Тебе, Мати Бога нашего, хвалим (Богородичные сотницы)
Рекомендовано к публикации Издательским Советом Русской Православной Церкви ИС 12-208-0651
Сотница первая
1. Богородице Дево, радуйся, Благодатная Марие, Господь с Тобою: благословенна Ты в женах и благословен Плод чрева Твоего, яко Спаса родила еси душ наших.
2. Радуйся, Благодатная, яко еще древле о Тебе рече Бог, яко Семя Твое сотрет главу змия – Сын Твой сокрушит диавола, проклятие и смерть. И ныне Тя, Богородицу, упразднившую державу змия древнего, сиречь диавола, и в мир введшую бессмертие, непрестанно величаем.
3. Радуйся, Благодатная, и, Исаие, ликуй, Дева име во чреве, и роди Сына Еммануила, Бога же и Человека, Восток имя Ему; Егоже величающе, Деву ублажаем.
4. Рождество Твое, Богородице Дево, радость возвести всей вселенней: из Тебе бо возсия Солнце правды Христос Бог наш и разрушив клятву, даде благословение, и упразднив смерть, дарова нам живот вечный.
5. Высшую небес и Чистшую светлостей солнечных, избавльшую нас от клятвы, Владычицу мира песньми почтим.
6. Всяк земнородный да взыграется духом просвещаем, да торжествует же безплотных умов естество, почитающе священное торжество Богоматере, и да вопиет: радуйся, Всеблаженная Богородице, Чистая Приснодево.
7. Радуйся, Богородице Дево, радуйся, Похвало всея вселенныя, радуйся, Пречистая Мати Божия Благословенная, Юже вся тварь Божественными песньми величает.
8. Радуйся, величие Ангелов и человеков, светлое блистание Святаго Духа, Царица небеси и земли, на Небесех благословенная и на земли славословимая. Радуйся, Невесто Неневестная.
9. На Синайстей горе виде Тя в купине Моисей, неопально огнь Божества заченшую во чреве: Даниил же Тя виде гору несекомую, жезл прозябший, Исаиа взываше, от корене Давидова, и лествицу одушевленную, юже Иаков виде, и дверь небесную, Тебе виденную Иезекиилем пророком, еюже никтоже пройде, токмо Един Христос Бог наш. Тем веселящеся Тя, Марие Славная, достойно славим, величаем, православных Похвало.
10. Радуйся, Дево, яко купина неопалимая, та бо не сгораше опаляема, тако Дева родила еси и Дева пребыла еси нетленною, Приснодево.
11. Гору Тя, благодатию Божиею приосененную, прозорливыма Аввакум усмотрив очима, из Неяже изыти, провозглашаше, Святый, во спасение наше и обновление.
12. Кто Тебе не ублажит, Пресвятая Дево; кто ли не воспоет Твоего Пречистаго Рождества; небесная поют Тя, Марие Богоневестная, и язык всяк православных похваляет, и блажит, и славословит преславное Рождество Твое.
13. Величаем Тя, Пресвятая Дево, и чтим святых Твоих родителей, и всеславное славим Рождество Твое.
14. Радуйся, Благодатная, поем Ти и величаем Тя, Пресвятая Дева, и чтим еже в храм Господень вхождение Твое. Велий Господь и хвален зело, во граде Бога нашего, в горе Святей Его. Освятил есть Селение Свое Вышний. Святыня и великолепие во святиле Его. Свят храм Твой, дивен в правде. Сия врата Господня, праведнии выйдут в ня. Предста Царица одесную Тебе, в ризах позлащенных одеяна преиспещрена. Лицу Твоему помолятся богатии людстии. Вся слава Дщери Царевы внутрь.
15. Радуйся, Благодатная, Пречистый Храм Спасов, многоценный чертог и Дева, священное сокровище славы Божия днесь вводится в дом Господень,
Благодать совводящи, яже в Дусе Божественном, Юже воспевают Ангели Божии. Сия есть Селение небесное.
16. Днесь благоволения Божия предображение и человеков спасение проповедание, в храме Божии ясно Дева является и Христа всем предвозвещает, Той и мы велегласно возопиим: радуйся, смотрения Зиждителева исполнение.
17. Радуйся, Благодатная, Богоизбранная Отроковица, приведенная во храм Господень и благословенная руками иереевыми. Ангели, вхождение Пречистыя зряще, удивишася, како Дева вниде во Святая святых, тем подаваша начало приведения к Богу рода человеческаго.
18. Радуйся, Отроковице, яко Дверь жизни, входящая в храм Господень во Святая святых, полагая таинство приведения к Богу рода человеческого.
19. Радуйся, Благодатная, Тебе, воспитавшейся во храме во Святая святых, украшенней верою и любовию, чистотою, и премудростию, и безмерным девством, Архистратиг Гавриил принесе с небесе целование. Радуйся, Благословенная, радуйся, Препрославленная, Господь с Тобою. И на небеси, и на земли величают Тя, Пресвятая Дева: Честнейшая Херувим и Славнейшая без сравнения Серафим.
20. Радуйся, Благодатная, яко о Тебе рече Архангел: родит от Духа Свята Сына, имя Ему Иисус, Сын Давидов, сын Аврамов, Той бо спасет люди Своя от грех их.
21. Радуйся, Благодатная, днесь спасения нашего главизна и еже от века таинства явление: Сын Божий Сын Девы бывает и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.
22. Радуйся, Богоизбранная, егда бо востече ко Елисавете, младенец же оныя абие познав целование Твое, взыграся радощами во чреве и устами ея возопи гласом велиим: и откуду мне сие, да прииде Мати Господа моего ко мне.
23. Радуйся, Благодатная, и воспеваем славословие Твое: величит душа Моя Господа и возрадовася дух Мой о Бозе Спасе Моем. Яко призре на смирение Рабы Своея, се бо отныне ублажат Мя вси роди. Яко сотвори Мне величие Сильный, и свято имя Его, и милость Его в роды родов боящимся Его.
24. Радуйся, Благодатная, и блажат Тя вси роди, Богородице Дево: в Тя бо Невместимый Христос Бог наш вместитися благоволи. Блажени есмы и мы, предстательство Тя имуще: день бо и нощь молишися о нас, и вселенная Твоими молитвами утверждается. Тем воспевающе вопием Ти: радуйся, Благодатная, Господь с Тобою.
25. Радуйся, Чистая Мати, девство и рождество сочетавшая, яко чудо из чудес: Се, Дева во чреве приимет, и родит Сына, и нарекут имя Ему Еммануил, – возвещали и пророки, и Ангели.
26. Радуйся, Благодатная, девство и Рождество сочетавшая, селением Бога и Слова ставшая, от Тебе, Пресвятыя Богородицы и Приснодевы Марии, изволил воплотитися нашего ради спасения
Един Сый Святыя Троицы, спрославляемый Отцу и Святому Духу.
27. Безлетно бо от Отца возсиявый Сын Единородный, Тойже от Тебе Чистыя пройде, неизреченно воплощся, естеством Бог сый и естеством быв Человек нас ради, не во двою лицу разделяемый, но во двою естеству неслитно познаваемый.
28. О чудо! Ибо чудо совершаемое в Тебе, Богородице: обновляется естество, и Бог Человек бывает: мы же Тобою хвалящеся, яко Тебе ради Бога познахом и Тебе величаем.
29. Радуйся, Благодатная Богородице Дево, Матерь Господа Иисуса Христа, Сына Божия, Единороднаго, Иже от Отца рожденнаго прежде всех век, Света от Света, Бога истинна от Бога истинна, рожденна, несотворенна, единосущна
Отцу, Имже вся быша, нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася.
30. Радуйся, Благодатная, Бог бо воплотися от чистых кровей Твоих, ум и душу и плотское смешение прием, Богородице, от Твоих ложесн Пречистых. Бог Слово поистине Человек явися и Божественного существа общника человека яве показал еси (глас 7, песнь 9, Богородичен Воскресной полунощницы).
31. Ужасеся о сем небо и земли удивишася концы, яко Бог явися человеком плотски и чрево Твое бысть пространнейшее небес: тем Тя, Богородицу, Ангелов и человек чиноначалия величают.
32. Радуйся, Невесто светлая, Мати Светодавца; радуйся, Невместимаго в небесех вместившая во утробе Твоей; радуйся, Дево, пророков проповедание, Еюже возсия Еммануил; радуйся, Мати Христа Бога, радость миру родившая.
33. Радуйся, Благодатная, наречем Тя Небо, яко возсияла еси Солнце правды; Рай, яко прозябла еси Цвет нетления; Деву, яко пребыла еси нетленна; Чистую Матерь, яко имела еси на святых Твоих объятиях Сына, всех Бога, Того моли спастися душам нашим.
34. Радуйся, Благодатная, яко Тобою Слово плоть бысть, и вселися, и обитало с нами, и видели мы Славу Его, яко Отчее сияние, и небо отверстым и Ангелов восходящих.
35. Слово Отчее, Христа Бога нашего, от Тебе воплотившагося, познахом, Богородице Дево, Едина чистая, Едина благословенная: тем непрестанно Тя воспевающе величаем.
36. Радуйся, Благодатная, Егоже родила еси, отдал бо нас во объятия Отчи и благослови взывати: Отче наш, Иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли.
37. Радуйся, Преславная Божия Матерь и святых Ангел Святейшая, рождшая нам Бога воплощена.
38. Радуйся, Чистая, Бога плотию рождшая во спасение всех, Еюже род человеческий обрете спасение, Тобою да обрящем рай, Богородице Чистая, Благословенная.
39. Преблагословенна еси, Богородице Дево, Воплощшим бо ся из Тебе ад пленися, Адам воззвася, клятва потребися, Ева свободися, смерть умертвися, и мы ожихом, тем воспевающе вопием: Благословен Христос Бог, благоволивый тако, слава Тебе.
40. Радуйся, Богородице Дево, от Тебе неизреченно воплощшагося Христа Жизнодавца страхом прославим, Егоже трепещут и трясутся Херувимы и славословят Ангельская воинства.
41. Со Ангелы небесная, с человеки земная, гласом радования, Богородице, вопием Ти: радуйся, врата небес ширшая, радуйся, Едина земнородных спасение, радуйся, Чистая, Благодатная, рождшая Бога воплотившагося.
42. Радуйся, Благодатная, рождшая Бога и Слово, о Нем да воспеваем: Седяй в славе на Престоле Божества, во облаце легце, прииде Иисус Пребожественный нетленною дланию и спасе седящия во тьме и сени смертной.
43. Радуйся, Всепетая, небес Превышшая, безначальное Слово безсеменно заченшая и воплощеннаго Бога рождшая человеком: тем Тя вси величаем.
44. Радуйся, Чистая, яко Скиния и Святая святых и одушевленное Селение Божией славы.
45. Радуйся, Дево, воспеваемая яко град, и селение, и жилище, и чертог, и престол, и звезда, являющая Солнце правды, Христа Бога нашего.
46. Неизреченно в последняя заченшая и рождшая Создателя Твоего, Дево, спасай Тя величающия.
47. Радуйся, Всепетая Мати и Дево, повелению законному повинующаяся, принесе в Божественное святилище всех святых Святейшее Слово, Егоже прием Симеон на руки своя, возрадовася вопия: ныне отпущаеши раба Твоего, Владыко, по глаголу Твоему, с миром: яко видесте очи мои спасение Твое, еже еси уготовал пред лицем всех людей, Свет во откровение языком и славу людей Твоих Израиля.
48. Радуйся, Благодатная Богородице Дево, из Тебе бо возсия Солнце правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение.
49. Радуйся, Богомати, во храм Господень с Божественным Младенцем на сретение всему миру пришедшая; радуйся, Ангели и человеки во сретении Твоем соединившая.
50. Радуйся, Богомати, яко понуди Сына Своего явити силу Божества, егда претвори воду в вино и исцеления и чудеса нача творити.
51. Радуйся, Благодатная, яко Сын Твой на горе Фавор возсия светом Божественным пред пророки и апостолы, яви людям славу Преображения, егда люди правовернии яко Ангели будут.
52. Радуйся, Благодатная, Егоже родила еси, Той спасение содела посреде земли, сего ради Бог на землю сниде, да нас на небеса возведет.
53. Радуйся, Мати Божия, стояще бо при Кресте Иисусове и видя вольные страдания, прияла еси служение яко Матерь всего рода христианского.
54. Радуйся, Благодатная, да воспеваем Ти: еже от века утаенное и Ангелом несведомое таинство, Богородице, сущим на земли явися Бог, в неслитном соединении воплощаем и Крест волею нас ради восприим, имже воскреси первозданного, спасе от смерти души наша.
55. Радуйся, Благодатная, да Сына Твоего хвалим, благословим и воспеваем: разрушил еси Крестом Твоим смерть, отверзл еси разбойнику рай, мироносицам плач преложил еси и апостолам проповедати повелел еси, яко воскресл еси, Христе Боже, даруяй мирови велию милость.
56. Радуйся, Дево, радуйся, Благословенная, радуйся, Препрославленная: Твой бо Сын Воскресе тридневен от гроба.
Светися, ликуй и веселися, Чистая Богородице, о востании Рождества Твоего.
57. Радуйся, Богородице и Матерь Света, достойно есть блажити Тя, яко родила еси Бога Слова, Егоже Воскресшаго тридневно Христа воспевают вся земнородные и Силы Небесныя.
58. Радуйся, Благодатная, Сын бо Твой воцарися, в лепоту облечеся, волею нас ради пострада и смертию Своею нашу смерть умертви и воскресением живот дарова любящим Его.
59. Ангел вопияше Благодатней: Чистая Дево, радуйся, и паки реку, радуйся, Твой Сын воскресе тридневен от гроба и мертвыя воздвигнувый, людие, веселитеся.
60. Светися, светися, Новый Иерусалиме, Слава бо Господня на тебе возсия, ликуй ныне и веселися Сионе: Ты же, Чистая, красуйся, Богородице, о востании Рождества Твоего: видехом бо Свет Истинный, прияхом Духа Небеснаго, обретохом веру истинную, Нераздельней Троице покланяемся: Та бо нас спасла есть.
61. Радуйся, Благая, жребий апостольскаго служения в земли Иверстей получившая; радуйся, готовая Служительнице Сына Своего и Бога.
62. Радуйся, Благодатная, Господь с Тобою. Величаем Тя, Пресвятая Дево, Богоизбранная Отроковице, и чтим еже в храм Господень вхождение Твое, почитаем Богоотец Иоакима и Анну и всеславное славим Успение Твое – переход от земли на небо к вечному бессмертию, идеже вси вернии будут в славе Трисолнечного Света.
63. Радуйся, Благодатная, яко на руках Своих носила Младенца Бога Слова, тако и во Успении Твоем Сын Божий возносит на руках Своих душу Твою во Врата Небесные.
64. Ангели Успение Пречистыя видевше, удивишася, како Дева восходит от земли на небо.
65. Радуйся, Благодатная, лествице к небеси, в Тебе, Дева Чистая, побеждаются естества уставы, по рождестве Дева, и по смерти жива, спасаеши присно, Богородице, наследие Твое.
66. Радуйся, о Мати Дево и Богородице Пресвятая. Величаем Тя, Пренепорочная Мати Христа Бога нашего, и преславное славим Успение Твое, егоже виде богоотец Давид и рече: воспою и пою во славе Моей. Святыня и великолепие во святиле Его. Обратися душе Моя в покой Твой, яко Господь благодействова Тя. Воскресни, Господи, в покой Твой, Ты и кивот святыни Твоея.
67. Радуйся, Благодатная, в Рождестве девство сохранила еси, во Успении мира не оставила еси, Богородице, преставилася еси к Животу, Мати сущи Живота, и молитвами Твоими избавляеши от смерти души наша.
68. Радуйся, Благодатная, и величаем Тя, в молитвах неусыпающую Богородицу, и в предстательствах непреложное упование, гроб и умерщвление не удержаста: якоже бо Живота Матерь, к животу престави, во утробу Вселивыйся приснодевственную.
69. Придите, вси концы земли, честное Успение Богоматере восхвалим: в руце бо Сына Своего душу непорочную положи, от живота в живот преставляему Рождшую Начальника жизни.
70. Величаем Тя, Богородице Чистая, и чтим святое Твое Успение. Бог бо славы, Сын Твой, Чистая, со славою яко Матерь прият Тя и посади одесную Себе, и предстала еси Богу яко Царица и Мати Божия, и Тебе, Богородице Чистая, Живущую и ныне по смерти, славит все множество небесных и земных.
71. Ты же, Дево, Боголепным Твоим сиянием вся озаряющи, зряще Сына Твоего на Престоле, темже земли и неба Всецарице Дивная, Пречистая, Пресвятая, в Царство введи славящих Успение Твое.
72. Радуйся, Обрадованная, во Успении Твоем нас не оставляющая. Радуйся,
Благодатная, Пречистая Богородице, на небесех Благословенная и на земли славословимая. Радуйся, Невесто Неневестная.
73. Радуйся, Всенепорочная, царем, пророком, и апостолом, и мучеником Ты еси Похвала и Предстательница миру. Радуйся, Благодатная, пророцы проповедаша, апостоли научиша, мученицы исповедаша, и мы веровахом Богородицу Тя воистину Сущую, тем и величаем Тя, Матерь Света.
74. Радуйся, Богородице, Тя величаем, вопиюще: радуйся, Незаходимаго Света облаче, Того носивши в недрах, славы Господа. Радуйся, Благодатная, Мати Святая Неизреченного Света, Ангельскими Тя песньми воспевающе, благочестно почитаем.
75. Радуйся, Благодатная, Слово Отчее, Христа Бога нашего, от Тебе воплотившагося познахом, Богородице Дево, Едина Чистая, Едина Благословенная: тем непрестанно Тя воспевающе величаем.
76. Радуйся, Богородице Приснодево, Госпоже, Царица и Владычице всех тварей, Славнейшая Серафим и всех Сил Небесных, первая по Боге и пред Богом Заступница и Помощница наша, Матерь Божия.
77. Радуйся, Благодатная, Тебя ублажают вси роды, покровом бо Своим покрываеши и чудесами спасаеши род христианский.
78. От Бога Бога Слова, неизреченною мудростию пришедшаго обновити Адама, ядию в тление падшаго люте, от Святыя Девы неизреченно воплотившагося нас ради, вернии единомудренно песньми величают.
79. И мы воспеваем Сына Твоего, Богородице, и Тебе вопием: радуйся, Благодатная, Преславная Приснодево, Мати Христа Бога нашего.
80. Радуйся, Матерь Света, научи непрестанно взывати к Солнцу правды: Иисусе, Отчее сияние, Ты еси упование мое, часть моя еси на земли живых, услыши глас мой, да будут уши Твои внемлюще гласу моления моего.
81. Радуйся, Благодатная, да поем Сыну Твоему: Боже, во имя Твое спаси мя, помощь моя от Тебе, Господа, сотворшаго небо и землю, и благословен еси Ты, Господи, Боже отец наших, и хвально и прославлено имя Твое во веки.
82. Радуйся, Благодатная, Ты Иже от Тебе Рождшагося моли, Богородице Дево, яко Милостив есть и спасти могий, Иже и страдати о нас изволивый.
83. Радуйся, Благодатная Мати Дево, Егоже родила несказанно, поем Ему: Иже нас ради рождейся от Девы и распятие претерпев, Благий, испровергий смертию смерть и Воскресение явлей яко Бог, не презри, яже создал еси рукою Твоею, яви человеколюбие Твое, Милостиве, приими Рождшую Тя Богородицу, молящуюся за ны, и спаси, Спасе наш, люди Твоя и благослови достояние Твое.
84. Радуйся, Благодатная, да Твоим заступлением спасаеми, славу, хвалу, благодарение и поклонение за вся в Троице Единому Богу и всех Создателю возсылаем.
85. Радуйся, Благодатная, яко Бога Невместимаго родила еси, Ему же мы взываем: молитвами, Господи, всех святых и Богородицы, Твой мир даждь нам и помилуй нас, яко Един щедр.
86. Радуйся, Благодатная, и мы к Тебе, Богородице, прилежно ныне притецем, грешнии и смиреннии, и припадем, в покаянии зовуще из глубины души: Владычице, помози на ны милосердовавши, потщися погибаем от множества прегрешений, не отврати Твоя рабы тщи, Тя бо и Едину надежду имамы.
87. Владычице и Мати Избавителя, приими моление недостойных раб Твоих, да ходатайствуеши к Рождшемуся от Тебе: о Владычице мира, буди Ходатаица!
88. Радуйся, Благодатная, под Твою милость прибегаем, Богородице Дево, молений наших не презри в скорбех, но от бед избави нас, Едина Чистая и Благословенная.
89. Пресвятая Богородице, спаси нас, много может моление Матернее ко благосердию Владыки.
90. Радуйся, Богородице, христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех нас бед Твоими молитвами всегда избави, Едина вскоре предстательствующая.
91. Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.
92. Радуйся, Благодатная, яко всех еси творений Высшая, воспевати Тя достойно недоумевающе, Богородице, туне, молим Тя, помилуй нас.
93. Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
94. Многая множества моих, Богородице, прегрешений, к Тебе прибегох, Чистая, спасения требуя. Посети немощствующую мою душу и моли Сына Твоего и Бога нашего дати ми оставление, яже содеях лютых, Едина Благословенная.
95. Радуйся, Благодатная, яко Спаса родила еси, Емуже воспеваем: Возбранный Воевода и Господи, ада Победителю, яко избавлься от вечныя смерти, Иисусе Предвечный, грешников спасение. Поем Тя, Бога Единаго в Троице, вопиюще глас Трисвятый, молящеся спасение получити.
96. Радуйся, Дево, рождшая Спаса и Владыку мира и Господа, Того моли спасти души наша.
97. Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего, Честнейшую Херувим и Славнейшую без сравнения Серафим, без истления Бога Слова Рождшую, сущую Богородицу Тя величаем.
98. Радуйся, Богоблагодатная, любовь бо Твоя сильнее и горячее любви Серафимов и Херувимов, и любовию
Своею объемлешь весь мир, и в Духе Святом видишь все народы земли, и подобно Сыну Своему всех жалеешь и милуешь. Ты нам Матерь по Духу и близка по природе яко человек, и всякая душа христианская влечется к Тебе любовью.
99. О Пресвятая, Пречистая, Преблагословенная, Славная Владычице наша Богородице и Приснодева Марие, Честнейшая Херувим и Славнейшая без сравнения Серафим. Хвалим, величаем Боголепную славу Твою, молим Тя, Матерь Бога нашего: созижди, украси вселенную храмами в похвалу имени Твоего, и прославляющих Боголепную славу Твою, и любящих, и призывающих Тя соделай храмами Духа Святаго, и да Христос Бог наш и Сын Твой пребывает с нами до скончания века. Аминь.
100. О Тебе радуется, Благодатная, всякая тварь, Ангельский собор и человеческий род, освященный храме и раю словесный, девственная похвало, из Неяже Бог воплотися и Младенец бысть, прежде век Сый Бог наш: ложесна бо Твоя престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.
Сотница вторая
1. Радуйся, Упование мира, Благая Богородице Дево, моли Милостиваго Бога избавитися вечных мук.
2. Радуйся, Благодатная, Иисуса рождшая Отроковица Богородительница, Того умоли спасти вся православныя и геенны избавитися. Радуйся, Благодатная, Человеколюбиваго Бога Мати, моли Своего Сына и нашего Владыку и Господа, да обратит к покаянию и вечныя муки избавит нас.
3. Радуйся, Благодатная, Всепетая Мати, рождшая всех святых Святейшее Слово, Твоим заступлением вечныя будущия муки свободи воспевающия Тя, Богоблаженная.
4. Радуйся, Всепетая, Иисуса рождшая Господа, Того моли избавити муки вся поющия Тя и Богородицу воистину именующия.
5. Призри на моления раб Твоих, Всенепорочная, утоляющи лютая на ны возстания, всякия скорби нас изменяющи; Тя бо Едину твердое и известное утверждение имамы, и Твое предстательство стяжахом, да не постыдимся, Владычице, Тя призывающии, потщися на умоление Тебе верно вопиющих: радуйся, Владычице, всех помоще, радосте и покрове и спасение душ наших.
6. На спасения стези настави мя, Богородице, студными бо окалях душу грехми и в лености все житие мое иждих, но Твоими молитвами избави мя от всякия нечистоты.
7. Милостива мне Судию же и Сына Твоего, прегрешившему паче всякаго человека, Твоими молитвами соделай, Владычице.
8. Радуйся, Пречистая Дево, Богородице, всех христиан прибежище, моли Своего Сына и нашего Владыку и Господа, да и мя обратит к покаянию и Своих заповедей делателя да явит мя.
9. Радуйся, Благодатная, предстательство и покров жизни моея полагаю Тя, Богородительнице Дево, Ты мя окорми ко пристанищу Твоему, благих и верных утверждение, Едина Всепетая.
10. Радуйся, Свет Невечерний рождшая, дивная Владычня Палато, избави мя огня вечнующаго, и червия же злаго, и тартара, и мук предлежащих мне, Богородительнице, яко да ублажаю Тя.
11. Радуйся, Всецарице, земнородных Похвало, в последняя дни Спасение наше рождшая, да от древния клятвы человеческий род свободиши, темже вси немолчно Тя величаем.
12. Радуйся, Благодатная, яко нашего воскресения сокровище, на Тя надеющияся, Всепетая, от рова и глубины прегрешений возведи, Ты бо повинныя греху спасла еси, рождшая Спасение наше, Иже прежде Рождества Дева, и в Рождестве Дева, и по Рождестве паки пребываеши Дева.
13. Радуйся, Благодатная, на Тя моя упования возложих, Богородице, спаси мя молитвами Твоими, даруй ми прегрешений оставление.
14. Оживи мя, Рождшая Жизнодавца и Спаса, спаси молитвами Твоими, Благословенная, Надеждо душ наших.
15. Радуйся, Благодатная, милосердия Твоего бездну призывающи подаждь ми, Яже Благосердаго рождшая и Спаса всех поющих Тя спаси.
16. Спаси всех молитвами Твоими, Дево Богородице, к Тебе притекающих, и избави всякия нужды и скорби.
17. Радуйся, Всепетая Богородице, спаси верныя люди Твоя и подаждь им с небесе победу, зане родила еси Бога, Едина Благословенная.
18. Зиждителя всех во утробе Твоей заченшая, Дево Всенепорочная, молитвами Твоими спаси души наша.
19. Радуйся, Благодатная, Царица небеси и земли, в храме стояще славы Твоея, на небеси стояти мним, Богородице, Дверь небесная, отверзи нам двери милости Твоея.
20. Радуйся, Благодатная, да Ти воспеваем: милосердия двери отверзи нам, Благословенная Богородице, надеющиися на Тя да не погибнем, но да избавимся Тобою от бед, Ты бо еси Спасение рода христианского.
21. Милосердия сущи Источник, милости сподоби нас, Богородице, призри на люди согрешившия, яви яко присно силу Твою: на Тя бо уповающе, радуйся, вопием Ти, якоже иногда Гавриил, безплотных Архистратиг, и Благословен Плод чрева Твоего, яко Спаса родила еси душ наших.
22. Богородице Дево, упование христианом, покрый, соблюди и спаси на Тя уповающих.
23. Богородице Дево, миру благая Помощнице, покрый и соблюди от всякия нужды и печали.
24. Радуйся, Благодатная, прибежище и сила наша, Богородице, державная помощь мира, молитвами Твоими покрый раби Твоя от всякия нужды, Едина Благословенная.
25. Радуйся, Благодатная, моление теплое и Стена Необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас.
26. Спаси от бед рабы Твоя, Богородице, яко вси по Бозе к Тебе прибегаем яко нерушимей стене и предстательству.
27. Радуйся, Благодатная, надежда и предстательство христиан, необоримая стена, изнемогающим пристанище небурное Ты еси, Богородице Пречистая, но яко мир спасающая непрестанною Твоею молитвою, помяни и нас, Дево Всепетая.
28. Дева родила еси, Неискусобрачная, и Дева пребыла еси, Мати Безневестная, Богородице Марие, Христа Бога нашего моли спастися нам.
29. Радуйся, Дево, ковчег, богустроенное жилище, ибо от Христа, родившагося от Пресвятой Девы, спасаются в Церкви от потопления греховнаго.
30. Радуйся, Благодатная, саде райский, идеже Древо Жизни и бессмертия, Новый Иерусалиме, подавай, молим Тя, мир Церкви и людем Твоим, всем чадам, спасение даруй.
31. Радуйся, мира очистилище, Дево; радуйся, ручко и свещниче всезлатый Божественныя манны и света, Богоневесто.
32. Радуйся, Богородице, манну носящая; радуйся Божественная трапеза, небесный хлеб – Христос бо, сшедший с неба, хлеб жизни и бессмертия, насыщает нас Телом и Кровию Своею для жизни вечной.
33. Радуйся, Благодатная, земле благая, Благословенная Богоневеста, клас прозябшая неоранный и спасительный миру, сподоби мя причащатися Пречистаго Тела и честныя Крови Христа Бога, Сына Твоего.
34. Радуйся, Благодатная Богородице, Свете моея души, надежде, покрове, прибежище, утешение, радование мое, Иже источник бессмертия Рождшая, Милостиваго Бога Любоблагоутробная Мати, сподоби мя причащатися во исцеление души и тела, во оставление грехов и в жизнь вечную Пречистаго Тела и Честныя Крове Сына Твоего, Христа Бога нашего, во еже пети и славити Тя, Пресвятую, Пречистую, Славную Владычицу и Приснодеву Марию, во вся дни живота моего, яко Благословенна и Препрославлена еси во веки веков. Аминь.
35. Радуйся, Благодатная, величаем Тя, ублажаем, понеже бо Тебя ради бысть Господь сил с нами и Тобою Сына Божия познахом и сподобихомся Святаго Тела Его и Пречистыя Крове Его.
36. Радуйся, Благоукрашенная, Тя бо величаем, сокровище спасения, и источник нетления, и столп утверждения, и дверь покаяния.
37. Радуйся, Благодатная Дево, небесная врата, спасительная дверь, лествице спасения, Юже Бог сниде и человек взыде.
38. Радуйся, Благодатная, Тебя, Преславную Божию Матерь и святых Ангел Святейшую, немолчно воспоим сердцем и усты, Богородицу сию исповедающе, яко воистину рождшую нам Бога воплощенна и молящуюся непрестанно о душах наших.
39. Не умолчим никогда, Богородице, силы Твоея глаголати, недостойнии: аще бо Ты не бы предстояла молящи, кто бы нас избавил от толиких бед, кто же бы сохранил до ныне свободны; не отступим, Владычице, от Тебе: Твоя бо рабы спасаеши присно от всяких лютых.
40. Радуйся, Благодатная, все упование мое на Тя возлагаю, Мати Божия, сохрани мя под кровом Твоим.
41. Радуйся, Девице Марие, просвети мою душу, помраченную люте житейскими сластьми.
42. Радуйся, радуйся, Матерь Всепетая, я пред Тобою с мольбой: бедного грешника, мраком одетого, Ты благодатью покрой.
43. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
44. Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.
45. Радуйся, Благодатная, под Твое благоутробие прибегаем, Богородице, моления наша не презри во обстоянии, но от бед избави ны, Едина Чистая, Едина Благословенная.
46. Радуйся, Благодатная, Пресвятая Владычице Богородице, убогих заступница, алчущих кормительница, нагих одеяние, больных исцеление, грешных спасение, Тя величаем.
47. Призри благосердием, Всепетая Богородице, на мое лютое телесе озлобление и исцели души моея болезнь.
48. Радуйся, Благодатная, недугов и всяких болезней, и бед нас свободи, к священному Твоему покрову прибегающих.
49. Утоли болезни многовоздыхающия души моея, утолившая всяку слезу от лица земли, Ты бо человеков болезни отгониши и грешных скорби разрушаеши: Тебе бо вси стяжахом надежду и утверждение, Пресвятая Мати Дево.
50. Радуйся, Благодатная, Целительнице душ и телес наших. Радуйся, Всецарице, недуги наша благодатию исцеляющая.
51. Радуйся, Всемилостивая, избави нас от глада, огня и меча, междоусобныя брани и подаждь мир и просвети души наша ко спасению.
52. Радуйся, Пресвятая Богородице Дево, рук наших дела исправи и прощение прегрешений наших испроси, внегда пети нам ангельское пение.
53. Владычице, приими молитвы рабов Твоих и избави нас от всякия нужды и печали. Тебе, необоримую стену, спасения утверждение, Богородице Дево, молим: сопротивных советы разори, людей Твоих печаль на радость преложи, град Твой огради, о мире мира моли: яко Ты еси, Богородице, упование наше.
54. Радуйся, многоскорбная Мати Божия, печаль нашу в радость претворяющая. Радуйся, нечаянную радость верным дарующая.
55. Радости мое сердце исполни, Дево, яже радости приемшая исполнение, греховную печаль потребляющи.
56. Вышняго освященное Божественное Селение, радуйся, Тобою бо дадеся радость, Богородице, зовущим: Благословенна Ты в женах еси, Всенепорочная Владычице.
57. Радуйся, Благодатная, святых Святейшая Ангел, Херувим и Серафим Превысшая, землеретный мой ум земнаго и вещнаго желания превыше покажи, от земли к небесной любви возвысивши.
58. Радуйся, Благодатная, дом Божий и врата небесная, Еюже сниде Бог, Благая Вратарница, двери райския нам отверзающая, благоволи и нам принести дары: непорочность, кротость, чистоту, милосердие, правосудие – все дары человеколюбия и добра.
59. Радуйся, Пресвятая Владычица моя Богородице, сподоби мя возлюбити Тя и быти под покровом Твоим и благодатию Твоею.
60. Радуйся, Благодатная, воспеваем благодать Твою, Владычице, Жизнодателя Бога рождшую. Превысшая Ангел, небесная ми улучити блаженства со всеми святыми сподоби.
61. Радуйся, Благодатная, Преславная Приснодево, Мати Христа Бога, принеси нашу молитву Сыну Твоему и Богу нашему, да спасет Тобою души наша.
62. Радуйся, Благодатная Богородице, Ты еси лоза истинная, возрастившая нам Плод живота, Тебе молимся: молися, Владычице, со святыми апостолы помиловати души наша.
63. Радуйся, Благодатная, пристанище и предстательство тебе прибегающих буди, Дево, и Стена Нерушимая, прибежище и покров и веселие.
64. Радуйся, горо; радуйся, купино; радуйся, врата; радуйся, лествице; радуйся, Божественная трапезо; радуйся, всех помоще Владычице.
65. Радуйся, христианом Помощнице и милосердая о грешных Предстательнице. Радуйся, Радосте наша, иконою Твоею нас присно утешающая.
66. Радуйся, Пречистая, от иконы Твоея милости нам источающая. Радуйся, Владычице, милостивая о нас пред Богом Заступнице. Радуйся, Заступнице усердная рода христианскаго.
67. Заступнице усердная, Мати Господа Вышняго, за всех молиши Сына Твоего, Христа Бога нашего, и всем твориши спастися, в державный Твой покров прибегающим. Всех нас заступи, o Госпоже Царице и Владычице, иже в напастех и в скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.
68. Радуйся, Боголюбивая Царице Богородице, надеждо и прибежище наше.
69. Боголюбивая Царице, неискусомужная Дево, Богородице Марие, моли за ны Тебе возлюбившаго и рождшагося от Тебе Сына Твоего, Христа Бога нашего, подати нам оставление прегрешений, мирови мир, земли плодов изобилие, пастырем святыню и всему человеческому роду спасение. Грады наша и страны Российския от нахождения иноплеменных заступи и от междоусобныя брани сохрани. О Мати Боголюбивая, Дево! О Царице Всепетая! Ризою Своею покрый нас от всякаго зла, от видимых и невидимых враг защити и спаси души наша.
70. Царице моя преблагая, надеждо моя Богородице, приятелище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми, яко немощну, окорми мя, яко странна. Обиду мою веси, разреши ту, яко волиши; яко не имам иныя помощи, разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.
71. Не имамы иныя помощи, не имамы иныя надежды, разве Тебе, Владычице, ты нам помози; на Тебе надеемся и Тобою хвалимся, Твои бо есмы раби, да не постыдимся.
72. Радуйся, Радосте наша, избави нас от всякаго зла и утоли наша печали.
73. Радуйся, Благодатная, молим Тя: сподоби нас Царствия Сына Твоего, Христа Бога нашего, яко держава Его благословенна и препрославленна со Безначальным Его Отцем и с Пресвятым, и Благим, и Животворящим Его Духом.
74. О, преславнаго чудесе! Небеси и земли Царице, от святых сродников наших умоляемая, до ныне землю Русскую покрывает и милостивно обогащает. О Владычице Державная! Не престани и на будущее время во утверждение на Руси Православия милости и чудеса изливати до века. Аминь.
75. Радуйся, Благодатная Богородице Дево, погибших Взыскание и всех скорбящих Радосте.
76. Всех скорбящих радосте, и обидимых заступнице, и алчущих питательнице, странных утешение, обуреваемых пристанище, больных посещение, немощных покрове и заступнице, жезле старости, Мати Бога Вышняго Ты еси, Пречистая; потщися, молимся, спастися рабом Твоим.
77. Радуйся, Радосте наша, покрый нас от всякаго зла честным Твоим омофором.
78. Днесь, благовернии людие, светло празднуем, осеняеми Твоим, Богомати, пришествием, и к Твоему взирающе пречистому образу умильно глаголем: покрый нас честным Твоим покровом и избави нас от всякаго зла, молящи Сына Твоего, Христа Бога нашего, спасти души наша.
79. От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней: тако и мою немощь посети, и душу мою помилуй, Благая, и тело исцели благодатию Твоею, Пречистая.
80. Радуйся, Благая Вратарнице, двери райския верным отверзающая.
81. Радуйся, Благодатная, Благого Царя Благая Мати, Тобою да обрящем рай, Богородице Дево, Едина Чистая и Благословенная.
82. Радуйся, Пречистая и Благословенная, яко от Тебе, Дево, восприявый дух, душу и тело Истинный Человек и Бог Истинный, дарова нам рождение водою и Духом и отверзи двери Царствия Небесного.
83. Радуйся, Богомати, яко Сын Твой и Бог наш дарова нам Тело и Кровь Свою, да внидем в Царствие Божие.
84. Радуйся, Славная Владычице, да улучу Твоим ходатайством и заступлением, благодатию и человеколюбием Единородного Сына Твоего, Господа и Бога и Спаса нашего Иисуса Христа, спасение и жизнь вечную.
85. Радуйся, Благодатная, Блаженная Матерь Божия и Матерь рода христианского, к небеси призывающая плачущия, кроткия, алчущия и жаждущия правды, милостивыя, чистыя сердцем, миротворцев, изгнанных правды ради, дабы радовались и веселились во свете Солнца Незаходимого, Христа Бога, Спасителя нашего.
86. Радуйся, Благодатная, яко с Тобою избранныя – кротких и смиренных сердцами поставит Господь одесную Себе и речет: приидите, благословеннии Отца Моего, наследуйте уготованное вам Царствие от сложения мира.
87. Егда к нам Бог приити изволи, тогда во Твою, Пречистая, чистейшую утробу вселися и спасе Тобою человеческое смешение, даровавый всем Царство Небесное. Темже вопием Ти, Богородице Чистая, радуйся, Владычице.
88. Еже радуйся Ангелом приимшая и рождшая Зиждителя Твоего, Дево, спасай Тя величающия.
89. Язык всяк православных похваляет, и блажит, и славит Пречестное Рождество твое, Марие Богоневестная.
90. Оживи мя, Рождшая Жизнодавца и Спаса, и спаси молитвами Твоими, Благословенная Надеждо душ наших.
91. Зиждителя всех во утробе Твоей заченшая, Дево Всенепорочная, молитвами Твоими спаси души наша.
92. Избави мя огня вечнаго и мук, предлежащих мне, Богородительнице, яко да ублажаю Тя.
93. Пресвятая Богородице, рождшая Спаса, от бед спаси и всякия иныя нужды рабы Твоя.
94. Пощади, Спасе, души умерших братий наших в надежди жизни и ослаби, остави им согрешения, молитвами, Милостиве, Матери Твоея Пречистыя и всех святых Твоих Твоя милости людям Твоим даруй.
95. Неизреченно в последняя заченшая и рождшая Создателя Твоего, Дево, спасай Тя величающия. Отца и Сына славословим и Духа Святаго, глаголюще: Троице Святая, спаси души наша.
96. Премудре человека прежде созда Сын Твой, Дево, и истлевшаго обнови Тобою, Всепетая: и Божественнаго света зари невечерния всех исполни, Тя, Богородицу истинную, верою славящих.
97. Радуйся, Благодатная, Спаса Бога и миру Избавителя, Всечистая, родила еси, Егоже ныне моли благолепием добродетелей, и светлостию, и постническою благодатию облещи поющия: благословенна еси, Бога плотию рождшая.
98. Невеста непорочная, палата Зиждителя, земле неделанная, престол огнезрачен явилася еси, Пречистая. Темже вопием Ти: радуйся, Пречистая Владычице, яже человеки обожившая Божиим Твоим рождеством.
99. Тя пою, Всечистая, успи страсти моея души, ко утру покаяния воздвигни мя, Отроковице, и светом Твоим просвети, Благодатная Дево.
100. Радуйся, Просветившая род наш светоносным Воскресением Сына Твоего и Бога нашего: Тя бо христианский род непрестанно ублажает.
Сотница третья
1. О Всепетая Мати, рождшая всех святых Святейшее Слово! Нынешнее приемши приношение, от всяких избави напастей всех и будущия изми муки о Тебе вопиющих: аллилуиа.
2. Избранней от всех родов Божией Матери и Царице, предивно цельбоносную икону Свою явившей, на нейже у Креста Христова стоящую Заступницу нашу видяще, похвальное Той возглашаем пение: Ты же, Госпоже Всемилостивая, яко имущая милосердие неизреченное, теплым Твоим предстательством и заступлением от всяких нас бед и недугов свобождай, во умилении Тебе зовущих: Радуйся, Благодатная, непрестанно за нас Христу молящаяся.
3. О Всепетая Мати, Сладчайшаго Господа нашего Иисуса Христа нетленно рождшая и спасительным страданием Его многоболезненно спострадавшая, приими милостиво сие малое моление наше, пред многоцелебным Твоим образом с любовию Тебе приносимое, и всемощным Твоим предстательством и заступлением избави нас от временныя напасти и муки вечныя, да сподобимся, по кончине жития нашего, со всеми святыми взывати Спасителю Богу: аллилуиа.
4. Преблагословенная Дево, Богородительнице Чистая, у Креста Сына Твоего и Бога нашего предстоящи, скорбь велию претерпела еси и благодать от Него прияла еси сущия в скорбех утешати. Темже на пречистый образ Твой благоговейно взирающе и изображенную Тя на нем пред Крестом Спаса нашего видяще, умиленно к Тебе вопием: Заступнице усердная, благая и милостивая! Ускори избавити ны от всякия скорби, нужды и болезни и спаси души наша, да Тя со благодарением славим во веки.
5. Притецем, вернии, к благодатному милостей и щедрот источнику – чудотворному Пречистыя Девы образу: сей бо нам свыше даровася, душам и телесем во спасение, емуже поклоняющеся с любовию, возопием к Богородице: о Всепетая Мати, о Царице Всемилостивая, покрый и соблюди нас от всякаго зла Твоим к Богу Матерним предстательством.
6. Взбранной Воеводе, Боголюбивей Царице, превысшей всякаго создания, Деве и Матери Христа Бога, похвальная восписуем Ти раби Твои, Богородице! Ты же, яко Боголюбивая и Всемилостивая Мати, благоизволившая явити пресветлый Свой лик благоверному нашему князю Андрею, от бед и скорбей сохрани ны и храм сей, да зовем Ти: Радуйся, Боголюбивая Царице Богородице, Надеждо и Прибежище наше.
7. О Мати Боголюбивая, Царице Небесная, Всемощная наша Предстательнице! Малыя сия услышавши смиренныя мольбы наша, призри на ны милостивым Твоим оком; буди нам скорая Заступница в день кончины нашея и в час смертный явися нам Сама, Пречистая, простирающи руку помощи, отгоняющи духов злобы, ищущих поглотити душу нашу при разлучении от тела, и сподоби нас в будущей жизни в веселии и радовании возвеличити и прославити Тя, яко Преблагую Покровительницу нашу, да спасении Тобою в безконечном веце вопием Богу: аллилуиа.
8. Взбранней Воеводе победительная, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством, благодарственная восписуем Ти, раби Твои: яко имущая державу непобедимую, от всяких нас бед и скорбных обстояний свободи, зовущих: радуйся, Благодатная Богородице Дево, погибших Взыскание и всех скорбящих Радосте.
9. О Всепетая Богообрадованная Мати, рождшая на радость небу и земли Царя Христа, Бога нашего! Услыши глас скорбящих раб Твоих и, приемши сие малое моление наше, избави нас от всяких бед, скорбей и напастей; недуги наша исцели, клеветы потреби, всяку злобу и вражду отжени от нас и будущия изми муки о Тебе вопиющих: аллилуиа.
10. Радуйся, Благодатная Богородице Дево, во объятиях Своих Превечнаго Младенца и Бога носившая, проси Его дати миру умирение и душам нашим спасение. Сын бо Тебе, Богомати, вещает, яко вся прошения Твоя во благое исполнит. Сего ради и мы, припадающе, молимся и, надеющиися на Тя, да не погибнем, имя Твое именуем: Ты бо еси, Владычице, Взыскание погибших.
11. Взыщи нас, погибающих, Пресвятая Дево, не по грехом бо нашим наказуеши нас, но по человеколюбию милуеши, избави нас от ада, болезни и нужды и спаси нас.
12. Взбранной Воеводе, Заступнице нашей, взирающе на первописанный образ Твой, хвалебное пение воспеваем Ти раби Твои, Богомати. Ты же, яко имущая державу непобедимую, сохрани и спаси благодарне Тебе вопиющия: Радуйся, Пречистая, от иконы Твоея милости нам источающая.
13. О Всепетая Мати, Заступнице Всемилостивая, Дево Богородице, обычным Твоим милосердием малое моление сие наше приемлющи, якоже древле, тако и ныне помилуй землю нашу Русскую и от всяких бед раби Твоя избави, о Тебе вопиющия: аллилуиа.
14. Днесь светло красуется славнейший град Москва, яко зарю солнечную восприимши, Владычице, чудотворную Твою икону, к нейже ныне мы притекающе и молящеся, Тебе взываем сице: о, Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко Милосерд.
15. Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.
16. Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Владычице, о явлении нам чудныя иконы Твоея Державныя. Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти: Радуйся, Матерь Божия Державная, Заступнице усердная рода христианскаго.
17. О Всепетая Мати, Державная Владычице! Приими ныне сие малое моление наше, и величия ради благости Твоея и неизреченных щедрот Твоих, не помяни множества грехов наших, но исполни во благих прошения наша: даруй нам вся потребная к животу и благочестию, избави нас от глада, болезней и печали и Царствия Небеснаго наследники всех сотвори, верно вопиющих Богу: аллилуиа.
18. Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.
19. Ангелов лицы благоговейно Тебе служат и вся Небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей «Державней» и светозарный луч славы чудес Твоих да нисходит от Нея на всех с верою Тебе молящихся и вопиющих Богу: аллилуиа.
20. Взбранной Воеводе победительныя песни приносим, яко даровася нам Держава Твоя, и ничесоже устрашимся, не от мира бо спасение наше, но Превознесенныя Владычицы милосердием ограждаемся и тому днесь радуемся, яко прииде Заступница на стражу земли Своея.
21. О Всемилостивая Владычице Богородице, Российской страны дивная Заступнице, обидимых прибежище, грешных спасение! Отечество наше от враг защити, вселенную всю миром благослови, веру православную укрепи, скорби и крест со упованием понести помози, в любви и согласии всех нас соблюди и в радость Господа внити сподоби поющих Ему: аллилуиа.
22. Заступнице верных преблагая и скорая, Пречистая Богородице Дево, молим Тя пред святым и чудотворным образом Твоим, да якоже древле от него заступление Твое граду Москве даровала еси, тако и ныне нас от всяких бед и напастей милостиво избави и спаси души наша яко Милосердая.
23. Избранней Богом от человеческаго рода послужити воплощению предвечнаго Слова, преблагословенней Деве Богородице, достойно воспеваемой от Ангел на небеси, мы, грешнии, на земли дерзаем приносити хвалебное пение; еже милостиво от нас приемши, всемилующая Царице Богородице, от всяких бед нас спаси и вечных мук свободи, да зовем Ти: радуйся, христианом Помощнице и милосердая о грешных Предстательнице.
24. О Всепетая Мати, рождшая святых Святейшее Слово, от Ангел воспеваемая на небеси и от человек славимая на земли! Приими милостиво сие малое моление наше и даруй душевное спасение и телесное здравие всем, верно чтущим Тя и поющим Богу: аллилуиа.
25. Притецем, вернии, со дерзновением к Милующей Царице, Богородице, и умиленно воззовем к Ней: ниспосли на ны милости Твоя богатыя, град сей избави от всякаго обстояния, мир даруй мирови и спасение душам нашим.
26. Архангельский глас вопиет Ти, Всецарице: достойно есть, яко воистину блажити Тя, Богородицу, Присноблаженную и Пренепорочную и Матерь Бога нашего.
27. Отцев соберитеся всеафонское множество, верно празднующе, днесь радующеся, и светло восклицающе вси в веселии: Божия бо Мати ныне от Ангела преславно воспевается, темже яко Богородицу присно Сию славим.
28. Празднует днесь весь Афон, яко песнь прият от Ангела чудно Тебе, Чистей Богоматери, Юже вся тварь чтит славящи.
29. Взбранной Воеводе, Владычице нашей Богородице, знамением иконы Ея святыя дивную победу людем Новаграда даровавшей, благодарственное возглашаем пение: Ты же, Всеблагая Заступнице наша, яко имущая державу непобедимую, от всяких нас бед свободи и от враг видимых и невидимых защити, да зовем Ти: радуйся, Владычице, знамение милости Твоея нам являющая.
30. О Всепетая Мати Сладчайшаго Спасителя нашего Господа Иисуса Христа! Нынешнее наше приемши приношение, от всякия избави нас напасти и скорби и вечныя изми муки всех пред святою иконою Твоею с верою и любовию поклоняющихся и о Тебе благодарно зовущих Богу: аллилуиа.
31. Яко необоримую стену и источник чудес, стяжавше Тя раби Твои, Богородице Пречистая, сопротивных ополчения низлагаем, темже молим Тя: мир отечеству нашему даруй и душам нашим велию милость.
32. Честнаго образа Твоего знамение празднующе людие Твои, Богородительнице, имже дивную победу на сопротивных граду Твоему даровала еси, темже Тебе верою взываем: радуйся, Дево, христиан похвало.
33. Взбранной Воеводе, Владычице нашей Богородице, похвальная пения приносим Ти раби Твои, яко пришествием честнаго образа Твоего стяжавши щит крепкий, стену необоримую и стражу неусыпну. Ты же, яко имущая державу непобедимую, покрый и защити нас, Владычице, от всех врагов видимых и невидимых и избави от всякого вреда, душевнаго и телеснаго, да зовем Ти: радуйся, благая Вратарнице, двери райския верным отверзающая.
34. О Всепетая Мати, Пресвятая Госпоже Дево Богородице! Призри на нас, приносящих смиренно со слезами малыя сия молитвы пред пречистым Твоим образом и все упование и надежду возложивших на Тя, и избави нас всех бед и напастей в животе сем и будущия изми муки, да спасаемии Тобою вопием выну: аллилуиа.
35. Аще и в море ввержена бысть святая икона Твоя, Богородице, от вдовицы не могущия спасти сию от врагов, но явилася есть хранительница Афона и вратарница обители Иверския, враги устрашающая и в православней Российстей стране чтущия Тя от всех бед и напастей набавляющая.
36. Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти: радуйся, Заступнице Усердная рода христианскаго.
37. О Всепетая Мати, рождшая всех святых Святейшее Слово, приими ныне малое сие моление и, величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, душе спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: аллилуиа.
38. Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы; ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящиеся раби Своя.
39. Взбранной Воеводе, Пренепорочней Деве Богородице, земли Калужской Избавительнице, хвалебные песни приносим Ти, раби Твои, яко иконы Твоея явлением даровавшей нам стража неусыпна. Ты же моления нашего, пред иконою Твоею возносимаго, не отвержи, но защити ны, Владычице, от всех врагов видимых и невидимых и избави ны от всяких болезней душевных и телесных, да во умилении сердец зовем Ти: радуйся, Владычице, милость Свою нам и заступление являющая.
40. О Всепетая Мати Христа Бога нашего! Приими милостиво сие моление наше, еже принесохом пред Твоею иконою, и в час смертный явися нам Сама, Пречистая, простирающе руку помощи, отгоняюще духи злобы, ищущии поглотити души наша при разлучении от телесе, и умоли Приснопоклоняемую Троицу избавити ны мучения вечнаго, да предстательством Твоим наследуем Царствие Небесное и сподобимся со святыми пети Богу: аллилуиа.
41. Заступнице от враг иноплеменных необоримая Калужския земли и Избавительнице от смертоносныя язвы милостивая! Избави раби Твоя от всяких бед и болезней, с верою и любовию прибегающая к чудотворней иконе Твоей, и спаси души наша.
42. Взбранной Воеводе, Пречистей и Богообрадованней Деве Богородице, огнезрачныя иконы Своея явлением обрадовавшей Церковь Христову и ею от огненнаго запаления защищающей верныя, похвальное возглашаем пение. Ты же, о Богомати, Купина Неопалимая нами именуемая, яко имущая державу непобедимую и милосердие многое, ускори на помощь к нам, требующим Твоего заступления, и от всяких бед свободи зовущих Ти: радуйся, Благодатная, Купина Неопалимая, огненнаго запаления нас избавляющая.
43. О Всепетая Мати, рождшая всех святых Святейшее Слово и Неопалимая Купина от нас недостойных именуемая, вонми гласу молений и пений наших, пред святою иконою Твоею усердно Тебе возносимому, и теплою молитвою Твоею ко Господу огня временнаго и вечнаго избави нас, хвалящих имя Твое и прославляющих чудеса Твоя, Сыну же Твоему и Богу нашему вопиющих: аллилуиа.
44. Избранное и дивное избавление нам даровася – Твой образ честный, Владычице Богородице, яко избавльшеся явлением его от недугов душевных и телесных и скорбных обстояний, благодарственная хваления приносим Ти, Всемилостивая Заступнице. Ты же, Владычице, «Неупиваемою Чашею» нами именуемая, приклонися благоутробно к нашим воздыханиям и воплям сердечным и избавление подаждь страждущим недугом пианства, да с верою воззовем Ти: радуйся, Владычице, Неупиваемая Чаша, духовную жажду нашу утоляющая.
45. О Премилостивая Мати Сладчайшаго Господа нашего Иисуса Христа! Нынешнее наше услыши моление и избави нас от всех недугов, душевных и телесных, наипаче же свободи страждущих недугом пианства рабов Твоих, да не во зле погибнут, но да спасеннии Тобою, присно вопиют Богу: аллилуиа.
46. Днесь притецем, вернии, к Божественному и пречудному образу Пресвятыя Богоматери, напояющей верных сердца небесною Неупиваемою Чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице премилостивая, исцели наша недуги и страсти, молящи Сына Твоего, Христа Бога нашего, спасти души наша.
47. Избранней от всех родов Божией Матери и Царице, явившейся иногда к человеку беззаконну, во еже отвратити его от пути нечестия, благодарственное пение приносим Ти, Богородительнице: Ты же, яко имущая милосердие неизреченное, от всяких нас бед и грехов свободи, да зовем Ти: радуйся, нечаянную радость верным дарующая.
48. О Всепетая Мати, Невместимаго Бога во чреве вместившая и Радость всему миру родившая! Нынешнее приими пение, вся наша печали на радость преложи и от всякия избави напасти всех и будущия изми муки о Тебе вопиющих: аллилуиа.
49. Днесь, вернии людие, духовно торжествуем, прославляюще Заступницу Усердную рода христианскаго, и, притекающе к пречистому Ея образу, взываем сице: о Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.
50. О Всепетая и Всемилостивая Мати, Пречистая Госпоже Богородице! Услыши глас молящихся рабов Твоих и приемши сие малое моление наше избави нас от всяких бед, скорбей и напастей: подаждь нам в жизни руку помощи, враги наша разжени, недуги наша исцели, всякую злобу и вражду отжени от нас, в печалех житейских отраду и утешение даруй и будущия изми муки о Тебе вопиющих: аллилуиа.
51. Избранней Предвечным Царем, превышшей всякаго создания небесе и земли Царице, пришедшей иногда во Влахернскую церковь на молитву, достойное поклонение с благодарением приносяще, яко во тьме сущии, под Твой светящийся омофор с верою и умилением прибегаем. Ты же, яко имущи державу непобедимую, от всяких нас бед свобождай, да зовем Ти: радуйся, Радосте наша, покрый нас от всякаго зла честным Твоим омофором.
52. О Всепетая Мати, Пречистая Госпоже, Дево Богородице! К Тебе возвожду душевныя и телесныя очи, к Тебе простираю разслабленныя руце и из глубины сердца вопию: призри на веру и смирение души моея, покрый мя всемощным омофором Твоим, да избавлюся от всех бед и напастей, и в час кончины моея, о Всеблагая, предстани мне и уготованнаго ради грехов моих избави мучения, да выну поклоняяся зову: аллилуиа.
53. Дева днесь предстоит в церкви и с лики святых невидимо за ны молится Богу, Ангели со архиереи поклоняются, апостоли же со пророки ликовствуют: нас бо ради молит Богородица Превечнаго Бога.
54. Взбранной Воеводе родов христианских и страны нашея известней Избавительнице хвалебныя песни принесем, вернии, на святей горе Ея собравшеся; Ты же, яко имущая милосердие неизреченное, о Владычице Богородице, моления нашего пред чудотворным Твоим образом возносимаго не отвержи, да в умилении сердец зовем Ти: радуйся, Похвало Почаевская и всего мира Надеждо и Утешение.
55. О Всепетая Мати Христа Бога, вся роды христианския любовию Себе всыновившая, достойныя похвалы воспети Тебе недоумеем мы, грешнии, обаче любовию Твоею побеждаемии и к Твоему чудотворному образу очи своя возносяще, молим Тя: в борении и нуждах наших не остави чад Твоих, заступлению Твоему тепле верующих и Сыну Твоему вопиющих: аллилуиа.
56. Взбранной Воеводе, избравшей гору Почаевскую в место селения Своего, похвальная восписуем Ти, раби Твои, Богородице: яко от лет древних прославила еси место сие Богоносное явлением Цельбоносныя Стопы Твоея и Твоего Божественнаго образа чудодействием. Тем-же, яко избавльшая иногда обитель Твою от нашествия агарянскаго, от всяких нас бед и напастей свободи, да всегда Твоею помощию избавляеми, из глубины душевныя вопием Ти: радуйся, похвало Почаевская, надеждо наша и утешение.
57. О Всепетая Мати, Царице неба и земли! Воззри милостивым оком Твоим на ны, предстоящия пред святою иконою Твоею, и на вся люди, Тебе молящиеся, и Твоими Богоматерними молитвами избави нас от всяких бед, напастей и скорбей, да безгрешно, мирно и благочестно поживше в нынешнем веце, и в будущем сподобимся вси небесных и вечных благ от Господа и Спаса и Судии нашего, поюще Ему, прославляющему Тя на святей горе Твоей, и Тобою от святыя иконы Твоея и Стопы Твоея прославляемому во веки: аллилуиа.
58. Предстательство христиан непостыдное, ходатайство ко Творцу непреложное явилася еси воистину, Богородице, в цельбоносней Твоей Стопе и чудотворней Твоей иконе на горе Почаевстей. Не презри убо, Всепетая, грешных молений гласы, но предвари любовию Твоею Матернею на помощь нам, верно зовущим Ти: ускори на молитву и якоже древле явилася еси на скале Почаевстей в столпе огненнем, цельбоносную воду от камене во спасение наше источающи: потщися на умоление и Твоею благостынею покрый и соблюди нас, якоже иногда благопоспешила еси обители Твоей во спасение от нашествия агарянскаго, предстательствующи присно, Богородице, чтущих Тя.
59. К Богородице прилежно ныне притецем, грешнии и смирении, и припадем к дивному образу Ея, иже на горе Почаевстей: к нему же умильно взирающе и моляшеся, Царице Владычице, из глубины душевныя вопием: о Пречудная Дево, Мати Господа Вышняго, oт лет древних избравшая обитель Почаевскую в место селения Своего, землю отечественную нашу в Православии и мире утверди и спаси всех предстоящих и молящихся Тебе умиленною душею и сокрушенным сердцем пред Пречистым Твоим образом со слезами. Не отврати рабы Твоя тщи: Тя бо и едину надежду имамы.
60. Пред святою Твоею иконою, Владычице, молящиеся исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.
61. Источник исцелений и веры православныя утверждение Почаевская Твоя икона, Богородице, явися, темже и нас, к ней притекающих, от бед и искушений свободи, лавру Твою невредиму сохрани, Православие во окрест стоящих странах утверди и грехи разреши молитвенник Твоих: елика бо хощеши, можеши.
62. Избранней от всех родов Божией Матери и Царице, скоропослушливо внемлющей молитвам смиренным, и токи целебныя изливающей верным от иконы Своея святыя, благодарственное приносим пение: Ты же, Всемилостивая Заступнице, преклонися благоутробно к гласом нашим хвалебным, и от всяких бед свободи ны, зовущия Ти: радуйся, Всеблагая Скоропослушнице, прошения наша во благо исполняющая.
63. О Всепетая Мати, Скоропослушницею нарекшаяся во святей иконе Твоей, Богородице Марие! Приими милостивно сие малое моление наше, еже от усердия нашего принесохом Ти с верою и любовию, и умоли приснопоклоняемую Троицу избавити ны геенны огненныя, тьмы несветимыя и мучения вечнаго, да предстательством Твоим унаследим Царствие Небесное и сподобимся со святыми пети Богу: аллилуиа.
64. К Богородице притецем, сущии в бедах, и святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся, Тебе бо раби Твои в нуждах готовую Помощницу имамы.
65. В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.
66. Избранней от всех родов, небеси и земли Царице, Пресвятей Богородице Одигитрии, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством благодарственное пение приносим Ти, раби твои. Ты же, Всемилостивая наша Заступнице, от всяких нас бед и скорбных обстояний свобождай и к Царствию горнему путеводствуй, да зовем Ти: радуйся, Богородице Одигитрие, христиан упование!
67. О Всепетая Мати, Царице Всемилостивая Дево Богородице Одигитрие! Приими малое сие моление наше и принеси е Сыну Твоему, Матерне умоляя Его благость, да помилует нас грешных и недостойных, и Твоего ради всесильнаго ходатайства, избавит нас мучения вечнаго, сподобит Царствие Небесное получити и тамо со Ангелы воспевати Богу: аллилуиа.
68. Избранней от всех родов Божией Матери и Владычице небеси и земли, избавляющей нас от всякия нужды, благодарственное приносим пение. Ты же, Всемилостивая Госпоже Богородице, приими наше усердное моление, сохрани нас от глада и пагубы, даруй земли нашей плодоносие, Питательнице и Спорительнице нив и хлебов наших, да радующеся всегда зовем Ти: радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
69. О Всепетая Мати, рождшая всех святых Святейшее Слово! Нынешнее наше приемши приношение, избави люди, к Тебе прибегающия, от всякия нужды, глада душевнаго и телеснаго, смертоносных болезней и всякаго зла и вечныя изми муки, да с лики ангельскими непрестанно поем Богу: аллилуиа.
70. Пречистая Дево Марие, Мати Царя небеси и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения и подаеши им вся обильно к наслаждению. Спорительнице сущи хлебов им, избавляя их всякия нужды и утеснения и устрояя им, рабом Твоим сущим, избавление вечныя муки и жизнь вечную.
71. Избранней от Всевышняго, грешных Споручнице, преклоняющей на милосердие Сына Своего, да спасет яже созда рукою Своею, благодарственное пение приносим Ти, Мати Дево и Владычице, о явлении дивныя Твоея и чудотворныя иконы; Ты же яко предстательство ко Господу имущи, потщися от обстояний многообразных избавити ны и вечное спасение нам соделати, да, воспевающе, вопием Ти: радуйся, грешным Споручнице, всегда о нас руце Свои в поручение Богу приносящая.
72. О Всепетая Мати, Всеблагая Споручнице спасения грешных, Богородице Дево! Приими милостиво и нынешнее наше моление, еже от усердия нашего во благодарение Ти принесохом, и испроси нам у Всещедраго Бога в вере православной непоколебимость, в любви христианской преуспеяние и грехов наших прощение, да предстательством Твоим унаследим Царствие Небесное и сподобимся со всеми святыми пети Богу: аллилуиа.
73. Умолкает ныне всякое уныние и страх отчаяния исчезает, грешницы в скорби сердца обретают утешение и небесною любовию озаряются светло: днесь бо Матерь Божия простирает нам спасающую руку и от Пречистаго образа Своего вещает, глаголя: Аз Споручница грешных к Моему Сыну, Сей дал Мне за них руце слышати Мя выну. Темже, людие, обремененнии грехи многими, припадите к подножию иконы Ея, со слезами вопиюще: Заступнице мира, грешным Споручнице, умоли Матерними Твоими молитвами Избавителя всех, да Божественным всепрощением покрыет грехи наша и светлыя двери райския отверзет нам, Ты бо еси предстательство и спасение рода христианскаго.
74. Тебе, милосердия источнику присно текущему и Споручнице грешных, недостойнии раби Твои, Богородице, припадающе, скорбяще, вопием Ти: спасай нас от бед, Владычице, и Матерним Твоим ходатайством испроси всем нам вечное спасение.
75. Честное жилище бывшее неизреченнаго естества Божественнаго выше слова и паче ума и грешным еси Споручница, подаваеши благодать и исцеление, яко Мати всех Царствующаго: моли Сына Твоего получити нам милость в День Судный.
76. Взбранной Воеводе, Владычице нашей Богородице, благодарственная пения восписуем о явлении чудныя Ея иконы, к Нейже притекающии присно избавляются от враг видимых и невидимых. Ты же, Госпоже Неба и земли, яко милосердная Мати, приими ныне малое сие моление наше и неотступну никогда же сотвори милость Твою от нас и заступление, охраняющи от всех бед и напастей, зовущих Ти: радуйся, Владычице, милостивая о нас пред Богом Заступнице.
77. О Всепетая Мати, рождшая всех святых Святейшее Слово, буди нам покров и защищение в жизни сей от врагов видимых и невидимых, от бед и скорбей, сохрани от искушений и грехопадений и в будущей жизни, на суде Сына Твоего и Бога нашего, буди Заступница и Ходатаица, избавляющи нас от вечнаго осуждения, да спасеннии Тобою, с лики ангельскими вопием Богу: аллилуиа.
78. Взбранной Воеводе, Владычице нашей Богородице, осенившей страну Российскую огнезрачным Своея иконы на Толге явлением, похвальное возглашаем пение; Ты же, о Богомати, яко имущая державу непобедимую, от всяких бед избави нас, зовущих: радуйся, Радосте наша, иконою Твоею нас присно утешающая.
79. О Всепетая Мати, рождшая Радость Вечную – Господа нашего Иисуса Христа, земным и небесным Спасителя! Приими благоутробно молебное пение наше, пред чудотворною иконою Твоею с верою и благоговением Тебе возносимое, и всесильными молитвами Твоими избави нас от временных бед и вечныя муки, сподоби же в благочестии и правоверии пожити зде, в земном житии, таможе, в будущем веце, в радости райстей, со всеми святыми, вечно воспевати Создателю нашему: аллилуиа.
80. Взбранней Воеводе, Богообрадованной Приснодеве Богородице, посетившей Гору Афонскую явлением чудотворным иконы Своея и многия милости Ею дарующей роду христианскому, похвальное возглашаем ныне пение; Ты же, о Богомати, яко имущая державу непобедимую и Матернее о нас попечение, предвари на помощь к нам и от всяких бед избави зовущих Ти: радуйся, Помощнице наша, Троеручною иконою Твоею нам помогающая.
81. О Всепетая Мати Сладчайшаго Искупителя нашего Господа Иисуса Христа! Вонми гласу молебному, Тебе пред святою иконою Твоею нами смиренно возносимому, и Матернею молитвою Твоею к рождшемуся от Тебе святых Святейшему Слову от всякия избави напасти и вечныя муки всех имя Твое молитвенно призывающих и о Тебе благодарно зовущих Богу: аллилуиа.
82. Избранней от всех родов Божией Матери и Царице, восходящей от земли к небеси, благоговейная пения о пречестнем Твоем Успении приносим раби Твои, Богородице. Ты же, яко имущая победу над смертию, от всяких нас смертоносных бед свободи, да зовем Ти: радуйся, Обрадованная, во Успении Твоем нас не оставляющая.
83. О Всепетая Мати Безсмертнаго Царя небесе и земли, Христа Бога нашего, живущая и по смерти, нынешняя приношения о всечестном Твоем Успении от нас приемши, в жизни сей и в смертнем успении нашем от всякия напасти, бед и муки избави и Небеснаго Царствия нас, Царице, сподоби, о Тебе вопиющих: аллилуиа.
84. Взбранное нам и дивное избавление даровася – Твой образ честный, Преблагословенная Дево, Владычице Богородице, яко избавльшеся от злых явлением его и к нему взирающе, восписуем Ти благодарственная раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Радосте наша, избави нас от всякаго зла и утоли наша печали.
85. О Всепетая Мати, Небесная Царице и Владычице, Дево Богородице, рождшая всех святых Святейшее Слово, нынешнее приемши приношение, утоли наша печали и избави нас от всяких напастей, бед, скорбей и вечнаго осуждения и грядущаго изми мучения и сподоби нас, рабов Твоих, в вечных райских селениях водворитися, зовущих: аллилуиа.
86. Утоли болезни многовоздыхающия души моея, Утолившая всяку слезу от лица земли: Ты бо человеком болезни отгоняеши и грешных скорби разрушаеши, Тебе бо вси стяжахом надежду и утверждение, Пресвятая Мати Дево.
87. Взбранней Воеводе, Пренепорочней Деве Богородице, Заступнице нашей и Предстательству христиан непостыдному, явлением чудныя иконы Своея радование подавшей земле Российстей и вся верныя чада Церкве просветившей, благодарение усердно приносим Ти, Богородице, и припадающе пречудному образу Твоему умильно глаголем: спаси, Госпоже, и помилуй рабы Твоя, зовущия: радуйся, Матерь Божия, Предстательнице и Заступнице наша Усердная.
88. О Премилосердая Заступнице наша, великия ради милости Твоея даровавшая отечеству и граду нашему чудотворную икону Твою во освящение, утешение и ограждение наше, нынешнее приемли славословие, от всякаго злаго обстояния избави рабы Твоя и всех нас вечных мук свободи, устнами, душею же и сердцем вопиющих: аллилуиа.
89. Пришествием честныя Твоея иконы, Богоотроковице, обрадованный днесь богохранимый град Кострома, якоже древний Израиль к кивоту Завета, притекает ко изображению лица Твоего и воплотившагося от Тебе Бога нашего, да Твоим Матерним к Нему предстательством присно ходатайствуеши всем, под сень крова Твоего прибегающим, мир и велию милость.
90. Благодарственная приносяще Ти, раби Твои, Богородительнице, о всех, имиже благодеяла еси граду нашему, из глубины души взываем к Тебе: не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.
91. Избранней от всех родов Божией Матери, небеси и земли Царице, освятившей род человеческий пришествием к нам во всечестнем Рождестве Твоем, благоговейная пения приносим Ти раби Твои, Богородице; Ты же, яко пришедшая на утешение и спасение наше, от всяких нас бед свободи, да зовем Ти: радуйся, Пречистая, весь мир Рождеством Своим возвеселившая.
92. О Всепетая Мати, от неплодове рождшаяся на спасение миру, нынешняя наша о всечестнем Рождестве Твоем приемши приношения, не остави нас во время живота нашего, от всякия напасти и плена вражия избави нас и от неплодства душевнаго разреши всех, о Тебе вопиющих: аллилуиа.
93. Избранней Предвечным Царем от всех родов, Преблагословенней Деве Богородице, рождейся от неплодове на радость всему миру, яко всемощной Заступнице и неусыпаемой Молитвеннице, выну припадающей к Престолу Сына Своего и Бога нашего с Матерним дерзновением за весь род христианский, ныне радостно сошедшеся в Божественнем храме Богоотроковицы, плотию младенствующей во спасение наше, достойное поклонение со благодарением приносим. Ты же, о Всеблагая, призри на моления с верою и любовию вопиющих Ти: радуйся, Радосте наша, спаси нас от вечныя смерти преславным Твоим Рождеством.
94. О Всепетая и Богообрадованная Дево Марие Богородице, рождшаяся на радость и спасение миру, призри милостиво на предстоящих честному образу Твоему, прости нам грехи наша, любвеобильная Мати, и вознеси к Сыну Твоему и Богу нашему теплыя моления за вся люди Твоя, покрый нас ризою Твоею от всякаго зла и настави нас на путь заповедей Христовых, да избавльшеся Тобою от вечныя смерти, радостно вопием Богу: аллилуиа.
95. Избранней Предвечным Царем Богоотроковице Марии, Ангелов и человеков Царице, пришедшей иногда в храм Господень во Святая святых, на обручение девства Своего Жениху Небесному воспитатеся в Божие Жилище, достойное поклонение усердно Тебе приносим; Ты же, яко многомощная Заступница наша, от всяких нас бед и скорбей свободи, да с любовию и умилением Тебе вопием: радуйся, Богоизбранная Отроковице, вхождением во храм двери райския нам отверзающая.
96. О Всепетая Богоотроковице, пришедшая во храм Господень воспитатися во Святая святых в Божие Жилище, нынешнее наше о всечестнем Введении Твоем приемши приношения, избави нас от всякия скорби и напасти и искушений вражеских, очисти ны от всякия скверны плоти и духа и сохрани нас до скончания нашего в целомудрии и чистоте, да освященнии Тобою достойны будем введения во обители райския с мудрыми девами, с нимиже да воспоем о Тебе Богу: аллилуиа.
97. Избранней в Предвечном Совете Богоотроковице Марии послужити велию таинству Боговоплощения, сияющей девственной чистотою паче высшия небесныя чистоты, благоговейныя пения принесем Тебе, Богородице, о всерадостном от Архангела Благовещении Твоем. Ты же, яко обрадованная и радость падшим людем подати могущая, избави нас от всяких бед и греховныя печали и возведи нас к небесней радости, да с Гавриилом вопием Тебе: радуйся, Благодатная, Господь с Тобою.
98. О Всепетая Параклита Невесто, Чистая брака не познавшая Дево! Архангела красотою девства удивившая и Богу Слову плоть нетленно днесь взаимодавшая, нынешняя наша приемши приношения о всерадостном от Гавриила Благовещении Твоем, Христу Богу обрученныя в девстве сохрани, всех же в чистоте укрепи и от бед избави, да свободшеся Тобою от вечных мук, Тобою рай да обрящем, идеже вси да воспоем о Тебе Богу: аллилуиа.
99. Днесь спасения нашего главизна, и еже от века таинства явление: Сын Божий Сын Девы бывает и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.
100. Возбранных Сил небесных радость и хваление, всего же рода человеча исправление, ублажаем Тя, Пречистая Дево Мати! Ты же наше упование единое, ниспосли душам отраду благодатную, да поем Тебе, образ дивный Твой чтущии: радуйся, Божия Мати, Невесто Нетленная, светлая наша Отрадо.
Сотница четвертая
1. О Всепречистая Дево, Светлая наша Отрадо, Сладчайшего Сына нетленная Мати! От всяких бед и скорбей ограждай нас, от будущих мук нас избави, Благая, радости же вечныя сподоби нас у горняго Престола воспевати: аллилуиа.
2. Яко покров благодатный и спасительный, стяжахом честную Твою икону, Богородице, на сию убо со умилением взирающе, Тебе вопием, Владычице: ниспосли нам отраду и утешение, на Тя бо упование возлагаем, грешнии и смирении, на Твое предстательство надеемся, недостойнии. Ускори нас избавити от бед и скорбей и умоли Сына Твоего, Христа Бога нашего, помиловати и спасти души наша.
3. О Преблагословенная Богородице Дево, поклоняяся Твоему пречистому образу, Тебе поем хвалебную песнь, Тебе приносим свои нужды, горе и слезы. Ты же, о кроткая Заступнице наша, Тебе так близки земныя печали, приими наша воздыхания, помози нам и от бед спаси. Неустанно бо и со умилением зовем Ти: радуйся, Мати Божия, Цвете Неувядаемый.
4. О Неувядаемый Цвете, о Всепетая Мати Марие, рождшая всех святых Святейшее Слово, нынешнее наше приемши приношение, от всякия избави напасти всех и Небеснаго Царствия нас, Царице, сподоби, о Тебе вопиющих: аллилуиа.
5. Радуйся, Богоневесто, жезле тайный, Цвет Неувядаемый процветший, радуйся, Владычице, Еюже радости наполняемся и жизнь наследствуем.
6. Избранная от всех родов Заступнице вселенныя, похвальный глас Твоих рабов приемши, Всеблаженная, избави нас от всяких бед, да пред иконою Твоею и мы архангельский привет поем усердною душею: радуйся, всем радостем Ты еси радость, Всеблаженная.
7. О Мати Всепетая, всем во спасение даждь, Всеблагая, сердец умиление, да Божиим страхом всегда ограждаеми, избегнем губительных сетей борца, и тако Твоими мольбами спасаеми, во веки восхвалим Благаго Творца: аллилуиа.
8. Возбрани врагом нашим озлобляти нас и от Господа нашего отлучити конечне, а нас научи пети Тебе весело: радуйся, Избавительнице, от горя, бед и гибели спасающая нас, бедствующих.
9. О Всепетая и Вселюбимая наша Мати, умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу, прощающему нас: аллилуиа.
10. Яко пресветлая звезда, просия Божественными чудесы святый образ Твой, Избавительнице, лучами благодати и милосердия Твоего озарив в нощи скорбей сущих. Подаждь убо и нам, Всеблагая Дево, избавление от бед, исцеление недугов душевных и телесных, спасение и велию милость.
11. Избавление приносящая всем, от сердца Тебе призывающим, принеси избавление скорое и нам, в лютых бедах погибающим и в Тебе Единой избавление наше о Бозе полагающим.
12. Ко иконе Твоей, Пресвятая Госпоже, бедствовавшие с верою притекше заступлением Твоим избавившая от злых! Но яко Матерь Христа Бога, и нас свободи от лютых обстояний временных и вечных, да зовем Ти: радуйся, Избавительнице от всех бед. Аминь.
13. Избранней от всех родов Божией Матери и Царице, милостиво внемлющей молитвам болящих и от водных источников токи целебная изливающей страждущим, благодарственное приносим пение. Ты же, Всемилостивая Целительница, приклонися к благоутробным гласам нашим хвалебным и от всяких недугов душевных и телесных свободи нас, зовущих: радуйся, Живоносный Источниче, вся наша болезни исцеляющая.
14. О Всепетая Мати, Небесная Царице и Владычице, Дево Богородице! Рождшая нам Христа, Сына Божия, изволившаго, нашего ради спасения, снизойти на землю и воплотитися от Духа Свята и от Тебе, Пресвятой Девы, и вочеловечитися; услыши наша усердныя молитвы и всех здесь предстоящих со слезами и воздыханиями молящихся помилуй: даруй нам всем по коегождо прошению помощи, да никтоже от нас отыдет от Твоего Божественного Лика тощ и не услышан, но вси, получивши Твоя милости, благодарственно о Тебе вопием нашему Богу: аллилуиа.
15. Почерпем, человецы, цельбы душам и телом молитвою, Река бо всем предтечет – Пречистая Царице Богородице, источающи нам чудную воду и измывающи сердец черности, греховныя струпы очищающи, души же освящающи верных Божественною благодатию.
16. От неистощимаго Твоего Источника, Богоблагодатная, подаеши ми, точащи, воды Твоея благодати, приснотекущия паче слова, яко бо Слово рождшая паче смысла, молю Тя, ороси мя Твоею благодатию, да зову Ти: радуйся, Водо спасительная.
17. Избранной от всех родов Владычице Богородице, благодатную помощь нам являющей, похвальная восписуем Ти раби Твои, Богородице. Ты же, яко Преблагая Мати Божия, излей на нас великия и богатыя милости Твоя, недуги наша исцели и скорби утоли, да благодарственное зовем Тебе: радуйся,
Владычице, Живоносный Источник верным изливающая.
18. О Всепетая Мати, Живоносный Источник Твой миру давшая, от негоже изливаеши нам великия и богатыя милости, приими благодарственное сие моление наше, даруй нам источник живота нынешнего и грядущаго, да выну зовем Тебе: аллилуиа.
19. Днесь притецем, вернии, к Божественному и цельбоносному образу Пресвятая Богородицы, излиявшия капли Своих излияний и людем верным чудесе показавшия, яже мы видяще и слышаще духовно празднуем и любезно вопием: исцели наши недуги и страсти, якоже и каркинския и тмочисленныя страсти исцелила еси; темже молим Тя, Дево Пречистая, моли воплощеннаго из Тебе Христа Бога нашего спастися душам нашим.
20. Избранней от сложения мира Пресвятей Деве Марии Богородице, яко воистинну плотию рождшей Иисуса Христа, Спаса и Бога нашего, яко Владычице всея вселенныя, зело возлюбившей род преподобных Христа и взявшей под Свой державный покров их святыя обители, похвальная приносим пения; Ты же, о Всечестная наша Мати Игумения, храни, спасай нас от всех врагов видимых и невидимых, да зовем Ти: радуйся, Пресвятая Богородице Дево, Святой Горы Афона и всея вселенныя православных обителей Всечестная Игумения.
21. О Всепетая наша Мати Игумения, Преславная Владычице Богородице, приими сии моления, от всея души Тебе ныне нами возносимыя, и сподоби нас в чине Ангельском достигнути Небеснаго Царствия, идеже вси святии Ангели и человецы воспевают непрестанными гласы хвалу Пресвятей Троице Богу: аллилуиа.
22. Предстательство страшное и непостыдное, не презри, Благая, молитв наших, Всепетая Богородице, Милостивая верных Домостроительнице, утверди православных жительство, спаси страну нашу и всех православно живущих в ней защити, зане родила еси Бога, Едина Благословенная.
23. Избранней от всех родов Царице и Владычице похвальныя песни принесем, яко Ходатаице и Заступнице рода христианскаго. Ты же, яко Благая Предстательница пред Господем, умоли Сына Твоего и Бога нашего даровати нам наследие благ вечных, да радующеся о Тебе взываем: радуйся, Премилосердная Владычице, предстательство наше и всерадостное заступление.
24. О Пресвятая Владычице, Дево Богородице, Ангельскими чинми на небеси песнословимая, приими и от нас, недостойных раб Твоих, сие малое моление, в похвалу Ти приносимое, и от падений греховных нас избавляеши, наследниками Царствия Небеснаго соделай, да с Тобою во веки поем Богу: аллилуиа.
25. Помощи от Тебе требующия не презри, Владычице, и милосердия бездну отверзи всем притекащим к цельбоносней иконе Твоей, печали наша житейская утоли, Всещедрая, и от юдоли сея плачевныя к радости вечней верныя Твоя престави: Тебе бо вси стяжахом надежду и утверждение, милости источник, покров и спасение душ наших.
26. Величия Твоя кто исповесть, Пресвятая Дево, Творца всех Христа Бога рождшая? Едина бо еси Мати и Дево преблагословенная и препрославленная, упование наше, источник благостыни, верным прибежище и миру спасение.
27. Избранней от всех родов Божией Матери и Царице пред Пречистым Ея образом со умилением хвалебная пения приносим. Ты же, яко имущая к роду христианскому милосердие неизреченное, от бед и скорбей избави всех нас, Тебе зовущих: радуйся, Невесто Неневестная.
28. О Всепетая Мати, Пресвятая Госпоже, Дево Богородице, не отрини смиренно приносимое Тебе ныне пред чудотворным образом Твоим сие моление наше, презирающи бездну грехов наших, избави всех нас от бед и скорбей в житии сем и от грядущия вечныя избави муки нелицемерно о Тебе вопиющих Богу: аллилуиа.
29. Днесь светло красуется обитель Красногорская и с нею ликовствует Раифская пустыня, яко зарю солнечную, от востока возсиявшую, восприимши, Владычице, чудотворную Твою икону, еюже разгоняеши мглу искушений и бед от вопиющих верно: избави обитель нашу и вся страны христианския от всех навет вражиих и спаси души наша, яко Милосердая Заступница рода христианского.
30. Тебе, избранней от всех родов Божией Матери, благодарственное пение приносим, пришествием честныя Твоея иконы, Богородице, озаряеми, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.
31. Избранней от всех родов Владычице мира, превыше сил Небесных превознесенней, хвалебныя песни приносим раби Твои, Богородице; Ты же, яко имущая милосердие неизреченное, во святей иконе Твоей являемое, от всяких нас бед свободи, да с радостию зовем Ти: радуйся, земли Холмския отрадо и всему миру прибежище и заступление.
32. О Всепетая Мати, Царице неба и земли, ко Твоему пречистому образу прибегаем и поклоняющеся ему умильно глаголем: покрый нас кровом милосердия Твоего, избави нас от всяких бед, скорбей и напастей и умоли Сына Твоего в день праведнаго Суда Божия сподобити нас деснаго стояния со всеми святыми, да непрестанно поем Ему: аллилуиа.
33. Яко материнское благословение даровала еси, Пречистая Дево, пречудную икону Твою православным предком нашим на гору Холмскую, тако и ныне, презирая множество грехопадений наших, не остави нас, Всепетая Мати, но пребуди любовию с нами до скончания века и отверзи нам райския двери.
34. Пресвятей Деве Богородице, дивными иконами Своими яко звездами Церковь Православную украсившей и православным людем земли Холмския пречудный образ Свой даровавшей, благодарственное воспеваем пение. Ты же, Пречистая, укрепи нас в православней вере, да зовем Ти: радуйся, Царице небесе и земли и любящая Мати всех с верою чтущих Тя.
35. Избранней от всех родов Пресвятей Деве Богородице, явившейся некогда клирику болящу во еже исцелити его от болезни лютыя, похвальное приносим пение. Ты же, Всемилостивая Владычице, яко имущая державу непобедимую, от всяких бед, скорбей и болезней свободи ны, зовущия Ти: радуйся, Благодатная, Целительнице душ и телес наших.
36. О Всепетая Мати Сладчайшаго Господа нашего Иисуса Христа, милостивно приими сие малое моление наше, избави нас от всякия напасти, болезни, внезапныя смерти и сподоби нас наследники быти Царствия Небеснаго и со всеми святыми воспевати Сыну Твоему и Богу нашему: аллилуиа.
37. Яко Пресветлая Звездо, просия Божественными чудесы святый Твой образ «Целительнице», подаждь убо и нам, Богородице Марие, исцеление недугов душевных и телесных, спасение и велию милость.
38. Любовию, Чистая Дево, Твою святую икону почитающим и Божию Тя истинную Матерь прославляющим и верно поклоняющимтися Целительница явися, всякое зло и болезни от сих удаляющая, яко Всемогущая.
39. Избранней от всех родов Преблагословенней Деве, похвальное приносим Ти пение, яко Мати сущи Бога, земнородным явилася еси Милосердная Матерь, страждущим подающи отраду, болящим различными недугами исцеление и от наветов вражиих защиту, всем же молящимся Тебе скорое услышание, темже в радости и умилении вопием: радуйся, Радосте наша, избави нас от всякия нужды и печали.
40. О Всепетая Мати, Царице Небесная, рождшая Христа Сына Божия и Спасителя всему миру, приими ныне от всего сердца нашего сие приносимое Тебе моление и всесильным Твоим предстательством сохрани нас от всяких бед и напастей в жизни сей и сподоби нас в блаженстве вечном со всеми святыми хвалу Богу воспевати: аллилуиа.
41. Богорадованная Владычице, Препрославленная Мати щедрот и человеколюбия, Всемилостивая о всем мире Ходатаице! Прилежно раби Твои ко Твоему предстательству прибегаем и, ко пречудному образу Твоему со умилением припадающе, молимся: молитву теплую Сыну Твоему и Богу нашему сотвори, о Всепетая Царице Богородице, да от всяких болезней и печалей нас Тебе ради избавит и от грехов всяких свободит, Царствия Своего Небеснаго наследники ны покажет: велие бо и неизреченное яко Мати к Нему дерзновение имаши и вся от Него испросити можеши, Едина во веки Преблагословенная.
42. Твоего предстательства уверение и милосердия Твоего явление икона Иерусалимская нам, Владычице, показася, пред нею же души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.
43. Не отрини, о Милосердая Мати, слез и воздыханий наших, но прошения наша милостивно приимши, пред Иерусалимскою иконою Твоею молящихся людей веру укрепи, умилением сердца их исполни и крест земнаго жития нести им помози, елика бо хощеши, можеши.
44. Избранней Воеводе не умолчим никогда глаголати мы, недостойнии, Всесвятая Дево, рождшая на спасение ваше Радость вечную, всякое уныние и печаль отжени от нас, да зовем Ти: радуйся, Радосте наша, во объятиях Своих Радость всего мира носившая.
45. О Всепетая Мати, Пречистая Госпоже Дево Богородице! Приими сие малое моление наше, Заступнице крепкая сущих в скорбех и печалех, умоляем Тебя Честным и Животворящим Крестом Сына Твоего, Господа нашего Иисуса Христа: подаждь нам дух сокрушенный, сердце смиренное, слезы умиления, многих согрешений наших прощение и радость неувядаемую, да поем в горнем Иерусалиме Спасителю Богу: аллилуиа.
46. От святыя иконы Твоея радости неизреченныя преисполнила еси сердце благочестивыя жены. О Пречистая Владычице мира, Всенощная Царице радосте, Приснодево твари, егда возвратила оной и мужа, и сына, и достояние ея, такожде и всем нам милосердствуеши, даруй исполнение благих желаний, источая приснотекущий источник радости молящимся Тебе и вседушно вопиющим: Радость всему миру родившая, радости исполни неоскудевающия чтущих Тя.
47. Избранней от дщерей человеческих Материю быти Христа Бога нашего, принесем от любви нашея песни хвалебная. Ты же, Сына Божия неизреченно родившая и, яко Младенца, млеком питавшая, сохрани поющих Тя от обышедших нас зол, скорбей и напастей, да зовем Ти немолчно: радуйся, Богородице Дево, Млекопитательнице, милостию Твоею нас присно питающая.
48. О Всехвальная Богородице Дево, нашего Господа и Владыку млеком питавшая! Не презри сего скорбнаго моления нашего, но умоли Сын Твоего, да дарует нам грехов прощение, болезней исцеление, да сохранит от глада, мраза, смертоносныя язвы и нечаянныя смерти и от всех бед и обстояний, да избавльшеся сих, радуяся зовем Ему: аллилуиа.
49. Без семене от Божественного Духа волею же Отчею зачала еси Сына Божия, от Отца без матере прежде век суща, нас же ради, из Тебе без отца бывша плотию, познала еси Младенца и млеком питала еси. Темже не престай молити избавитися от скорбей душам нашим.
50. Избранней от всех родов Пресвятей Госпоже Деве Богородице благодарственная пения приносим Ти, раби Твои, яко прославила еси Божественный образ Твой чудодействием. Ты же, Всемилостивая Владычице, яко имущая державу непобедимую, от всяких нас бед свободи, да зовем Ти: радуйся,
Владычице, иконою Твоею благодать и милость нам являющая.
51. О Всепетая и Всемилостивая Мати, приими ныне молебное пение наше, пред чудотворною иконою Твоею с верою и благоговением Тебе возносимое. Призри милостивно на веру и упование наше и всесильными Твоими молитвами избави нас от всякия напасти, болезни, внезапныя смерти и сподоби в блаженстве вечном со всеми святыми хвалу Богу воспевати: аллилуиа.
52. Избранней Владычице и Заступнице рода христианскаго, знамениями чудес дивных от святыя Своея иконы в стране нашей возсиявшей, благодарственная и умиленная пения немолчно приносяще, яко Матери Господней, в печалех наших и болезнех вопием: радуйся, скорая Утешительнице и Целительнице, любовь Свою и милосердие нам являющая.
53. О Всепетая Мати, Божественная славо и красото небесе и земли, неисчерпаемое чудес море, Заступнице и Хранительнице рода христианскаго и святыя обители Твоея, приими недостойное сие, обаче благодарное, от сокрушеннаго сердца возносимое к Тебе моление, яви нам до конца Матернее Твое милосердие, в скорби и напасти не остави нас сирых, и в час смертный Твоим теплым предстательством причастники вечнаго блаженства сотвори, да, памятуя выну Твоя дивная о нас заступления, со всеми святыми не престанем воспевати Богу: аллилуиа.
54. Веселися, земле Полтавская и все отечество наше православное, се бо яко светозарное солнце, явися пречудная икона Преблагословенныя Богоматере, мир озаряющи множеством чудес Своих; Тою убо обретаем яже на земли вся благая и полезная и сущих на небеси сокровищ сподобляемся, сего ради вопием: радуйся, похвало наша приснопоклоняемая, спаси ны, Тебе молящаяся, единая надеждо и радование вечное поющих Тя.
55. Боголепно во смирении красуется обитель Козельщанская, осеняемая предивным образом Владычицы Пречистыя небесе и земли, Царицы Богородицы, от него же источники благодати и чудес обильно изливаются, и усердно притекающии исцеления верою приемлют, и невернии верою крепкою сердца исполняют, и мы, раби Твои, Богомати, благодарне вопием Ти: радуйся, предстательство христиан непостыдное и обители Твоея красото и радование.
56. Избранней от всех родов Царице и Владычице мира, милостию Своею страну сию озаряющей, похвальное пение приносим Ти, Богородице; Ты же, яко имущая дерзновение к Сыну Твоему и Богу, от всяких нас бед свободи, да зовем Ти: радуйся, Пречудная Владычице, земли Муромския и Рязанския Милостивая Заступница.
57. О Всепетая Мати, Всемилостивая Госпоже, Присноблаженная Царице, приими от нас, недостойных, малое сие моление, пред пречистым Твоим образом со слезами приносимое, и якоже древле прельщенныя вразумила еси и кающияся помиловала еси, тако и ныне тьму греховную в сердцах наших просвети, бурю страстей умири, вся раздоры и нестроения утоли и от бед избави всех, вопиющих Богу: аллилуиа.
58. Днесь светло красуется град Муром, яко зарю солнечную восприемши, Владычице, чудотворную Твою икону, к ней же ныне мы притекающе и молящеся Тебе взываем сице: о Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша, яко Милосерд.
59. Взбранная Помощница явилася еси, Владычице, даровав нам образ Твой, Пречистая, к нему же умильно взирающе, восписуем Ти благодарственная пения и радостно зовем Ти: радуйся, с верою молящихся пред честным образом Твоим от бед избавляющая.
60. О Всепетая Мати, рождшая небесе и земли Творца, нынешнее наше приемши малое к Тебе моление, избави нас от всякия беды и напасти и будущия изми муки о Тебе вопиющих: аллилуиа.
61. Пречистая Владычице Богородице, упование всех христиан понеже иного упования и надежды не имамы, разве Тебе, Всенепорочная Владычице моя, Госпоже Богородице, Мати Христа Бога моего. Тем же помилуй и избави мя от всех зол моих и умоли Милостива-го Сына Своего и Бога моего, да помилует окаянную душу мою и да избавит мя от вечных мук и сподобит мя Царствия Твоего.
62. Избранней от всех родов Божией Матери и Царице пред пречистым Ея образом, «Нерушимою Стеною» именуемым, благодарственное хвалебное пение приносим Ти, Богородице, Благодатная. Ты же, яко имущая силу нопостижимую и любовь несказанную, от всех нас бед и скорбей сохрани, да зовем Ти: радуйся, Богородице, Стено Нерушимая, Заступница наша и утешение.
63. О Всепетая Мати Господа нашего Иисуса Христа, приими ныне сие малое моление наше, огради нас от грехов и всякой скверны, избави нас от находящих на нас бед и нужд, сохрани от уныния и отчаяния, клеветы человеческой, болезней нестерпимых, да молитвами Твоими ставши на путь спасения вечнаго, благодарно воспоем Сыну Твоему: аллилуиа.
64. Яко нерушимую стену и всемощный покров стяжахом Ти раби Твои, Владычице Богородице, мрак грехов и скорбей отгоняеши. Тем же вопием Ти: мир мирови Твоему даруй и душам нашим свет и спасение.
65. Взбранней за ны Воеводе предстояще, благодарная восписуем Ти, Владычице, о явлении чудотворныя Твоея иконы. Ты же, яко благосердая ко всем, призывающим Тя, охраняй всех нас, недостойных, Твоим покровом, озари нас светом Твоея лучезарныя иконы, спасай нас от всех бед и напастей, да зовем Ти: радуйся, Солнца незаходимаго Мати, любовию Своею нас не оставляющая.
66. О Всепетая Мати, рождшая всех святых Святейшее Слово, призри всемилостивым Твоим оком на моления наша, не отврати лица Твоего от нас, помилуй ны, с верою поклоняющияся чудотворней иконе Твоей, избави ны от всякия скорби и нужды и умоли о наших гресех Сына Твоего и Бога нашего, да приносим Ти присно хвалебную песнь: аллилуиа.
67. Днесь яко солнце пресветлое возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно, Емуже молися, Царице Богородице, да сохранит вся грады и страны христианския невредимы от всех навет вражиих и спасет верой поклонявшихся Его Божественному и Твоему пречистому образу, Дево неискусобрачная.
68. Притецем, людие, к Деве Богородице Царице, благодаряще Христа Бога, и к Тоя чудотворней иконе умильно взирающе припадем и возопиим Ей: о Владычице Марие, присетивши страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.
69. Избранней Заступнице рода христианскаго, покрывающей и спасающей люди правоверный, иноком благоскорбящим Подательнице вечнаго радования, благодарственныя от души восклицаем пения. Ты же, яко нарекшаяся «Умиление», призри на ны милостивно и умиление нам даруй, да со дерзновением воспеваем Ти радостно: радуйся, Всеблагая Владычице, умиление и спасение наше.
70. О Всепетая Мати, Царице небесе и земли, иноков Благая Вратарнице, верных покров и умиление, нынешнее приемши пение, от всякаго избави ны злаго обстояния и не лиши ны радости Царства Небеснаго, да вопием прилежно: аллилуиа.
71. Избранная от рождества Своего Дево и по славном успении Своем в небесная вознесенная преславно, Служительнице избавления мира смиреннейшая, в сердце Своем о людех печаль имеющая, близкая Заступнице и Утешительнице всем труждающимся, обидимым и обремененным опора нерушимая Тебе ныне хвалебная пения по силе приносим, понеже явила еси от образа Своего милости предивныя людем Изборским, да взываем Тебе немолчно: радуйся, Богомати, в напастех Помощнице скорая.
72. О Мати единая, любовию весь мир содержащая в сердце Своем и пред Сыном Своим за ны ходатайствующая неумолчно, светло внемли молениям нашим, Тебе из глубины души смиренных и благодарных устен приносимым. Приими моление наше, не отыми покров заступления Твоего от мира греховнаго, зане преступления и грехи наши всегда пред нами. Твоим предстательством умножи силы наши, стезю греха миновати, поборов прелести и искушения пути блазненнаго и пространнаго, не остави нас сирыми в жизни нашей, вся дни труда и лишения исполнено. Да к Тебе в молитвах прилепляяся, вся дни жизни нашея твердо, радостно и благочестно пройдем, понеже Ты имаши силу низводити на нас, недостойных, благое изволение Владыки жизни и любве, Емуже ныне со умилением вопием: аллилуиа.
73. Избранней от всех родов Божией Матери и Царице, милостиво благоволившей икону Свою Озерянскую нам даровати и тою непрестанно христианом благодетельствующей, благодарственная пения приносим Ти и умиленно молим: приими, Мати Владычице, смиренныя молитвы раб Твоих, и яко имущая державу непобедимую, от всяких нас бед свободи, зовущих Ти: радуйся, Обрадованная, радость Твоего заступления всему миру дарующая.
74. О Всепетая Мати, без истления Бога Слова рождшая, вонми гласу молебному, пред святою иконою Твоею нами смиренно возносимому, и умоли Живоначальную Троицу и в жизни сей, и в смертнем успении избавити ны от всяких бед, скорбей и напастей и даровати нам блаженство вечное, да в радости выну воспеваем: аллилуиа.
75. Твоего предстательства уверение и милосердия Твоего явление, икона Озерянская нам, Владычице, показася, пред Нею же души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.
76. Избранней Небесным Царем, Превысшей и умных чинов, Всеблагой Царице, рода христианскаго Заступнице и от всех зол и напастей скорому вспоможению, вси мы, грешнии и в безмерных бедах сущии раби Ея, со слезами и умилением сердца принесем покаянная пения; Ты же, яко Премилосердная Мати наша, Сама духоносному молению настави нас и прияти сия воздыхания души нашея удостой: о, Благодатная, помилуй нас и спаси и пачесолнечною теплотою любве Твоея грехми умерщвленный наш дух оживи.
77. О Преблагословенная Мати, пред Еяже любовию точию льна курение и самое сильное желание наше, умилосердися на ны, Твоя многогрешныя раби, прости и помилуй вся ны Твоею любовию, молим Тя: помози, даруй избавление от отяготевших толико лет лютых зол и бед верному народу Твоему, сынами неверия порабощенному и растлеваемому. Твое избавление пошли, врачующее и наши недуги душевныя, да на благое и верное житие по благому закону Сына Твоего приидем мы и да, сердцем исцельшиися и о свете веры нашея святыя радующееся, сыновне из рода в род благодарною любовию и умилением воспеваем Всеблагому Отцу своему: аллилуиа.
78. Избранней от всех родов Пречистей Деве Владычице, источающей нескудные милости всему миру и сугубо стране нашей Российстей, похвальная восписуем о Ея чудесех, являемых в чудотворных Ея иконах. Ты же,
Обрадованная, не отрини наших песнопений, но приими их и подаждь радость нам, зовущим Ти: радуйся, Пречистая Дево, всемирная Славо и Радосте наша.
79. О Пречистая Дево, Владычице небесе и земли! Приими от всея души нашея возносимое Тебе сие хвалебное пение и сподоби нас, грешных, и в вечных селениях зрети Тя, нашу всемирную Славу и Радость всех радостей, поя Тебе и о Тебе Богу песнь великую, в вышних изрядно песнословимую: аллилуиа.
80. Избранная Промышлением Божиим на великое служение страждущему человечеству, преславно подвиг милосердия в узах жития земного смиренно несла еси, Мати Милосердия. Ты бо Сама вемы бури, скитания на море житейстем смиренно претерпела еси, темже искушенная по всячески можеши, Дево Пречистая, и искушаемым помощи. Мы же, земнороднии, волнами грозных страданий обуреваемии, молим Тя, всех скорбящих Радосте, помози нам, недостойным, любовию Твоею, отри слезы страдальцев, утиши стоны молящихся, ниспосли ласку Твою ожесточенным, дабы вселенная вся прехвально воззвала дивному величию Твоему: радуйся, Мати Милосердия, страждущих от скорбей избавляющая.
81. О Мати Милосердия, для утешения страждущих Великого Искупителя преславно рождшая, от нас, недостойных, сии мольбы с любовию приими, Десницею милости Твоея к страждущим сердцам милостивно простри, слезы плачущих с любовию отри и всем ищущим Материнския помощи Твоея даруй благия щедроты любвеобильного сердца Твоего, да во святыне дивных добродетелей Твоих восхвалим Отца Вседержителя, Сына Божия Искупителя и Духа Святаго Утешителя гласы преподобными: аллилуиа.
82. Избранную от корене Давидова Матерь Предвечнаго Света в песнех умиленно возвеличим и, яко истинней Богородице и Царице, поклонимся, спасаеми Тобою, Пречистая, со Архангелом зовуще: радуйся, Благодатная Марие, Господь с Тобою.
83. О Всепетая Мати и Дево, Царице Небесная, сие смиренное славословие наше приемши, покрый нас от скорби и бед святым покровом Твоим, прости нам прегрешения наша и умоли Всеблагаго Господа, Сына Твоего, да милостиво приимет нас в Небесное Свое Царствие, идеже воззовем Ему Тобою спасеннии: аллилуиа.
84. Взбранной Воеводе, Владычице нашей Богородице, державней Заступнице рода христианскаго, похвальная восписуем Ти, недостойнии; Ты же, Всеблагословенная Одигитрие, блуждающих настави нас на истинный путь спасения и избави от всяких бед и напрасной смерти, да Твоею помощию выну спасаеми из глубины душевныя благодарственно зовем Ти: радуйся, Мати Милосердия, покровом Твоим нас не оставляющая.
85. О Всепетая Мати, Премилостивая Владычице Одигитрие, нынешнее наше благоутробно приеши молебное пение, пред святою Твоею иконою Тебе приносимое, от всяких бед и напрасныя смерти избави всех и в блаженное жилище проведи нас, Всеблагая Путеводительнице наша, о Тебе вопиющих к Богу: аллилуиа.
86. Взбранной Воеводе рода христианскаго и страны нашея известней Избавительнице, хвалебная песни принесем, вернии, Деве Владычице Богородице; Ты же, яко имущая милосердие неизреченное, от всяких нас скорбных обстояний свободи, да с любовию зовем Ти: радуйся, похвало Табынская и всего мира Надеждо и Утешение.
87. О Всепетая Мати Христа Бога нашего, приими молитвы раб Твоих и мир испроси всем, с верою и любовию притекающим к иконе Твоей Табынской, и живот вечный даруй им, во умилении поющим: аллилуиа.
88. Наста днесь пресветлый праздник, Пречистая Дево, честныя Твоея Табынския иконы, Владычице, паче лучей солнечных возсия от источника приснотекущаго Христа Бога нашего, источающую целебныя дары с верою к ней притекающим, и сию Помощницу людем Своим дарова покрывати и спасати от всякия беды рабы Своя, едину Благословенную.
89. Избранней от всех родов Заступнице нашей и Царице, покровом Своея благости покрывающей пределы земли Дальнероссийския, благодарственная пения приносим Ти раби Твои, Богородице. Ты же, яко Всемилостивая Владычице, от всяких нас бед спаси и вечных мук свободи, да радующеся зовем Ти: радуйся, Царице Препрославленная, пределы Дальнероссийския земли милостию Своею не оставляющая.
90. О Всепетая Мати, рождшая всех святых Святейшее Слово, от Ангел восхваляемая на небеси, от человек воспеваемая на земли! Призри на смиренное наше моление пред пречистым Твоим образом и вся полезная даруй рабом Твоим, да спасаемии Тобою, вопием Богу: аллилуиа.
91. Днесь торжествует град Владивосток, и с ним сликовствуют вси пределы земли Дальнероссийския: сретая вновь обретенную икону Твою, Богомати, Порт-Артурскою нареченную, в благословение и знамение торжества христолюбивому воинству Дальней России дарованную, на ню же взирающе, вси зовем: Русь Святая, храни веру православную, в ней же твое утверждение.
92. Взбранной Воеводе, изрядней Заступнице нашей, Деве Богородице, явившейся во граде Владимире первосвятителю Российскому блаженному Максиму, Сына Своего Божественнаго на руках держащи и омофор святительский угоднику Своему милостивне подавшей, благодарственное приносим пение. Ты же, Благопрославленная, яко имущая милосердие неизреченное, от всяких нас бед и скорбей свободи, да зовем Ти: радуйся, Благодатная, с Тобою Господь, подаяй Тобою нам велию милость.
93. О Премилосердная Госпоже, Царице Богородице, явившаяся во граде Владимире святителю Всероссийскому блаженному Максиму и рекшая: «Рабе Мой Максиме! Добре пришел еси семо посетити град Мой»; приими смиренное сие моление наше, пред чудотворною Твоею иконою с любовию Тебе нами приносимое, и якоже древле, тако и ныне от всяких напастей, бед град Твой, святый храм Твой и Отечество наше добре сохрани и не престани молящи Егоже родила еси, да дарует нам прощение согрешений наших и Царствия Своего причастники сотворит всех, почитающих Тя и Богу вопиющих: аллилуиа.
94. Днесь светло красуется славнейший град Владимир, радостно совершая, Владычице, праздник явления Твоего святителю Максиму, в нем бывшаго. Сие ныне воспоминающе и молящеся Тебе, взываем сице: о Пречудная Владычице Богородице, молися Превечному Архиерею, Сыну Твоему, да непоколебиму утвердит Церковь Православную, град наш Владимир и всю Русскую землю в мире сохранит и спасет в правоверии души наша.
95. Призри на нас, Всепетая Богородице, возсияй просвещение сердцам помраченным и озари стадо Твое, Пречистая, елико бо хощеши и можеши, яко Мати сущи Зиждителя, и возопий молящим Тя: Аз есмь с вами и никтоже на вы.
96. Взбранной Воеводе, Владычице нашей Богородице, преславным явлением иконы Ея святыя люди богоспасаемаго града Киева дивно посетившей, благодарственное возглашаем пение. Ты же, яко Всеблагая Заступнице рода христианскаго, от всяких нас бед свободи и от всех враг видимых и невидимых защити, да с верою Тебе зовем: радуйся, Пренепорочная Богородице Дево «Призри на смирение», с высоты небесной на смирение рабов Твоих призирающая.
97. О Всепетая Мати Господа нашего Иисуса Христа, неисчерпаемое море Божественных даров Ты еси, Всесвятая Дево! Яко светоподательную лампаду, елеем милости исполненную, созерцаем Тя очами веры и, кротким сиянием Твоим озаряеми, любовию же Твоею присно согреваемии, Тебе, яко Благой
Заступнице нашей, со умилением глаголем: приими благоутробно молебное пение наше, пред чудною иконою Твоею с верою Тебе возносимое, и всесильными молитвами Твоими умоли, Владычице, избавитися нам, грешным, временных бед и вечныя муки, да спасеннии Тобою прославим и в будущей жизни Всесвятое имя Сына Твоего и Бога нашего, верно зовуще Ему: аллилуиа.
98. Необоримая Стена образ Твой и источник чудес, якоже древле от Него заступление Твое граду Пскову даровала еси, тако и ныне нас от всех бед и скорбей милостивно избави и спаси души наша, яко Любвеобильная Мати.
99. Пренепорочная Дево, отображение лика Твоего чтущия благодарныя дары приемлеши, живым и мертвым помогаеши, град и страну нашу спасаеши, и пред Сына Твоего молитвы приносиши и спасаеши всех нас.
100. Избранной Деве Марии, превысшей всех дщерей земли, Матери Сына Божия, Его же даде спасению мира, со умилением взываем: воззри на многоскорбное житие наше, воспомяни скорби и болезни, ихже претерпела еси, яко наша земнородная, и сотвори с нами по милосердию Твоему, да зовем Ти: радуйся, многоскорбная Мати Божия, печаль нашу в радость претворяющая.
Сотница пятая
1. О Всепетая Мати, изнемогавшая от скорби у Креста Сына Своего и Бога, внемли воздыханием и слезам нашим и избави от скорби, болезней и вечныя смерти всех, уповающих на неизреченное Твое милосердие и вопиющих Богу: аллилуиа.
2. Умягчи наша злая сердца, Богородице, и напасти ненавидящих нас угаси, и всякую тесноту души нашея разреши: на Твой бо святый образ взирающе,
Твоим состраданием и милосердованием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати Благосердная, в жестокосердии нашем и от жестокосердия ближних погибнути, Ты бо еси воистину злых сердец умягчение.
3. Избранней от всех родов Божией Матери, небеси и земли Царице, врачевство духовное всему миру подающей, благодарственная пения приносим о даровании Божественнаго сокровища, чудотворныя иконы Ея, «Прибавление ума» нареченныя, еюже ограждаеми, радуемся светло и с любовию взываем: радуйся, Всемилостивая Владычице, премудрость и разум верным людем Твоим дарующая.
4. О Всепетая Мати Присносущнаго Света и Отчия Премудрости, Ты еси свет омраченных, прибавление ума и радость сердец наших; услыши и приими моление нас, грешных, умудри нас, неразумных, и настави на пение и молитву пред иконою Твоею, «Прибавление ума» нареченною. Не престай молити о нас, недостойных рабех Твоих, славящих Тя и поющих Сыну Твоему и Богу: аллилуиа.
5. О Преславная Мати Христа Бога нашего, благих Подателя, милостию Своею всю вселенную сохрани, даруй нам, рабом Твоим, премудрость и разум, светом Сына Твоего души наша просвети, едина Всепетая, от Херувим и Серафим славимая.
6. Яко Единицы умом нас просвещающую, хвалим Тя, Пречистая, Мати Разума, всю вселенную держащаго, Красото мира видимаго и невидимаго, лучами жизни нас озаряющая.
7. Взбранной Воеводе и Благой Воспитательнице рода христианского, яко избавльшеся от злых, благодарственная восписуем Ти раби Твои, Богородице, имущая державу непобедимую, от всяких бед чадо мое свободи, да со слезами зову Ти: воспитай, Владычице, чадо мое достойна Небеснаго Царствия и наследником вечных благ его сотвори.
8. О Всепетая Мати Иисуса Сладчайшаго, приими сие малое акафистное моление в воню благоухания духовного о чаде моем и возьми его под Твой милосердный покров. Еще же даруй ему мыслити, ведати, слышати, глаголати и творити токмо тое, еже приближает к Тебе и Сыну Твоему и споспешествует вечному спасению. И посли ему в жизни сей привременней все полезное ко спасению души его, да зовет Богу: аллилуиа.
9. Новоявленней Твоей иконе предстояще вернии умильно, воспеваем Ти, Всецарице, раби Твои: ниспосли цельбы к Тебе притекающим ныне рабом Твоим, да вси радостно зовем Ти: радуйся, Всецарице, недуги наша благодатию исцеляющая.
10. О Всецарице Мати, рождшая всех святых Святейшее Слово, нынешнее наше приявши песнопение, от всякой смертныя болезни исцели ны и будущаго избави осуждения вопиющих: аллилуиа.
11. Образом радостотворным честныя Всецарицы, желанием теплым взыскающих благодати Твоея спаси, Владычице; избави от обстояний к Тебе прибегающих, от всякия напасти огради стадо Твое, к заступлению Твоему взывающе присно.
12. Избранной Предвечным Царем в наше верных спасение, небесе и земли Царице, благодарственныя похвалы приносим Ти, Богородице! Ты же, яко имущая державу непобедимую и милосердие неизреченное, от всяких нас бед свободи и вся благая нам даруй, да зовем Ти: радуйся, Мати Дево, всепетая христиан похвало.
13. О Всеблагая Мати Дево, Богородице, присно благодеющая нам во святей иконе Твоей, нынешнее приемши Тебе единей прикладное приношение, от всяких нас бед, напастей и скорбей временных и вечных избави и сподоби нас, рабов Твоих, в селениих райских водворитися, да во вся веки поем: аллилуиа.
14. Избранной от всех родов Пресвятей Деве Марии Богородице, яко воистину плотию рождшей Иисуса Христа, Спаса и Бога нашего, Владычице всея вселенныя, избравшей вторым земным жребием своим гору Печерскую и обитель для иноков на ней создавшую, похвальная приносим пения. Ты же, о Всечестная наша Мати и Заступница, храни и спаси обитель Твою и всех нас от враг видимых и невидимых, да зовем Ти: радуйся, Пресвятая Богородице Дево, Печерская похвало и наше утешение.
15. О Всепетая наша Мати, Преславная Владычице Богородице! Приими сия похвалы и моления, от скверных устен и нечистаго сердца возносимыя; сохрани Твою обитель, нашими грехми оскверненную; собери нас, расточенных, и сподоби в чине ангельстем достигнута Небеснаго Царствия и вкупе с преподобными Антонием и Феодосием и всеми угодники Печерстими прославляти вечно Тебе, нашу Матерь, и Сына Твоего и Бога и пети песнь: аллилуиа.
16. Днесь светло торжествует Печерская обитель и радуется явлением образа Богоматере безмерный лик печерских отцев, с нимиже и мы непрестанно вопием: радуйся, Благодатная, Печерская похвало.
17. Взбранной Воеводе и усердней Заступнице рода христианского, Пресвятей Деве Богородице, град Любеч явлением святыя иконы Ея прославльшей и чудесы, от нея бываемыми, духовно ны утешившей, благодарственное приносим пение; Ты же, Всемилостивая Царице, яко имущая державу непобедимую и милосердие неисчетное, от всяких нас бед и скорбей присно свобождай, да зовем Ти: радуйся, Мати Божия, и спаси на Тя уповающия.
18. О Всепетая Мати, Любечская похвало и наше заступление, приими милостиво сие малое моление наше, пред пречистым образом Твоим приносимое, и умоли Сына Твоего и Бога нашего избавити нас муки вечныя и сподобити радости святых, выну поющих Ему: аллилуиа.
19. Преблагословенная Царице, Пречистая Дево Богородице, прославльшая град Любеч угодника Твоего преподобнаго Антония Печерскаго рождением и чудотворныя иконы Твоея явлением, молим Тя, Всеблагая: моли за ны рождшагося от Тебе Царя, Христа Бога нашего, и Матерним Твоим к Нему предстательством избави нас от всякаго зла, недуги наша исцели, печали наша утоли и наследники яви нас Царствия Небеснаго, яко Милосердна.
20. Взбранная Воеводо, всего мира Утешительнице и Надеждо спасения рода христианскаго, к Тебе припадаем во вся дни жизни нашея, яко к источнику всех духовных дарований, и молим Тя: услыши нас, вопиющих к Тебе в часы дневныя и нощныя, в болезнех и скорбех, в нуждах и напастех, всегда в радости зовущих: радуйся, Владычице мира, иконою Твоею Песчанскою сердца наша утешающая.
21. О Всепетая Мати, приими от нас благодарное пение сие, Тебе возносимое. Буди нам в жизни сей Ходатаица пред Богом о жизни вечной, да выну благодарно восхваляем Тя и Богу поем: аллилуиа.
22. Люди верни, со дерзновением притецем к чудотворному образу Богоматери Песчанской, ибо она дарует граду сему и стране нашей велию милость и спасение душам нашим.
23. Избранную от всех родов Божию Матерь и Царицу Небесную, непрестанно у Престола Сына Своего молящуюся о нас, с любовию благодарно восхвалим. Восхотев во всех концех земли видети прославление величия Божия, возблаговолила еси, Преблагословенная, воздвигнути спасительныя обители Своя; тако и воззрев на страдания православных страны Прибалтийския, посетила еси край сей Своею благодатию, да утешенные Тобою зовем Ти сице: радуйся, Любвеобильная, слезы сердец наших милостивно осушающая.
24. О Всепетая Мати, Любвеобильная Заступница православных людей Твоих, страждущих в безумнем мире сем, призри на скорби и нужды наша, услыши моления наша, во смирении из глубины усталых сердец Тебе возносимыя, очисти грехи наша и сподоби нас до конца дней наших нелицемерно взывати Воплотшемуся от Тебе Спасителю нашему: аллилуиа.
25. Утешение всех скорбящих, скорая Помощнице в туге сердечней к Тебе прибегающим, услыши нас, Владычице, и даждь нам на пути к жизни вечней душ и сердец от скверн очищение и яко елень на источники водныя к Царству Небесному неустанное стремление.
26. Пресвятая Богородице Дево, утоли жажду спасения страждущия души моея у Источника вод живых – Божественнаго Слова, Сына Твоего, Христа Бога нашего, призри на любящих и славящих Тя, Пречистая, и покрый нас покровом милосердия Твоего от всяких зол, тревог и бурь моря житейскаго.
27. Избранной Богом Владычице всей твари, благословенней Марии Деве Богородице, приносим смиренное поклонение святому Твоему образу. Ты же, о Пренепорочная, приими молитву недостойных раб Твоих, почитающих Крестныя страдания Сына Твоего и Бога нашего, со умилением зовущих Ти: радуйся, Невесто Неневестная.
28. О Всепетая Мати, приими недостойных раб Твоих молитву, призри на предстоящия люди пред чудотворной иконою Твоею и усердно поклоняющихся Пречистым Страстем Сына Твоего, просящих избавления от вечныя муки, вопиющих Тебе: аллилуиа.
29. Днесь возсия неизреченно царствующему граду нашему Москве икона Богоматере и, яко светозарным солнцем, пришествием тоя озарися весь мир, небесныя Силы и души праведных мысленно торжествуют, радующеся; мы же, на ню взирающе, к Богородице со слезами вопием: о Всемилостивая Госпоже, Владычице Богородице, молися из Тебе воплощенному Христу, Богу нашему, да подаст мир и здравие всем христианом по велицей и неизреченней Своей милости.
30. Днесь, яко солнце пресветло, просия в Российстей стране, в конце ея полуденнем, всечестная икона Твоя, Владычице, юже благоверный великий князь Димитрий в град Москву принесе. Светло празднуем, благовернии людие, честнаго образа пришествие, молящеся прилежно: Владычице Богородице, молися
Сыну Твоему, Христу Богу нашему, избавити град Москву, страну нашу и вся православный христианы от варварскаго пленения, и междоусобныя брани, и всех навет вражиих, Тебе бо Едину Заступницу имамы.
31. Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, выну приходящих к ней с верою и любовию и молящихся усердно Твоему, еже о Сыне Твоем и Бозе, величию. Слава Богу, Арсением сию давшему нам, слава возвратившему от Новаграда, слава дающему тою всем исцеления.
32. Заступнице земли Российския от нашествия Свейскаго и непрестанная за нас Молитвеннице, мир земли и душам нашим у Господа испроси, да святится в нас имя Божие во веки.
33. Бысть чрево Твое святая трапеза, имущи Небеснаго Хлеба, Христа, от Негоже всяк ядый не умирает, якоже рече всяческих, Богородице, Питатель.
34. Предстательнице нератная, о Одигитрие готовая! Тверския земли и града Москвы красота и слава, днесь в кров Твой вси прибегаем и умильно вопием Твоему крепкому заступлению, просяще избавления от злых наветников Православия, присно борющих нас, и получити, Богородительнице Чистая, токи неисчерпаемых чудесных исцелений от Твоея пречудныя иконы молитвой предстоящего пред Тобою Мирликийского чудотворца Николая, да усердно вси Твое проповемы наше ограждение.
35. Яко стену необоримую, источник милосердия, упование земным и заступление, Мати всяческих Творца Всесветлая, Тя стяжавши, раби Твои, Богоотроковице, на мольбу нашу ныне умилосердися, иже от врагов Православия насилование скоро и невозвратно разори мечом Божественныя Твоея и святителя Николая молитвами и не остави прославляющия люди и стада Твоя погибнути, яко вся возможно Тебе, Чистая Богородице Неискусобрачная и Мати Зиждителя сущи и Всепетая, да усердно вси Твое проповемы наше ограждение.
36. Всепетая и всеславная Царице Богородице, Мати всея твари Содетеля, христианская Надеждо и Заступнице, печальных утешение, ненадеющихся и отчаявшихся скорое надеяние, молим Тя: милостива буди нам, грешным, и не остави раб Своих, и не отрини моления верных, в скорбех и бедах пред честным образом Твоим избавления требующих.
О Владычице, Благая Помощнице! Ризою Твоею честною нас защити и от всех зол избави, молящи Сына Твоего, Христа нашего, да спасет души наша, яко Милосерд.
37. Дева днесь предстоит Сыну, руце Свои к Нему простирающи, святый князь Андрей радуется и с ним Российская страна торжествует, нас бо ради молит Богородица Превечнаго Бога.
38. Ко источнику приснотекущему милосердия, Пречистей Деве Богородице, притецем, людие все, священницы же и иноцы, мужие, и жены, и чада, здравии и болящии, в покаянии вопиюще и умильно глаголюще: Владычице, помози грешным рабом Твоим, яви, яко Благая, славу Твою, присно потщися умилосердитися на ны, испросити очищение душ и телес наших от источника жизни нашея Бога, Егоже родила еси, едина Благословенная.
39. Днесь пресветло красуется славнейший град Москва, имея чудотворную икону Владычицы нашея Богородицы, та бо, верным являющи чудеса, низпосылает дары целебныя. Сего ради и мы, с верою припадающе, молимся, и на Тоя пречистый образ взирающе, яко истинную Самую зрим Владычицу нашу Приснодеву Богородицу и умильно глаголем: воззри, Мати Божия, оком милости, простри к нам руце Твои пречистыя, якоже на иконе Твоей сие зрится, и подаждь всем скорбящим радость, больным от всех недугов исцеление и от бед избавление, яко Ты еси скорая Предстательница о душах наших.
40. Веселятся православнии народи, видяще, Владычице Дево Богородице, твою пречудную и чудотворную икону, и приемлют врачевство душевное и телесное Твоею милостию всегда. Темже и мы, поклоняющеся оней, усердно Тебе вопием: помилуй, Благая Мати, смиренныя рабы Твоя и избави нас от всякаго зла и навета вражия, молящи Сына Твоего, Господа Иисуса, да, спасшеся зде, небесное жительство получим человеколюбием и благодатию Его.
41. В небесныя обители преселившаяся с плотию, сущия на земли никакоже оставила еси, Богородице, образ божественный и многочудесный пречистаго лица Твоего зрети любящим Тя и поклонятися даровала еси. Яко знамение Твоея благодати, чтим его, лобызающе.
42. Дерзость ненавидящих образ Господень и держава нечестивых безбожно в Никею прииде, и посланнии безчеловечно вдовицу, благочестно чтущую икону Богоматере, истязуют, но тая нощию с сыном икону в море пусти, вопиющи: слава Тебе, Чистая, яко непроходимое море плещи своя подаде, слава правошествию Твоему, Едина Нетленная.
43. Не имамы песней, ниже словес, как достойно восхваляти Тя, Мати Христа Бога нашего, явления ради чудотворныя иконы Твоея земли Калужстей, томко можем вопити Тебе: не отврати милости Твоея от нас и низпосли ко всем притекающим к цельбоносней иконе Твоей.
44. Совозсия днесь свету Воскресения свет чистыя иконы Твоея, обоя весело торжествующе, вопием: сохрани раб Твоих благодатию, Владычица.
45. Дева днесь невидимо предстоит в церкви и с лики печерских отцев молится о нас, благоговейно величающих Ея безмерную милость к роду нашему, явльшуюся в чудном образе Ея, обитель Печерскую украшающем.
46. На водах Свислочи явилася еси, Пренепорочная Отроковице, от Царьграда и Киева богоспасаемому граду Минску милость показа, просвети нас, грешных, сиянием Своим, яви, яко присно, силу Твою, спаси нас предстательством Своим и избави от навет вражиих, Тя бо Необориму Стену и едину надежду имамы.
47. Душ наших чувствия очистивше, узрим на иконе таинство преславное, Творца вселенныя и Господа Вышних Сил, во объятиих держима и от сосцу Твоею, яко Младенца, питаема, и, со страхом и радостию поклоняющеся Тебе и рождшемуся от Тебе Спасу нашему, воззовем: радуйся, Владычице, Жизни нашея Питательнице.
48. Благодатию Твоею, Владычице, умягчи сердца злодеев, низпосли благодетелей, соблюдающи их от всякаго зла, благомолящимся Ти усердно пред честными иконами Твоими.
49. Иже в купине, огнем горящей и несгораемей, показавый Моисеови Пречистую Твою Матерь, Христе Боже, огнь Божества неопальне во чреве приимшую и нетленну по рождестве пребывшую, Тоя молитвами от пламене страстей избави нас и от огненных запалений град Твой сохрани, яко многомилостив.
50. Чудное и богоприятное светоноснаго зрака Твоего явление, Пречистая Дево, с верою взирающим бывает известное чаяние спасения, столпом бо огненным являющи предстательство, неусыпное и теплое за ны к Богу возсылаеши моление, имже страну Российскую от всяких бед избави, молимся, да радостными усты вопием Ти вси: радуйся, Предводительнице вечнаго блаженства.
51. Яко звезда светозаряющая, из Сербии на Афон чудесно прииде всечестная икона Твоя «Троеручица», юже обитель Хиландарская благоговейно восприемши, яко Божественный дар свыше, прославляет Тя, Владычицу, и умильно вопиет: не остави милость Твою от нас, но пребуди с нами во веки.
52. К Богородице со умилением припадем, вси грехми обремененнии, чудотворную Ее икону «Умиления» облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.
53. Юже подражая неплодную смоковницу, аз, окаянный, умиления плода отнюдь не приношу и посечения страшуся, но, взирая к чудотворней иконе Твоей «Умиление», Владычице, стеню от сердца и вопию: умилися, Благодатная, и мне, окамененному сердцем, благоволи подати душевное и телесное умиление.
54. Днесь светло красуется преименитый град Кострома и вся Русская страна, созывающи к веселию вся боголюбивыя народы христианския на преславное торжество Божия Матере, пришествия ради чудотворнаго Ея и многоцелебнаго образа. Днесь бо явися нам пресветлое великое солнце. Приидите, вси богоизбраннии людие, новый Израиль, ко источнику цельбоносному, источает бо нам неоскудныя милости Пресвятая Богородица и избавляет вся грады и страны христианския невредимы от всех навет вражних. Но, о Всемилостивая Госпоже Дево Богородице, Владычице, спаси страну нашу, и архиереи, и вся люди Твоего достояния от всех бед по велицей Твоей милости, да зовем Ти: радуйся, Дево, христиан похвало.
55. В преславнем явлении Твоем, Дево Богородице, припаде к стопам Твоим преподобный авва Сергий и мольбу о святей обители изрядно сотвори, да Твоим Матерним ко Христу предстательством усердно присно ходатайствуеши о всех под священный покров Твой прибегающих, просящи нам оставления грехов и велия милости.
56. Радуйся, Владычице, знамение милости Твоея нам являющая. Радуйся,
Благодатная, непрестанно за нас Христу молящаяся. Радуйся, Мати Божия Державная, Заступнице Усердная рода христианскаго.
57. Радуйся, Богородице Дево, Млекопитательнице, милостию Твоею нас присно питающая. Радуйся, Владычице Милостивая, в напастях скорая Заступнице. Радуйся, Любвеобильная, слезы сердец наших милостивно осушающая.
58. Радуйся, Благодатная, Купина Неопалимая, огненнаго запаления нас избавляющая. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое. Радуйся, Всеблагая Владычице, умиление и спасение наша.
59. Радуйся, Всеблагая Скоропослушнице, прошения наша во благо исполняющая. Радуйся, Мати Милосердия, страждущих от скорбей избавляющая. Радуйся, скорая Утешительнице и Целительнице, любовь Свою и милосердие нам являющая.
60. Радуйся, Богородице Одигитрие, христиан упование. Радуйся, похвало Почаевская и всего мира надеждо и утешение. Радуйся, Владычице, милость Свою нам и заступление являющая.
61. Радуйся, Премилосердная Владычице, предстательство наше и всерадостное заступление. Радуйся, грешным Споручнице, всегда о нас руце Свои в поручение Богу приносящая. Радуйся, Божия Мати, Невесто Нетленная, светлая наша Отрадо.
62. Радуйся, Пречистая, весь мир Рождеством Своим возвеселившая. Радуйся,
Матерь Божия, Предстательнице и Заступнице наша усердная. Радуйся, Обрадованная, во Успении Твоем нас не оставляющая.
63. Радуйся, Богоизбранная Отроковице, вхождением во храм двери райския нам отверзающая. Радуйся, Радосте наша, спаси нас от вечныя смерти преславным Твоим Рождеством. Радуйся, Благодатная, Господь с Тобою.
64. Радуйся, Избавительнице, от горя, бед и гибели спасающая нас, бедствующих. Радуйся, Помощнице наша, Троеручною иконою Твоею нам помогающая. Радуйся, Радосте наша, отраду и утешение верным дарующая.
65. Радуйся, Пресвятая Богородице Дево, Святой горы Афона и всея вселенныя православных обителей Всечестная
Игумения. Радуйся, Владычице, Неупиваемая Чаша, духовную жажду нашу утоляющая. Радуйся, Невесто Неневестная.
66. Радуйся, Радосте наша, во объятиях Своих Радость всего мира носившая. Радуйся, Солнца незаходимаго Мати, любовию Своею нас не оставляющая. Радуйся, Пречистая Дево, всемирная Славо и Радосте наша.
67. Радуйся, земли Холмския отрадо и всему миру прибежище и заступление. Радуйся, Пречудная Владычице, земли Муромския и Рязанския Милостивая Заступница. Радуйся, с верою молящихся пред честным образом Твоим от бед избавляющая.
68. Радуйся, Богородице, Стено Нерушимая, Заступнице наша и Утешение. Радуйся, Обрадованная, радость Твоего заступления всему миру дарующая. Радуйся, всем радостем Ты еси радость, Всеблаженная.
69. Радуйся, Богомати, в напастех Помощница скорая. О, Благодатная, помилуй нас и спаси и пачесолнечною теплотою любве Твоея грехми умерщвленный наш дух оживи. Радуйся, Живоносный Источниче, вся наша болезни исцеляющая.
70. Радуйся, Мати Дево, всепетая христиан похвало. Радуйся, Царице Преблагословенная, пределы Дальнероссийския земли милостию Своею не оставляющая. Радуйся, Пренепорочная Отроковице, градов наших Небесная Заступнице.
71. Радуйся, Пренепорочная Богородице Дево «Призри на смирение», с высоты небесной на смирение рабов Твоих призирающая. Радуйся, Богоматери величие и Приснодевы смирение в Себе сочетавшая. Радуйся, Мати Милосердия, Покровом Твоим нас не оставляющая.
72. Радуйся, Всемилостивая Владычице, премудрость и разум верным людям Твоим дарующая. Радуйся, Благая Воспитательнице, воспитанная во Святая святых. Радуйся, Мати Божия, Цвете Неувядаемый.
73. Радуйся, Пресвятая Богородице Дево, Печерская похвало и наше утешение. Радуйся, Владычице мира, иконою Твоею Песчанскою сердца наша утешающая. Радуйся, Мати Божия, и спаси на Тя уповающия.
74. Радуйся, Благодатное Небо, радость и спасение нам дарующая. Радуйся, Благодатная Богородице Дево, Всеблагая
Мати, взыскующая погибающих. Радуйся, Благодатная, с Тобою Господь, подаяй Тобою нам велию милость.
75. Не отврати от мене многия щедроты Твоя, не затвори утробу Твою человеколюбную, Чистая, но предстани ми ныне и в час судный помяни мя.
76. Тебе, Чистейшую Цареву палату, молю, Многопетая: ум мой очисти, оскверненный всякими грехами, и жилище красное Пребожественныя Троицы сотвори, яко да силу Твою и безмерную милость величаю, спасаемый, непотребный раб Твой.
77. Чудо превелие: како содержася Невместимый во чреве Твоем, и воплотися, и явися, яко человек, не претерпевый смешения или разделения Божественнаго и непреложнаго Божества,
Отроковице Всечистая: темже Богородицу Тя верно проповедуем присно и славим.
78. Никтоже притекаяй к Тебе посрамлен от Тебе исходит, Пречистая Богородице Дево, но просит благодати и приемлет дарование к полезному прошению.
79. Безпомощным крепость Ты воистину, Пресвятая Дево Мати, отсюду смиреннии Тобою возвышаемся, о Тебе высоце держимся: всем Ты еси покров и к Богу Ходатаица.
80. Мысленно прикасаяся Твоим стопам, Всенепорочная, молю Тя: приими рыдание мое, пение внуши и прегрешений разрешение подаждь ми, вопию Ти, молитвами Твоими, Дево, да любовию Тя величаю.
81. Паче естества Матерь и по естеству Деву, едину в женах благословенную, песньми вернии Богородицу величаем.
82. Благодарим Тя присно, Богородице, и величаем, Чистая, и поклоняемся, воспевающе Рождество Твое, Благодатная, вопиюще непрестанно: спаси нас, Дево Премилостивая, яко благая, в час испытания, да не посрамлени будем раби Твои.
83. Да Тебе вернии, «радуйся» зовем, Тобою радости причастницы бывше присносущныя; избави нас напастей, варварскаго пленения и всякия иныя раны, за множество, Отроковице, прегрешений находящия человеком согрешающим.
84. Дево Всенепорочная Марие, со Ангелом Хранителем моим прилежно Спаса моли даровати ми согрешений моих прощение и жития исправление, да Тя всегда, яко Матерь Божию, благодарственно величаю.
85. Владычице Дево Чистая и Препрославленная, с Предтечею Сына Твоего и Царя моли, от всякия нужды спасти верою Тя блажащия.
86. Простри длани Твоя, имиже всех Владыку яко Младенца прияла еси, за множество благости, не остави нас, всегда надеющихся на Тя, бодренною Твоею молитвою, и неизчетною простынею ущедри нас, и подаждь душам нашим милосердие Твое, во веки источающи, Тебе бо имамы грешнии Заступницу от находящих на ны бед и зол, но яко имущи милосердия щедроты, ускори на молитву и потщися на умоление, предстательствующи присно, Богородице, чтущих Тя.
87. Радуйся, Всеблагословенная Марие, из Тебе бо всеблагословенный Бог одеяся во всего мя человека и, одеявся, соедини Своему Божеству неизреченным соединением, Дево Одигитрие. Радуйся, Благодатная, Радосте всего мира.
88. Лето живота нашего прочее сохрани неврежденно, поможением Твоим, Дево Отроковице, и сподоби конец благий получити нам, воспевающим Тя и взывающим: радуйся, Всеблаженная Богородице Чистая, Одигитрие.
89. Преблагословенная Богородице, радуйся, яко еси Царя всех престол, Херувимов вышший, не закосни, моля Своего Сына и Бога нашего о чтущих Тя присно, с Николаем Блаженным.
90. Марие Госпоже, Мати Избавителя, приими мя, кающагося, и прибегающаго под кров Твой, яко да не престая вопию к Тебе: радуйся, Благодатная Богородице, Приснодево.
91. Царице, всех Царя рождшая и Носящаго всю тварь, спаси мя, величающаго Тя, Пресвятая Владычице.
92. Поем Тя, Благословенная, Чистая Дево, Еяже ради возсия нам сущим во тьме и сени смертней, Правды незаходимое Солнце, Ты бо еси со всеми святыми изрядная нашего спасения Ходатаица.
93. Велия и страшная есть тайна, Богомати, Твоего Рождества: Бога бо родила еси, Егоже смерть не претерпе и гроб не растли. Темже Тя, Пречистая, вси языцы славим.
94. Сладосте Ангелов, скорбящих радосте, христиан Предстательнице, Дево, Мати Господня, заступи нас и избави вечных мук.
95. Марие, Госпоже Богородице Безневестная, Надеждо верных, вражия возношения низложи, поющия же Тя возвесели.
96. Богородице Всепетая, Ты вся можеши у Превечнаго Сына Твоего, моли убо Его, яко Милосердая Мати, избавити ны от всех зол, да Тя непрестанно величаем.
97. Тебе и стену, и пристанище имамы, и Молитвенницу Благоприятную к Богу: Егоже родила еси, Богородице Безневестная, верных спасение.
98. От Девы возсиявый миру, Христе Боже, сыны света Тою показавый, помилуй нас.
99. Невесту Тя нарицаем, Пречистая, Отца Невидимаго и Матерь Сына, из Тебе Духом Святым воплощеннаго, и Молебницу Тя о пострадавших за Церковь Сына Твоего и Свое отечество предлагаем. Тебе бо Помощницу имамы земнии, и любовию поюще, Тя величаем.
100. Вси ублажаем Тя, Чистая, безсеменно бо родила еси плотию Бога и Царя Небеснаго.
Комментарии к книге «Тебе, Мати Бога нашего, хвалим», Николай С. Посадский
Всего 0 комментариев