илия Фезвитянин, и обратят сердца отец на чада, сиречь сонмище еврейское на Господа нашего Исуса Христа и апостольскую проповедь».

И паки святый Феофилакт на 39-е зачало Марка глаголет: «Илия убо пришед устроит вся: и како писано о Сыне Человечесте, да много постраждет. Еже глаголет, сице есть: Илия Фезвитянин егда хощет приити, мир хощет сотворити непокоривым иудеом, и в веру их привести, имже и втораго пришествия есть предотеча». Ниже: «Илия убо устроити хощет вся, и не будет тогда неверна еврея, но вей веруют проповеди, елико их услышат Илию».

Такожде и в беседах к римляном, зачало 107-е, беседа 19-я, писано сице: «Не бо хощу вас не ведети братие тайну сию, да не будите о себе мудри. Тайну зде недоведомое и несказанное глаголя, и многое убо чудо, многое же нечаемое, противу всех мнения имущее. Кая убо есть тайна? Яко недоумение Израилеви отчасти бысть, дондеже исполнение языком внидет, и тако весь Израиль спасется, якоже есть писано, приидет от Сиона Избавляяй, и обратит нечестие от Иакова. Таже назнаменательное спасение полагая, да не некто в прежняя лета сие привлечет и сопряжет, рече: и се им от Мене завет, егда отъиму грехи их». Ниже: «Аще бо сие обещано бысть, и на нихже еще не бысть, ниже прияша крещением оставления, всячески будет. Темже и наведе, нераскаянна бо дарования и звание Божие. О глубина богатства и премудрости и разума Божия, яко не испытанны судове Его», и прочая. Ниже: «Удивися и возопи, уверяя слышащих, яко будет всячески яже рече. Ибо не бы возопил и удивился, аще бы не всячески хотело бы сие быти». Выше, в той же беседе, в зачале 105-м, о евреех пишет, глаголя: «Глаголю убо: еда согрешиша, да отпадут? Да не будет. Увидим, которое им утешение умышляет. Которое убо утешение? Егда исполнение языков внидет, тогда весь Израиль спасется, во время втораго пришествия и скончания».

Святый Иоанн Богослов во Апокалипсисе глаголет: «И слышах число запечатленных, сто четыредесять четыре тысящи запечатлений от всякаго колена сынов израилевых», и прочая. Ниже от толкования: «Аще же вернии тогда от еврей, и избегший пленения римскаго, или же и паче вернейшее, спасаемии при кончине от иудей (верою) за не, якоже глаголет апостол, по внитии исполнения язык, весь Израиль спасется, и обое приятно есть» (гл. 7, зач. 19).

И во Апостоле Толковом сице пишет: «Исаия вопиет о Израили, аще будет число сынов израилев, яко песок морский, останок спасется. Толкование. Зри яко и зде не всем спастися вещает, но толико достойным спасения». Ниже: «Зриши ли пророческое прилежание вкупе и апостольскую мудрость, како во свидетельство приведе, како достойно: ибо не толико сие нам свидетельствует, яко нецыи спасутся, не вси же. Но и како имеют быти спасени наводит: како же убо спасутся, и како их благодати Своея достойными сотворит? Сказание. Сиречь при времени Христова втораго пришествия и скончания мира, якоже во Апокалипсисе пишет: егда Илия и Енох послани будут от Бога на обличение антихриста и обратят от всякаго колена израилева по дванадесяти тысящ ко Господу Богу их, сиречь ко Господу Исусу Христу, пришедшему плотию спасения их ради» (зач. 102, л. 383).

Показахом зде священным писанием, яко тогда евреи ко Христу обратятся чрез проповедь Илии и Еноха. Прочее достоит показати, яко не обратившийся ко Христу антихриста аки Бога примут. А яко приимут в него веровавше, о сем Сам Господь во Евангелии свидетельствует, внегда рек тем иудеом глаголя: «Аз приидох во имя Отца Моего и не приемлете Мене, аще ин приидет во имя свое, того приемлете» (Ин., зач. 17). От толкования в Благовестнике: «Ин же, рече, приидет антихрист яве, Мене убо во имя Отчее пришедша не приемлете, онаго же во имя свое приходяща приемлете». И апостол глаголет: «Зане любве истинныя не прияша, во еже спастися им, сего ради послет им Бог действо льсти, во еже веровати им лжи, да суд приимут не веровавший истине, но благоволиша о неправде» (зач. 275). И преподобный Иоанн Дамаскин о сем глаголет: «Иудеи убо Сына Божия суща Господа Исуса Христа и Бога не прияша, лестца же, бога себе самого глаголюща, приимут» (книга 4, гл. 27). И преподобный Ефрем в книзе своей глаголет: «Паче же убо погании убийцы жидове чтити его (сиречь антихриста) начнут, и радоватися царству его, тех бо почитати будет и место и церковь». Выше: «Чтити же имать зело язык жидовский, тии бо чают пришествия его» (слово 105). Святый Кир ил Иерусалимский в знамении 8-м пишет: «И в мечтании все злое хитрствующа, восхищая себе власть Римскаго царства, и ложно Христом прозовется, и тем прозванием жидов прельстит, иже они его надеются, да с ними пребудет». И паки в знамении 9-м глаголет: «Яко исперва будет смирен, тих, разумен, чист, милосерд, лестию имать показатися, и знаменьми и чудесы лживиыми и мечтательными жидов прельстит до конца, яко показуя себе Христом, егоже они ожидают». И еще в знамении 10-м глаголет: «Того ради сия глаголю, даже мы сами себе не предадим в волю его: понеже бо к жидом приидет, яко Христос, и от жидов прият имать быти, даже их тем наипаче обольстит и честную церковь (им) сотворит, да в большее сомнение их вложит, глаголя себе от колена Давыдова, хотящу Соломонову церковь создати». И святый Ипполит глаголет: «Понеже еврейский род яко паче всех возлюблен будет от самого мучителя, глаголюще к себе: егда обрящется сицев благ и праведен человек в роде нашем. Изряднее, якоже прежде рехом еврейский род мняше, яко царство их хощет востати. Прочее яко того видят в таковем начальствии, приидут к нему, глаголюще: вси тебе покаряемся, вси на тя уповаем, тебе бо познваваем праведна по всей земли» (Соборник, гл. 8).

Подобно сим и в прочих священных книгах обретается показание, яко в пришествии антихристове евреи изменятся своего нынешняго их нрава, овии верою ко Христу, овии же ко антихристу приступят. Ныне же их видим еще во своем обычаи неизменно пребывающих, и елико по силе их наблюдающих сень законную. И сего ради чрез сие знамение яко познавается, яко свойственнообразное антихристово пришествие не бысть в мире, понеже и еще даже доселе тии евреи мессии своего ожидают, тойже мессия будет антихрист.

ПРИСТИЖЕНИЕ. Рече убо Господь во святом Евангелии, яко «небо и земля мимо идет, словеса же Моя не прейдут, ниже изменятся» (Мф., зач. 101). Сам же Той о антихристе рекл есть иудеом, глаголя: «Аз приидох о имени Отца Моего, и не приемлете Мене, ин же приидет о имени своем, того приемлете» (Пн., зач. 17).

Нецыи же ныне инако о сем мудрствуют, утверждающе якобы уже исполнилося сие Господне проречение: прииде ин – сиречь нечестие, или прииде ин – сиречь Игбсус, и прияша его человецы вместо истиннаго Бога.

Обаче сие таковых мудрование не истинно есть, и опровергается самеми теми Господними словесы, занеже сия рекл Господь не язычником, но евреом. Аще же под именем сим рекл языком, то много паче самем сущим тем евреом. Евреи же даже доныне никаковаго закона кроме Моисеова не приемлют, ниже Иггсуса, ниже коего нечестия. Языцы же тогда проповедию апостол вскоре Христа прияша, аще же и уклонишася от Него паки в некое нечестие, но обаче по многих летех уклонишася. Христос же сего не рече, яко приимут Мене, и потом оставят Мя, ин же приидет и приимут его. Зде яве назнамена, яко непосредственно по сени законней евреи прияти имут антихриста. И сего ради не подобает сие речение толико относити языком, елико евреем, к тех бо лицу сие изречеся, они же и до днесь никогоже не прияша кроме сени законныя. Темже всуе шатаются вышереченнии с таковым тщетным своим мудрованием. Ибо святии учители сказуют, яко егда антихрист приидет, абие приимут его иудеи вместо истиннаго Христа Бога, и тогда уже не будут Христа ожидать. Ныне же и еще они с надеждою и велиим чаянием Христа ожидают, и от сего явно, яко и до днесь антихриста не прияли.

И еще паки нецыи ныне инако сей глагол Господень разумеют, толкующе, якобы сие проречение сбылося на евреех, и прияли они тогда антихриста, егда отреклися Христа пред Пилатом, глаголюще: «Не имамы царя, токмо кесаря, распни, распни Его».

Однако якоже вышереченное, тако и сие умствование, елико не прилично, толико и не справедливо. Ибо святый Иоанн Златоустый в беседах во Евангелии на сие место, и во Апостоле Толковом в зачале 275-м, такоже и святый Феофилакт в Благовестнике, стих сей толкующе, оба единомудренно объявляют, яко сие евреом речеся, а о языках ничтоже отнюд воспоминают, к тому же и сего не глаголют, якобы тогда евреи антихриста прияли, егда отреклися Христа пред лицем Пилатовым. И аще бы тогда евреи антихриста прияли, то всяко бы святии отцы сие сказали, и почто бы им время будущее назнаменати? Святый Иоанн Дамаскин в книзе своей Самого Господа вышереченные глаголы во свидетельство приводя, глаголет, яко иудеи Господа не прияша, лестьца же приимут. Видиши ли, что святии отцы глаголют, не яко уже прияша, но приимут. Всем же есть известно, яко вей святии отцы после Христа и апостолов быша, но обаче время будущее назнаменают, а не прошедшее.

ПРИСТИЖЕНИЕ ДРУГОЕ. Под именем Христа ожидают иудеи самого того антихриста, Христа же истиннаго Бога, давно уже плотию пришедша, не хощут в Него веровавше прияти. И за таковое ожидание проклинает их святая соборная и апостольская Церковь, глаголющи: «Проклинаю всех, чающих антихристова прихода», и прочее (Потребник иноческий, л. 309 и 310). Ныне же нецыи к сему прицепившеся, и на нас клятву сию наводят, яко бы и мы антихриста ожидаем.

Ожидаем убо, обаче разсмотрети подобает ожидания нашего разум, понеже сугубообразно ожидание разумеется: есть ожидание еже и суть ожидание, и есть ожидание токмо под именем ожидания, не суть же ожидание, но страх паче. И сего ради во изъявление покажем некий пример: якоже бы град некий благочестивый обстоим и окружен был от страшнаго некоего сильнаго и многочисленнаго воинства, посланнаго от некоего врага, нечестиваго и гордаго царя, лютаго мучителя, который бы хотел абие и сам вскоре принта, и град той разорити и опустити, и благочестие разрушити. Тогда во граде том благочестивии людие, слышаще царя того к ним идуща, и видяще хотящую быта граду их скорую погибель, темже плачут и рыдающе сетуют, аще же и не хотяще врага того и губителя ниже слышати, ниже видети: однакоже ожидают его безпрестанно горьким и печальным ожиданием (таково убо есть и наше антихриста ожидание). Другие же нецыи, аще будут во граде том человецы, растленнии умом и житием своим, сии слышаще того мучителя к ним идуща, еще возрадуются, и восхощут прияти его с любовию, и покоритися ему, аки своему царю, сущаго же своего их царя, пришедшаго к ним на избавление, отметающеся. И таковых и ныне не вей ли бы осудивше проклянули за оное ожидание. Обаче наше ожидание антихриста не такое, якоже сих ожидание: ибо мы ожидаем антихриста не яко мессию и царя своего, а яко врага и губителя, ожидаем не с радостию и надеждою коею, но со скорбию и страхом ожидаем, веруя божественному писанию, яко быта ему во свое ему время.

И сицевым убо ожиданием и святии отцы ожидают, такожде и нам ожидати повелевают, о сем святый Иоанн Златоустый в Маргарите глаголет: «Видим яко уже несть места под небесем, в немже не проповедася Евангелие, прочее ожидай конца, нечистоты и запустения, сына погибели, егоже ради многа имать быта и велия скорбь» (ел. 13, л. 591). И в Книге Кирилове во главе 4-й о антихристе глаголется: «Котории оному последнему антихристу человеков вкупе приведут, иже прежде его пришествия востати имут, и изменят дела и глаголы зрящии, и приидут ихже ожидаем чуднее и паче сих». В той же главе в знамении 7-м глаголет: «И се есть уже отступление, и ожидаем врага, иже помалу поелет пред собою предотеч своих, даже и сам на готовое пришед останокуловит».

Подобно сему и в других святых книгах обретается, яко святая соборная Церковь ожидает антихристова пришествия. И аще нецыи на нас за таковое ожидание клятву наводят? Увы! Да наведут они прежде клятву на святых отец, занеже и они ожидают его, якоже речеся. Видиши ли, яко и святии отцы ожидают антихриста.

Но иже пререкуяй о сем божественному писанию, якоже в прочих местех, тако и зде развратити предумышляя, сице нецыи глаголют: святии отцы ожидали антихриста, но тогда, егда он еще не пришел, ныне же не подобает его ожидати, зане уже прииде и воцарися.

На таковое сих мудрование отвещаем им: аще не хощете покоритися о сем священному писанию, поне помните то, еже сами вы всегда глаголете: не сами ли вы повсеместно утверждаете, аки бы наста самый той антихрист от времен воплощения Христова, а зде глаголете, яко тогда при святых отцех не прииде той антихрист, и сего ради они его ожидали. Святии же отцы и церковнии учители после воплощения Христова были по различным временам, даже до лет Никона патриарха московскаго, и они видели еретиков и отступников от благочестия, якоже римлян, тако и прочих, и благочестия исполнь книги писали, обаче пождание назнаменали. Аще же бы от прежде бывших их времен был уже антихрист царствуя в мире, то кого бы они ожидали? Темже убо видимо есть, яко вышереченнии человецы токмо словеса обращают семо и овамо, а не хотят, или паче не ведят, последовати лежащему во святом писании разуму, но и той тщатся наипаче на свое умышление обратити. И за сие сбывается на таковых писание Великаго Василия, якоже рек глаголя: «Пререкателие истины не по писанию свой разум последовати изучающе, но к своей воли разум писаний развращающе» (на Шестоднев беседа 2).

Глава 11

Знамение 5 Чудеса хотящая быти тогда Енохом и Илиею скорбию размешена

О чудесех убо хотящих быти Енохом и Илиею пророкома во время антихристова пришествия, во Апокалипсисе во главе 11-й свидетельствуется тако: «И дам двема свидетелема Моима, и будета пророковати дний тысящу двести шестьдесят, облеченна во вретища». Ниже: И аще кто хощет их обидети, огнь исходит из уст ею, и снедает враги ею. И аще кто хощет я обидети, сице подобает ему убиену быти. Сия имата власть затворити небо, да не снидет дождь во днех прорицания ею: и область имата над водами обращати я в кровь, поразити землю всякою язвою, елижды аще восхощета. Толкование. И аще кто хощет их обидети: оле божественныя дивныя благости и благодательства, яко равномощную на язву приносит цельбу. Понеже бо во всяких знамениих и чудесех ложных, от всех чаровных отравников и обаятелей лжехристос будет объявленнейший, аки всякое диаволе действо приемляй. В силе истинных знамений же и чудес святая сия вооружит Бог приложением истины и света, ложь и тму хотяща обличити. И прельщенных убо обращающа, словом же учительным, жезлы же казнительными, бездождием и огнем и изменением стихий, и подобными. Лестьцаже изобличающа, и ничтоже ниже от онаго, ниже от другаго постраждут, даже до конца своего си прорицания» (Толковый Апокалипсис Андрея Кесарийскаго). И паки во главе 15-й, зачале 45-м, глаголет: «И по сих видех и се отверзеся храм скиния свидения на небеси. И изыдоша седмь ангели, имущии седмь язв». Ниже: «И едино от четырех животных даде седмим ангелом седмь фиал златых, исполненных ярости Бога, живущаго во веки веком. И никто же можаше внити в храм, дондеже скончаются седмь язв седми ангелов. Толкование. Отсюду умышляем, яко донележе негодование божественное на нечестивых не разлучит праведники от неправедников, никакоже святии получат жребий в небеснем Иерусалиме, и священнодейство и покой в храме Божии. Подобает бо скончатися, глаголет, язвам, ими же мздовоздаяния греховная достойным подаются, и сии изволенный им получат ответ, посем сице дано будет обитание святым в горней митрополии. Куюждо же язв обретающимися в кончине примиряяй, кто не погрешил бы мню подобающаго. Человеколюбец бо сый Бог, ко еже умалити безконечныя муки в будущем и в настоящей жизни, достойным попустит, да наведены будут чрез Еноха и Илию пророка мучительныя язвы, и чрез припадающия болезненныя от браний противомерному согрешенных возмездию». И паки во главе 16-й, зачале 47-м: «И вторый ангел излия фиалу свою на море, и бысть кровь аки мертвеца. И всяка душа живая умре в мори. Толкование. Не велие есть божественней силе, и на обличение немощи антихристовы, и на удобство прельщаемых, святыма пророкома Енохом и Илиею преложити море в кровь аки мертваго, сиречь, аки закланнаго, и тлю содеяти сущих в нем, якоже древле во Египте чрез Моисея сотвори на обличение жестоты фараоновы и на указание Своея силы». Ипполит святый в Соборнике глаголет: «И убо полседмицы возмут оба пророка со Иоанном, еже проповедати во всем мире о антихристове пришествии, сиречь дней 1260, оболчена во вретища: иже и сотворят знамения и чудеса, во еже тако умолити и обратити человеки в покаяние за пребезмерное тех беззаконие и нечестие. И иже восхощет тех озлобити, огнь изыдет от уст их, и пояст враги их. Тии имут власть удержати небо, да не снидет дождь во дни пришествия антихристова, и воды обратят в кровь, и поразят землю всякою язвою, якоже аще хотят».

О сих язвах, хотящих тогда быти от пророков, вышеписанное сие речение, елико аще восхощета, нецыи ныне не в силе писания разумеют, но мнят якобы и не восхощут тогда сии пророцы язвы сия навести.

Аще же кто истиннолюбно разсмотрити желает, тем известно да будет, яко неотрочно наведены будут оныя язвы от сих пророков, понеже во Апокалипсисе в той же 11-й главе ясно сказуется, яко по убиении сих пророков людие возрадуются и возвеселятся, яко оба сия пророка мучиста живущия на земли. И аще речеся мучиста, зде яве есть, яко язвы сия наношаста. А еже речеся, елико аще восхощета, или якоже аще хотят, сиречь еюже язвою колико восхотят наказати, столько и накажут. Ведят бо время и потребу, качество и количество, яко раби Бога вышняго, и вся послушна им, якоже речеся. Сего ради вонмем, где убо ныне, или от кого таковыя вышереченныя знамения и чудеса совершаются? Воистину ни от кого же и нигде же. Темже и от сего знамения показуется, яко антихрист не прииде в мир: в самое бо то время пришествия его сия истинная чудеса от сих пророков будут действоватися, противу мечтательных знамений и ложных чудес антихристовых, о нихже изъявится ниже в шестом знамении.

Глава 12

Знамение 6 Яко той антихрист царем и богом прозовется и покажется, понеже дивная чудеса в мечтании содеет

В первом знамении показахом от пророка Даниила, како яви ему Дух Святый четыре великая царства, иже едино по другом преемствовати хотяща до скончания мира. Сие же открыся ему образом четырех зверей из моря исходящих. В сем же знамении показати потщимся явление единаго зверя, рекше четвертаго, яко и достойно, рече убо Даниил: «Видех и се зверь четвертый, горд и страшен, и крепок излиха, зубы его железни и велии, и ногти медяни, ядый и отончевая, останокже ногами попираше. Тойже различаяся излиха паче всех зверей прежних, и рогов десять ему, и смотрих в розех ему, и се рог другий мал взыде пред ними». Ниже: «И се очи, аки человечи в розе том, и уста глаголюща велика». В тойже главе толкуя ему, о сем ангел глаголет: «Зверь четвертый – царство четвертое есть на земли, еже преспеет вся царства, и пояст всю землю, и поперет ю, и посечет ю. И десять рог ему – десять царей востанет, и по нем востанет другий, иже преспеет злобами вся» (Даниил, гл. 7).

Святии отцы Ипполит папа римский, Кирил Иерусалимский и Иоанн Дамаскин, во свидетельство своих писаний приемлюще от сея главизны пророчества Даниилова, и сего единонадесятаго царя, виденнаго во образе единонадесятаго рога, разумеют быти самого того антихриста, объявитися хотящаго в римстем начальстве, показанном пророку во образе четвертаго зверя горда и страшна, о немже пространно сказано и в первом знамении. Откуду ясно показуется, яко зверь четвертый горд и страшен, се есть четвертая монархия, или единовластительство римское. Рог оный малый возшедший пред ними, се есть антихрист, иже от мала и худа и безславна рода востати хотящий. Понеже антихрист царствия не будет отчичь и дедичь наследник, но прелестный и лукавый восхититель.

О сем глаголет Даниил пророк во главе 11-й: «И не даша нань славы царства, и приидет со обилием и соодолеет царству лестьми». И преподобный Иоанн Дамаскин глаголет: «Народится рече из блуда, и воспитается тайно, и внезапу привостанет и восцарствует» (книга 4, гл. 27). И святый Кирил Иерусалимский пишет, глаголя: «Не от царей ни от царска рода воздержит царство, но прелестию восхитит власть» (знамение 10). «Егда же исправится царство ему, абие убиет три цари великия, египетскаго, ливийскаго и ефиопскаго» (Ефрем и Ипполит об антихристе). О сих святый Андрей во Апокалипсисе сказует глаголя: «Сии десять рог и Даниил виде, сиречь царей пред антихристом идущих, от нихже триех искоренит, а прочая под ся покорит проклятый» (гл. 17, зач. 54). О сих и Стефан Зизаний учитель церковный глаголет: «Ибо седмь царей в послушание свое антихрист к римскому престолу слугами своими в то время добровольно и без брани взыскати имать, а трех паки войною и силою со иными седмию цари достанет» (Книга Кирилова, знамение 9).

Понеже егда антихрист трием вышереченным царем одолеет, сиречь египетскому, ливийскому и ефиопскому, тогда и прочий царие покорятся ему. Таже вознесется сердцем на всякаго человека, не точию же, но и на Бога хульная речет, помышляя окаянный, яко царь будет даже до века (Соборник, гл. 8). И оттоле антихрист начнет быти монархом, рекше единовластвующим всея вселенныя обладателем. О сем монаршестве антихристове, яко быти ему по образу августа кесаря, сказует и святый Андрей во Апокалипсисе, во главе 13-й, зачало 36-е. Подобно и святый Григорий Богослов в книзе своей во главе 47-й повествует. Тоже и святый Кирил Иерусалимский в знамении 10-м книги своея пишет. И святый Иоанн Златоустый в беседах апостольских глаголет: «Якоже бо иже прежде сего разоришася царствия, сиречь мидское от вавилонскаго, вавилонское от персскаго, персское от македонскаго, македонское от римскаго, тако и сие от антихриста, а он от Христа» (2 Сол., беседа 4). Зде Златоуст святый антихристово царствование сравнивает с вышереченными царствами и глаголет быти антихристово царствие последующее римскому, якоже римское греческому, греческое персскому, персское асирийскому. Ельма же оная царствия бяху чувственны и бяху монархиями: яве есть, яко и антихристово царство хощет быти чувственное, и будет монархиею, и никим же упразднитися имать, точию Самем Господем Исусом Христом на суд грядущим. И о сем апостол вещает глаголя: «Егоже Христос

Исус убиет духом уст Своих, и упразднит явлением пришествия Своего» (2 Сол., зач. 275).

Возвратимся паки на преждереченная. Святый Ипполит нрав и действа антихристова показует, глаголя: «В первых бо его родится кроток, тих, любезен, благоговеин, миролюбив, ненавидя неправду, не приемля мзды, идолослужения отвращаяся, писания любя, и прочая. Таже и чудеса сотворит, прокаженныя очистит, разслабленныя воздвигнет, бесы изгонит, о дальних яко о настоящих известит, мертвыя возставит, вдовицам поможет, и прочая. И сия сотворит, яко льстив сый и лукав, и всех хотя прельстити, во еже сотворити его царя. И егда видят его людие и народ толикия добродетели его и таковыя его силы, вси вкупе единым разумом соберутся, во еже сотворити его царя». Ниже: «Исперваубо льстивне прием ложь беззаконный, отречется славы своея. Человецы же пребудут моляще его, и поставят его царя, и по сих вознесется сердцем», и прочая. Ниже: «И спеша воврещи в погибель весь род человеческий, умножит знамения ложная. Людем бо всем, восхваляющим его мечтаний ради, воззовет гласом крепким, яко поколебатися месту, в нем же множества тому предстоят: разумейте людие, колена и языцы мою великую власть и силу, и крепость моего царства, кто силен якоже аз? Кто бог велий разве мене? Кто власти моей сопротиво станет? Представит горы пред очима зрящих, шествует по морю не мокрыми стопами, сведет огнь с небес, сотворит день тму, а нощь – день: солнце бо преобратит аможе хощет, и луну такожде. И единою просто вся стихия землю и море силою мечтаний своих пред зрящими покажет послушны». Ниже: «Тажде повеления его скверный на кииждо град послет, и взаконения во всех странах, с бесы же и с чувственными человеки глаголюща, яко царь велий явися по всей земли: приидите вси и видите крепость его и силу», и прочая. Ниже: «Уведесте ли козни льстиваго, како всячески хощет отставити ум человеком? Бесы же покажет яко ангелы света, и воинства безплотная приведет, имже несть числа, и пред всеми покажет себе на небо вземлема с трубами и гласы и звуки неизочтенными, и воплем крепким, восхваляющим его неисповедимыми песньми, и возблистается яко свет, иже тме начальник: и когда убо якоже на небеса возлетит, когда же на землю сходит со славою многою, когда же яко ангелом бесом заповесть творити повеления его со многим страхом и трепетом».

Преподобный Ефрем в книзе своей глаголет: «Изреку с болезнию, и возглаголю с воздыханием о настоящем мира скончании, и о змии безстуднем и лукавем, хотящем возмутити всю поднебесную, и вложити страх и пренемогание и люто неверование в сердца человеком, и творити знамения и чудеса и страхования, яко да возможет прельстити и избранныя, и уклонити в ложная знамения и чудеса привиденьми, бывающими от него, по попущению святаго Бога приемлет область антихрист прельстити весь мир, зане умножися нечестие в мире, везде и повсюду злая содевают. Тем убо Пречистый Владыка духом лестьчим хощет искусити весь мир, за нечестие их послабит. Понеже сами тако восхотеша человецы Бога отступити, а неприязнь прияти. Велик подвиг братие во времена она на всех человецех, паче же на верных, егда будут знамения и чудеса от самого змия со многою областию. Егда паки себе являет яко бога в привидениих страшных, на аер летяща, и вся демоны во образе ангельстем летяща со страхом пред мучителем, и возопиет бо крепко, изменуя образы, устрашити хотя без числа вся человеки. Прием бо безстудный область, демоны послет на вся концы земныя, яко да проповедят всем, яко царь велик явися со славою, приидите вси и видите». Ниже: «Не сам же родится сатана, но во образ его приидет прескверный, яко тать лжею говения, хотя прельстити вся человеки. Смирен же и молчалив являяся, яко и се рещи, ненавидя неправду, и отвращаяся идол, почитая же благоверие, и прочая. Над всеми же сими чудеса сотворит и знамения, и страхования со властию многою». Ниже: «Егда бо узрят его людие мнози и народи толика его добродейства, красотою же и силою суща утворена, вси вкупе во единой воли будут, и с радостию великою поставят его царя, глаголюще сами к себе: где убо ин обретается толик человек благ и праведен». Ниже: «Потом же выше меры вознесется сердцем, уже не яко говеин являяся, уже не яко нищелюбец, уже не тих, но всегда от всех яр, нагл, гневлив, и прочая. Чудеса множа страшная, лжею и неправдою се являя. Тацем же коварством преставит горы привиденьми ложными, а не истиною. Народом убо предстоящим и людем многим славящим его за привидения, и возопиет гласом крепким, яко подвизатися и месту, на немже народи предстоят ему. И глаголет со дерзновением: разумейте вси людие великую силу моея области, се пред всеми вами хощу горе оной велицей сущей обои пол моря, да прейдет со онаго полу моря глаголом моим семо ныне к нам. И речет скверный, тебе велю горо, ныне прейди на сию страну моря: и абие потечет гора во очию всем видящим, а не подвигнувшися ей отнюд от оснований, яже Бог вышний утврди и вознесе. Сим бо прескверный области не имать, но весь мир прельстит привиденьми и чары волшебными. Паки же друзей горе, стоящей во глубине великаго моря, острову зело велику велит изыти и на сусе стати в красный позор видящим, острову же не двигнувшуся отнюд, яко гора на сусе, абие оток бывает. Паки тойже змий прострет руце свои и соберет множество гад и птиц, и пойдет верху бездны, яко посуху, привиденьми льстит всяческая. И мнози веровати имут, и славити его начнут яко бога крепка» (слово 105).

В синоксаре в Неделю мясопустную о втором пришествии Христове глаголет: «Преди же Его пришествия приидет сопротивник Христу, и походит негли по Христе, проходя житие, и чудеса сотворит, елика убо и Христос содея, и мертвеца воскресит, обаче по привидению вся содеет». Ниже: «И все сатанино действо подъимет, и напрасно востанет и угодит людем, негли и божественная писания пройдет, и посту навыкнет, и понудится от человек, и царь проповесться».

Святый апостол Павел глаголет: «И тогда открыется человек беззаконию, сын погибели, противник, и превозносяйся паче всякаго глаголемаго бога или чтилища, яко ему сести в церкви Божии, аки богу, показуя себе яко бог есть» (2 Сол., зач. 275). От толкования в Толковом Апостоле. «О антихристе зде беседует». Ниже: «Сей превознесется своею гордостию не токмо на всякаго глаголемаго бога, но и на идолы: не аки ко идолослужению приведет человеки, но тому самому поклонитися, и повелевати себе за бога почитати». Апостол: «Яко ему сести в церкви Божии, аки богу, показуя себе яко бог есть». Толкование: «Не токмо во Иерусалиме, но и в церквах Божиих, и не рече глаголюща, но показуя, сиречь покушаяся показати и делы, и знамении, и чудесы». И в беседах пишет, глаголя: «И открыется человек, рече, превозносяйся паче всякаго глаголемаго бога или чтилища. Не бо во идолослужение введет он, но богопротивен некто будет, и всех разорит богов, и повелит кланятися себе вместо бога, и сядет в храме Божием, не иже во Иерусалиме, но и в церквах, показуя, рече, себе бога, не рече глаголюща, но покушающася показати: ибо дела велия соделает, и знамения покажет чудна».

Видиши ли, яко антихрист царем будет, и не точию царем, но и богом прозовется, и велия знамения соделает. А еже глаголет, яко сядет в церквах Божиих: како же сядет и когда, о том ниже покажется в знамении 7-м и 9-м. Зде же не о сем, но о титуле (сиречь достоинстве или сане) и о чудесных действах его глаголем, о сем паки и святый Кирил Иерусалимский в знамении 10-м сказует, глаголя, яко «сатана ученики себе учинит, иже по онаго воли сам собою начнет действовати, и прелыцати всякими знаменьми и чудесы лживыми, отец бо лжам, и лживая действа мечтанием действовати имать, иже многая начнут видети мертвых воставших, а они не восташа, и хромых ходящих, и слепых прозирающих, а здравия не будет. От толкования. Вознесется и возвысится паче всякаго глаголемаго бога или чтилища. Не глаголет всячески паче Бога, Иже есть един истинный Бог, но паче всякаго глаголемаго бога, еже есть паче всех царей земных вознесется, иже суть прозваннии, а не суть бози». И в знамении 11-м сице: «Оны прежний цари гоняще токмо убивали, а мертвых не воскрешали: а тогда антихрист лестию и привидением злым прельстит их и изменит, аще возможно, и избранныя, едва тогда кто помыслит, яко и Христос имать что больше сотворити паче сего, яковою же силою сей действует».

Показахом зде от многа мало священным писанием, яко антихрист царем и богом объявится, и велия чудеса сотворит, которая выше сказана. Кто же ныне и где виде, или когда слыша таковаго человека, бывающа царя и бога, и сицевая знамения и чудеса мечтанием сотворяюща? Воистину никто, никогда и нигдеже. Темже и от сего знамения явствуется, яко не у прииде самообразне той антихрист: но всуе и ложне нецыи утверждают отдавна в мире пришествие его.

ПРИСТИЖЕНИЕ. Но речет ли кто, яко ныне мечтательная сия чудеса показуются в столичных и прочих городах в театрех.

Отвещаем. Аще ныне привидения некая и показуют нецыи, обаче не такова, якова же от антихриста хотят быти. Разньство же их всяк может видети, ибо антихристова действа в священном писании суть объявлена, такожде и при нынешних зрелищах всеми есть видимо. Еще же тии показатели ныне и богом себе не исповедуют, и имети себя вместо бога никого не научают: но токмо показуют они оная зрелища взятки ради денежныя, над народом же никакой власти не имут, темже и людие вместо бога их не вменяют, но токмо видевши оная зрелища, смехом и прочим мирским утешением забавлени, абие отходят. Сего ради не пристойно есть таковая зрелища вменять и разуметь вместо оных знамений и чудес, хотящих быти тогда от самого антихриста, иже не взятки ради денежныя, и не смеха ради, и не простаго ради зрения действоватися имущих, но ради прелести и погибели душевныя, якоже выше объявися.

Инии же паки о сих чудесах инако мудрствуют, якобы сия мечтательная знамения и чудеса от антихриста ныне уже совершаются тайнодейственне, в духовном смысле, при еретических сонмищах: имут бо еретицы вся тайны ко прельщению православных, якоже показует святое писание.

Отвещаем. Обаче таковое их мудрование неосновательно есть, блазненно паче же и лживо: а яко тако есть, показуется отсюду.

Пер вое. Яко к еретиком ныне аще кто обращается или присоединяется, всячески не чудес ради соблажняется, но жительства ради легкаго, растленнаго и роскошнаго, или ради недоведения в разсуждении чрез множество замешательств. При антихристе же не сих ради соблазнятся, но чудес ради и знамений якоже речеся.

Второе. Яко еретицы убо своим лживым учением прельщают уже лет тысящу осмь сот и болыпи, наченшеся от времен воплощения Христова, и даже доселе. Нецыи же еретицы были и при законе Моисеове, таково бо продолжительно прельщение еретическое, яко оттоле даже до ныне продолжися. Прельщение же антихристово самообразное, не продолжительно есть, но малое некое удержит время, сиречь токмо три лета и шесть месецей. И о сем ясно показуется ниже в 12-м знамении.

Т р е т и е. Яко во время прошедшее и ныне настоящее, в нем-же и еретицы настоят, никтоже противу им не вооружися таковыми чудесами, яковы же противу него от пророков Илии и Еноха будут. Кто бо и где ныне затвори небо, да не снидет дождь на землю? Или кто преобратил воды в кровь, или порази землю другими сим подобными язвами? Воистину никтоже. Во время же пришествия антихристова, противу его ложных чудес, святая пророка Илия и Енох сотворят сия истинная чудеса, рекше: удержат небо, да не снидет дождь на землю, и обратят воды в кровь, и поразят землю всякою язвою, елико восхощут. И о сих писано выше в знамении пятом.

Но паки противоречат ныне нецыи, о сих глаголюще: вся сия чудеса уже сбышася сицевым подобием: небо убо есть святая Церковь, а дождь от неяблагочестивое учение, земля же суть человеки. И егда оскуде от Церкви благочестивое учение, яко дождь от небесе, и преобратишася воды в кровь, сиречь в нечестивое учение, тогда изсше земля, сиречь от таковаго нечестиваго учения умроша человецы таинственною душевною смертию.

Отвещаем. От божественнаго писания выше показахом, в знамении 3-м, 4-м, и 5-м, о сих пророках Илии и Енохе, яко чувственно приидут во время пришествия антихристова и сотворят вышереченная чудеса. Ныне же онии самомнители яве блазнятся с таковым неистинным мудрованием, яко умствуют быти пророков божественное писание, или закон, а небо – Церковь: дождь же и воды кровавы – учение: землю – человеков. Есть убо в священном писании, называются сия тако: обаче преносне во иносказательном разуме, а не всюду и не о сих паче пророках Илии и Енохе, но отнюд в другом лице и смысле и времени. Сие же святых отец сказание о сих пророках, и о чудесах их, о небеси и о дожде, о водах и о земли, подобает чувственно тако приимати. Ибо тако святый Иоанн Богослов во Апокалипсисе в 11-й главе предаде. Святии же отцы Иустин мученик и любомудрец, и Ириней епископ лугдунский, и Андрей архиепископ Кесарии Каппадокийския, и Иоанн Златоустый, вей сии кииждо их протолкова Апокалипсис, и на сию 11-ю главу толкование творяще, сиречь о сих пророках Илии и Енохе, о пришествии же их и убиении, и о чудесах, хотящих быти от них, вся сия они чувственно приемлют, а иносказательнаго коего толкования никтоже из них не предаде, якоже явственно свидетельствуют древлеписменные и новопечатные Апокалипсисы. Такожде и Ипполит святый с ними единомудренно сия приемлет. Ибо в слове своем, егда писаше о антихристе, тако взем от Апокалипсиса, написа и о сих пророках, и о чудесех и убиении их. Обаче и сей святый вся речения о сих чувственно приемлет и предает, а таинственнаго смысла отнюд не рече: о сем сказано выше в знамении 3-м, 4-м и 5-м. И возможно убо есть всячески ум имущему видети и уразумевати по вышереченным святоотеческим сказанием, яко сия пророка Илия и Енох чувственно будут.

Таинственное же оных мнение не точию святых отец сказанию, но и самим им таковое мудрование воспротивоборствует, и на себя станет. Имать же сице: аще убо и по их мудрованию разсуждати, и святое писание зде за пророков Илию и Еноха полагати: то где и како могут быти от писания вышереченная чудеса? Кто убо виде или слыша когда, еже бы священное писание удержало небо от дождя, сиречь от благочестивагоучения, и преобратило бы в кровь воды, сиречь в нечестивое учение, и тем бы изсушило землю, сиречь человеков душевне умертвило? Могут ли сия тако быти? Никакоже! Темже явственно показуется, яко не имать места таковое мудрование, еже бы разумети вместо Илии и Еноха Святое писание: но яве открывается и светлоявленно познавается чувственное тех пришествие и чудеса быти имущая.

Четвертое доказательство к трем вышеписанным, во утвержение истинных чудес пророческих, хотящих быти во обличение вышереченных антихристовых ложных чудес, яве, яко чувственно же быти имущих во оное время, егда сам он приидет, и богом быти себе вознепщует, тогда и людие многи поклонятся ему, аки богови святому, вопиюще и глаголюще, яко ты еси спаситель наш.

Темже убо ныне нецыи прицепившеся к речению сему говорят, якобы сие уже совершилося. Мнози бо ныне покланяются иному новому богу Игюусу, глаголюще, яко ты еси спаситель наш, той бо ин бог наста от лет 1666, от времени Никона патриарха московскаго. Тойже иный новый бог Игюус от тех времен учинися небесным и земным царем и владыкою, и всему миру спасителем: истинною же антихрист есть.

ОБЛИЧЕНИЕ. Не ведятубо ниже разумеют глаголющий о сей новости И ж: ус, якобы она бысть отлет 1666, и якобы се антихрист есть, но явно ошибаются. Ибо не от сих лет сия новость настала, но гораздо ранее, от кого же и как возниче, не известно. А яко сия новость не есть антихрист, извествуется отсюду.

В книге Библии, печатанной в 1581 году в городе Остроге, на самом последнем листу в выходе греческими буквами напечатано Игбсус. Издана же сия Библия Василием князем острожским, к которому Мелетий патриарх александрийский писал послания, и называл его всеславным, велелепным, благочестивым и православным поборником Церкви соборныя, православныя, восточныя веры, ни в чесом не сумненныя. О чем зри в Книге Кириловой на листах 431 обор., 451, 489 об. и 501.

В беседах апостольских, изданных Захарием Копистенским в 1623 году, аще и не всюду, обаче во многих местех, напечатано Иш: ус. На сии же беседы богомудрый списатель Книги о правой вере во многих местех ссылается, смотри в Книге о вере на листах 26, 84 обор., 91, 99 и 100, и далее по всей книге. Еще на те же беседы ссылался московский собор, бывший исправления ради церковнаго пения при патриархе Иосифе. О чем зри в предисловии служебника, напечатаннаго в 10-е лето патриарха Иосифа, и в другой раз в первое лето Никона. Но аще бы сия новость «Иг^сус» была (якоже нецыи мнят) антихрист, то списатель Книги о вере, и всероссийский архиереев собор, и даже сам Иосиф патриарх, видя оную в вышеозначенных книгах, не бы умолчали, еже бы сего не объявити последующим по ним родовом, понеже вещь сия не суть мала: но всячески достойна объявлению. Аще же толицыи и таковии отцы тако не рекоша, яве есть, яко несть се антихрист: и всуе трудятся блазнящеся о сем нецыи, мнящеся быти премудрее оных отец, обаче объюродеша, хотяще то приввести и утвердити, еже святии отцы не предаша. Прочее покажется о сем ниже в знамении 10-м, раздел 6-й.

Глава 13

Знамение 7 Яко не инде где, но во Иерусалиме граде престол антихристов имать быти

А яко престол антихристов во Иеросалиме будет по подобию Давыдову, о сем от божественнаго писания извествуемся, во Апокалипсисе во главе 11-й сказуется тако, яко «зверь восходяй от бездны (сиречь антихрист) сотворит с ними брань (то есть со Илиею и Енохом) и победит их, и убиет я, и труп ею оставит на стогнах града великаго, иже нарицается духовне Содом и Египет, идеже и Господь наш распят бысть. От толкования. Антихрист убиет я по Божию оставлению, и не погребена оставит телеса ею в самем тем Иерусалиме, сиречь ветхом и развращением, идеже Господь пострада: ту бо начнет царствовати по подобию Давыдову, егоже по плоти бысть Сын Христос истинный Бог наш, да и в сем себе Христа известит быти, яко совершая пророческое слово глаголющее: воздвигну скинию Давыдову падшую, и изриновения ея паки созижду, имже жидове блазнящеся, на онаго пришествие восприемлют и сказуют» (Апокалипсис толковый Андрея Кесарийскаго, зач. 30). И паки святый Андрей глаголет: «И антихрист в храме Божии сядет, или во иудейстем древле убо божественнем, развращением же за дерзость на Христа, и от него паки исправитися чаемем богоборцами иудеями» (зач. 63). И святый Ипполит в слове своем о антихристе сказует: «Яко той воставит во Иеросалиме каменей храм» (Собор-ник, гл. 8). И паки ниже глаголет: «И три цари убиет гневом, египетскаго, ливийскаго и ефиопскаго. И по сих сотворит церковь иже во Иерусалиме, и воставит ея иудеом». И святый Ефрем в книзе своей глаголет: «Паче убо погании жидове чтити его начнут, и радоватися царству его, тех бо почитати будет и место и церковь» (слово 105). И в синоксаре в Неделю мясопустную пишет, яко «он все сатанино действо подъимет, и напрасно востанет и угодит людем, негли и божественная писания пройдет, и посту навыкнет, и понудится от человек, и царь проповесться, и возлюбит множае еврейский род, и во Иерусалиме устанется и церковь их воздвигнет». И в книзе Григория Богослова, во главе 47-й, сице писано: «Мерзость опустения стоя на месте святом глаголют, яко храм во Иерусалимех созиждется послежди, яко антихристу уверующуся от иудей Христу быти и сядущу, и возмнившуся всея вселенныя быти царю». И святый Кирил Иерусалимский глаголет: «А еже глаголет, яко в церкви Божии ему сести: в которой церкви? В смущенной глаголю жидовской, а не в той, в которой ныне есть мы. Того бо ради сия глаголю, даже мы сами себе не предадим в волю его: понеже бо к жидом приидет яко Христос, и от жидов прият имать быти, даже их тем наипаче обольстит, и честную церковь сотворит, да в большее сомнение их вложит, глаголя себе от колена Давыдова, хотящу Соломонову церковь создати» (Книга Кирилова, знамение 10).

Выше писано в сей главе из Апокалипсиса, яко град Иерусалим нарицается Содомом и Египтом. Темже да весть хотяй познати, яко тако не просте нарицается, но духовне, зане умножися в нем беззаконие и студодеяние. Сего ради подобно сказует и святый Иоанн Златоустый в Маргарите во втором слове на иудея, приводя во свидетельство пророка Исаию глаголюща: «Услышите слово Господне князи содомстии, внемлите закон Божий людие гоморстии. Не к содомляном ниже в Гоморе живущим беседует, но ко иудеом. Наричет же тех сице, понеже злобы подражанием еже ко онем привлекоша сродство». Нарицается убо град сей Иерусалим градом святым, ради бывших в нем Божиих благодеяний. От исперва обетований ради о нем Божиих к праотцем, и по сих закона ради ветхаго в нем совершеннаго, и пророк и апостол ради бывших в нем, паче же ради страстей Христовых и Креста и погребения, и прочих тайн и дарований Божиих. Нарицается же град сей Иерусалим и Содомом, и Гомором, и Египтом, ради бывшаго в нем людскаго беззакония, и студодеяния и слепоты. И в том убо граде Иерусалиме, а по духовному нарицанию в Содоме и Египте, престол антихристов быти имать, якоже всеми вышеписанными святыми отцы свидетельствуется.

Глаголет же некто: Иерусалимом нарицается Церковь, в ней-же давно уже седит антихрист на своем престоле. Или еще паки ин некто, инако мудрствуя, глаголет: престол антихристов сказует быти в Содоме и Египте, Содом же и Египет бысть уже ныне весь мир за злобу его и беззаконие. Темже и антихрист давно уже прииде и на престол сед царствует в сем Содоме и Египте, сиречь во всем мире.

Отвещаем. Называется в писании Церковь Иерусалимом, и мир сей Содомом и Египтом, однако тамо не о сем речено, но в другом некоем разуме. Сие же во Апокалипсисе не о всем мире и не о Церкви глаголет, но сущем том самем граде Иерусалиме, прирече бо, в немже Христос распят бысть. Мир убо сей во всю вселенную бысть, и Церковь такожде во весь мир распростреся, Христос же распят бысть не во всем мире, и не в церквах, но во едином месте града Иерусалима. Темже не пристойно сице разумети сие на Церковь и на весь мир. Аще бо область антихристова и всюду тогда распространится в мире и в церквах, обаче столица его во едином месте зрится быти, сиречь в том самом граде Иерусалиме, идеже и Христос распят бысть, якоже выше речеся во Апокалипсисе и в прочих книгах.

Инии же святии отцы сказуют о антихристе, якобы он царем будет в старом Риме (якоже выше в первом знамении напомянуся), обаче и таковое сказание не сопротивно есть вышеписанным зде святым отцем. Ибо может быть, яко в Риме прежде начнет царствовати, и потом во Иерусалим приидет, и тамо устанется, якоже повествуется о нем в Книзе Кирилове в толковании на 10-е знамение сице: «А иже на Римское царство, якоже ныне видим, не цари царя избирают, но духовныя духовных на монархию Римскую, на царскую власть света сего прикладают. Иже Божию и святительскую власть в Риме на себе восхитив, и по всему миру расширяют и держат, и предадут оному последнему князю мира сего, иже есть антихристу». Ниже: «И тако с великою нуждею и тягостию приидет ко иудеом, якоже святый Кирил в преди в знамении 11-м пишет». Ниже: «Ведая сопротивнаго величество и смирение благоверных, якоже рече Господь, егда пришед во Иерусалим, тогда сущии во Иудеи да бежат на горы, аще кто слышится силен быти, да ся борет с сатаною, якоже достоит».

Сие же паки слышит некто в писании, яко антихрист в Риме воцарится, Римом же быти не Рим разумеет, но Московское царство таково быти непщует, занеже назвася оное Римом от Иеремии патриарха константинопольскаго (Кормчая, л. 15). Обаче известно да будет, яко в священном писании называет сим именем Рим четырекратно, яже суть сия: Рим старый, или ветхий, се есть истый Рим. Рим вторый, или новый, се есть Царьград, или Константинополь. Рим третий, се есть царство Московское, или самовладение российское. И есть Рим четвертый, се есть весь мир, иже беззаконий и преступлений ради тако наречен. Темже убо надлежит чтущему разумети, где о котором Риме глаголет: антихристу же быти божественное писание вещает не в сих, но в старом Риме, о сем зри в Книге Кирилове в знамении 8-м в конце толкования.

Еще убо нецыи из нынешних утверждают, якобы не будет во веки возстановлена во Иерусалиме церковь иудеом. И приводят на сие во свидетельство неких святых отец, наипаче же Иоанна Златоустаго, иже в Маргарите в 3-м слове на иудея о сем глаголет: «Аще бо и хотят иудее паки восприяти свой град, и на первое возвратитися жительство, и храм зрети воздвизаем, еже никогдаже будет».

Таковое убо свидетельство Иоанна Златоустаго достоит всячески приимати, обаче же и зде толикими и таковыми святыми отцы вышеписанная отнюд не подобает отметати, зане в них глаголав Той-же Дух Святый: и елико их, но вей они сказуют, яко возставлен будет той храм во Иерусалиме, в немже будет и престол антихристов. И аще кто благоразумно разсмотрит, таковый всяко узрит, яко и Златоуст то же любомудрствует, а не противное прочим святым отцем: понеже и он То гоже имея Духа, Егоже и тии. А еже глаголет о храме еврейстем, якобы той воздвизаем никогдаже будет, то с сицевым разумом глаголет.

Первое. Яко никогдаже иудеи восприимут, ни узрят свой град и храм, еже бы совершати им в нем чин закона Моисеова: сего отнюд не будет во веки. Аще же храм той и возсозиждется (по сказанию вышеписанных святых отец), но уже на малое некое время, и не с чином закона Моисеова, но повелит им той антихрист кланятися ему аки богови. Аще же нечто и соблюдати научит от закона Моисеова, обаче и то сотворит от исперва к прельщению иудеев, истинною же отнюд сего лишатся, и никогдаже им сие будет, по глаголу Златоустову.

Второе. Или яко краткое и нечинное оныя церкви возставление тогда случится, сего ради оное возставление не вменяет Златоуст в созидание.

Третие. Или яко тогда он зельне тече на иудея, сего ради отнюд пресече им надежду онаго, яко нечаяннаго и отметнаго уже законоположения. Обаче во время антихристова пришествия, яко паки во Иерусалиме возсозиждется храм той еврейский, и яко сам той антихрист сядет в нем, сего и Златоуст не отрицает, но то же любомудрие являет, еже и прочий вышеписаннии святии отцы предают, имать же сице: внегдаубо рече апостол о антихристе, яко ему сести в церкви Божии аки богу (зач. 275). Златоуст в Толковом Апостоле на сие глаголет: «Не токмо во Иерусалиме, но и в церквах Божиих». И паки тойже в беседах толкуя сие, сице рече: «И сядет в храме Божием, не иже во Иерусалиме, но и в церквах» (2 Сол., беседа 4).

Видиши ли силу слова, не рече убо, не иже во Иерусалиме, но в церквах: рече же, «но и в церквах», и сия союзная «и» значит яко не токмо в церкви, но первее сядет в том храме, иже во Иерусалиме. Чрез сию речь, рекше «не т о к м о» и паки чрез союзную «и» обеми сими яснейши показует, яко той антихрист первее сядет в церкви оной во Иерусалиме, таже и в прочих церквах Божиих. И отсюду показуется, яко и Златоуст то же любомудрствуя объявил, еже и вышереченнии святии отцы сказали, яко тогда будет во Иерусалиме церковь еврейская, аможе и антихрист уставится, и чрез чудеса богом объявится. Ныне же и еще не у оная церковь во Иерусалиме возставися, ниже кто тамо таков уставися, и яко бог чудесы прославися. Темже чрез сие знамение является, яко антихрист не у пришел есть, ниже воцарися. Сего ради не лепотное и не крепкое оных умышление, не сице мудрствующее, да сотрется крепостию силы богодухновеннаго вышереченных зде святых отец писания, егоже выше положихом, подобно и ниже изъяснится. А како сядет антихрист в церквах, о том ниже в знамении девятом покажется.

Глава 14

Знамение 8 Убиение Еноха и Илии пророков, и паки воскресение их

Выше во главе 9,10 и 11 показахом от божественнаго писания о сих святых пророках Илии и Енохе, яко они во плоти взяты, яко живи и во плоти даже до ныне пребывают, и яко от Бога послани приидут обличити антихриста, и обращати человеческий род в покаяние от пребезмернаго тех беззакония и нечестия, и яко сотворят чудеса велия и страшна. Зде же показати потщимся, яко они по всех сих во граде Иерусалиме от антихриста убиени будут.

О сем сказуется во Апокалипсисе во главе 11-й: «И егда совершита свидетельство свое (сиречь Енох и Илия), зверь восходяй из бездны сотворит брань с нима, и победит я и убиет я, и телеса ею оставит на стогнах града великаго непогребенна, иже нарицается духовне Содом и Египет, идеже и Господь наш распятся. От толкования. По засвидетельствовании бо ею (глаголет) еже от прелести отбежания, зверь, сиречь антихрист, исходяй из темных и пропастных земных мест, в нихже диавол осужден бысть, убиет я по божественному оставлению, и непогребенная оставит телеса ею, в самем тем Иерусалиме, сиречь ветсем и превращением, в нем же и Господь пострада: в сем (якоже подобится) поставляя царственная, и престол царский по подобию Давыдову». Ниже. «Сущее: И узрят от людей, и колен, и язык, и народов трупа ею дни три и пол, и трупа ею не оставят вложити в гроба, и живущии на земли возрадуются о нею и возвеселятся, и дары дадут друг другу: яко сия два пророка мучиста живущая на земли. От толкования. И узрят от людей, и колен, и язык, предпостижени единощи (глаголет) дивами ложными антихристовыми, и богомерзкое его имя не истребление в сердцах вписавшии от иудей же и язык: погребсти убо святая телеса возбранят. О избытииже и свобождении жезлов (казней), ихже о возвращении пострадаша, возвеселятся, не помышляюще, яко егоже любит Господь наказует, биет же всякаго сына, егоже приемлет» (толкование Андрея Кесарийскаго).

О сем Ипполит святый свидетельствует, глаголя: «И убо полседмицы возмут оба пророка со Иоанном, еже проповедати во всем мире о антихристове пришествии, сиречь дний 1260, оболчени во вретища, иже и сотворят знамения и чудеса, во еже тако умолити и обратити человеки в покаяние: за пребезмерное тех беззаконие и нечестие иже и воды обратят в кровь, и поразят землю всякою язвою, якоже аще хотят. И егда сия вся проповедят, оружием от диавола падут, и исполнят мучение свое, якоже рече и сия Даниил провидев, яко зверь восходяй от бездны сотворит с ними брань, сиречь с Енохом и Илиею и Иоанном, и победит их, и убиет их», и прочая (Соборник, гл. 8).

В Книге Кирилове, в знамении 8-м, о антихристе пишется: «Егоже обличити Христос Истинный своих угодников Еноха и Илию пошлет, не приимати лживаго, он же окаянный пред всеми повелит их убити». И в синоксаре в Неделю мясопустную сице глаголет: «Преди же седми лет, якоже глаголет Даниил, приидет Енох и Илия, проповедающе людем не приимати его (сиречь антихриста). Сей же ем их умучит, таже и главы им отсечет».

В житии пророка Илии месяца июля в 20-й день в конце повести сице пишет: «Сей Илия виден бысть во время Преображения Господня на Фаворе от святых трех апостол, и паки виден будет смертными плотскими человеки, пред вторым Господним на землю пришествием. Избежав прежде от меча Иезавелина, постраждет в то время от меча антихристова, и не токмо яко пророк, но и яко мученик в лице святых, болыпия чести и славы сподобится от праведнаго Мздовоздаятеля Бога». И в Прологе в тойже день в похвальном слове глаголется сице: «Илия хотяи быти последний мученик во пророцех, якоже во апостолех Стефан первый».

Пишет во Апокалипсисе (еже в начале главы сея показахом), яко по убиении сих пророков Еноха и Илии лежати будут не погребенна телеса их во Иерусалиме три дни и пол. Ниже: «И по трех днех и полдня дух животный вниде в ня, и стаста на ногу своею, и страх нападе на зрящия я, и слышах глас велий с небесе глаголющ има: взыдета семо, и взыдоша на небо на облаце, и зряху я врази ею. Толкование. Равночисленныя дни летам прорицания ею глаголет, умерщвена бывша, паки воскреснета, и на небо на владычней колеснице взыдета, страх и ужас зрящим бывающа».

Показахом зде от божественнаго писания, яко сия пророка Енох и Илия приидут от Бога послани, и по проповеди ихубиени будут от сопротивника антихриста, и по трех днех паки оживут и взыдут на небо. Ныне же нецыи не веруют чувственно сим быти, но все сие чувственное преносят на духовное бытие сицевым умствованием: убиена, говорят, уже антихристом пророка сия Енох и Илия, сиречь убиена еретиками божественная словеса писаний и закон. Однако от имущих ум может уразуметися, яко не истинно есть, но лживо, блазненно же и гнило таковое тех мудрование, и ни единой имать крепости. Аще же блазненно и крепится, обаче само на ся ратуя тако крепится, еже обличается сими доводами:

Пер вое. Яко убо божественная словеса святаго писания не убиваются, но отвергаются токмо, якоже глаголет Бог грешнику усты пророка, рекий: «Ты же возненавиде наказание, и отверже словеса Моя вспять» (псалом 49). Сего же не глаголет, яко убил еси словеса Моя, но точию отверже. Иеремия пророк сице рек глаголя: «Тако глаголет Господь о полку Израилеве, слыши земле, се Аз изведу злая на полк сей, плод помышления их, иже словес Моих не послушаша, и закон Мой отвергоша» (Иеремия, гл. 6). И паки тойже глаголет: «Постыдени суть премудрии, устрашени, поймани суть, слово бо Господне отвергоша» (гл. 8). И в Деяниих апостольских глаголет: «Вам бе лепо первее глаголати Слово Божие, а понеже отвергосте ё, се обращаемся во языки» (зач. 33). Видиши ли, яко закон или божественная сила отвергаются токмо, а не убиваются: зде же святии отцы сказуют о сих пророках Илии и Енохе, яко они убиени будут, а не отвержени токмо. Сего ради не приличествует к сим пророкам таковое тех мудрование.

Второе. Яко закон или божественная словеса святаго писания не приемлют мучения, и не возможно сему быти, и никтоже никогдаже сего слыша или виде, ежебы божественная словеса или закон или писание пострадало и муки претерпело, и мучеником было. Писание бо такова есть вещь, яже не имать ипостаси чувственны, ни души, ни плоти, то како может мучение претерпети и мучеником быти. О сих же пророцех Илии и Енохе сказуется, яко не токмо они суть пророцы, но и мученицы хощут быти, якоже выше речеся. О Илии речено, яко хощет быти последний мученик во пророцех, якоже во апостолех Стефан первый. Стефан же не закон бе, не вера и ни писание, но чувственный человек, апостол Христов и мученик первый. Подобно и о сих сказуется, яко мученицы будут последний: закон же и писание не могут мучитися. Сего ради не пристойно сим пророкам таковое оныхумышление.

Т р е т и е. Выше писано от Апокалипсиса о сих пророках, яко от антихриста убиени будут, и полежат телеса их на земли три дни и пол, и потом дух животен внидет в ня от Бога, и станут оба на ногах своих, и услышат глас велий с небесе глаголющ има: взыдита семо. И взыдут на небо на облаце по Господню образу. И сия вся разсмотривши со испытанием, явственно зрится, яко не возможно естьуподобити и полагати священное писание и закон вместо сих пророков, якоже нынешний нецыи самомнители разумевают. Познавается же отсюду, понеже и по их мнению, аще уже убито святое писание, или вера, или закон, то (по сказанию Апокалипсическому) по трею днию паки подобает ожити, и взыти на небо на облаце по Господню образу. Господь же взыде на небо чувственно со Своею плотию, юже взят от пречистыя Девы Марии. Такожде и сим пророком на небо взыти глаголет, взыти же купно с телесы своими на облаце: и се есть по Господню образу. Закон же убо или писание откуду оживет, ибо всегда живо есть слово Божие (Евр., зач. 310): и како взыдет на небо, и на что бы к Себе Господь призвал, рекий: взыдета семо. На небеси бо вси жителие исполнени Святаго Духа, и не требуют здешняго закона и писания. Аще бо и зде на земли сущим праведным закон не лежит по апостолу (зач. 213), то кольми паче небесным.

Сих же святых пророков Илию и Еноха призовет Господь, яко рабов Своих, проповедников и мучеников. Бывает же призвание на небо, аще и не во плоти, якоже зде, обаче не единым сим точию, но и прочим святым, якоже в житиях их свидетельствуется. Вопроси убо тех, иже инако о сих пророках и убиении их мысленно, а не чувственно мудрствуют, да скажут они, како убита сия пророка? И аще се есть убито писание, или вера, или закон, то какия три дни и пол лежит мертво? И на какой земли оно лежит? И в каком граде велицем? И на каких стогнах града? И какой дух животен внидет в него? И когда оживет? И како станет не ногах своих? И на каких ногах? И который услышит глас с небесе – взыди семо? И глас сей от какого есть неба? И чесо ради не просто глас, но велий? Како же и почто писанию взыти на небо? И на какое небо? И на каковом облаце? И како по Господню образу? О всех сих выше речено во Апокалипсисе, яже и имут сбытися чувственно на сих пророках Илии и Енохе. Како же сим содеятися мысленно на писании, вере же и законе? Воистину невозможно. Сего ради не возмогут они на сие справедливо отвещати, и согласно и чинно протолковати, но разве развращенно и неподобно, и само на ся ратуемо, а не истинно: зане не возможно истинно отвещати нехотящим истине покоритися. Темже и божественный апостол к таковым под именем галатов глаголет: «О несмысленнии галате, кто вы прельстил есть и не покоритеся истине» (Гал., гл. 3).

От сихубо вышереченных всех светло является, яко и всякому имущему ум можно видети и о пророках и о убиении их, яко то не о законе и не о писании речеся, но о чувственных тех пророках, Илии и Енохе, иже от антихриста убиени быти имут во свое время на кончину времен. Темже и сие знамение являет, яко еще не пришел есть и не царствует антихрист, занеже сии пророцы живи суть и во плоти пребывают даже доселе, и тако пребудут даже до его пришествия. Тогда приидут оба сия пророка со Иоанном (по святому Ипполиту) и возмут времени полседмицы, сиречь дней 1260. И тогда зверь, сиречь антихрист, убиет их, якоже речеся.

Еще ныне нецыи прекословят, глаголюще: аще Илия и Енох даже и доселе живи суть, и приидут, и убиени будут, обаче сие будет на самой кончине мира, а антихрист уже и ныне царствует.

Но да весть истину уразумети хотяй, яко сему быти не возможно, еже бы пророком сим не у пришедшим, и еще не убиенным, антихристу царствовати. Понеже царствование антихристово не будет прежде пришествия сих пророков, о сем тако сказует святый Ипполит, глаголя: «В полседмицы проповедати пророком, и в полседмицы, сиречь в триех летех и пол, царствует антихрист на земли». Зде явственно познавается от сказания святаго Ипполита, яко в первую половину оныя реченныя седмицы проповедати пророком, и убиенным быти от антихриста: потом же вторую половину, сиречь три лета и пол, ему царствовати.

Еще паки инии инако о сих пророках мудрствуют, глаголюще, яко сии пророцы живи даже доселе, и живи будут до втораго пришествия Христова: и тогда во время Его пришествия с прочими живыми человеки такову смерть приимут, сиречь токмо обновятся, а не умрут, еже апостол глаголет: «Се тайну вам глю, вей бо не успнем, вей же изменимся: вскоре, во мгновение ока, в последней трубе» (зач. 163). Темже акибы сего ради и в Прологе ноября 8-го о Енохе пишет сходно сему глаголя, яко «не видети ему общия с человеки смерти, даже до втораго снития Господня еже на землю».

Обаче сицевым таковое разумение, паче же мнение, не от святых отец предадеся, но от своего тех погрешительнаго умышления привниде. А от святых отец никтоже сего не рече, якобы Илия и Енох во второе пришествие Господне с прочими живыми человеки изменитися имели, но вей православнии учители церковнии единогласно глаголют, яко от антихриста убиени будут: и потом паки вскоре оживут и взыдут на небо тогда, егда еще не точию во второе Христу не пришедшу, но антихристу належащу, и человеком пребывающим, иже и возрадуются о сих убиении, якоже выше о сем во главе сей изъявися. А яко не от священнаго писания бысть оное мудрование, но от грубаго и погрешительнаго некоего умышления, убо и достоверно быти не может.

О сем же да не мятешися, ниже погрешителен кий глагол возмниши, аще писание овогда глаголет, яко полседмицы возмут сии пророцы, сиречь дней 1260, и в полседмицы, сиречь в триех летех и пол, царствовати антихристу: овогда же глаголет, яко не видети сим смерти даже до втораго снития Господня еже на землю. Обоя бо сия истинна суть, и могут свестися во един разум сицевым подобием. Самою истиною тако подобает разумети, яко сии пророцы от антихриста убиени будут прежде втораго Христова пришествия, якоже речеся. А еже глаголет, яко не видети смерти даже до Христова пришествия, сие речение надлежит сице разумети: понеже тая последняя половина седмицы, тогда уже самая кончина мира сего, и яко кратко время три лета и пол. Сего ради и называется время оно «время пришествия Господня» близкости ради суда Его, ибо тогда снитие Его уже при дверех есть.

Темже и Златоуст спастися евреом сказует о времени пришествия втораго и скончания (Рим., зач. 105, беседа 19). Не яко они во второе Христово пришествие спастися имут, в то бо время никтоже может подвизатися, зане время оно не время подвига, но время воздаяния. Но яве есть, яко спастися им сказует прежде пришествия Христова, тогда, егда Илия с Енохом обратят их веровати во Христа Исуса, тогда они и спасение получат, якоже выше сказано. Святый Иоанн Златоустый время оно нарицает временем втораго пришествия Господня, яве яко близости ради, якоже речеся. Темже подобообразно разумети подобает, яко и сии пророцы не во второе пришествие Христово смерть увидят, рекше умрут, или с прочими живыми человеки изменятся: но прежде пришествия Христова от антихриста убиени будут, якоже святое писание сказует, еже выше во главе сей положихом. Сего ради верно сие слово и всякаго приятия достойно.

Глава 15

Знамение 9 Яко тогда станет мерзость запустения на месте святе

У пророка Даниила зрится речено о сей мерзости запустения, сице глаголющаго: «И разблажит завет мнозем седмина едина: в пол же седмины отъимется треба, и возлияние на святый храм, омерзение и опустение, и до скончания времен, скончание дастся на опустение» (Дан., гл. 9). О сей мерзости запустения Сам Господь во Евангелии у Матфея святаго свидетельствует, глаголя: «Егдаузрите мерзость запустения, реченную Даниилом пророком, стоящу на месте святе, – прочитаяй да разумеет, – тогда сущии во Иудеи да бежат на горы» и прочая (Мф., зач. 99). И якоже о сквернавом имени антихристове различна суть разумения, якоже преднаписася: тако и о мерзости запустения различна суть сказания в священном писании, суть же сия.

Первое, мерзостию запустения суть и нарицается той кумир (истукан), иже поставлен был в храме Соломони на месте святе во олтари, в то время, егда Тит царь римский повоева Иерусалим. О сем святый Феофилакт глаголет: «Мерзость запустения есть труп человека мертваго, еже есть тело запустения, без души и без крове, есть мертвое и опустелое и ничего не творящее. А когда Евспасиан и Тит римстии цари пришедше Иерусалим плениша, и пуста его положиша, и кумир свой во олтари на месте святем поставиша, жидове же кумир – труп человечь – мерзость нарицаху» (Книга Кирилова, знамение 6).

Второе, подобно первому, мерзостию запустения нарицается и всякий идол.

Третие, мерзостию запустения нарицается бесовския помыслы в коем либо человеке, ихже кто прием постави на месте святе своего ума. О сих же сказует святый Феофилакт, глаголя: «Мерзость бо всякий идол глаголется. Запустения же, зане яко воюему

Иерусалиму запустение страждут». Ниже: «Можетжеся разумети и по обычаю, мерзость запустения есть всяко разумение сатанинско стояи на месте святем, нашем разуме. Темже тогда сущии во Июдеи, да бегают на горняя». Ниже: «Егда бо пристрастное что разума станет в нас, подобает исповеданием выходити на высокая, а не слазити с высоты добродетелей» (Благовестник, от Марка зач. 60).

Четвертое, мерзостию запустения нарицается нечестие и ереси, иже сташа на месте святе в Божиих церквах. О сем сказуется в Большом катихизисе. «Вопрос. Чесо ради людие в последняя времена от веры отступят, и абие к ереси приступати имут? Ответ. Трех ради вин. Первая убо сия есть, еже Даниил пророк рече: мерзость запустения станет на месте святе, сиречь, еже обладает нечестивая ересь церкви святыя. Сия убо мерзость толкуется по писанию Иоанна Златоуста, воинство антихристово, разоряющее Церковь Божию. Тогда людие, не имуще где скрытися от таковых скорбей и великих мучений их ради гонения, приступати имут ко ересем» (Катихизис большой, гл. 4).

О мерзости запустения сие сказание в Катихизисе двояко может разуметися, сиречь и на время прошедшее и настоящее, и отчасти на время оное будущее. Однако наивернейши видится быти, яко сие не о той самой мерзости глаголется, яже при антихристе станет, которая от самого его произыдет, о ней же ниже покажется: но яве яко о иной, понеже сия мерзость, сиречь нечестие или отступление и ересь, антихриста предупреждает. И о сем в том же Катихизисе о знамениих сказуется сице: «Знамение 15-е, нецыи отступят от веры. 16-е, станет мерзость запустения, реченная Даниилом пророком на месте святе. 17-е, потом приидет антихрист» и прочая (Катихизис большой, гл. 23).

Пятое, есть и называется мерзостию запустения и самый той антихрист, еже Феофилакт святый толкуя на Матфея глаголет: «Нецыи мерзость запустения антихриста глаголют, разумеют же сице: яко иже на храмине, сиречь, иже на высоте добродетели, да не снидет от высоты добродетели взяти телесная. Подобает же и от села бежати, сиречь от земных» (Благовестник, от Матфея зач. 99).

Еще же к сим и тии, иже прелагаются от благочестия в нечестие, нарицаются мерзостию запустения: обаче гадательне и участие, преносне же и уподобительне тако разумеются. Нам же не о сих настоит слово, но о той истой мерзости запустения, яже хощет стати на месте святе во время антихристова пришествия, имать же сице.

Шестое, есть бо и нарицается мерзостию запустения кумир, или истукан антихристов, еже есть икона, или образ его, иже имать стати на месте святе, во святых Божиих церквах, не токмо во Иерусалиме, но и в прочих: понеже единому тому человеку антихристу разделитися и повсюду быти невозможно, не бо есть Бог и не сый всюду, но местом определяется, того ради окаянный яко льстив сый и коварен, вместо себе поставити всюду потщится свою таковую икону, сиречь образ подобия своего.

О сем повествует во Апокалипсисе великий во апостолех Иоанн Богослов, емуже Духом Святым открыся вся сия хотящая быти. Сказав убо о лжепророце, хотящем тогда при антихристе быти и велия чудеса сотворити, потом же сице о нем рече: «И льстит живущая на земли ради знамений, яже дана быша ему пред зверем творити, глаголя живущим на земли, сотворити образ зверя, яже имать язву оружную и жив бысть. И дано бысть ему дати дух образу зверину, да проглаголет икона зверина. И сотворит, да иже аще не поклонится образу зверину, убиен будет» (Апок., гл. 13). От толкования. «Сей заступник антихристов ничтоже кроме демон содеет: сотворит бо образ звериный, и покажет й глаголюща, дабы прельстил люди: осудит же избивати, иже ся ему не поклонят». И во Апостоле толковом в зачале 150-м святый Иоанн Златоустый глаголет: «Еще же беснующеся глаголют еретицы, яко литургия есть мерзость Божия, яже по писанию в царстве антихристове имяше стати на месте святем, но да возмут сполна словеса у Марка святаго, ибо тамо тако рече Господь, егда узрите мерзость запустения стоящу на месте святем. Да смотряем же и словес Даниила святаго, тако глаголет: от времени пременену учащения, дней 1290. Зриши ли, яко мерзость запустения не есть свята жертва любезна и приятна Богу, но спустошения ея, еже соделает антихрист пред пришествием Господним, свой образ на то место поставивши» и прочая (Апостол толковый, л. 549).

Отсюду познавается, яко не инако как сядет антихрист в Божиих церквах, но станет оная мерзость, сиречь истукан его, и не во Иерусалиме токмо, но и в других всюду Божиих церквах. О сем святый апостол Павел глаголет: «Яко ему сести в церкви Божии аки богу, показуя себе яко бог». Толкование Златоустово: «Не токмо во Иерусалиме, но и в церквах Божиих» (Апостол толковый, зач. 275). И в беседах глаголет: «И сядет в храме Божием, не иже во Иерусалиме, но и в церквах».

Якоже видится убо в писании некий древний обычай царский: «Внегда царю в начало на царский престол восшедшему и царским венцем венчану, образ подобен ему хитрецы сотворяют, сиречь икону его, и царю царствующу, образы его в митропольския грады, рекше в стольныя, вносими бываху, народи усретаху я, честь яко самому царю образу цареву вдаваху. Епархийским бо градовом видети царя разстояния ради многаго не возможно, и убо сего ради иконы царевы вношахуся к ним во грады» (Соборник малый, л. 16).

Тако подобно сему зрится быти и при антихристе: понеже ему самосущественно во вся грады и церкви сести не возможно, сего ради вместо себе потщится всюду поставити таковую мерзость, сиречь свою икону, да чрез нея поклонятся ему вси живущим на земли: сиречь тии, иже ничтоже не радяще о небесных, но токмо земных прилежаще, поклонятся антихристу. Поклонятся же ему не с тем разумом, аки просто человеку царю, но аки богу и зиждителю. О сем же святый Иоанн Златоуст сказует, глаголя: «Не бо во идолослужение введет он, но богопротивен некто будет и всех разорит богов, и повелит кланятися себе вместо бога» (2 Сол., беседа 3).

Из нынешних же людей мнози мнят и утверждают, якобы вышереченная оная зверина икона и мерзость запустения давно уже стоит на месте святе, рекше в церквах: и икону Христову, яже перстное сложение имать по нововводному обычаю литеросложное, и имеет надписание «Иш: ус Христос», нарицают и мнят быти иконою звериною, сиречь антихристовою. Обаче выше в знамении шестом показахом, подобно и ниже в знамении десятом в разделе шестом покажется, яко сие новое наименование «Иш: ус» несть антихрист. И аще несть антихрист, якоже и несть, убо и иконою его и мерзостию запустения быти не может. Темже оных таковое яко не истинное мнение остается не достоверно. В Риме убо от давних времен иконы имут из древа вытесаны болванами, а не на деках писаны, и крест воображают с единым перстом на образех своих (Книга о вере, гл. 28). Обаче и таковую икону никтоже от святых отец не назвал иконою звериною. А понеже истая мерзость запустения от самого антихриста имать быти. Понеже она постоит малое некое уреченное время, сиречь три лета с половиною. Понеже и римския таковыя иконы святии отцы не нарицают иконою звериною. Убо отсюду явствует, яко икону за таковое новое надписание «Иш: ус» не подобает разумети за икону зверину, сиречь за образ антихристов. Аще же оная нам и не потребна суть, таковыя ради нелепыя новости, обаче за звериную икону вменяти – вещь страха и ужаса преисполнена. Ибо каждаго икона, рекше образ, сотворена бывает уподоблением к первообразному, или краскою, или вещию: подобно и антихристова икона хощет быти собственный его образ, самого того имея первообразное. И яко каяждо икона имать первообразное: сице и Христова икона, аще и новостию таковою безчестится, обаче чий есть образ и кого имеет первообразное? Не тогоже ли Христа Исуса истиннаго Бога, во образе человечестем бывша? И иже какову имея главу и власы, лице и нос и браду, таков и на иконе воображается. Но олеума велемудраго и языка дерзкаго! Прочия иконы при нынешних церквах нарицая кумирами, сиречь акибы идолы языков не знающих Бога: а икону Христову оныя ради новости именуя иконою звериною, сиречь образом антихристовым и мерзостию запустения, сему же быти и еще не у пришло время.

Аще бо уже и ныне мерзости запустения, рекше еретицы и ереси, на месте святе чрез предотечи антихристовы зрятся поставлены: обаче по уподоблению некоему участие тако наречены, истиною же не суть самая мерзость запустения, при антихристе быти хотящая. И о сем сказует святый Иоанн Златоуст глаголя: «Уже начинают посланницы антихристовы, сына беззаконнаго, но не у кончина, дондеже сам приидет, и с ним совершится и исполнится мерзость вседневнаго запустения» (Апостол толковой, зач. 150, л. 550).

Глава 16

Знамение 10 Яко тогда антихрист поклоньшихся ему запечатлеет своею печатию, имущею число 666

Выше в знамении втором писано о лжепророце, предотече антихристове, иже имать быти по образу Крестителя Иоанна. О сем лжепророце Иоанн Богослов во откровении виде и написа о нем, глаголя: «Иже льстит живущия на земли ради знамений, иже дана быша ему пред зверем творити, и сотворит вся малыя и великия, богатыя иубогия, свободныя и работныя, да даст им начертание на десней руце их, или на челех их, да никтоже возможет ни купити ни продати, токмо кто имать начертание или имя зверя, или число имени его. От толкования. Сотворит бо образ звериный, и покажет й глаголюща, дабы прельстил люди: осудит же избивати, иже ся ему не поклонят. И начертание пагубнаго имени отступнича на вся наложити потщится. На десницах же, добрых дел отсечет детели, а на челех, да научит в льсти и тме прелыценныя дерзати. Не приимут же знаменавшии Божиею печатию лица своя. И число зверино распространяв всюду начнет, в куплях же и продаяниих: да иже сего не приимут, от потребныя нужды смерть приимут. Сущее. Зде мудрость есть, иже имать ум, да сочтет число зверино, число бо человеческо есть, и число его ббб. Толкование. Истое число имени его, якоже и прочая писания о нем, время явит, и искушение тогда бодрствующим. Аще бо была бы потреба яве разумети каково имя, иже бы узрел его, открыл бы: но не изволи божественная благодать во святых книгах написанному быти пагубному имени» и прочая (Апокалипсис толковой, гл. 13, зач. 37).

Преподобный Ефрем глаголет: «Се же и злыи ков содея враг, да вей зверину печать воздвигнут, егда приидет прельстити всячески знаменьми во свое время на кончину времен. И тако купит брашна на требование, и всяку вещь, приставники же поставит творити волю его. Вонмите братие велику злобу зверину, ков и лукавства, яко от чрева начинает, да егда кто оскудеет брашна лишен, то понудится печать его прияти, даст ему свою печать скверный: не просто же на всех удех тела да не негодуют, но даст на руце десней человеку, такоже и на челе мерзкий образ, да области не имать человек знаменатися десною рукою, знамением Христа Спасителя нашего: ниже паки на челе знаменатися отнюд страшным и святым именем Господним, ни паки крестом Спасовым славным и страшным. Уразумеет бо окаянный, яко крестом Господним аще знаменается человек, то разрушает ему всю силу. Сего ради запечатлевает десницу человеку, та бо есть знаменающая вся уды наша. Такожде и на челе, якоже бо свещник носим свещу света знамение Спаса на высоте» (слово 105).

И святый Ипполит в слове о антихристе пишет: «И вен тесноты ради пищныя к нему приидут и поклонятся ему. И даст им знамение на руце десней и на челе, да никтоже честный и животворящий Крест сотворит десною своею рукою на челе, но связана рука его будет: и оттоле власти не имать знаменати своя уды, но прелестнику приложится, и тому единому послужит, понеже таковому покаяния несть: всяко убо яве, яко погибе от Бога и от человек. И дарует тем льстец малы снеди печати ради своея скверныя: печати же его, иже на челе и на десней руце, есть число ббб. Еже непщую, не бо опасно свем сего писания, многа бо имена в числе сем обретаются» и прочая (Соборник, гл. 8). О именах числа сего писано выше в 5-й главе, зде же не о имени его глаголем, но точию о его печати.

Мнози убо из нынешних людей, паче же из покрещеванцев, якоже антихриста не чувственно мнят быти, но мысленно и многообразно: тако и печать его не чувственно же разумеют быти, но таинственно и многообразно. И якоже самого антихриста мнят давно уже в мир пришедша и воцарившася: тако разумеют, акибы и печать его давно уже печатлеется. Мнят же они быти печать антихристову в знамении креста триперстное сложение, сиречь щепоть, подобно и литеросложное благословение. И инако мнят быти печать антихристову крест двочастный или четвероконечный. И еще мнят быти печать антихристову нечестие, ереси и отступление от Православия: и еще печатию антихристовою разумеют быти церковное крещение и миропомазание, и прочие тайны: инии же печать антихристову мнят быти герб российскаго царя, иже есть во образе орла двуглаваго, друзии же паки называют печать антихристову пашпорты или билеты, инии же монету царскую медную, серебряную и золотую, и ассигнации, или просто рещи деньги, которыми мир видимый исправляется в потребах своих. Но обаче таковое их разумение, пачеже своеумышленное мнение не истинно есть, вся бо сия не суть печати антихристовы, якоже показуют нижеписанныя зде разделенныя доказательства, яже суть сия:

РАЗДЕЛ ПЕРВЫЙ. Первее речем о кресте четвероконечном, яко той несть печать антихристова, ниже мерзость запустения. Понеже аще четвероконечный той крест печать антихристова, то чесо ради при тайне святаго крещения на четыре концы крестообразно в купели вода от священника ограждаема бывает, а не на осмь концов? И сицевое предание есть святых апостол и святых отец, еже чинно в потребниках и служебниках положися. Почто же и в тайне миропомазания крестообразно на четыре конца повелено священнику миром помазовати, а не на осмь концов? Могли бы убо святии отцы повелети и четверочастный крест воображати, обаче не повелеша: повелеша же токмо сотворяти креста знамение, яве яко на четыре конца. Сице в маслопомазании и миропомазании творити, такожде и в приношении Святых Даров, егда диакон речет: вонмем, иерей же воздвизает агнец треми персты обоих рук, и творит крест агньцем над дискосом четвероконечный, а не осмиконечный. И егда в потир полагает горнюю часть, творит такожде крест над потиром четвероконечный. И в прочих тайнах церковных такожде творити повелено.

Темже отсюду познаваем, яко сие несть печать антихристова. Ибо аще бы се была печать его, то како бы могли под нею церковныя тайны совершатися? Еще же аще четвероконечный крест, сиречь двочастный, печать антихристова, то чесо ради и как святии апостоли и святии отцы не на осмь, но токмо на четыре конца предали знаменатися крестным знамением? Ибо свою десницу егда относим с главы на живот, и с праваго плеча на левое, тогда яве четыре конца воображаем, а не осмь, и видотворим токмо креста древо правое и древо прекое, аще бо во уме нашем и наменяем тогда крест трисоставный истинный крест Христов, обаче под видом четырех концев знаменаемся. И сего ради явственно есть, яко четвероконечный крест несть печать антихристова. И паки, аще той есть печать антихристова, то векую и на рамех наших носити того отцепреданне прияхом?

Или речет кто, яко носим крест не двочастный, но четверочастный? Ей, тако, и мы тоже глаголем, яко четверочастен, носим, или рещи трисоставен: но обаче той трисоставный на единосоставном зрится, от единыяубо страны трисоставен, от другая же единосоставен: темже и оба вкупе суть, и един на другом воображен бывает. Писано же, идеже крест, тамо и Сам Христос есть (Иоанн Дамаскин, книга 4, гл. 12). Понеже Исус в кресте, и крест во Исусе (Соборник, л. 316). И аще Исус в кресте, и крест во Исусе, и идеже крест, тамо и Сам Христос есть: негли идеже печать антихристова, тамо и антихрист есть. И аще четвероконечный крест печать антихристова, то почто бы святии отцы нам на себе носити повелели, соединивше во едино место Христа со антихристом? Сие бо и быти не может, ибо апостол глаголет: «Кое общение свету со тмою, и кое согласие Христу с Велиаром» (зач. 182). И отсюду яве показуется, яко четвероконечный крест не есть печать антихристова.

Еще же и от сего признается, яко той не есть печать антихристова, понеже он воображается на священных ризах, на стихарех, на епитрахилех, на фелонех, омофорех и прочих, егоже вей священнослужители, внегда облачаются во священныя одежды, со благоговением целуют. И аще бы таковый крест был печать антихристова, то почто бы святии отцы на священных ризах воображати его предали? И аще той есть печать антихристова, то никтоже и от самех христиан минул печати его, вей бо под сим видом единосоставнаго креста назнаменани при крещении, не ныне точию, но и в древняя лета. А яко и тогда чрез него действие бываше и на таковых местех воображашеся, темже явленно, яко той не может быти печатню антихристовою.

Или противоречит кто, глаголя: яко тогда в вышеписанных действах под видом четырех концев креста разумеяшеся самый истинный крест Христов трисоставный, а не единосоставный, сего ради и в тайнах чрез него действие бываше, рекше в маслопомазании и миропомазании и прочих таковых.

Убо аще тогда под образом двучастнаго креста в вышеписанных действах разумеяшеся крест святый трисоставный: то и ныне омышления и ужаса достойна вещь нарицати того печатаю антихристовою. И аще той крест прежде беяше в некоем церковнем употреблении, лепоте же и честности: ныне ли убо той преложися в печать антихристову и в мерзость запустения? Никакоже. Что же убо и сатана со антихристом крестовидну ли устроят тогда печать? Никако. Такову ли им вожделети иустроити печать, имже знамением разрушается крепость их и погибает? Темже не возможно быти крестовидней печати антихристове, ибо той даст печать своего имени и своего образа, а не крестнаго. Тако бо предает святый Иоанн Богослов в тайне Апокалипсичестей, образ зверя и имя его, и число имени его (Апок., гл. 13). От всех же сих реченных свидетельств и показаний удобно познавается, яко крест четвероконечный несть и не может быти печатаю антихристовою, ниже мерзостию запустения: но и порицатели таковыя, по своей их дерзости, от Бога восприимут суд.

Нынешний же новым церковным обычаем последователи, якоже прочая многа древлеотеческая содержания измениша, тако и в кресте двочастном о истине погрешиша, обаче сим точию, яко от них поклоняем бывает вместо четверочастнаго, сиречь трисоставнаго Креста Спасова. И яко не на тое место его поставляют, идеже быти ему подобает по древлеправославному церковному преданию: быти же не на просфирах, ни на жертвеннице, ни на престоле, ни на прочих таковых местех вместо креста трисоставнаго: но на священных ризах, стихарех и фелонех и прочих таковых. Однако аще и не на тое место четвероконечный крест ныне теми поставляется: но за сие неизрядство токмо сами на ся тии от Бога притяжут суд. Крест же той, вышеозначенных ради действий и свидетельств, никак не может быти, ниже именоватися печатию антихристовою.

РАЗДЕЛ ВТОРЫЙ. О гербе государевом.

Вопрос. Что есть нынешний герб российскаго государя, повсюду печатлеющийся?

Ответ. Герб сей образ есть птицы орла, означающий собою образ российскаго царя. Се же есть знамение или печать царская, а по нынешнему обычаю называется герб. Не ныне же точию, но и древле гербы или знамения, сиречь печати царския у самодержцев были, якоже начасте в летописных и прочих книгах видится. Есть же убо и бывает во многих вещах потребну быти гербу царскому, ради твердости вещи нефальшивой: понеже небоящиися Бога мфолюбивии (т. е. любящие мфское, соблазны мфа сего. – ред.) человецы обыкоша лукавне оболыцати сродную свою братию в перевесах и мерах, и прочих таковых. Темже к разрушению сих нужна печать царская, якоже и писание глаголет: «Мерила лестна мерзость пред Господем, мерило же праведно приятно Ему есть» (Притч., гл. 11).

Вопрос. Почто убо герб той двуглавен ныне изображается? Яве яко того ради, занеже ныне царь содержит две власти, царскую купно и святительскую, по образу папы римскаго. Сего ради и на гербе том образует в правой руке (меч) власть гражданскую, а в левой руке (крест) власть духовную, а потому убо и патриарха Россия уже не имеет, понеже обе власти государь содержит.

Ответ. Не того ради пишутся две главы на гербе, акибы знаменовати царю две власти, рекше царскую телесную, сиречь гражданскую, вкупе и духовную: но сего ради, понеже прежде сего Российское царство было не толь велико, якоже потом бысть. Темже и герб единоглавен тогда беяше, назнаменуя едину державу Московскаго царства. Потом же, егда Россия возоблада многими странами, сего ради приложи ко образу орлю и главу другую. Сие же орла сугубоглавство (по сказанию выходнаго листа Библии 7172 лета) знаменует сугубодержавство. Кое сие? Российскаго царя над многими землями начальство, а не другую власть, сиречь духовную. В правой же руке держит не меч, но хоругвь свою, сиречь скипетр царствия, что было неотрочно и у царей древних. А в левой руке имеет не просто крест, но державу самодержавствия, на ней же и крестное воображение начертавается, показуя, яко и сам царь верует во Христа, на кресте распятаго, имже и враги своя побеждает, тем и называется царь христианский. Назнаменует над главою и три венцы, и паки сим являет, яко верует он во Святую Троицу, содержащую державу его и всея вселенныя концы.

Патриаршество же в России не тогда прекратилося, егда двуглавый герб наста: ибо двуглавый герб учредися в России еще с тех времен, егда прислася от греческаго царя Алексия Комнина в дар великому князю Владимиру Мономаху златая цепь и бармы Константина Мономаха, царя греческаго, скипетр и царский трон, со изображением на скипетре и троне двуглаваго орла; которыя вещи и доныне сохраняются в Москве во Оружейной палате и во Успенском соборе на царском месте.

В Греции же той двуглавый герб начатся изображатися со времен царя Феодосия Великаго: ибо Феодосий сынам своим Аркадию и Онорию завещал царствовать одному на востоке, а другому на западе, в знаменование же сего и учреждено было у греческих и у римских царей изображение двуглаваго герба.

Таковый герб, сиречь изображение двуглаваго орла, видится на царских печатех, бывших у великаго князя Ивана Васильевича, и у внука его, царя и великаго князя Ивана Васильевича Грознаго, у царя Михаила Феодоровича и у царя Алексия Михайловича, которую прикладывали они к грамотам или указам царским. Еще таковый герб видится на многих военных оружиях царей Михаила Феодоровича и Алексия Михайловича, которыя находятся в Москве во Оружейной палате, и всякому желающему видети оныя

возможно.

Еще таковый герб видится в древних Маргаритах на выделке бумаги, на которой смотря противу солнца явственно двуглавыя гербы видно. Печатаны же сии Маргариты в царство царя Михаила Феодоровича, в патриаршество Иоасафово.

Еще же таковый герб зрится напечатан на первом листу Библии, изданной в Москве в лето 7172 при царе Алексии Михайловиче, и сам сей царь видится в том гербе на коне изображен с вышереченными гербу тому стиховными надписании. Патриархи же тогда в России и после того были, якоже Никон, Иоасаф и прочий. Темже отсюду явствуется, яко двуглавый герб не ради двою властей, сиречь царской и святительской изображается, но мирским неким житейским обычаем, паче же того ради, якоже выше рехом.

Сие же, сиречь каков бы ни был герб государев, никогоже повредити во спасении не может. Вредит же когождо свое беззаконие, и свое необузданнаго ума вышемерное несправедливое мудрование, егоже святии отцы не предаша. Иже видеша многоразличные гербы в толикая многая времена у прежних царей, паче же мучителей, идолопоклонников и иконоборцев, и прочих яве сужденных проклятых еретиков: обаче ничесоже в писании о сем не предаша, и не имеша их за печать антихристову, ниже тако нарицаша. И аще таковых нечестивых царей оныя гербы не бяху печать антихристова: темже много паче сей герб российскаго царя не может быти того печатаю, зане ныне сему царскому гербу вместо Бога людие не покланяются, ниже принуждение имут тако покланятися, аще хотя кто когда и покланяется, то не яко Богу, но яко человеку сушу, царю земному. Тогда при антихристе, иже аще кто не поклонится образу его, той убиен будет (Апок., гл. 13). Святый же Златоуст яве сказует, яко не во идолослужение введет он, но повелит кланятися себе вместо Бога (2 Сол., беседа 3). А ныне сей царский герб, или образ на челе или деснице ни у кого не печатлеется во изъявление от Христа отступления. Аще же у кого и печатлеется, то не на челе и не на деснице, но на металлех: и не во изъявление от Христа отступления, но во изъявление некоего мирскаго от царя дарования – сана или чести. Тогда же при антихристе дастся печать не на одежди и не на металлех, но на десней руце их, или на челех их (Апок., гл. 13). И зане ныне вей не имущии на себе сего царскаго герба живи пребывают, продают и купуют. Тогда же при антихристе, иже его начертания не приимут, то от потребныя нужды смерть приимут (Апокалипсис, там же). От сих же всех познати всякому возможно, яко не приличествует и не сходствует разумети двуглавый государев герб за печать антихристову.

РАЗДЕЛ ТРЕТИЙ. О пашпортах и деньгах.

Еще же вышереченнии, иже мнят не быти чувственно антихристу, якоже гласит писание, то и печати его глаголют тако не быти, якоже во Апокалипсисе речено, имя его, или число имени его: но глаголют онии, есть-де печать антихристова, без которой ни купити ни продати не можно, сиречь пашпорт или деньги. И приводят во свидетельство от книги Зиновия Мниха: в ней бо глаголют писано, что антихрист будет давать карточки, на которых будет писати имя свое тайно ббб. И с оными карточками аможе пойдут, без беды минуют. Еще же приводят во свидетельство святаго Ефрема, глаголюща: «Се же и злыи ков содея враг, да вей зверину печать воздвигнут» (сиречь деньги).

Аще же и разумеют они тако быти, но обаче таковое их разумение не истинно есть, сих ради вин.

Пер вое. Яко книга Зиновия Мниха, ученика Максима Грека точно есть, но Зиновий Мних писал больше противу лютеран о их ересях, а наипаче о непоклонении их святым иконам, и о прочих церковных чинах: о антихристе же и о печати его ничего не писал, и ничего не упомянул, и сие ложно написано только в выписках, и сему верить не подобает.

Второе. Яко пашпорты, или письмы проездные во иные земли давались и прежде, от самого государя или градскаго воеводы, якоже видети сие можно из Уложения царя Алексия Михайловича, напечатаннаго по благословению святейшаго Иосифа патриарха московскаго в лето 7157, в котором во главе 6-й, в статии 1-й пишет тако: «А буди кому случится из Московскаго государства, для торговаго промыслу, или иного для какого своего дела в иное государство, которое государство с Московским государством мирно, и тому на Москве бити челом государю, а в городех воеводам о проезжей грамоте, а без проезжей грамоты ему не ездить, а в городех воеводам давати им проезжие грамоты безо всякаго задержания». Ниже в статье 4-й: «А будет в сыску объявится, что он ездил в иное государство без проезжей грамоты, для торговаго промыслу, а не для измены, и ему за то учинити наказание, бити кнутом, чтобы на то смотря иным не повадно было тако делати».

Такожде и нищии прежде ходили ради собрания милостыни в дальния страны с грамотами епископскими, якоже 11-е правило Четвертаго вселенскаго собора повелевает: «Требующий помощи нищии с послании мирными да отходят». От толкования. «Мирное послание есть, рекше грамота епископля, да егда убо хотят требующий нищии отъити негде и просити милостыни, возмут отпущение от епископа, рекше мирную грамоту, да идеже хотят показуют, и видяще христиане, яко с миром отпущени суть от епископа, дают им милостыню, и помогают им елико кто может». А внизу на поле написано сице: «Нищии, по инем градом и селом просящий, без епископлих грамот милостыни да не просят, понеже мнози в них лжепророцы являются» (Кормчая, л. 97).

От сего вышеписаннаго видети можно, когда у царя Алексия Михайловича просили торговые люди проезжие грамоты, то на тех грамотах царь свою печать царскую прикладывал, или воеводам приказывал прикладывати. Ибо и тогда царская печать была двуглавый герб, сие доказывается царскими грамотами. Такожде и епископы давали письмы или грамоты мирныя, к которым свои руки прикладывали и печати во уверение подающим, то есть коея епархии и коего града или села или веси просители: тако и ныне не для чего иного торговым людям или рабочим пашпорты даются, но ради удостоверения тамошних обывателей, аможе они приидут, чтобы были известны, коея они губернии, или уезда, села или веси. Ибо человецы неправеднии и хищницы навыкоша неправду творити, и свою братию единоплеменную обмановати всякими коварствы, и грабити тайно и явно, и от своих господей убегати, не ради душевнаго спасения, но ради вольничества и татьбы нощныя и дневныя. Того ради пашпорты и даются, чтобы таковые люди с пашпортами отличалися от воровских людей.

Аще ли печать антихристова пашпорт, то и при царе Алексии Михайловиче была таже печать антихристова, с таковым же царским повелением и с таковою же царскою гербовою печатаю: хотя и не во всей России давалась, но только во иныя земли, ибо тогда в России народ был еще справедливее и богобоязнее. Тако и ныне такой же пашпорт дается во всей России, как и прежде, также с царским поведением и царским гербом, и печатью уездною, какая есть во своем городе, а не с числом антихристовым ббб, или со именем его, которая будет даваться на челе или на десной руце, то явно есть, что пашпорт не есть печать антихристова, но просто такая же проездная грамота, какая и прежде давалась.

Третие. Которые люди живут всегда в домех своих и не имеют надобности в дальные города отъезжать, разве верст 30, таковые пашпортов никогда не берут даже до смерти, а продают и покупают что им надобно, разные товары, такожде хлеб и съестные припасы, сколько им разсудится. Во время же антихристова пришествия по Апокалипсису «никтоже может ни купити ни продати, разве имея начертание имя зверя, или число имени его». От толкования. «И число зверя всюду распространяти начнет, в куплях же и продаяниих, да иже сего не приимут, от потребныя нужды смерть приимут». Но вышереченнии людие, не взимающий пашпортов, от нуждныя смерти, сиречь глада или жажды, не умирают, разве естественною смертию скончаваются. И се явно есть, яко панторты не есть печать антихристова.

Но речет некто, аще пашпорты не печать антихристова, что некоторые могут их миновать: но деньги или монета царская есть печать антихристова, ибо на них чеканятся и пишутся или печатаются змии и гербы такожде с повелением царским, а без них никому ни купити ни продати несть мощно. Аще денег у кого не будет, и никто ему не даст хлеба, и таковый от потребныя нужды смерть приимет: то яве есть, яко сия печать антихристова. Отвещаем, яко и сия, сиречь деньги, не печать антихристова сих ради вин:

Пер вое. Яко печать антихристова будет полагатися на челе или на десной руце: деньги же никтоже на чело приемлет или прилепляет (тако же и пашпорты) но просто приемлют в руки, и не в десную токмо руку, но и в левую, и полагает их во чпаг или карман. И не единовидны, овы с гербом двуглавым, и в ногах у герба трофеи подобны стрелкам, и ленты концы раздвоенные (якоже вы мните оных змиями), а другия с крестами четвероконечными, а иныя с единою буквою царскаго имени. Еще и другое разньство есть в металлах, овыя златыя, иныя сребреныя, другия медныя: еще же и ассигнации, то есть бумажныя.

Второе. Яко печать антихристова будет иметь имя его или число имени его, которое будет состоять числом ббб, а на монете имени такового не видится, которое бы число сие ббб замыкало, но просто имена царские, при котором царе монета чеканена, того царя портрет или имя означает, якоже се: Петр, Екатерина, Павел и прочая.

Но паки воспротивится кто и речет, яко на монете и пашпортах число антихристово есть: ибо годы писаны не по преданию отеческому, но по новому обычаю, от того времени когда антихрист настал, со убавлением осми лет от воплощения Христова, и то явно есть, яко число антихристово.

Но и сие доказательство не есть справедливо, потому что вы мните антихристу настати со времен Никона патриарха, с коего времени и печати его должно быти. Летописание же по новому обычаю начатся много раньше, якоже видится во многих книгах, во острожской Библии и прочих, которыя напечатаны в 1581 году: такожде и в Беседах апостольских и Апокалипсисах киевской печати, и в Полинодии рукописной Захария Копистенскаго, и еще в Книзе Кириловой в конце 9-го послания Мелетиева. Сии вей книги печатаны и писаны до Никона патриарха, то посему и не признавается, что пашпорты и монета с упомянутым летоисчислением печать антихристова.

Третие. Святый Андрей Кесарийский в толковании Апокалипсиса на зачало 37-е пишет: «На десных же руках, да десных и благих дел отсечет действо». А монету кто подает нищим от праведнаго своего прибытка, якоже и прежде подавали, не токмо десных и благих дел отсечет действо, но и евангельскую заповедь исполнит, якоже есть писано, просящему у тебе дай. Еще же монету когда человек приемлет в руку, тогда никакого обета явнаго или тайнаго не дает, чтобы никаких дел Божиих не творить, то есть чем Бога почитают, того бы не исполнять. И на монете несть сего, что могло бы подействовать ко отступлению от Бога, то яве есть, яко пашпорты и монета не есть печать антихристова.

РАЗДЕЛ ЧЕТВЕРТЫЙ. О отступлении, нечестии и ересях.

Онии убо вышереченнии во второй главе, иже мнят антихристу чувственно не быти, темже многия вещи антихристом быти вознепщеваша, от них же суть сия: ереси, нечестие, отступление, агньца в просфире закалаемаго где-либо в церквах инославных. И паки они сами же в другое время тыя же вещи называют уже не антихристом, но печатаю его. А не опомнятся о том, что сами прежде утверждали, аще ли же помнят, то всячески не ведают, яко сии вещи (печать антихристова) не могут быть антихрист. Понеже ино есть сам антихрист, и паки ино печать его, и толико разньство имать сие едино от другаго, елико разликует сам человек от орудия своего, или персона от портрета своего. Обаче вещи сии не могут быти ниже антихристом, ниже печатаю его сих ради причин. Понеже ереси и нечестие и отступление едино от другаго не отлучается, но паче вся сия едино есть и бывает и разумеется. Есть убо в священном писании, яко иногда и отступление называется начертанием диавольским: ибо о святых мучениках, мученных Христа ради, глаголется, яко о неприимших диаволя начертания, сиречь отступления (Апокалипсис толковый, гл. 20, зач. 61). Иногда же нарицается таковым начертанием, еже не полагати десницею на челе и не знаменовати честнаго и животворящаго Креста Христова (Минея четия

макарьевская августа 31). Темже убо таковыя места опасно ведети надлежит, понеже требуют разсуждения и различия некоего: аще бо и тем же именем нарицаются, но разум другой имеют, есть же сице: ибо человек плотян есть и видим, а диавол безплотен и невидим, и не может быти человек диаволом, ниже паки диавол человеком. Обаче приточне и гадательне называется диавол человеком (Мф., зач. 57), истиною же несть человек, но диавол есть и нарицается. Такожде и человек диаволом и сатаною называется (Мф., зач. 68), по некоему еже к нему уподоблению, истиною же не диавол, но человек есть и глаголется. Подобно и многия лжехристи и лжепророцы, и еретицы, и мучители антихристами называются, по некоему еже к нему уподоблению, истиною же не суть антихристи, но предотечи его и суть и разумеются, о сем выше во главе 3-й показахом. И якоже убо имеют разньство диавол с человеком, аще и единоименно иногда называются: и якоже имеют различие антихристи токмо нарицательнии со антихристом существительным, аще и единоименно иногда по некоему уподоблению называются: тако подобообразно разсуждати подобает разньство нарицаемыя его печати, яже действуется неким уподоблением чрез оных антихристов, иже суть ему предотечи: и сущия его печати, яже при самом том антихристе быти имущия. Оное убо печатление или начертание, сиречь ереси или нечестие, отдавна уже и прежде были в мире, и ныне есть. Но тое начертание не таковое, яково же хощет быти при самом том антихристе. Ино бо есть начертание зовомое токмо антихристово, еже есть чрез предотечи его, и чрез отступление прежде бывшее и бывающее, еже таинствене и преносне начертанием именующееся, по некоему уподоблению, истиною же несть начертание, но просто ересь есть и нарицается. Паки же ино начертание самосущественное антихристово, еже чрез самого того антихриста, и чрез тогдашнее отступление чувственне и истинно-действительне быти хотящее, еже и нарицается и есть его начертание: еже ниже когда было в мире сем, ниже ныне есть: что и извествуется отсюду.

Отступление убо от Христа и от православия начатся еще во время Христова на земли во плоти пребывания, ибо и тогда нецыи отступиша. И паки потом мнози епископи, презвитери и простолюдины отступиша некогда от Православия в нечестие, и тако было во все время. Вси же таковые отступники по реченному запечатлени быша от врага таковым начертанием, сиречь отступлением. Обаче от тех потом нецыи ко благочестию обратишася, и покаявшеся прощение получиша, и мнози от тех быша сосуди избраннии. Ибо таковым и чин положен святыми отцы, о еже како приимати обращающихся ко благочестию. А тогда во время пришествия антихристова тем запечатленным самою его печатию покаяния несть, якоже о сем сказует святый Ипполит глаголя, яко «оттоле власти не имать человек знаменати своя уды, но прелестнику приложится, и тому единому послужит, понеже таковому покаяния несть, всяко убо яве, яко погибе от Бога и от человек» (Соборник, гл. 8). Ныне же несть ни единаго таковаго на земли греха или беззакония, или нечестия, емуже бы не было обращения и покаяния, даже до последняго человеческаго издыхания. Вей бо хотящий наследовати спасение, иже от какой-либо ереси обращающеся, ко благочестию приходят, о нечестии прощение приобретше спасаются. Темже отсюду явленно, яко отступление, нечестие и ереси, и прочее сим подобное – все сие несть и не бывает печатию антихристовою: всем бо ныне обращающимся от сих есть покаяние, и о сем всякому от велика даже до мала есть известно.

РАЗДЕЛ ПЯТЫЙ. О седми тайнах церковных.

От времени убо Христова на небеса вознесения, даже до лет Никона патриарха московскаго, во все сие время сколько было по вселенней в еретических церквах или сонмищах всяких ересей, мерзости же и заблуждения, аможе и Рим отпаде от благочестия со всеми западными странами, несть ныне время подробну оныя исчисляти. Сие же тех заблуждение и нечестие видевше святии отцы, истиннии архипастыри святыя восточныя Церкви учителие и вселенней светильницы, зельне потщашася от нечестия оных отвратити, и того ради великия послания к тем писаша, показующе им нечестие и заблуждение, и паки укоряюще их, и божественный суд наносяще, овогда же моляще их и увещавающе, еже от того отступити, овогда же паки своих си оберегающе от оных заблуждения, объясняюще и на среду приносяще тех нечестие. И таковаго святых отец писания много обретается, еже блюдомо даже доныне, которое отчасти и до нас дойде. Обаче в том писании, якоже зрим, никтоже от святых отец вознепщевал, ниже нарекл печатию антихристовою церковныя тайны, яже действуемыя теми еретиками, паче же аще и римлянами или латынянами, иже полны суть всяких еретических догмат и нечестия. Что же о тех тайнах сказуется, услышим.

Матфей Правильник в книзе своей состава «со» во главе 12-й глаголет: «Иже убо иноплеменных латынских преданий облюдатися и бегати, яко гаггрены елика сила подобает, сих бо ради и тех освеняемся приобщения: обаче и еже не толико мерзцы да вменяются, но и священнодействуемии от них опресноцы не причастии убо нами да суть: но ниже паки прости да вменяются, Господне бо призывание назнаменует сих, и божественнаго Иакова брата Божия священная припевания, службу сим якоже навыцаем действуют, ниже подемлющая сия и служащая сих священнодейству сосуды, ниже священных одежда, ниже что в сих ино проста от нас возмнятся, но и сих хиротония к нам прилагаемом, иже от них хиротонисанным не отлагаются». И аще таковая тех латынников священнодейства святии отцы не называют печатню антихристовою, то кольми паче в тайнодействах прочих легчайших еретиков не леть быти печати его.

И еще много бы прилично было о тайнах еретиками действуемых от священнаго писания показати, яко оныя не точию печать антихристова, но даже некоторыя, яко то крещение и хиротония, приемлеми бывают святыми отцы, яко тайны, но за невмещение малыя сия книжицы оставляем, темже и кратко глаголем, и сие токмо наменихом, яко таковыя тайны не пристойно умствовати печатию антихристовою по вышереченным, и всякому имущему ум явленно и разумно, яко тако есть.

ПРИСТИЖЕНИЕ. Ныне убо нецыи называют печатию антихристовою, паче инех от сих едину некую тайну, еже есть миропомазание, вознепщевавше же тако по приличности печатления. Обаче явствуется от священнаго писания, яко сице мудрствующий погрешиша: несть бо миропомазание печать антихристова, яко тако показуется чрез некоторыя неприличности.

1) Святейший Филарет патриарх московский, в соборном своем уложении во главе 9-й, иже от обливанцев миропомазание и маслопомазание, яко благочестивое приимати повелевает, ибо обливанцами помазанных паки помазовати не повелевает.

2) Священницы убо миром печатлеют по всех удех человека: антихрист же своею печатию запечатлеет не на всех удех, но токмо на руце или на челе, якоже пишется: «Даст им начертание на десней руце их или на челах их» (Апок., гл. 13): или на руце и на челе, якоже сказует святый Ефрем глаголя: «И даст свою печать скверный не просто же на всех удех тела, да не негодуют, но даст на руце десней человеку, такоже и на челе мерзкий образ». Темже убо зде явственне показуется, яко миропомазание не есть печать антихристова.

РАЗДЕЛ ШЕСТЫЙ. О триперстном сложении.

В знамении крестнем еже десною рукою три первыя персты слагати, мнози ныне называют печатню последняго антихриста, а особливо покрещеванцы, иже отнюд мнят быти таковою печатню, что и повсеместно утверждают. Обаче видится, якоже от прочих, тако и о сем они не истинствуют, ибо таковое мудрование от себе у них возниче, а не от святых отец произыде: сего ради и не достоверно есть, якоже явствуется отсюду.

Первое. Таковое убо триперстное знаменование зрится, яко и прежде было до Никона патриарха у еретиков во многих землях, а наконец и в греках, от которых и Никон принял сию новость. К тому же в еретиках и различны были перстосложения в крестном знамении: и ов из них сице умысли, ов же инако, якоже о сем на мнозе в церковном писании видится, а именно: в летописце Барониеве сице повествуется: «В то лето папа Формос скончася, по нем вторым наста Стефан седмый того имене. Сей Формоса из гроба взяти повеле, и облеченнаго в папежскую одежду на престоле посадити. И глаголаше к нему Стефан: был еси епископом портуенским, почто властолюбивым духом римский вселенский престол похитил еси. И повеле с него одежду оную совлещи, и три персты, имиже бывает благословение, отсещи, и тело в Тивер реку воврещи» (Бароний, лета Господни 896 и 897, и Книга о Вере, гл. 27, л. 240). В Книзе Кириловой сказует, яко «фрязи и латыни благословляют пятою персты, и паки потом единым пальцом лице перекрещивают» (гл. 27, л. 259, или 282: и Кормчая, гл. 48, л. 401). В Кормчей во главе 39-й пишет: «Еретицы яковити единем перстом прекрещеваются, от левыя страны на правую». И в Книге о вере во главе 28-й вещается, яко «римляне крест развращенно творят пятою персты, и первое на левое плече и потом на правое руку полагают, и с единым перстом на образех (сиречь на лицах) своих крест воображают яко единовольницы еретицы».

Вся же сия развращенная перстосложения святии отцы видеша, но ни единаго не отлучили, еже кое бы из них было хуждыпи или пагубнейши, ниже о триперстном особне что рекоша, но единообразно и единословно узаконоположиша, глаголюще: аще кто не знаменуется двема персты, якоже и Христос, да будет проклят (книга древлеписьменная Никона Черныя Горы, последи книги во главе 94-й, яже указуется в Поморских ответах ответ 5-й, и книга харатейная Иакова Жидовина, и книга Феодорита епископа кирскаго, и книга древлеписьменная Иосифа архимандрита Спасскаго новаго монастыря). Или сице: иже не крестит двема перстома, якоже и Христос, да будет проклят (в тойже книге Феодорита епископа, и в Кормчей древлеписьменной гл. 100, и в Потребнике иноческом московской печати). Или паки сице: аще кто двема перстома не благословляет, якоже и Христос, или не воображает двема персты крестнаго знамения, да будет проклят, святии отцы рекоша (Стоглав, гл. 31).

Ельма же вся в крестном знамении развращенная перстов слагания, древний святии отцы в еретиках бывающая слышаша, наипаче же яко и сами видеша, обаче не мудрствуют, якобы се есть печать антихристова, и не отличают чем хуждыпе прочих триперстное сложение: но якоже нелепая святей Церкви противность, купно с прочими перстосложениями клятве от них предается, печатаю же антихристовою не нарицается. И аще святии отцы сего тако не нарицают, темже яве есть, яко сие не есть печать антихристова. Нарицающии же тако явственно обличаются, яко не по святоотеческому преданию, но по своему смышлению тако утверждающе нарицают.

Второе. Во осмой тысящи во втором сте летех сочинены некоторыя святоотеческия книги, а именно: Книга о правой вере, Книга Кирилова и Соборное изложение святейшаго Филарета, патриарха московскаго и прочия. Кирилова же книга не вся есть сочинения святаго Кирила, но токмо от первыя доски сказание на осмой век (а по малорусской – на осмый артикул вызнанья веры), и знамения об антихристе: и чрез сие наименование она прия, еже зватися книгою Кирила Иерусалимскаго. Обаче и в тех самех Кирилом писанных знамениях суть толкования некоего белорусца, восточнаго православия хранителя и проповедника слова Божия, премудраго мужа Стефана Зизания, егоже напоминает и списатель Книги о правой вере во главе 30-й. Сей же Стефан Зизаний бе во время благовернаго князя Василия Острожскаго, и по его прошению истолкова из книги Оглашения святаго Кирила патриарха иерусалимскаго слово 15-е о последнем времени, и приела ко князю Василию, и напечатася тамо на двою языку, откуду преведеся на наш славянорусский язык, и напечатася в московской типографии повелением богоизбраннаго государя царя Михаила Феодоровича и благословением Иосифа патриарха. К тем же словесем святаго Кирила и Зизания и ина словеса церковных учителей приложишася, от многих святых книг собранная, и вся сия совокуплена и сочинена вново: сего ради и в выходе книги сея не глаголет книга Кирила Иерусалимскаго, но книга новособранная, понеже Кирил святый бе в лета 5845-е, а в книге сей не оно время показуется, но осмыя тысящи второе столетие является, якоже в самой той написанныя действа и лета во многих местех явствует, якоже во главе четвертой, знамении 3-м, на листе 28-м или 51-м, на поле – лета 7000 и 7089. Во главе 35-й на листе 342-м или 365-м – лета 7097. Во главе 45-й на листе 499-м или 522-м – лета 7104. Во главе 27-й – лета 7129. Такожде и Книга о правой вере яве своя лета показует, ибо описует подробно униатов от восточнаго православия отступление, еже бысть в лето 1595, якоже свидетельствуется в той книге во главе 30-й. Подобно и Соборное изложение святейшаго Филарета патриарха своя лета показует. Вси же сии книги явствуются, яко сочинены оныя уже в последних временех.

В сих же священных книгах зельно лежит на римлян и латынян обличение и на прочих еретиков, ясное неправославия их показание и сильное противоборство. Обаче от обретающихся в книгах сих священных церковных учителей никтоже нарече печатию антихристовою триперстнаго знаменования, ниже прочих неправославных перстосложений, ни седми тайн церковных, еретиками действуемых. Такожде и нововводное имя «Иггсус», и агньцау них приносящагося не вознепщевали быти антихристом, ниже печатию его. Аще же что от сих было бы антихрист или печать его, то не бы сии святии отцы умолчали, еже бы то не объявити, зане вещь сия великое есть дело, и потребно бы наипаче других вещей о сем явити и указати по них последним родовом, яко се есть антихрист, а се – печать его. Обаче они антихристу (яве яко и печати его) время будущее назнаменуют, якоже выше во главе 3-й показахом: от сих же ничего не называют, ниже самем антихристом, ниже печатию его. А яко сии святии отцы тако не предают ниже нарицают сих вещей ни антихристом ни печатию его: убо явленно есть, яко несть сия антихрист ниже печать его. И не дерзость ли сие и велие неистовство будет, еже святых отец предание презрети, умыслити же свое. Глаголет бо святый Петр Дамаскин: «Велие есть безумие, еже оставити глаголы готовы и глаголати своя» (Алфа и Омега, гл. 1).

Третие. После сих святых отец были страдальцы соловецкие, иже нововводства онаго, еже в великороссийской церкви, не прияли. Однако ничесоже от того ни антихристом, ни печатию его не вознепщевали, о чем свидетельствует самая их челобитная, юже они подали государю, милости от того просяще, да оставит их жити в древлецерковных содержаниях.

Четвертое. От того же Соловецкаго монастыря бе некий мудрый и добродетельный инок Герасим Фирсов, о котором напомяновено в книге соловецкой истории во главе первой. Сей инок Герасим по прошению неких сочинил слово о крестном знамении зело благостройно, добро же и душеполезно, еже положено в той же книге соловецкой истории, глава 3-я. И в том слове сей отец пространно пишет о о триперстном сложении в знамении крестнем: обаче подобно якоже и прочий уподобляет ё токмо некаким ересем прежде бывших еретиков, печатию же антихристовою не называет.

Ельмаже вышеписаннии архипастыри, и священнии церковноучители, собравший и сочинившии в последних уже временех новыя книги, рекше, Книгу о правой вере, и Книгу Кирилову, и Соборное уложение святейшаго Филарета. Вей убо сии святии отцы по восточней православней Церкви крепце побораху, ереси же каковыя, и непотребныя новости с зельностию обличающе отреваху, и достойную вину наносяще, и прочим всем являху. Однако нововводнаго сего имени Игюусова, или агньца в еретических церквах в просфире закалаемаго, или от прочих вышеписанных что, не вознепщевали быти антихристом, ниже печатию его. Тако подобно и соловецкие страдальцы сию новость «Иш: ус», или ино что таковое не называют антихристом, ниже печатию его. И аще убо сии и таковии отцы, мудрости и ревности по благочестии исполненныя, таковаго непщевания не предаша, егоже предают нынешний покрещеванцы, темже всяк имеяй разум может познати, яко новость сия «Иисус» не есть антихрист, такожде и триперстное крестное знаменование, и прочия вся вышепомянутыя вещи не есть печать антихристова.

РАЗДЕЛ СЕДМЫЙ. Ныне же и сие удивлению достойно, яко почему покрещеванцы возмнели столь много антихристовых печатей. Называют они ереси – печать, отступление или нечестие – печать, триперстное знаменование – печать, пятиперстное благословение – печать, крест четвероконечный – печать, герб царский – печать: овогда также называют пашпорт, овогда монету и седмь церковных тайн – седмь печатей, и овогда убо называют печатию то, овогда же другое. Итак по их мудрованию находится антихристовых печатей близ пятинадесяти. От коего же писания они сие взяли? И который апостол тако предал? Или кто от святых отец сице написа, яко антихрист даст своих печатей десять или пятьнадесять? Воистину никтоже. А яко не от писания священнаго таковое мнение произыде, но токмо от некоего уподобления и гадания и человеческаго погрешительнаго умышленна введеся, темже и вероятно быти не может.

Понеже священное писание сказует, яко тогда антихрист даст свою печать, рекше едину, а не глаголет, яко даст своя печати, акибы многия. Святый Иоанн Богослов во Откровении сице о сем глаголет: «И даст им начертание на десней руце их, или на челех их. В толковании. Начертание же пагубнаго имени на вся наложити потщится». И святый Ипполит глаголет: «И вей тесноты ради пищныя к нему приидут и поклонятся ему. И даст им знамение на руце десней и на челе». И преподобный Ефрем подобно сим предает глаголя: «Да егда кто оскудеет брашна лишен, то понудится печать его прияти, и даст ему свою печать скверный». Такожде и в прочих святых книгах предается, и всюду едина печать антихристова сказуется, а не многия. Темже и отсюду показуется, яко сия мнимыя печати не есть печать антихристова.

И якоже чрез сия подобно и от вышеписанных тоже познавается, убо в начале главы сея свидетельствует Апокалипсис, яко тогда иже не приимут того антихристова начертания, то не возмогут ни купити ни продати, но от потребныя нужды смерть приимут. Ныне же бывает не тако: но якоже кто хощет, тако и верует, и кто где крещен или како, или отнюд некрещенный, и кто как знаменает лице свое, или всячски не знаменует, и аще кто христианин, или весьма неверный, и кто правоверный или еретик, и аще кто прият на себе вышереченныя мнимыя оныя печати, или не прият. Вей таковии неиспытно продают и купуют, и несть о том искания и принуждения, и купити и продати запрещения, и от потребныя нужды того ради умертвия. И сего ради явствуется, яко вся оныя вещи не суть печать антихристова, но всуе онии вышеписаннии любопрящеся самомнительно тако утверждают и прочих в то тщетное мудрование приводят.

Убо глаголет Апокалипсис, яко иже того антихристова начертания не приимут, то от потребныя нужды смерть приимут. О которой убо смерти сие речеся? О духовной ли, сиречь душевной, или о чувственной, сиречь телесной? Но всячески известно, и всем имущим ум может быть явлено, яко не о духовной смерти, но о чувственной сие глаголется. И сие тако познавается отсюду. Ныне же тии наипаче душевно умирают, иже печать антихристову приимут. Зде же не тако, но глаголет тем живым быти, иже печать его приимут. А иже оныя не приимут, тем сказует смерть прияти, и не просто смерть, но рече, от потребныя нужды, не возмогут бо ни купити, ни продати. И от сих ясно показуется, яко сие речено не о душевной смерти и нужде, но о телесной. Обаче ныне вен, иже не приимшии вышеписанныя оныя мнимыя печати, пребывают, и никтоже от тех не умирает ради потребных нужд, но вен живут, и продают, и купуют. Темже отсюду светло явствуется, яко сия вся не есть печать антихристова.

РАЗДЕЛ ОСМЫЙ. Аще убо по мудрованию покрещеванцев настоит ныне печать антихристова, ибо называют они печатню ереси, яве яко прежде бывшия и ныне настоящия: темже и крещение, ныне в великороссийской церкви бываемое, и миропомазание называют тою же печатню. Еще же и триперстное знаменование, к сим же и другая многа, якоже выше речеся, мнят быти печатню антихристовою. И тако высокомудренно возмневше, якобы кроме их вен уже запечатлени тою печатню. И сия ли тако суть? Никакоже.

Аще же по их мнению сия тако суть, то како и они могут к себе примирять таковых уже запечатленных печатню антихристовою? Пишет бо, яко таковому покаяния несть, но вовеки погибе. И аще убо покаяния несть, то яве, яко и обращения и спасения несть. И паки, аще по их мнению оныя вышереченныя вещи печать антихристова есть, то уже и сами они отисперва запечатлени тою печатаю, темже и самим им несть покаяния, но во веки погибоша от Бога и от человек. И аще сами они уже во веки погибоша, то и прочих таковых невозможно им от погибели избавити. Или сице они отвещают: яко мы таковых запечатленных ныне антихристовою печатию примиряем к себе не чрез покаяние, но чрез крещение: а чрез покаяние примиряти тех и спастися им невозможно.

ОБЛИЧЕНИЕ. Аще убо запечатленных тою печатию чрез покаяние примирити и спастися им невозможно, то и чрез крещение будет невозможно. Аще убо покаяния несть, то яве есть, яко и обращения несть, и аще обращения несть, то и крещения несть: невозможно бо не обратившися креститися. Идеже бо коренем отъятым, откуду трость и лоза растет? И идеже источником пресякшим, откуду река потечет? Сице подобно и некрещеный, не глаголю запечатленный, аще не первее обратится и раскается, то не может креститися. Прежде бо человек верует, таже и крестится, аще же и младенец будет, то от родителей его или от восприемников сие исповедается. Аще же кто в возрасте, то сам той первее познавает, и о нечестии раскаевается, и того отрицается, или проклинает, и к Богу обращается и верует, таже и крестится. Убо крещение без обращения и без покаяния быти не может. Тем и самое тое крещение во Евангелии называется покаянием, идеже сице речено: «И проповедатися во имя Его покаянию и отпущению грехов. От толкования. О крещении зде рече, о сем бо покаяние бывает, исповеданием и отложением первых зол и нечестия, и последует отпущение грехов» (Евангелие недельное на Вознесение Господне). И Господь глаголет: «Покайтеся, приближибося царство небесное» (Мф., зач. 5). И Петр апостол мужем иудейским рече: «Покайтеся, и да крестится кождо вас во имя Господа Исуса во оставление грехов» (Деян., зач. 6). И в Потребнике в молитве от иерея глаголемой на Рожество Христово над чадом духовным сице: «Владыко Господи… сотвори человека по образу Своему и по подобию, и давыи ему крещение в покаяние». Подобно и всюду в священном писании явствуется, яко крещение не бывает без покаяния, но чрез тое крещение исповедуется покаяние. Запечатленному же антихристовою печатию, якоже речеся, несть покаяния, тем и опасно объяви, аще несть покаяния, то несть и обращения. От ересей же ко благочестию обращающихся и кающихся святая соборная и апостольская Церковь приемлет, убо и устав примирения в трех чинех располагает, якоже свидетельствуют книга Кормчая, Большой потребник, и прочий. Но и сами тии покрещеванцы от нынешних нововводств обращающихся к ним чрез покаяние принимают в соединение: убо явственно показует самое сие действо, яко вся вышеписанныя вещи несть печать антихристова. Паки, яко тако есть, и еще сице разумеется.

Аще убо нецыи ныне приидут в собор покрещеванцев, и примирятся в соединение их, и прекрестятся от них паки, якоже обычай их содержится, и пребудут с ними купногласно и единомудренно во всем неколико лет, потом, возгнушавшися их и всего мудрования их, от них отступят, и шедше во именитый град к епископу, и раскаются ему о сем с прошением, да приимет их и присочетает к своей церкви. И тогда той епископ приведет их к церкви, и повелит им проклинати тех покрещеванцев, подобно и прочих всех последующих древлецерковным преданиям, и не приемлющих новоцерковных содержаний. Таже аще помажет их миром и повелит им прекрещати лице свое треми первыми персты, по их обычаю, а двуперстное знаменование клятве предати, с тем же и прочая вся древлецерковная предания, яже суть им противная: по сих причастит их своея церкви таинством. Сим всем совершившимся, повелит им хранити непозыблемо вся елика возмогут, яже обычна нынешней великороссийской церкви. Они же сия вся крепце соблюдающе, нецыи же и оженятся, и поживше тако несколько времени, паки приидут к тем покрещеванцам, раскаявающеся о отступлении, просяще от них прощения с примирением. То они таковым обратившимся что сотворят? И како к себе присочетают? Будут ли паки третие их крестити? Никакоже. Ибо аще сице будет, то не точию будет неправильно, но и самем им разрушительно и противоборно. Темже сия видяще не будут таковым что другое творити, но приемлют их чрез покаяние и епитимию. И таково примирение у них обращающимся бывает, якоже и мы о сем множицею слышахом, иногда же и сами видехом.

Темже вся сия разсмотривше, ино ничтоже зде показатися имать, разве то, что рекл бы кто таковым сицевая: «О умиленнии, не последовасте о сем священных отец любомудрию, и не только тому, но ниже своим мудрованием последуете: не вей ли вы всегда повсеместно утверждаете, якобы триперстное знаменование есть печать антихристова, подобно и прочая некая? И аще се есть тая печать: то како вы можете запечатленных тою печатаю приимати чрез покаяние, имже сие уже отсечено? Аще же тако приимаете: убо отсюду и сами вы яве показуете, яко се несть печать антихристова. И аще несть, якоже и несть: то почто оное своемненное мудрование вводите? И таковое неистинное учение утверждаете? И тем сами себе прельщаете и прочих соблажняете? Ибо исповедуете оныя вещи быта тою печатию, яже не суть печать. А яко тако есть, сице быта и действо ваше являет, понеже которыя вещи тою печатию называете, обаче действом своим не печатию быта показуете. Темже и самем вам противоборное действо ваше являет неистинно быта учение ваше и мудрование. Ибо всякое истинное учение и любомудрие треми сими истинно быта познавается. 1, яко да будет учащий благочестив и истинен, и житие имея незазорное, огребаяся всякия злыя вещи. 2, яко да будет учение тое согласно и единомудренно с духоносными апостолы и святыми отцы, и со всеми священнейшими церковноучительми. 3, яко да учение то будет и прочим подъятно и ко исполнению возможно, и само к себе не противоборно. Вышереченных же о печати антихристове мудрование не точию святым отцем не согласно, но и само себе противно. Ибо еже они словесы научают и утверждают: то паки сами же делом своим опровергают и разрушают. Темже таковое учение достоверно быта не может, но всячески открывается, яко сия не есть печать антихристова.

НАДСЛОВИЕ ОСМОМУ РАЗДЕЛУ

Глаголет святый Ипполит, яко «приимшу печать антихристову покаяния несть, но во веки таковый погибе от Бога и от человек». Во Апокалипсисе же святый Андрей сказует, яко «тогда наведет Бог мучительныя язвы обращая человеки на покаяние: они же не на покаяние, но на хулу ся подвигнут, и на Бога, рече, язык свой поострят». Ниже: «А еже не на покаяние, но на хулу обращахуся жестость сердца их объявляет, темже яко фараон будут, паче же и сего жесточайше».

Зде убо яве показует велие быти тогда тех злонравие и ожесточение. Темже и влепоту о таковых святым Ипполитом речеся, яко несть им покаяния. Или от сих показуется, яко сугубообразно нечестие разсуждается: есть нечестие, от негоже Илия и Енох во благочестие обращати будут, якоже выше во главе 9-й и 10-й показахом: и есть паки нечестие, еже имать быти у поклонившихся аки богу антихристу, и приимших печать его. И овому убо нечестивому есть покаяние, якоже зрится: овому же нектому. Ельма же сия тако суть, паки тойже святый Ипполит являет, ибо рече о пророках Илии и Енохе, и Иоанне Богослове, еже проповедати им во всем мире антихристово пришествие, иже и сотворят, рече, знамения и чудеса, во еже тако умолити и обратити человеки в покаяние за пребезмерное тех беззаконие и нечестие. О приимших же печать антихристову рече, покаяния несть: темже убо и сугубо нечестие показа. Еще же тако быти и сим объяви. В таковое бо нечестие тогда впадшии, рекше приимшии печать антихристову: «Аще и увидят, – рече, – яко той есть лукавый сопротивник, и плакати начнут себе болезненне, и рыдати вельми, и по лицу рукама начнут битися, и ногты ланите драти и власы терзати, глаголюще к себе, о беды, о великаго падения, како прельстихомся, како того мрежами живи уловихомся» и прочая. Видиши ли, яко на тех в то нечестие увязнувших, сиречь поклонившихся аки истинному Богу антихристу, подобно и иконе его, и приимших печать его, имать быти наипаче некая сила и область сатанинская, неже на ином каковом нечестии. Понеже приимшии тогда печать антихристову, аще и познают свое нечестие, и восплачутся и возрыдают, и руками возбиются, обаче неудобство оное не имать дати тем места истинному покаянию и спасению.

Ныне же бывает не тако: никто убо ныне сице не плачется настоящаго коего нечестия, ниже рыдает сицевым подобием, ниже биется того ради руками. Паче же кто и не познавает его, но содержит до смерти своей за благочестие: аще ли же кто познает и восхощет от нечестия отступити, то ничтоже его ныне не удерживает, и не о чем таковым образом плакати и битися. Но абие может всяк, аще хощет, раскаятися о нечестии и праве веровати во Отца и Сына и Святаго Духа, аще ли не крещен сый, или крещен, но не по истине, еретическим крещением, сиречь, якоже в 31-й главе Книги о вере речеся, «не в три погружения», но или единою погружен, или обливан, или окроплен точию, или не во Отца и Сына и Святаго Духа крещен, то сицевый да крестится по преданию древлеправославной Церкви. Аще ли же кто крещен в три погружения во имя Отца и Сына и Святаго Духа, обаче обретаяйся в неких ересех, но и от сих мощен вскоре отступити, и в раскаяние пришед спастися. Приемлется же в соединение церковное вторым или третиим чином, сиречь посредством святаго миропомазания, или просто со одним проклятием ересей: понеже всем ныне отверста дверь к покаянию и спасению. Темже явственно познавается, яко вся оныя вышеписанныя мнимыя печати не есть печать антихристова.

РАЗДЕЛ ДЕВЯТЫЙ. Вопросит убо зде некто глаголя: аще вышеписанныя вся вещи не есть печать антихристова, то что же есть печать его?

Отвещаем. В божественном писании явствуется, яко печать антихристова есть не ино что, якоже ныне нецыи возумствоваше разумевают, мысленное некое качество быти утверждающе: но самая истая печать антихристова хощет быти явственная, а не таинственная, чувственное начертание, а не мысленное. Сиречь, поклонившимся аки Богу антихристу устроено будет, и дастся от него на чела тех или десницы некое тревидное пятно, наподобие того, якоже в настоящих временех, по указу царскому, запечатлеваются на лице неким пятном посылаемыя с наказанием в ссылку за великия смертныя вины. И якоже сии начертаваеми бывают таковым знамением, во изъявление неугодных дел их и вечнаго зде осуждения, подобно и при антихристе поклонившийся ему аки богови начертани будут его знамением, во изъявление еже к нему присочетания и от Христа отпадения, и вечнаго осуждения.

А яко чувственно таковое пятно будет, священное писание со удобством открывает, и всякому имущему ум есть явленно. Ибо и от времени являет, и от места показует, и от видотворения его тако быти явственно открывает. От времени убо сице являет, яко будет в кратком времени урочном, в последних оных триех летех и пол, в самое то своеобразное пришествие, и самосущественное царствование антихристово. Ныне же тому времени и самому тому антихристу еще не пришедшу (якоже выше в книзе сей показася, подобно и ниже изъявится), то яве есть, яко и печати его быти невозможно. От места же сице показует, яко оное дано будет не на иное кое место, но на чело или на десную руку. А от видотворения сице открывает, яко вид того начертания таков хощет быти, рекше имети будет: или образ, или имя, или число имени антихристова ббб.

Тако убо сказует быти святый Иоанн тайновидец, глаголя: «И даст им начертание на десней руце их, или на челех их, да никтоже возможет ни купити ни продати, токмо кто имать начертание на челе своем, или имя зверино, или число имени его» (Апок., гл. 13). Святый же Андрей, архиепископ Кесарии Каппадокийския, апокалипсической тайны сказатель, и благоискусный изъяснитель, толкуя вышереченная Иоанном святым словеса о начертании антихристове, никаковаго иносказательнаго мысленнаго толкования не полагает, но то же самое существословие буквально изъясняет, и спроста паки начертание именует, емуже быти на челе или на деснице прямо толкует. Образ же и имя зверино и число имени непреносно разумевает. И что его толкования яснейши, еже выше с начала главы сея положися.

Подобно и святый Ипполит и преподобный Ефрем о той печати антихристовой пространно повествуют: и тии также не преводне, но просто прямо разумевают, якоже выше объявися.

В книзе же Мессии Правдиваго (на польском языке) о той печати сказует сице: «яко (тогда) трояко будет пятно антихристово, которое слуги его на руце правой или на челе своем будут имети. Первое пятно – образ властный антихристов вылиованный, другое пятно – имя его властное, литерами выраженное: третие пятно – литеры, котории вкратце личбу имени его будут в себе замыкати, сиречь ббб».

Якоже убо во Апокалипсисе речеся образ зверя, еже есть начертание, или имя его, или число имени его: тако подобообразне и в книге Мессиине сказуются три сия, сиречь образ антихристов и имя его, и число имени его. Аще же кто сему уверитися не хощет, да весть таковый, яко сие не своемысленно есть мнение, но священному апокалипсическому писанию согласное любомудрие. И аще согласно есть, якоже и есть, убо верно слово и всякаго приятия достойно.

И сице разсмотряющися божественное писание, печать антихристову чувственное тревидное пятно быти являет. И от сего треобразия едино пятно комуждо, веровавшим и поклонившимся аки богу антихристу или иконе его, датися на чело или на десную руку показует. Темже оставити священнаго писания готовые глаголы и в тех место вводити тщетная своя мнения зело опасно и многобедно есть.

Мы же, последующе богодухновенному писанию тако разумеваем, неразвратно приемлюще святоотеческое о сем сказание, тако мудрствуем, достоверно и без сомнения шествующе незазорным путем толкования священных церковноучителей, тако утверждаем, якоже выше о сем изъявися. Еще ли же противоречит и любопрится кто, и сего разумения не приемлет, инако же некако быти умышляя, спорливо потязается: но мы таковаго обычая не имамы, ниже Церковь Божия, якоже рече апостол (зач. 148).

ПРИСТИЖЕНИЕ. Выше писахом, наипаче же во главе сей почасту напомянушася некая новопредания, рекше триперстное знаменование на лице своем, подобно и иная некая нововводства и ереси: да не возмниши, акибы мы оная похваляем или приимаем. Сего ради извещательне изъясняем, да не будет на нас блядивое то порицание, понеже и слышати не терпим в том обретатися. Но еже святая соборная и апостольская Церковь предает или приемлет, тому преданию и мы последующе, все оное приемлем и облобызаем: а еже та отверже и прокля, тое и все и мы отреваем и проклинаем. Зде же вышеписанная нововводства причиною напоминахом, не яко похваляюще или оправдающе, но истиннолюбно священным писанием объявляюще, яко оная не есть печать антихристова, но просто новости или заблуждения, или ереси суть и разумеются, якоже показуют вся вышеписанная свидетельства и доводы.

Глава 17

Знамение 11 Яко тогда антихрист воздвигнет велие гонение и мучение, и неизреченны тогда будут скорби, яковы же не бывали от сложения мира

Во время убо антихристова на землю пришествия не от антихриста токмо постраждет человеческий род, но наказан будет и богопопустными язвами, или богогневными муками, якоже и выше в знамении пятом речеся. Егда Енох и Илия имут затворити небо от дождя и преобратити воды в кровь, и поразити землю всякою язвою, елико аще восхотят. Таковыми язвами тогда уцеломудряя Бог человеческий род, от тела и души сугубе сотворенный: ово убо напаствуя и казня, ово же милуя и щадя. И о сем повествует возлюбленный ученик Христов Иоанн Богослов во Откровении. Словеса коего приведем с толкованием Андрея Кессарийскаго по киевскому изданию Апокалипсиса: «И по сих видех, и се отверзеся храм скинии свидения на небеси, и изыдоша седмь ангели, имущии седмь язв». Ниже: «И едино от четырех животных даде седмим ангелом седмь фиал златых, исполненных ярости Бога, живущаго во веки веком». Ниже: «И никтоже можаше внити в храм, дондеже скончаются седмь язв (седми) ангел (зач. 45). Толкование. Отсюду непщуем, яко донележе негодование божественное нечестивых не разлучит праведники (от неправедников), никакоже святии получат жребий в небеснем Иерусалиме, и священнодейство и покой в храме Божии. Подобает бо скончатися (глаголет) язвам, имиже мздовоздаяния греховная достойным подаются. И сии изволенный им получат ответ. Посем сице дано будет обитание святым в горней митрополии. Куюждо же язв обретающимся в кончине примиряяй кто, не погрешил бы (мню) подобающаго, человеколюбец бо сый Бог, к ежеумалити безконечныя муки в будущем, и в настоящей жизни достойным попустит да наведены будут чрез Еноха и Илию пророка мучительныя язвы, и чрез припадающия болезненныя от браний противомерному согрешенных возмездию».

Зачало 46. «Сущее. И слышах глас велий из храма глаголющий седми ангелом: идете и излияйте седмь фиалы ярости Божия на землю. И отыде первый ангел и излия фиалу свою на землю: и бысть гной зол и лукавей на человеки, имущия начертание зверево, и на покланяющияся образу его. Толкование. Фиала зде, якоже и чаша, вместо мучительнаго действа приемлется, ейже глаголет от ангела излиянней, гной лукавей бысть, аки млеко ссело, в сердцы болезнь трясущуюся знаменующий, бывающую в сердцах отступничих, егда богопопущенными язвами биеми ни едину же цельбу от обоготвореннаго ими антихриста получат. Подоболепно же яко и чувственне сих уязвляются телеса, на обличение гнойныя их душа диавольскими прелести стрелами лестьчими (и антихристовыми и отступничими).

Зачало 47: «Сущее. И вторый ангел излия фиалу свою на море, и бысть аки кровь мертвеца, и всякая душа живая умре в мори. Толкование. Не велие есть божественней силе (и) на обличение немощи антихристовы, и на удобство прельщаемых, святыма пророкома Енохом и Илиею преложити море в кровь аки мертваго, сиречь, аки закланнаго, и тлю содеяти сущих в нем, якоже древле во Египте чрез Моисея сотвори». Ниже: «Яко да известнии в вере вжилятся, и неутвержденнии убоятся, зряще тварь ополчающуюся им о чести губителя». «Сущее. И третий ангел излия фиалу свою на реки и на источники вод, и быша в кровь. И слышах ангела вод глаголющаго: праведен еси сый, и иже бе, преподобие, яко сия судил еси. Занеже кровь святых и пророков излияша, и кровь дал еси им пити, достойни суть. Толкование. И отсюду показуется, яко ангели учинени суть над стихиями, якоже и горе речеся, из нихже единаго (суща) и иже на водах, глаголет, яко воспевает Бога, о наведением по достоянию осуждении на преступники, яко осквернившим руки кровьми святых, кровь к питию даде. Показуется же чрез сия, или еже мнозем сподобитися во времени оном, твердым в вере стоянием, пророческаго дарования, и убиенным быти от диавольских защитников: или (сие) яко отвращающийся божественных пророк проповедания, и оправдающе их убиение от жестосердых иудей, предложением общницы бывают заклания их».

Зачало 49. «Сущее. И четвертый ангел излия фиалу свою на солнце, и дано ему бысть опалити человеки огнем: и озноишася человецы зноем великим, и похулиша имя Бога, имущаго область над язвами сими, и не покаяшася дати Ему славу. Т олкование. Негли убо и чувственне опалением солнечным тогда опалятся человецы, человеколюбцу Богу браздою и уздою челюсти не приближающихся к Нему встягающу, да зрят к покаянию. Аще и во глубину зол впадшии, не к обращению, но к хуле злобою разума и воли приведутся. Инаго толкование. Писание Солнцем Христа наричет. Зде же не имамы сего о Христе приимати, но сия фиал излияся на солнце сие видимое, да усушит землю, да не даст плодов своих, и уязвит человеки жжением своим. Понеже бо сия казнь от Бога быти свойственна есть на грешныя.

Зачало 50. «Сущее. И пятый ангел излия фиалу свою на престол зверев, и бысть царство его помрачено, и жваху языки своя от болезни, и хулиша Бога небеснаго от болезний своих, и от гноев своих, и не покаяшася от дел своих. Толкование. Еже излиятися фиале на престол зверев знаменует, яко на царство антихристово сицевый гнев излиется, и помраченное покажется, аки не просвещенно солнцем правды сущее. Жвание же языков презельность болезни являет, ёюже прелыценнии от него объяти будут богопопущенными язвами биеми, яко да познавше, яко льстец есть прославляемый от них аки бог, престанут от прелести: они же ниже отсюду к покаянию, но к хуле обратятся».

И во главе 7-й, зачало 19-е, пишет: «Сущее. И по сих видех четыре ангелы стоящия на четырех углех земли, держащия четыре ветры земли, да не дышет ветр на землю, ниже на море, ниже на всяко древо. Толкование. Аще и нецыи истолковаша, яко сия от римлян древле иудеом быша, мняще яко четыре божественнии ангел и знаменуют, на земли же и на мори напаствуемым, никакоже возмощи избежати неизбежнаго гнева. Много паче сие в пришествии антихристове будет, не в частней земли иудейстей, но во всей, еяже на четырех углех стояти ангелом повествует, яко исполняющим служения от Бога им врученная, нам же не знаемая. Удержание же ветров явственне разрушение благочиния твари и злых являет неизбежное. Ветрами бо питаются и садовие сущее на земли и прозябает, и по морю преплавают».

Зде убо явственно показуется, яко тогда при антихристе в той седмице не токмо духовная будет скорбь, но при духовной будет и чувственная туга и скорбь превеликая, якоже удобно открывает божественное писание, выше и ниже во главе сей положенное. О скорби той, хотящей быти при кончине мира, во время антихристова пришествия, Сам Господь во Евангелии сказует глаголя: «И проповесться сие Евангелие царствия по всей вселенней, во свидетельство всем языком, и тогда приидет кончина. Егда узрите мерзость запустения, реченную Даниилом пророком, стоящую на месте святе, – прочитаяи да разумеет, – тогда сущии во Иудеи да бежат на горы, и иже на крове, да не сходит взяти иже в дому его, и иже на селе, да не возвратится вспять взяти риз своих. Горе же непраздным и доящим в тыя дни. Молитеся же, да не будет бегство ваше зиме, ни в суботу. Будет бо тогда скорбь велия, якова же несть была от начала мира доселе, ниже имать быти. И аще не быша прекратилися дние оны, не бы убо спаслася всяка плоть, избранных же ради прекратятся дние оны» (Мф., зач. 99).

На сия словеса Иоанн Златоуст в Беседах, и Феофилакт в Благовестнике толкуют о днех запустения Иерусалиму, еже бысть во время разорения его от римских вой, по четыредесятих летех вознесения Господня. Бяше убо тогда иудеом велия скорбь, якоже повествуют летописныя книги: обаче не о тогдашней токмо скорби иудейстей сия тако рече Господь, но и о скорби хотящей быти при антихристе. А яко тако есть, явствуется о нижеписанных свидетельств: рече Господь: «В той день, иже будет на крове, и сосуди его в дому, да не слазит взяти их, и иже на селе, такожде не возвратится вспять» и прочая (Мр., зач. 60). Т олкование Феофилакта в Благовестнике: «В той день антихристова пришествия, сыи на крове, еже есть на высоте добродетелей, да не слазит, ниже ослабеет коего ради извета житейскаго». Ниже: «И иже на селе, такожде да не возвратится вспять, но напредь простирается». Ниже: «Сия вся Матфей Иерусалиму запустения рещи Господеви рече, являя враг наитие, и яко не возвратно бегати римляном нашедшим». Ниже: «Ничтоже дивно и в запустение Иерусалиму сия быша, и хотят абие быти в пришествие антихриста, паче же и к самому тому времени скончания скорбем, и тогда хощет быти неизбежно».

Преподобный Ефрем в книге своей в слове 105-м глаголет: «Не будет бо во время то страшное, егда приидет змий, покоя на земли, но печаль велика и смущение и размешение, смерти же и глади во всех концех. Сам бо Господь рекл есть Своими усты, таковая не быша от начатка создания (Мф., зач. 99). Мы же грешницы како смирим его безчисленную ту злость, неизречена та Богови нашему именовавшу суща. Да поставит убо кождо ум свой опасно в словеса святая Господу Спасителю, како убо за беду и скорбь ту превеликую прекратит дни Своим милосердием».

Подобно и святый Кирил Иерусалимский в знамении 11-м глаголет: «Тогда сущии во Иудеи да бежат на горы. Аще кто слышится силен быти, да борется с сатаною, якоже достоит, не ослабляю бо церковных жил, и о всем да глаголет, никтоже нас разлучит от любве Божия, но страшливии да бегают, а инии да оставимся. Будет бо тогда скорбь велия, якова же не бысть от начала мира, и потом не будет (Мф., зач. 99). Но хвалю Бога, яко велию скорбь на малое время описует. Глаголет бо, избранных ради прекратятся дние тин». Ниже: «Блажен терпяи и постигни во дни 1335. Тогоже ради достоит таитися и убегати, не имут бо скончатися грады Израилевы дондеже приидет Сын человеческий. Кто же блажен? Иже Христа ради с радостию тогда мучение приимет, паче всех мучеников сицевии мне мнятся тогдашний мученицы быти. Первии бо мученики с человеки брашася, а иже при антихристе и с самим сатаною очевидно братися имут. Толкование. Тогда сущии во Иудеи да бежат на горы, иже мук не могут терпети, отрадит им Христос тогда на время убежати, да не соблазнившися или убоявшися мук вечно погибнут. А которыя постраждут доблественно, паче всех мучеников первых начальнейшими будут, иже в то время за Христа муки приимут, ибо не с простым человеком, но с самим диаволом побиются».

Святый Иоанн Богослов во Откровении глаголет: «И видех, егда (Агнец) отверзе шестую печать, и се бысть трус велии. О т толкования. И сия нецыи во обстоянии при Веспасиане царе истолковаша вся, коегождо реченных образнословивше. Нам же является прехождению зде быти от лет яже в гонениих, во время еже прежде пришествия антихристова, в нем же (сиречь времени) толиким пророчествовано бысть быти язвам, негли за еже не отрещися обучающимся в сих человеком противонаводимым от антихриста мукам (сицевым сущим), яковыя же никогдаже бывшия знахом», и прочая (Апокалипсис толковый, зач. 18).

И святый Иоанн Златоустый в Беседах пишет глаголя: «На погибель бо человеком приидет и обидети их имея, что бо не соделает тогда, вся подвигнет, вся возмутит, и повелений ради и страха, страшен бо будет отвсюду, от власти, от суровства, от законопреступных повелений» (беседа 4-я на 2-е послание к солуняном).

Святый Ипполит папа римский глаголет: «Зрите ли христолюбцы, какова скорбь во днех онех будет: якова же не бысть от сложения миру, и не имать быти». Ниже: «Тогда (антихрист) яко ангелом бесом заповесть творити повеления его со многим страхом и трепетом. Тогда послет в горы и в вертепы, и в пропасти земныя бесовския полки, во еже взыскати и изобрести скрывшияся от очию его, и тех привести на поклонение ему. И убо покаряющихся ему знаменает печатию своею. Нехотящих же того послушати томленьми и неисчетными муками лютыми и козньми изнурит, яже ниже быша, ниже слухом человеческим слышаны быша, ниже око человеческое виде. Блажени иже тогда подвигнутся на мучителя, яко вящши мученик первых и славнейши и выпили могут показатися. Мученицы бо первии того слуги победиша, сии же самого того сына погибельнаго поперут и победители будут, – которым похвалам и венцем не сподобятся от Царя нашего Исуса Христа?» Ниже: «Навыкни, и сущим во градех и в селех каково люто время и дние будут, тогда от восток на запад пойдут, и от запада даже до восток приидут, и восплачутся вельми и возрыдают крепко, и дни сияющу ожидают нощь, да почиют от трудов своих. Постигши же нощи, от частых трусов и бурей воздушных дни взыщут, да ионе узрят дневный свет. И како хотят прочее лютою смертию прейти болезненное тех житие. Восплачется тогда вся земля, восплачется солнце и луна, восплачутся тогда дивия животная со птицами. Восплачутся горы и холми и древа польская человеческаго ради рода, яко вси уклонишася от Бога, и лестьцу вероваша, приимше начертание сквернаго богоборца вместо животворящаго Креста Спасова. Восплачутжеся и церкви Божия плачем велиим, зане ни приношение, ниже кадило совершается, ниже служба богоугодная. Священныя бо церкви, яко овощное хранилище будут, и честное тело и кровь Христова во днех онех не имать явитися. Служба угаснет, чтение писаний не услышится, но тма будет на человецех, и плач на плач, и горе на горе, повергнуто будет тогда злато и сребро на местах, и никтоже возмет, ни соберет кто, но вся мерзска устроятся. Вси бо во еже бежати и скрытися тщатся, и нигдеже возмогут убежати с пути сопротивнаго, но знамение его обносяще удобь ведоми и знаеми тому явятся. Вне страх, внутрь трепет, и в нощи и во дни, по местах и в домех глад и жажда. На местах мятеж, и в домех рыдание. Увянут доброты лиц и образов. Будут бо видове человеком, яко мертвых, и лепоты женския увядятся, и желание всем человеком и похоть отбегнет».

Подобно и святый Ефрем о сем глаголет сице: «Тогда братие моя, кто обрящется верою огражден и пребывая недвижим, имый знамение в души своей единороднаго Сына Божия страшное второе пришествие. Егда узрит скорбь ту неизреченную, бывающую всюду на всякой души, не имый отнюд ниоткуду утехи ни ослабы, на земли же и в мори. Егда узрит весь мир смущен, и когождо бежаща скрытися в горах, и овых гладом умирающа, иных же жаждею истающа, яко воск, и не будет избавляющаго. И егда узрит лица слезна всем, и любовию вопрошающа: есть ли где слово Божие? – и не будет его слышати нигдеже. Кто убо понесет болезни ты? Или кто понесет скорбь ту неизреченную, егда узрит размесшася люди и грядуща от конец земли на видение мучителя, и многи покланяющася пред зверем, и вопиюща и глаголюща, яко ты еси спаситель наш. Море возмутится и земля изсшет, небо не даст дождя, сади увянут. Вси же сущии на земли восточней на запад побегнут от многаго страха, и паки сущии на западех солнечных на восток побегнут со страхом. Прием бо беззаконный область, демоны послет на вся концы земныя, яко да проповедят всем, яко царь велик явися со славою, приидите вси и видите. Кто убо имать такову душу несотрену, яко да претерпит мужески вся соблазны? Кто убо таков есть человек якоже прежде рехом вам, да вси ангелы ублажат й? Аз, о братие христолюбцы совершеннии, убояхся от самыя памяти змия того, помышляя в себе хотящая быти человеком во времена та. Тогда восплачется люте вся душа, и воздохнут горько, егда вси видят скорбь без утехи одержащую их нощь и день, и нигдеже обретают насытитися брашна, притавницы бо станут немилостиви на всяком месте. И аще кто имать на себе печать мучителеву на челе и на деснице, купит мало брашна от тех брашен обретающихся тогда. Тогда издхнут младенцы на лонех матерних, умрут же и матери верху отрочат. Тогда умрут отец и мати с чады вкупе и не будет кто погребая их, или истребляя во гробы от множества мертвых, но пометаемы на путех, и смрад всюду оскорбляя вся живыя крепко. Заутра с болезнию и воздыханием к себе глаголют, когда вечер будет, да покой улучим? Пришедшу вечеру со слезами горькими глаголют к себе, когда освенет, да належащия скорби избежим, и несть камо убежати или утаитися от скорби тоя, смутишабося всяческая море же и суша. Сего ради рече нам Господь, бдите молящеся на всяк час, да избежите от скорби. Смрад в мори, смрад на земли. Глади и труси на суши, глади и труси в мори. Страшилища по морю, страшилища по земли. Злато и сребро много, и поваплены ризы никому же на пользу будут в скорбь ту великую, но вси человецы блажити начнут погребенныя прежде пришествия великия тоя скорби на землю. Тогда злато и сребро на путех лежати имать, и не будет кто прикасался ему, яко вся мерзка быша, но вси скрытися и бежати тщатся, и нигдеже им есть избавления от скорби, но глада и жажди страх. Зверие бо и гади плотоядцы изыдут, и обретаются в нощи и во дни. Внутрь страх, а вне трепет, на путех трупия, а в домех мертвии, на цестах смрад, и в домех смрад, на цестах алчба и жажда, и в домех алкота и жажда, на цестах глас плача, и в домех глас плача: цеста же путь наричется, на путех горе, и в домех горе. Тогда кождо друг друга с плачем сретает, отец чадо и сын отца, и мати дщерь, и друг со другом на путех объемшеся падутся, и братия с братнею объемшеся и вен умрут. Увянет доброта лица всякия плоти, будут бо яко мертвы зрацы человеком, мерзка же и возненавидена красота женская, увянет всякия плоти похотение, брашну не сущу… Тогда восплачется вся земля, и море и аер: восплачутся вкупе и животная дивия со птицами: восплачутся горы и холми и древа польская: восплачутся и обе светиле небеснеи со звездами за род человеческий, яко вси уклонишася вкупе от Бога святаго, Содетеля всяческим, и лестьцу веру яша, приимше образ сквернаго богопротивника за Крест Спасов. Тогда восплачется вся земля и море, яко внезапу престанет глас пения и молитвы от уст человеческих. Восплачутся тогда церкви Христовы вся плачем великим, зане не будет службы святыя во олтарех, ни приношения» и прочая.

Показахом зде от священнаго писания о скорбех, хотящих быти на кончине мира, в пришествие антихристове: но из нынешних убо нецыи мнят быти скорбем сим токмо духовно, а не чувственно паче: и акибы всем сим уже совершившимся мысленно, а чувственно отнюд не быти помышляют. Во утверждение же сего приводят еже во Евангелии (Луки зачало 87 и Матфея зачало 102) сице Господем реченное: «Якоже бысть во дни Ноевы, ядяху и пияху, женяхуся и посягаху», и прочая: потому же будет и в день, вонь же Сын Человеческий явится. Толкование Феофилакта: «Сего ради внезапу и нечаемо Свое пришествие являет, якоже при Нои внезапу прииде потоп и потопи вся». Ниже: «Яко антихристу пришедшу безместными сластьми обложении будут человецы» (в Луке). Или: «сласти похотныя умножатся в человецех, и в напитания и браки безерамно уклонятся» (в Матфеи). «Блудницы будут, и беззакония сласти отдадятся». Ниже: «И достойно в царство лестьца процветут злая, лукавство и всякаго греха жилище, будут бо тогда человецы во всякой пищи» и прочая (в Луке).

Но опаснаго ради ведения потребно есть зде и от бесед еже на Евангелие святаго Иоанна Златоустаго воспомянути, глаголющаго сице: «Евангелие. Якоже бысть во дни Ноевы, ядуще и пиюще, женяшеся и посягающе, до негоже дне вниде Ное в ковчег и не уведеша, дондеже прииде вода и взят вся. Тако будет и пришествие Сына человеческаго. Толкование. Сия же рече, являя яко внезапу приидет и неначаянне, и множайшим в сластех живущим. Ибо Павел о сем тако глаголет, егда рекут мир и утвержение, тогда внезапу нападет на них всегубительство. И яко то будет нечаянно, являя глаголаше, якоже болезнь во чреве имущая. Како убо рече по скорби дней онех? Аще бо наслаждение тогда и мир и утвержение, якоже рече Павел: како убо глаголет, по скорби дней онех? Аще наслаждение, како скорбь? Наслаждение не чувственне пребывающим и мир. Сего бо ради не рече, егда будет мир и утвержение, нечувствие их показуя, якоже бывших при Нои, егда в таковых злых наслаждахуся. Праведнии же не тако, но в скорби и печали они пребываху. Отсюду показуется, яко антихристу пришедшу, безместныя сласти умножатся в законопреступных и своего спасения отчаявшихся. Тогда чревообъядения и козлогласования, тогда пиянство. Темже наипаче указания полагает приличествующее вещи: якоже бо ковчегу бываему не вероваху, рече, но предлежаше ковчег посреде, будущая предвозвещая злая: тако и ныне, аще и явится антихрист, по немже скончание и мучения нестерпимая, обаче пиянством злобы одержимии, ниже страх ощутят быти имущих. Темже и апостол рече, яко болезнь во чреве имущей, тако им предстанут страшная она и неизбежная» (на Матфея беседа 77).

Подобно сему и во Апостоле толковом сице сказуется: «Апостол. Егда бо рекут мир и утвержение, тогда внезапу нападет на них всегубительство: якоже и болезнь во чреве имущая, не имут избежати. Златоуст. Сим являет второе пришествие Господа нашего Исуса Христа, хотящее неначаянно приити судити живых и мертвых, еже и Христос рече: якоже бяше во днех Ноевых, ядяще и пиюще, женящеся и посягающе, дондеже вниде Ное в ковчег и не уведеша, дондеже прииде потоп и взят вся. Тако будет и пришествие Сына человеческаго. И паки, якоже болезнь во чреве имущая. Сия рече, являя яко внезапу приидет нечаянне, и множайшим питающимся и во благодеянии живущим, и вам напаствующи и не чающи приити концу, но всяко приидет. Какоже внезапу приити погибанию солнцу? Прежде приити антихристу вещахом, концу бо знамения сия, пришествию же Христову не есть тако, внезапу бо приидет, и Той воздаст комуждо по делом его. Добре же указ положи от имущия во чреве, ибо и та знамения рождению имать, дня же и часа не весть? Аще тогда мир и утвержение, како глаголет Христос: по скорби дней онех? Аще бо пища тогда, како скорбь? Пища нечувственне пребывающим и мир. Сего ради не рече, егда мир и утвержение, но егда рекут мир и утвержение, нечувствие сих показует, якоже и при Нои сущих» (Апостол толковый, зач. 271, л. 884).

Выше речеся во Евангелии, якоже при Нои внезапу прииде потоп и потопи вся, тако будет, рече, и пришествие Христово. Обаче ведети надлежит, бысть ли внезапу всем той потоп во дни Ноевы? Никакоже. Но бысть он внезапу того ради, и тем токмо, иже не прияша наказания Ноева, еже он предвозвещаше и прещаше словесы и ковчегом. Аще бы они тогда пришедше в чувство прияли его претительное наказание, то не бы было им внезапу. Тако и во время будущее, аще кто приимет наказующее священное писание, и пророческую Илии и Еноха проповедь, то сим не будет внезапу: но токмо тем будет внезапу, иже имети будут злый и жестокий и нечувствительный нрав, иже и ничему веровати не имут, ни писанию, ни пророчестей тогдашней проповеди, ниже богопопустными наказательными ранами уцеломудритися восхощут. Но будут, рече, яко фараон, паче же и сего жесточайше (Апокалипсис толковый, зач. 52): и таковым поистинне будет внезапу.

А яко потоп Ноев не бысть просто внезапу, о сем сказует Иоанн Златоустый, глаголя: «Слышасте ли вси о потопе, егда и оная прещения ради рекошася, или сбышася и быша. Сицевая и онии многая глаголаху: и в сто летех ковчегу созидаему, и древесом устрояемым, и праведному вопиющу, никтоже бе веруяй» и прочая (8-е нравоучение на 2-е послание к солуняном). И паки той же, в 1-м послании к Тимофею, в нравоучении 15-м, сказует: «Яко о потопе предречено было прежде множайшаго времени тогда». Еще же в послании к Филимону в нравоучении 3-м, и в послании к евреом в беседе 23-й сказует: «яко было тогда прещение людем прежде потопа, но они не убояшася, но и Ной посмеян и поругаем бысть тогда». И преподобный Ефрем в книзе своей в слове 8-м сказует, глаголя: «яко во дни Ноевы ядяху и пияху, женяхуся и посягаху, и купли творяху, дондеже прииде потоп и погуби вся. Дивно бо бе тогда воистину видети вещь ту страшную братия моя. Зряще дивияго живота собираема во едино место: слоны от Индии и Персиды грядуща, львы же и рыси со овцами и козами смешены, и коегождо их друг друга не вреждая. Гади и птицы пернатыя, никомуже гонящу их, грядуща, и окрест ковчега водворяеми. И се по днех довольных самому Ноеви потщавшуся уготовати ковчег, и к ним вопиющу: покайтеся, и не внимаху: ни зряще собора безсловеснаго живота, не покаяшася, да быша спасени были».

Отсюдуубо явственно показуется, яко не потопи Бог внезапу тогда водою вселенную: но прежде даже не бысть потоп о том предвозвести ковчегом и Ноем, и дождем четыредесятодневным. Такожде егда приближится время судьбы божественныя, еже разрушити и опустити града Иерусалима, и попрати всю землю иудейскую, за еже на Христа Бога оных шатание, и беззаконное убиение, и злосердое необращение, и рабов Христовых продерзое гонение и побиение. И егда пришедше в конец беззакония, и возлезше на самую громаду злобы, ею же преидоша меру отец своих, но и тогда Господь Бог, яко имеяй неисчерпаемую милости пучину и человеколюбия бездну, не хотя их погубити, но милосердствуя и приводя их к чувствительному познанию, еже к Нему обратитися, воздвиже некоего от них проповедника, яко пророка, прежде осмию лет расчленения их еже от вой римских. И той пророк вопияше безпрестанно во дни и в нощи, даже до самаго врага наития, проповедуя им хотящую быти погибель: и глаголаше: «горе, горе Иерусалиму: последи же пред убиением своим воскрича, горе и мне» (Барония Лето Господне 65).

Подобно сему и всюду видится, яко егда хощет Бог погубление наводити, предвозвещает прежде, дабы человецы в чувство пришедши спасени были, не хощет бо смерти грешных, но еже обратитися и жити: скор бо на созидание, а косен на разорение. И якоже не погуби Бог просто внезапу вселенныя потопом и Иерусалима разрушением: сице и вселенную паки не зрится, еже бы внезапу казнити кончиною. Не точию бо еже писанием ныне о сем предвозвещает нам, но и чувственно послет пророка Своя Илию и Еноха, за еже проповедати, яко уже при дверех Владычний приход, и прочая, о чем выше во главе 9-й книги сея положися. Не яви Господь дни и часа Своему второму пришествию, ниже знамения положи, обаче скончанию мира священное писание многая полагает знамения, от нихже некая и в книге сей положися. Однако в нечувствии пребывающий, о своем спасении нерадящии, не точию второе Христово пришествие, но ниже скончание поразумеют. Такови бо суть грехолюбцы и о своем спасении небрегущий, мамоне же аки богу работающий: сицевии аще и смерть узрят пред очима, но не возмогут востягнутися, ежебы не повинутися своей страсти. Сие же и ныне множицею бывает, кольми же паче тогда во оное время, егда наипаче, по святому Феофилакту, окаянный тогда человеческий род приидет во ону меру беззакония. Темже и в лепоту о таковых речеся внезапное таковое наитие. Творящим же волю Божию и всегда ожидающим Владычняго того пришествия, и готовых сущих к сретению Его, и сим не точию скончание, но и славное Христово пришествие не зрится быти внезапу. Таковым бо Сам Той Спас рекл, глаголя: «Вам дано есть разумети тайны царствия небеснаго, прочим же в притчах» (Мф., зач. 51; Лк., зач. 35).

Паки же надлежащей емлемся повести. Святии отцы Златоуст с Феофилактом сказуют: «Яко антихристу пришедшу безместными сластьми обложении будут человецы, блудницы будут и беззакония сласти отдадятся: или яко безместныя страсти умножатся в законопреступных. И яко тогда чревообъядения и козлогласования, и достойная в царство лестьца процветут злая, лукавство и всякаго греха жилище. Будут бо тогда человецы во всякой пищи». И паки той же Златоуст сказует: «Аще тогда мир и утвержение, како глаголет Христос: по скорби дней онех? Аще бо пища тогда, како скорбь? Пища нечувственне пребывающим и мир. Сего ради не рече, егда будет мир и утвержение, но егда рекут мир и утвержение, нечувственное сих показует, якоже и при Нои сущих». Зде внимательно видети надлежит, како глаголет, яко будут тогда человецы во всякой пищи. Что же паки сей рече: како глаголет Христос: по скорби дней онех? Аще бо пища тогда, како скорбь? Темже отсюду показуется, яко поистинне скорбь, а не наслаждение. А еже речено, яко тогда пища и сласти, не абие просто пищу и сласти тогда являет, но чрез пищу и сласти разумети подобает тогдашний злый человеческий нрав, и конечное нечувствие. Сице бо сказует паки сам той Златоуст, глаголя: наслаждение тогда нечувственне пребывающим, нечувствие их показуя, и о сем выше речеся.

В самой же вещи не зрится быти тогда пища или наслаждение, и похотныя сласти умножение. Аще тогда в самом действе пища, и похотныя сласти умножение, како святый Ипполит глаголет: «Тогда увянут доброты лиц и образов. Будут видове человеком, яко мертвых, и лепоты женския увядятся, и желание всем человеком и похоть отбегнет». Подобно и Ефрем святый глаголет: «Тогда увянет доброта лица всякия плоти, будут бо яко мертвы зрацы человеком, мерзка же и возненавидена красота женская, увянет всякия плоти похотение, брашну не сущу» И влепоту, внегда бо брашну не сущу, сиречь хлебу не обретающуся, тогда нужда увянути или отбегнути всякому плоти похотению. Убо отсюду яве показует тогда пищи или сластем и брашну не умножение, но конечное оскудение.

Брашно же зде глаголет не духовное, но чувственное брашно. Понеже сам той святый Ефрем о антихристе выше рекл глаголя: «Вонмите братие великую злобу зверину, ков и лукавство, яко от чрева начинает, да егда кто оскудеет брашна лишен, то понудится печать его прияти». А яко всячески сие глаголет о чувственном брашне, отсюду познавается: понеже он приведе уподобление прельстившагося в пустыни Израиля исходяща от Египта, егда чрез Валаама постави Валак жены безстудныя пред людьми, и трапезы исполни треб и жертвы пред враты. Сие же уподобление привед, потом и сия будущая рече: яко от чрева начинает, и прочая. Темже отсюду явственно показует, яко не о духовном, но о чувственном брашне сие сказует.

Тогда ли уже многая пища, или наслаждение, в таковыя богопопустныя раны, о нихже выше с начала главы сея от Апокалипсиса объявихом. Или якоже святый Ипполит сказует: «Егда небо не даст росу свою, облацы не дадят воду, земля отвержется плодов своих, море исполнится смрада, рыбы его изомрут, реки изсохнут, блата изсякнут, студенцы оскудеют, зверие на человеки востанут, скоти и четвероногая помрут, человецы от глада и жажди скончаются, отец сына объем и мати дщерь, вкупе умрут, и не будет погребающаго их: но и земля вся от телес повергнутых умерших смрада исполнится. Море же не приемля речныя струи смраду подобие возсмердится, и зловония безчисленнаго и гнуса исполнится. Тогда глад крепок по всей земли, тогда рыдание неутешно: тогда плач безмерен, тогда стонание непрестанно. Тогда ублажат человецы мертвых, глаголюще к ним: отверзите гробы ваша к приятию утомленных нас сродник ведомых. Блажени вы, яко не видесте дни сия. Блажени вы, яко жизнь сию не достигосте видети, ниже глад сей неутешимый, ниже нужду сию обдержащую душа наша». И егда вся сия будут, то кая может быти тогда сласть или пища, при таковых скорбех воистинну неизреченных. Сего ради и влепоту тем же святым Ипполитом речеся: яко тогда все земное рыдание, и плач утехи неимеяй.

Ныне же нецыи мудрствуют, аки бы сим чувственно не быти, но все сие разумеют таинственно сицевым подобием: мнят убо еже зде святым Ипполитом и прочими писании реченное: небо аки бы Церковь есть, облацы – учители церковнии, роса и вода – учение церковное, земля же – человеки, рыбы в мори – души человеческия в мире сем, иже умирают духовною смертию, зане не имуще воды живы, рекше чисты, сиречь учения благочестна.

Сие разумение аще и правдоподобно мнится быти, обаче не истинно есть. Понеже аще будут они тако разумети, то не точию от других писаний и обстоятельств, но от самех таковых разумений явственно покажется, яко о истине погрешиша. В других убо местех писания в другом разуме и вещи приемлются сия тако. Зде же у святаго Ипполита, подобно и у прочих, не имать места тако разуметися. Ибо откровенно признается сим показанием. По мнению убо таковых: земля – человеки, а море – мир сей, яве яко те же человеки. Ибо аще мысленно толковати, то море – мир не о четырех стихиях долженствует глаголати, имиже состоится мир сей: но о человецех, в мире живущих. И паки скоты и четвероногая помрут, и сие аки бы не о скотах речеся, но о человеках скотски живущих. И паки, человецы от глада и жажди скончаются. Что же убо? Мнят тии землю – человеки, рыбы – человеки, скоты – человеки: и паки самые человеки тоже человеки. Темже отсюду яве показуется, яко не справедливо сих таковое толкование, но поистинне погрешительно есть. Понеже аще бы святый Ипполит разумевал сия по духовному смыслу, то почто бы трижды нарекл человеков, рекше, чрез землю, чрез море, чрез рыбы: и по сих паки четвертое тех же человеков нарицал бы человеками, рекий, и человецы от глада скончаются. Аще ли же человеков яве называет человеками, то почто ему под другими именами тех разумевати. Темже отсюду явственно открывается, яко то святый Ипполит сказует не о духовных, но о всех чувственных, якоже о стихиях, о воде и земли, тако и о прочих вещех, сиречь о рыбах и реках, о человеках и о скотах, и четвероногих. Рече бо, и четвероногая помрут. Кто же суть сия четвероногая? Души ли человеческия? Никакоже. Что бо таковаго неистовства будет нелепейше! Но сие разумеется яве о чувственных четвероногих: подобно и о прочих всех вышереченных. Понеже убо зрится в божественном писании, яко тогда всякое сотворение превратится, склоняющися ко всеконечному потреблению. Ибо и сам той святый Ипполит мало выше в том же слове рече, яко тогда и сами стихии своего чина отвергнутся. И Апокалипсис являет тогда разрушение чина тварнаго (зач. 19). И синоксарь в Неделю мясопустную глаголет: «И тогда глад будет велик, вещем всем превращающимся, яко потребитися вмале убо всем». И еще выше речено, яко тогда злато и сребро много, и повапленныя ризы никому же на пользу будут в скорбь ту великую» (Ефрем Сирин, слово 105). О каких же сие речеся ризах, и злате и сребре? Или кто мнит, яко сие речено о духовных, сиречь, акибы злато убо есть учительское слово, такожде и сребро? Ризы же заповеди Божия и святых отец добродетели?

Отвещаем. Есть убо в писании толкуется тако о иных неких вещех, на сем же месте не возможно сице приимати, понеже разрушительно и противоборно будет и самому историческому последованию. Аще убо зде реченныя злато и сребро и повапленныя ризы положатся за словеса и заповеди Божия и за отеческия добродетели: то како рече, никому же на пользу будут? И аще заповеди Божия ныне не пользуют, кроме же тех, кто может спасен быти? Никтоже. Аще же бы никто ныне спасен не был, то не бы вселенная стояла. Аще же и о крещении зде речет кто? Но и крещение такожде есть заповедь Божия: Сам бо Господь заповеда учеником Своим глаголя: «Шедше в мир весь проповедите Евангелие всей твари, научите вся языки, крестяще их во имя Отца и Сына и Святаго Духа, учаще их блюсти вся, елика заповедях вам» (Мр., зач. 71, Мф., зач. 116). Ельма же святая Божия заповедь всем человеком в неотрочную есть пользу даже до скончания мира: убо светоявленно открывает, яко сие рече не о духовных, но о чувственных ризах, и сребре и злате, и влепоту тако речеся, не быти им ни на какую же пользу и потребу, в таковыя тогдашния скорби. И паки той же глаголет: «Тогда злато и сребро на путех лежати имать, и не будет кто прикасался ему, яко вся мерзска быша» (Ефрем Сирин, слово 105). О которых паки зде путех глаголет, о чувственных, или о духовных? Многи бо пути духовно наречени в писании видятся, от нихже нецыи суть сии: нарицается путь Христос, глаголяй «Аз есмь Путь» (Ин., зач. 47). И нарицается путь заповеди Божия, о сем пророк Давыд глаголет: «Путь заповедей Твоих текох» (Псалом 118). И в Благовестнике, <от> Матфея, зачало 21-е, путь заповеди глаголет. И паки таможе: «Путь есть новый завет» (Мр., зач. 1), и путь убо еже о Христе житие имущии (Мф., зач. 5). И во Апостоле толковом путь мира благое житие глаголет (зач. 83, л. 261). Там же глаголет: «Путь убо есть житие се от всех человек шествуем» (зач. 23, л. 72). Подобно и в Благовестнике глаголет: «путь же есть житие се» (Мф., зач. 2). Там же: «Путь же есть житие когождо: еллени бо пути лукавы имяху, сиречь житие зазорно» (Мф., зач. 89). И паки глаголет: «Пути есть души, по нихже ходит Господь» (Лк., зач. 4). Видиши ли, коликия пути мысленно нарицаются? Обаче ни ко единому же от сих приличествует оное речение, ежебы на таковых путех повержено быти могло духовное тое сребро и злато и ризы, сиречь словеса или заповеди Божия.

Нарицаются убо пути заповеди Божия, и аще сребро и злато и ризы суть заповеди, то како заповеди и паки на заповеди повергнутся.

Путь есть Христос, но и к сему оное повержение не имать пристойности, сих ради: 1) Яко Христос нарицается числом единственным, сиречь Путь, а не множественным, рекше, пути. Оное же повержение глаголет числом множественным, сиречь на путех, а не на пути. 2) Яко на тех путех глаголет, тогда трупия мертвых и смрад, алчба и жажда, горе же и глас плача: на Христе же сия быти не могут: Той бо есть Бог истинный, Бог же несть Бог мертвых, но Бог живых (Мр, зач. 55). К Нему же и смрад и алчба и жажда и прочая таковая приближитися не могут: Той бо есть Миро благовонно и Хлеб животный, и Пиво новое, Радость же и Утеха безконечная. Тому же злату и сребру повергнутися тогда глаголет на тех путех, на них же трупия и смрад, алчба и жажда, и глас плача.

Паки путие называются души и житие се настоящее. Како же и на житии и на душах положено быти может тое духовное сребро и злато и ризы таковыя? Аще убо заповеди Божия и добродетели отеческия у многих уже мерзки быша, отвержены и не действительны, обаче на оныя пути положитися им не возможно. А Ипполит святый пути называет местами, глаголя: «повергнуто будет тогда злато и сребро на местех». И паки: «На местех мятеж и в домех рыдание». Темже отсюду и сей явственно показует, яко места глаголет вне домов: и аще вне домов, то яве есть, яко тоже на путех проходящих. Святый же Ефрем пути называет цестами, что же есть цеста, сам толкует, глаголя: цеста же путь наричется. Темже от всех сих явствуется, яко сие не о духовных путех, но о чувственных речеся.

И аще пути чувственны суть, якоже и суть, то злато и сребро и повапленныя ризы неотрочно чувственно разумети достоит. А яко тако имать, сего ради наведе, сице рек, яко «вся сия мерзка быша, но вен скрытися и бежати тщатся» (Ипполит). Аще же которым мерзка быша ныне словеса и заповеди Божия и добродетели отеческия, то тин отнюд никакоже бежати тщатся: но тин паче бежати тщатся, иже сия любят и держатся, и приятна имеют. Темже откровенно показуют, яко вся сия о чувственных, а не о мысленных ризах и сребре и злате глаголется.

И паки рече: «Тогда умрут отец и мати с чады вкупе и не будет кто погребая их, или истребляя во гробы от множества мертвых, но пометаемы на путех, и смрад всюду оскорбляя вся живыя крепко. Тогда друг со другом и братия с братнею объемшеся падутся, и вен умрут» (Ефрем). И другий рече: «Тогда человецы от глада и жажди скончаются, отец сына объем и мати дщерь, вкупе умрут, и не будет погребающаго их, но и земля вся от телес повергнутых умерших смрада исполнится» (Ипполит). Глаголет зде о мертвых, обаче коею смертию умерших, душевною или телесною. Нецыи ныне о сих мудрствуют, акибы сие разумеется о умирающих душевною смертию, каковою умирают ныне вен неблагочестивии и ересем подверженнии человецы.

Обаче убо не нечестивии токмо, но и мнящийся правовернии, благих дел не творящии, и безстрашно согрешающий, душевне уже мертви суть. Но видится, яко сие зде речеся о гладе и о умирающих смертию всем общею телесною, а по духовному не имать места разуметися, понеже наведе рек, яко и земля вся от телес повергнутых умерших смрада исполнится. И не глаголет от душ, но от телес: телесный же смрад чувственный значит смрад. Темже явственно показуется, яко сия вся и чувственно сбытися тогда имут.

Или речет кто, аще сие о умирающих чувственно разумеется, то како речено: тогда вен умрут и не будет погребающаго их. Аще же вен умрут, то како паки глаголет: веровавший зверю приступят к нему, глаголюще: даждь нам ясти и пити, и аще уже вен умроша, то како просят ясти и пити? И паки инде священное писание показует, яко будут живии даже до втораго пришествия Христова.

Отвещаем. Историографы убо и прочий священнейший учители, яко о чем-либо повествующе, имеют обычай таков, и видятся, акибыуже окончавше настоящих сказаний разум, и повествующе предняя, обаче намнозе и паки обращающеся абие емлются задним: и потом шествующе к предним, предлагают словеса, имже последование бывает. Сего же в священном писании зрится безчисленное множество, яко всякому внимающему есть явленно, невнимающему же бывает се и паче невнимательно. Темже подобно и зде разумети достоит, рече бо и вей умрут, и не будет погребающаго их. Однако святый обращается и паки к задним, по некоему разсуждению, и повествуя нечто не у реченное: темже и живых паки являя и пищи просящих, не яко по умертвии их, но яко задняя повествуя, тако глаголав.

Или паки сице разумеется, убо сия речь, вей, не всюду за всех приемлется, но иногда и сице имать: вей, сиречь мнози. Якоже сия речь, мнози, не всегда за многих токмо разумеется, но иногда и за всех полагается. Сам бо Господь во Евангелии глаголет: «Се бе есть кровь Моя, яже за многи изливаема». Всем же известно есть, яко кровь Христова излияся не за многих точию, но за всех, за весь бо мир Христос распятся, и кровь Свою излия: и се мнози разумеются за всех. Тако и сия речь, вей, не просто за всех всюду, но иногда полагается токмо за многих. Зри в Благовестнике: «яко всеми, – рече, – ненавидими будете, сиречь многими» (Мф., зач. 36). И Давыд глаголет: «Всиуклонишася, вкупе неключими быша, несть творяи благостыню» (псалмы 13 и 52). И святый Иоанн Златоустый, о тогдашнем при нем времени, о непослушании божественнаго писания глаголет: «Яко слышащаго ни единаго, смеющиижеся и ругающийся вси» (Беседы апостольския, на послание к евреом нравоучение 23). Подобно и Ефрем святый в настоящем при нем времени о иноцех глаголет: «Вси прекословцы, вси гневливи, вси нагли, и вси яри: вси ризами украшени, и вси тщеславии: вси славолюбцы, и вси началолюбцы» (слово 50). Сице и зде глаголет: и вси умрут, не яко отнюд вси, но вси, сиречь мнози: нецыи же и тогда, аще убо и не многия, обаче и живии будут. И паки оба святии отцы Ипполит и Ефрем сказуют, яко «восплачутся тогда горы и холми и древа польская, и обе светиле небеснеи со звездами, человеческаго ради рода, яко вси уклонишася вкупе от Бога, и лестьцу вероваша», и прочая. Зде глаголют, яко вси уклонишася, и аще вси, то како сами же в тех своих словесех о том времени сказуют глаголюще: «Мнози убо святии елико тогда обрящутся». Ниже: «и побегнут со тщанием великим в пустыню». Ниже: «и дастся им помощь от Бога, и наставит их в места нарочита, и спасутся крыющеся в пропастех и в вертепех», и прочая. И якоже сказуют, яко вси лестьцу вероваша, но и паки показуют, яко не вси, но инии и спасутся: тако и сие речение разумети надлежит, еже и вси умрут, не понеже вси, но понеже мнози, иже «вси», зде наречены, якоже явствовася.

Но и паки противляяйся глаголет: ныне уже лежат таковыя мертвецы непогребенныя, сиречь не погребены благочестивыми священниками, но еретиками и некрещенными простолюдинами. Тем-же таковое погребение не вменяется в погребение, но пребывают таковии мертвецы яко не погребенны.

Отвещаем. Рече убо иудеом Спас глаголя: «О роде неверный и развращенный, доколе терплю вы». Подобно и зде сицевым не достоит ли рещися: «О роде развращенный, доколе развращаете о сих божественное писание! Не вы ли всегда разумеете сие речение о мертвецех, живых человецех, умирающих душевною смертию? И како паки о чувственных мертвецех приемлете?» И влепоту сие речено о чувственных: обаче ныне еще не пришло то время, еже таковым мертвым быти. Понеже и следующая словеса показуют: где убо ныне, или кая земля исполнися смрада от телес повергнутых умерших? И коего смрада? И в каковыя горбы положены нынешния мертвецы? И на каковых путех повергнуты трупия их? И кий воздух растлися и исполнися паки от тех смрада? Всем бо сим быти сказует святое писание, еже во главе сей выше положихом. И о сихубо всех явственно показуется, яко не возможно полагати сие реченное о мертвых за умирающих ныне душевною или телесною общею смертию: но яве есть, яко все сие речено о мертвецех чувственных, не ныне умирающих, но хотящих быти во дни последния, на самой кончине мира, в пришествии самого антихриста.

Еще ведети надлежит вышереченное сице: «Тогда ублажат человецы мертвых, глаголюще… блажени вы, яко жизнь сию болезненную не достигосте видети, ниже глад сей неутешимый, ниже нужду сию обдержащую душа наша». И паки: «Яко тогда молва нестерпимая на душах человеческих». И паки: «Тогда скорбь неизреченная, бывающая всюду на всякой души» (Ипполит, Соборник, гл. 8).

Речеся убо зде глад и нужда, молва и скорбь на душах человеческих: и сие ныне нецыи слышавший мнят быти едину токмо скорбь душевную, чувственной же скорби отнюд не быти помышляют, зане яко не глаголет скорби телесней, но молва и скорбь на душах человеческих. Сего ради потребно есть знати, яко в священном писании чрез душу не всегда едина душа разумеется, но начасте под именем души весь человек приемлется. И о сем в Бытии сказует, яко в седмидесяти пяти душах Иаков сниде во Египет (Быт., гл. 47), не яко снидоша едины души, но яве есть, яко вкупе и с телесами. И пророк Давыд глаголет: «Железо пройде душу его» (сиречь Иосифову). Како же может пройти железо сквозе душу? Зде разумети подобает не едину просто душу, но и с телом, рекше, всего человека окована в железа. Такожде и о пищи сказуется, акибы душа яст и пиет: яст ли убо душа хлеб чувственный? Никакоже. Однако на мнозе в писании глаголется, акибы яст, не душа убо яст хлеб чувственный, но тело питается, по сказанию 26-й главы Григория Богослова. Ельма же тело чрез душу питается, тем и глаголется, яко душа яст или пиет. Сице глаголет Давыд о израильтянах: «И искусиша Бога в сердцых своих, вопросити брашна душам своим» (псалом 77). Зде явственно есть, яко не духовнаго, но чувственнаго брашна вопросиша, обаче душам своим просиша глаголется. О сем же повествуется сице: «И роптаху людие на Бога и на Моисея рекуще: векую изведе ны из Египта, убити нас в пустыни, яко несть хлеба ни воды, и душа наша негодует о хлебе сем тщем» (Числ, гл. 21). Хлебом тщим иудее манну нарекоша. «Душа наша возненавиде хлеб сей тщетный, манну яве». И паки: «И седше плакахуся сынове израилевы, и рекоша: кто ны напитает мяс? Помянухом бо рыбы, яже ядохом в земли Египетстей туне, и смокви и дыни, и червленый лук, и чеснок, а ныне душа наша исчезает, ничтоже, токмо манна пред очима нашима». И в Евангелии недельном глаголется сице: «Душа бо не яст, по обычаю же общему глаголет се: пища бо составляет тело, в немже содержится душа. Яве убо невозможно души в телеси содержатися, аще не питается плоть. Не пецытеся о души вашей, что яст и что пиет. Яве убо есть, яко кроме души человеку питатися не возможно есть. Ибо богатый он лихоимец глаголаше к души своей: душе имаши многа блага, лежаща на лета многа, почивай, яждь, пий и веселися» (Неделя 3-я по Всех святых).

Подобно сим и в прочих местех священнаго писания начасте обретается, яко чрез душу весь человек разумеется. Темже молва и скорбь, глад и нужда на душах человеческих зде реченная: не яко на душах просто, но под именем души ко всему человеку приличествует, и разуметися может, сиречь являет, яко вся сия и по чувственному сбытися имут.

И несть убо необычно, еже тогда при духовных скорбех и чувственным, якоже речено, совершитися, понеже сия и прежде отчасти бяху. Убо чрез Моисея казни Бог Египта чувственными десятою язвами, от нихже некия подобны вышепоказаным язвам, хотящим быта напоследок, как-то: первая язва на Египет наведенная – обращение воды в кровь; вторая – жабы; третья – скнипы; четвертая – песня мухи; пятая – умертвие всему скоту; шестая – гнойныя струпы на человецех и на скотех; седьмая – град и огнь; осьмая – прузи; девятая тма, мгла и дым; и десятая – избиение первородных (книга Исход). И паки тем же Моисеом претит Бог, глаголя: «Аще не послушаете Мене, и не сотворите повелений Моих, положу небо вам аки железо, и землю вашу аки медяну, и будет вотще крепость ваша, и не даст земля ваша семени своего, и древа села вашего не дадут плода своего» и прочая (Левит, гл. 26, Второзаконие, гл. 11 и 28).

Многажды же сбысться тако и в самем искусе, яко быта небу аки железну, и земли аки медяне, еже гладу назнаменательно есть, иже и бысть преже, якоже и божественное писание сказует. Бяше убо глад чувственный седмь лет в земли ханаанстей, во дни Иакова-Израиля и Иосифа прекраснаго. И бысть глад велик при Илии пророце, тогда не бысть дождя три лета и месяц шесть: о нем же и Сам Господь свидетельствует во Евангелии (Лк., зач. 14). И еще бысть глад велик по всей вселенней при Клавдии кесаре, якоже деяния апостольская сказуют (зач. 28). И паки: мнози быша глади и моры, страси и трусы, и многоразличная от Бога наказания во многих странах и местех, якоже о сем летописцы повествуют. Темже что дивно, яко и напоследок при антихристове пришествии сим быти: не сим же точию, но и паче сих ужаснейшим скорбем тогда быти святое писание сказует, якоже отчасти выше во главе сей показахом. Аттте убо и ныне духовныя настоят скорби, много паче тогда будут: обаче с теми и чувственныя вышепоказанныя скорби неотрочно тогда сбытися имут. Ельма же таковыя скорби ныне еще не прибыша, убо светлоявленно показуется, яко антихрист не прииде в мир, ниже воцарися.

Глава 18

Знамение 12 Яко самодержавнаго царства или самовладения антихристова будет токмо три лета и шесть месяцей, таже абие разрушится вторым славным Христовым пришествием

О времени антихристова царства, колико попустит ему Бог держати время гор даго и мучительнаго самовладения, всяк чтяй и послушаяй священнаго писания может уразумети, занеже на мнозе о сем повествует и явственно сказует время его самодержавствия три лета и шесть месяцей: и яко сие число лет не в тайнем смысле, ниже в мудрости коей, но явственное количество открытно зрится. Сего ради и нам не велика есть потреба многому взысканию для сказания о сих. Но понеже ныне нецыи, а наипаче из покрещеванцев, инако о сих летах мудрствуют, и во ином некоем таинственном смысле разумеют, сиречь акибы сия три лета и пол, покровенно некако приемлются, рекше, акибы под именем сих лет многа лета разумеются: и акибы сим летом давно уже идущим: и акибы антихрист отдавнауже в мир пришед царствует. Темже и многообразие мнят антихристово в мир пришествие. Нецыи убо мудрствуют быти в мире пришествию его от времене воплощения Христова или от вознесения Его еже на небеса. Инии же помышляют быти по воплощении Христове от лет ббб, а инии разумеют от времени римскаго падения и отступления от восточныя церкве, еже бысть по тысящи лет от воплощения Христова. О чем и Апокалипсис сказует, яко по тысящи лет разрешен будет сатана от темницы своея. Прочий же обаче и мнози утверждают быти в мире пришествие антихристово от лет 1666, о сем и в Книге о вере сказуется, яко по исполнении сего числа лет подобает опасение имети, и прочая (зри во главе 5-й книги сея). Вся же сия мнения, якобы от тех времен и даже доселе царствовати антихристу, не суть достоверна, о чем покажется чрез некия непристойности, ихже во главе сей представим.

Аще убо царство антихристово и распространяется, но чрез его предотеч. Ибо списатель Книги о вере в предисловии не просте рече, но сице: «Известно ведая, яко время последнее, антихристово царство распространяется, и сам скоро явится». Видиши ли силу словес? Яко ино значит царство антихристово, чрез предотечи его бывающее, ино же царство антихристово, чрез самаго его быти имущее, ибо прирече глаголя: «и сам скоро явится». Темже и ныне чрез предотечи его царство его распространяется: самосущественне же ниже в мире когда бысть, ниже ныне царствует, якоже показася во всех вышеписанных главизнах святоотеческими сказании: подобие и ниже объявится, яко егда той самообразне воцарится, то тогдашнее самовладение его и еже при нем оскорбление не имать простертися в долготу более трех и поллета. Мнози же ныне не веруют сим тако быти: темже нужно есть, еже о сем божественным писанием объявити и святоотеческим толкованием утвердити. И во-первых на среду приведем достоверна о сем свидетеля пророка Даниила, иже показа путь неуклонен, от царствия еже при нем даже до скончания, шествовати хотящим во истины явлении. Что же той сказует в книзе своей о времени царствования антихристова? Рече убо: «Востанет царь, иже преспеет злобами вся, иже прежде его, и три цари смирит, и словеса к Вышнему соглаголет, и святыя Вышняго смирит. И помыслит пременити времена и закон. И дастся в руку его до времене, и времену, и полвремене» (Дан., гл. 7). И паки рече: «И видех аз Даниила, и се два другая стоята, един о сию страну устия реце, а другий об ону страну. И рек к мужу оболченному в багряницу (се же есть архангел Гавриил): доколе скончание, яже нарече чудеса?» Ниже: «И воздвиже десницу свою на небо, и клятся в Живущаго во веки, яко во время, и во времена, и в полвремене». И паки глаголет: «От времене пременену учащения дней тысяща двесте и девятьдесят, и прочая» (Дан., гл. 12). Еще зде представити потребно есть реченное о седминах, еже сказа Даниилу ангел глаголя: «Размысли же в словеси и разумей в явлении, седмьдесят седмиц скратишася о людех твоих, и о граде твоем святем». Ниже: «И увеси и уразумееши от исхода словесе, яко отвещати, и яко соградити Иерусалим, до Христа старейшины, седмин 7 и седмин 62». Ниже: «Град же и святое разсыплется со старейшиною грядущим». Ниже: «И разблажит завет мнозем седмина едина: в пол же седмины отъимется треба и возлияние на святый храм, омерзение и опустение, и до скончания времене, скончание дастся на опустение» (Дан., гл. 9).

Что же зде разумети достоит? О каких временах и седминах сие у пророка Даниила речено? Глаголет убо времене, и времену, и полвремене: и седмицы, и седмицу, и полседмицы. Велико ли есть время? И велика ли седмица? И что есть полвремене? И что полседмицы? Мы же, последующе святопросвещенных и богомудрых мужей толкованию, сице разумеваем: яко времена зде у пророка за явныя и определенныя лета полагаются, такожде и седмицы по седми лет вей равно числятся. Рече убо (царствовати антихристу токмо) до времене и времену, и полвремене, сиречь три лета с половиною. И паки рек: во время и во времена и в полвремене. И зде тоже три лета и шесть месяц показует: такожде и полседмицы те же полчетверта лета являют.

Или некто речет нам укоризненно, глаголя: о сих временах и седмицах, яже зде у Даниила пророка речены, никтоже может опасне и добре протолковати, разве аще кто имея, по апостолу, дух дарования и разум учения, Ветхаго же и Новаго писания в конец ведение. Вы же яко безблагодатни, темже и грубостию неведения содержими, всех сих непричастни: како можете о сих истинно разумети и толкование наводити, еже вам не возможно? Темже и толкование ваше о сих не приятно.

Отвещаем. И что убо, ныне ли настоит кая невозможность, еже бы имети кому дух благодатный? Аще ли же мы и не достойни есмы, якоже мнят, таковаго дарования, и не имеем философских и риторских учений происшествия, ниже божественнаго писания в конец ведения: но кто же таков ныне обрящется? Сего ради убо и нам или и прочим таковым, аще и не возможно добре и опасне протолковати пророческая предсказания, обаче готовому богопросвещенных святых отец толкованию возможно есть добре и не сумненне последовати, со всяцем известием и надеждою, еже не наше есть, но тех таковое сказание: темже и верно и всякаго приятия достойно, егоже и ведети нужно, емуже и последовати долженствует неотрочно: «Аще бо тех не вемы, ихже ведети не возможно, без вины будем: аще ли ко уведению удобных не вемы, последнюю казнь постраждем» (Апостол толковый, зач. 245, л. 830).

Посмотрим же и на оных разумение. Истинствует ли таковое тех мудрование, иже в вышереченных временах и седмицах мнят быти многая некая лета безвестная и числом необявленная, и всячески неопределенная.

Таковии считают сии седмицы от времене пророка Даниила до скончания мира, и полагают седмиц 69 до Христова воплощения: вси же сии 69 седмиц по седми лет разумеют, а седмьдесятую седмицу помышляют быти под некаким неопределенным временем, или неуставным лет числом, сиречь, акибы тая седмица идет от воплощения Христова и даже до Его втораго пришествия. А инии паки инако о сих седмицах мудрствуют, и изчисляют в них лета многообразным счетом: ов убо сице, ов же инако, един другаго предваряюще и аки сокровенную мудрость и тайну открывающе, о чем и кичливством надымающеся, чрезмерно прочих уничижают, аки не достизающих зде сокровенной мудрости. Обаче они с таковым мудрованием не точию святопросвещенных мужей толкованию, но и сами к себе дышут несогласием. Вси же они того ради лета сия тако исчисляют, яко да покажут, акибы давно уже самый той антихрист царствует свое ему время, реченную седмицу или полседмицы.

Обаче резонно явствуется, яко не истинно есть таковое их мудрование, занеже не сходно святоотеческим сказаниям, якоже ниже объявится, и не точию не сходно, но и противно зрится быти: аще же противно есть, яве, яко и лживо есть, и отвержено быти достоит. Понеже святии отцы не тако, но инако о сих временах и седмицах разумеюще сказуют, имже и всяк последовати незазорно должен есть. Зане в них не бысть некое плотьское лживое мудрование, но Духа Святаго действие, по слову апостольскому, яко «всяко пророчество книжное по своему сказанию не бывает, но от Святаго Духа просвещаеми глаголаша святии Божии человецы» (2 Петр., зач. 66). И якоже убо святии пророцы и прежний святии мужие Духом Святым о сих предглаголаша, такожде и святии отцы, иже послежде бывший, темже Духом Святым протолковаша тех глаголы богодухновенныя. И кто не безумен будет, иже оставит известное и светлоглаголанное святоотеческое сказание, вместо же тех приводити будет свое суемудренное мнение? Но святии отцы толкуют о сих временах и седмицах сице: Святый Кирил Иерусалимский о антихристе и о скорбех при нем быти хотящих глаголет: «Хвалю Бога, яко велию скорбь на малое время описует. Глаголет бо, избранных ради прекратятся дние тии. Будет же антихристова царства токмо полчетверта лета. Не пророчествую же, но от пророка Даниила глаголю, тако пишет: дастся в руку его до времене, и времени, и полвремене. Время есть год един, возрастет пришествие его. А два времени, другая лета злобы его, и тако суть три лета. А полвремене есть шесть месяц. И паки на ином месте тойже Даниил глаголет: и закляся Живым его во веки, яко во время и во времена и в полвремене беду имети нецыи имут, и прочая дней тысяща двести девятьдесят» (Книга Кирилова, знамение 11). Видиши ли, яко зде Кирил святый все вышереченныя у Даниила пророка три стиха под единым разумом быти протолкова. Во всех бо ясно и зело откровенно разумея, сказует три лета и шесть месяц, а неопределенных некаких лет ниже помысли воспомянути, якоже зрится, и что сего толкования яснейше?

О седмицах же инаго сказания во святом писании не видится, разве то едино, яко сии седмицы уже совершишася при первом на землю Христове пришествии и при Иерусалимском разрушении. Вей бо церковнии учителие отцы святии тако сказуют, и единомудренно во всякой седмице по седми лет разумеют, а таинственнаго некоего числа лет отнюд не поминают. О сем в Маргарите в третием слове на иудеи святый Иоанн Златоустый пишет, и во всех 69 седмицах исчисляет лета, и не прилагает некаких неопределенных лет, но полагает предел и явственное количество всего 483 лета, считает сия от царства царя Артаксеркса, от обновления Иерусалима, и оканчивает их на разорение и опустение паки Иерусалимово, еже и бысть при Тите и Веспасиане царех римских, по четыредесятех летех вознесения Христова. И куюждо седмицу не считает неуставным числом, но уреченно сказует по седми лет в седмице, глаголя: «Седмица бо не днем глаголется, ниже месяцем, но седмица летом».

В книге пророка Даниила сказуется седмиц 7 и седмиц 62, и тако суть седмиц 69, а седмьдесятую седмицу едину от прочих отделив, глаголет: «И разблажит завет мнозем седмина едина: в пол же седмины отъимется треба, и возлияние на святый храм, омерзение и опустение, и до скончания времен, скончание дастся на опустение» (Дан., гл. 9). Отделив убо от прочих сию едину седмицу того ради, яко в сию седмьдесятую седмицу назнамена Иерусалима разрушение, еже и бысть. В сию бо седмицу разорися Иерусалим от римских воев, и жертва отъяся, и тогдашнее святое опустошися на вечное омерзение и опустение. Тако бо святый Иоанн Златоустый сии седмицы от обновления града Иерусалима числя, снисходя к разрушению его зрится, глаголя: «Внегда бо рече воздвигнется град Иерусалим и свой восприимет образ, от онаго 70 седмиц сочти и узриши распленение се, не ктому конец имущее» (Маргарит, слово 3-е на иудеи).

Зельная бо тогда бяше скорбь иудеом, о ней и Даниил прорече, и сам Христос во Евангелии предсказа, глаголя: «Егдаузрите обстоим Иерусалим вой, тогда разумейте, яко приближися запустение ему». Ниже: «Горе имущим во утробе, и доящим в тыя дни. Будет бо беда велика на земли, и гнев на людех сих, и падут в острии меча, и пленени будут во вся языки, и Иерусалим будет попираем языки, дондеже скончаются времена язык» (Лк., зач. 106). И паки глаголет: «Будет бо тогда скорбь велия, якова же не бысть от начала мира доселе, ниже имать быти». На сие место толкование творяще, святый Иоанн Златоустый в беседах, и Феофилакт в Благовестнике сказуют о иудеех, яко скорбь и беда нестерпимая бяше им тогда, егда Иерусалим и вся Иудея распленяшеся.

Сия же скорбь иудейская бысть аки прообразование оной скорби, во дни антихристова пришествия быти хотящей: которая не в частней токмо земле иудейстей имать быти, но во всей вселенней. Понеже егда Христос глагола учеником Своим о запустении Иерусалима, и абие внезапно преходит на запустение вселенныя. Темже и святый Феофилакт в конце толкования на зачало сие сказует глаголя: «Всяко сие обще можется разумети, во время скончания мира и запустения Иерусалима по нестроению реку, и ратей и прочим» (Благовестник, от Луки зач. 105). Ниже: «Рек бо, счетовает о скончании словеса и о запустении». И выше рече: «Ничтоже дивно и в запустении Иерусалима сия быша, и хотят абие быти в пришествие антихристово, паче же и к самому тому времене скончания скорбем, и тогда хощет быти неизбежно» (там же, зач. 107). Зде Феофилакт святый яве открывает, яко во Евангелии еже рече Господь о скорбех хотящих быти, то не просте рещи Ему являет, но сугубым разумом, сиречь то рекл есть о скорби еврейстей, яже и бысть во свое время при разрушении Иерусалима, и о скорби хотящей быти при антихристове пришествии в скончание мира.

Подобообразне убо и у Даниила пророка отделена от прочих зрится едина седмица, негли тогожде ради, яко имеет сугубый разум, сиречь, яко и бысть уже во оную седмицу иудеом распленение, и жертвы разрушение, конечное опустение, велия же и нестерпимая скорбь. Такожде и на последнее время имать быти, таковая едина седмица скорби преисполненная, не яко иудеом, но всей вселенней. Однако не сице являет, якобы вей 70 седмин имеют сугубый разум, но токмо едина седмина, а не вей. Темже святии отцы и во свидетельство приводят пророка Даниила, и едину седмицу таковую описуют, хотящую быти напоследок, а прочих седмиц не считают порядка единыя по единой, но просто едину быти сказуют, ейже и количество времени определенное явственно открывают. Святый Ипполит глаголет: «Якоже рече о сем Даниил провещав, глаголет бо, завет завещаю седмицы единыя, и в полседмицы возмется моя жертва и жрение, едину бо седмицу седмих лет назнаменает, яже убо на последок будет, и убо полседмицы возмут оба пророка со Иоанном… сиречь дней 1260». Ниже: «Даниилу убо рекшу, седмицы единыя поставлю завет Мой, седмь лет показа: в полседмицы проповедати пророком, и в полседмицы, сиречь в триех летех и пол, царствует антихрист на земли, и посем возмется царство его и слава» (Соборник, гл. 8).

Сие сказание святаго Ипполита о седмице единей испытне и внимательне примечати подобает, понеже зде явственно показуется не истинно быти вышереченное мудрование покрещеванцев о сей седмице, явствует же сими треми посредствами. 1) Яко не глаголет святый Ипполит, акибы сия седмица идет от воплощения Христова, но глаголет убо, яже напоследок будет. 2) Яко не умудряется неким премудрым или таинственным счетом разумети оную седмицу, но абие просто глаголет седмь лет быти, а полседмицы, дней 1260 сказует. 3) Яко не предает многое некое время антихристу царствовати, но просте сказует полседмицы, или дней 1260.

Святый Иоанн Богослов во Откровении во главе 13 сказует: «И даны быша ему (антихристу) уста глаголюща велика и хульна. И дана бысть ему область творити месяц четыредесять два». Толкование. «По оставлению Божию полчетверта лета сотворит антихрист, губя и прельщая бывающими от него лживыми чудесы и привидении». И паки во главе 12-й глаголет: «Жена бежа в пустыню, идеже име место уготовано от Бога, да тамо питается дний 1260». Толкование. «Пустыня есть отпущение злобы и нетления, в нюже вложишася святии и избраннии, жития сего избегнут небрегуще ни о чемже, или в пустыню горскую бежат, скрытися от лица антихристова полчетверта лета, якоже первее мученицы деяху». И якоже прочий святии отцы о сем разумеют, тако и святый Андрей Кесарийский, на Апокалипсис толкование творя, на месяцы сия не издаде некоего таинственнаго неопределеннаго времени, но абие по числу 42 месяцей определяет явственное и верное число – полчетверта лета.

В Большом Катихизисе во главе 23-й пишет: «Знамение 17-е. Потом приидет антихрист, имать же царствовати три лета и месец шесть, и чудеса мечтанием и лжею и волхвованием творити, и тогда будет велие гонение, и лютое мучение» и прочая. Подобно сему и святый Кирил Иерусалимский глаголет: «И антихрист полчетверта лета тако будет люто царствовати». На сие место церковный учитель Стефан Зизаний, толкование творя, не сказует некоего числа неуставнаго, но тожде самое сказует, полчетверта лета ему пребыти. О сем зри в Книге Кириловой знамение 9-е.

Что же ныне рещи о таковых, иже сверх толкования святых отец наводят о сих некое иносказательное, или истее рещи, своемнительное толкование: святоотеческое же явственное сказание относят на иный разум, егоже святии отцы не предаша: тем не явно ли творят святому писанию противоборство? Ей, и всякому явленно и известно, яко тако есть. Понеже зде в толкованиях несть никоего сокровеннаго разума, но всячески явственно святии отцы открывают, и время урочно уставляют, три лета и шесть месяцей. Святый Иоанн Златоустый в Толковом Апостоле сказуя о краткости времени антихристова царствия, приводит во свидетельство Даниила пророка, глаголя: «Он же (антихрист) не тако долго пребудет, якоже еретицы показуют на пастырех церковных, но токмо толико дней, якоже выше от Даниила речеся. И сие же явственнейши время извести, сиречь три лета и шесть месяцей, понеже писание час лето тамо нарицает. Иоанн святый такожде четыредесят и два месяца полагает» (Апостол толковый, зач. 150).

Превращающий же святоотеческая о сих сказания, и на сем месте изобретают часть утвердити своеумышленное некое мнение, глаголюще: Сии три лета и шесть месяц не суть тако просто толико лет, глаголет бо, понеже писание час лето тамо нарицает. Темже отсюду яве показуются некая сокровенная лета под часами разумеваемая.

ОБЛИЧЕНИЕ. Вопросим таковых, аще под часами некая сокровенная лета по них разумеются: то да протолкуют яве, како разумеются? Что есть оный час? И какое лето? И где тамо? И кто нарицает? То уже видится, яко таковии своим мнением не возмогут по последованию сих речений справедливаго навести толкования, но разве нестройное, противоборное же и развращенное: понеже убо как можно в часы положити сии полчетверта лета, будет бо времени зело мало, сиречь токмо три часа с половиною. Или паки и то будет не пристойно, еже бы положити часы за лета, сиречь в трех летех с половиною обретающихся будет бо лет безмерно много, яко ниже все время от создания мира и до скончания его в число сие достанет, ибо и во едином году обретается часов больши нежели полдевяти тысящи, а именно 8766. Темже сицевым мудрованием исчисляющии оная лета не обрящут тихаго пристанища истинности, но яко при бури в морских волнах недоведения влаятися будут.

Мнози глаголют, час лето тамо нарицает, но зрятся по вышесказанных, и показатися хотящих, яко о еже глаголют, того и сами со опаством не знают. Того ради со вниманием подробно разсмотрети достоит, яко что Златоуст глаголет: «понеже писание час лето тамо нарицает». Зде взыскати потребно, чесо ради не глаголет сице: «тогда нарицает», но «тамо». Ино бо есть кто, и ино тогда, и паки ино тамо. Разность же в сих такова есть: кто – сиречь сей, или той: тогда – сиречь в кое время: тамо – сиречь на коем месте. Зде же святый не глаголет, яко тогда нарицает, рекше, акибы в то время антихристова пришествия. Но глаголет: «тамо нарицает»: где тамо? И кий час? И кое лето? И кто тако нарицает? Обаче сам той Златоуст сказует, кто нарицает: глаголет бо, писание нарицает. Кое писание? И глаголет тамо: и где тамо? В коей книге и в коем месте? Но видительно есть, яко тамо нарицает, сиречь в книге пророчества Даниилова. Понеже той мало выше помянув Даниила пророка, и в свидетельство его представи. Темже яве есть, яко туда и отсылает в его писание, сиречь, акибы в его писании час лето нарицается. Обаче в книге пророка Даниила несть таковаго нарицания: час – лето. Но знати потребно есть, аще бо и несть в его книге таковаго нарицания: час – лето, но разум той всячески обретается, иже есть сицев: у Даниила пророка лета убо не летами нарицаются, но временами, глаголет бо: время и времену, и полвремене (глава 7 и 12). Сия же у него нарицаемыя времена святии отцы летами нарицают. Ибо еже у него нарицается время, они же то толкующе нарицают лето или год, якоже выше объявихом. Подобно и в прочих книгах, аще кто внимательно чтет, той разумеет, яко на мнозе обретаются некая времена сугубоименная, и друга друзей придержащаяся, яже нарицаются сице: час – година, година – год, год – лето, лето – время: и паки, время – час. Или подобно сице, еже и приличнейши, время – лето, лето – год, год – година, година – час: и паки, час – время или лето, сиречь час – лето. А особенно сие доказывается от Апокалипсиса, глаголет бо Иоанн Богослов тако: «И десять рогов, ихже видел еси, десять царей есть, иже не у царство прияша, но область яко царие на един час приимут со зверем. Толкование. И десять же рогов и Даниил виде, предваряющих антихриста: из нихже три искореняяй, прочия покорит проклятый. Един же час или краткое лета глаголет, или един час годища, сиречь обращение солнечное, еже есть тремесячие» (Апокалипсис толковый печатный, гл. 17, зач. 54). Темже и Златоуст глаголет час – лето, еже есть оное у Даниила пророка реченное время.

Содержание же разумное в тех словесех просто речется сице: понеже писание тое еже у пророка Даниила реченное время лето нарицает, сиречь под именем времени там лето разумеется, якоже выше святый Кирил протолкова. Тако подобно и Златоуст тожде предает, у Даниила реченная времена, именем часов нарекши, явственнейше три лета и шесть месяцей извести: и Иоанна Богослова во Апокалипсисе пишуща в верное свидетельство приведе, глаголя: «И Иоанн святый такожде 42 месяца полагает».

Видиши ли, не всячески ли зде всеконечно открывается истинословное святоотеческое разумение, и согласное о сих сказание, яко вей единомудренно три лета и шесть месяц антихристу царствовати ясно показуют, един по другом толкование творяще, не предают некоего времени лет числа сокровеннаго (якоже ныне нецыи мудрствуют). Аще бы то было сокровенно, то чесо ради они о таковом покровении не упоминают, но явственно сказуют. А понеже не упоминают, яве есть, яко несть покровения: сего ради и в толкованиях тожде сказуют три лета и шесть месяц. И не летами точию и месяцами, но даже и числом дней явственно показуют. Ельма же оных самомнительно не сице разумеющих мудрование, яко несогласное святым отцем, яко противное священному писанию, всячески не достоверно есть: темже от имущих ум и отриновенно долженствует быти. Иже бо тако разумеюще утверждают, а сами вконец не разумеют, что утверждают. Не о таковых ли убо апостол глаголет: «Нецыиуклонишася в безумная словеса, хотяще быти законоучители, не разумеюще ни яже глаголют, ни о нихже утверждаются» (зачало 278).

Понеже убо явственно сказаниями святых отец показуется оное краткое время свойственнообразнаго царствования антихристова. Аще же хотя и многоразньственне святии отцы о сем предглаголют, обаче, якоже зрится, все тое разньство единомудренне во един разум соглашают: овогда бо глаголют полседмицы, овогдаже три лета и пол, или полчетверта лета, или три лета и шесть месяц, иногда же 42 месяца, и другое дней 1260, или паки мало что к сим: обаче вей единомудренно являют три года и шесть месяц. И токмо святый Никифор Каллист сказует, якобы антихрист всю оную седмицу, рекше седмь лет, царствовати будет (синоксарь Недели мясопустныя и Книга о Вере, гл. 30). Обаче и сицевое его сказание может свестися в тойже вышереченных святых отец разум таковым подобием: ибо может быти, яко в первую половину оныя седмицы, мало еще и по тиху возобладати начнет, в ней же и пророцы Илия и Енох ему противостанут. В другую же половину седмицы, уже по убиении сих пророков, покажет всю свою силу и мучительство. И тако седмь вкупе, и полчетверта лета разуметися будут по святому Никифору. Но видится, яко и сей не продолжает времени, но кратко быти являет, темже и глаголет: «Умалятжеся седмь лет онех ради избранных». И святый Ипполит глаголет: «Ниже тогда благоутробныи и человеколюбивый Бог оставит род человечь неутешим, но сократит дни оны» (Соборник, гл. 8). Также и преподобный Ефрем пишет: «Да поставит убо кождо ум свой опасно в словеса святая Господу Спасителю, како убо за беду и скорбь ту превеликую прекратит дни Своим милосердием». Святый же Кирил Иерусалимский Самого Бога с похвалою в верное свидетельство приводит, глаголя: «Но хвалю Бога, яко велию скорбь на малое время описует. Глаголет бо, избранных ради прекратятся дние тии» (знамение 11). И святый Иоанн Златоустый глаголет: «И абие (рече Господь) по скорби дний тех солнце померкнет. Кую скорбь глаголет дний тех? Антихриста и лжепророков. Скорбь бо тогда будет велика, толиким сущим прельщающим: но не прострется в долготу времени. Аще бо иудейская брань избранных ради прекратися, много паче сие искушение скратится тех ради самех. Сего ради не рече – по скорби» и прочая (на Матфея беседа 76). И в Книге о правой вере во главе 30-й глаголет: «Блажен обрящется той, иже тогда не соблазнится, и претерпит таковую лютость гонения. И аще бы Господь Бог не прекратил оных дней, не бы убо спаслася всяка плоть, избранных же ради прекратятся». Подобно сим и инии святии отцы сказуют, яко оное при антихристе искушение не имать продолжитися, но прекратит Господь Своим милосердием.

От всех же вышереченных писаний, пророческих и апостольских предречений и святоотеческих сказаний явственно познавается и открытно показуется, антихристова царствования быти токмо полчетверта лета, в последнее время, во оной реченной седмице, на кончине мира. Сии же полчетверта лета явственно есть, яко чтутся по чувственному кругообращению солнечному, рочнаго летняго обычая, а не некая неопределенная лета, акибы идуща от воплощения Христова, или от римскаго падения, или от лет 1666, и акибы по тех оттоле царствует антихрист. Аще ли же оттоле уже царствует антихрист, то како сбудется вышереченное писание глаголющее: прекратятся дние тии избранных ради? И аще оттогда он царствует, то где дней прекращение? Многия бо от тех времен доселе роды проидоша, и прекращения несть. Аще и от лет 1666 царствует антихрист, но от тех до настоящих ныне времен два столетия пройде. И кое зде прекращение дней скорбных? Никоеже. Ибо кто родися в сих летех, и прежив жизнь свою скончася: однако не прекратишася когда дние скорби сея, и доселе не прекращаются. Аще ли же от воплощения Христова, или от римскаго падения полагати, то наипаче отнюд никоеже будет дней прекращение мнящейся настоящей скорби сей. Многия бо в сих временех роды быша и скончашася, дние же скорби сей и еще не прекратишася. Темже явственно есть, яко вся сия краткость времени речеся святым писанием, не о прошедших летех и скорбех, ниже о настоящих ныне, но о хотящих быти во свое время на скончание мира сего. Аще же сия тако суть, якоже и суть: убо и сие знамение показует, яко антихрист самосущественне не прииде в мир, ниже воцарися.

Всеми же сими священными писании, святоотеческим любомудрием и сказанием, и светлоявленным толкованием, вышеположенными доказательствы, и реченными посредствы и обстоятельствы ясно осиявается, и всеконечно открывается, яко чувственно хощет быти в мире антихристово пришествие, и яко не истинно есть мудрование утверждающих мысленное бытие его, и во многих неопределенных неких летех разумевающих царствование его, иже и прочим всем действом при нем быти хотящим, таинственно совершитися наменивше, и тому тако быти возмневше, емуже ныне не у пришло время. Егда же убо то время, в не же сему быти, приспеет, тогда все сие сбудется на самом искусе, якоже апостол глаголет: «Тогда явится беззаконный, егоже Господь Исус убиет духом уст Своих, и упразднит явлением пришествия Своего. И тогда отъимется царство прелестника антихриста вскоре, и прочее в мгновение ока прейдет образ мира сего» (беседа на 2-е послание солуняном, зачало 275-е, и слово Ипполита в Большом соборнике). И тогда праведный Судия Господь наш Исус Христос воздаст комуждо по делом его: праведным убо жизнь вечную во славе неисповедимей, грешным же томление и муку безконечную в посрамлении неизреченнем, еяже, о, дабы избавил нас по своей благости Небесный Царь! Емуже слава и держава, честь и поклонение ныне и во вся безконечныя веки, аминь.

Надсловие книги сея

Сия книга о антихристе, показующая чувственное его пришествие, хотящее быти на кончине мира сего: и во утверждение таковаго разумения предлагает 12 знамений, в них же на священное о сем писание обретается светлоявленное святоотеческое толкование, паче же Самого Бога духновение.

Темже убо, благочестивый читателю, да не соблазнит тя своемненное неких о сем размышление, сице глаголющих: «Не возможно есть антихристу чувственно быти: ибо аще бы чувственно приити тому надлежало, то како речено, яко мечтательну плоть приимет? И аще мечтательну, то како человек быти может? Но аще и человек будет и царем чувственным три лета и шесть месяцей, то како в таковое краткое время проповедатися ему, прельстити же и возобладати толь великим всего мира царствием? Да и начто же ныне таковому проповедатися в мире, понеже вмале уже не весь мир прельщен и соблазнен, и во всяком нечестии заблужден погибает? И паки: аще чувственно приидут на землю пророцы Илия и Енох обращати человеков от нечестия, и еже бы не веровали антихристу: то паки в толико краткое время, сиречь в три лета с половиною, как можно двум или трием человеком проповедати благоверие во всю вселенную, толиким пространством одержимую? Аще же сия вся чувственно будут, то и второе Христово пришествие могло бы от человек познатися, егоже Господь никому не сказа, дня же и часа того явити не изволи».

Сия же и прочая подобная сим таковии мудрствуют и глаголют, чрез которая антихристово и пророков Илии и Еноха пришествие, и прочих действ сбытие хотящее быти, тогда в нечувственное обращают. Ты же аще будеши о сих истиннолюбно священное писание разсуждать и безпристрастно толковать, и внимательно разсматривать, и смиренномудренно с Божиею помощию испытовать, то обрящеши, яко сия всячески станут и в чувственном смысле, якоже антихристово, тако и пророков пришествие, и прочая при них быти изъявленная действа. Сия же тя да не соблажняет, ниже невозможностию коею да покрывает. Веруй божественному писанию, егоже и в книге сей отчати собрахом, яко неотрочно по сему будет и будет. Понеже «не изнеможет от Бога всяк глагол», по речению ангелову. И «невозможная от человек, возможна суть от Бога». И Богу хотящу удобь совершаются преславная. И идеже хощет Бог, тамо побеждается естества чин.

Нам же на вся вышереченных оных смышления и противоглагольная речения, аще чинить пространная ответословия и божественным писанием возражения, то сия книжица всячески обтяжется величеством и многословием. Аще же и при чувственной трапезе многая брашна и пресыщения враг сладости бывает: сице подобно и при духовной трапезе священнаго писания бывати обыче: ибо зело пространная беседа и долговременное разглагольствие, и многословное повествование духовную сладость многим многажды не столь приятну приносит. Темже и мы малейшую сию скративше книгу, яко истинно кого спастися хотящаго вразумити могущу: понеже имеет она священное писание богоносных отец любомудрым сказанием протолковано и изъяснено. По немуже мы последующе зде вчинихом, имже и вышереченная действа чувственно быти имущая изъявихом. Прочее неизмеримую бездну судеб Божиих своим малоумием мерити не дерзаем, слышавше глаголющаго: «О глубина богатства и премудрости и разума Божия, яко не испытани судове Его, и не изследовани путие Его. Кто разуме ум Господень? Или кто советник Ему бысть» (Апостол, зач. 107).

Точию о сем извещаваемся, яко яже бывают и яже быти имут, вся на полезная нам от Бога устрояются. Темже убо со оным неисчетным небесным народом должни есмы и мы сице воспевати: «Спасение и слава и честь и сила Господу Богу нашему, яко истинни и праведни суди Его» (Апокалипсис, гл. 19), всегда и ныне и присно и во веки веком аминь.

Оглавление

Предисловие

Глава 1

  Начало книги сей и изъявление, что есть речь сия «антихрист»

Глава 2

  Сказание, что есть антихрист, и кто сей будет

Глава 3

  О антихристе, о еже како мнози антихристи, и како суть един антихрист

Глава 4

  О рождении антихристове, и о бытиях чувственных, писанных же во иносказательном таинственном разуме

Глава 5

  О имени зверине, сирень антихристове

Глава 6

  Сказание о последней године, и о последнем часе

Глава 7

  О знамениях являющих антихристово пришествие

  Знамение 1 Разрушение и кончина царства, или самовладения римскаго, и самаго того града Рима опустение

Глава 8

  Знамение 2 Востанут лжехристи и лжепророцы, и яко со антихристом вкупе приидет некий чудный лжепророк по образу Крестителя Иоанна

Глава 9

  Знамение 3 Чувственное во плоти пришествие Еноха и Илии пророков, во обличение антихристу, во обращение же и утверждение человеком

Глава 10

  Знамение 4 Изменение жития еврейскаго: овии бо веровавше Христу в крещение обратятся Илиею и Енохом, овии же ко антихристу, егоже они аки Христа ожидают, и тогда приимут его, егда приидет, якоже сказа Христос

Глава 11

  Знамение 5 Чудеса хотящая быти тогда Енохом и Илиею скорбию размешена

Глава 12

  Знамение 6 Яко той антихрист царем и богом прозовется и покажется, понеже дивная чудеса в мечтании содеет

Глава 13

  Знамение 7 Яко не инде где, но во Иерусалиме граде престол антихристов имать быти

Глава 14

  Знамение 8 Убиение Еноха и Илии пророков, и паки воскресение их

Глава 15

  Знамение 9 Яко тогда станет мерзость запустения на месте святе

Глава 16

  Знамение 10 Яко тогда антихрист поклоньшихся ему запечатлеет своею печатию, имущею число 666

Глава 17

  Знамение 11 Яко тогда антихрист воздвигнет велие гонение и мучение, и неизреченны тогда будут скорби, яковы же не бывали от сложения мира

Глава 18

  Знамение 12 Яко самодержавнаго царства или самовладения антихристова будет токмо три лета и шесть месяцей, таже абие разрушится вторым славным Христовым пришествием

Надсловие книги сея Fueled by Johannes Gensfleisch zur Laden zum Gutenberg